Yeremia 5 - Eipomek

Yerusalem mutuku nang nirya arye, malye weik winilamik ati, nyabuk yupu

¹ Allah arye, na nabi Yeremia biti nyapnuk. Yeremiao, anda weik asik dobuka, ulyam mutuku, Yerusalem mutuku noutam nirya ara, bisikak obinuka, ayanuka kipmince, dipdebuka binulyame! Tonda, amutuku noutam nirya, an asing arye dipdemince, ‘Amutuku nang ara, winibuka unyakeʼ tenen, biknalyame. Ninye bulubuka wekenyakak nirya, dipdeminyak arye, Allah ati, pia diba tenebuka, diksukum winina ap, dip yupu nyana ap, winilamlinye birye, tonok babye aulul do, kum do?’ tenen, dipdenulyame. ‘'Amutuku noutam, dipdenin baminyebuk, atonye tonok ton aulyamlyak, eipminyopura, laka nyapnamnilyame. Diksukum winina ap, dip yupu nyana ap, winilinye birye, Yerusalem mutuku unyak nang nirya arye, malye-malye weik wininyak ning ara, na Allah arye, kum wenepnamsine. Sik malye winin ning biknirye, kum kipdeipnamne.

² Ura na bikse. Sik Yerusalem mutuku unyak nang arye, nyanyake. “Kume, pia dipkoprob nyababe. Nun ni Allah Yahweh, dipkoprob tuba kam ulul touk, nunce dipkoprob nyababe. Elce nyasilye yupu, moubuka talibibirye, diksukumuk wininamabe,” nyabuka, talye si bambol deice arye nyanyak bukni, sikce talye yupu aryuk nyanyake. Na kele, sikce nyace touk, pia kum wininyaka ati, tilila yupu uk nyanyake. Allah Yahweh arye, na biti, nabi Yeremia biti nyapnuk.

³ Nyapnukba, na Yeremia birye tamubuka nyapse. “Se na ni Allah Yahweh. Na kele, ance, ninye ati, Yata wirinamak do?’ tenen, patakulul ning ara, anti diba tenebuka, pia dib yupu nyana ap, diksukum winin ning ap, yupu. Anda Allah arye, sik malye wininyak nang akunum wenebuka opsi bukni, sikda, ‘Dipkoprop Allah arye winisululeʼ tenen, ikin kanye bobuka kum unyake. Tonda, sik wenena ati, ikin ning weik deipsulumce, opsulumba, ninye weik akunum diamik bukni, aning babye sikce kel kum bikinyake. Sikda, kama weik tuba abuka deice arye, ance, ‘Aning wininamlume, aning ara pia kum wininamlume,’ nyapsuluma babye, aning kekena kum aryuk, sik malye wininyak ning ara, kum bataknamake. Winipmanto ara, sik urasin ara, kat keil atonun kibuka unyaka ati, ance nyasilyam yupu pia kum kekenyake. Sik malye wininyak ning batakuka, tamubikirye, diksukum winin bisik kum banyake,” nyapse.

⁴ Nyapseura, na Yeremia birye tenenun ning ara, nyapse. Ara, “Se, na ni Allah, sik amutuku noutam unyak nang ara, dipkoprob talye kankan nang unyakce, pia walwal nanguk unyake. Sik wininyak ning nirya ara, walwal deiceuk wininyak ati, an Allah arye, ‘Aninguk wininamlume. Teleb winin ning ara, ani,’ nyabuka nyasilyam yupu ara, sikda dipkoprob, moubuka kum bikicak arye, kum bikinyake. Anda, sik Allah ulyam bukni, ance, “Diksukum bisik ara ani,” nyabuka, peterepsulum ning ara, “Kel bikna kum arye, dipkoprob kum wininyake,” nyapse.

