Yeremia 48 - Eipomek

Moab mutuku ulamik nang ati, nyabuk yupu

¹ Allah Yahweh arye, aning-aning nirya talibuka, im deice tam unyak yin talin malaikat nirya ara, sik deiyoknye ulule. Sik Israel yala nang arye, el si erebikirye, elti, si erebuka kinyake. Allah Yahweh arye, sik Moab mutuku noutam unyak nang ati, ayupu nyapdeibuk. Ayupu ara, ani. “Sik Moab mutuku noutam unyak nang ara, pia bicoe. Ara, Nebo mutuku unyak nang ara, opnamsiake. Amutuku ara, akunum uluplobuka, sice buklopnamsiake! Winibikcopura, Kiryataim mutuku unyak nang babye, obuka tomopnamake. Winibikirye, weik cang keil poka domik ning ara, uluplobuka, sice buklopnamake. Ati ara, sik amutuku unyak nang nirya ara, ilil uplyeba, alye dakdanamake.

² Moab mutuku noutam unyak nang, sik anirye dinyakce, talibuka unyak ning nirya ara, kum kipdeipnamne. Winipnyeba, sik amutuku nang, sik weik asik domikce, ‘Nun mutuku deiyok ani,’ nyabuka, Hesyebon mutuku poka wibik ning ara, sik mal olan nang ati, yanuka obuka, sice buklopnamake. Tonda, ‘Atam mutuku noutam unyak nang ap, sik Moab mutuku nang ap, kum kipdeipnamabe. Aminyan talak ara, sik amutuku unyak nang ara, negara ton pia kum unamakʼ tenen, olyanamake. Tonda, anggun Madmen mutuku noutam ululum nang arye, yupu nirya nyanamlum ning ara, pia kum kipdeipnamsine. Anggun nirya ara, kum unamlume. Aning-aning nirya, winipnamsil deiyok ara, na Allah arye, lo arepsinyeba, amutuku noutam ara, anggun ona ati, yin talin nang aryuk, olyanganamsiake.

³ Tonda, anggun nirya moubuka kekeplulume! Ara, Horonaim mutuku noutam unyak nang nirya ara, weik yupu deice arye ngalukuka nyanmake. Ara, “Se, nun ton, akunum kum kipdeipsilirye, akunum sice bukuka batakmasile,” nyabuka engenmake.

⁴ Tonda, sik Moab mutuku noutam unyak nang nirya babye, Allah arye kum kipdeipnamle. Winipnamle talak ara, sik Moab mutuku unyak mapu nirya arye, ngalukuka engenamake. Alelim ara, opera mutuku, Zoar mutuku unyak nang arye kekenamake.

⁵ Sik amapu nirya arye, engenmaka deiyok ara, ani. Ara, Luhit mutuku welebuka bikirye, engenmakce yupu kekenmakiba, engena lelim weik arye nyanmakceba, yuk nang arye kekepnamake. Tonda, Horonaim mutuku bisik welebanak babye, yuk nang arye, engen yupu kekebikirye, engenmakiba, alelim ara, yuk nang ton kekepnamake.

⁶ Ati ara, yuk nang arye, amutuku nang ati nyapnamake. Ara, “Anggunda, min arye bikbik abuka binamlume! Anggun babye yanuka lyepdamunce, tukwak mutuku noutam, bai tam ulamle keledai basam, bikbik abuka balamle atonun kibuka, anggun babye, bikbik abuka bimunce, lyepdanamlume!” nyapnamake.

⁷ Se, anggun Moab mutuku noutam ululum nango! Anggunda, adiparyuk moubuka teniplulume. Min talak anggunce, ‘Kume, nunda mikip kibibirye, nun weik bona talin nang unyaba ati, nunda telebuk unamabe,’ tenelamlum. Bukni, dipkoprob nyapsine. Wini talak ara, angguncuk, anggun mal olan nang arye yanuka opnamsiake. Winipsikcopura, anggun mal olan nang aryuk, obukapsikirye, anggun si erelulum isa, el si Kamos ap, anggun pil don nang ati, imam-imam nang ap, tonda yuk yala ninye deiyok nang nirya ap, isa Kamos ati melilamik nang ap nirya ara, Moab mutuku noutam arye bobuka, anggun wenena ati, pia yuk mutuku bobinamsiake. Winipnamsiaka deiyok ara, anggunce, talye ning ati, ‘Nun ni koproba arye, lyenamsile,’ nyabuka, isa ati, diba tenyamluma ati winipnamsiake.

