Yeremia 9 - Eipomek

Yeremia birye, sik Israel nang ati, bico tenebukce, engebuk yupu

¹ Na patapnil ning ara, ani. ‘Na kisok noutam ara, mek weik deibuka langdiptua deice arye, na asing maka mek durupna deibikiba, balamle touk kipnutueʼ tenen, patapnile. Aning atonun, ‘Na asing maka, mek pu dobuka balamle atonun kipnutuba, pia engeptinyeba, na asing maka pia saktueʼ tenen, patapnile. Winiptopura, lukunyan talak babye, keting noutam talak babye nirya, malye kanye bobuka, engena dem uptinye. Ara talye ati kum engenune. Bukni, nun olana nang ara, yuk mutuku yu nang arye, na mutuku nang yupa weik akunum obuka, sirya dakaca ati engenune.

² Tonda, winibuka tenenye ning ara, ani. Nara, mek pia kumak ati, ninye kum unyak sukum, pia pata mutuku noutamuk, bisik ban nang tia mana ati, mitik aik doptinga babye, ato aik bena uptinyopura, telebe. Na mutuku nang unyak sukum arye batakuka, ninye kumak, pia pata mutuku noutam binuka utenirye, anggun ap, na ap neika elana kumce, ‘Na yuk uptinyeʼ tenen, patapnile. ‘Na mutuku nang nirya batakuka, pia pera bindoptinyeʼ tenen, nyapne. Deiyok ara, talye yupu nyabuka malye winin yala nang unyakce, sik deiyok-deiyok nang ati, ‘Sik yupu kum kekenamabe,’ nyabuka, anang batakikirye, teleb kibuka un nang ton, pia kum unyaka ati nyapne. Ara, sik ni Allah batakikirye, yuk malye bisikuk banyake. Sikce malye winin ninguk talibuka, wininyaka deice arye, winipmanto ara, sikda, ninye arye, sik akunum domice kilapu batakuka, yuk nang arye domice kilapu alubuka, ubula yolalamaka atonun nang unyaka ati, nyapne.

³ Sik abulubuka unyak nang arye, talye tilila yupu nyana ap, talye-talye kanye bobuka, malye weik winina ap, aninguk talibuka wininyakce, dipkoprob ning ton, pia kum wininyake. Sikce aning wininyaka deice arye, winipmanto ara, ninye arye, ‘Yuk nang opnuyap’ tenen, yin talibuka, mal olalal balamaka atonun wininyake. Amutuku nang nirya ara, teleb kibuka un ning deice arye, talibuka kum wininyake. Sik tilila yupu nyanyaka deice arye, amutuku noutam mikip weik nang akunum unyake. Sikce, diksukum winin ning ap, dipkoprob yupu nyana ap ara, pia min talibuka kum unyak bukni, malye winin ninguk talibuka, malyeuk pia winipnin banyake. Dipkoprob ning ara, sik amutuku nang ara, na Allah Yahweh ap, narye wininun ning ap ati, moubuka kum bikininyake.

⁴ Tonda, anggunce anggun kayapu nang ap, anggun dam unyak nang ap, anang arye wininamak ning ati, ‘Nun dam yasilyak’ tenen, moubuka kalikilamunce, unamlume. Aning nirya ati, ‘Diba, sikda teleb wininyake,’ pia kum tenenamlume. Deiyok ara, anggun kayapu koproba, tonok mun pum tam arye deiamsik nang unyak bukni, sikce nyapsikce yupu nirya ara, ‘Diba’ tenen, pia kum kekenamlume. Anggun kayapu nang koprop arye, tilila yupu uk tamultokirye, nyanyak nang unyaka ati nyapsine. Tonda, dipkoprob awinipmaliba kum eipmakce adiparyuk, talye yupu nyana ap, talye tilila nyana ap, ayupu nyalakirye, banyake.

