Yeremia 42 - Eipomek

Israel yala nang arye, Yeremia biti, “Ance nunti, Allah moropsilyame,” nyabuka, morobik yupu

¹ Yohanan ap, el ap neika banmek nang nirya ap, Yehuda mutuku ulamik yin talina deiyok nang nirya ara, bulubuka, na Yeremia ap eldana ati, na dam yayik. Sik anang ap Kareah el mi Yohanan ap, tonda ninye si Hosaya deiamuknye, el si Asarya ap, amutuku ulamik ninye weik nang babye, mitik nang babye nirya ara, bulubuka yayikce, na Yeremia biti nyapnike.

² “Naio, an asing arye elisilyame! Min talak ara, ninye weik ulamupu bukni, wini talak ara, nun mitik tonun tuba unamabe. Ati, wini talak mitik tonun tuba aunmab nang, nunce anti, moropnukabe. Ati, nunce nyapnukiab yupu ara, nun ni ance kekepsimince, an ni Allah Yahweh, an si erelyamnye biti, tenipsimince, moropsilyame.

³ Nun patapsila ati, moropkiap ning ara, Allah Yahweh ati moropnusilyame. Moropsiminba, elce nunti, ‘Sikda amutuku bina unyake,’ nyapsilye touk, amutuku binamabe. Tonda, elce, “Aninguk wininamake,” nyapsilye touk, aning kekebibirye, aninguk wininamabe,” nyabuka, laka nyabik.

⁴ Nyabikura, na Yeremia birye, sikti, nyapse. “Telebe, nyapmanuluma ati ara, anggun nyapmanulum yupu ara, akunum kekepne. Tonda, anggun moropmanulum ning ara, akunum kekepne. Narye, anggun moropmanulum ning nirya ara, nun ni koproba Allah Yahweh, el si erelulum Allah ati, moropnamane. Anggunce ayupu nyapmanulum touk, moropneba, Allah arye nyapnamsil yupu nirya ara, narye anggun dam yanuka, laka nyapnamsine. Tonok yupu babye, anggunti kum kwinisa dopnamsine. Anirya anggun kekenak laka nyapnamsine,” nyabuk.

⁵ Nyapsopura, sik Yehuda yala nang mitik tonun tuba aunmek nang arye, nati nyapnike. “Kume, nunce anti, ‘Nun ni koproba Allah Yahweh ati, moropsilyame!’ nyabuka, moropmakiap ning ara, Allah arye nunti, ‘Wininamake,’ nyapsilye yupu ara, aninguk moubuka talibibirye, wininamabe. Ati, nun ni Allah Yahweh arye, nun unamap ning nirya dipdesiliba, elce nyapnamsil ning, dipkoprob kum winibipyopura, elce wenebuka opsilyake!

⁶ Ati, Allah Yahweh arye nunti, ‘Winipnamne. Amutuku binuka unamake,’ nyabuka, nun dam nyapnamsil ning ara, teleb yupu do, ikin yupu do, aning nirya kekebibirye, aninguk talibuka wininamabe. Nun kanye ara, Allah Yahweh arye, ‘Aning ara, wininamlume. Aning ara, pia kum wininamlume,’ nyapdeipnamsil yupu kekebibirye, ‘Aninguk talibuka winibipyopura, nunce wininamap ning nirya ara, telebuk unamsile,’ tenepmabe. Ati nunce anti, ‘Allah moropsilyame,’ nyabuka, moropmakiyaba deiyok ara, ani. Ara, ‘Allah Yahweh arye, nyapnamsil yupu, moubuka talibibirye, aminyan talak ara, nunce pil donamap ning ap, wininamap ning nirya ara, telebuk unamsilʼ tenen, moropkiyabe. Ati ance nunti, ‘Allah moropsilyame,’ nyabuka, moropkiyabe. Sik Yehuda mutuku nang arye, ayupu yanuka nyabikce, na Yeremia dam moropnike.

Yeremia birye, Allah ati morobukba, Allah kekebukce, yanuka nyapdeibuk yupu

⁷ Yehuda mutuku nang arye, Yeremia dam yanuka morobikce, daunmeka ani, like takubarye sum, akunum mapupopura, Allah Yahweh arye, na Yeremia dam yanuka, nyapdeipnuke.

⁸ Yanuka nyapnukopura, na Yeremia birye, Kareah birye, deiamuknye Yohanan ap, tonda Yehuda mutuku ulamik nang, sik yin deiyok nang ap, tonda sik ap neika melibuka yanmek nang nirya, weik sisi nang babye, mitik sisi nang babye, sik nirya ati, “Anggunda yalulume!” nyabuka yukupse.

⁹ Yukupsiba, anang nirya yayikopura, narye sik kekenmek sukum arye laka nyapse. “Anggunce nati, moropnulum ning ara, ‘Yeremiao, ance nun Israel yala nang si erenyap Allah, nun ni koproba Allah Yahweh ati, moropnamsilame,’ nyapdeipmanuluma atonun, ayupu bobinuka, Allah ati, narye akunum moropse. Moropsiba, Allah Yahweh kekebukce, anggunti, ayupu nyapdeipmasile.

