Yeremia 43 - Eipomek

Yohanan birye, Yeremia ap, yuk Israel yala nang ap dobuka, Mesir mutuku bobiyika ati, yupu

¹ Ura, Allah Yahweh arye, na Yeremia biti, “Yehuda mutuku tuba unmek Israel yala nang ati, ayupu bobinuka nyalbinamlume,” nyapdeipnuk yupu, narye anang ati, ayupu akunum binuka nyapse. Ara, Israel nang arye, si erenyak Allah, anggun ni, Allah Yahweh arye nati, laka nyapdeipnuk yupu, akunum laka nyapdeipse.

² Binuka laka nyapsiba, sik talima erebuka maknya kintinin nang ara, Hosaya elce deiamuknye Asarya ap, Kareah birye deiamuknye Yohanan ap, sik yuk maknya kintinin nang nirya ap, neika asinibuka, na Yeremia biti, ayupu nyapnike. “Anda, tilila yupu dem nyanmasilame. Nunce si erenyap Allah, el si Yahweh arye, ‘Anggunda, Mesir mutuku binuka kum unamlume,’ kum nyapmasil buk, ance talye yupu dem nyanmasilame,’ nyapnike.

³ Tonda, sikce na Yeremia biti, nyapnike. ‘Nun kanye ara, ninye si Neria, elce deiamuknye Baruk, elce yupu mikip arye anti, ‘Nyapnulyame,’ nyapkuka ati, elce nyapdeipkuk yupu nyapmasilame. Deiyok ara, mitik tonun, Yehuda mutuku tuba unamap nang, nun dam binuka nyapminba, diba tenebuka unmabiba, ‘Aminyan talak, sik Babel mutuku yu nang arye, yanuka talibuka ukirye, opnamsiakʼ tenen ati, ayupu nyapmasilame. Akumopura, ‘Sik Babel nang arye, Yudea mutuku tam tuba unyak Israel nang nirya bobinuka, Babel mutuku nang arye, sik mutuku bobinamsiakʼ tenen, anye Baruk birye nyapmakila ati, ance yanuka nyapmasilame,” nyapnike.

⁴ Sik maknya kintinibuka unmek nang arye, ayupu nyabika deice arye, Kareah birye deiamuknye Yohanan ap, tonda el ap neika unmek yin talina deiyok nang nirya ap, tonda tuba mitik tonun unmek Yehuda mutuku noutam unmek Israel yala nang ap, sik nirya ara, Allah Yahweh arye sikti, “Yehuda yala nang, asukum anggun mutuku noutamuk unamalume,” nyapdeibukba, Yeremia birye binuka, laka nyabuk yupu ara, pia kum kekebik.

⁵ Adeice arye, Kareah birye deiamuknye Yohanan ap, tonda yin talina deiyok nang nirya ap, sik mitik tonun tuba, Yehuda mutuku unmek Israel yala nang nirya bobuka, Mesir mutuku biyik. Tonda, atalakuk, minop talak Babel mutuku dabinuka deiamikba, ikin arye daulamika ani, Babel mutuku tamubuka, sik mutuku koproba, Yudea mutuku yanuka unmek Israel nang babye, amaknya kintinilamik nang arye bobinuka, Mesir mutuku uk, bobiyik.

⁶ Mesir mutuku bobinamik nang ara ani. Ara, Israel yala nang ap, kilapu ap, tonda sik mapu ap, Yudea mutuku ninye deiyoknye, Raja elce deiamuk kilmapu ap nirya, Mesir mutuku bobiyik. Tonda, sik dem kum bukni, na Yeremia ap, Neria birye deiamuknye Baruk ap, tonda Babel mutuku yin talin nang, sik deiyoknye, el si Nebusarad birye, ‘Anggunda Gedalya ap neika unamlume. Ara, Sapan birye deiamuknye Ahikam, elce deiamuknye Gedalya bira, Yudea mutuku talina ati, ninye deiyoknye kibuka taliplirye, el unamlak dem, anggun ton asukumuk unamlum nang ara ani,’ nyapdeibuk nang nirya ap, tonda na Yeremia ap, sik maknya kintinibuka unmek nang arye, anang bobinuka, Mesir mutuku uk, bobisike.

⁷ Winibika deice, Allah Yahweh arye, ‘Winipnamlume. Aning ara, pia kum winipnamlume,’ nyapdeipsuk yupu ara, batakik. Allah arye nyapdeipsuk yupu batakikce, nun bobuka, Mesir mutuku bobisikce, nun ap, sik ap ara, Tahpanes mutuku binmapu.

⁸ Tahpanes mutuku abinuka unmapu talak ara, Allah Yahweh arye, na Yeremia dam yanuka yupu nyapdeipnuk. Ayanuka nyapdeipnuk yupu ara, ani.