⁵ Sik anang ara, tilila yupu boyanuka, sik mining dam unyak nang kekenak bakirye nyanyake. Anang nirya ara, tilila yupu uk nyanyake. Sik kan-kan noutam ara, tonoknye babye, dip yupu pia kum nyalule. Sikda, talye-talye yupu nyapnin banyaka ati, sik si bambol deice arye, nyanyak yupu ara, pia ati, talye tilila yupu uk nyanyaka ati, sik malye unyak ning ara, pia wininyaka ati, namin asa ubikirye, malye winin ning min kum batakmanto unyake.

⁶ Aning atonun, yuk nang ati, ikin ning, sik nong deice pia delinyake. Tonda, talye minin yupu deice arye, tilila yupu uk, pia nyanyake. Anang nirya arye, amalye winin ninguk, tuba-tuba wininyaka ati, anang nirya arye, na Allah Yahweh ati, ‘Elda, dipkoprob nun ni koproba Allah ulule,’ kum nyakirye, nati moubuka kum bikininyake.

⁷ Ati ara, nara Allah Yahweh, im deice yin talen malaikat nirya talipsirye, sik deiyoknye ununa ati, nara pia mikip weiknye unune. Narye ayupu ara, dipkoprob nyapsine. Dipkoprop narye na mapu koproba, sik Israel nang ati, ‘Teleb unamak do, kum do?’ tenen, ikin ning arepnamsina deice arye, sikti, winipdenamne. Winipmanto ara, ninye arye kat besi ning uku dongopmakiba, uku arye malye ning nirya diplirye, teleb ning wilamle touk, na Allah arye, na mapu ati, winipdenamne. Winipnyopura, sik malye ning kum daninbaliba, teleb winin ninguk laka upliba, diksukumuk unamake. Sikda, pia malye winin ninguk talibuka, tuba wininyaka ati, narye sik teleb winina ati, yata ning ton, winiptinye do? Kume, sik kanye arye teleb winina ati, ikin ning sik nong deice deipnirye, wenepnamna deice arye, sikti, asileninto upnamne.

⁸ Sik anang arye nyanyak yupu ara, ninye arye mal marabikiba, yuk nang obuka delamak touk, yupu nyalinyake. Sik amalye yupu nyanyak nang arye, nyanyak yupu ara, pia tilila yupu uk nyanyake. Sik anang arye, sik kayapu nang ap, sik mining dam unyak nang ap ati, ‘Nun yupu kekebikirye, nunti kanye deipnamsiak,’ tenebikirye, ‘Tenepce arye, teleb kibuka kekepnamakʼ tenen, yupu uk nyanyake. Bukni, dipkoprob sik kanye talima noutam ara, ‘Duknubikirye, anang opnamabe,’ tenenyake. Wininyaka deice arye, sik tilila yupu nyanyaka deice arye, wena webuka kalikilanyake.

⁹ Anang ara, pia malyeuk wininyaka ati ara, yata deiyok ati, narye amutuku nang, sik wenena ati, sik nong deice ikin ning kum deiptinye do? Kume, narye sik malye winin ning ati, sikce malye winilamice touk, narye tamubuka, kwang dakuka wenepnamne. Sik malye wininyak ning ati, dengna arepnamne. Na Allah Yahweh arye, akunum nyapmasina ati, aning ara dipkoprob winipnamne.

Allah arye, ‘Yerusalem mutuku ap, Yehuda tam nirya ap uluplopniba, asik oldemuk upnamle,’ nyabuk yupu

¹⁰ Allah arye, na Yeremia biti, ayupu laka nyapdeipnukba, narye nyapsine. “Na yupu kekenululum nang nirya ara, engenauk umunce, ngalukunamlume. Ara, anggun umunyak weik bukuk mutuku nirya ap, bai mutuku ap, luh mutuku noutam palamle maning ap, mutmuta ap nirya ati tenepmunce, engenamlume. Ara, Allah arye anggun wenena ati, amutuku nirya malye kipdeipnamle. Winiplyopura, yata mutuku nang do nirya, sikce amutuku-amutuku noutam ton, kum banamake. Tonda, amutuku noutam nirya ara, ninye arye weilamak ning, sapi basam yupu ton nyanmaliba, kum kekenamake. Tonda, amutuku noutam nirya ara, maka yala-yala nirya babye, bai tam ulamle kam ning yala-yala nirya babye, bai sakuka pia yukak bidobikiba, kum upnamle. Ati anggun nirya arye, anggun mutuku ati tenipmunce, engenamlume,” nyapsine.