⁸ Ati, Allah arye ninye ona ati areplyeba, amutuku noutam nirya ara, anggunce weik asik domlum ning nirya ara, sice bukuka bataknamle. Winipnamle talak ara, ninye aik ap, ninye ap, tonoknye babye, ton tuba kam kipman, kum binamake. Anggun ululum mutuku nirya, dabu tam bukni, weik pala lu mutuku tam ap nirya ara, adiparyuk kum kipdeipnamle. Dipkoprop, na Allah Yahweh arye, ayupu akunum nyapdeipmana ati, nong kunupnamle!

⁹ Nyapna ati ara, anggun adiparyuk Moab mutuku nang unyakak, ‘Pia malye upnamleʼ tenen, garam weik tonun dobuka, Moab mutuku tuku deice nirya yamupdonoknamlume. Winipnamaluma deiyok ara ani. Moab mutuku noutam nirya, ninye asik weik domik ning nirya ara, adiparyuk kum kipdeipnamne. Tonok babye, ton kum bataknamne. Amutuku-amutuku noutam nirya ara, ninye ton kam kum unamake. Anang nirya opnirye, pia kum kipdeipnamne. Winipnyopura, amutuku noutam nirya ara, ninye tonoknye babye ton, kam kum unamake. Asik oldemuk upnamle.

¹⁰ Allah Yahweh arye, ‘Sikce na tenyamse pil donamakʼ tenen, “Anggunda wininamlume,” nyabuka, pil aresilye ning nirya ara, dipkoprob pia moubuka, pil talibuka kum dolamikce nang ara, supnamle. Aning atonun, Allah Yahweh elce, ‘Moab nang nirya, obuka sirya dakdanamakʼ tenen, yu parang ya arebukba, el lin aling pum tam arye dobuka, ninye kum olamlinye biti ara, Allah arye supnamle.

Moab mutuku noutam ubuk ning nirya, sikce buklopnamuka ati, nyabuk yupu

¹¹ Allah Yahweh arye, na Yeremia biti nyapnuk. “Ara minop talak noutam arye, dipdongobuka wini talak babye, sik Moab mutuku nang ara, talye kanye bobuka, nemalyap arye, dakeiam asa ulamik. Winilamik talak ara, ton yuk mutuku nang, sik mal olan nang arye, yanuka opnirye, sik bobuka yuk pera mutuku kum bobinamik. Sik Moab mutuku nang ati, winipmanto yupu nyapnune. Ara, anggur mek weik mek makau pum tam langdibuka deibikceba, makau pum tam lulukna kumce, ur talye delilamle touk ulamik. Tonda, anggur mek el susunga ning ara, amakau mek kwebuka deipmacebuk, susunga ning ara, el makau sibaru dam ulamle touk, sik Moab nang babye, urdem teleb asa ulamik. Atonun ton, anggur mek makau ara, kum kukicopura, el nintong lelul touk ulule. Tonda, elto ning dibiceba, pia tuba teleb ulamle touk, ulamik. Bukni, wini talak ara, aning nirya ara, na Allah arye malye kipdeipnamsine.

¹² Bukni, na Allah Yahweh arye dipkoprob nyapsine. Aminyan yanamle talak ara, narye “Winipnamlume,” nyapniba, sik Moab mutuku nang mal olan nang ati ton, dopdeipyeba, olyanamake. Winipmanto ara, anggur kwebuka, dikiltaklamak touk, winipnamake. Tonda, Moab mutuku nang nirya opnirye, sirya daknamne ning ara, winipmanto ning ulule. Winipmanto ara, ninye arye, mitik mek makau dobuka, mikip asa tuku deice deiplobikiba, colamle touk ulule. ‘'Ara sik unyak mutuku tuku ap, sik amutuku unyak nang ap, obuka sice buklopnamake!

