Yeremia 38 - Eipomek

Yuk nang arye Yeremia biti, yu ubukba, el dobuka, tuku palyamik pum bisik, dopkwetebik yupu

¹ Yeremia, ninye deiyoknye aik pum tam bukni, wenen aik tuba daulamuk talak ara, el yupu tuba nyalamukba, amutuku ulamik ninye nirya, kekenauk ulamik. Ara, “Allah arye, el yupu, na dam nyaninyak ning ara, ani,” nyabuka, tuba nyalamuk. Ayupu nyalamuka ani, sik yuk nang ton kekebik. Ara, ninye si Matan, el mi Sefaca ap, Pasyur el mi Gedalya ap, Selemya el mi Yukal ap, tonda Malkia el mi Pasyur ap, sik nirya ara, Yeremia nyanmok yupu kekebik. Kekebik bukni, sikda, ‘Ayupu ara, nun lik,’ tenebikce, malye kanye bobik.

² Yeremia birye, ayupu nyanmok. “Allah el si Yahweh arye nyapdeipnuk yupu ara, nyapsine. Ara, amutuku ululum ninye ara, Babel mutuku yu yin talin nang arye, anggun dam yanuka, obisipnamsiake. Winipsice ati ara, amutuku asik noutamakuk, tuba unamice ninye nirya ara, Babel mutuku nang arye, mal oldanamace sum, parang ya arye oplopnamsiyake. Tonda, anggun amutuku uk, tuba umunyeba, anggun din ning nirya, kum upsilyopura, dina patana deice arye, dipnamlume. Tonda, weik kanye imun uk dilamliba, adeice arye ton, ninye weik dipnamake. Bukni, yata ninye do nirya, ‘Babel nang oldanuyabe,’ tenena kumce, amutuku noutamak arye batakuka, Babel mutuku nang tam kipnamlanye bira, tapu koubikirye, sik mutuku tamubuka bobinamsiake. Ikin ning dopropnamlum bukni, kum oplopnamsiyake. Babel mutuku nang arye, akunum olyanmasiyaka anya arye, ‘Opdanamabe,’ teneplum ninye ara, oplopnamsiyake. Bukni, ‘Tapu koupsikirye, bobinamsiyake ara, teleb uka,’ tenepmunye ninye ara, kam unamlume. Aninye ara, kum dipnamake.

³ Aning ara, talye ati kum nyapsine. Allah el si Yahweh arye, dipkoprob nyapsile. ‘Narye lo arepneba, sik Babel mutuku yin talin nang arye, amutuku unyak ninye nirya, malya kipnamake. Winibikirye, amutuku unyak ninye ap, amutuku ulul ning nirya ara, dalubuka doprobikirye, sik ninye deiyoknye biti, arepnamake.’ Allah arye nyapnuk touk nyapsine,” Yeremia birye, aninye nirya ati, laka nyabuk.

⁴ Ayupu laka nyabukba, sik amutuku noutamak deiyok yuk-yuk talibuka, mambul pil dolamik nang kekebikce, sik ninye deiyoknye, Raja dam nyalbiyik. “Kume na nio. Ance nyapdeiptumba, ayupu nyanmalanye bira, oploptibye. Ara, urdem ati, kum nyababe. El yupu deice arye, amutuku kalikina ati unyak yin talin nang ap, amutuku unyak ninye ap, ayupu kekebikirye, ilil upliba, sik mikip kum upnin balule. Sik mikip, pia mitang uplyak ati, yanuka nyapkiyabe. Ara, dipkoprob anye bira, Yeremia birye, talye tilila yupu nyaplopliba, amutuku unyak ninye nirya kekebikirye, pia malye kanye bonyake. El pataplye ninguk tenelule. ‘Amutuku ninye teleb winipnamak’ tenen, patapliba, kum nyasulule. ‘Amutuku ninye ikin uptu babye,’ teleb uka, tenelirye, nyasulule,” nyabik.

⁵ Nyabikba, amutuku ninye deiyoknye, Raja Zedeikia kekebukce, “Telebe, anggun tenepmalum touk, dawiniplulume. Narye el dobuka, anggun taruk noutam deipsine. Anggun tenepmalum ning ara, narye ‘Bataklulume,’ nyabuka, yupu kum seknamsine,” nyabuk.

⁶ Nyabukba, sik anang arye, Yeremia dobuka, ninye deiyoknye, el mi Malkia palyamuk sumur pum bisik, tapu kirikdongobuka, apum dopkwetebik. Asumur lukamukak ara, ninye deiyoknye Raja, el aik dam lukamuk. Atalak ara, mok kum li anya arye, asumur ara, mekwen ton kum deiamuk bukni, benuk uamuka anya arye, Yeremia atuku pum bisik dokwetebikba, bental pum bisik wekmanto ubuk.