¹¹ Allah Yahweh arye, ayupu ton nyapsuke. Anggun moubuka kekeplulume! Narye, anggun wenena ati, Yudea mutuku noutam nirya, ninye arye asik domikce ulamik mutuku nirya ara, uluplopniba, asik oldemuk upnamle. Ninye nirya wenepnirye, obuka sirya daknamna ati, amutuku noutam ton, pia kum unamake. Tonda, weik asik domik, Yerusalem mutuku babye, uluplopnirye, sice buklopnyopura, amutuku anyasik nirya ara, uluplopniba, tuku deice ara, keiluk upnamle. Tonda, amutuku noutam ninye nirya ara, kum kipdeipniba, ninye ton amutuku noutam kum ukcopura, bai tam ulamle yu kam arye, amutuku noutam yanuka, pia unamake,” Allah arye nyabuk.

¹² Nyabukura, na Yeremia birye, tamubuka Allah ati asipdese. “Se na nio, amutuku unyak nang nirya ati wenepnalam ning ap, amutuku-amutuku nirya, malye kipdeipnalam ning ap ara, yata nang arye, aning moubuka teneptingce, bikting do? Awinipnamle ning nirya ati, moubuka bikmantonye ton, aunmal do? Tonda, anda Allah Yahweh arye, awinipnalam ning ara, minop talak arye, yatanye biti laka nyaplumba, kekebukce, yanuka laka nyapsutuba, biktibye do? Yatanye birye, adeiyok ning ati, an Allah arye, amutuku-amutuku nirya, tuku malye kipdeipsiminba, pia oldemuk upnamle ning ara, laka nyapsutumura, biktibye do? Tuku malye uplyopura, tuku pum tam arye palamle ning nirya, kel-kel abuka sesal seplirye, koluplyopura, mek pia kumak, pata mutuku atonun upnamle ning ap, amutuku noutam ninye nirya ton, kum banamak ning ap, asik oldemuk upnamle ning ap ara, Allah ance yatanye biti akunum laka nyalamlumba, nunti yanuka laka nyapsutu do? Kume, ninye aryuk aning nirya, kum laka nyapsitinge.” Na Yeremia birye, Allah ati nyabuka asipdesiba, Allah Yahweh arye tamubuka nyapnuke.

¹³ Na Allah Yahweh arye nyapsine. “Amutuku nang wenepnirye, amutuku nirya malye kipdeipniba, pia malye mutuku uk upnamle ning deiyok ara, ani. Ara, na mapu Israel nang nirya arye, narye, ‘Aning ara, wininamlume. Aning ara, pia kum wininamlume,’ nyapdeipsise mem yupu nirya ara, sikce aning moubuka kum kekekirye, yaninyaka ati, sik unyak mutuku nirya, malye kipdeipnamne. Tonda, aning atonun narye, ‘Wininuna ara malye, telebe uka,’ nyabuka, laka nyalansise bukni, sikce na yupu kekebuka, kum talinikirye, diksukumuk pia kum unyaka ati, anang wenepnamsine. Narye, ‘Teleb umunce, abisikuk banamlume,’ nyalansise bukni, anggun Israel nang kekena kumce, ayupu nyamse touk, moubuka kum talinikirye, na nyalamse bisikuk kum dobolbanyake. Ati, sik unyakak mutuku-mutuku nirya, malye kipdeipnamne.

¹⁴ Tonda, sik Israel nang ara, mandipna arye, keil atonun kisok bobuka unyak nang ati, na nyalamse yupu nirya, yanibuka, sik kanye talima noutamuk patalye touk wininyake. Wininyaka ati, sik apu yapu nang arye, ‘Aisa el si erenamabe,’ nyabuka, malye weik winilamikce, ‘Anggun ton aning atonun, wininamlume,’ nyabuka, peterelamikba, sik wini talak unyak nang babye, isa Bahal, el siuk erebikirye, talye ninguk talibuka, malye winipnin banyake.

