Yeremia 50 - Eipomek

Allah arye, Babel mutuku nang nirya wenebuka opnamla ati, nyabuk yupu

¹ Allah Yahweh arye, na Yeremia biti nyapdeipnuk yupu ara, ani. Babel mutuku ap, Babel mutuku noutam unyak nang arye, sik malye winilamik ning ati, ayupu nyapdeipnuk.

² Ara, tukwak mutuku im sirya, mutuku sirya nirya unyak nang, sik yala yuk-yuk nang nirya ara, ‘Sik ton kel biknamakʼ tenen, na nyapnukin yupu bobinuka, laka nyalbinamlyame! Tonda, Babel mutuku noutam awamuk ning nirya ara, amutuku unyak nang ap, Allah arye obuka sirya daknamle,’ nyabuka, laka nyan yupu ara, kum duknunamlyame. Ayupu uk, laka nyana ati, lak kin ning, el si spanduk sekuka erepdeipmince, lak sukumak deipminyeba, dana-dana tam unyak nang nirya eibikirye, bikinamake. Ara, ‘Yuk mutuku yin talin nang yakirye, Babel mutuku nirya ap, Babel tam umunye nang nirya ara, opsikiba, anggun nirya dipnamlume. Anggun isa kil, el si Bel, erenyak isa babye, alye weik dakdanamle,’ nyalbinamlame! Ati, aning ara dungnuna kume! ‘Anggun olyanamsiak nang arye, Babel nang arye, si erenyak isa kil, el si Merodak babye, anggun mal olan nang arye, aning dakuka, atu atonun buklopnamake. Tonda, aisa kil bukni, el si bitinye ning ara, dewa Bel, ninye urasin atonun kibuka deiamikce, si erenyak patung nirya ara, sik olyanamak nang arye, aning coplobikiba, yuk-yuk kipnamle. Ati ara, aisa kil Bel ap, el si erena ati, patung talinyak nang nirya ap, alye weik dakdanamake. Aisa atibuk, ‘Nun deiyok kil,’ nyabuka, si erenyak nang nirya ara, imun kanye bobuka ukirye, ‘Se, yata wiripnamsil do?’ tenen, teniltonamake. Dipkoprop aisa si erena deiyok ning nirya ara, sice buklopnamake.

³ Aning nirya ara, talye ati kum nyapsine. Na Allah arye winipnyopura, utara, dabu tam arye, tonok mutuku yu nang ton yakirye, Babel mutuku noutam nirya warikilyanamake. Warikikirye, Babel mutuku noutam ubuk ning nirya ara, kum kipdeibikcopura, sik mutuku babye, pia malye dem upnamle. Narye anggun mutuku nirya, malye kipdeipnyopura, anoutam nirya ara, ninye ap, talye kam ulye ning nirya ara, bikbik abuka bindopnamake. Tonda, amutuku noutam nirya ara, ton pia kum unamake. Amutuku nirya ol dem upnamle. Allah arye, “Yuk mutuku nang yukupniba, Babel mutuku yanuka, amutuku nirya ara, sice buklopnamake,” nyabukba, na Yeremia birye ayupu sekdeipse.

Allah arye Israel nang lobukaplirye, lyeplyopura, sikce Babel mutuku batakuka, sik mutuku tamubuka yanamaka ati, nyabuk yupu

⁴ Allah Yahweh arye, Yeremia biti nyabuk. Yuk mutuku nang arye, Babel mutuku nang nirya obicopura, anoutam arye, Israel yala nang ap, Yehuda yala nang ap, sik neika, sik mutuku koproba, tamubuka yakirye, engepnamake. Engebikirye, ‘Se, nun si erenyap Allah, el si Yahweh ara dan sukum ulul do? ‘Yata yupu nyapsiliba, kekebuka unamap do?’ tenen, sik mutuku tamubuka yakirye, na sik ni koproba Allah Yahweh ati, yanuka enamniake.

⁵ Sik anang ara, ‘Nun mutuku tamubuka binuyabʼ tenen, bisik banmakcak arye, aulamice nang ak, ‘Sion mutuku balamak bisik ara, dan sukum ubuk do? Anggun ton laka nyapsutum do?’ nyabuka, asipnamake. Asibikiba, ‘Sion mutuku balamak bisik ara, ani,’ nyabuka, laka nyabikcopura, sik Israel yala nang nirya ara, abisik eibikirye, abinamake. Winipnamak talak ara, sik anang arye, ‘Allah Yahweh ap, nun ap neika pia unamabeʼ tenen, narye, “Aning ara, wininamlume, aning ara pia kum wininamlume. Na yupu moubuka kekepnumunyopura, narye pia teleb kipdeipnamsine,” nyabuka, nyalin yupu deice arye, akunum nyapnyopura, anyapdeipnamne ning ara, sik anang arye, luba kum kipmanake. Sikce, ‘Diba ance nyapmasilam ning ara, pia moubuka talibibirye, wininamabe,’ nyabuka, nyalin yupu arye nyanamake.