⁵ Nyapsirye, aning ton tenepse. Wini talak ara, weik nang, sik bona talin nang dam binirye, “Sik ap, yupu talipnamabe,’ tenepse. Na kanye ara, ‘Dipkoprop sik bona talin nang ara, sik si erenyak Allah arye, “Aning ara wininamlume. Aning ara, pia kum wininamlume,” nyapdeibuk yupu ara, sikce akunum kel bikamikce, ‘Aninguk talibuka wininyake,’ tenepse. Bukni, anang dam bisirye, yupu talibupuura, akunum kel bikse. Ara, sik anang babye atonun, an Allah arye, ‘Wininamlume,’ nyapdeiamsulum yupu nirya ara, sikce, ‘Aning ara nun lik, Allah arye nyasulul ning ara, nun like,’ tenebuka, ayupu yaninauk wininyake. Ayupu ara, moutalibuka kum wininyake. Winipmanto ara, ninye arye, ‘Tapu arye, nun sapi basam kirikibirye, telebak libuka bobinamapʼ tenen, tapu kirikmace bukni, asapi basam balye potong tiklirye, yu uplyeba, atapu buluploplirye, el teneplye touk, yukak balamle touk, sik anang babye, sik kanye tenen ninguk wininyake.

⁶ Se, sikda bicoe! Mandipna kanye bobikirye, malye ninguk talibuka wininyaka ati ara, kanye imun ning, sik dam yanamlarya! Winipmanto ara, bai tam ulye kam ning, yu weik pus, el si ara Singa Pus, atonun yalirye, sik nong nirya opsilyeba dipnamle. Tonda, mek ap, ninye ap, pia kum mutuku ulye ning, el si ara Serigala kus do, pia yu kam do, aning yalirye, amutuku nang nirya obuka, sirya daknamle. Winipmanto ning ton, bai mutuku yu weik ulye ning, el si ara, Macan Tutul pus, amutuku noutam domik asik unyak nang ati, ‘Obuka dipnunʼ tenen, yanuka, kalikinamle. Ati ara, yata nang do nirya, anyasik noutam arye, ubuka bai tam balyopura, ayu ning arye, sik banamak nang onamle ati, moubuka kaliknamlarya! Aning winipnamle deiyok ara, sikce. Ara, sikda, malye ning weik talibuka wininyaka atia. Tonda, sikce Allah ati, “Naio, an tam nanguk unamabe. Ance nyasilyam yupu uk, moubuka talipnamabe,” nyalamik bukni, asum-asum nirya, Allah ati, kanupdobuka, Allah arye, ‘Wininamlume. Aning ara, pia kum wininamlume,’ nyadeipyamsuk yupu yaninyaka ati, ikin ning weik, sik dam yanamlarya! Na Yeremia birye nyapse.

⁷ Nyapseba, Allah el si Yahweh arye, ayupu nyabuk. Anggunda, pia malye weik winilulum ati, na mapu koproba, yata deiyok ning deice arye, anggun malye winilulume ning ati, biksitinirye, kum kipdeiptinye do? Anggun amutuku ululum nang ap, anggunce deiplumba, dadeipdanin yanganyak nang nirya arye, na akunum bataknulumce, yuk talye ning ati, ‘Nun ni ani,’ nyabuka, isa si erelulume. Narye, anggun din ning ap, anggun patan ning ap, pia weika arye areamseseba, diluluma deice arye bousulul bukni, anggunda pia malye-malye weik winilume. Ara, anggunce akunum domlum kilapu batakuka, yuk nang arye domik kilapu, talye yalalulume. Tonda, ninye talye-talye yolon nyak kilapu, sik unyakak ton, dilbalamlumce, amutuku ninye weika arye, akilapu sik dam bimunce, akilapu ap, yolalulume.

⁸ Winipmanto ara, sik anang ara, yim kuda basam, nong weik nelamle atonun unyake. Winikirye kuda basam, kil burum kwakmalya ati, mikip weik dolamle atonun unyake. Sik amutuku nang arye tenenyaka ara, ‘Na kwit birye domuk kil, tonda yuk nang arye domik kilapu, ubula dobuka, yoptinye,’ tenenauk unyake.

