Yeremia 36 - Eipomek

Allah nyapdeiamukba, Yeremia arye sekamuk yupu nirya ara, tonoknye, el si Baruk birye, Allah el si eren aik binuka, nukuk yupu

¹ Yehuda mutuku ap, Yehuda yala ninye ap, ninye deiyok kibuka taleamuknye bira, el si Sisinanye, Raja Yoyakim bira, keting tamun dumbarye deice arye, amutuku nirya taleamuk. Yoyakim bira, el li koprop si ara, Yosia. Atalak noutamak ara, Allah el si Yahweh arye, Yeremia dam yanuk, ayupu nyapdeibuk. Allah arye nyabuk.

² “Yeremia ance kitilongolamak buku ton dopropmince, abuku noutamak ara, narye an dam Israel yala ninye ap, Yehuda yala ninye ap, tonda ninye yuk mutuku ninye nirya ap, sik malye wininyak ning wenena ati, ‘Winibuka ikin ning, sik nong deice deipnamne,’ nyabuka, laka nyapdeiamkise yupu ara, seknulyame. Ara, minop talak Raja Yosia birye, ninye deiyoknye ulamuk talak arye, minopce nyapdeiamkise yupu arye, dipdongobuka, asum nyapkin yupu nirya ara, seknulyame nyapkine.”

³ “Sekminyeura, ayupu lakak arye nyabikiba, Yehuda yala ninye kekebikirye, sik malye ning batakikirye, ‘Na dam tamubuka yanamak do, kum do?’ tenen, dinamne. Ara sikce, ‘Se, nun malye wininyaba dekna ara, Allah arye kanye imun ning, nun dam deipnamsila ati nyapsuke,’ tenebikirye, ikin kanye bobikirye, sik malye wininyak ning batakuka, na damuk tamubuka yacopura, narye, ‘Ikin ning, sik dam deipnamne,’ tenepse ning ara, bataktinye. Kumopura, kume.” Allah arye Yeremia biti, nyabuka laka nyabuk.

⁴ Allah arye ayupu nyapdeipnuka ati ara, na Yeremia birye, ninye si Neria, el mi Baruk yukupsiba, na dam yayuk. Baruk birye, Yeremia dam yayukba, Yeremia bira, Allah Yahweh arye, elti, nyapdeiamuk yupu nirya laka nyabukba, Baruk birye kitildongolamak buku noutamak sekuk.

⁵ Baruk birye, ayupu nirya akunum sekukura, Yeremia birye Baruk biti nyabuk. “An kele, wini talak ara, wenen aik dongopnikba, apia ununa anya arye, Allah el si eren aik binuka, kum wektinye. Ati, narye anti moropkina ara, Allah el si eren aik noutam binuka ayupu nyapnalyame,” nyabuka morobuk.

⁶ Nyabukce, ayupu ton dukdongobuka nyabuk. “Ara, talye sum deice kum binalyame bukni, Israel ninye arye, Allah el si erena ati, din ton dina kumce, anyaik bulubuka wekikirye, Allah moronyak sumuk, an adiparyuk, sik dam binulyame. Sik dam bimince, weik yupu deice arye, ayupu nuknalyame. Ara, anyapdeipmakinba, winiryuk seknamalam yupu nirya, ‘Ninye nirya kekenamacak, ayupu laka arye yinipnalam’ tenen, nyapkine. Yinipminyopura, tonda Yehuda yala ninye, sik mutuku yuk-yuk dobuka, unyakak arye, yanganamak ninye nirya ap, bulubuka wekmacakuk, yinipminba kekepnamake.