¹³ Moab mutuku ap, Moab mutuku noutam unyak nang nirya ap, malye kipdeipnyopura, sik Moab mutuku unyak nang arye, alye weik dakdanamake. Ara, sik si erelamik ning, isa Kamos ati, ‘Se, elcuk yata ati, kum lyepsuk do?’ tenebikirye, alye dakdanamake. Aning atonun, minop talak, sik Israel nang arye, Betel mutuku ulamik talak ara, sik isa si erelamik ning, ‘Si erebuka kipnamapʼ tenen ati, sapi basam mi urasin atonun kibuka, patung memebuka deibikce, aisa si erelamikak bukni, aisa arye kum melilamukba, alye weik dakalalamik. Atalak ara, Israel nang arye, ‘Se,’ tenelamikce, imun kanye bolamik touk, sik Moab nang babye atonun unamake.

¹⁴ Minop talak ara, anggun Moab mutuku ululum nang arye, yuk mutuku nang ati, ilil tenena kumce, “Kume, nunda ninye olana ara, weik tonun kel bikamuburye, nunda pia mikip weik yin talin nang unyabe. Yuk nang nirya arye, nunti, ‘Se, sikda, dipkoprob mambul nang unyake,’ tenesinyake,” nyalamlum bukni, wini talak ara, anggunce yata deiyok ati, aning tuba nyaptum do? Aning ara, kum nyaptume.

¹⁵ Deiyok ara ani. Ara, anggun mutuku Moab ap, amutuku noutam ululum nang nirya ap ati, obuka sice buklopnamle ning deiyok ara, anggun dam akunum olyanusile. Elce yalyopura, anggun wel nang, yin talin nang, pia teleb nang nirya ara, adiparyuk onauk winipnamsile. Nara Allah, aning-aning nirya talibuka, deice tam unirye, Raja unune. Nara, im deice yin talin malaikat nirya, sik deiyoknye ununa ati, narye ayupu nirya ara, akunum nyapdeipmasina ati, aning nirya ara, dipkoprob nong upnamle!

¹⁶ Ati, narye dipkoprob nyapsine. Moab mutuku noutam ikin ning dobuka, deipnamne ning nirya ara, akunum dam yale. Ati, lo pia weik ton kum uple. Sik Moab mutuku nang nirya obuka, sirya daknamle deiyoknye bira, anggun dam akunum yale. Anggun nirya ati, yanuka, obuka sice buklopnamsile.

¹⁷ Aning ati ara, anggun Moab mutuku dana-dana tam umunce, ‘Se, Moab mutuku ap, amutuku unyak nang ap, pia teleb unyaka ati, sikda weik mambul nang,’ tenelulum nang nirya ara, imun kanye bobuka, anggun kayapu nang, sik Moab mutuku nang ati, ‘Se,’ tenebuka engenamlume. Winipmunce, sik Moab mutuku nang ati, nyanamlume. Ara, “Se, minop talak ara, sik Moab mutuku nang arye, amutuku-amutuku nirya talibuka, mikip weik ulamikba, nunce, ‘Se, sikda, pia teleb unyake,’ tenelamupu bukni, sik mikip ara, akunum kum danmale! Sikda akunum sice buklopmake!” nyabuka, ngalukuka engenamlume.

¹⁸ Tonda, anggun Dibon mutuku noutam ululum nango, anggun pia telebak ululum mutuku arye, koulukuka yanululume. Koulukuka yamunyopura, alye dakdamunce talye tuku deice ap, butbuta deiceuk yanuka buknamlume. Minop talak ara, ninye nirya arye anggunti, ‘Se, sik babye pil teleb donyake,’ tenelamsik bukni, wini talak ara, kume. Deiyok ara ani. Moab mutuku noutam uamuk ning nirya ati, yanuka akunum kum kipdeiamuka deiyoknye bira, anggun dam ton akunum yanganamle. Akunum yalyopura, anggunce kat ning arye, weik asik dolulum ning, el si benteng nirya ara, ulubuka dakloplirye, sice buklopnamsile.

