Yeremia 44 - Eipomek

Allah arye, Mesir mutuku ulamik Israel yala nang ati, nyabuk yupu

¹ Allah Yahweh arye, Mesir mutuku noutam bukni, Migdol mutuku ap, Tahpanes mutuku ap, Memfis mutuku ap, tonda iknapnye tam, (arah selatan) mutuku noutam asik dobuka ulamik Israel nang ati tenibukce, na Yeremia dam yanuka nyapdeipnuke. Allah arye nyapdeipnuk yupu ara, ani.

² Israel nang arye, ‘Nun ni koproba,’ nyabuka, sikce si erenyak Allah ara, na Yahweh arye nyapsine. Nara, im deice unyak yin talin malaikat nirya ara, sik deiyoknye ununa ati, na mikip weiknye birye nyapsine. Ura, anggun nirya moubuka tenipnamlume! Yerusalem mutuku ap, Yehuda mutuku noutam unyak nang nirya, sik asik dobuka unyak mutuku nirya ara, narye sik wenena ati, ikin ning arepsiba, imun kanye bobuka unyaka ara, anggun ton akunum elilulume. Wini talak ara, anggunce, amutuku tenipnamlume. Sik wenena ati, lo arepsiba, sik yuk mutuku yu nang arye, yanamikce, Yerusalem ap, Yehuda mutuku weik asik dobuka ulamik mutuku nirya ara, ulubukabikce, malye kibuka oplobikba, ton nang dibik, ton nang bobinamik. Ati ara, anggun mutuku koproba ara, oldemuk ulule. Ninye ton amutuku noutam kum unyake. Aning ara, na Allah arye ikin ning dobuka, sik deice deipseba, anggunce akunum eibuka biknamlume.

³ Aning winipsa deiyok ara, talye ati kuma. Deiyok ara, sik amutuku ulamik nang arye, malye weik tuba-tuba winilamika ati, na yu ulamnuka deice arye winipse. Sik amutuku ulamik nang arye, sik si bikina kum ning bukni, talye isa ap, anye atonun, talye dewa ning ap, si erena ati, domba ato ning obuka arelyangalamikce, atalye ning ati, si erelamike. Atalye ning ap, isa ap ara, sik atalak Yehuda mutuku noutam ulamik nang babye, anggun atalak unmalum nang babye, anggun apu yapu min talak ulamik nang babye, aning nirya ara, anggun si kum bikamlume.

⁴ Narye anggun Israel nang, anggun apu yapu ap, anggun wini talak ululum nang ati, ‘Se, malye winibiceba, wenepsinyakʼ tenen, narye tuba-tuba tenilamsisirye, na yupu laka nyana ap, aminyan winipnamle ning laka nyana ati, pil don nang, sik nabi-nabi nang dobuka delilbinamsiba, anang arye, anggun amalye ulamlum Israel yala nang ati, dopdeiamsiseba, na yupu laka nyalamik. Sik nabi nang deice nyalamsise ning ara, “Anango, Allah arye, ‘Apia malye ning nirya ara, kum wininamlume. Aning nirya ara, na pia lik ati, winina pia kume,’ tenesulula ati, anggunda amalye wininmaluma ara, adiparyuk bataknamlume,” nyabuka, nabi nang deice yupu deipneura, sikce nyalamsike.

⁵ Bukni, sik nabi nang arye, anyalamsik yupu ara, kum kekelamlume. Tonda, ‘Aning ara, dipkoprob nyanmasiaka,’ kum tenelamlumce, kum kekelamlume. Tonda, anggunce, ‘Se, nun malye wininyap ning ara, adiparyuk bataknuyabe,’ kum tenelamlume. Ara, anggunce talye isa mer ati, kam ning obuka arelbalamlum ning babye, kum bataklume.

⁶ Ati ara, anggun malye ulamlum ning ati, na yu weik upnukba, wenen ning dobuka, anggun deice deipsise. Tonda, Yehuda mutuku noutam ulamik nang, sik asik dobuka ulamik sukum ap, Yerusalem mutuku, weik asik noutam ulamik nang, sik bisik yamikce balamikak nirya ara, na yu upnukba, amutuku nirya ara, obuka sice buklopseba, oldemuk ubuk. Winipmanto ara, ninye arye, uku sekikirye diplyeba, tuku nirya silal selamle atonun, wini talak Yehuda mutuku nirya, eibuka biknamlume.