⁷ Na walwal bukni, ayupu nyapnalam sum ara, kekebikirye, ‘Se, nun dipkoprob malye unyabe’ tenen, sik aninye malye wininyak ning nirya bataktingce, Allah ati moropnamak do, kum do? Ara, sik aninye nirya arye, ‘Se nun ni Allah, nun malye wininyap ning batakikirye, an damuk tamubuka yanamabe. Ance nun malye ning kilipsutumce, lyepsutum tenen, moropkiyabe,’ nyabuka, Allah ati, moropnamak do, kum do? Nun walwal bukni, dinauk unaname. Ara, urdem ati kum nyapkine. Sik Israel ninye ap, Yehuda yala ninye ap arye, pia malye weik wininyaka ati, Allah el yu weik upliba, ‘Sik wenena ati, ikin weik ning, sik nong deice deipnirye, sikti, opnamne,’ nyapdeibuk ning ara, mitik kume. Weik wenen ning kintinipmala ati, nyapkine. Ati ara, Allah arye nyapdeipnukba, laka nyapmakinba, ance sekmalam yupu dobuka, Allah el si eren aik binuka yinipnalyame, nyapkine,” Yeremia birye, Baruk biti nyabuk.

⁸ Yeremia birye nyabukba, Neria el mi Baruk bira, Yeremia arye, ‘Winipnalyame,’ nyapdeipmok touk winibuk. Ara, Allah el si eren aik biyukce, ayupu nukuk. Ara, Allah arye, ‘Israel ninye wenepnamne,’ nyabuka, laka nyapdeiamukba, nabi Yeremia kekelamukce, laka nyapdeibuk yupu nirya ara, Baruk birye sekuka kintinipmokce, binuka yinibuk.

⁹ Sik nirya daunmeka ani, Raja Yosia el mi, Yoyakin amutuku ninye deiyok kibuka taleamukba, keting tamun pamubarye noutamak, wala sembilan akunum kibukura, amutuku noutamak ulamik ninye arye nyabik. “Kume, nun ni koprop Allah, el si erena ati, din dina kumce, dina bulunguk ubirye, Yerusalem mutuku binuka bulubipyopura, Allah el si erenamabe,” nyabik. Nyabika ati, sik Yerusalem mutuku asik noutamak ulamik ninye ap, Yehuda mutuku noutamak asik yuk-yuk dobuka ulamik ninye ap, sik nirya bulubuka yayik. Ara, Yerusalem mutuku noutamak bukni, Allah el si eren aik dam bululyayik.

¹⁰ Yayik talak ara, Baruk birye, Yeremia laka nyapdeipmok yupu, kitilongon buku noutamak sekuk ning ara, aninye bulubuka wekmekce, kekenmek sukumuk ayupu yinibuk. Anyaik ara, Allah el si eren aik dam bukni, ara ninye si, Safan el mi Gemarya birye, pil domuk aik dam yinibuk. Safan bira, ara Sekretaris Negara pil talibuka dolamuknye biti, nyapne. Gemarya birye domuk aik ara, Allah ati arelban aik dam bukni, mitik tonun deice tam, ‘Allah moropnuyap’ tenen, wekelbalamikak yinibuk. Tonda, anyaik ara, Allah Yahweh, el arena ati domik aik wekelbana ati, botobik bublan el si ara, Winiryuk Bublan dam ubuk. Anyaik ara, awinibuka ati, anyaik dam Baruk birye, ayupu nirya yinibuk.

Yehuda mutuku ninye deiyoknye, Raja Yoyakim, el ulamuk aik pum tam, Baruk birye, ayupu yinibuk

¹¹ Ninye si, Safan birye deiamuk mi, el si Gemarya bukni, anye birye deibuk mi, el si Mikaya ulamuk. Allah arye, Yeremia dam nyapdeiamuk yupu ara, Baruk birye yinibuk talak ara, Mikaya ton anyasik dam aunmokce, kekebuk. Ara, Allah Yahweh arye, Yeremia biti nyapdeiamukba, Yeremia birye Baruk biti, laka nyapdeibukba, sekuk yupu kekebuk.

¹² Baruk birye yinibuk yupu, akunum kekebukopura, amutuku taleamuk ninye deiyoknye, sisinanye el aik biyuk. Anyaik biyuk bukni, ton mitik aik wilibuka domik ning, amutuku ulamuk ning nirya sekne deiyoknye, elti, domik aik binuka wekuk. Anyaik ara, Sekretaris Negara, el aik pum tam ara, amutuku talibuka ulamik weik nang nirya, bulubuka wekmekce, bukmekak eibuk. Anyaik bukmek nang, sik si ara, ani. Semaya el mi Delaya ap, Akbor el mi Elnatan ap, Safan el mi Gemarya ap, Hananya el mi Zedeikia ap, tonda sik yupu nyapnaba si sekna deiyoknye, el si Elisama ap, tonda amutuku deiyok yuk-yuk pil talibuka ulamik weik nang ap, sik nirya anyaik wekmekce, bukmekak eibuk.