¹⁹ Ura, anggun Aroer mutuku ululum nang ara, anggun adiparyuk bisik dandanya uk binuka tikmunce, pia moubuka dimunce, tenenamlume! Winipnamlum talak ara, sik Moab nang arye, ilil uplyeba, bikbik abuka, banamak nang ap, kilapu ap, adiparyuk kalubuka binamak nang nirya ap ati, asilenamlulume. Ara, “Se, anggunda yata ati, anggun mutuku arye batakuka, bikbik aplumce, banmalum do?” nyabuka asinamlume.

²⁰ Asipmunyopura, sik anang arye, tamubuka laka nyapnamake. Ara, “Kume, Moab mutuku noutam domumupu ning nirya ara, akunum uluplobuka, sice buklopmasiaka ati, pia alye dakdanuka banmabe! Ati ara, anggun babye, adiparyuk ngalukuka engenamlume! Ati ara, anggunce Arnon mek dam arye, yuk nang ton eipmunyopura, anggunce, “Se, Moab nang nirya bobinuka, olbikirye, sice bultakalbinmaka adano!” nyabuka, laka nyanamlyame!” Sik Moab mutuku arye, bikbik abuka binamak nang arye, sik Aroer nang ati, winibuka nyanamsiake.

²¹ Ati, na Allah arye nyapsine. Na Allah Yahweh arye, Moba mutuku noutam bukni, amutuku-amutuku noutamuk domik asik nirya babye, wenepnirye, obuka sirya daknamne. Ara, mutuku kon bukuka, dup tam unyak nang nirya ara, kanye imun weik wenen ning ara, sik dam dobuka deipnamne. ‘'Amutuku si ara, ani. Ara, Halon mutuku ap, Yahas mutuku ap, Mefaat mutuku ap,

²² Dibon mutuku ap, Nebo mutuku ap, Bet-Diblataim mutuku ap,

²³ Kiryataim mutuku ap, Bet-Gamul mutuku ap, Bet-Meon mutuku ap,

²⁴ Keriot mutuku ap, tonda Bosra mutuku ap nirya ara, ikin ning deipnamne. Winipnamne talak ara, sik Moab mutuku noutam uamuk mutuku nirya, mining dam aunyak mutuku ap, pera mutuku unyak nang ap nirya ara, wenebuka opnirye, sirya daknamne!

²⁵ Moab mutuku noutam uamuk mutuku nirya ara, kum daneipnamne. Winipmanto ara, ninye taruk yok ceplyopura, pil kum dopmanto ulamaka atonun, Moab mutuku wenepnyopura, sik imun kanye, mikip weik talibuka ulamik ning nirya ara, sice buklopnirye, bataknamne. Ati nara, Allah Yahweh arye, ayupu ara, akunum nyapdeipmasina ati, nong dipkoprob upnamlarya! Allah Yahweh arye, nabi Yeremia biti, laka nyabukba, sekuk.

“Moab mutuku unyak nang nirya, kanye namin asa arye unamake,” nyabuk yupu

²⁶ Allah Yahweh arye nyabuk, “Tonda, sik Moab mutuku nang nirya ara, yu mek dibikiba, kanye wangalamak touk, upnamake. Aning deiyok ara, anggunce na Yahweh dam ati, maknya kintinibuka kwalilamikce, malye kililalamike. Ati, sik Moab nang ara, wenebuka amu tam deipniba, sik dukna dukmacakuk bongop-bongop binamake. Wininmakiba, yuk nang arye eibikcopura, Moab nang ati, akutunamake.

²⁷ Aninguk kum bukni, minop talak ara, anggun Moab mutuku nang arye, Israel mutuku ulamik nang ati, akutulamlume. Tonda, sik Israel nang arye, ubula kum dolamikce, ubula don nang ap, neika kum ulamik bukni, sik Moab mutuku nang arye, Israel nang ati, akutulamlumce, malye yupu nyana ap, yep-yep ana yupu ap, minin yupu ap, nyalamlume.