¹⁵ Israel nang arye, amalye winin ning nirya tuba-tuba wininyaka ati ara, na Allah Yahweh, im deice yin talin malaikat nirya, sik deiyoknye ununa ati, na mikip weiknye unune. Tonda, narye anggun Israel nang nirya, melibuka kaliklamsiba, sikce nati, ‘Nun ni ani,’ nyabuka, na siuk erelamnik. Naryuk ayupu nyapsine. Nara, Israel nang, na mapu koproba, sik malye wininyak ning ara, mikip deice arye wenepnamne. Winipmanto ara, anggun din ning ara, pia mitang ulamle ninguk arenamsine. Tonda, ninye dibina ati, pia yu mek, el si racun arepniba, dibikirye dibinamake. Akanye imun ning nirya ara, narye arepsiniba, ikin weik unamsile.

¹⁶ Dipkoprob anggun Israel nang ati, wenepnamsina ara, ani. Narye sik amutuku unyak nang ara, dobukapnirye, sik apu yapu nang babye, pia kum bikamik mutuku nang, yuk pera mutuku nang deice deipnamne. Ara, narye yuk pera mutuku nang ati, lo arepnyopura, anang arye, sik Israel nang dam yanuka obikirye, dobuka tapu koubikirye, sik yuk pera mutuku tamubuka bobinamake. Tonda, mal olan talak arye, ‘Se, nun nirya obuka, sice buklopnamsiak’ tenen, ilil weik upliba, bai sakuka bindobikirye, bokdanuka mutuku yuk-yuk balona ati, bikbik abuka banamake. Bukni, narye yin talin nang ton, tuba dobuka deipniba, Israel nang yuk pera mutuku dabinamak nang nirya ara, ninye on parang ya arye, obuka sirya daknamake. Ara, yin nang dopdeipniba, yanuka opnamaka ara, sik asa arye kum wininamake. Ara, Israel nang, sik wenena ati, na Allah arye mikip weik arepniba, adeice yuk mutuku yin talen nang arye, yanuka obuka sirya daknamake. Allah arye nyabuk.

Allah arye, Israel nang nirya wenepnamla ati, ‘Sik nirya engenamake,’ nyabuk yupu

¹⁷ Ura, Allah arye, ayupu ton nyabuk. Nara Allah Yahweh arye, im deice yin talin malaikat nirya, sik deiyoknye ununa ati, nara mikip weik ununye birye nyapsine. Narye, na mapu koproba ati nyapnusin yupu ara, kekepmunce, moubuka talipnamlume! Anggun wenena ati, narye arepsiniba, amutuku noutam wininamsil ning nirya ara, ikin weik unamla ati, anggunda pia kanye imun weik bobuka unamlume. Ati, anggunce, engena kel kilapu yukupnamlume. Yukupmunba, sik akilapu yakirye, kanye imun upliba, malye kanye bobikirye, malye nyabuka, dit nyakirye, pia weik tonun engenamake.

¹⁸ Yehuda yala kilapu, engena kel kilapu nyapmunba, minop yakirye, sik kanye imun upliba, malye nyabuka, dit nyana deice, weik tonun engebikiba, kekepmunce, adeice anggun babye kanye imun upsiliba, minop asing maka weik sakanamsile.

¹⁹ Weik tonun engenamluma ara, talye ati kum bukni, wini talak ara, Sion mutuku noutam arye, akunum deiyok koubuka engebikiba, kekelulume. Sik Sion mutuku unyak nang arye, imun kanye bobikirye, malye nyabuka, engebikirye, nyanamak yupu ara, ani. ‘Se, nun nirya kum kipdeipsiliba, nun asik oldemuk upsila ati, nun nirya ara, alye dakdanamabe. Deiyok ara, nun mal olan nang ara, sik pera mutuku nang arye yanuka opmasiakce, nun asik nirya ulubuka, sice buklopmasiake. Nun asik domupu ning nirya ara, akunum ulubuka, kum kipdeipmasiakce, sirya daknamsiaka ati, nun alye dakdanamabe. Nun unyap mutuku noutam nirya ara, adiparyuk batakuka bindopnamabe.’ Sik Sion mutuku unyak nang arye nyabuka nyanmak anyak, kekenmalume,” Allah arye nyabuk. Nyabukce, ayupu ton nyabuk.