Sudan mutukunye birye, Yeremia biti, melibuka lyepdobuk yupu

⁷ Atalak ara, ninye tonok el si ara, Ebet-Melek, Etiopia mutukunye, elda ninye deiyoknye, Raja el aik melibuka pil dolamuk. Winilamuka anya arye, kekenmokba, yuk nang arye, “Yeremia bira, sumur lukamik pum bisik akunum dopkwetepmake,” nyabikura, kekebukce, el adiparyuk, ninye deiyoknye unmokak nyalbiyuk. Ninye deiyoknye Raja ara, Benyamin yala nang arye, bublan botopdeibuke nyalamik bublan dam, binuka bukmokba, anye birye, Raja binyak nyalbiyuk.

⁸ Ebet-Melek adiparyuk Raja el aik batakukce, el si ara Benyamin nyalamik bisik bublan dam biyukce, amutuku taleamuk ninye deiyoknye, Raja biti binuka, nyabuk.

⁹ “Na deiyoknye Raja, anti nyapkine. An amu tam pil dona deiyok nang arye, Allah el yupu nyapdeipliba, laka nyananye, nabi Yeremia dobuka, sumur dopkwetepmak ning ara, pia malye wininmake. Anang arye, ‘E, Yeremia asumur dongobibiba, dipkoprob imun kanye boplirye, dipnamle. Tonda, nun mutuku noutam ara, kwaning patana li, akunum kibuka ati, kwaning kum danin banmasila anya arye, atuku pum bisik unamle talak ara, din ning kum diplyopura, dipnamle,’ tenebik. Utenebikce, Yeremia dobuka, atuku pum bisik dongobik,” nyabuk.

¹⁰ Nyabukba, ninye deiyoknye, Raja ayupu kekebukce, Ebet-Melek biti nyabuk. “Kume, ninye winilye nang ton nyapminba, an melipkikiba, anggun neika bimunce, Yeremia min kum dipmalye talak arye, atuku pum tam arye, dopropnamlume,” nyabuk.

¹¹ Nyabuk touk, Ebet-Melek birye, winilye nang nyabukba, sik neika, ninye deiyoknye, el aik dam biyik. Akunum biyikopura, baju pum deiamukba, bataklamik ning ton dopdobikce, ‘Nun kwit nabi Yeremia bira, abaju talipdobuka weleyanamal’ tenen, abaju tapu kirikdongobikce, Yeremia unmokak dopkwetebik.

¹² Ebet-Melek birye, baju tapu kirikdongobuka dopkwetebukce, Yeremia biti nyabuk. “Abaju wilikdoba ara, an tapu kiriknamakiyap kikol dam deipnamalyame. Ara, tapu kirikuka lipdopnamkiyap talak ara, ‘Uk dipkilyak’ tenen, nyapkine. Nyabukba, anye nyapdeibuk touk, Yeremia birye, aminop baju, el kikol dam deibukce, kintinibuk.

¹³ Winibukopura, sik awinilye nang arye, tapu talipdongobuka, liboweleyayikce, Yeremia yanuka deibik. Akunum dobuka deibikopura, ninye deiyoknye, Raja el yin talin nang, sik aik damuk, deipmekba unmok.”

Ninye deiyoknye Zedeikia birye, Yeremia biti, “Ance nyapniminye ning kekepnirye, wininamne,” nyabuka, yanuka morobuk yupu

¹⁴ Yuk talak ton, amutuku ninye deiyoknye, Raja Zedeikia birye, el mapu dopdeibukba, Yeremia bobuka, el dam boyayik. Ara, Allah el si eren aik, bisik bublan wekelbana winilye ning dam bodeililbiyik. Bobiyikba, Raja arye, nabi Yeremia biti nyabuk. “Na asipdenamkin ning ara, an adiparyuk, laka nyapnamanilyame. Dungnuldongona kume,” nyabuk.

¹⁵ Nyabuk bukni, Yeremia birye, tamubuka ninye deiyoknye Raja biti nyabuk. “Kume na nio, Allah arye anti, ‘Anye bira, ikin ning, el nong deice deipnamake,’ nyapkuk ning, laka nyapkinyeura, dipkoprob na wenebuka opnamanilame. Tonda, ‘Allah arye anti, wenen yupu nyapkuk ning, laka nyapkitinya babye, ance na yupu kum kekepnamnilame,’ tenepne,” Yeremia birye, Raja Zedeikia biti nyabuk.

