Yeremia 51 - Eipomek

Sik Babel mutuku nang ati, ‘Allah arye ikin ning dobuka, sik deice deipnamle,’ nyabuk yupu

¹ Allah Yahweh arye nyabuk. Ara narye lo arepniba, yu weik yin talin nang arye, Babel mutuku tam unyak nang ati olyanganamake. Winipmanto ara, mikip weik kumanya weik tonun dopkwetepniba, kum doplirye, aning-aning nirya dakuka bataklamle touk, upnamle. Ara, ayu yin talin nang arye, Babel mutuku yakirye, amutuku noutam unyak nang nirya ap, Kasdim mutuku nirya ara, adiparyuk yanuka, obuka sice buklopnamake.

² Aning winipnamne talak bukni, narye yuk mutuku ninye asik nang ton, yupa weik wibuka dopkwetepniba, Babel mutuku noutam yanuka, olamikirye, pia sice buklopnamake. Winipmanto ara, gandum duk lanmakirye, el bama nirya labuka, batakmakce ning erebuka talibikiba, kumanya yalyopura, kum doplirye gandum duk bama nirya bobalamle touk, narye Babel mutuku nang ton winipnamne. Ara narye, ‘Kanye imun ning arepnamsine,’ tenepse sum, akunum dam uplyopura, yukupniba, yuk mutuku dana-dana tam unyak yin talin nang yakirye, Babel mutuku noutam unyak nang nirya ara, adiparyuk anang nirya obikirye, kum kipdeipnamake. Tonoknye babye, ton kum bataknamake.

³ Ati ara, sik Babel mutuku nang ona ati, dopdeipnamne ning ara, minopce adiparyuk yanuka opnamaka ati, sik Babel mutuku yin talin nang arye, lo pia kum ati, sik mal minopce kum dopmanto upnamake. Tonda, sik yin talin nang arye, ‘Nun mal olan nang arye, mal dobikiba, opsicakʼ tenen, besi ning arye memebikba, ongolamak baju ara, minopce kum ongopnamake. Tonda, sik Babel mutuku noutam wel nang nirya ara, sikti, olyanamak yu nang arye, onmakca ani batakikiba, tonoknye babye, kam ton pia kum unamake. Ati, sik Babel mutuku noutam unyak yin talin nang nirya ara, adiparyuk obuka, sice buklopnamake.

⁴ Obikce talak ara, sik Babel mutuku yin talin nang nirya ara, sik nong deice ara, dila pia weik ning, diamuk kipdeipniba, suse dilamlya ani, sik mutuku bisik dandanya noutam nirya, sakuka bikirye, poulbinuka dipnamake. Tonda, Babel mutuku yin nang nirya, amutuku noutam bisik banyak sukumuk, obikiba, sakikirye, dibinauk upnamake.

⁵ Ati ara, anggun kekeplulume! Nara, Allah Yahweh, im deice unyak yin talin malaikat nirya ara, sik deiyoknye ununa ati, mikip weik ununye birye nyapsine. Israel yala nang ap, Yehuda yala nang ap, sikce na Allah ati, si ereninyak Allah arye nyapsine. Na Allah arye, na mapu koproba, sik Israel nang ap, Yehuda yala nang ap ati, kum batakse. Tonda, aminyan talak babye, pia kum bataknamsine. Tonda, Israel yala nang nirya, sik talibuka unun Allah ara, malye un ning tonok ning babye, kum uniliba, Pia Lek Telebnye unune. Dipkoprob sik anang nirya arye, akunum malye-malye weik winilamikce, sik mutuku noutam nirya ara, pia malye winin ning weik aulul bukni, aupmalya babye, Israel yala nang pia kum bataknamne. Sik malye winilamik ning ati, dengna arepnirye, akunum wenebuka opnyopura, aminyan talak tamubuka, pia teleb kipdeipnamsine.

⁶ Ati ara, anggun Israel yala nang ap, Yehuda yala nang ap ara, Babel mutuku noutam tuba ululum nang ara, adiparyuk Babel mutuku batakuka, bikbik abuka bimunce, lyepdanamlume! Wini talak ara, amutuku batakmunce, adiparyuk, bikbik abuka bindopnamlume. Sik Babel yala nang, amutuku noutam unyak nang ara, na Allah ati malye-malye kipdeiamnike. Ati, narye anang opnamne talak, anggun Israel yala nang arye, ‘Nun babye ton opsilyakʼ tenen, anggun adiparyuk, bikbik abuka bindopnamlume! Aning ara, talye kum nyapsine. Deiyok ara ani. Wini talak Babel yala nang ara, sik malye ulamik nang, on sum akunum dam uple. Tonda, na Allah arye, sik wenena ati, kwang daknamne talak, akunum dam upmala ati, sik bidamang malye ulamik ning dengna ati, Babel mutuku nang nirya obuka sirya daknamne.

⁷ Winipmanto yupu ton nyapnusine. Ara, minop talak ara, ninye arye dengna weik ning, el si emas doprobikirye, kat makau el si cangkir memebuka delinyak mek makau pum tam arye, anggur mek kwebuka arebikiba, yuk nang arye dinmaca ani, sik kanye wanganyake. Atonun, sik Babel mutuku nang arye, malye-malye weik winilamik. Ara, kat mek makau atonun, ara Babel mutuku nang ulamik. Kanye wangalamak anggur mek, ara Babel nang arye, malye-malye weik winilamik ning ati, nyapne. Sik malye-malye weik winilamika deice arye, yuk-yuk mutuku nang yala-yala nirya ara, aning eibuka bikamikce, malye winilamikba, pia malye winin ninguk talibuka winilamik. Mutuku sirya, im sirya nirya unyak nang arye, yu mek dibikiba, kanye wangalamaka atonun ulamik. Winipmanto ara, mutuku sirya, im sirya nirya ulamik nang ara, Babel mutuku mek makau pum tam arye, yu anggur mek kwebuka dilamik. Winilamika ati, sik anang nirya ara, motona nang malye-malye weik winilamak touk, sik babye winilamik. Bukni, awinilamik ning deiyok ara, sik Babel mutuku nang aryuk winilamike.