²⁰ Se, anggun Israel yala kilapu, engena kel kilapu nirya ara, na Allah Yahweh arye nyapnusin yupu kekeplulume. Anggun kilapu nirya ati nyapsine. Na Allah Yahweh arye, nyapdeipnusin yupu uk kekepmunce, kanye imun upsiliba, engena deice, dit nyalulum ning ara, anggunce delilulum kilmapu ap, ton anggun kayapu yuk kilapu ap, imun kanye bobuka, dit nyaluluma ara, peterenamlume. Winipmunba, akilapu nirya arye dukdongobuka, adit nyapnin banamake. Ara, sik kanye imun uplye talak, amot uk nyanamaka ati, peterelanamlume.

²¹ Anggun kanye imun upsiliba, engebuka mot nyanamluma deiyok ara, ani. Ara, dibina deiyok ning ara, nun aik abilinga kin-kin bisik ap, aik abilinga noutam jendela botopdeibupu bisik kin-kin ap, abisik kin-kin nirya arye wekuka, ninye un dam yangalule. Ayangalul ning ara, talye kankan unyak nang, sik aik ap, weik ninye deiyok nang unyak aik, urasin pia teleb aik, istana nyanyak aik ap, akunum wekelyanamsile. Ninye yupa weik akunum dibinyaka ati, anggun mapu bisikak arye, bikbik abuka wininamak ning ap, tonda sik wel nang arye dengna ati, din ning deibikiba, ninye arye bulubuka, din ning dekenyakak ap, tuba kum yanganyake.

²² Aning nirya ara, na Allah Yahweh arye nyapmasina ati, anggun kekepmunce, laka nyapnamlume. Ara, sik yuk pera mutuku yu nang, lo arepniba yakirye, sikti, yanuka obikirye, sirya dakanamsiake. Yuk pera mutuku nang arye, yanuka obikiba, dipnamak nang ara, maning palamlak ton, tuku deice saknamake. Dibikirye, sakicopura, yuk nang arye, sik nong dobuka, ninye wein dam kum weilbinamake. Ninye pia weik tonun yanuka opnamaka ati, talye bama ning, talye mutuku donokolbalamak touk unamake. Ara, sikti, yu tenebuka, mal olan nang arye opnamak nang, sik nong ara, mining damuk, tuku deice bataknamake. Yuk nang arye yanuka, adipmakce nang, nong kum dobuka weilbinamake. Winipmanto ara, teikuka el bama lanyak ning, el si gandum duk doprobikirye, el yok ap, bama ap ara, mining dam bulakuka, talye batakikirye, tamubuka kum dololamak touk, wininamake. Ninye obikiba, dipnamak nang sik nong ara, talye kata sukumuk bataknamake. Kum weilbinamaka ati nyapsine. Aning ara, sik yuk mutuku yin talen nang arye, Israel nang pia weik tonun opsikiba, upnamle ning ati, laka nyapsine. Ati, anggunce anggun kayapu nang ati, adiparyuk, sik dam laka nyapnamlume. Allah arye nyabuk.

²³ Allah arye ayupu nyabukopura, ayupu ton dukdongobuka nyabuk. Nara Allah Yahweh arye, nyapsine. Sik kel weik bikamik nang arye, ‘E, nunda kel weik bikupu ati, nunda mambul weik nang,’ tenena kume. Winibuka tenebikirye, sik talima babye erebuka, kwalina kume. Tonda aning atonun, anggun mikip weik nang ara, “E, nunda mikip weik nang unyaba, ati, nunda mambul weike,” nyabuka, maknya kintina kume. Aning atonun, sik bona weik talin nang babye, ‘E, nunda aning-aning yala-yala nirya talinyabe. Tonda, bona weik talin nang unyabe. Tonda, nunda mambul weik nang unyabe,’ tenebuka, maknya kintina ap, kwalina ap, pia meme.