⁶ Yata barye keting tamun deice arye, na mapu koproba ara, ‘Teleb bisik ara, ani. Dipkoprop winina ara, ani,’ tenen tenipmanto nang kum ulamik. Winipmanto yupu deice arye, domba basam talye dabatakamiki buk, ‘Nun binamap bisik ani,’ tenena kumce, talye banmakirye, wangaldalamaka atonun, na mapu sikda akunum wangaldalamike. Winilamika deiyok ara, Israel yala nang, sik deiyok arye talilamik talak nirya ara, ‘Teleb winina ara ani, malye winina ara, ani,’ nyana kumce, sik amu tam ulamik nang nirya ara, pia malye weik ulamik. Winipmanto ara, domba basam talibuka, weina deiyok nang arye, sik domba basam akunum batakiceba, teleb bisik batakuka, talye bai mutuku noutam, mangkau kanye bobuka, talye-talye balamikirye, amutuku kon omutuku kon, amutuku dup, omutuku dup ayanuka, obinuka yuk-yuk balanyaka atonun ulamik. Winilamika ati, sik Israel nang arye, ‘Nun binamaba ati, asik ara, asukumʼ tenen, pia moubuka bikina kumce, akunum lubakiamik Ara, na Allah dam ton kum yangalamnike.

⁷ Winilamika ani, sik ona ati, sik dana-dana tam ulamik yuk mutuku nang arye, Israel nang ati, olyangalamik. Tonda, ikin ning weik, sik nong deice delilamik. Ara, Israel yala nang ap, neika ulamik nang nirya arye, ikin ning dobuka, sik nong deice delilamik. Winilamikce, nyalamik. “Kume, Israel nang yanuka, talye onmaba ara, moubuka onmaba adano! Deiyok ara, sik ni koproba Allah Yahweh ati, ‘Nun like,’ tenelamikce, el yupu nirya, yanilamik. Allah elda, anggun ni koproba ulule. Allah Yahweh aryuk, anggunti lyepsutue! Tonda, anggun apu yapu nirya, diba tenyamikce, ‘Allah Yahweh, elcuk lyepsutue. Yuknye birye kumeʼ tenen, el deiceuk sik kanye delilamikce, el siuk erelamik. Ati ara, nun malye kuma. Deiyok ara, sik Israel nang nirya ara, Allah Yahweh ati, akunum batakamika arye, nyalamik.

⁸ Se, na mapu koproba, anggun Israel nang deiyok kibuka ululum nango, anggunda adiparyuk, Babel mutuku batakuka, bikbik abuka binamlume! Ati ara, angguncuk ninye deiyok nang atonun kibuka, menekmunce, bikbik abuka bamunyopura, sik yuk Israel nang ara, aminyan tam dobolyanganamsiake. Winipmanto ara, ‘Weik yim kambing arye, menekuka bakiba, sik yuk kambing basam nirya ara, sik aminyan tam dobolbalamak touk, upnamlumʼ tenen ati, nyapsine.

⁹ “Anggunda bikbik abuka bindopnamlume!” nyapmasina ara, talye ati kuma. Deiyok ara, na Allah arye, “Olbilulume” nyabuka, yukupniba, mutuku sirya, im sirya nirya arye, unyak mikip weik yin nang nirya ara, dabu tam arye, mikip kibikirye, Babel mutuku noutam olyanamake. Nyapnyopura, yuk-yuk yala nang nirya arye, yuk-yuk nebuka kintinibikirye, ‘Babel mutuku unyak nang nirya ara, ansinibuka neika bibirye, sikti, opnamapʼ tenen, Babel mutuku dam olyanamake. Ara, amutuku nang ap, amutuku uamuk ning ap, kum kilina ati binamake. Awibuka deipnamne kel weik yin nang nirya ara, tonok mal babye mentena kumce, anirya olkwetenauk unyak nang wipdeipniba, olyanamake.

¹⁰ Winibikcopura, Babel mutuku nang nirya obikiba, Babel mutuku noutam uamuk ning nirya ara, alubuka dopropnamake. Ara, sikce dopropnamaka ning ara, sik talima noutam arye, ‘Aning patapnila ati, talye parapkabuka doproptinye,’ tenen ning, ayala-yala nirya ara, dopropnamake. Akunum winibikcopura, ‘E, akunuma, nun tenebupu touk, akunum winipmap adano,’ tenebikirye, kanye deipnamake. Aning nirya ara, nara, Allah Yahweh arye, akunum nyapdeipmasina ati, aning nirya dipkoprob nong kunupnamle! Allah arye, ayupu nyapdeibukba, Yeremia birye sekuk.