⁷ Ton wini talak ara, anggun Israel yala nang arye, Nun ni koproba,’ nyabuka, na si erenululum Allah ara, im deice unyak yin talin malaikat nirya, anggun deiyoknye ununa ati, na mikip weik unune. Nara, Allah Yahweh arye anggunti, asipdenmasine. Yata deiyok ati, anggun bidamang nang ati, malye kilin ning dobuka, anggun nong deice delilalulum do? Winipmanto ara, anggun bidamang arye, olilan ning dobuka, anggun deice deipdalumce, kanye imun usulul do? Malye weik tuba winipluma deice arye, wenepsiliba, anggun Yehuda mutuku noutam ululum nang ara, sal babye, kilapu babye, tonda anggun mapu babye, sik pia mitik mapu babye nirya ara, kum danamle. Anggunce, ‘Kume, nun yala nang kum daliba, tonok babye kum unamabe,’ teneplumce, malye weik tuba winilulum do?

⁸ Tonda, anggunda yata ati, na yu kilinululum do? Anggun Mesir mutuku yanuka, akunum aumunya ara, ninye asik nang yanuka ululum bukni, sik amutuku nang arye, talinyak isa si erena ati, anggun Israel nang arye, domba ato ning obuka, arelyangalamlumce, talye ning ati, si erelulume! Anggun mining deiceuk, malye kipdalumba, aminyan talak sik mutuku sirya, im sirya nirya unyak nang arye, anggun Israel yala nang ati, ‘Se, sikda pia malye nang unyake,’ nyabuka, akutubuka nalinamsiyake. Tonda, yuk nang arye, anggun si ati ara, ‘Sikda subuk nang,’ nyapnamsiaka ati winilulum do?’ nyabuka, malye yupu nyanamake.

⁹ Anggun apu yapu Yehuda mutuku noutam ulamik nang ap, tonda Yerusalem mutuku bisikak balamik nang ap, tonda Yehuda yala nang ati, ninye deiyok nang kibuka, Raja-Raja ulamik nang ap, sik Raja nang arye domik kilapu nirya arye, malye upnin yangalamik ning ara, akunum luba kiplum do? Tonda, anggun wini talak aunmalum nang ap, anggunce doplum kilapu nirya arye, pia tuba malye unyak ning ara, anggunce akunum luba kiplum do?

¹⁰ Bukni, anggun apu yapu, minop talak ulamik nang babye, wini talak kam ululum nang babye, ‘Se, nunda dipkoprob pia malye unamabe. Aning ara, adiparyuk bataknamabe,’ nyabuka, anggun talima lamapdongobuka, namin asa arye, kum unamlume. Narye anggun apu yapu nang ap, anggun wini talak ululum nang ap ati, “Teleb una ara ani. Aning-aninguk talibuka, diksukumuk wininamlume,” nyapdeiamsise yupu ara, kum moubuka taliplumce, na si dipkoprob kum erenululume.

¹¹ Winiluluma ati ara, anggun Israel yala nang arye, ‘Nun ni koproba,’ nyabuka, anggunce si erenululum Allah ara, na Yahweh arye nyapsine. Nara im deice unyak yin talin malaikat nirya ara, sik deiyoknye ununa ati, na mikip weiknye birye nyapsine. Na Allah Yahweh arye, aning akunum tenepsa ati, dipkoprob winipnamsine. Anggun Yehuda mutuku noutam ululum nang nirya ara, anggun Israel yala nang nirya ara, obuka malye kibuka opsinirye, sirya daknamsine. Anggun nirya obuka, sice buklopnamsine.

¹² Tonda, Babel mutuku nang arye kum omikba, anggun Yehuda yala nang, tuba mitik tonun unmamunye nang arye, ‘Mesir mutuku uk, bibirye, unamapʼ’ tenen, binamak nang nirya ara, Mesir mutuku noutamuk dipnamake. Ara, sisin nang babye, sisina kum nang babye, sik nirya ara, Mesir mutuku aryuk dipnamake. Ara, mal olan deice ap, din ton kum daliba, din patan deice arye, sik anang nirya ara, dipnamake. Sik anang dibikiba, yuk nang arye aning eibikirye, “Se, anang winibuk touk, winipsilyake!” nyabuka, ilil unamle. Tonda, ton nang arye, yuk nang ati ara, “Allah arye, anang subuka atonun, sik babye suptue,” nyabuka, yuk nang ati, malye yupu nyanamake.

¹³ Tonda, narye Yerusalem mutuku noutam ulamik nang ati, wenepse touk, anggun Mesir mutuku unamlum nang babye, wenepnamsine. Ara, mal olan deice ap, din patan deice ap, tonda sakdanin balamle uk din deice arye, sik nirya ara, dipnamake.

