Yeremia 37 - Eipomek

Raja Zedeikia birye, Yeremia biti, “Allah moropsutumba, lyepsetu do?” nyabuka, morobuk yupu

¹ Babel mutuku ninye arye, Yehuda tam ninye obuka dakik talak ara, Babel mutuku taleamuk weik deiyoknye, el si Nebukadnesar birye, Yehuda tamnye el si Yosia, el mi Zedeikia dobuka erepdeibukce, ‘Anye bira, anggun Yehuda tam ululum ninye talibuka, sik sisinanye Raja unamle,’ nyapdeibuk. Winibuka ati, Yehuda yala nang, sik mutuku ninye deiyok kibuka taleamuknye, Yoyakin punubuk. Yoyakin el li koproba ara, Yoyakim ulamuk. Nebukadnesar birye winibukura, Yosia nyalamiknye, el mi Zedeikia wipdeibukba, Yehuda mutuku noutamak talibuk.

² Bukni, Zedeikia birye, ninye deiyoknye ulamuk talak ara, el ap, el amu tam pil deiyok kibuka taleamik nang nirya ap, tonda amutuku noutamak talye daulamik ninye ap nirya ara, Allah el si Yahweh arye, Yeremia el dam nyapdeibukba, laka nyalamuk yupu ara, moubuka kum kekelamik.

³ Allah el yupu kum kekelamikce, malyeuk winilamik bukni, Yehuda mutuku taleamuknye, Raja Zedeikia birye, ‘Yuk mutuku nang arye yanuka, obuka sirya daksikcak’ tenen, ‘Allah bico tenepsuturye, lyepsutue’ tenen, bitinye nang dopdeibukba, Yeremia el dam birik. Ara, ninye si Maseya, el mi Zefanya ap, tonda Selemya el mi Yukhal ap, sik bitinye dopdeibukba, nabi Yeremia dam morolbirik. Zefanya bira, Allah el si eren aik pum tam, pil dona deiyoknye imam ulamuk. Raja Zedeikia birye nyabuk, “Anggun bitinye arye, Yeremia el dam birumunce, nyapnamarume. ‘Allah arye lyepsutueʼ tenen, ‘Moropnamsilame,’ nyabuka, moropnamdume,” nyapdeibukba, morolbirik.

⁴ Atalak ara, amutuku deiyok nang arye, Yeremia biti, min kum tomobik. Tonda, Yeremia biti, tapu koubuka wenena aik noutamak, min kum bobinamika ati, Yeremia bira, tuba amutuku ulamik ninye noutamak, laka nyalbanauk winilamuk.

⁵ Atalak babye, sik Babel mutuku yin talin nang arye, ‘Yerusalem mutuku unyak nang nirya, obuka malye kipnamap’ tenen, yanuka warekmace talak ara, yuk ninye arye, anang ati, “Kume, anggun kekeplulume. Yuk mutuku ninye, Mesir mutuku talilul weiknye, el yin talin nang arye, Yerusalem mutuku ninye ona ati, yanganmake,” nyabuka, laka nyabik talak ara, sik Babel mutuku yin talin nang arye, ilil ubukba, adiparyuk Yerusalem mutuku asik domik ning batakuka, bai tam sakuka bindobik.

⁶ Atalak noutamak arye, Allah el si Yahweh arye, nabi Yeremia dam yanuka nyabuk.

⁷ “Zedeikia birye, wibuka deipmokba, an dam yanuka moropkirik nang ati ara, ayupu nyapnulyame. Ara, Yehuda yala ninye nirya, sik ninye deiyoknye ubuka aninye talilulnye, el dam birumunce, anyapnusin yupu laka nyalbinamdurume. Ara, Yudea mutuku talilulnye birye, na Allah ati, ‘Se, nunti bico tenepsutumce, lyepsutume,’ nyabuka morobuknye biti, ayupu nyapdeipnamdurume. Anggunce nyapnamarum yupu ara, ani. ‘Mesir mutuku yin talin nang, sik Yudea tam unyak ninye ap, an ap, anggun melina ati yanganmongo nang ara, bisik noutamak arye tamupmakce, sik mutuku, Mesir mutuku uk, tamubuka binmake,’ nyabuka, nyapdeipnamadurume,” Allah arye nyabuk.

