Yeremia 39 - Eipomek

Babel yin talin nang arye, Yerusalem mutuku obuka doprobik ati, nyabuk yupu

¹ Raja Zedekia birye, Yehuda tam ulamik nang talibuka ulamuk keting tamun, toupne barye (9) tahun kibuk talak wala ara, takubarye (10) kilbiyuk. Akibuk talak ara, Babel mutuku Raja kibuka ulamuknye, el si Raja Nebukadnesar ap, el yin talin nang nirya ap yayikce, Yerusalem mutuku yan warekuka, antanap dongobik.

² Warikuka antanap dongobuka ulamika ani, winilamik buk, Raja Zedekia birye, amutuku ulamik nang talibuka ulamuk bukni, koklombarye (11) tahun kibuk wala ara, dumbarye (4) wal ara, toupne barye (9) kibuk sum ara, Yerusalem asik domikce, weik cang keil poka dobuka, antanap dongamik noutam ara, sik Babel yin nang arye, akeil dakuka uluplobikce, bisik tonok botobuka, Yerusalem asik koprop wekikce, amutuku alubuka doprobik.

³ Babel nang arye, keil poka dakuka, uluplobik bisik botopdeibikce, Yerusalem mutuku noutam yanuka alapdobik. Winibik talak ara, Babel mutuku noutam, pil yala yuk-yuk deiyok koubuka, amutuku taleamik nang nirya ara, Yerusalem mutuku noutam wekik. Ara, Yerusalem mutuku ulamik nang, keil poka domikce, apoka noutam botopdeiamik bisik bublan, el si Pintu Gerbang Tengah, asukum damuk yayik. Ayayik nang sik si ara, ani. Ara, Nergal-Sarezer ap, Samgar-Nebo ap, Raja Babel el aik pum noutam deiyok kibuka ulamuknye, el si Sarsekim ap, Nergal-Sarezer eramaknye ap, tonda Babel mutuku weik deiyoknye, Raja Nebukadnesar, el amu tam pil don nang, sik deiyok-deiyok nang ton, Yerusalem mutuku noutam weknamik ati, bulubuka yayik.

⁴ Babel nang arye, Yerusalem mutuku wekikba, Raja Zedekia ap, el yin talin nang nirya ap arye, awinibik ning nirya eibikce, ilil ubuka ati, alukunyan aryuk, sik nirya bai sakuka bikbik abuka, Yordan mek lilun tam biyik. Ara, keil poka dana-dana arye wipdeiamik noutam bisik arye, Raja Zedekia el aik dam tam, wa wibuka deiamikce, poka botopdeiamik bublan bisik arye, sakuka biyik.

⁵ Sakuka bikbik abuka biyik bukni, sik Babel mutuku yin talin nang arye, anang banmika eibikce, ‘Anang tomobuka opnuyapʼ tenen, bikbik abuka, dobonmika ani, Raja Zedekia bira, Yeriko mutuku dam bukni, weik lu mutuku arye, binuka tomobik. Tomobikopura, ayin nang arye, Raja Zedekia bobuka, Babel mutuku Raja Nebukadnesar ulamukak, Amat mutuku noutam bukni, mutuku si Ripla mutuku boyanuka deibik. Raja Zedekia boyanuka deibikba, Raja Babel birye, “Ura aning ara, sik dengna ati, winibuka opsinirye, wenepnusine,” nyapdeibuk.

⁶ Raja Babel birye, ‘Winiplulume!’ nyabuk touk, el pil don nang arye, sik Yehuda tam nang ati, wenebuka obik. Ara, Ripla mutuku aryuk, atalak ara, Raja Zedekia dinmokak arye, el mapu koproba ap, tonda Raja Zedekia, el amu tam pil dolamik nang, sik Yehuda tam deiyok-deiyok nang nirya ap, Babel mutuku nang arye, obikura, dibik.

⁷ Anang nirya akunum obikba, Raja Zedekia birye, akunum eibukura, anang arye Zekedia el asing duk ara, lukuka kweteprobik. Akunum kweteprobikopura, besi tapu, el si rantai doprobikce, el taruk tapu koubikce, ‘Anye bira, nun pera mutuku, Babel mutuku bobinamabeʼ tenen, kintinip deibik.

⁸ Winibik talak aryuk, sik Babel mutuku yin talin nang arye, Raja Zedekia el aik ap, elce talilamukba, amutuku ulamik nang, sik asik nirya ap ara, uku dongobik. Anirya uku dongobikba, dibukura, Yerusalem mutuku asik dobuka ulamikce, min talak weik cang keil poka dobuka, amutuku dana-dana tam nirya antanap dongamik ning nirya ara, akeil poka ulubuka daklobik.

⁹ Winibikura, Yerusalem mutuku tuba kam unmik nang ap, Babel nang tam akunum kipropmik nang ap nirya ara, Babel mutuku yin nang kong nirya, sik deiyoknye, el si Nebuzarad, elce, anang nirya bobuka, Babel mutuku uk, tamubuka bobiyuk.