⁹ Anggunda, pia malye weik winilulum ati ara, anggun ton tenenipdelulume! Na Allah arye, anggun malye ning weik winilulum nang ati, kum wenebuka optinye do? Tonda, sik amutuku noutam unyak nang arye, malye-malye weik wininyak ning ati, kum kwang dakuka weneptinye do? Kume, aning ara, dipkoprob wenebuka kwang daknamnarya!

¹⁰ Ati ara, na Allah arye, sik mal pin nang, dopdeipnirye, anang ati, nyapnamne. ‘'Amutuku unyak nang, sik anggur wa wibuka kouwamika nirya ara, malye kipdeipnamne. Bukni, anggur tapu nirya ara, weplum bukni, aning nirya min kum kupdeipnamne. Mitik tonunuk bataknamne. Ara, sik amutuku nang ara, winipmanto anggur tapu atonun unyaka ati, atapu taruk weik tam ning ara, dipkoprob na Allah Yahweh, ‘Naʼ tenen, ning kum wininyaka ati, na ning kum ati, weik tam ning ara, sekuka, bataknamne. Narye, anggun mal olan nang ati nyapniba, anggun amutuku ululum nang kan-kan, ninye weika arye, obuka sirya daknamake.

¹¹ Narye ayupu nyapmana deiyok ara, Anggunda na mapu koproba, anggun Israel yala nang ap, Yehuda tam ululum nang ap, anggunce, nati, diba tenebuka, pia kum dobolbalulume. Anggunce na batakanululuma ati, dipkoprob kanye imun ning dopdeipyeba, anggun dam yanamlarya!

¹² Na mapu koproba, Israel nang arye, na Allah Yahweh ati, tilila yupu ton, na dam nyanyake. Sikce nyaniyaka ara, ani. Sikce, “Kume, nunce malye winibibya babye, Allah arye nun dam ton, wenen ning yala-yala nirya ara, kum arepnamsile,” nyabik. Allah arye yata winipnamsil do? Kume, nun dam, weik kanye imun uk, ninye diplyeba dakdongopdanin balamak uk ap, tonda din patana ap, tonda mal olan nang arye yanuka, osikce ning ap, aning nirya kum kipnamsile.

¹³ Tonda, Allah el yupu laka nyana ap, aminyan upnamle ning, laka nyana ap, pil donyak nang, sik nabi-nabi nang arye nyasinyak yupu ara, dip kum tenenyabe. Anggunce, ‘Aminyan talak ara, kanye imun ning yanamsil, winipnamsil,’ nyabuka, nyanyak yupu nirya ara, talye yupu uk ulule. Winipmanto ara, “Sik nabi nang babye, talye yupu uk nyasika ati, kumanya balamle atonun, sikce nyasinyak yupu ara, nong kum upnamle yupu,” nyanyake. Deiyok ara, sikce nyasinyak yupu ara, “Allah Yahweh arye, anggun dam kum nyabuka atia! Allah el yupu ton, anggun dam kum nyalisulule,” sik Israel nang arye nyanyake. Allah arye, sik Israel nang ati, nyabuk.

“Allah Yahweh arye, Israel nang ati bataknamle,” nyabuk yupu

¹⁴ Allah arye, na Yeremia dam, ayupu yanuka nyapnuke. Israel nang arye ayupu nyanyaka ati, wenepnamsine. Atalak ara, na Allah Yahweh, im deice yin talin malaikat nirya, sik deiyoknye ununa ati, nara mikip weiknye birye nyapsine. Wini talak, na yupu ara, uku dilamle atonun dobuka, Yeremia an si pum tam deipnamkine. Weik mikip yupu nyapnamlyame. Tonda, sik Israel nang ara, aik domne yo, toubuka delilamaka atonun, kipdeipnamsine. Ati winipmanto ara, uku buk arye koulubuk yo deiplirye, sice bultakalamle touk, an Yeremia birye, nyanamlam yupu ara, sik anang nirya dibikirye, sirya daknamle.