⁹ Yeremiao, ance weik keil weik tonun ton palibuka dopmince, Tahpanes mutuku noutam bukni, Mesir mutuku ninye deiyoknye, Firaun bira, el weik aik dam wekelbana ati, el aik bisik bublan damuk binuka, akira tuku noutam palipmince, akeil-akeil nirya tuku pum bisik dongopnulyame. Apil dopnuminye talak ara, sik Yehuda mutuku ulamik Israel yala nang, sik urasin deipmace tamuk, akat tuku palipmince, akeil nirya ara, binuka tuku pum bisik dongopmince, teikdongopnalyame.

¹⁰ Winipminyopura, an Yeremia birye, sik Israel nang kekenak ati, nyapnulyame. Anggunda, moubuka kekepnululume! Allah Yahweh, im deice unyak yin talin malaikat nirya, anggun deiyoknye unirye, anggunti ayupu nyapsine. Anggun Israel nang arye, nati, ‘Nun ni koproba,’ nyabuka, na siuk erenululume. Bukni, nara anggun ni koproba Allah arye, na amu tam pil donmalanye, Raja Nebukadnesar bira, Babel mutuku nirya talilul ninye deiyoknye biti, dopdeipniba, elce amutuku yanamle. Yalyopura, Yeremia birye akeil dobuka, tuku lukuka dungnubuka deipmok ning, anggunce asukumuk eipmalum keil ara, Raja Babel birye, el amutuku nirya, el mikip arye talibuka unamsile. Atalak ara, elce amutuku nirya talenamla laka kilina ati, el ninye deiyok una ati bunamle ning, el si tahkta, kintinibuka akeil deiceuk deipnamle. Tonda, elce Mesir mutuku nirya taliplirye, asukum unamalak, laka kilina ati, el pala weik tenda ning, el si terpal, pia pala weik ning, atuku deice bibikuka deiplirye, yo ikuka adeice deipnamle. Ara, el tenda domik aik, kintinina ati nyapne.

¹¹ Babel mutuku ninye deiyoknye, Nebukadnesar birye, Mesir mutuku yanamle talak ara, Mesir mutuku nang nirya obuka, sice buklopnamle. Winipnyopura, na Allah arye, ‘Amutuku nang ikin weik ning, sik nong deice deipnamnarya,’ tenyamse nang ara, pia imun kanye bon uk, weik dina deiyok ning arepniba, ninye weik tonun dipnamake. Tonda, na Allah arye, ‘Amutuku nang ara, Babel mutuku yin nang arye bobinuka, sik yuk mutuku bobinamake,’ tenyamse nang ara, tapu koubikirye, bobinamake. Tonda, narye, ‘Sik anang ati, mal olan deice arye, obikiba dipnamake,’ tenyamse nang ara, Babel yin nang arye, ninye on parang arye boyanuka, anang obikiba, asukumuk dipnamake.

¹² Mesir mutuku unyak nang arye, ‘Nun deiyok ning ani,’ nyabuka, talye ning ati, si erenyak isa asik nirya ara, na Allah arye, lo arepniba, Babel ninye deiyoknye birye, anyasik nirya, uku dinipdongopliba, uku arye dipnamle. Winiplyopura, Mesir mutuku nang arye, isa si erena ati, memepdeiamik ning ara, Babel mutuku talibuk ninye deiyoknye birye, dakuka boplirye, el mutuku bobinamle. Winipmanto ara, domba weinanye birye, ‘Na baju deice basam kirim weknilyak’ tenen, akirim wibuka oplirye, el baju nirya, pia teleb kililamle touk, Babel mutuku ninye deiyoknye ap, el yin talin nang ap arye, Mesir mutuku nang arye talinyak bona yala-yala nirya ara, alubuka doprobikirye, bobinamake. Tonok ning ton, kum bataknamake. Winipnamak talak ara, yuk nang arye, Babel mutuku nang ati, yupu kum sektinge, anang ati kum opnamake. Aning-aning nirya alubuka doprobikirye, kanye deibuka, talye sik mutuku tamubuka, bobinamake.

¹³ Mesir mutuku nang arye, talye isa mer ati, ‘Nun ni,’ nyabuka, si erena ati, ayukumna atonun weik cang keil, Heliopolis mutuku iklamik ning ara, Mesir mutuku noutam ikdeiamikce, keting ati si erelamik ning ara, acang keil ton ulubuka bataklirye, malye kibuka opnamle. Tonda, talye isa si erena ati, Mesir mutuku nang arye, sik mutuku noutam nirya, isa si erenyakak, anyasik domik ning nirya ara, Babel mutuku ninye deiyoknye birye, anyaik nirya dakuka uluploplirye, uku dongopnamle.