⁸ Winilamik bukni, wini talak winipmanto ara, namin mek makau deiplobikiba, colamle atonun winipnamake. Ara, yuk mutuku yu nang arye, Babel mutuku nang, talye karin arye obikcopura, Babel nang ara, weik tonun dipnamake. Winipmanto ara, namin mek makau sakukaplirye, copliba donoklamak touk, Babel mutuku nang nirya opnamake. Ati ara, anggun Babel mutuku nang, pia weik dipnamaka ati, engenamlume. Tonda, Babel mutuku nang, sik weik suse dila ap, engena ap, sik suse dila kwetena ati, obat salep arye kwetepnamlume. Winipmunyopura, yatanye birye kel biktu do? Sik walwal bukni, na Allah arye, sik Babel mutuku nang ati, kwetebuka teleb kipdeipnamne do, kum do?

⁹ Yuk-yuk mutuku nang arye, Babel mutuku noutam unyak nang ati, ‘Se, sik Babel mutuku nang melina ati, kwetepnuyabʼ tenen, piripdepu bukni, kwetepmanto kum ubuka ati, nun akunum batakupu! Ati ara, pia teleb ning ara, sik Babel mutuku nang nirya ara, batakukabibirye, nun mutuku uk, tamubuka yuk-yuk bindopnamabe. Deiyok ara ani. Allah Yahweh arye, sik Babel mutuku nang ati, mikip weik arye wenelula ati, sik nirya obuka, sice buklopnamle. Aning ara, min kum kum danmanto ati, daupnamle.

¹⁰ Allah Yahweh arye, el mapu koproba, nun Israel yala nang ati, akunum lak kibuka, lak nyapmale. Ara elce, “Kume, na mapu koproba, sik Israel yala nang ara, teleb nanguk unyake. Sikda ‘Naʼ tenen nang, unyaka ati, sik Babel mutuku nang arye, sik nong deice weik ikin ning delilamik ning ara, wini talak anggun nong deice deipnusine,” nyapmale. Ati ara, nun Israel yala nang nirya, bulubibirye, tuba tamubuka, Yerusalem mutuku noutam bipyopura, nun si erenyap Allah, nun ni koproba Allah Yahweh ati, el siuk erenamabe. Ara, Allah Yahweh arye, pia mambul weik pil dolul ning ara, nukuka nyanamabe.

¹¹ Allah Yahweh arye, yuk-yuk mutuku noutam unyak, mikip weik ninye deiyok-deiyok nang, sik kanye talima noutam ara, pil akunum dobuka deice arye, sikce, ‘Ura, nun nirya bulubibirye, Babel mutuku binuka, sik Babel mutuku unyak nang nirya ara, obuka sice buklopnamabe! Ara, sik Media mutuku unyak nang taleamuk ninye deiyoknye ap, Media mutuku nirya talibuka ululnye ap, el yin talin nang arye, Babel mutuku nang olbinamle. Awinipnamle ning deiyok ara, Allah Yahweh arye, ‘Kume, sik Babel mutuku nang ara, pia malye winin ning weik ulya ati, sik wenena ati, wini talak, anang nirya obuka, sice buklopnamne. Tonda, sik Babel mutuku nang arye, na si eren aik ulubuka daklobika ati, wenepnamsine. Sik dengna ati, weik ikin ning sik nong deice deipnirye, sik nirya oplopnamne,’ akunum tenebuke. Ati ara, anggun yuk-yuk mutuku ululum yin talin nang arye, wini talak anggun adiparyuk, mal lupnamlume! Tonda, ninye olban talak, anggun taram dam lelina ati, delilulum kat ning, el si ara perisai babye, aning ton kintinip deipnamlume!

¹² Allah Yahweh arye, akunum tenebuka ara, ‘Babel mutuku nang obuka, sirya daknamne,’ tenebuk. Ati ara, anggun yuk-yuk mutuku yin talin nang arye, Babel mutuku nang cang weik keil arye domik keil poka dam binuka, bendera ikdeipnulyame. Ara, ‘Nunce Babel mutuku nang ati, olyanamapʼ tenen, laka kin ning ara, ninye on talak iklamlum bendera ton, ongonamlume. Tonda, anggun yin talin nang ara, tonap tabaknamlume. Winipmunce, anggunce nyamunyeba, Babel mutuku dana-dana tam domik keil poka dam tikikcak arye, kaliknamake. Tonda, ‘Babel mutuku bai tam nirya ara, duknupmunce, kintinipnalume. Ara, ‘Babel mutuku nang mangkau kanye bobuka, abisik bace talak ara, talye karin arye, opnamapʼ tenen, kintinipnamlume.

¹³ Allah Yahweh arye, sik Babel mutuku tam unyak nang ati, ayupu ton akunum nyapmale. “Anggunda, teleb mutuku noutam ara, bona utotoa weik nang ululume. Anggun mutuku dam ara, weik mek ton balule. Bukni, wini talak ara, anggun kam un talak ara, akunum sirya daknamsine. Narye, anggun kam una deiyok ning dopropnamsine. Winipnyopura, anggun nirya, adiparyuk dibinauk upnamlume.

¹⁴ Allah Yahweh im deice unyak yin talin malaikat nirya ara, sik deiyoknye ulula ati, elda pia mikip weik ulule. El si deice arye, anggunti nyalin yupu akunum nyabuk. Ara, “Babel mutuku nang olbana ati, yuk mutuku yin talin nang nukman kumto, yupa pia weik dobuka deipnamna ara, sul kwising nukman kumto yangalamaka atonun upnamake. Ayin nang dobuka deipnyopura, Babel mutuku olyakirye, sik Babel mutuku nang nirya obuka sirya dakikcopura, kanye deibikirye weik yupu deice arye, ‘Akunuma, Babel mutuku nang akunum obuka sice buklopmabe,’ nyanamake.