¹³ Mikaya birye, anyaik wekukce, anyaik unmek nang ati, nyabuk. “Kume, Allah arye, nabi Yeremia dam nyapdeiamukba, sekamuk yupu nirya ara, tonoknye el si Baruk birye, amutuku ninye kekenmakak yinipmalaba, na ton kekepmana ara, ani,” nyabuka laka nyabuk.

¹⁴ Ayupu laka nyabukba, sik awekmek nang kekebikce, sikce tamubuka tonoknye, el si Yehu biti dopdeibikce, elti, nyabik. “Baruk el dam bimince, elti, nyapnulyame. ‘Ninye nirya kekenmokak arye, yinipmalam yupu ara, dobuka nun dam adiparyuk boyanulyame,’ nyapdeipnamlyame,” nyabikba, anye Yehu bira, kekebuk. Ara, anye bira Netanya, el mi ulamuk. Netanya el li koproba ara, Selemya ulamuk. Selemya el apu koprop ara, Kusi ulamuk. Ati, Netanya el mi Yehu birye dopdeibikce, “Baruk dam bimince, nyapminba, yanamalule,” nyapdeibikba, nyalbiyuk. Binuka nyabukura, Nerya el mi Baruk kekebukce, adiparyuk, Allah arye nyapdeiamuk yupu kitildongon buku noutamak sekuk ning ara dobuka, sik dam tamubuka yayuk.

¹⁵ Anyaik yayukura, sik anyaik wekmek nang arye, nyabik. “Anyaik yanuka bukmince, abopmalam buku ara, nun dam ton yinipsiminba, kekepnuyabe ati, abuku ara yinipsilyame,” nyabikba, Baruk birye, abuku dobuka yinibuk.

¹⁶ Akunum yinibukopura, ayupu nirya akunum moubuka kekebikce, sik anang nirya arye, ‘Se,’ tenen, ilil ubukba, sik mining urasin deice, uk dipdayikce, Baruk biti nyabik. “Anyaplam ning ara, weik mambul yupu anya arye, nun ninye deiyoknye Raja ati, binuka nyapnuyabe” nyabik.

¹⁷ Nyabikura, sik amambul weik deiyok nang arye, ayupu tonap, Baruk biti asipdeyik. “Ance laka nyapsilyame. Yata wiribuka, aning nirya ara seklum do? Ayupu seklum ning ara, nabi Yeremia birye, laka nyapdeipkuk ati, aninguk seklum do? Aning ara, moubuka nun dam ton nyapsilyame,” nyabik.

¹⁸ Nyabuka asipdeiyikba, Baruk birye tamubuka nyabuk. “Diba, asekse yupu nirya ara, nabi Yeremia birye, nyapdeipnukopura, adiparyuk el nyabuk ninguk sekse. Nara, sekne ning ap, sekne mek ap, aninguk dobuka, akitildongon buku deiceuk sekse. Abopmanba eipmalum ara, akunuma,” nyabuk.

¹⁹ Nyabukba, sik anang arye, tamubuka nyabik. “Kume amio, ance yinipmasilam yupu ara, kanye imun weik yupu anya arye, ‘Amutuku deiyoknye birye, kekeplirye, kel biklyopura, ayupu ati, yu upliba, opkilyak’ ati, an ap, nabi Yeremia ap, adiparyuk dungnupnamdurume. Tonda, lak una pia kume,” nyabik.