²⁴ Aning kum bukni, yata nang do nirya, sikce ‘E, mambul weik ning ani, mambul weiknye bira ani,’ tenenamak talak ara, sikce anyapnusin ninguk tenenamake. Tonda, tukwak mutuku, talye daulye ning nirya ati, ‘Aning ara, mambule,’ pia kum tenenamlume. Aning nirya kum bukni, anggunce na Allah Yahweh ati, diba tenepnulumce, na ap, na wininye ning ap, moubuka biknamnulum nang ara, angguncuk, ‘E, mambul weik ning ara, Allah Yahweh el uka,’ tenepmunce, aning deice aryuk, kanye pia delinamlume. Ara, anggunce na Allah ati, “E, Allah arye bico tenesilirye, elce, ‘Aning ara wininamlume, winipmunyopura, narye melisinirye, pia teleb kipdeipnamsine,’ nyabuka, nyalin yupu deice arye nyapdeipsuka deice arye, teleb kibuka melisulule. Elce winilye ning nirya ara, diksukum una ap, teleb ning winin deice aryuk, ninye yupu lipsisikuka bokosilirye, tuba-tuba melisulule,” nyaptingce, na si erepnitinge. Nara Allah Yahweh arye, anggunti pia bico tenesinirye, pia kum batakasunune. Narye, anggun tukwak mutuku sirya, im sirya nirya ululum nang ati, melisinye ning nirya ara, bico tenena ap, dip yupu nyana ap, malye winin ning pia kumce, diksukum winin deice arye melisunune. Tonda, na Allah arye, ateleb winin ning nirya ap, ‘Diksukum winin ning nirya ap ara, telebe uka’ tenen, na kanye delinune. Aning ara, na si Allah Yahweh arye ayupu nyapsine, nyabuk.

²⁵ Nyabukopura, ayupu ton dukdongobuka nyabuk. Nara, Allah Yahweh arye nyapsine. “Na dipkoprob nyapsine. Aminyan talak ara, sik tuba malyeuk wininyak nang nirya ati, weik tonun wenepnamsine. Sikda, yuk nang arye, nunti, ‘Allah el ‘Naʼ tenen nang unyake, ‘Tenenansiak’ tenen, min arye nyalamsise touk, anggun ninye den bol mouse tam sekelulum bukni, anggun talima noutam ara, malye winin ning, aupmasili buk winilulume. Aning atonun winilulum nang ara, aminyan talak anggun dengna dopropnalume.

²⁶ Tonda, narye, ‘Winina kume,’ nyapdeisise bukni, anggun amul dam kisok potong akunum koplirye, Mesir mutuku ap, Yudea mutuku ap, Edom mutuku ap, Amon mutuku yala nang ap, Moab mutuku noutam ululum nang ap ati, nyapsine. Tonda, anggun mek kum ati, ninye kum unyak mutuku bukni, pala weik pata mutuku noutam ululum nang arye, ‘Nun isa mer arye, kanye deipsiting’ tenen, anggun amul deice tam, kisok potong kolulum nang babye, anggun Israel nang yala nirya, amutuku noutam nirya ululum nang babye, anggun nirya ati, weik tonun wenepnamsine. Deiyok ara, anggunce, ‘Yuk nang arye nunti, ‘Allah el mapu koproba unyake, tenenansiak’ tenen, anggun mapu den bol mouse ning sekelulum bukni, dipkoprob anggun talima noutam ara, malye winin ning pia tuba upsuka ati, nyapsine. Aning atonun, anggun Israel yala nang nirya babye, anggun mapu den bol mouse ning sekelulum bukni, dipkoprob anggun talima noutam ara, malye winin ning pia tuba aupsukba, malye ululume. Anggun nirya ati, wenepnamsinarya, nyapsine.” Allah arye nyabuk.