Allah Yahweh, el si erena ati, si erebuka kin mot nyanamaka ati, nyabuk yupu

¹⁵ Allah Yahweh, el mikip weik deice arye, atukwak mutuku nirya kwepdeibuk. Allah el kel weik deice arye, atukwak mutuku ara, urasin teleb kibuka kwepdeibukba, asukumuk aulule. Tonda, el kel weik ap, aning-aning nirya nong noutam kel bikilula deice aryuk, im tam ton kwepdebukce, amsuna kitcamikca yokuka tokolilamak touk, pala kipdeibuk.

¹⁶ Allah Yahweh arye, ‘Aning ara wininamlume,’ nyaplyopura, im tam arye, weik mek olamlirye, lelim nyalamle touk, lelim weik nyalule. Allah elcuk, tukwak mutuku dup arye, ‘Dua yatue,’ teneplye talak ara, dua yangalule. Winiplyopura, Allah elcuk nyapliba, weik mok celirye, bebeya laklamle touk ulule. Tonda, Allah arye kumanya dobuka deibukak arye, ‘Kumanya dopnule,’ teneplirye, dopdeiplye talak ara, kumanya mikip arye dolule.

¹⁷ Ninye tukwak unyak nang, yala-yala nirya ara, walwal nang atonun unyake. Nunda, pia moubuka tenina kum nang atonun unyabe. Ton nang arye, dengna kat weik ning, el si emas memebuka, delina kel nang arye, sik alye dakikirye, sik urasin ara, duknulonamake. Deiyok ara, sikce memenyak ning ara, ‘Aning ara, nun ni koproba arye melinamsilʼ tenen, talye ning, el si ara, patung berhala, memenyak bukni, aning ara, nong pia kum ninguk memenyake. Aning ara isin ap, kam una ap, pia kum ning buk memenyaka ati, atalye ning arye, pia kum melinamake.

¹⁸ Ninye taruk arye, talye memenyak ning ati, “Nun deiyoknye ani,” nyabuka, patung berhala si erenyak ning nirya ara, nong pia kum upnamle ati ara, pia kum melipsitinge. Aning nirya ara, moubuka tenena kume. Tonda kanye bona kume, walwal nang arye memebuka delinyak ning ati, Allah arye, ‘Asum akunum tenipnamle talak ara, atalye ning nirya, kum kipdeipnamle. Winiplyopura, sik atalye ning si erelamikce nang arye, ‘Se, aning ara, yata ati kum melipsuk do?’ tenen, malye nyabuka, ikin kanye bobuka unamake. Allah arye aning nirya ara, kum kipdeipnamle.

¹⁹ Bukni, nun Israel nang arye, si erenyap Allah ara, atalye ning atonun pia kum ulule. Allah Yahweh ara, pia dipkopropnye ulula ati, elce aning-aning nirya kwepdeiamukba aulule. Allah arye nun Israel nang ati, ‘Na mapu koproba unamlume,’ nyalin yupu deice arye nyalamsuke. Elda, Allah Yahweh, im deice unyak yin talin malaikat nirya, sik deiyoknye ulule. Elcuk, nun Israel yala nang nirya ati, akunum mince wibuka deiamsuke.

Allah arye domon yupu deice arye, sik Babel mutuku nang ati, nyabuk yupu

²⁰ Allah Yahweh arye, sik Babel mutuku ulamik nang ati, ayupu nyabuk. Ara, Anggunda, Babel mutuku noutam ululum nang ara, winipmanto ara, kat besi ning pakudakan ning, el si palu atonun ning, akunum kipdeipsise. Tonda, ninye olbana ati, na yin ap, na mal ap, atonun updeipsise. Winibuka nyapmasina deiyok ara, anggunda mutuku sirya, im sirya nirya unyak nang ati, yo nia dobuka, mal olan nang atonun kipdeipsise. Tonda, yata mutuku nang do, sikda ninye deiyok nang nirya ap, sikce talinyak nang ap, sik ninye onanye kipdeipsisiba, anggunce anang nirya obuka, sice bukuka bataklume.

²¹ Aning atonun, narye na mikip dobuka anggun deice deipsinyopura, anggun Babel mutuku nang arye, yuk mutuku nang olbalulum yin talin nang arye, sik kuda basam balye deice bukuka, olbanyak kuda basam nirya ara, akuda deice bukuka, olbanyak yin nang ara, sik Babel mutuku nang arye, aning nirya obuka, sice bultakan nang kipdeipsisa ati, opmunyeba kum danalinune. Atonun, ninye olbana ati, kuda basam arye libuka, tuku deice balamle ning, el si kereta perang ap, aning deice tikuka banyak yin nang nirya ara, lo arepsiseba, anggunce anang obuka, sice bultakan nang akunum ululume.

²² Narye anggun Babel mutuku nang ati, lo arepsiseba, yuk mutuku sal ap, kilapu ap on nang akunum kipdeipsise. Tonda, wisi nang ap, wel nang ap, mitik mapu ap, ninye dona kum kilapu ap nirya ara, ninye on nang akunum kipdeipsisiba ninye olulume.

²³ Atonun, narye anggunti, mikip ap, lo ap arepsiseba, anggunce domba basam weina deiyok nang ap, sikce weilamik domba basam ap, opmunce kum kilin nang kipdeipsise. Tonda, na mikip deice arye, sik Babel nang ati yuk mutuku wa winyak nang ap, sik wa wina ati, sik sapi basam tapu kirikdongbikirye, tapu lipdobikiba, wa wilul sapi basam nirya ara, opmunce, kum daneipnamlume. Tonda, narye lo arepsisiba, weik nang ap, ninye deiyoknye Gubenur ap, sik amu tam deiyok kibuka, pil melibuka donyak nang ara, opmunce, kum kipdeipnamlume. Aning-aning nirya ara, na Allah Yahweh arye, sik Babel mutuku nang ati, na mikip deice arye, lo arepsisiba, anggunce anang nirya olbalamlume.