²⁸ Anggun Moab mutuku noutam ululum nang ara, anggun ululum mutuku nirya ara, adiparyuk batakuka, bai sakuka bindopnamlume. Tonda, namin asa tunim abuka, keil bukamuk mutuku dup arye, yalma maka arye, duk deipnamlya ati, kot dam tiklamle yo taruk deice arye, aik labuka doplirye, duk delilamle touk, anggun babye namin asa, tunim abuka duknulbinamlume. Akeil bukuka pum noutam dabinuka ulamunyebuk, anggun mal olan nang arye, yanuka kum tomopnamsiaka ati, na Allah Yahweh arye, akunum nyapdeipsine.

²⁹ Anggun Israel mutuku noutam ululum nang nirya arye, Moab yala nang wininyak ning elilulume. Sikce wininyak ning ara, “Nunda pia telebe,” nyabuka, kwalinmakirye, erelanyake! Tonda, sikce “Nunda weik mambul nang unyabe,” nyabikirye, sik kanye erepdakirye, kwalinyak ning ara, elilulume. Awininyak ning ara, na babye akunum kekenune.

³⁰ Ati nara, Allah Yahweh arye, sik Moab nang arye, “Nunda pia telebe,” nyabuka, dipdanuka unyak ning nirya ara, akunum bikinume. Bukni, sikce talye yupu nyanyaka babye, dip ning kum nyanyake. Tonda, sikce kwalinmakcak arye, nyanyak yupu ap, sikce pil donyak ning ap nirya ara, talye ninguk, nong kum upmanto ninguk ulule. Aning babye, na akunum bikinume.

³¹ Wininyaka ati ara, sik Moab nang nirya ati, pia mikip arye engenune. Tonda, Kir-Heres mutuku noutam unyak nang ati, narye, ‘Se,’ tenebuka, pia engenauk unune.

³² Aning atonun, anggun Sibma mutuku noutam ululum nang ati, pia weik tonun engenamne bukni, Yaezer mutuku unyak nang ati ara, mitik tonun aryuk engenamne. Sibma mutuku noutam ara, anggur tapu, wa wibuka kouamika, el taruk kwa lekuka binamuka ani, weik mekwen, el si Laut Mati, deiamukak binamuk. Tonda, asukum ara, Amon mutuku arye dukdongobuka, pera weik mutuku, Yaezer mutuku binamuke. Bukni, wini talak ara, buppu li talak ara, duk mouna ati upmal bukni, anggun anggur tapu duk nirya ara, kum daknamlume. Aning nirya, sice buklopnamle deiyok ning dopkwetepniba, anggun dam yalyopura, aning nirya babye, kum danamle.

³³ Moab mutuku noutam, wa pia teleb kibuka wilamik mutuku nirya ara, aminyan kum kipdeipnyopura, kanye deibuka, telebuk ulamik ning nirya babye, kum kipnamle. Tonda, narye anggur mek memena ati, purubuka delinyaka ara, malye kipdeipniba, anggur mek ton tuba kum banamle. Aning babye, kum kipdeipnyopura, asukum arye dipdongobuka, doupnamle talak ara, amutuku nang arye, anggur mek kum memenamake. Tonda, teleb kanye bobuka kum unamake. Yupu weik tonun nyanamaka ara, kanye deibuka, teleb asa un ning ati kume. Imun kanye bobikirye, engebuka ngaluknamake.

³⁴ Sikce engebuka ngalukunamak talak ara, sik engenamak lelim ara, pera mutuku unyak nang babye, kekenamake. Ara, Hesyebon mutuku nang ap, Eleale mutuku nang ap, Yahas mutuku nang ap, Zoar mutuku nang ap, tonda asukum dipdongobuka, Horonaim mutuku nang ap, Eglat-Selisia mutuku nang ap, sik nirya babye kekenamake. Tonda, atalak ara, Nimrim mek nirya ara, pia cepdoplirye, kum kipnamle.