Babel mutuku asik uku dapnamake,’’ nyabuk yupu

¹¹ Allah arye, ayupu ton nyabuk. Se anggun Babel mutuku nango, anggunda bicoe. Deiyok ara, anggunda na mapu koproba, ‘Naʼ tenyamse nang, sik Israel yala nang nirya ara, angguncuk oplumce, alubuka doproplum ning ara, ikin ning weik, anggun nong deice delilalume. Winiplum talak ara, sapi basam mi arye, bikbik abuka merkabang dolirye, kanye deibuka, maning kapu dam binuka dilamle touk, winilamlume. Aning atonun, anggunda yim basam kuda arye, teleb kanye boplirye, orbinuka, ayanuka, talye bikbik abuka balamle touk, winilamlume.

¹² Wini talak winilulum bukni, aminyan talak ara, anggun mutuku nang ap, yuk mutuku nang ap arye, ‘Se, sik Babel mutuku nang ara, pia malye weik ulamik,’ tenepsikirye, malye yupu nyapsikcopura, anggun mutuku koproba, tuba unamak nang nirya arye, alye weik dakdanamake. Ara, anggun mutuku nang bukni, ‘Se, nun lik,’ tenenamsiake. Winipmanto ara, kilapu arye, sik mapu deibikceba, aminyan talak, amapu pia malye-malye weik winibikcopura, sik nin yapu arye, ‘Se, yata ati do?’ tenenyakce, alye dakalalamak touk, aminyan talak, anggun mutuku nang arye, atonun tenenamsiake. Narye akunum wenepsinyopura, anggun Babel mutuku nang ara, pia amu tamuk dobuka deipnamsine. Anggun mutuku ara, pia pata mutuku uk upnamle. Mok pia kum celiba, amutuku tuku nirya, sisal leplyopura, ninye upmanto kumak, amutuku oldemuk upnamle. Winipnamla deiyok ara, na Allah arye winipnamne!

¹³ Anggun Babel mutuku nang arye, malye-malye weik winilamluma ati, na yu weik unulule. Aning ara, narye pia weik arye wenepsinyopura, anggun Babel mutuku nirya ara, sice buklopnirye, amutuku noutam ara, mutuku oldemuk upnamle. Ninye tonoknye ton amutuku kum unamle. Winipnamle talak ara, yuk mutuku nang do nirya, sik ton Babel mutuku dam bisik bakirye, sik mutuku eipnamak nang engebikcopura, ilil weik upliba, ‘Se,’ tenen, lukdanamake. Tonda, sik mutuku pia malye winipnamle ning ati, malye yupu arye nyanamsiake.

¹⁴ Na Allah arye, Babel mutuku nirya wenebuka dengna arepnamne ati, anggun mal dona pia kel weik nang ara, sik Babel mutuku nang ona ati, ninye warekil binamlume. Babel mutuku antanap dongobuka, pia moubuka diksukum umunce, kintinibuka tiknamlume. Winipmunyopura, Babel mutuku warikil bimunce, anggun ninye on mal nirya ara, bobanmamunya ani, Babel mutuku binuka dopnamlume. ‘Na mal tonok ning ton, ‘Naʼ tenen, deipnamane,’ pia tenena kume. Anggun dopnamlum mal nirya ara, bataknamlume. Winipmaluma deiyok ara, Babel mutuku nang nirya arye, na Allah Yahweh ap, na yupu ati, akunum pia malye kipdeipnikce, yanilamnike.

¹⁵ Tonda, Babel mutuku noutam antanap dongobuka domik asik noutam aupnamlye bukni, anyasik dana-dana tam nirya ara, weik yupu deice arye ngalukmunce, yupu nyanamlume. Ara, “Anggun nirya yanuka dilulume! Babel mutuku nang nirya, sik ona ati yanmakirye, Babel mutuku noutam nirya ara, akunum yanuka opnin yanganmabe! Winibipyopura, sik Babel mutuku tam nang nirya ara, pia mitang upliba, ‘Yata wiriptibye do, kuma?’ tenen, ilil upmalba, akunum batakmaka ati, nunce anggun mutuku alubuka dopropmabe! Sik mutuku dana-dana nirya, cang weik keil poka deibuka domik ning nirya ara, akunum dakuka batakmapce, sik asik nirya akunum uluplopmabe,” nyabuka weik yupu deice arye nyanamlume. Winipmunce, ayupu nyanamluma deiyok ara, ani. Ara, na Allah Yahweh arye, “Kume, anggun Babel mutuku nang nirya arye, minop talak yuk mutuku nang ati, yu arye malye wamik touk, na babye, sik dengna ati, aning atonun, narye sikti, akunum winipmance, kwang dakmane,” nyapsi.