Allah arye Babel mutuku nang, sik wenen ning deipnamle ati, nyabuk yupu

²⁴ Allah Yahweh arye nyabuk. “Ara narye Babel mutuku noutam unyak nang, sik malye weik winilamik touk, dengna ati opnamne ning ara, anggun babye biknamlume. Tonda, sik Kasdim mutuku ulamik nang aryuk, Yerusalem mutuku noutam ulamik nang ati, malye kililamikce, olamik. Sik Babel mutuku nang arye winilamika ati ara, sikti, wenepnirye opnamne. Na Allah Yahweh arye nyapmasina ati, aning ara dipkoprob nong upnamlarya!

²⁵ Se, anggun Babel mutuku nango, winipmanto ara, anggunda mutuku kon topsaklirye, mutuku sirya, im sirya nirya, sice bultakalamle touk ululume. Anggunce, tukwak mutuku noutam nirya, yuk-yuk mutuku nang, weik tonun akunum obuka, sirya daknamlume. Bukni, nara Allah Yahweh arye anggun deice yanipnamsine. Winipsinirye, anggun adiparyuk lipdopnamsine. Tonda bongop dongopsinirye, bataksiniba, uku arye dipsiliba, atu butbuta atonun upnamsile. Winipmanto ara, minop talak anggun Babel mutuku nang ara, weik tonun bukamuk mutuku ulamlum bukni, aminyan talak ara, weik uku arye mutuku kon Nirya dipliba, tokna pakuka saklirye, lu ulamle touk, na mikip weik deice arye, malye kipdeipsinirye, amu tamuk deipnamsine.

²⁶ Anggun weik keil aik dolamlum ning akunum uluplobicopura, aminyan talak ara, yuk nang arye akeil dobuka, tuba tonap, yuk teleb aik ton, pia kum dopnamake. Ara, ‘Aik mikip kipliba, pia aunamleʼ tenen, aik ayukumna iklamaka amu tam delin keil ap, aik abilinga kup-kup keil delina ap ati, sikce uluplopnamak keil aik ara, ninye arye ton, kum dobuka deipnamake. Aminyan doyanamle talak noutam nirya, sik mutuku ara, asik oldem upnamle, pia oldemuk upnamle. Sik mutuku ara, buta mutuku upliba, ninye kum unyak sukum atouk unamle. Ara, na Allah Yahweh arye, ayupu ara akunum nyapdeipmasina ati, aning ara, nong dipkoprob upnamlarya!

²⁷ Ati ara, anggun dana-dana mutuku noutam ululum nango, anggun yuk-yuk ninye yala nirya ara, anggunce ninye olban ning, el si bendera ara, memebuka kintiniplulume! Tonda, winipmunce, ‘Yin talin nang kintinibuka yanamakʼ tenen, lelim nyan ning, el si terompet dobuka, lelim nyapmunyopura, mutuku sirya, im sirya nirya unyak ninye kekepnamake! Kekebiceura, mutuku sirya, im sirya nirya unyak nang arye, Babel mutuku noutam unyak ninye ati, olbinamake! Sik dabu tam mutuku noutam talibuka unyak ninye deiyok nang nirya, kong nyapnalum mutuku deiyok nang ani. Ara Ararat mutuku ap, Mini mutuku ap, Askenas mutuku ap, amutuku deiyok talibuka unyak nang nirya ap, nyapminyeba, Babel mutuku nang olbinamake. Ati, Babel mutuku noutam ninye olbana ati, yin talin weik deiyoknye tonok wipdeipnamlume. Tonda, ninye olbana ati, balye deice bukuka banyak kuda basam ara, sul kwising pia weik tonun balamak atonun kibuka, dopdeipnamlume.

²⁸ Dopkwetepmunye ura, mutuku sirya, im sirya nirya arye, Babel mutuku noutam olbinamake. Tonda, weik pala mutuku, Media mutuku noutam ninye deiyok kibuka talibikce unyak nang, sik amu tam pil talibuka donyak deiyok-deiyok nang ap, Gubenur nang ap, Gubenur amu tam melibuka donyak nang ap, tonda, adeiyok-deiyok nang arye talinyak mutuku nirya, daunyak nang ap, ati, yukupmunyeba, sik nirya bulubikirye, Babel tam ninye ati, olyanganamake.

²⁹ Dana tam, dana tam yanganamak nang arye, lulukunamle talak ara, Babel mutuku nirya lokukaplirye, dou banamle. Ara, na Allah arye, Babel mutuku noutam malye mutuku kipdeipniba, ninye nirya tunim abuka unamake. Ati, narye tenepse talak, akunum uplyopura, Babel mutuku noutam nirya ara, oldemuk kipnamle. Ninye pia una kum sukum, buta mutuku oldem ulamle touk, upnamle.

³⁰ Narye nyapniba, sik dana-dana tam yin nang arye, Babel mutuku olbinamak talak ara, sik Babel mutuku noutam yin talin nang nirya ara, ilil weik upliba, tonap kum olyanamake. Sik talima daksakliba, ‘Ninye olan kanye kum bopnamake. Sikce nun opsicakʼ tenen, ‘Asukumuk dungnubuka unamabe,’ tenenamake. Winibikcopura, weik keil arye domik keil asik, el si ara benteng-benteng noutamuk dungnubuka unamake. Wininamak talak ara, sik alye una kum ning nirya ara, tunim apnamle. Winipliba, kanye moubuka tenen ning nirya ara, kum danamle. Ilil weik upliba, kilapu arye, mikip pia una kumce, mitang ulamle touk, yuk yin talin nang arye, kum opmanto upnamake. Winipnamak talak ara, sik aninye arye, domik asik wekelban bisik bublan dam arye, besi ning arye kintinip deibik bublan, el si pintu gerbang nirya ara, yuk nang arye, uluplopnamake. Tonda, sik asik nirya ara, uku dongobuka, asik malye kibuka daklopnamake.

³¹ Winipnamaka ati, ‘Seʼ tenen, yupu boyangan nang ton wipdeipyopura, yanganamak nang nirya ara, aminyan tam arye dukdongobuka, duknupdongobuka yakirye, Babel mutuku noutam talibuka ulul ninye deiyoknye biti, yanuka nyanamake. Ara, “Se, na nio, an mutuku noutam nirya ara, anggun mal olan nang arye, akunum dana-dana tam nirya olyakirye, an talilyam asik nirya ara, akunum obuka, sirya daknamake,” nyabuka, laka nyapnamkiake.