³⁵ Moab mutuku unyak nang ati wenepnamne talak ara, na Allah Yahweh arye, Moab mutuku noutam, siltong ning boyakirye, sik isa si erena ati, mutuku kon deice, uku dongonyakak nirya ara, kum kipdeipnamne. Tonda, sik atalye ning, isa si erena ati, kam ning obuka, uku dongonyakak ap, isa si erenyak nang ara, kum kipdeipniba, sikce isa si ton, tuba kum erenamake. Ati, nara Allah Yahweh arye, akunum nyapdeipmasina ati, aning nirya ara, dipkoprob nong upnamle.

³⁶ Aning ati ara, Kir-Heres mutuku noutam nirya arye, talibuka unyak ning ap, Moab mutuku noutam arye, talibuka unyak ning nirya ara, akunum kum kipdeipnamne. Winipniba, sik anang arye wininamak ning ati, eipnirye, bico unamnile. Nara, ninye dibikcopura, eibikirye, bico upliba, mot nyan ning, el si seruling bobuka, mot nyalamak atonun, na kanye talima noutam ara, engenamne.

³⁷ Wininamne talak ara, sik anang nirya ara, sik mal olan nang arye, ‘Alye dakanamakʼ tenen, sik kisok potong nirya kopnamake. Tonda, bam potong kopnamake. Tonda, sik taruk duk, parang arye sekikcopura, dila laka upnamle. Tonda, teleb baju ongolamik ning kwiriplobikirye, talye kain dobuka, sik deiyok dam kitibikirye, unamake.

³⁸ Na Allah Yahweh arye nyapsine. Winipmanto ara, ninye arye, ‘Amitik botol mek makau ton ap kum patapnamnilʼ tenen, aning colobuka, mitik-mitik kibuka bataklamaka touk ubuka, narye sik Moab mutuku unyak nang ati, weik tonun wenebuka opnamne. Aning akunum winipnyopura, sik asik deice, kat ning arye tapu kobuka, dobika deice tam ap, sik weik asik noutam, ‘Yupu talinamapʼ tenen, ninye bulunyakak ap, ninye weik tonun engebuka ngalunamake. Ara, ninye dibikiba, deipmakirye, weik tonun engebuka, malye nyalamak touk, wininamake.

³⁹ Se, anggunda bicoe! Narye, Moab mutuku uamuk ning nirya ara, sice kibuka bataknamne! Winipnyopura, yuk-yuk mutuku nang arye, sik Moab mutuku noutam unyak nang nirya ati, nalibuka akutunamake. Winibikcopura, sik Moab mutuku nang nirya ara, alye dadakirye, engenamake! Narye, Moab mutuku nang wenebuka opnyopura, yuk-yuk mutuku unyak nang eibikirye, Moab mutuku nang ati, ‘Kume, sikda pia malyeuk unyaka ati, obuka ara, teleb uka!’ tenebikirye, ilil unamle. Tonda, antanap dongobik mutuku, im sirya, mutuku sirya nirya unyak nang arye, Moab mutuku ati, nalibuka, akutunamake. Allah arye nyabuk.

“Moab mutuku nang ara, sik lyena ati, yuk bisik ton kum binmanto upnamake,’’ nyabuk yupu

⁴⁰ Nara, Allah Yahweh arye, ayupu nyapsine. Winipmanto ara, ayam olamle maka, el si Bib maka arye, ‘Dan ayam mi obuka dipnunʼ tenen, im deice lakuka, banmalya ani, tukwak yanilyarlinye, el pol tengel takalul touk, na Allah arye lo arepniba, tonok mutuku nang ton, mikip weik arye Moab mutuku olyanamake.

⁴¹ Olyanamak talak ara, Moab mutuku noutam, sik mal olan nang arye yakirye, weik keil poka domik asik el si benteng-benteng nirya ara, warikikirye, obuka dopropnamake. Tonda, sik yuk-yuk asik domik ning nirya babye, alubuka dopropnamake. Winipmanto ara, kilapu mi bomikca delinmakiba, uk weik arye donmaca ani nong mitang ulamle touk, sik Moab yin talin nang nirya ara, ilil uplyeba, sik nong mikip ara, mitang unamake.