¹⁶ Yuk mutuku ninye asik nang, Babel mutuku nang arye omikce, tapu koubuka, sik mutuku tamubuka boyanamikba, Babel mutuku noutam yanuka, wa wibuka, yala koun pil don nang ap, wa wiamikce ning nong upliba, aning labuka, lin pil don nang nirya ara, sik Babel mutuku obuka, sice buklopnamlum nang arye, aninye asik nang lopdeipnamlume. Lopdeipmunba, sik adiparyuk tamubuka, sik mutuku yuk-yuk bindopnamake. Yuk mutuku yin talin nang arye, sik Babel mutuku unyak nang ona ati, ninye on parang ya boyanamak nang ati, eibikirye, pia weik arye ilil upnamle. Ilil upliba, Babel mutuku unyak ninye asik nang nirya ara, tonok ton babye, amutuku noutam kum unamake. Wa wina ap, yala kouna ap, nong wisipliba lina ap, pil dolamik nang nirya ara, sik mutuku tamubuka bikbik abuka bindopnamake. Ati ara, ‘Naʼ tenen, nang, sik Israel yala nang babye, sik mutuku uk, tamubuka binamake. Allah arye nyabuk.

Allah ara, nyalin yupu deice arye, ‘Israel nang ara, tamubuka teleb kipdeipnamne,’ nyabuk yupu

¹⁷ Allah arye nyabuk. Winipmanto ara, anggun Israel nang nirya ara, domba basam ding tonok ulamik bukni, bai tam ulamle yu kam, el si singa arye, doplamukba, dabinuka wangapdanamik touk, ulamika ani, wini talak ara, yuk-yuk mutuku bindomika ati, yuk-yuk mutuku noutam arye daunyake. Aning atonun, min talak ara, Asyur mutuku taleamuk ninye deiyoknye Raja arye, minop deiyok kibuka, Israel nang dam yanuka, obukce dobolbinamuk. Winilamuka ani, dotalak ara, Babel mutuku taleamuka deiyoknye, Raja Nebukadnesar bira, elce aminyan talak, Israel nang nirya omukce, taleamuk. Winipmanto ara, Nebukadnesar bira, yu singa arye, yuk kam ning oplirye, tup diplyopura, aminyan talak aning yok nirya ara, si tolamle touk, ulamuk.

¹⁸ Aning ara, Na Allah Yahweh, im deice unyak yin talin malaikat nirya, sik deiyoknye ununa ati, na mikip weiknye ununba, sik Israel yala nang arye, nati, ‘Nun ni Allah,’ nyabuka, na siuk ereninyake. Narye ayupu nyapsine. Israel yala nang, sik deiyok Allah, narye, Babel mutuku ninye deiyoknye, Raja Nebukadnesar biti, mikip arye wenebuka opnamne. Ara, minop talak ninye deiyok kibuka, Asyur mutuku talamuknye biti, weik tonun wenebuka, el nong deice, ikin ning deiamse touk, Raja Babel bira, atonun winipnamne.

¹⁹ Winipnyopura, na Allah arye, sik Israel yala nang nirya ara, tuba tamubuka, sik mutuku koproba boyanuka deipnirye, teleb kipdeipnyeba, pia telebuk unamake. Winipnamak talak, sik din dinamaka ara, mutuku si Karmel mutuku ap, Basan mutuku ap aryuk, wa wibikiba, nong uplye ninguk, boyanuka dinamake. Aning atonun, tonda mutuku kon uamuk noutam ara, Efraim mutuku ap, Gilead mutuku ap aryuk, wa wibuka koubikiba, nong uplirye, wisipnamle ninguk, boyanuka dinamake. Sikce, ‘Se, aning ara, winibuka diptinyeʼ tenen, pataplye touk, sik din weik tonun dibikiba, boupnamle!

²⁰ Winipnamne talak ara, anggun Israel yala nang ap, Yehuda yala nang ap, nirya ara, adiparyuk, sik malye winilamik ning nirya ara, kum kipdeiplirye, teleb nanguk unamake. Malye ning talibuka wininyak nang ton, amutuku noutam, pia kum unamake. Deiyok ara, Israel nang, yuk-yuk ning weik tonun wenebuka opnamne bukni, aminyan sirya talak ara, narye, ‘Sik anang yupa winibuka, lyepdopnamne,’ tenyamse touk, dobuka lyepniba, tuba kam unamaka ara, sik yupa mitik tonun bukni, sik malye wininyak ning nirya, namin kipnirye, kum kipdeipnamne. Ati, nara Allah Yahweh arye, ayupu akunum nyapmasine. Allah arye nyabuk.

Babel mutuku nang, sik deice ikin ning deipnamle ning ati, nyabuk yupu

²¹ Na Allah Yahweh arye, yukupniba, Babel mutuku nang olbinamak nang ati nyapsine. Anggunce, Babel mutuku noutam bukni, mutuku si Merataim mutuku ap, Pekod mutuku ap ara, anggun ona ati, binuka warekmunce, adiparyuk olbinamlume. Anang arye, ‘Se, sik opsikcakʼ tenen, bai sakuka bindobikca babye, sikce batakna kumce, anggun ton bikbik abuka bimunce, amutuku nang nirya, adiparyuk oplopnamlume. Sik nirya obuka, kum kipdeipnamlume. Ara, na Allah arye, ‘Anggun Babel mutuku nang olbinamlume,’ nyabuka, akunum nyapdeipmase touk, anggunce aninguk adiparyuk winibuka winipnamlume. Ati nara, Allah Yahweh arye, akunum nyapne.”