¹⁵ Se, anggun Israel nang bicoe! Na Allah Yahweh arye, ninye yala yuk nang, ara pera mutuku nang ton, dobuka deipnyeba, anggun Yudea tam noutam ululum nang ati, ‘Aninye obuka, sirya daknamapʼ tenen, anggun dam yanuka warikil yanganamsiake. Asukum mutuku yala nang ara, pia min talak dodarapce, ulamik touk, tuba mikip aryuk unyake. Sik yupu nyanyaka ara, anggun Israel nang arye, kum kel bikluma ati, anang arye nyanamak yupu ara, kum kekepmanto unamlume.

¹⁶ Anggun amutuku nang ap, sik yin talin nang ap ara, mikip weik ap, mal dona weik kel ap, unyak nang ati, sikda ilil pia kum, mania nang unyake. Sikce mal pibikirye, ninye onyak talak ara, bico pia kum tenenyak nang ati, sik Israel yala nang, pia weik tonun onamake.

¹⁷ Tonda, anggun pera mutuku nang, anggun mutuku noutam yakirye, anggun Israel nang arye wa wibuka, kouplulum din yala-yala nirya ara, alubuka doprobikirye, aning nirya libuka, kum kipdeipnamake. Winipsikcopura, anggunce delilulum mapu ap, kilmapu ap nirya ara, obuka sirya daknamsiake. Aning kum bukni, anggun Israel nang arye weilulum sapi basam nirya ap, anggun domba basam nirya ap ara, obikirye, atuku nirya dibuka, sirya daknamake. Tonda, sik anggur tapu duk ap, Arah yo duk ap nirya ara, weplobikirye, kum kipdeipnamake. Tonda, anggun Israel nang arye, asik weik doblumce, ‘E, akunuma, nun mal olan nang arye anyasik kum wekuka opsitingʼ tenen, kanye deibuka, cang weik keil poka antanap dongobuka domlumak nirya ara, ulubuka batakikirye, aning babye, kum kipdeipnamake.

¹⁸ Aning-aning nirya ara, na tenyamse touk, lo arepnyeba, ayu nang arye, dipkoprob ikin ning deipnamniak bukni, atalak ara, aning winipnamaka babye, na Allah Yahweh arye, anggunda na mapu koproba ululum ati, anggun nirya dipkoprob min kum kipdeipnamsine. Sik yala nang ara, mitik tonun, tuba kam unamake.

¹⁹ Tonda, aminyan talak, aning nirya dopdeipsinyeba, anggunda imun kanye bobuka wininamlulum talak ara, anggun kan-kan noutam, ton nang arye, an Yeremia biti asipdanamake. Anggunce, “Se, ‘Nun ni koproba,’ nyabuka, el si erelamupu Allah ara, el si Yahweh ulule. Bukni, nun ni Allah arye, yata deiyok ati, imun ning nirya bobuka, nun dam deipmasil do?” nyabuka engebikirye, asipdanamak talak ara, ance anang ati, tamubuka nyapnalam yupu ara, ani. “Kume, anggun amutuku ululumce, ‘Allah ati, nun likʼ tenen, bataklumce, amutuku noutam aryuk, talye ning si erebuka, min arye kum bikamlum isa talibuka, anggun amu tam pil domlum touk, pera mutuku nang arye, opsikirye, tapu koubuka, anggun mutuku bobisikce talak ara, amutuku nang arye, ikin pil dipsikce buk, sik pil melin nang kibuka, unamlume. Apera mutuku noutam, anggun anang amu tam kibuka, ikin piluk donamlume.” Allah arye, sik Israel nang ati nyabuk. Allah arye, nabi Yeremia biti nyabuk.