¹⁰ Sik Babel mutuku yin nang, sik deiyoknye Nebuzaradan birye, aning nirya akunum winibukura, Yehuda tam bukni, Yerusalem mutuku noutam, pia bona utotoa talina kum nang ap, aning-aning nirya talina kum, talye ulamik nang ap nirya ara, Yehuda mutuku noutamuk, tuba batakukura daulamik. Tonda, sik anang ati ara, anye Nebusaradan birye, anggunti, “Anggunda, wa wibuka kouna ap, tonda anggur wa wina ap, wininamlume,” nyabuka, Yudea mutuku noutamuk tuba batakuk.

Nabi Yeremia tomobuka deiamuka ani, lopdeibuk ati, nyabuk yupu

¹¹ Babel mutuku ninye deiyoknye, Raja Nebukadnesar birye, el yin talin nang kong nirya, sik deiyoknye, el si Nebusaradan biti, “Aning ara, winipnalyame,” nyapdeibuk. Anyabuk yupu ara, ani.

¹² “Anda, el nabi Yeremia biti, elbinulyame! Moubuka epminyeura, elti, moubuka kalikmince, el patan ning nirya ara, arenamlyame. Tonda, ance el deice, ikin ning ton kum deipnalyame. El nabi Yeremia birye anti, yupu nyabuka moropnamkil ning ara, ance anyaplye touk winipnamlyame,” nyabuk.

¹³ Nyabukba, Babel mutuku yin nang, sik deiyoknye Nebusaradan ap, el amu tam pil don nang bitinye, sik si ara, Nebusyasban-Rabaris ap, tonda Nergal-Sarezer erapmaknye ap, tonda Babel mutuku deiyoknye, Raja Nebukadnesar, el amu tam deiyok-deiyok kibuka, pil dolamik nang ap nirya arye, yupu nyapnibuk, nabi Yeremia dam binuka doprobik. Nebusyasban-Rabaris ara, Raja Nebukadnesar, el weik aik pum noutam, kalikna deiyoknye ulamuk.

¹⁴ Adeiyok-deiyok nang arye, sik yin talin nang unmek aik biyikce, na nabi Yeremia anyaik unmasebuk, binuka dopropnik. Dopropnikopura, na dobuka, ninye si Safan, elce deibuknye, el si Ahikam, tonda anye birye deibuknye, el si Gedalya dam bobinikce, elti, arepnikba, Gedalya birye nati, adiparyuk teleb kibuka bobinukce, na mutuku noutam, na yala nang, sik damuk dopdeipnukba, asukumuk daulamse.

Allah arye, “Sudan mutukunye, el si Ebet-Melek deice winipnamne,” nyapdeibuk yupu

¹⁵ Na nabi Yeremia bira, Raja Zedekia, el yin talin nang aik noutam, tuba tapu koubuka deipnikba, daulamse talak ara, Allah Yahweh arye nati, yupu ton nyapdeipnuk. Ayupu ara, ani.

¹⁶ Allah arye nati, nyapnuke. “Nara sik Israel yala nang arye, ‘Nun ni koproba nyabuka, si ernululumba, narye melibuka kalikisunun Allah aunune. Nara, Allah Yahweh arye, im deice unyak yin talin malaikat nirya, sik deiyoknye ununa ati, mikip weiknye unune. Aunirye nyapkine. Aminyan talak, an Yeremia birye, Sudan mutukunye, el si Ebet-Melek, el dam bimince, ayupu nyapnamalyame. Ara, min talak, narye, ‘Amutuku nang wenena ati, winipnamne ning ara, teleb winin ning kum bukni, dipkoprob weik kanye imun un ning dopdeipyeba, amutuku nang, anggun deice yanamle.’ Ara, narye, ‘Atalak ani, asum deice ani,’ tenyamse talak, amutuku nang wenebuka opnamne. Aning winipnamne talak ara, anyapdeiamse ikin ning ara, arepnyeba winipnamle ning ara, an Yeremia birye eipnalame,” Allah arye nyapnuke.

¹⁷ Bukni, atalak ara, narye anti, melipkinirye, lyepropnamkinarya. Winipkinyeura, yu nang arye, an dobuka, malye nang ati, kum arepnamkiake. Ara, ance, ‘Seʼ tenen, ilil ukulul nang dam, yuk nang arye, an dobuka, anang deice kum deipnamkiake.

¹⁸ Aning ara, talye ati kum nyapkine. Dipkoprob nyapkine. Narye, anda lyepropnamkina ati, an nong ara, kum opnamkiake. Yu nang arye, ninye on parang ya arye bobuka, anda kum opnamkiake. Aning kum bukni, ance na Allah ati, pia diba tenenilyamce, na damuk uminya ati ara, dipkoprob kamuk unamlame. Ayupu ara, na Allah Yahweh arye nyapkine.” Allah arye nyabukura, na Yeremia birye, ayupu bobuka Ebet-Melek biti, el dam binuka nyapnamnarya.