Yehuda mutuku ninye deiyoknye, Raja Yoyakim bira, Yeremia birye nyabukba, Baruk birye sekuk yupu kekebuka ati, nyabuk yupu

²⁰ Ninye deiyoknye Raja Yoyakim, el amu tam talibuka pil dolamik nang arye, Baruk sekuk kitildongon buku dobukabikce, Sekretaris Negara, el si Elisama, el bulamuk aik pum tam deibik. Winibikce, amutuku taleamuk deiyoknye, Raja Yoyakim el dam binuka, Allah arye nyapdeiamukba, Yeremia kekebukce, Baruk biti laka nyabukba, sekdeibuk yupu nirya, Raja Yoyakim biti, laka nyalbiyik.

²¹ Binuka nyabikura, ninye deiyoknye Raja Yoyakim tamubuka, Yehu biti nyabuk. “An adiparyuk bimince, akitildongon buku binuka dobuka boyalyame,” nyabuk. Nyabukba, Elisama aik deipmeka, binuka boyayuk. Akunum boyayukura, Yehu birye yinibukba, amutuku Raja ap, el amu tam pil dolamik weik nang nirya ap, el dam tikuka kekebik.

²² Awala ara, toupne barye wala noutam arye yinibuk ati, amutuku arukna li uamukba, arukna weik ubuk. Yehu birye abuku yininmok talak ara, ninye deiyoknye Raja ara, bai bukmoka anya arye, uku sekmeka dam bukmokce, uku pikinmok. Atalak ara, arukna li uamuka ati, upmok.

²³ Yehu birye abuku akunum yinibuka nyapnin banmoka ani, ayupu mitik anun ton nyabukopura, amutuku ninye deiyoknye, Raja birye, ‘Ayupu na lik anya arye, tonap kum kekenamabe’ tenen, el topnong kapu dopdakuka, abuku noutam arye kwiliklobuk. Abuku kwilikukce, dobuka uku dongobukba, uku arye dipdobuk. Atalak aniryuk aning nirya, sirya dakuka, uku dongobukba, dibuka sirya dakuk.

²⁴ Uku danmok talak ara, aninye deiyoknye Raja ap, el amu tam pil deiyok kibuka, dolamik nang ap, sik nirya arye, ‘Abuku noutamak sekmalce, uku danmala ara, malye weik unamle,’ tenen, ilil kum ubuka ati, sik amutuku ninye ulamik touk, sik baju kum kwiliklobik. Aning kum bukni, Raja arye, ayupu dobuka, uku dongobukba, sik nirya ara, talye yupu tunim abuka unmek.

²⁵ Wininmeka ani, Elnatan ap, Delaya ap, Gemarya ap arye nyabik. “Se, nun deiyoknye abuku ara, mambul yupu anya arye, uku dana kume,” tuba nyabik bukni, sik yupu kum kekebuk.

²⁶ Ninye deiyoknye, Raja Yoyakim bira, el mi Yeramel ap, tonda Ariel el mi Seraiya ap, Abdel el mi Selemya ap ati, nyabuk. “Anggunce, nabi Yeremia ap, elce nyabuk yupu sekuknye, Baruk ap, tomobuka tapu koupnamlume,” nyapdeibuk. Nyabukura, sik abitinye nang arye, ‘Nunce sik anang tomopnunam’ tenen, eprik bukni, Allah el si Yahweh arye, Yeremia ap, Baruk ap ati, duknyamukba, sik abitinye nang arye, kum enmarik.

Nabi Yeremia birye, kitildongon buku tonok ton, sekuka ati, nyabuk yupu

²⁷ Amutuku ninye deiyok kibuka taleamuknye, el si Raja Yoyakim bira, Allah Yahweh nyalamukba, Yeremia kekebukce, Baruk biti laka nyapdeibukba, Baruk birye, keten buku noutamak sekeibuk yupu ara, akunum uku dongobukba, uku arye dibuka sirya dakukopura, Allah el si Yahweh arye, Yeremia dam yanuka nyabuk.

²⁸ “Narye nyapdeiamkisiba, kekeplumce, Baruk dam nyaplumba sekamuk buku uamuk yupu ara, tonap tuba tamubuka, yuk winiryuk keten buku noutamak seknamlyame. Ara, Yehuda tam talilulnye, Raja Yoyakim birye, uku dongobuk ning ara, tonap tuba tamubuka nyapminba, Baruk birye seknamalule,” nyabuk.