⁸ Nyabukce, ayupu ton nyabuk. Winibikiba, sik Babel mutuku yin talin nang arye, tamubuka yanmakce, amutuku uk Yerusalem mutuku yanuka, warikinamsiyake. Winipsikirye, amutuku ululum ninye nirya, obisibikirye, anggun asik nirya, uku dongobuka, sirya daknamake.

⁹ Ati ara, na Allah Yahweh arye, anggun wenena ati, nyapsine. Anggun Yudea tam ululum ninye arye, tilila yupu kum nyapdanamlulume. Na dipkoprob nyapsine. Anggunce, anggun bidamang atibuk, ayupu kum nyanamlulume. “Kume, sik Babel mutuku yin talin nang ara, nun dam yanmasiyak bukni, nunti ona kum diparyuk, talye tamubuka bindopnamake. Dipkoprop kum opnamsiyake,” nyabuka, tilila yupu kum nyalanamlulume. Na Allah arye, dipkoprob nyapsine. Sik Babel mutuku yin talin nang arye, kum bataknamsiyake. Onauk winipnamsiyake, nyapsine. Ara, narye tenepse touk, sik ayin talin nang arye, tamubuka yanuka warekinmasiyake. Anggun wenena ati, opnamsiyake.

¹⁰ Winipmanto ara, anggun Yudea tam ululum ninye arye, Babel mutuku yin nang nirya ati optumce, kam tuba upting nang ara, dilauk doploptumba, sik tenda aik buktinga babye ara, sik Babel mutuku nang aniryuk, anggun nirya obuka, sirya daksitinge. Sirya opsitingce, anggun Yudea tam dolulum aik nirya, uku dongobuka, sirya daksitinge. Aning ara, dipkoprob winipnamsina ati nyapsine. Allah arye, Yeremia biti nyabukba, Yeremia birye, el dam yanmarek nang bitinye ati, laka nyabuk.

Yeremia tomobuka, wenen aik bobiyik yupu

¹¹ Babel mutuku yin talin nang arye, Yerusalem mutuku yanuka warikmek. Awarekmek talak ara, yuk nang arye, ‘Se, Mesir mutuku weiknye Firaun ap, el yin talin nang ap yanganmake,’ nyabuka, laka nyabikba, sik Babel mutuku yin talin nang kekebikce, Babel mutuku yin nang adiparyuk, Yerusalem mutuku batakuka, bai tam sakuka bindobik.

¹² Atalak noutamak ara, nabi Yeremia bira, Yerusalem mutuku batakukce, Benyamin yala nang, sik ulamik mutuku biyuk. Ara, ‘Na deiyok nang arye, taleamik mutuku ati, sik ap na ap, nun tuku kibuka alapropnamap’ tenen, biyuk.

¹³ Bukni, Benyamin yala nang ulamik asik dam, bublan wekelbalamik bisik dam biyukba, abublan kaliklamuk yin talinanye birye, Yeremia tomobukce, ayupu nyabuk. “Kume, na kele, anda, ‘Babel nang, sik tam kipropnamne,’ teneplumce, sik mutuku banmalam atia,” nyabuk. Ayupu nyabuknye bira, el si ara, Yeria. El li koprop el si ara, Selemya. Selemya el li koproba si ara, Hananya ulamuk. Ayin talinanye Yeria birye, nabi Yeremia biti, asipdeyuk.

¹⁴ Asipdeyukura, Yeremia arye tamubuka, nyabuk. “Kume, ance nati, ‘Babel mutuku nang tam kipropnamne’ tenen, banmalam atia,’ nyapmanilam ning ara, kume. Nara, Yehuda tam ninye batakuka, sik Babel tam kum kipnune. Ance talye nyapnilame,” nyabuk. Nyabuk bukni, Yeria birye, Yeremia nyabuk yupu kum kekebukce, Yeria birye adiparyuk, nabi Yeremia tomobuka, tapu koubukce, Benyamin mutuku taleamik nang, sik dam bobiyuk.