⁴² Moab mutuku noutam unyak nang nirya ara, anggunce na Allah Yahweh dam kwalibuka erepdakirye, ‘El yupu ara kum kekenamabe,’ nyabuka yaniltaninyaka ati, narye obukapnirye malye kibuka bataknamne. Winipnikcopura, sik Moab mutuku unyak nang nirya ara, opnirye sirya daknamne. Aminyan talak ara, ninye arye, ‘E, amutuku noutam unyak nang ara, Moab yala nang unyake,’ pia kum tenenamake. Ayala nang, sik si kum kipdeipnamne.

⁴³ Se, anggun Moab mutuku noutam ululum nang ati, pia bico tenesenune! Deiyok ara ani. Ninye ona ati, weik tuku pum palipnamak tuku pum noutam sakuka opnamsile. Tonda, ninye arye, tapu wemikca pum wekmunce, youpliba opnamsiake.

⁴⁴ Yatanye do nirya, ‘Wena pum noutam weknunʼ tenen, elcuk bikbik abuka binamlanye bira, wena wemikca pum tam, sakuka weknamle. Tonda, apum tam tonap weleplirye, ‘Lyepdanunʼ tenen, bai sakuka, binamlanye bira, aminyan talak balirye, mangkau kanye bobuka, wena pum tam ton weknamle. ‘Aning nirya ara, winipnamle,’ tenepse talak, akunum dam uplyopura, dipkoprob winipnamle. Ara, na Allah arye, Moab mutuku noutam nirya ara, wenepnirye, amutuku nirya, malye kibuka opnamne.

⁴⁵ Winipniba, sik Moab mutuku nang ton, ‘Bikbik abuka bibirye, lyepdanamapʼ tenen, Sikda pera mutuku, Hesyebon mutuku wekelbinamake. Bukni, amutuku noutam babye, ninye deiyoknye el si Raja Sihon, el pia teleb aik, el si istana babye, uku dapniba, uku arye dipnamle. Auku dipnamle talak aryuk, sik mutuku wililonak ati, wililyamikak nirya babye, kum kipdeipnamle. Tonda, Moab mutuku bukni, iknapye tam mutuku dup babye, kum kipdeipnamle. Ati ara, sik minop talak, mandipna kanye weik ulamikce, ‘Nunda, pia mikip weik nang unyaba ati, yuk mutuku nang ati, talye parapkabuka olbinamabe,’ nyabuka, maknya kintinilamik nang, sik Moab mutuku nang nirya ara, obuka sirya daknamne.

⁴⁶ Ati ara, anggun Moab mutuku ululum nang ara, anggunda pia bicoe. Ara, kanye imun weik ning ara, anggun dam akunum yanamsile! ‘'Amutuku noutam ulul ning, anggunce isa si erelulum ning, el si Kamos ara, anggunti wenepsinirye, kum daneipnamsine. Winipnyopura, anggun ona ati, yanamak nang arye, anggunce deiamlum mapu ap, anggunce deiamlum kilmapu ap nirya ara, tomobuka dobukabikirye, sik pera mutuku bobikirye, wenen aik dongonamake.

⁴⁷ Na Allah arye, ayupu nyapmasina nirya ara, dipkoprob winipnamle. Bukni, doyanamle talak ara, narye Moab mutuku noutam nirya ap, Moab mutuku unamak nang ap ati, tuba tamubuka, teleb kipdeipnamnarya! Ayupu nirya ara, na Allah Yahweh arye, akunum nyapdeipmasina ati, aning nirya ara, dipkoprob nong upnamle! “Ati ara, na Allah Yahweh arye, sik Moab nang ati, wenebuka opnamne ning ati ara, akunum nyapsine. Ton ap dukdongobuka kum nyapnusine. Akunum nyapne. Allah Yahweh arye nyabukba, nabi Yeremia birye sekuk.