Yeremia 40 - Eipomek

Yeremia ap, Gedalya ap, neika ulamdik yupu

¹ Yerusalem mutuku tuba kam ulamik nang ap, Yehuda tam tuba kam ulamik nang ap, tonda Yeremia ap, sik neika tapu koubuka, Babel mutuku bobana ati, bobanmika ani, Rama mutuku binuka unmik. Atalak ara, Babel mutuku yin talin nang, sik kong kina, deiyoknye, el si Nebuzaradan birye, Yeremia taruk tapu kouamik ning lopdeibukce, Rama mutuku binuka deibuk. Atalak ara, Allah Yahweh arye, Yeremia dam yanuka, yupu nyapdeibuk.

² Atalak ara, Babel mutuku yin nang, sik kong kina deiyoknye, Nebuzaradan birye, Yeremia boyayukce, elti, nyabuk. “An ni Allah Yahweh arye, amutuku ati, ‘Weik ikin ning, amutuku deipyeba, ‘Sice buklopnamle,’ tenebuka ati, amutuku kanye imun ning yanmala ara, akunum eipmabe.

³ Wini talak ara, an ni koproba Allah arye, “Anggun wenena ati, winipnamsine,” nyapdeiamuk touk, akunum winipmasile. Ara, an mutuku nang, sikce Allah Yahweh anggunti, el yupu nyapdeiamsuk ning ara, sikce kum moubuka talinyake. Tonda, sikce malye winin ning tuba talibuka wininyaka arye, Allah elce ikin ning akunum areplyeba, aning ara, sik deice akunum yanmalba, dopropmaka atia.

⁴ Ati wini talak, ance moubuka tenipdemince, kel biknalyame! Narye, an taruk tapu koupkik ning akunum lopdeipkine. Ance, ‘Telebe,’ teneptumura, an ap, na ap neika, otam pera mutuku, Babel mutuku bitinemnyeba, narye anti, pia melibuka kalikinamkine. Winipnyopura, anda teleb unamlame. Bukni, an babye, ‘Kume, Babel mutuku kum binuka unamne,’ tenepminyeura, aning babye, teleb uka. Ance tenepmince. Ati, anda melipniminyeba, nun neika Babel mutuku binamap do? Kum binamap do? An kanye arya. Anda dipdelyame. ‘'Amutuku nirya ara, laka kibuka dinmalama ati, ance, ‘Amutuku bana ara telebe. Diksukum winin ning ara, amutuku ton binuka winiptinye,’ tenepminye mutuku ara, talye parapkabuka bana uka.” Babel mutukunye, Nebusaradan birye, na Yeremia ati nyapnuke.

⁵ Bukni, el kum binabuk talak ara, Nebusaradan birye, ayupu ton nyapnuk. “Bukni, an tenena ati, ayupu ton nyapkine. Ance, ‘Amutuku unamne,’ tenepminyeura, ninye si Safan birye deibuknye, el si Ahikam, elce deibuknye el si Gedalya, el dam teleb aryuk dabinulyame. Deiyok ara, nun Babel mutuku ninye deiyoknye, Raja Nebukadnesar birye, ‘Yehuda tam unyak nang, sik mutuku uk, tuba unmak nang ati, anggunce mitik asik domikce, talibuka, sik deiyoknye Gubenur kibuka upnamleʼ tenen, Gedalya akunum erepdeipmale. Ati ara, Gedalya ap, elce taleamuk nang ap, an ap, neika unamlume. Akumopura ance, ‘Atam mutuku binun,’ tenepminye mutuku ara, talye parapkabuka binamlyame. Aning babye teleb uka.” Nebusaradan birye, ayupu akunum nyabukopura, elce na Yeremia ati, din ap, nati, ‘Telebeʼ nyana ati aren ning, talye arin ning hadiah ap arepnukce, na adiparyuk lopdeipnukura, elda biyuk. Atonun, na babye adiparyuk bise.

⁶ Na Yeremia bira, Safan birye Ahikam deibukba, elce deibuknye Gedalya, Mizpa mutuku ulamukakuk bise. Biseura, Gedalya ap, na Yeremia ap, amutuku tuba kam ulamik nang ap, nun neika ulamupu.

Gedalya Gubenur kibuka ati, sekuk yupu

⁷ Atalak noutam ara, Babel mutuku nang arye, kum obik Yehuda yala nang, Yehuda noutam bukni, bai mutuku talye banauk ulamik nang ara, sik deiyok-deiyok nang ap, sik amu tam yin talibuka ulamik nang ap, yuk nang arye nyanmik yupu kekebik. Yuk nang arye, anang ati, “Kekeplulume! Pia bona utotoa talina kum unyap nang, Babel mutuku nang arye bataksikba, amutuku tuba aunmab nang ati, Raja Babel birye, ‘Yehuda tam tuba unyak sal ap, kilapu ap, mapu ap, amutuku bona utotoa talina kum unyak nang nirya talibuka, deiyok kibuka, Gubenur kipnamleʼ tenen, Ahikam birye deibuknye, Gedalya akunum erepdeibukba, elce nun mutuku talinamsile,” nyabik. Nyabikba, Yehuda mutuku tuba ulamik yin nang, sik deiyok kibuka taleamik nang ton, ayupu kekebik.

⁸ Kekebikopura, sik nirya arye, Gedalya dam biyik. Ara, ninye si Netanya, elce deibuknye Ismael ap, Kareah arye deibuknye Yohanan ap, Tanhumet arye deibuknye Seraya ap, Efai el mapu silip bukni, Netofa mutuku arye yayik nang ap, tonda Maaka arye deibuknye Yezanya ap, adeiyok nang ap, sik amu tam yin talin nang ap, sik nirya neika, Mizpa mutuku binuka, Gedalya ulamukakuk yayik.