¹⁶ Ayupu nyabukopura, Raja Zedeikia kekebukce, mur-mur alamak yupu atonun arye, Yeremia biti nyabuk. “Kume, na dipkoprob nyapkine. Nun ni koproba Allah, Kam Una Deiyoknye birye, nun bitinye kam una deiyok ning ap, isin ap areamsukba, kam unyame. Elda, pia kam unamle ati, el si deice arye nyapkine. Allah arye, anti nyapdeipkuk yupu, laka nyapniminyopura, narye anti, kum opnamkine. Tonda, narye, ‘Yuk nang arye, anye bira wenebuka optinge’ tenen, kum nyapnamne. Narye anti, yuk nang kum arepnamkine,” nyabuk.

¹⁷ Nyabuka ati, Yeremia birye, ninye deiyoknye, Raja Zedeikia biti, Allah arye nyapmok ning, el dam laka nyabuk. Yeremia birye nyabuk yupu ara, ani. “Allah el si Yahweh ara, Israel ninye ayala-yala nirya kalikuka melilule. Tonda, Allah Yahweh, elda aning-aning nirya ap, im deice yin talin malaikat ap, nirya talibuka, sik weik deiyoknye ulule. Elce nyapkuke. ‘Ninye deiyoknye Raja, anda Babel mutuku talibuka unyak deiyok nang ati, ‘Anggunce nara teleb aryuk datomopnululume,’ nyapminba, tomopkicopura, an wenebuka kum opnamkiyake. Tonda, amutuku noutamak dolamik asik nirya, ulupbuka uku dongobikirye, sirya kum daknamake. Babel nang arye anti, tomobuka tapu koupkicopura, aning nirya winipnamkiyake. Winipkikirye batakikiba, an ap, an kilapu ap, an mapu ap, an aik neika umunye ninye nirya ap ara, kam umunce, telebuk unamlume.’ Allah arye, anti nyapdeipkuke,” nyabuk.

¹⁸ Nyabukce, ayupu ton dukdongobuka nyabuk. “Bukni, ance sik Babel mutuku deiyok nang ati, ‘Nara, datomopnululume,’ kum nyapminyopura, dipkoprob nyapkine. An ap, an mapu silip nirya ap, amutuku ap nirya ara, sik Babel mutuku yin talin nang arye, obuka sirya daknamake. Tonda, anyasik domik ning, uku dapnamake. Tonda, an babye, min kum bikbik abuka binmanto kum upminba, an tomobuka opnamkiyake. Allah arye, winibuka nyapmakil yupu ara, akunum nyapkine,” Yeremia birye, Raja Zedeikia biti nyabuk.

¹⁹ Nyabukba, Zedeikia ayupu kekebukce, Yeremia biti, tonap tuba tamubuka nyabuk. “Na ilil upnil ning ara, ani. Nun mutuku nang, babye, Yehuda tam nang bukni, Babel mutuku nang tam akunum kiprobikce, wekelbiyik nang ara, anang arye, na bobukapnikirye, ‘Weik arye wenebuka opnamaniyak’ tenen, na ilil upnile,” nyabuk.

²⁰ Nyabuk bukni, Yeremia birye tamubuka, Raja Zedeikia biti nyabuk. “Kume, na deiyoknye, anyaplam ning ara, sikce kum winipnamkiyake. An bobuka, Babel mutuku nang dam binuka, wenebuka kum opnamkiyake. Dipkoprop Allah el si Yahweh arye, nyapdeipnuk yupu uk, akunum nyapkine. Anyapmakin touk, Allah arye nyapdeipkuk yupu kekepmince, aninguk winipminyopura, aning nirya ara, telebuk unamkile. Tonda, an kum opnamkiyake.

²¹ Bukni, na deiyoknye, ance sik anang ati, ‘Ur tomopnululume,’ kum nyapmince, mandipna kanye bobuka upminyopura, an opnamkiyake. Anyapmakin yupu nirya ara, Allah Yahweh arye, dotalak winipnamle ning ara, lengdar mapsa deice arye, akunum yanuka, lak lepdeipnukba, eipse ning ati, laka nyapmakine.”