²⁹ Tonda, na Allah Yahweh arye, Yehuda tam talilul ninye deiyoknye, Raja Yoyakim biti, nyapnamkin yupu babye seknulyame. Ayupu ara, ani. Na Allah Yahweh arye nyapkine. Narye, Yeremia dam mambul yupu nyamsiba, elce Baruk dam nyapdeibukura, sekamuk yupu ara, ance mandipna kanye bobuka, akunum uku daplume. Ara, ‘Abuku dobuka, uku dapnyopura, Allah arye derepnamnil do, kum do?’ tenena kum arye, talye lukparabuka, uku daplume. Tonda ance, ‘Yata deiyok ning ati, Allah arye abuku noutamak ara, Babel mutuku deiyok kibuka taleamuknye biti, mikip arepneba, Yehuda mutuku unyak ninye nirya ap, sik weinyak ning ayala-yala nirya ap, obuka, sirya daknamake,’ nyapsuk do? ‘Aning ara, na like,’ nyaplumce, abuku dobuka, uku daplume.

³⁰ Ati ara, na Allah Yahweh arye, anda Yehuda tam talibuka ulyamnye, Raja Yoyakim biti, nyapkine. Se, Raja Yoyakim, anda ninye deiyoknye ulyam bukni, yuk nang arye anti, oplopkicopura, an kayapu nang arye, an nong dobuka, kum weipnamake. Aning kum bukni, an nong doprobikirye, bai tam talye lakak donokikiba, keting deice noutamak ara, keting diplirye, buppu weik upliba, sesal lebuka lyupnamkile. Tonda, lukunyan noutamak ara, arukna an nong deice palipkilibuk, arukna weik upnamle. Winipnamkiyaka ati ara, ance deipminba, dadeipdanin banamak nang ara, amutuku talina ati, ninye deiyok nang ton, kum kipnamake. An mapu noutamak, tonoknye babye, minop talak Raja Daud birye bulamuk ning deice, kum buknamle. An yalanye birye, amutuku pia kum talinamle.

³¹ Aninguk kum bukni, an ap, ance deipminba, dadeipdanin banamak mapu ap, tonda an taliplumba, an amu tam pil yuk-yuk talibuka donyak ninye ap, anggun nirya ara, malye winimunya anya arye, wenebuka opnamsine. Ara, anggun deiyok kibuka, amutuku taliplum nang arye, malye winimunyeba, Yerusalem mutuku unyak ninye ap, Yehuda mutuku noutamak daunyak ninye ap, malyeuk wininyaka ati, narye amutuku noutamak, ikin weik ning, anggun nong deice deipnamsine. Winipnamne ning ara, yata talak arye, “Anggunce tuba malyeuk winipmunyopura, anggun malye winilulum ning dekna ati, kanye weik imun ning arepsinirye, mikip arye wenepnamsine,” nyalamsise. Bukni, amutuku ninye nirya arye, na nyalamse yupu kum kekelamnik. Ati, ‘Aikin ning nirya ara, dipkoprob anggun nong deice deipnamsine,’ nyapne. Allah arye nyabukba, Yeremia birye, kekebuk.

³² Yeremia birye, ayupu nirya akunum kekebukopura, winiryuk keten buku doprobukce, Sekretaris Baruk dam deibukce, “Narye laka nyapkiniba, ayupu seknulyame,” nyabuk. Nyapmokba, ayupu nirya tuba tamubuka, Neria el mi Baruk biti, laka nyabukba, Baruk birye sekuke. Ara, minopce Allah arye nyapdeibukura, Yeremia kekebukce, Baruk dam nyabukba, sekamuk bukni, Raja Yoyakim birye, uku dongobuk ning, ayupu atonun, tuba tonap sekuk. Tonda, Allah arye, ayupu atonun yupu tonap tabakuka nyapdeibukba, Yeremia kekebukce, laka nyabukba, Baruk birye sekuk. Ayupu nirya ara, nabi Yeremia birye nyabuk.