Yeremia 41 - Eipomek

Ismael birye, Gedalya obuka ati, sekuk yupu

¹ Aketing tamun noutam, wala tekbarye (7) akunum kibukura, Elisama elce deiamuknye Netanya, elce deiamuknye bira, Ismael birye, Mispa mutuku yayuk. Ismael ara, amutuku ninye deiyoknye, Raja tikamuknye, el si Zedekia, el amu tam pil dona deiyoknye ulamuk. Ismael ap, yuk nang ton, takubarye 10 nang ap, ninye si Ahikam, elce deiamuknye, Gedalya dam yayik. Ara, ‘Gedalya ap epdanuka, yupu talipnamap,’ tenen ati, Mispa mutuku yayik. Mispa mutuku akunum yayikura, sik nirya tonok kanye bobuka, roti ap, yuk din ap, neika dinmik talak ara, unmik.

² Neika dinmik talak noutam ara, Netanya elce deiamuknye, Ismael ap, tonda el ap melibuka yayik nang, takubarye 10 nang ap, sik nirya talye karin arye, neika tekikce, ninye si Safan birye deiamuknye, Ahikam, elce deiamuknye Gedalya biti, ninye on parang ya dobuka oplobik. Gedalya obik deiyok ara, ani. Ara, Babel mutuku taleamukce, ninye deiyok kibuka, Raja ulamuknye, Nebukadnesar birye, ‘Mizpa mutuku nang nirya, sik deiyoknye Gubenur kibuka, anang talipnamleʼ tenen, Gedalya akunum erepdeiamuka ati, ‘Anye bira nun likeʼ tenen, Ismael ap, el melin nang arye, anye bira oplobik.

³ Anye dem kum bukni, aning atonun, Ismael ap, el melin nang arye, Yehuda mutuku nang ton, adiparyuk oplobik. Ara Gedalya ap, Yehuda mutuku nang ap, Mispa mutuku neika unmika atia. Tonda, Kasdim mutuku arye, Mispa mutuku akunum yanuka, tiya talak ati, aunmek yin nang babye, sik nirya ara, Ismael birye oplobuk.

⁴ Ismael birye, Gedalya obuka mamuka ani, akunum berekukura, yuk nang arye ton, Ismael birye, Gedalya opmuk ning ara, yuk nang nirya arye, min kum bikmek.

⁵ Asum aryuk, Sikhem mutuku nang ap, Silo mutuku nang ap, tonda Samaria mutuku nang ap, yupa weik delapan puluh (80) nang arye, Mespa mutuku yayik. Sik anang nirya ara, sik bam potong nirya ara, akunum kobuka kipmikce, sik ongopmik baju nirya ara, akunum kwilikdobuk ongopmik. Sik nong bol deice ara, dila-dilauk upmok. Winibuka winipmekce, anang nirya arye, ‘Allah el si erebibirye, elti, teleb ning arepnamapʼ tenen, Allah el arena ati, din ning el si gandum ap, tonda nintong teleb ning el si kemenyan ap, libuka boyanmikce, amutuku domik Allah Yahweh, el si eren aik dam boyanmik.

⁶ Mispa mutuku ban bisik, tuba yanganmik talak ara, Mispa mutuku noutam arye, Netanya elce deiamuknye Ismael birye, ‘Anang epdanamapʼ tenen, anang Mispa mutuku ban, bisik noutam tuba yanganmik talak ara, sik dam binuka, anang ap epdayik. Ismael birye, anang akunum epdayikura, engebuka elcuk, sikti, talye yupu deice arye nyabuk. “Se, na kayapu, Ahikam birye deiamuknye, Gedalya, el dam binululume,” nyabuk.

⁷ Nyabukba, sik anang kekebice, mangkau kanye bobuka, talye parapkabuka, Mispa mutuku noutam banmika ani, anyasik dolamik noutam akunum biyikura, Netanya birye deiamuknye, Ismael ap, tonda el melipmik yin nang nirya ap arye, anang nirya obuka, tuku pum tam donokik. Ara, min talak amutuku nang arye, ‘Mekwen deipsituʼ tenen, weik lukamika pum tam, aobik nang, sik nong dobuka dopkwetebik.

⁸ Ayanmik nang, 80 nang noutam ara, ton tam nang akunum obik bukni, ton tam nang kum obik talak, tuba kam unmik nang, takubarye 10 nang arye, Ismael biti nyabik. “Se, ance nun ona kume. Nunda, yuk talak ara, teleb din bobuka, amutuku dam bukni, bai tam ara, duknubuka deipmupu. Ara, roti kwaning dana ati deiyok ning, el si gandum duk ap, jelai duk ap, tonda minyak ap, mong mekwen ap, aning nirya duknukintinibuka deipmaburye, wa win mutuku noutam duknubuka deibupu ning ara, ance amutuku binuka, aning nirya dopdoptume,” nyabik. Nyabikura, Ismael birye anang ap, tonda sik kayapu yuk nang ap, sik nirya 10 nang ara, ona kum bukni, batakuk.

⁹ Ura min talak ara, Yudea mutuku ninye deiyoknye, el si Raja Asa birye, nyapdeibukba, el tam nang arye, ‘Tuku pum tam paliptibyeba, mok ceplye talak ara, mekwen ton atuku pum tam deipnamsile. Mek auplyopura, aminyan talak amek ceptu,’ tenen, weik tuku pum tam akunum min arye lukamik. Aweik bisik lukamik talak ara, Yudea tam nang deiyoknye, Raja Asa birye, Israel yala nang taleamuknye, el si Raja Basea ati, utenebuk. ‘Kume Raja Basea bira, ‘Yudea mutuku talilul ninye deiyoknye Raja Asa ap, el tam nang ati, olbinamne,’ tenebuka kintinip toura, yanuka wariksutu bukni, nun din mek ara, min kum upnamsil,’ tenebuka ati, “Winiplulume!” nyabukba, el tam nang arye, weik bisik kintinibuka lukik. Ati, Ismael birye, Mispa mutuku noutam arye, anang yupa weik, 70 nang akunum obukba, deibik nang nirya, sik nong dobuka, weik tuku pum tam eibukce, atujuhpuluh nang obukabukce, sik nong dobuka, abisik pum tam yanuka dongobukba, abisik langdibuk.