³² “Tonda, winibikirye, weik mek koubuka otam bana ati, bisik ban sukum nirya ara, sik olana ati yanamak nang arye, abisik nirya akunum kalikinya ati, nun tam nang babye kum binmanto unamabe. Aning atouk, nun mutuku noutam, weik mek kup-kup ak nirya ara, cang manmaning palul sukum nirya, uku akunum dongopmakba, uku arye dinmale. Ati, an yin talin nang nirya ara, ilil weik upmalba, ‘Se yata wiriptibye do?’ tenen, teninauk unmake.” Sik yupu laka nyalyangan nang arye, nyanamake.

³³ Allah arye ayupu ton nyabuk. Ati pia ouku una kumce, sik mal olan nang ara, minop yakirye, sik Babel mutuku nang nirya ara, adiparyuk obuka, sirya dakanamake. Tonda, sik mal olan nang aryuk, Babel nang obikirye, sik nong deice yanibuka sunuknamake. Winipmanto ara, gandum duk teikna sapi basam arye, yanibuka teiklamikiba, gandum bamadem, tukwak sakliba, talye daulamle touk, Babel mutuku nang nirya ati, obuka, sirya dakanamake. Ati ara, na Allah Yahweh, im deice unyak yin talin malaikat nirya, sik deiyoknye unune. Israel ninye ati melinun Allah ara, na ununa ati, sikce na si ereninyake. Nara, mikip weik ununye birye, ayupu akunum nyapdeipmasine.

³⁴ Aminyan talak ara, Yerusalem mutuku noutam nirya unyak nang arye nyanamake. “Se, sik Babel mutuku nang arye, nunti, adiparyuk malye kibuka, sice buklopmasiake. Tonda, Babel mutuku talibuka, ninye deiyoknye Raja Babel birye, obuka, sirya dakmasile. Winipmanto ara, weik laut pum tam ikan arye, mitik ikan obuka diplirye, sirya daklamle touk, nun Yerusalem mutuku ninye nirya, akunum obuka sirya dakmasile. Nun mutuku noutam teleb uamuk ning nirya, alubuka doprobukce, kum kipdeipmasile. Winipmanto ning ton, weik yu kam arye, pia weik ning arye, mitik kam ning obuka dilamle touk, Yerusalem mutuku nirya ara, kunum dipmasile. El mun pum tam arye, amutuku noutam teleb ning nirya ara, dopropnamle bukni, elce, ‘Na like, teneple ning ara, dukuka batakmasile.”

³⁵ Ati, Anggun Sion mutuku noutam ululum ninye ara, adiparyuk nyapnamlume, “Sik Babel mutuku noutam unyak nang arye, nun Sion mutuku ninye pia weik tonun olamsikba, nun ining ara, pia weik biyuke. Ati ara, nunce Allah ati, nyabuka moronyabe. ‘Naio, nun nong ap, ining ap ati, ance sik Babel tam ninye ati, opminyakarye, kwang daknalame,’ nyabuka, moropkiyabe!”

Allah Yahweh arye, “Israel ninye melipnamle,” ati, nyabuk yupu

³⁶ Ati ara, Allah Yahweh arye, sik Yerusalem mutuku ninye ati, nyabuk. “Narye pia dobuka, sik melibuka kwang dakna ati, sik Babel mutuku nang arye, anggun Yerusalem mutuku ninye olyangasinyaka ati, wini talak ara, sik Babel tam ninye ati, wenebuka opnamne. Winipnamne talak ara, sik Babel mutuku noutam dinyak mek pu ap, balamle weik mek nirya ap ara, adiparyuk cepdeipyopura, sisal lepnamle.

³⁷ Winipnyopura, sik Babel mutuku noutam ara, malye kibuka, sice buklopnyopura, asik oldem upnamle. Sik weik asik nirya, dakuka batakniba, sik domik asik keil nirya ara, tuku deice talye-talye deiplopniba, pia aupnamle. Narye, sik mutuku winibuka malye kipnyopura, bai tam kam ulamle kam arye, el duknun sukum kipdeipnamne. Winibuka deipnamne talak ara, sik Babel mutuku noutam unamle ning ara, yuk mutuku ninye arye, eibikirye, ‘Se, Allah arye, anang wenebuka obuka ara, weik mambuleʼ tenena ap, ilil una ap, unamle. Tonda, ninye tonoknye babye ton, amutuku noutam, pia kum unamake.

³⁸ Sik Babel mutuku nang arye, singa kus el din ning patapliba, yupu weik tonun, nyalamle atonun kibuka, malye bobuka, ngalukunamake. Tonda, singa kus arye, el mapu deiplirye, iribuka damamlya ani, din pataplyopura, yupu weik tonun nyalamle touk, nyanamake.

³⁹ Atalak ara sik pia din patanamle. Ati, narye sik dipnamak ati, weik kwalya ton kintinibuka delilbinamne. Winipnamne ning dibikceura, sik adiparyuk yu mek dibikiba, kanye wangalamak touk winipnamake. Tonda, sik kisok nirya ara, biribiri anmalya ati, mana dem unamake. Mapmaca ani, aminyan talak tonap kum bunamake. Na Allah Yahweh arye, ayupu akunum nyapmasina ati, dipkoprob nong upnamlarya!

⁴⁰ Ati, narye sik anang ati, winipnamne ning ara, yim domba basam mi ap, yim domba basam wisi domba basam ap, kambing basam ap, obuka boyakirye, libuka delilamak touk, kipdeipnamne. Allah arye nyabuk.

Aminyan talak, Babel mutuku ninye winipnamika ati, nyabuk yupu

⁴¹ Allah Yahweh arye, ayupu ton dukgobuka nyabuk. “Ara, mutuku sirya, im sirya nirya unyak nang arye, Babel mutuku ati, ‘Se, amutuku ara, pia teleb mutuku,’ nyabuka, si erelamik ning ara, tamubuka dopropnirye, malye kipnamne! Winipnyopura, sik Babel mutuku ara, yuk mutuku dana-dana nirya arye, Babel mutuku malye kipnamne ning eibikirye, ‘Se, Allah arye, Babel ninye weik yu arye wenebuka, obuka ara, weik mambule,’ tenen ap, ilil una ap, pia kum unamle.