²² Anggun Babel mutuku noutam binuka, anang opnamlum talak nirya ara, ninye olyangana ati lelim ara, weik tonun nyapnamlum bukni, amutuku nang arye kekenamake. Sik mutuku noutam wamlye ning nirya ara, sice buklopnamlume. Tonok ning babye, kum bataknamlume.

²³ Ura, min talak ara, Babel mutuku ulamik yin talin nang arye, yuk-yuk mutuku nirya ulamik nang ati, talye parapkabuka oltaklamik. Winipmanto ara, ninye arye, pakudakna ati, el si ara martalok, pakudaklamak touk, Babel nang arye, yuk mutuku nang nirya obuka, malye kibuka bataklamik. Bukni, min dakamik martalok atonun ulamik nang ara, sik martalok akunum bulaklopmake! Ati ara, wini talak ara, mutuku sirya, im sirya unyak nang nirya arye, Babel mutuku sik wenena ati, Allah arye winibuk ning kekebikcopura, ilil weik upliba, lukulanyake. Tonda, aminyan doupnamle talak babye, ilil upliba, lukulanauk unamake.

²⁴ Se, anggun Babel mutuku ulamlum nango. Anggunda bicoe! Na Allah arye, “Ura, anggun Babel mutuku nang ara, na yupu akunum yanininyaka ati, wininyaka deice arye, anggun dengna ning, wenebuka arepnamsine,’ tenyamse. Winipmanto ara, ninye arye sik babye, wena wepmakca pum bisik, mana wekelbikceba youlamle touk, sik mangkau kanye arye, dabinuka wena wepmakca wekuka olalamak touk, narye anggunti, tapu weamsise ning ara, akunum wekuka youpdongopdalume. Aning ara, anggunce pia moubuka kum tenyamlum bukni, narye anggunti, wenen ning akunum kintinip deipsise ning ara, anggun nong deice akunum yanmale!

²⁵ Ati, na Allah arye, na yin ap, mal ap, parang ya ap, topnong ap, delina ati kintinibuka domse asik ara, bublan akunum kuklopmane. Ara, na pia yu weik deice arye, anyasik pum tam noutam deiamse ninye on ning nirya ara, adiparyuk dobuka dopkwetepnamake. Anggunda, obuka sirya daknamsine. Deiyok ara, na Allah Yahweh, im deice unyak yin talin malaikat nirya, sik deiyoknye ununa ati, na mikip ara pia weik unulule. Tonda, aning-aning talibuka, mikip weik ununa ati, na tenenye touk unune. Narye, sik Babel mutuku noutam ara, mambul pil weik tonun donamne. Ara, anggun amutuku noutam nirya ululum nang ati, wenepsinirye, dengna arepnamsina ati, nyapmasine.

²⁶ Aning ara, narye yukupsiniba, Babel mutuku nang olyanamlum nang ara, moubuka kekepnululume! Sik Babel mutuku nang nirya ona ati, mutuku dana-dana tam nirya arye, olyanamlume. Winipmunyopura, Babel mutuku noutam unyak nang arye, sik din deiamikce aik pum tam nirya ara, bublan kuklopnamlume! Akuklopmunce, sikce deiamik gandum do, yuk yala ning do, ubula alubuka dopropmunce, tonokakuk, bulubuka deipnamlume! Sik Babel mutuku noutam domik asik nirya ap, yuk awamuk ning nirya ap, sice buklopnamlume. Tonok mitik tonun babye, ton pia kum bataknamlume. Sik asik nirya ulubuka batakmunyopura, akeil nirya bulubuka, tonokakuk deipnamlume.

²⁷ Winipmunyopura, sik amutuku yin talin nang nirya ara, adiparyuk obuka, sirya daknamlume! Min talak ara, weik yim sapi basam, mikip weik ulamle touk ulamik bukni, wini talak ara, ayin nang nirya opmunce, anang nirya ara, kum kipdeipnamlume. Ura, sik Babel mutuku yin talin nang nirya ara, bicoe! Sik wenebuka ona sum, akunum dam upmala ati, anggunce adiparyuk opmunce, kum daneipnamlume!

²⁸ Anggun daunamlum nang mutuku sirya, im sirya nirya ululum nang nirya kekeplulume! Sik Babel mutuku nang arye tomobuka bobinamik Israel yala nang ara, atalak arye deiyok koubuka, Babel mutuku batakuka, Yerusalem mutuku noutam tamubuka yanganamake. Sikce Yerusalem mutuku yanamak nang arye, nyanamak ning ara, ani. Ara, “Nunce si erenyap Allah, nun ni koproba Allah Yahweh arye, sik Babel mutuku nang ara, wenebuka opnamle. Ura, sik malye winilamik ning ati, kwang daknamne! Tonda, sik Babel mutuku nang arye minop talak, nun ni koproba Allah Yahweh, el si eren aik ara, akunum ulubuka, sice buklomika ati, kwang daknamle,” nyabuka, weik yupu arye nyanamake!