¹⁴ Yehuda yala nang tuba mitik tonun unmek nang arye, “Nunda, Mesir mutuku uk, binuyabe,” nyabuka, amutuku akunum biyik nang ara, tonok nang babye, ton batakniba, kam kum unamake. Sik anang kan-kan arye tonok nang babye, Mesir mutuku batakikce, Yehuda yala nang, sik mutuku koproba kum tamubuka yanamake. Diba, sik anang weik tonun, ‘Nun mutuku tamubuka yatibye,’ tenenamak bukni, ninye weik tonun, kum yanamake. Bukni, ninye mitik tonunuk, sik mutuku tamubuka yanamake. Allah arye Yeremia biti, akunum laka nyabuk yupu ara, Yeremia birye, ayupu nyabuk.

¹⁵ Yeremia birye ayupu akunum nyabukura, el yupu kekenmek nang kan-kan arye, ninye ton sik domik kilapu arye, isa si erena ati, kam ning obuka arelbalamikba, bikamik nang ap, tonda, Yeremia dam tikilyanagalamik kilapu ap, Mesir mutuku bukni, eitam mutuku, Patros mutuku unmek nang ap, yupa pia weik tonun asukumuk bulubuka yanmekce kekemek. Ayanmek nang arye, Yeremia biti ayupu nyabik.

¹⁶ Kume, ance nunti, Allah Yahweh el si deice arye nyapmasilam yupu ara, nunce, ‘E, dib nyapmasileʼ tenen, kum kekepnamabe.

¹⁷ Nunce, ‘Wininamabe,’ nyabuka, nyalin yupu deice nyapdeiamupu yupu deice arye, akunum nyapdeibupu ning nirya ara, kum bataknamabe. Nunce aning nirya, adiparyuk winipnamapca! Ara, nunce Allah si erena ati kum bukni, yuk-yuk ning ati, im deice ulul ninye deiyok kil, el si erena ati, teleb aren ning bobinuka arelbanamabe. Tonda, ‘Aren ning pia teleb upnamleʼ tenen, aning deice ara, anggur mek ton dikilongonamake. Aning nirya ara, nun isa kil, el si erena ati, arelbanauk wininamabe. Aning wininamaba ara, nun wini talak unyap nang ap, Yehuda yala nang, nun apu yapu ap, ninye deiyok kibuka, nun mutuku taleamsik nang, nun Raja-Raja nang ap, sik amu tam pil dona deiyok kiamik nang ap, aning atonun ulamik. Tonda, Yerusalem mutuku noutam bisikak balamik nang ap, tonda Yehuda mutuku noutam asik domikce daulamik nang ap, nun nirya arye, min talak isa kil si erelamupu touk, wini talak babye, el si tuba erenamabe. Winibipya babye, nun deice ikin ning kum yanamsile. Atonun, minop talak, isa si erelamupu talak ara, nun pil dolamupu ning nirya ara, telebuk uamuk. Tonda, nun din ning yala-yala weik awamukba, weik tonun dipnarye, telebuk ulamupu. Ati ara, nun nirya arye, aninguk talibuka wininamabe.

¹⁸ Bukni, nunce tenipmap ning ara, ani. Ara, im deice ulul ninye deiyok kil, isa kil ati, nunce domba ato ning obuka, kum arelbalamuburye, aning teleb kilina ati, anggur mek bobinuka, kum dikilongolamubu. Aning nirya batakamupu talak ara, nun patan ning yuk-yuk nirya ara, pia kum dandomsuke. Tonda, nun mutuku tam nang nirya ara, yuk mutuku yu nang arye, mal olana arye, olamsikba akunum diamike. Tonda, din ton kum dayukba, din patana deice arye, akunum diamike. Amutuku ninye ap, amutuku kilapu ap arye, Yeremia biti, nyabik.

¹⁹ Tonda, sik amutuku kilapu nirya arye, ayupu tamubuka nyabik. “Anda moubuka tenipnalyame. Nun akanye yapu, sikce ton melisinyaka arye, nun isa kil ati, teleb aren ning arenyabe. Ara, batakna kumce, nun isa kil el si erena ati, roti kwaning, el si kue dabibirye, isa kil el urasin atonun ubuka, kue deice memebibirye, arenyabe. Tonda, el si erebuka kina ati, siltong teleb ning dobuka, uku dongona ap, tonda nun arenyab ning deice anggur mek ap ara, el isa kil ati, arelbanauk wininamabe. Nun akanye yapu melisinyaka deice arye, Telebe winipnamlume,’ nyapsikiba, nunce aning pia kum batakanamabe. Pia arenauk unamabe,” sik akilapu nirya arye, Yeremia biti nyabik.