⁴² Aning unamle talak ara, sik Babel mutuku nang, olyanamak yin nang, yupa pia weik tonun yanamake. Winipmanto ara, weik laut mekwen mek weleplirye, mikip weik kumanya pu abuka, laut mek kait weleplirye, kup-kup ning nirya, singnilamle touk kipnamle.

⁴³ Babel mutuku noutam nirya ara, minop talak weik asik domik bukni, anyasik nirya dakuka, sice buklopnyopura, yuk mutuku yala ninye nirya arye eibikirye, pia ilil weik unamle. Aminyan talak, apata mutuku atonun kipdeipnamne. Winipnyopura, amutuku noutam ara, ninye una ap, bisik bana ap ara, pia ton kum unamake. Amutuku ara, asik oldemuk unamle.

⁴⁴ Ati na Allah aryuk, sik Babel mutuku noutam ara, isa el si Bel, si erenyaka ati wenepnamne. Ati, sikce isa Bel el si erelamikce, yuk mutuku ninye talilamik ning nirya, alubuka dopromik ning nirya ara, tamubuka, sikce aning dobuka, yuk mutuku ninye ati, tuba tonap arenamake. Aning winipniba, sik mutuku sirya, im sirya nirya unyak nang arye, ‘Isa Bahal el si erepnamabʼ tenen, Babel mutuku yangalamik touk, tuba tonap kum yanganamake. Bel isa ati, batakicak arye, el si pia kum erenamake. Ati, sik Babel mutuku nang arye domik weik cang keil poka nirya ara, narye dakuka, sice buklopnamne. Nara, Allah arye, ayupu akunum nyapdeipne.

⁴⁵ Anya arye, se anggunda, na mapu koproba Israel yala nango! Babel mutuku noutam, tuba kam ululum nang arye, amutuku batakuka, bikbik abuka bindopnamlume! Nara Allah Yahweh arye, sik Babel mutuku ninye ati, yu weik unmanila ati, anang ara, weik tonun wenebuka opnamne. Ati, anggun na mapu koproba ara, lyepdamunce, bikbik abuka bindopnamlume. Babel mutuku nang nirya ara, weik tonun wenepnamne.

⁴⁶ Amutuku nirya wenepnamna ati, anggunda ilil pia kum upnamsile. Ura, atalak ara, ton asik nang arye, ton asik ninye ati, ‘Se, ikin ning yanamsileʼ nyabuka, engenmakirye, yupu nyalanauk unamak. Bukni, na mapu koproba, anggunce ayupu kekepmunyopura, ilil una meme. Ton keting tamun noutam ara, yuk yupu nyanamake. Ton keting tamun noutam ara, yuk talye yupu ton nyapdanamake. Ton talak ara, ‘Se, ton mutuku ninye deiyoknye birye, yuk mutuku talibuka, deiyoknye biti, olbinmale! Tonda, ton tam nang arye, yuk otam mutuku nang ati, “Olbenmake!” nyabuka, sik bidamnye kanye aryuk, talye yupu nyanamak bukni, anggunda na mapu koproba ara, ayupu pia kum kekenamlume. Aning ara, pia tenena kumce, talye unamlulume.

⁴⁷ Bukni, pia dipkoprob nyapsine. Na tenepnye talak, akunum yalyopura, sik Babel mutuku ninye ap, sikce talye ning isa ati, si erenyak ati, weik tonun wenebuka opnirye, sirya daknamne. Ikin ning akunum sik deice deipnamne talak dam akunum upmale. Winipniba, amutuku noutam unyak ninye nirya ara, alye dakdamake. Tonda, sik Babel mutuku noutam ulamik yin talin nang nirya ara, akunum opniba, sik mutuku koproba arye, bisik noutam danyuk sakikirye, anyakuk dipnamake.

⁴⁸ Aning nirya akunum winipnyopura, im deice ubuk ning nirya ap, tukwak mutuku sirya, im sirya nirya aubuk ning nirya ap ara, pia weik tonun kanye deibikirye, pin-pin kanye bobuka, weik yupu arye, ‘Telebe,” nyanamake. Ara, ‘Sik Babel mutuku noutam unmak nang opnamapʼ tenen, yanganamak nang ara, sik dabu tam mutuku nang arye olyanamake. Narye dobuka arepninyeba, anang arye yanuka, sik Babel mutuku ninye nirya, obuka malye kibikirye, sice buklopnamake.

⁴⁹ Mutuku sirya, im sirya nirya ulamik nang kan-kan noutam arye, sik Babel mutuku nang ara, pia weik arye olamikba dibilamik. Aninguk kum bukni, Babel mutuku yin talin nang arye, Israel yala nang yupa pia weik tonun olamikak, dibuka sirya dakmanto ubik. Aning ati ara, na Allah arye, sik Babel mutuku nang ati, wenebuka opnamne. Ara, oudapu mutuku tam arye, yuk mutuku yin talin nang arye yanuka, Babel mutuku tam unyak nang ati, obuka sirya daknamake. Na Allah Yahweh arye, akunum nyapdeipne.

Allah Yahweh arye, sik Israel nang ap, Babel mutuku nang ap ati, nyabuk yupu

⁵⁰ Allah Yahweh arye, sik Israel nang ati nyabuk. Anggun Israel nang, Babel mutuku noutam tuba kam ululum nang ati, nyapsine. Sik Babel mutuku yin talin nang arye, ninye ona ati parang ya bobuka, sik Israel nang yupa pia weik, akunum olamik bukni, anggun tuba kam unmalum nang ara, adiparyuk bikbik abuka bindopnamlume! Anggun Israel yala nang arye, ‘Malye, nunda aminyan talak binamabe,’ tenena pia meme. Wini talak arye, Babel mutuku batakuka, adiparyuk, bikbik abuka binululume. Anggunda, sik mutuku koproba noutam kum unamlum bukni, minopce, anggun mutuku koproba noutamuk umunce, na Allah atibuk, tenepnumunce, na siuk erenamnulume. Ara anggun ni koproba Allah Yahweh ap, Yerusalem mutuku ap atibuk, moubuka tenenamlume. Allah arye nyabuk.