²⁹ Aning ara, yata yin talin nang arye do nirya, Babel mutuku nang, sik ona ati, mal don nang kintinipmunce, Babel mutuku nang ati, mal pibinamlume. Sik ona ati, nyapnamlume. “Babel mutuku nang tonoknye ton, pia kum bai sakuka binamlume. ‘Winibikcakʼ tenen, adiparyuk, Babel mutuku nirya antanap dongopmunce, wariknamlume. Ara, sik Babel mutuku nang nirya arye, mandipna kanye bobuka, maknya kintinilamikce, na Allah ati, ‘El nyalul yupu ara, pia kum kekenamabe. El ti yaniltaknauk wininamabe,’ nyabuka, malye kilininyake. Babel mutuku nang arye, malye-malye weik winilamik touk, narye ikin ning boyanuka, anggun dam wenepnamsine. Ayupu ara, Israel nang, sikce si ereninyaknye, anggun ni koproba Allah Yahweh unune. Nara, malye un ning, pia kum upmanilba, pia teleb, lek dem ununye birye, nara Allah arye nyapsine. Israel yala nang, anggun ni koproba Allah arye nyapsine.

³⁰ Aning ati ara, atalak noutam ara, sik Babel mutuku wel nang nirya ara, adiparyuk obikiba, amutuku bisik banyak noutamuk dipnamake. Tonda, amutuku yin talin nang nirya ara, obuka sice bultakanauk upnamake.

³¹ Tonda, anggun Babel mutuku ululum nang nirya ara, talima erepdanuka ulamlumce, kwalin nanguk ululuma ati, na Allah Yahweh arye, anggunti wenebuka opnamsine. Ati na Allah arye, anggunti wenepnamsin talak ara, akunum dam upmasile. Nara Allah Yahweh, aning-aning nirya talibuka, deice tam unirye, na tenenun ning nirya ara, dipkoprob unune. Nara im deice unyak yin talin malaikat nirya, sik deiyoknye ununa ati, nara Pia Mikip Weiknye unirye nyapmasina ati, aning nirya ara, dipkoprob nong kunupnamle!

³² An mutuku noutam unyak nang nirya ara, sik talima eren nanguk unyaka ati, narye wenepnamsin talak ara, anggun yan ara, keil yan dum duksiliba, saknamlume. Atalak ara, ninye yuk nang arye ton, ‘Bicoʼ tenen, melipsikirye, tamubuka, kum bukdeipnamsiake. Anggun ti wenepnamsin talak ara, anggun amutuku-amutuku noutam nirya ara, anggunce domlum asik nirya, uku dinipdongopniba, uku diplyopura, anggun mutuku uamuk ning nirya sirya daknamne. Winipnirye, amutuku noutam awamuk ning yuk-yuk ning nirya ap, anggun mutuku nang ap ara, adiparyuk kum daneipnamne.

³³ Nara, Allah Yahweh, im deice unyak yin talin malaikat nirya, sik deiyoknye ununa ati, nara Pia Mikip Weiknye unirye nyapsine. Ara, anggun Israel nang ap, sik Yehuda mutuku noutam unyak nang ap, nirya ara, Babel mutuku nang arye, ikin ning sik deice deibikiba, ikin weik uplya ati, mambul kanye bonyake. Sik Israel nang ap, Yehuda mutuku nang ati, Babel mutuku nang arye obikce, tapu koubuka, sik mutuku tamubuka bobinamikce, wini talak ara, tuba talibuka unyake. Mikip weik arye kalikinyak nang arye nyanyake, “Kume, sik Israel yala nang ara, pia kum lopdeipnamabe. Sikce nun mutuku kum batakuka binamake,” nyanyake.

³⁴ Bukni, Israel yala nang nirya ara, na Allah ara, sik melibuka lyena deiyoknye unune. Na Allah ara, sik Lyena Deiyoknye, pia mikip weiknye unune. Ati ara, na si bitinye ton, Allah Yahweh, im deice yin talin malaikat nirya, sik deiyoknye ulula ati, elda pia mikip weiknye nyabuka nyaninyake. Ati ara, na Allah dem aryuk, anggun lyena ati, pia pi dobuka melinamsine. Tonda, Israel nang lopdeipnyopura, sikce sik mutuku koproba tamubuka bikirye, talye kanye deibuka, telebuk unamake. Olana kumce, tunim abuka unamake. Bukni, sik Babel mutuku unyak nang nirya ara, sik deice ara, olan ning ap, ilil un ning ap, imun kanye bon ning ap, sik deice deipnamne.