¹⁰ Winibukura, Mispa mutuku tuba kam unmik nang ara, Ismael birye, sik nirya tomobukce, anang dobuka, ‘Amon yala nang arye unyak mutuku noutam bobinamneʼ tenen, anang bisik bobanmok. Elce, Amon yala nang ati unmik mutuku bobanmok nang ara, ani. Ara, Babel mutuku taleamuk ninye deiyoknye, el si Nebuzaradan birye, ‘Mispa mutuku kam tuba aunamak nang ara, Gedalya birye kaliknamleʼ tenen, Nebuzaradan el kilmapu ap, sik Mispa mutuku nang, atalak tuba unmik nang ap ati, “Gedalya, ance anang kaliknamlume,” nyapdeipmokba, elce talipmokba, tuba unmik nang ara, Netanya birye deiamuknye Ismael birye, sik anang nirya ara, bobuka, ‘Amon yala nang unyak mutuku tam binkunʼ tenen, Mispa mutuku batakuka, mek koubuka, otam biyuk.

¹¹ Bukni, ninye si Kareah, elce deiamuknye Yohanan ap, el yin talin nang ap, sik deiyok nang ap, sik nirya ara, yuk nang arye, “Se, Ismael birye, pia malye ning weik winilule,” nyabuka, laka nyalamik ning ara, akunum kekelamik.

¹² Ismael birye, malye winilamuk ning ara, anang arye, akunum kekelamikce, sik melin nang nirya ati, “Anggunda, adiparyuk bulubuka weklulume,” nyabik. Winibikura, Yohanan ap, el melin nang ap arye, ansinibuka, ‘Netanya birye deiamuknye, Ismael olbinuyabeʼ tenen, bisik banmeka ani, Gibeon mutuku noutam bukni, weik mekwen deiamuka dam, binuka epdayik.

¹³ Ismael ap, neika banmik nang nirya arye, dilamikak, Kareah elce deiamuknye, Yohanan ap, tonda Yohanan el yin talin nang, sik deiyok-deiyok nang nirya ap, yanganmikak eibikce, kanye deibuka, pipin asa unmik.

¹⁴ Pin-pin kanye bobuka unmik ning ara, Ismael birye, ‘Mispa mutuku ulamik bukni, wini talak Amon yala nang unyak tam bobinamanʼ tenen, bobalamuk nang nirya ara, tamubuka Kareah el mi Yohanan, el dam yayikba, sik neika biyik.

¹⁵ Anang weik tam ara, Yohanan tam kipdobikce, biyik bukni, Ismael melibuka banmik nang, ninye pinbarye nang ara, Netanya el mi Ismael melibuka banmik. Bikbik abuka banmika ati, Ismael ap, abanmek nang ap, sik Amon yala nang ulamik mutuku biyik.

¹⁶ Akunum biyikura, Kareah el mi Yohanan ap, tonda el yin talin nang, sik deiyok-deiyok nang arye, Mispa mutuku tuba ulamikba, Netanya el mi Ismael birye, ‘Aninye dobuka, Amon yala nang unyak mutuku bobinamanʼ tenen, bobanmok nang nirya tamubuka boyayikce, ‘Mesir mutuku binuka unamapʼ tenen, bisik biyik. Ara, ninye si Ahakim birye deiamuknye Gedalya, Ismael birye Gedalya obukabukce, el taleamuk nang bobanmoka ani, Yohanan birye, anang dobuka bobukce, bobanmok. Yohanan birye, ‘Mesir mutuku binuka unamapʼ tenen, bobanmok nang ara, sal ap, kilapu ap, mapu ap, tonda yin talin nang ap, amutuku Raja el aik pil don nang ap, Gibeon mutuku arye tamubuka boyayuk.

¹⁷ Yohanan birye, anang dobuka bisik bobanmoka ani, Babel mutuku nang ati, ‘Wabuka, opsikcakʼ tenen, ilil weik ubuka ati, sikda, ‘Mesir mutuku binuka unamapʼ tenen, banmika ani, bisik noutam arye, mutuku si Gerut-Kimham mutuku binuka, tiya talak ati mapmik. Kimham mutuku, ara Betlehem mutuku dam uamuk.

¹⁸ Sik Yohanan ap bisik banmik nang ara, utenebik. ‘Kume, Netanya el mi Ismael birye, Ahikam el mi Gedalya biti, oplopmuka ati, Babel mutuku ninye deiyoknye, el si Raja Nebudkadnesar birye, weik wabuka, opsilyak,’ tenebik. Deiyok ara, Nebukadnesar birye, ‘Anye bira, Gedalya, na amu tam bukni, Mispa mutuku talibuka, Gubenur tiknamle,’ tenebuka ati, anye bira erepdeibuk bukni, Ismael birye, anye akunum oplobuk. Winibuka ati, Yohanan ap banmik nang nirya arye, ‘Babel mutuku ninye deiyoknye birye, nun nirya ati, wabuka, opsilyak,’ tenenmeka ati, ilil ubukura, Mesir mutuku bisik banmek.