Yeremia 46 - Eipomek

Allah arye, Yahudi yala kum nang, mutuku sirya, im sirya nirya, yala yuk-yuk nang nirya ati, “Winipnamne” nyamuk ning ati, sekuk yupu

¹ Allah Yahweh arye, Yahudi yala kum nang, mutuku sirya, im sirya nirya unyak nang nirya ati, ‘Winipnamne,’ nyabuka, nabi Yeremia dam yanuka nyabuk.

² Ara, Yehuda mutuku taleamuka ninye deiyoknye, Raja Yosia elce deiamuknye, Raja Yoyakim birye, Yehuda yala nang, sik deiyoknye bikuka ulamuka ani, keting tamun dumbarye akunum kibuk talak ara, Allah arye sik Mesir mutuku ulamik nang ati, ayupu nyabuk. Ara, Babel mutuku taleamuknye, Raja Nebukadnesar birye, Mesir mutuku taleamuka deiyoknye, el si Firaun Nekho ap, el yin talin nang ati, weik balamle mek, Efrat mekin dam binuka nirya obuk. Firaun Nekho obukak ara, Karekemis mutuku dam obuk. Atalak ara, Allah arye Yeremia biti, yanuka nyabuk yupu ara, ani.

^3-4 Sik Mesir mutuku unyak nang ati, nyapnulyame. “Anggunda, kintiniplulume! Sik yin talin nang ati, sik deiyok nang arye, sik adiparyuk mal olana ati, kintinilamak ning ara, kintinibuka taliplulume! Ara, anggun ninye on tombak ap, parang ap, perisai ap ara, adiparyuk kintinipnalume! Kat ning arye memebik baju ap, kisok kaluna, topi perang ap, kintinipnalume! ‘Mal olanak bibiba, opsicakʼ tenen, kiniklamak ning ongopmunyopura, anggun asik dana-dana tam, kalikinak binuka kintinipnalume!

⁵ Bukni, na Allah arye, dinmasince, kel bikse. Sik amutuku nang ara, ilil ubukba, tamubuka yanamik bisikuk, bikbik abuka biyik. Sik yin talin nang nirya babye, ‘Yuk mutuku nang olbinuyapʼ tenen, bisik banmekbuk, sik ilil ati, tuba bikbik abuka binmace bisikuk, tamubuka yanmake. Sik yin nang ara, ilil pia kumce, mania kanye bonyak nang babye, sik olanak batakuka, bikbik abuka bace talak ara, aminyan ton, ‘Nun mal olan nang arye, nun balye tam bikbik abuka olyanusiak do, kum do?’ tenen, tamubuka, kum dipdenamake. Amutuku noutam nirya ara, ninye nirya ilil weik akunum ubuka ati, sik nirya arye, ‘Se,’ tenenauk unyake.

⁶ Mal olana kel weik nang babye, kum bikbik abuka binmanto upnamake. Tonda, yin nang sik deiyok nang babye, sik mal olan dam nang akunum olyakiba, ‘Nun lyepdanuyapʼ tenen, sik dam arye, bai sakuka binmanto kum upnamake. Sik mikip ara, mitang upliba, sik nirya yan dum dukliba, dabu tam, arah utara tam ara, weik mek el si Efrat mekinuk, sakuka poulbinamake.

⁷ Anggun amutuku ululum nang ara, moubuka dinamlume. Yata mutuku nang arye, ‘Yuk mutuku nang nirya ati, mal olalbinamapʼ tenen, kintinipmak do? Yata nang arye, aning wininamapʼ tenen, anggun damak yannyak do? Winipmanto ara, weik balamle mek, el si Nil mek onmalirye, langdibuka welelamle atonun unyak nang ara, yata mutuku nang arye do?

⁸ Dipkoprob ning ara, sik Mesir mutuku yin talin nang ara, yanganmaka ara dipdelulume. Sik Mesir mutuku nang arye, winibuka tenenyake. Sikcopura, “Kume, nunda mikip pia weik ap, ilil una kumce, mikip nang unyaba ati, nuncuk tikibirye, yuk-yuk mutuku nang nirya ara obibirye, anang nirya talinamabe. Yuk mutuku nang arye, sik asik dobuka, unyakak nirya ap, amutuku noutam unyak nang ap ara, obibirye, kum kipdeipnamabe. Nun yala nang arye, mutuku sirya, im sirya nirya noutam ara, binuka ubibirye, amutuku nirya lipnamabe,” nyabuka, sik Mesir mutuku noutam unyak nang nirya arye, utenebuka nyanyake.