²² “Lengdar mapmasirye, dinmasiba, lak winibuk ning ara, ani. Ara, aminyan talak ara, an kilapu ap, an teleb weik aik ton, kam unamak kilapu ap, an Raja Zedeikia birye taleamlum Yehuda mutuku noutam ton, tuba aunamak kilapu nirya ara, Babel mutuku talibuka unyak nang arye, akilapu nirya tomobikirye, bobinamake. Ara, sik Babel mutuku yin talin nang ati, arepnamake. Arebikiba, bobinamak talak ara, akilapu nirya arye, bisik banamak talak arye, anti nalibuka akutupnin banamkiake. Nun deiyoknye Raja, an kayapu nang ati, ‘Sikda, teleb nang anya arye, sikce nyaninyak yupu dib teneptinye,’ tenelalam bukni, an amu tam deiyok nang aryuk, teleb yupu an dam nyapdeiamkik bukni, tilila yupu nyalamikba, kekelalume. Ati ara, winipmanto yupu nyapkine. Wininmakica deice arye, wini talak ara, an yan ara, bental noutam burukminba, bental arye siknipkiliba, lyebuka kum binmanto upkile. Winipkiliba, an kayapu nang nirya, aning eipkikirye, ilil ati akunum bindopnamake. Akilapu nirya arye, an Rajanye biti, nalibuka akutupkikirye, malye nyanamkiyake, nyapkine.”

²³ “Ati ara, na Yeremia birye, tonap tamubuka nyapkine. Na deiyoknye Raja Zedeikia, an ap, an kilapu ap, an mapu ap, anggun nirya ara, Babel mutuku nang yakirye, malye kibuka opsikirye, anggun nirya tomobuka, bobinamsiake. Aning ara, dipkoprob nyapkine. Babel mutuku weik deiyoknye birye anti, kum bataknamkile. El yin talin nang arye, an dobuka bobinamkiyake. Winibikirye, an ulaminye asik nirya, uku dongobikiba, uku diplirye, sirya daknamle, nyapkine.” Yeremia birye, Zedeikia biti nyabuk.

²⁴ Nyabukopura, ninye deiyoknye Zedeikia birye, tamubuka nyabuk. “Anyapnilam yupu ara, kekepmakin bukni, ance yuk nang kekenmacak ton, laka nyana pia meme. Ayupu nyapminba, yuk nang kekebiceura, ‘An opkicak’ tenen ati, nyapkine.

²⁵ Tonda winipmanto, nun bitinye talipmanam yupu nirya, sik yuk nang kekenmacak, nyapminyeura, sik anang arye yupu bobuka, na amu tam pil don ati, weik deiyok nang ton, sik dam nyabikiba, kekebikirye, an dam yakirye, ‘An ap amutuku ninye deiyoknye ap, talepmarum yupu ara, nun dam laka nyapsilyame. Ayupu laka kum nyapsiminyeura, nunce anti, oplopnamkiyabe,’ nyapnamakiyak ati, nyapkine.”

²⁶ Nyabuka, yanuka asipdekiceura, nyapnamalyame. “Kume, nara ninye deiyoknye dam binurye, nyapnune. ‘Se na nio, nara, tuba tamubuka bopnimince, wenen aikuk bulbilyame,’ nyabuka, kum dopdeipnamnilyame. ‘Awenen aik binyopura, na dipnyake,’ nyabuka morolbimanue. Aninguk nyapnamalyame,” Raja Zedeikia birye, Yeremia biti nyabuk.

²⁷ Nyabukba, Yeremia birye, ayupu kekebuka, dabinuka unmoka ani, ninye deiyoknye Raja Zedeikia, el amu tam pil deiyok yuk-yuk talibuka, pil dolamik nang nirya, elce Yeremia biti nyapdeipmok touk, sik adiparyuk, Yeremia dam yayikce, yanuka asipdeyik. “Nun mutuku talilulce, ninye deiyoknye Raja ara, yata deiyok ati, an yukupmakilba, el dam binmalam do?” nyabuka asipdeyik. Bukni, sik anang, el dam yanuka asibik ning ara, Yeremia birye, laka kum nyabuk. Ara, ninye deiyoknye Raja arye nyapmok touk, ayupu uk, sik anang damak nyabuk. Nyabukba, anang Yeremia dam, batakuka bindobik. El ap, Raja ap, yupu talepmarik ning ara, dipkoprob ning ara, kum bikik. Tonda, Yeremia ap, ninye deiyoknye Raja Zedeikia ap, talepmarik yupu ara, yuk nang ton kum kekepmeka ati, sik yuk nang ton, kum bikik.

²⁸ Ati ara, Raja nang amu tam pil deiyok yuk-yuk talibuka ulamik nang arye, el Yeremia biti batakikba, elda ninye deiyoknye, Raja Zedeikia, el aik dam bukni, wenen aik pum tamuk ulamuka ani, aminyan talak ara, Allah arye nyapdeibuk touk, sik Babel mutuku yin talin nang yayikce, Yerusalem mutuku ulamik ninye ap, olanmeka ani, bisibuka malye kibikce, amutuku tuba kam ulamik ninye nirya tomobuka, sik mutuku Babel mutuku tamubuka bobiyik. Yeremia birye, ayupu nirya sekeibuk.