³⁵ Ati, na Allah Yahweh arye, “Anggunda, Babel nang ati, mal pibinamlume,” nyapnyopura, yuk-yuk mutuku yu nang kekebikirye, sik ninye on parang ya dobuka, Babel mutuku nang ati, olyanamake. Tonda, Babel mutuku noutam unyak Kasdim yala nang ap, amutuku talibuka, deiyok yuk-yuk kibuka, yupu deiyok nyanyak nang ap, sik mutuku weik tonun, kel bikamik nang ap, sik nirya ati, olyanamake!

³⁶ Aning atonun, sik Babel mutuku noutam, talye yupu uk nyanyak nabi-nabi atonun nang nirya ati, narye nyapyeba, yuk mutuku yu nang arye, ninye on parang ya bobuka, olyanamake. Deiyok ara, sikce, ‘Allah arye nyasulul yupu laka nyasinyabe,’ nyanyak bukni, dipkoprob ning ara, isa arye nyanyak yupu ap, talye yupu ap deice aryuk nyanyaka ati, na Allah arye, anang nirya opnyopura, yuk nang nirya eibikirye, ‘E sik nabi atonun nang ara, dipkoprob walwal nyanyak nanguk unyake,’ tenebikirye, kel biknamake! Aning atonun, narye nyapnyeba, sik Babel mutuku noutam, yin talina kel weik nang nirya ati, yuk mutuku yu nang arye, ninye on parang ya boyanuka, olyanamake. Obikcopura, Babel mutuku yin talin nang nirya, kum kipdeipnamake.

³⁷ Aning atonun, narye nyapnyeba, yuk mutuku yu nang, ninye on parang ya boyanuka, sik Babel mutuku yin talin nang ati, olyanamake. Ara, yin talin nang arye, ninye olban talak bukuka banyak kuda basam ap, tuku deice balamle ning, el si kereta perang ap, tonda Babel mutuku nang arye, ‘Anggunce yanuka melipsululume,’ nyabuka morobikba, sik dana-dana tam unyak yin talin nang ton, tia talak ati, yanamik nang ap nirya ara, kum kipdeipnamne. Ara, narye nyapnyeba, yuk mutuku yu nang arye, ninye on parang ya boyanuka, Babel mutuku yanuka, anang nirya obuka, sice buklopnamake. Aning atonun, sik Babel mutuku nang arye talibuka, bona talin nang unyak ning ap nirya ara, kum daneipnamake. Ara, sik Babel mutuku nang arye, bona talinyak ning nirya ara, sik ona ati, yanamak nang arye, ninye opniba, dengna dololamaka atonun ubuka, aning yuk-yuk ning nirya ara, dopropnamake!

³⁸ Tonda, sik wenena ati, na Allah arye nyapnyeba, amutuku noutam balamuk mek nirya ara, cepdopnamle. Tonda, sik wa winyak sukum ara, kouluplirye, sisal dem sepnamle! Deiyok ara, sik Babel mutuku nang nirya arye, isa siuk erenyaka ati, ninye urasin atonun memebuka deibikirye, atalye ning ati, si erenyake. Aning wininyakce, sik isa si erenyaka deice arye, sik kanye talima ara, motona talin nang atonun kililanyake.

³⁹ Babel mutuku nang arye talilamik ning, yuk-yuk ning nirya ara, Babel mutuku nang ap, akunum obuka, sirya daknyopura, aminyan talak ara, sik Babel nang ulamik mutuku noutam ara, bai tam talye kam ulye ning, sik mana ap, bai tam talye kam ulye kam ap, tonda bai talye im deice tam lakuka banamle maka ap, sik dem amutuku unamake. Babel nang nirya kum daneipnyopura, amutuku noutam, ninye nirya ara, ton pia kum unamake. Ati, atalak arye dipdongobuka, doyanamle talak nirya ara, anggun mutuku ara, pia aik oldemuk upnamle!

⁴⁰ Ura, min talak narye Sodom mutuku ap, Gomora mutuku ap, sik dana-dana tam ulamik nang ap, tonda sik amutuku-amutuku nang arye, taleamik ning ap, amutuku asik nirya ara, kum daneiamsise touk, Babel mutuku nang babye atonun, kum daneipnamne. Winipnyopura, Babel mutuku noutam nirya ara, aminyan talak yuk nang ton yanuka, amutuku noutam pia kum unamake. Kwaning patanauk upnamle. Ati nara, Allah Yahweh arye, akunum nyapdeipmasina ati, aning nirya ara, dipkoprob nong upnamle!