⁹ Anggun Mesir mutuku nang arye, winibuka nyaluluma ati, na Allah arye nyapsine. Anggun kuda basam balye deice bukmalum yin nang nirya ara, meibuka bikbik abuka bilulume! Tonda, ninye olbana ati, kuda basam arye, tapu kirikmunba, libuka tuku deice balamle ning, el si kereta perang ara, kintinibuka bikbik abuka binamlume! Tonda, anggun mal olana ati, kel weik biklum yin talin nang arye, anggun yin ap, mal ap dopmunce, ninye mal olana ati binamlume! Tonda, anggun Etiopia mutuku ap, Sudan mutuku ap, Libia mutuku ap, ulamlum yin talin nang babye, adiparyuk menekuka mal pibilulume! Tonda, mal dona kel weik nang, anggun Lidia mutuku ululum nang babye, mal bopmunce, pibilulume!

¹⁰ Winipnamalum bukni, na Allah Yahweh arye, anggun nirya ati nyapsine. Nara Allah, pia deice tam erebuka, aning-aning nirya talibuka, Pia Mikip Weik Deiyoknye unune. Nara im deice unyak yin talin malaikat nirya, sik deiyoknye unune. Ayanamle talak ara, ‘Na Allah ati, ‘Nun lik,’ teneninyak nang nirya ara, wenepnirye, obuka sirya daknamne’ tenen, na akunum tenyamse talak, mambul weik talak akunum dam uple. Atalak noutam ara, mutuku sirya, im sirya nirya unyak nang arye, ‘Allah ara, nun lik’ tenen, na yupu yaninyak nang nirya ati, na yu weik upnuka deice arye, anang nirya wenebuka opnamna ati, sik nirya ati, kwang daknamnarya! Nara Allah, na ninye on ya arye dobuka, anang wenena ati, onmanya ani, sik ining pia weik banamle. Na ya arye sik ining dinmalya ani, akunum winiplirye boupnamle. Winipnamla deiyok ara, ani. Awinipmanto ara, nati akunum diba tenebuka bikamnik nang arye, ining ning obikirye, na si erena ati, aning boyanuka, uku dongolbalamak touk, anang olan talak ara, na Allah ati, ‘Nun lik,’ tenenyak nang nirya, akunum opnyopura, na Allah arye, ‘E, akunuma, na kanye deipne,’ tenepnamnarya! Ati atalak noutam ara, nara Allah Yahweh, pia deice tam erebuka, aning-aning nirya talibuka, Pia Mikip Weik Deiyoknye unune. Nara im deice unyak yin talin malaikat nirya, sik deiyoknye unune. Ati, na Allah ati, ‘Nun lik,’ teneninyak nang ara, utam dabu tam binamuk mek, el si ara Efrat mek dam, amutuku noutam, yin talin nang yupa pia weik tonun opnamaka ati, narye, ‘E, akunuma, na kanye deipne,’ nyapnamnarya!

¹¹ Ati, se, anggun Mesir mutuku noutam ululum nango, anggunda mitang nanguk ululuma ati ara, Gilead mutuku bimunce, ‘Nun suse kwetena ati, obat arepsitingʼ tenen ati, Gilead mutuku elbilulume! Amutuku noutamak, obat eipmunyakarye, dobuka dinamlum bukni, anggun uk dinamsil ning ara, pia kum lupmanto upnamsile.

¹² Tonda, anggun winimunye ning ati, Allah arye wenebuka opsiliba, alye weik dakalanamlume. Winipmunyeba, yuk-yuk yala nang eipsikirye, aning kekebuka biknamsiake. Yata mutuku noutam arye do? Tukwak mutuku im sirya, mutuku sirya unyak nang arye, anggunce, ‘Se,’ nyabuka, engenamlum ning ara, laka kipliba kekenamake. Tonda, anggun Mesir mutuku nang arye, ngalukunamluma lelim ara, ninye mutuku sirya, im sirya nirya arye, kekenamsiake. Deiyok ara, narye opsinyuopura, ilil una ati, anggun yin talin nang nirya arye, yan dum duksiliba, ton yin nang arye, ton yin nang deice poulbikiba, anggun neika daksakuka, tuku deice poulbinamlume.