⁵¹ Nyabukura, sik Israel yala nang arye, tamubuka nyabik. “Se, sik Babel mutuku nang arye, nunti, ‘Aning ara, nun pia like,’ tenyamsikce, nunti malye yupu weik nyalamsikba, alye dakdapu. Tonda, nun mutuku koproba nang kum bukni, yuk karin mutuku ninye asik nang arye, nun ni koproba Allah Yahweh, el si eren aik pum tam, anyaik noutam pia teleb lek aik nirya, talye luparabuka wekikce, malye kipdeibikirye, anyaik nirya uluplopsikba, nun Israel tam nang nirya ara, alye dakdaburye, engenauk ulamupu.” Sik Israel yala nang arye nyabik.

⁵² Nyabikba, Allah Yahweh arye, tamubuka nyabuk. “Wini talak ara, na Allah arye nyapnusin yupu ara, pia moubuka teniplulume. Ara, Babel mutuku nang arye, pia malye weik ulamik ati ara, sik dengna ati, aminyan talak ara, narye sik Babel mutuku nang arye, isa siuk erena ati, memebuka diamik patung nirya, ulubuka daklopnirye, sice buklopnamne. Babel mutuku nang wenen sum, akunum tenyamse ning ara, akunum dam upmala ati nyapne. Ati, narye yukupniba, yuk pera mutuku yu nang arye yanuka, Babel mutuku noutam unmace nang nirya ara, obikcopura, sik kanye imun weik suse dipliba, sikce, ‘Se, nunti, opmasiak dila ara, nun nong deice, weik suse uk weik arye lolonmasile,’ nyabuka engebikirye, ngalukunamake.

⁵³ Ura, na Allah arye dipkoprob nyapsine. Sik Babel mutuku nang arye, mikip weik uptinga babye, narye anang obuka, sirya daknamnarya! Aning atonun, sikce, sik weik asik dana-dana tam nirya, weik cang keil arye, keil poka dobuka deiptingba, im deice weleptua babye, na Allah arye, yuk karin mutuku nang ton, wibuka dopkwetepniba, sikce Babel mutuku asik nirya, dakaltaknauk ubikirye, Babel tam nang opnamake. Aning ara, na Allah Yahweh arye, akunum nyapdeipmana ati, aning ara, dipkoprob nong upnamlarya, nyapsine! Allah arye nyabuk.

Allah Yahweh arye, dukdongobuka, Babel mutuku malye kibuka, sice buklobikce, bataknamika ati, nyabuk yupu

⁵⁴ Allah Yahweh arye, ayupu tonap nyabuk. “Anggun nirya moubuka kekepnululume! Sik Babel mutuku noutam unyak nang arye, weik yupu deice arye ngalukna ap, bico uplyeba engena ap unamake. Deiyok ara, sik olana ati yanmak nang arye, sik mutuku noutam nirya obuka, sice bultakanmaka ati, weik lelim nyanmala ara, anggunda kekeplulume.

⁵⁵ Alelim kekenamaluma ara, na Allah Yahweh arye, sik Babel mutuku nang nirya ati, wenebuka opnirye, malye kibuka, sice buklopname! Winipmana deice arye, sik Babel mutuku nang ara, yupu pin-pin asa arye nyanamaka nirya ara, tunim apnamle. Yupu ton, pia kum nyanamake. Narye sik mutuku noutam nirya obuka, sice buklopnamna deice arye, weik lelim nyaplyeura, kekenamlulume. Winipmanto ara, mikip weik kumanya ara, mikip arye yalyeba, laut mekwen deice amek kait ara, weik arye weleplyeba, weik lelim nyalamle touk, Babel mutuku noutam arye, weik lelim nyapnamle ning ara, lake nyapnusine. Ara, narye lo arepnyeba, yuk mutuku yin talin nang nirya arye, Babel tam nang olyangana ati, weik arye yupu ngalukuka yakirye, olyanamak ning ara, nara awinipnya deice arye kekepnamlume.

⁵⁶ Alelim kekenamluma ara, talye ati kuma! Deiyok ara, na Allah arye, sik Babel tam nang malye weik winilamik ning wenena ati, yu weik upnilyeba, sikti, wenepnirye opnamne. Winipnamna ati, narye yukupnyeura, yuk karin mutuku yu nang arye, sik Babel mutuku nang nirya ara, sikti, dengna atonun arepnamne. Babel nang olan ati, yuk mutuku nang yakirye, Babel mutuku noutam nirya ara, ululopnamake. Winibikirye, Babel mutuku yin talin nang, ninye olan ati, weik kel nang nirya tomopnamake. Sik bopmakce yin nirya ara, bataklopnamake. Deiyok ara, na Allah Yahweh arye, sik malye-malye weik winilamikce, menenga arena ap, kwang dakna ap ati, sik nirya ati, wenepnirye, obuka sirya daknamne!

⁵⁷ Winipnamne talak ara, sik Babel mutuku noutam ara, ninye deiyok nang nirya talibuka unyak nang ap, weik kel bikin ning talibuka unyak nang ap, sik mutuku talina ati, ninye deiyok kibuka, Gubenur nang nirya ap, sik amu tam pil melibuka donyak deiyok nang ap, sik mutuku yin talin nang nirya ap, akunum opnyeura, tonap kam kum buknamake. Dibinauk upnamake. Winipmanto ara, ninye arye, kanye wangalamak yu mek arebikceba, yuk nang dibikirye, kanye nirya wangabikceba, malamak touk, winipnamake. Babel mutuku nang babye winipnamake. Yu mek dibikceba, anang mapmapcak ara, pia bukmanto kum arye malamak touk, sik Babel mutuku nang nirya opnyeura, dibinauk upnamake Aning nirya ara, na Allah arye, tukwak mutuku nirya talibuka, ninye deiyoknye Raja unune. Tonda, nara Allah Yahweh arye, im deice unyak yin talin malaikat nirya ara, sik deiyoknye ununa ati, nara mikip weiknye unirye, ayupu akunum nyapmasine. Ati, aning nirya ara, dipkoprob nong upnamlarya, nyapsine.” Allah arye nyabuk.