⁹ Mizpa mutuku yayikopura, Gedalya birye, sik ayayik nang ati, nyabuk. “Anggunda, Babel nang ati, ‘Se, sikce talipsiktingba, nunda sik amu tamuk ubirye, sik pil melibuka winina ara, ‘Nun lik,’ tenena kume. Sik Babel mutuku nang malibuka pil dona ati, ilil tenena kume. Anggunda, nun mutuku asukumuk unamlum bukni, anggun nirya ara, Raja Babel, el amu tam pil don nanguk unamlume. Aning umunyeura, anggun nirya ara, teleb unamlume.”

¹⁰ Anggunce, ‘Nunda amutuku uk unamabe,’ tenepmunye mutuku, binuka unamlume. Winimunce, wa wibuka koulamlum ning ap, anggur duk ap, yuk yala yo duk nirya ap, dakuka dinamlume. Tonda, minyak Zaitun ap, bulubuka, tonokak dikdongobuka, ‘Naʼ tenen delinamlume. Anggunce akunum alubuka doproplum mutuku ap, asik ap, asukumuk, kanye deibuka unamlume. Bukni, nara Mizpa mutuku unamne. Asukumuk daulamunya ani, anggun Babel mutuku nang arye, ‘Sikda yata wirinyak do?’ tenen, amutuku yaceura, amutuku noutam unamlum nang nirya ati, punupnirye, anggun melin ati, yupu nyapnyeba, sik Babel mutuku deiyok-deiyok nang arye, kanye deibuka, ayupu kekenamake.” Gedalya birye nyabuk.

¹¹ Aning mitik tonun, atalak noutam ara, yuk Yehuda tam ulamik nang bukni, Babel mutuku nang arye, Yehuda tam olyayik talak ara, sikce, ‘Se, Babel tam nang arye, yata wiripnamsiak do?’ tenen, ilil ubukba, bai sakuka, yuk-yuk mutuku datikilbanyak nang ton, ayupu kekebik. Ara, Yudea mutuku nang bukni, ilil ubukba, Moab mutuku ap, Edom mutuku ap, Amon mutuku ap, tonda yuk mutuku-mutuku nirya, dabinuka ulamik nang ap, sik nirya arye, ayupu kekelamik. Ara, yuk nang arye, “Kume, Raja Babel birye, Yehuda tam tuba kam unyak bona utotoa talina kum nang ati, Safan birye deibuknye Ahikam, elce deibuknye, el si Gedalya, ‘Elda sik Gubenur unamleʼ tenen, akunum Gubenur kipdeibikba, talibuka ulule,” nyalamikak, kekelamik.

¹² Min talak bai sakuka, dabindomik Yehuda tam nang, yuk-yuk mutuku noutam daulamik bukni, anang nirya ara, ayupu kekekalamikce, adiparyuk tamubuka, Yehuda mutuku noutamak bukni, Gedalya ara, Mizpa mutuku ulamukakuk, tamubuka balamik. Winilamikce, sik nirya arye, yo duk yala nirya ap, anggur duk ap bulubuka lipnakarye, tonokak delilamik ning ara, pia weik, kum nukmanto upnin balamuk.

Gedalya obik yupu

¹³ Sik anang nirya ara, teleb daulamik. Daulamika ani, tonok talak ton, Kereah el mi Yonahan ap, tonda Yehuda tam nang bukni, bai mutuku talye banauk ulamik yin nang ara, sik deiyok-deiyok nang ap, sik amu tam yin talibuka ulamik nang ap, Gedalya ulamukakuk, Mizpa mutuku yayik.

¹⁴ Yayikopura, sikce Gedalya biti nyabik. “Naio, an olan ati, Amon yala nang, sik ninye deiyoknye Raja Bahalis birye, ninye si Netanya, elce deiamuknye Ismael dam, ninye yupu nyapdeibukba, an olan ati, akunum dam yayuk ning ara, akunum biklum do, kum do? Aning ton kum moubuka tenepmalam do?” nyabuka asipdeyik. Nyabik bukni, sikce ayanuka laka nyabik yupu ara, Ahikam birye deibuknye, Gubenur Gedalya birye, ‘Ayupu ara, dipkoprob nyapmaka,’ pia kum tenebuk.

¹⁵ Kum diba tenebuka ati, ninye si Kereah, elce deibuknye, el si Yonahan bira, ‘Yuk nang arye kekepnamakʼ tenen, dungnubuka, Mizpa mutuku binuka, Gedalya unmokakuk binuka nyabuk. “Naio, na moropkine. Ance, ‘Telebe,’ nyapnutum ura, yuk nang bikna kum, naryuk binirye, Netanya deiamuknye, Ismael bira opnamane. Deiyok ara, yata deiyok ati, anye Ismael birye, an opkilyeba, Yehuda tam unyap nang, an dam tuba unmak nang nirya ara, ilil uplyeba, bai sakuka binamak do? Tonda, Yehuda tam nang, mitik tonun tuba aunmab bukni, ‘Nun Yehuda nang kum kipdeipnamsiak do?’ tenen, nyapkine.” Yonahan birye, Gubenur Gedalya ati, nyabuka asibuk.

¹⁶ Ayupu nirya, akunum nyabuka asibuk bukni, Ahikam birye deibuknye, Gubenur Gedalya kekebukopura, Kereah birye deibuknye, Yonahan ati, tamubuka nyabuk. “Ance atenepmanilam ning ara, pia winina kume. Na kanye ara, ance, ‘Ismael birye, an opnamkile,’ nyapmanilam ning ara, diba kum tenepkine. Ayupu nyapnamlam ning ara, talye ning tenepmalamce, talye yupu uk yanuka, nyapmanilame. Ati, ance aning ara, pia winina kume,” nyabuk.