Allah arye, el mapu koproba ati, ‘Biknamakʼ tenen, nyabuk yupu

²⁰ Allah Yahweh arye, na Yeremia biti, ayupu yanuka nyapdeipnuke. “Ara anggun deipkirikdopnye, Yakub birye deibukba, deipdanin banyak nang, tonda, Yehuda mutuku noutam unyak nang ati, ayupu kekebikirye, ‘Ninye nirya kekepnamakʼ tenen, Tukwak arye, weik yupu deice arye, laka nyalbinamlyame. Ance nyapnamlam yupu ara, ani,” nyabuk.

²¹ Israel nango! Anggun nirya kekepnululume! ‘'Amutuku noutam ululum nang ara, walwal arye, kum bikmanto nang ululume. Anggunda, ‘Deiyok ning ara ani,’ tenebuka, kum biklume. Anggun asing aupsuk bukni, moubuka kum elilulume. Tonda, anggun amul aupsuk bukni, moubuka kum kekelulume.

²² Anggun nirya moubuka teneipdelulume! Nara, Allah Yahweh ununa ati, yata deiyok ati, anggunce nati, ilil kum usulul do? Dipkoprop ning ara, anggunce na dam yamunce, nati ilil upsutuba, ‘Se, adiparyuk nun wenebuka opsilyakʼ tenen, anggun nong nirya memepdopnamtume! Tonda, moubuka teneplulume! Na mikip weik aryuk, weik laut mekwen delinak kwepdeipsirye, ‘Amekwen ara, talye balulʼ tenen, amekwen wililona ati, laut mekwen kup-kup outam ara, keil wininga el si pasir, akunum kintinip deipse. Akintinibuka deipsak ara, laut mekwen arye deiplirye, pia unamle. Ati ara, laut mekwen weik arye deiplirye, mekwen mikip mek ombak, kibuka welepnamle bukni, pasir kup-kup, kum bisipmanto ulule. Tonda, ‘Laut mekwen deiamlyak, binuka sukulbinamleʼ tenen, wilipdopse sukum ara, kum deibisipnamle. Asukumuk pia aunamle.

²³ Bukni, anggun Israel nang ara, mandipna kanye bobuka, malye weik winilulume. Winipmunce, anggun kisok ara, kat keil bulamle atonun nang ululume. Anggun kanye talima noutam ara, ‘Kume, Allah arye nyasilye yupu, pia kum kekenamabe,’ tenelamukce, mandipna kanye weik bolulume. Tonda, na Allah arye, ‘Aning wininamlume. Aning ara, pia kum wininamlume,’ nyalisunun yupu ara, kum kekelulumce, ayupu yanibuka winilulume. Aning winimunya deice arye, pia malye winilulume.

²⁴ Anggun awinilulum nang arye, anggun kanye talima namin upsutuba, anggunce, “Se, nun ni koproba Allah ati, dipkoprob ilil asa unamabe. El yupu uk kekebikirye, aninguk talibuka wininamabe,” nyaptum bukni, aning kum tenebuka nyalulume. Tonda, anggunce, “Se, nun ni koproba Allah aryuk, mok li talak ara, mok aresilyeba, mok celule. Tonda, aketing tamun, aketing tamun nirya, mok li ap, dou man ning deiyok koun talak ap, mok li sirya daklyeura, wa wibuka koumice ning, lin talak ap ara, Allah arye teneplirye, elcuk asum-asum nirya, teleb kibuka arisulule,” nyapmatume. Allah arye, ‘Winipnamakeʼ tenen, ‘Akunum kintinip deiamuk touk, tuba aresululʼ tenen, na Allah ati, si erebuka dopnutum bukni, aning babye, pia kum tenelulume.

²⁵ Na Allah arye dipkoprob nyapsine. Anggun malye ning weik talibuka winimunya deice ap, na yupu yanimunya deice ap, akintinibuka deipsise teleb ning nirya ara, talibuka deipmunce, teleb ning ton, kum dobuka dilulume. Tonda, telebuk kum winilulume.

