Yeremia 45 - Eipomek

Allah arye, Baruk el dam yanuka, nyalin yupu nyabuk

¹ Yosia elce deiamuknye Raja Yoyakim bira, Yehuda yala nang ulamik mutuku nirya taleamuk talak ulamuka ani, keting tamun empat tahun mabuk talak ara, na Yeremia birye, ninye si, Neria elce deiamuknye, surat sekna deiyoknye, el si Baruk biti, “Anyapnukin ning, tonok buku noutam ton sekuka deipnulyame,” nyapsiba, anyapdeipse yupu nirya ara, sekretaris Baruk birye, akunum sekuk. Asekuk yupu ara, ani.

² Sik Israel nang arye, si erenyak Allah, el si Yahweh arye, ayupu nirya ara, nabi Yeremia biti nyapdeibukba, Yeremia el surat sekna pil talibuka domuka deiyoknye, Baruk biti nyabukba, anyabuk yupu ara, Baruk birye sekeibuk.

³ Na Allah Yahweh arye, anda Baruk biti, ayupu nyapdeipkine. Ance utenebuka nyalyame, “Se, Allah arye, ikin ning weik arepnukba, nara ikin deiceuk ununa ati, na mambul kanye bobuka unune. Na ikin ning dopropsirye, kanye imun pia weik unulule. Wininulul talakuk, Allah arye tonap tabakuka, ikin ning weik tonun ton, na deice delinulule. Ati ara, narye, ‘Se, aning ara, yata deiyok ati unulul do?’ tenen, teninauk unune. Tonda, nara urdem tunim abuka kum unune. Ikin ning yaniliba dopropnirye, imun kanye bobuka ununa ati, dikdik sepmanto kum unune. Winipniliba, na mitang asa ununa ati, kum winipmanto unune. Baruk ance, na Allah ati nyabuka, malye nyanilyame.” Allah arye, Baruk biti nyabuk.

⁴ Nyabukopura, ayupu ton dukdongobuka nyabuk. “Bukni, anda Baruko! Na Allah Yahweh arye nyapkin yupu ara, moubuka kekepnulyame. Na Allah arye, Yehuda mutuku noutam arye, domse ning yuk-yuk nirya ara, akunum deiyok koubuka dakaltakanmane. Winipmanto ara, na Allah Yahweh arye, amutuku noutam arye, akunum kouamse ning nirya ara, webuka batakanune. Ara, Yudea mutuku noutam pil domse ning nirya ara, amutuku sirya, im sirya nirya ara, sice buklopnamne.

⁵ Ati ara, anda Baruk birye, ‘Na ti, Allah arye na dam ara, teleb ninguk upnutueʼ. Tonda, yuk nang nirya arye, nati, ‘Elda telebnye,’ tenepnikirye, ‘Telebuk kinamniake,’ tenenmalama ara, yata ati do? Ato ning tenepmalama ara, bataknulyame! Baruko, ance aning tenimalama ara, adiparyuk bataknulyame. Na Allah Yahweh arye, tukwak nang, mutuku sirya, im sirya nirya unyak nang nirya ara, sik deice ikin weik ning deibuka wenenamne. Winipnyopura, an babye ikin asa unamlam bukni, winipmaminya babye, anda damutuku binmaminya babye, kum dipnamlame. Ara, na Allah arye anti, lyepropnamkine. Anda kamuk unalame. Winipmanto ara, yin talin nang arye, ninye olanak arye tamubuka yakirye, ‘E, nun mal olan nang opmapu sukum arye, ateleb ning ton dopromse ning ara, ani,’ nyalamak touk, ance an tuba kam unalam ning ati, ayupu atonun nyapnamlyame. Ayupu ara, na Allah Yahweh arye, an Baruk biti nyapdeipkine.” Allah arye nyabuk.