⁵⁸ Nyabukura, Allah Yahweh arye, im deice unyak malaikat nirya, sik deiyoknye ulirye, ayupu ton dukdongobuka nyabuk. “Sik Babel mutuku nang, mikip weik arye dobik cang keil poka, el si tembok-tembok nirya ara, na Allah arye, ulubuka daklopnirye, sice buklopnamne. Akeil poka nirya ara, pia ulubuka daklopnirye, tuku deiceuk deiplopnamne. Aning atonun, sik weik asik wekelban bisik, cang bublan, kat ning besi arye deibuka dobikba, weik arye welebuka ning, el si pintu gerbang nirya babye, uku dongobuka sirya daknamne. Winipnamne talak ara, yuk mutuku nang arye, ‘Babel tam uamuk ning nirya, kum kiplyak ati, nunce melipnamapʼ tenen, piripdekirye, weik ikin pil dolamik bukni, aning nirya ara, talye uka. Deiyok ara, na Allah aryuk, apil donyak ning nirya ap, sik mutuku uamuk ning nirya ap, uku dongopyeba, uku arye aning-aning nirya dibuka, sirya daknamle. Ati ara, na Allah Yahweh, im deice yin talin malaikat nirya, sik deiyoknye ununa ati, nara mikip weiknye birye, ayupu akunum nyapdeipmasina ati, dipkoprob nong upnamlarya!” Ayupu nirya ara, Allah Yahweh arye nyabukba, nabi Yeremia birye, ayupu sekeibuk.

Yeremia birye, Babel mutuku nang ati, laka nyapdeibuk yupu

⁵⁹ Yehuda tam taleamuk ninye deiyoknye, Raja Zedekia bira, Yehuda mutuku taleamuk, keting tamun dumbarye (4) akunum kibuk talak ara, el ap, yuknye ap, sik bitinye arye, Babel mutuku birik. Babel mutuku binuyuk talak ara, ninye si Seraya, el li birye deiamuknye, el si ara Neria ulamuk. Tonda Neria, el li koproba ara, Mahseia ulamuk. Seraya bira, Babel mutuku ninye deiyoknye Raja ati, el amu tam pil melinanye ulamuk. Ati ara, atalak Seraya ap, Raja Yudea Zedekia ap, neika melibukba, Babel mutuku birik. Winiprik talak ara, na nabi Yeremia birye, el Seraya biti, narye sekeipse yupu arepsirye, “Ayupu ara, Raja Babel dam arelbinulyame,” nyapdeipse.

⁶⁰ Ara, na Yeremia biti, Allah arye, ‘Winipnamne,’ nyapdeipnuk yupu ara, sik Babel mutuku noutam weik kanye imun ning yanamuk ning ati, laka nyapnukba, surat deice sekdeipse ning ara, Seraya biti arepse. ‘Babel mutuku ikin ning yanamle,’ nyabuka, surat deice sekeipse ning nirya ara, abuku kitibuka pum tamuk, laka nyabuka, sekeipse ning dobuka, Seraya biti arepse.

⁶¹ Arepse ning ara, na Yeremia birye, Seraya biti nyapse. “Ara, an Babel mutuku akunum biminyeura, pia piribukapmince, abuku noutam sekeipse ning nirya ara, batakna pia kumce, sik Babel mutuku noutam unyak nang nirya ara, sik kekenak arye, ayupu nirya yinipnulyame.

⁶² Aning nirya akunum yinipminyeura, ninye kekenmakcak, ayupu ton weik yupu arye nyapnamlyame. “Ara, Allah Yahweh, anda Babel mutuku noutam unyak nang nirya ati, ayupu akunum nyapdeipsulume. Sik Babel mutuku dam nirya ara, sik wenena ati, opnirye, sice bukuka bataknamne. Winipnye nang nirya ap, sikce talibuka weinyak kam ning nirya ap, pia kum daneipniba, pia tonok babye amutuku noutam ton, pia kum unamle. Tonda, amutuku noutam wamlye ning nirya ara, kum daneipniba, asik oldem unamle. Sik Babel mutuku sirya, im sirya, tukwak nirya, ninye pia kum upmantoak kipdeipnamne. Allah arye akunum nyapdeipsuke,’’ nyabuka, laka nyapnamlyame.

⁶³ Ati, ayupu akunum nyapminyeura, an Seraya birye, asekuka deipse buku noutam ara, sik amutuku nang kekenmacak arye, akunum yinipminyeura, abuku deice ara, keil dongobuka kitipnulyame. Winipminyopura, abuku ara, adiparyuk weik mek el si Efrat mek biyuka, noutamuk donoknulyame. Donokminyopura, amek arye abuku bobinamle.

⁶⁴ Winipminyeura, nyapnulyame, ‘Ara, anggun nirya moubuka eipmunce, biknamlume. Asurat donokmanba mek pum tam wekmal buk, weik mek arye bobanmal touk ubuka, anggun Babel mutuku nang nirya babye, winipnamle. Ati, amutuku noutam ululum nang ara, Allah Yahweh arye, kum kipdeipnamsile. Tonda winipnamsil talak ara, pia kum lukeipnamsile. Deiyok ara, Allah Yahweh, el yu ubuka, weik kanye imun ning, anggun deice deipnamsila ati, aminyan talak babye, tamubuka tonap, pia kum lyepdeipnamsile.’ Seraya ance, sik Babel mutuku nang kekenak arye, ayupu laka kibuka, nyapnamlyame.” Nabi Yeremia birye, Seraya biti nyabuk. Ura, nabi Yeremia birye sekdeibuk yupu ara, sirya akunum sekeibuk.