Allah arye, sik Mesir mutuku ulamik nang ati, “Nebukadnesar olyanamsile,” nyabuk yupu

¹³ Allah Yahweh arye, nabi Yeremia dam yanuka, yupu nyabuk. Ara, Babel mutuku talibuka ulul ninye deiyoknye, Raja Nebukadnesar ap, el yin nang yupa pia weik ap yakirye, Mesir mutuku ninye olyanamika ati, Allah arye, Yeremia dam yanuka nyabuk. Ayupu ara, ani.

¹⁴ “Yeremiao, anyapdeipkin yupu ara, ance Mesir mutuku tam, asik donyakak nyalbinulyame. Ara, Memfis mutuku ap, Mikdol mutuku ap, tonda Tahpanes mutuku ap, unyak nang ati, “Anggunda, kintinibuka deipmunyakarye, unamlume,” nyabuka, laka nyapnulyame. Ara, anggun ninye olana ati, talibuka ululum ning nirya ara, dobuka, anggun mutuku dana tam ati, domlumak ara, bikbik abuka binamlume. Deiyok ara, ani. Ara, Allah arye lo arepliba, yuk mutuku yu nang arye, anggun mutuku bukni, dana-dana tam unyak nang olyanamsiake! Winipsicopura, mal olana deice arye, anggun mutuku dana-dana tam unyak nang nirya, kum kipdeipnamake!

¹⁵ Winibikcopura, anggunce asipdenamlume. Ara, “Se, nunce si erenyap isa, el si Apis bira, aisa si erena ati, sapi basam nong atonun kibuka memepdeiamupu patung ara, mikip weik ning ulul bukni, yata ati, el akunum bai sakuka biyuk do? Obika ati, sakuka bobinmok bukni, nun si erenya isa Apis ara, yata deiyok ati, tamubuka tiklirye, minop yanuka kum melipsutu do? Deiyok ara, Allah Yahweh, el mikip arye, anggun isa si erelulum ning, Apis ati, akunum obukba, tukwak deice sakuka biyuka atia!

¹⁶ Sik Mesir mutuku yin talin nang ap, sikti, melibuka yanamek nang nirya ap ara, yupa pia weik unyak bukni, Allah arye anang obuk talak ara, sik nirya ara, ilil pia weik ubukba, ‘Bikbik abuka bindopnuyap’ tenen, banmekbuk, mitang ubuka ati, yan dum duklirye, sakuka tukwak poulbalamak touk, akunum winibik. Winibikopura, sik bidamang nang ati nyapdayik, “Tuba amutuku uk ubipyopura, nun mal olan nang arye, obuka sirya daksikcak ati, nun nirya ara, tamubuka nun mutuku koproba uk bindopnuyabe,” nyalamik.

¹⁷ Aning ati ara, anggun Mesir mutuku ululum nang ara, anggun ninye deiyok kibuka, Mesir mutuku talibuk Raja ati, el minop si punubuka, el winiryuk si ara, nyabuka si sipnamlume. “Yupu maknya kintininanye ulula ati, elce yuk mutuku ulamik ninye opmanto talak ara, akunum kum dayuk,” nyabuka, el si ati si sipnamlume.

¹⁸ Nara Allah Yahweh, nara pia erebuka, deice tam ununa ati, aning-aning nirya talibuka, Pia Mikip Weiknye ununa anye arye, nara Raja unune. Tonda, im deice unyak yin talin malaikat nirya ara, sik deiyoknye unune. Tonda, na Allah Yahweh ara, Kam Deiyoknye ununa ati, ayupu ara, dipkoprob nyapsinye touk, na nyapnusin yupu babye, dipkoprob nong upnamlarya. Ara, winipmanto, yuk-yuk mitik mutuku kon erebuka, amutuku noutam bukuk bukni, Tabor mutuku kon ara, pia weik tonun erebuka bukuk touk, pia mikip weik nang yanganamake. Tonda, weik laut mekwen adeibuk bukni, Karmel mutuku kon aning deice tam belebuka bukuk touk, yuk mutuku yu nang mikip arye, amutuku nang dam yanuka opnamsiake. Akunum yangopura, sik mikip deice arye, amutuku nang nirya ati, opnamsiake.”