¹⁵ Tomobuka bobiyukura, amutuku deiyok nang arye, Yeremia biti, derebuka wenebikce, sik amu tam pil don nang ati, “Anye bira, obuka wenepmunce, tapu koupmunyeura, nun mutuku Sekretaris, el si Yonatan, el aik koprop dongoplulume,” nyabik. Nyabikba, anyaik binuka dongobik. Yonatan el aik koprop dam ara, amutuku malye winilamik ninye wenena ati, el aik damak, tuku palibuka, tuku pum tam, ninye wenena aik palibuka dolamikba, awamuk. Awamuk ati, Yeremia bobuka, Yonatan el aik dam, tuku palyamika pum bisik dongobik.

¹⁶ Yeremia bira, tapu koubuka, awenena aik bukni, tuku pum bisik dongobikce, Yeremia bira, atuku pum kikinak unmok. Asukum ara, ouku weik arye, atuku pum tam ulamuk.

¹⁷ Unmok bukni, aminyan talak ara, Yehuda mutuku taleamuknye, ninye deiyoknye Raja Zedeikia birye, el mapu ati, dungnubuka nyabuk. “ ‘Yuk nang arye kekebikcak’ tenen, lakak arye kum nyapnalam bukni, nabi Yeremia, adiparyuk bobuka, na dam boyalulume,” nyabukba, Yeremia bobukabikce, Raja Zedeikia, el dam bobiyik. Bobiyikba, ninye deiyoknye, Raja arye asipdeyuk. “Amio, anti Allah el si Yahweh arye, tuba tonap, yupu ton yanuka nyapmakil do, kum do?” nyabuk. Nyabukba, Yeremia birye, tamubuka ninye deiyoknye biti, laka nyabuk. “Diba, Allah arye anti ara, nyapkile. ‘Babel mutuku nang arye, an ap, an mutuku ninye ap ati, yanuka opnamsiyake.’ Allah arye nyapkile,” nyabuk.

¹⁸ Yeremia birye, aning akunum nyabukopura, tuba ton elce tamubuka, Raja Zedeikia ati nyabuk. “Narye yata malye ning ton winipseba, awenena aik dongopnulum do? Tonda, narye an amu tam deiyok nang ap, an talilyam ninye ap, tonda an ap ati ara, narye yata malye ning winipseba, adeiyok ati, anggun wenen aik pum tam dongopnulum do?” nyabuka asipdeyuk.

¹⁹ Nyabukce, ayupu ton dukdongobuka nyabuk. “Tonda amutuku deiyoknye, Raja Zedeikia, an mutuku mambul yupu laka nyana ap, aminyan upnamle ning laka nyana ap, weik kel bikamik nang arye, anti, ‘Kume na nio, sik Babel mutuku yin talin nang arye, nun dam kum yanuka opnamsiyake,’ nyabuka, an dam yanuka, laka nyapkik nang ara, wini talak dan tam unyak do?

²⁰ Ati ara, Raja Zedekia, na deiyoknye, anti moropkine. Wini talak na moropnukin ning ara, kekepnilyame. Ara, ance nati, ‘Yonatan aik dam, wenen aik pum tam tamubuka, kum dongopnamanilam’ tenen, moropkine. Na kele, ance an yin talin nang ati, ‘Anye bira bobilulume,’ nyapminba, awenena aik, tuku pum tamuk, tamubuka bobinicopura, na dipnamnarya. Anya arye, ‘Na dipnyak’ tenen, moropkine,” Yeremia birye, Raja Zedeikia biti morobuk.

²¹ Morobukba, ayupu ninye deiyoknye, Raja Zedeikia kekebukce, Yeremia biti, “Anye bira dopropmunce, na weik teleb aik damak bukni, na yin talin nang, sik aik bisik bublan wekelbana damuk binuka, deipnamlulume,” nyabuk. Nyabukba, anyaik binuka deibik. Abinuka deibikba, asukumuk ulamuk. Ulamuk talak ara, Raja Zedekia aik anyuk ton nyabuk. “Sumu-sumu nirya, din ning el si roti dabikiba, tonok ning dobuka, anye biti arelyanganamlule,” nyabuk. Nyapdeiamuk touk, din ning amutuku tuba aubuk talak ara, Yeremia biti, roti dobuka arelyanganlamik. Ati, Yeremia bira, ninye deiyoknye, el weik teleb aik pum tam bukni, wenen aik dongobikba, asukumuk ulamuk.