²⁶ Se, na mapuo, anggun umunya noutam ara, pia malye winin nang ton weik aunyake. Anang arye wininyake. Narye, ‘Aning wininamlume, aning ara, pia kum wininamlume,’ nyapdeiamsise yupu, pia yaniltananyake. Tonda, yuk nang, sik bona ara, ubula dolonyake. Winibikirye, winipmanto, maka youna ati, wena weyamikirye, ‘Yata talak youpnamle do?’ tenen, dilbalamak touk, anang arye yuk nang ati, ‘Anang ara, malye kipdeipnuyap,’ tenenauk unyake. Aning winilamik touk, ninye ona ati, wena webuka deibikirye, kalikinyake.

²⁷ Winipmanto ton, maka dobona kel nang arye, maka tomobuka, aik domikca noutam, maka pia weik dongolamak touk wininyake. Ara, aning atonun, sik anang arye, minina yupu ap, tilila yupu ap, ninye on yupu ap, nyaplobikirye, ‘Amutuku nang, sik bona nirya ubula dolonamabe,’ tenenauk unyake. Sik aik pum bisikuk, malye winin ning arye, pia weik langdibuke. Amalye ning wininyak deice arye, amutuku nirya, sikce talibuka winikirye, akunum bona talin weik nang unyake.

²⁸ Sik amalye wininyak nang ara, telebuk kibuka ukirye, sik nong pou weik unyake. Sik urasin babye, pia teleb unyake. Bukni, sik anang arye, malye wininyak ning ara, pia tenipmanto kum ning wininyakce, pia kum batakmanto unyake. Pia malye-malye aupto babye, sik tenepce touk, talye luparabuka wininyake. Sik anang arye, talye kwaknamne mapu ati ara, ‘Aminyan ara, amapu teleb kibuka unamakʼ tenen, diksukum kibuka, teleb winin ning arye kum melinyake. Amapu ati, yupu bokikce talak ara, diksukum kibuka kum nyanyake. Tonda, aning atonun, talye kankan uk unyak nang, aning-aning kum talenyak nang ati, yu nang arye malye winipnuce talak ara, anang arye, ‘Anggun bataksue, akankan nang ati, malye kilina kume,’ nyabuka, yupu kum sekenyake. ‘Sikda, dauplye,’ tenebikirye, yupu nyabuka, kum melinyake.

²⁹ Ura, sik anang ara, winiyaka ati ara, na Allah Yahweh arye, sik anang awininyak ning nirya ati, kum kipdeiptinye do? Tonda, amutuku noutam unyak nang, sik pia malye weik wininyak ning nirya ati ara, narye wenebuka kum kwang daknamne do? Kume, dipkoprob anang ara wenebuka kwang daknamnarya. Sik menenga ati, imun kanye bon ning arepnamsine.

³⁰ Dipkoprop amutuku noutam ulye ning ara, weik imun kanye bon ning ulule. Tonda, pia malye weik ning, amutuku noutam akunum ulule. Aning ara, teleb wininyak nang nirya arye, pia kum tenebuka winiptinge. Tonda, na kanye ara, aning pia na lik weik unulule.

³¹ Ara, na nyanun yupu laka nyan pil deiyok nang, sik nabi-nabi nang babye nyanyak yupu ara, tilila yupu deice aryuk nyanyake. Narye kum nyapdeipse yupu bukni, sikcuk, ‘Allah arye, ayupu nyapsukba, nyapsiabe,’ nyabuka, tilila nyanyake. Aninguk kum bukni, sik tilila yupu nyanyak nabi-nabi nang, sik kanye aryuk, ‘Winipnamlume, winipnalume,’ nyanyaka deice arye, na si eren aik pum tam pil dona deiyok nang, sik imam-imam nang arye, pil dokirye, na mapu Israel nang talibikirye, sik nong deice, ikin ning weik delinyake. Aning-aning nirya ara, dipkoprob malye ulul bukni, na mapu sik Israel nang, awinina ati, kanye deibuka winilulume. Winilulum bukni, anggun nirya kanye mouplulume! Aminyan sirya daknamle talak akunum dam uplyeura, anggunda yata wiripnamlum do?