¹⁹ Ati, anggun Mesir mutuku noutam ulamlum nang ara, minop talak, pia telebuk ulamlum bukni, aminyan talak ara, anggunce, ‘Se, nun mal olan nang arye, bobinuka wenen aik dongolbinamsiakca’ tenen, anggun bona ara, kintinipmunce, dinauk unamlume. Aning ara, talye ati kum nyapsine. Deiyok ara, Mesir mutuku noutam bukni, sik weik asik deiyok sukum, amutuku si ara, Memfis mutuku ara, ayanamak nang arye, obikcopura, ninye ton una kumce, asik oldemuk uplirye, bipla papliba eipmunce ‘Se,’ tenepmunce, bikinamlume!

²⁰ Winipmanto ara, Mesir mutuku ululum nang ara, sapi basam nong weik nelamle touk winilulum bukni, weik utam arye yanamle deibum, dabu tam arye yanamle deibum ara, anggunti oplirye, malye kipdeipnamsile.

²¹ Tonda, anggun Mesir mutuku nang ara, ‘Yuk mutuku nang arye, yanuka opsicakʼ tenen, yuk-yuk mutuku yin nang arye nunti, melibuka kalikinamsiakʼ tenen, yo bok weik areamlumce, dekamlumba, yuk mutuku yin talin nang akunum yayikce, anggun mutuku akunum kalikisinyake. Bukni, winipmanto ara, sapi basam nong weik nemlye buk, mikip weik kum balamle atonun, anggun melin yin talin nang babye, akunum upmake. Ati ara, anggun Mesir mutuku nang wenena ati, arup akunum yalyopura, ikin ning dolon talak upmala ati, anggun melin yin talin nang, minopce yayik yin talen nang babye, ‘Se, nunti, wenebuka opsilirye, malye kipdeipnamsileʼ tenen, talipdarabuka, kum winipnamake. Sik ilil upliba, sik lyeldana ati, sik mutuku koproba tamubuka bindopnamake.

²² Anggun Mesir mutuku ululum nang ara, ‘Nun mal olan yin talin nang arye opsikcakʼ tenen, anang dam yakiba, ‘Lyepdanuyapʼ tenen, bai sakuka, banamlum talak ara, bal balyakarye, yupu kum nyalamle touk upmunce, dungnubuka binamlume. Anggun on nang arye, yanuka opnamsiak ning ara, kapak ya boyakirye, bai tam yo welamak touk, winipnamsiake.

²³ Winipmanto ara, Mesir mutuku bai tam, weik tikamuk yo, pia weik pamlye mutuku noutam ara, anggunce, ‘Asukum ara, ninye kum bitinge,’ tenelamlum bukni, aminyan talak ara, sikce, ‘Kume, ayo kan-kan noutam ara, yo webuka, kata kililamak touk, nun mutuku dam olyasiake. Yu nang arye, atonun winipnamsiake,’ tenebuka, kel biknamlume. Tonda, anggun mal olan nang ara, yin talin nang yupa ara, nukman kumto, weike, sul kwising weik ulamle touk, nukman kumto ulamak touk upnamake.” Ara, Na Allah arye nyapsine.

²⁴ Allah arye lo arepnamla deice arye, arah utara tam unyak nang arye, yanuka obuka, sirya dakikiba, Mesir mutuku unyak nang ara, alye dakanamake. “Ayupu ara, na Allah arye akunum nyapdeipne.”