¹⁰ Ura, anggun Israel yala ululum nang ara, amutuku tuba ulamunyopura, na Allah arye anggun dobuka, erepdeipsinirye, teleb kipdeipnamsine. Erepdeipsinyopura, tamubuka anggunti, kum dobuka dopkwetepnamsine. Winipmanto ara, narye anggun dobuka, amutuku noutam kipdeipnamsine. Kipdeipsinyopura, tonap, atukwak arye wenebuka kum bataknamsine. Aning kum bukni, telebuk unamlume. Winipnamsina deiyok ara, ani. Ara, narye anggunti, pia bicoe tenesunune. Ara, anggun malye weik winilamluma ani, narye anggun wenena ati, ikin weik ning yala nirya, anggun deice akunum dobuka deipsiseba, dopromluma ati, narye bico tenesunune.

¹¹ Ati ara, minop talak ara, anggunce Babel mutuku talibuka ninye deiyok kibuknye biti, ilil weik ulamlum ning ara, tuba kum unamlume. Anye biti, anggunce elti, ilil una kume. Ilil kum unamluma deiyok ara, ani. Ara, na Allah, anggun kan-kan unirye, tuba melibuka kalikinamsine. Narye melibuka kaleksiniba, Babel mutuku ninye deiyoknye birye, sikti, ‘Oplirye, talinamsilʼ tenen, pia lyelonamsine. Winipsinyopura, anggunda telebuk unamlume.

¹² Anggun minop talak arye, malye winilulum ning ati, narye adiparyuk wenebuka opsitinye bukni, aning kumce, bico tenepsinirye, na kanye aryuk, pia teleb kipdeipnamsine. Winipnamsina deice arye, Babel mutuku talilul ninye deiyoknye birye, el babye anggunti, bico tenepsilirye, melinamsile. Tonda, Babel mutuku talilul ninye deiyoknye birye, ‘Anggun Israel yala nang nirya ara, anggun mutuku koproba uk, tamubuka bimunce, unamlume,’ nyapdeipnamsile. Ayupu ara, na Allah arye, ‘Winipnamleʼ tenen, akunum nyapdeipne.

¹³ Bukni, anggun moubuka kekeplulume! Anggun mitik tonun tuba batakmasiakba, Yehuda mutuku ulamlum nang arye, na nyapmasin yupu yaninululumce, nati, ‘Kume, nun ni Allah Yahweh arye, nyapmasil yupu kum kekepnuyabe. Nun si erenyap Allah arye nyapmasil yupu kekena kumce, amutuku noutamuk kum unamabe,’ nyapnumunyopura, ikin weik asa unamlume.

¹⁴ Ara, anggun Israel yala nang arye, “Kume, nunda amutuku tuba kum unamabe. Mesir mutuku uk, binuka unamabe. Mesir mutuku binuka upyopura, yuk mutuku nang arye nunti, kum olyanamsiyake. Tonda, yin talin nang arye, ‘Olbinamabʼ tenen, nun ap, yuk mutuku nang ap, opdanukca ati, ‘Kintininamakʼ tenen, terompet lelim nyanyak lelim babye, kum nyanyakba, nun ton kum kekenamabe. Tonda, din ton kum daliba, nun din babye, kum patanamsile. Ati, Mesir mutuku noutamuk pia aunamabe,” nyabuka, yanipnulumce, nyapnamnulum do?

¹⁵ Aning atonun nyapnumunyopura, narye dipkoprob nyapsine. Anggun Yudea mutuku ulamlum nang, ninye yupa mitik tonun dem tuba kam unmalum nang ara, anggunce moubuka kekepnamlume. Na Allah Yahweh arye, nyapsine. Anggunce malye kipmunce, nati, ‘Kume, nunda Mesir mutuku binuka, amutuku noutamuk pia unamabe,’ nyabuka, nyapnumunyopura, narye wenebuka opnamsine.

¹⁶ Ara, anggunce, ‘Se, yuk nang arye olyasikcak’ tenen, ilil weik usulul ning ara, dipkoprob anggun dam yanamle. Tonda, anggunce, ‘Se, nun din ning kum dalyopura, din patana ton, nun dam yasilyeba, doprobibyakʼ tenen, ilil usulul ning babye, Mesir mutuku binuka, ululum talak noutam ara, ailil tenelulum ning, dobolbinamsilya, amutuku noutam babye yanuka, anggun deice yalyeba, dolonmalume. Winipsilyopura, anggunda Mesir mutuku noutamuk dipnamlume.

¹⁷ Yata nang do nirya, anggun kan-kan noutam ara, malye kibuka, ‘Kume, nunda Mesir mutuku uk, binuka unamapʼ tenen, bilumce, Mesir mutuku binuka, unamlum nang nirya ara, olan deice arye opsikiba dipnamlume. Tonda, din patan deice arye dipnamlume. Tonda, tonye talipman uk buk, tonye dakalongon uk weik disilya deice arye, dipnamlume. Dipkoprop nyapsine, na Allah arye, ikin ning dobuka, anggun malye winilulum nang deice deipnamsin ning ara, tonoknye babye, kum bataknamsile. Aikin ning nirya ara, dopropnamlume. Aikin ning dopropmunya deice arye, anggun nirya ara, dipnamlume. Tonoknye babye, kam kum unamle. Sirya obuka daknamsine.