⁴¹ Mutuku sirya, im sirya nirya, daululum nang nirya ara, moubuka dinamlume. Narye, ‘Babel mutuku nang ati, olyanganamlume,’ akunum nyamsiba, wini talak ara, dabu tam arye, (arah utara arye), tonok mutuku ton, mikip weik nanguk unyak mutuku ara, yuk mutuku arye akunum kintinipmaka ati, Babel mutuku ati olyanamake. Sikda, mutuku sirya, im sirya tam arye, pia pera amutuku-amutuku arye, ninye talibuka, ninye deiyok nang Raja-Raja nang ara, pia weik tonun kintinibuka yakirye, Babel mutuku nang ati, olyanamsiake.

⁴² Sik ayanamak nang arye, boyanamaka ara, ninye on yin ap, mal ap, tonda yo arye tace lulamak ning, el si tombak ap, boyakirye olyanamsiake. Aolyanamsiak talak ara, sik anang arye ton, ‘Otam mutuku unyak nang ara, bico tenena kumce, yu weik upliba, talye parapkabuka olyanamsiake. Babel mutuku ona ati, yanganamak talak ara, tuku yanibuka, yace talak ara, lelim weik nyapnamla ati, winipmanto ara, laut mek kwen arye, mek kait weik tonun weleplirye, lontik alamle touk, anggun ona ati yanamak ning, el si kuda basam ara, sik yan lelim ara, weik tonun nyapnin yanamake. Ara, anggun Babel mutuku ululum nang nirya ati, anggun obuka sirya dakna ati, baris kibikirye, bikbik abuka, olyanamsiake. Allah arye ayupu nyapdeibukba, nabi Yeremia birye, ayupu kekebuka, Babel mutuku ninye deiyoknye, el si Nebukadnesar biti, laka nyabukba, kekebuk.

⁴³ Na Yeremia birye, ayupu nirya akunum laka nyapsiba, Babel mutuku taleamuknye, Nebukadnesar birye, akunum kekebukopura, aninye deiyoknye Raja ara, ‘Se, yata wiriptibye do?’ tenen, pia imun kanye bobukce, el nong nirya mitang ubuk. Winibuk talak ara, el urasin nirya ara, kilapu mi bomikca ani, mi deiyok dinmaliba, bolamak urasin atonun ubuk. Winibukce, imun kanye bobuk.

⁴⁴ Ura, na Allah Yahweh arye nyapsine. Winipmanto ara, talye bai tam, akam ulamle singa kus atonun, weik Yordan mek lilun mutuku tam, bai arye kutuka, tikilyalirye, domba basam maning mutmuta dilamlyakuk yanuka, tiklirye dilamle touk upnamle. Ara, aning atonun nara, Allah Yahweh arye, aminyan talak, talye karin arye, bikbik abuka yanamne. Winipnyeba, sik Babel mutuku nang, ilil upliba, sik mutuku batakuka, yuk-yuk mutuku dabindopnamake. Winipnamne talak ara, sik amutuku noutam yupu talibuka unamak ninye deiyok nang ara, naryuk yuk nang wipdeipnamne. Sik ninye deiyok nang wibuka deipnamna ara, tenipdelulume! Yata mutukunye ton, na unya atonunye ton ulul do? Kume, ninye deiyok nang wipdeipmantonye bira, na uka. Tonda, yata tonye birye, nati, ‘Anda adiparyuk yanulyame,’ nyapnutuba, yanamne do? Tonda, yata tonye birye, aning-aning nirya ilil tenena kumce, na unye touk uptu do? Yatanye birye, nati yanipnuturye, obuka malye kipnutu do? Kume, ninye arye aning nirya ara, pia kum winiptinge.

⁴⁵ Aning ara, anggun Babel mutuku noutam ululum nang ati, ‘Winipnamne,’ tenyamse yupu ara, na Allah Yahweh arye, nyapnusin yupu nyapnyeba, moubuka kekeplulume. Tonda, anggun amutuku ululum nang, anggun Kasdim yala nang ati, ‘Winipnamne,’ tenyamse ning ara, anggun adiparyuk moubuka kekepnamnulume. Se, anggunda bicoe! Anggun Babel mutuku nang ati, wenebuka opnamsin talak ara, yuk mutuku yu nang arye, sik Babel mutuku unyak mitik mapu nirya babye, mikip arye bobuka, yukak bobikirye, dopkwetepnamake. Winipnyopura, sik amutuku noutam ap, asukum unamak nang nirya ap ara, aning nirya eibikirye, ‘Seʼ tenen, pia weik tonun, ilil weik upliba, imun kanye bobuka, unamake.

⁴⁶ Aning akunum winipnamne talak ara, sik Babel mutuku nang nirya arye, weik yupu arye ngalukuka, engenamak ning ara, yuk mutuku unyak nang nirya arye, kekenamake. Babel mutuku nang sakikceura, sik yupu weik tonun nyalanamak ning lelim ara, yuk mutuku nang nirya kekepnamake. Tonda, weik yupu deice arye, ngalukuka malye nyanamak ning ara, alelim yuk mutuku nirya unamak nang arye kekenamake. Allah arye ayupu nirya nyabukba, nabi Yeremia birye sekuke.