²⁵ Israel nang, anggun ni koproba Allah Yahweh, im deice tam unyak yin talin malaikat, sik deiyoknye ulirye, el mikip weik ulule. Elce sik Mesir mutuku ninye biti nyabuk. “Anggun nirya moubuka dipdelulume! Mesir mutuku noutam bukni, mutuku si, Tebe mutuku, amutuku unyak nang arye, talye isa, el si Amon biti, si erenyak ning ap, Mesir mutuku ninye deiyok kibuka, Firaun ap, el amu tam yambul deiyok kibuka, pil donyak nang ap, Mesir mutuku si erenyak isa mer nirya ap, tonda amutuku nang nirya ara, Firaun bitibuk, ‘Se, elda pia mambule. Elcuk lyepnamsil,’ tenenyak nang nirya ara, na Allah arye, anggun nirya wenebuka opnirye, sirya daknamsine.

²⁶ Na Allah arye, anggun Mesir mutuku ululum nang dobuka, Babel mutuku taleamuknye, Raja Nebukadnesar ap, el yin talin nang ap, el amu tam pil dona deiyok-deiyok nang ap, sik dam arepniba, anggun isa si erelulum nang nirya ara, obuka, sice buklopnamsiake. Bukni, aminyan doupnamle talak ara, Mesir mutuku minop talak, ninye weik daulamik touk, doyanamle talak, tamubuka teleb kipdeipniba, ninye weik ton daukirye, telebuk unamake.” Ayupu nirya ara, na Allah Yahweh arye, akunum nyapdeipmasina ati, aning ara, dipkoprob nong upnamlarya,” nyapsine. Allah arye nyabuk.

Allah arye, el mapu koproba, sik Israel yala nang ati, “Lyepdopsiniba, teleb asa uk unamlume,” nyabuk yupu

²⁷ Bukni, na mapu koproba, anggun Israel nango. Anggun ilil una meme! Na amu tam pil dolamnuknye, anggun apu koproba Yakub, elce deiamukba, dadeipdanin yangalamikce, deipsik Israel nango, anggunce, ‘Se, yata wiripnamsil do?’ tenen, ilil kanye bona meme! Anggun ap, anggunce deipmunba, dadeipdanin banamak nang ap, anggun nirya ara, pia yuk mutuku bobinuka, delilbinamsiaka babye, anggun bobinuka delilbinamsiak mutuku noutam arye, lyepropsinirye, tamubuka anggun mutuku koproba boyasiniba, pia yamunce, teleb asa unamlume. Tonda, anggun nirya arye, yuk mutuku nang nirya ati, ilil kum unamsile. Anggunda, yuk nang ap olana kumce, narye anggunti, tonap tamubuka teleb kipdeipsiniba, teleb aryuk unamlume.

²⁸ Ati ara, se na mapuo, anggun apu koproba, Yakub birye deiamukba, dadeipdanin yangalamika ani, wini talak unmalum Israel nang ara, na amu tam ululum ati ara, anggun ilil una meme. Nara, anggun dam yanirye, anggun ati lyepdopnamsine. Minop talak anggun wenena ati, narye anggunda yakuka donoksiseba, yuk-yuk mutuku nang arye, sik unyak mutuku bobinamsikba, daulamlum bukni, anggun olana ati ninye, sik yuk-yuk mutuku ulamice buk, narye anang nirya obuka, kum kipdeipnamne. Winipnamne bukni, dipkoprob nyapsine. Anggunce, malye winin ninguk talibuka, malye-malye weik winilamlum ning ati, narye, ‘Daupmalye, aning ara, talye lubakibuka namin kipnamsine,’ kum nyaptinye. Ati, aminyan talak, anggun malye-malye ning winilamlum touk, anggun dengna ati wenepnamsine. Bukni, anggun nirya ara, obuka sice buklobuka, min kume kum daneipnamsine. Aning kum bukni, aminyan doupnamle talak ara, tonap teleb kipdeipnamsinca! Anoutam talak, anggunti obuka bobinamsik yala nang nirya ara, aminyan talak narye opnirye, kum kipdeipnamne. Bukni, anggun Israel nang ara, pia kum bataknamsine. Na ap, anggun ap, neika pia unamaba ati, aminyan talak ara, pia teleb kipdeipsiniba, telebuk unamlume. Na Allah Yahweh arye, ayupu nirya akunum nyapmasina ati, aning nirya ara, dipkoprob nong upnamlarya, nyapsine.” Allah arye nyabuk.