¹⁸ Nara Allah Yahweh, im deice unyak yin talin malaikat nirya ara, sik deiyoknye ununa ati, na mikip pia weike. Anggun Israel nang arye, na siuk erenululum Allah unune. Ati, narye anggunti, dipkoprob nyapsine. Na yu weik upnukba, sik Yerusalem mutuku weik asik noutam ulamik nang, sik deice deiamse touk, wini talak anggun Mesir mutuku binuka aunamlum nang babye, na yu weik anggun deice deipnamsine. Winipsinirye, wenebuka opsinyopura, yuk mutuku nang nirya arye, awinipnamsin ning eibikirye, ‘Se, Allah arye, Israel nang, sik wenena ati, weik tonun obuka sice buklobuk ning ara, pia mambul weik ulule. Sikda, pia malye wininyake,’ nyabuka, ilil upliba, anggunti malye yupu nyanamsiake. Tonda, yuk mutuku nang arye, anggun Israel yala nang ati, akutubuka nalinamsiyake. Nalisikirye, anggunti malye weik nyanamsiake. Atalak ara, yuk mutuku nang, walanmakirye, “Anda na lik ati, Allah arye Israel nang ati, wenebuka malye weik kipdeibuk touk, ‘An babye wenebuka opnamkilʼ tenen, supkine. Sik Israel nang ikin ning dolonyaka atonun, ‘An babye, ikin upnamkilʼ tenen, supkine,” nyabuka, malye yupu nyalanamake. Tonda, atalak arye dipdongobuka, dounamle talak nirya ara, anggun Israel yala nang ara, anggun mutuku koproba, tamubuka yamunyakarye, pia kum eipnalume.” Allah Yahweh arye, sik Israel nang ati nyabuk.

¹⁹ Nyapmasila ati, na Yeremia birye anggunti, ayupu tonap nyapsine. Anggun nirya moubuka kekepnululume! Allah Yahweh arye, anggun Yehuda mutuku tuba aululum nang nirya ati, akunum nyapmasile. Allah arye, anggunti, ‘Sikda Mesir mutuku bana kume!’ nyabuka, akunum nyapdeipmasile. Ati ara, na Yeremia birye anggunti, asum deice arye, akunum laka kibuka nyapmasine. ‘Allah arye wenebuka opsilirye, sirya daknamsilʼ tenen ati, anggunda Mesir mutuku bana kume,’ akunum nyapsine.

²⁰ Anggunce ayupu kum kekepmunyopura, anggunda pia malye weik kipdeipdanamlume. Anggun bidamang arye, anggun bidam nang ati, oplanamlume. Deiyok ara ani. Ara, anggunce nati, ‘Nun ni koproba Allah, el si erenyabe. Nun ni koproba Allah Yahweh ati, moropsilyame!’ nyabuka, moropmanulumba, aning nyapdeipmanuluma atonun, narye Allah moropsise. Tonda, anggunce, ‘Kume na nio, nunda Allah ati moropsiminba, elce nunti, nyapdeipnamsil yupu ara, moubuka kekebibyak arye, aninguk talibuka wininamabe. Malye tenenyap ning babye, teleb tenenyap ning babye, Allah arye nyapdeipsilye touk, moubuka talibibirye wininamabe,’ nyamnulume.

²¹ Ati arup ara, Allah arye anggunti, nyapdeipmasu yupu ara, narye anggun dam akunum nyapdeipmasine. Bukni, anggunce, ‘Allah el siuk erenyabe. Nun ni koproba Allah Yahweh ulule,’ nyalulum bukni, Allah Yahweh arye nyapmasil yupu ara, anggunce dipkoprob kum kekeplume. Ara, Allah arye nati, ‘Sik Israel yala nang ati, nyapnulyame,’ nyapdeipnukba, laka nyapmasin bukni, ayupu kum kekenmaluma ati, nyapsine.

²² Ati ara, anggun moubuka tenipnamlume. Anggunce, ‘Nun amutuku, Mesir mutuku binuka teleb unamapʼ tenen, patapsiliba, tenipnamlum mutuku ara, dipkoprob amutuku binuka unamlum talak ara, anggun nirya dipnamlume. Ara, yuk mutuku yu nang arye, ninye on parang dobikirye, olyanamsiake. Tonda, din patana deice arye, dipnamlume. Tonda, ninye dakdanin balamak uk talina ap, imun weik ulamle uk talipsilya deice arye, dipnamlume. Aning ara, akunum nyapmasine,” Yeremia birye nyabuk. Ara Yeremia birye, sik Israel yala nang bukni, Yudea mutuku mitik tonun tuba kam unmekce, ‘Mesir mutuku binuka unamabe,’ tenyamik nang ati, ayupu nyabuk.