²⁰ Nyabika ati ara, Yeremia birye, abulubuka wekmek sal ap, kilapu ap nirya, ayupu nyabikopura, sikti, ayupu ton tamubuka nyabuk.

²¹ “Ura, anggun ton kekeplulume! Yerusalem mutuku noutam bisikak nirya ap, tonda Yehuda mutuku noutam asik nirya domikce, daulamik nang nirya ap, tonda anggun apu yapu ap, sik ninye deiyok kibuka taleamsikce, Raja-Raja ulamik nang ap, sik amu tam pil dona deiyok kiamik nang ap, anoutam nirya daulamik nang nirya arye, minop talak isa mer ati, sik si erebuka domba ato ning obuka, arelbalamlum ning ara, nun ni Allah Yahweh arye, kum eibuka ati, kum bikilule. Tonda, ‘Aning nirya akunum lubakibuk,’ tenepmalumce, ayupu nyapmanulum do? Allah Yahweh arye, ‘Nun malye winin ning nirya, tonap kum teninamabe,’ tenepnamlum do? Kume, anggun walwal aryuk aning tenepmalumce nyapmanulume.

²² Dipkoprop ning ara nyapnusine. Isa mer si erena ati, anggunce domba ato ning obuka, arelbalamlumce, aning deice anggur mek dikilongolamlum ning ara, Allah arye eibuka bikamuka ati, aning kum bataksutue. Kume, anggun amalye winimunya deice arye, Allah elti, yu kililulume. Tonda, Allah arye sikti, ‘Kume, amutuku nang, pia malye wininyak ning ara, tuba kum eiptinye. Aning nirya ara, na lik weik unululule,’ tenyamuk. Ati, minop talak arye dipdongobuka, anoutam talak ap, wini talak ara, anggun mince ulamlum mutuku nirya ara, Allah arye akunum malye kibuka bataksuka ati, oldemuk ubuk. Ara, amutuku tuku pum tam arye, aning-aning ton tuba kum palamukce, tuba kum palule. Tonda, ninye ara, amutuku noutam tuba kum unyake. Tonda, yuk nang arye, sik mutuku malye winipnin balamuk ning eibikirye, ‘Se, amutuku noutam ara, Allah arye subuk nang, ikin weik ulamik touk, anggun babye atonun unamlume,’ nyabuka, yuk nang ati sunyake. Tonda, yuk nang arye eipsikcopura, anggunti nalinamsiyake.

²³ Anggun mutuku oldem ubuka, deiyok ara, ani. Ara, Allah Yahweh arye, ‘Aning ara, wininamlume. Aning ara, pia kum wininamlume,’ nyapdeipsuk yupu nirya ara, anggunce yanilamlume. Allah arye, mem yupu nyapdeamsuk ning babye, anggunce kum kekelamlumce, aninguk talibuka kum winilamlume. Tonda, elce ‘Teleb winina ara ani, malye winin ning ara ani,’ nyabuka peterelamsuk yupu babye, talibuka kum dobolbalamlume. Ati ara, Allah el yu ubukba, el mikip weik deice arye, anggun mince ulamlum mutuku nirya ara, malye winililalulumba, pia malyeuk ubuk. Dipkoprop, atalak babye, aning nirya, tuba elinune. Nun mutuku koproba ara, pia malyeuk ulule.

²⁴ Yeremia birye, el dam bulubuka wekmek nang nirya ap, isa si erebuka, ayupu nyanmek kilapu ati nyabuk. “Anango, anggun Yehuda mutuku, mince ulamlum nang bukni, amutuku batakuka, Mesir mutuku yanuka aunmalum nang ati, nyapsine.

²⁵ Anggun Israel nang arye, ‘Nun ni koproba,’ nyabuka, mince el si erelamlum Allah Yahweh arye, ayupu nyapsile. Elda im deice unyak yin talin malaikat nirya ara, sik deiyoknye ulirye, pia mikip weiknye birye ayupu nyapsile. Anggun Israel yala nang ap, anggunce doplum kilapu ap, anggun nirya arye, ‘Kume, im deice ulul ninye deiyok kil, isa ati, el si erena ati, teleb ning arebibirye, anggur mek aning deice dikilongonamabe. Aning batakna kumce, pia talenamabe,’ nyabuka, akunum nyalin yupu deice nyapdeiplum ning ara, dipkoprob anyapdeiplum touk, akunum winilulume. Ati ara, telebe merekuka, anyaplum touk, dawininamlume!

²⁶ Bukni, wini talak Allah Yahweh arye anggunti, nyapnamasil yupu ara, moubuka kekepnamlume! Ara, anggun Yehuda mutuku noutam ulamlum bukni, amutuku batakuka, Mesir mutuku yanuka, tuba asukum ululum nang ati nyapsine. Na Allah Yahweh arye, na pia mikip weik unilye si deice arye, nyalin yupu nyapsine. Se, anggun Israel yala nang, Yehuda mutuku ulamlum nang bukni, wini talak ara Mesir mutuku akunum ululum nang ara, wini talak arye dipdongobuka, do upnamle talak nirya ara, anggun si bambol arye, na pia teleb si ton, pia kum nyanamlume. Ara anggunce, ‘Nyalin yupu nyapnuyapʼ tenepmunye talak ara, na si deice arye, nyalin yupu ton kum nyanamlume. Anggunce, ‘Allah Yahweh dipkoprob kam pia ulula atonun, winipnamne,’ nyapdeiamuk yupu tonap pia kum nyanamlume.

²⁷ Tonda, na Allah arye, anggun Israel yala nang ati, moubuka eipsinirye, tuba dinamsin bukni, ara, ‘Anang ati, teleb kilinamne,’ kum tenenamne. Aning kum bukni, narye anggun aululum nang ati, ‘Anang ati, malye kipdeipniba, ikin weik unamakʼ tenen, moubuka dinamsine. Ara, talye ati kum nyapsine. Anggun Yehuda mutuku, mince ulamlum bukni, amutuku batakuka, Mesir mutuku yanuka, wini talak unmalum nang ara, ikin kanye uk bobuka, ulamunya ani, anggun nirya ara, mal olan deice ap, uk weik arye dilirye, dakdongopdanin ban uk din deice arye, dipnamlume. Winibuka mitik ninye mitikto, dem kipnin banmamunya ani, sirya talak ara, anggun nirya, sirya dakmunyopura, kum danamsile. Atalak ara, anggun yalanye tonok babye, Mesir mutuku noutam, pia kum unamle.

²⁸ Bukni, sik ninye mitik tonun, kum dipnamak bukni, sik anang Mesir mutuku arye tamubuka, Yehuda mutuku noutam, sik mutuku koproba uk, binuka unamak nang ara, mitik tonunuk, tamubuka yanamake. Winibikcopura, atalak arye, sik Yehuda yala nang ara, moubuka biknamake. Ara, mince Yehuda mutuku batakamikce, Mesir mutuku yanuka ulamik nang ara, sikce nyalamik yupu nong akunum upmal do? Akumopura, na Allah arye, nyamsise yupu ara, nong akunum upmal do?’ tenen, ayupu teneipdekirye, biknamake.

²⁹ Na Allah Yahweh arye, ayupu ton nyapsine. Ura, atalak ara, Mesir mutuku noutam, asukum tuba ululum nang ara, anggunce diksukum pia kum winilamlumce, malye winin ninguk, talibuka winiluluma ati, amutuku noutam aryuk, wenebuka opnamsina ati, ‘Anggun biknamlumʼ tenen, narye peteren ning ton arepnusine. ‘Anggun deice ikin weik ning deipnamsinʼ tenen, kintinipse ning ara, dipkoprob anggun dam upnamne. Anggun bikin ning laka kilina ati, winipnamsin ning ara, ani.

³⁰ Ura, na Allah Yahweh arye nyapsine. Mesir mutuku ninye deiyok kibuka, Raja Firaun, el si ara Hopra biti, Mesir mutuku talibuka ulul bukni, narye lo arepninyeba, yuk mutuku nang arye, ‘Se, anye Hopra biti optibye,’ tenenyak nang, sik deice, narye dobukadeipnamne. Minop talak winilamse touk, Yehuda mutuku taleamuknye, Raja Zedekia dobuka, el ona ati arepnamne. Ara, Babel mutuku talibuka ululnye, Raja Nebukadnesar birye, ‘Anye Raja Zedekia bira, optinyeʼ tenelulnye, el deice arepsiba, Zekekia obuk atonun, wini talak ara, na Allah arye, Mesir mutuku talilula deiyoknye, Firaun Hopra dobuka, el on nang ati, sik deice deipnamne. Sik anang arye, Firaun Hopra opnamake. Na Allah Yahweh arye, ayupu nyapmasina ati, aning ara, dipkoprob nong upnamlarya!