Yeremia 35 - Eipomek

Rekhab yala nang arye, teleb winilamik bukni, Yehuda tam nang ara, malye winilamik ning ati, nyabuk yupu

¹ Yehuda tam ulamuk nye, el si Yosia, elce deiamuknye Yoyakin, elce Raja kibuka Yehuda tam ulamik nang talibuka, ninye deiyoknye ulamuk talak ara, Allah Yahweh arye, na Yeremia dam yanuka, nyapdeipnuk yupu ara, ani.

² Yeremia an bimince, sik Rekhab yala nang dam binuka, yupu nyapnulyame. Winipminyeura, ance sik ayala nang dobuka, na Allah si eren aik noutam bukni, tonok aik domice sukum arye, anggur mek memebuka, anang ati arepdelyame,” Allah arye nyapnuke.

³ Nyapnuka ati, aning nyapnuk touk winipsirye, Rekhab yala nang dam bisirye, ayala nang, sik deiyok kibuka ulamik nang ton dobuka, Allah el si eren aik koproba boyase. Ara, ninye tonoknye, el si Habasiya birye, deiamuknye Yeremia, elce deiamuknye, el si Yaazanya ap, Yaazanya birye deiamuk mapu ap, tonda el weit dunye, el kayapu nang nirya ap, tonda sik Rekhab yala nang arye deiamik nang, sik nirya ara, dobuka Yerusalem mutuku boyasirye, Allah el si eren aik koproba wekupu.

⁴ Narye, sik anang nirya bobuka, Allah el si eren aik noutam bukni, ton aik koproba wilibuka domika pum tam, epdanuka bukuburye, yupu talebupu. Nun neika ulamupu aik koproba, ara ninye si nabi Hanan, elce deiamuk mapu, sik ulamik aik koproba wekuka ulamupu. Hanan el li koproba, el si Yikdalya ulamuk. Elce deiamuknye, Hanan el mapu ulamik aik koproba ulamupu. Anang boyasik aik koproba, mining dam ara, ninye si Salum, elce deiamuknye imam Maaseya, el ulamuk aik koproba, alip tam bulubuka, asukum yanuka wekupu. Allah el si eren aik wekelbana ati, bisik bublan botopdeiamik ning, kalikna deiyok nang ara, sik ulamik aik koproba wilibuka domik ning ara, asukum ton awamukba, batakuk. Maaseya elda, Allah el si eren aik, urasin tam weik bisik bublan botopdeiamika, kalikna deiyoknye ulamuk.

⁵ Anyaik koproba biyukopura, na Yeremia birye, sik Rekhab yala nang bukmek dam ara, anggur mek kwebuka deipmek ning ap, amek dina ati, mitikto mek makau kelas ap, kintinibuka dobuka deipse. Aning nirya kintinibuka deipsirye, Allah arye akunum, ‘Winipnulyame,’ nyapnuk touk, sik Rekhab yala nang ati, ‘Telebe, winira anggunda, anggur mek ton diplulume,” nyapse.

⁶ Nyapse bukni, sik anang nirya arye, nati tamubuka nyapnik. “Kume na nio, anggur mek ara, nun kum dinyabe. Deiyok ara, nun apu koproba Rekhab birye deiamuk nye, nun apu koproba Yonadab birye, ayupu nyapdeipsuke. “Nun Rekhab yala nang ap, nunce deibibiba, dadeipdanin banamak Rekhab nang nirya babye, anggur mek pia kum dinamabe,” nyabuka, yupu akunum nyapsukce, yupu sekamsuka ati, nun atalak unyap Rekhab nang babye, ayupu nyapdeiamsuk touk, “Wini talak babye, ayupu talibuka unyabe. Ati, anggur mek kum diptibye,” nyabik.

⁷ Nyabikopura, ayupu ton laka nyapnik. “Aninguk kum bukni, nun apu koproba Yonadab birye, ayupu ton nyapdeipsuke. “Nun Rekhab yala nang, kam unamap talak nirya ara, nunce anggur wa ton, talibuka kum winamabe. Tonda anggur kouna ap, dekna ap, pia kum wininamabe. Tonda, yuk yala ning, yala yuk-yuk nirya babye, anggur duk wa wibuka kum kounamabe. Tonda nun unamap sukum kat aik babye, kum dobuka unamabe. Nun ayala nang nirya ara, pia ati, tia tenda aikuk, kintinibuka deibipyeura, atenda aik diamuk pia aunamabe. Deiyok ara, Allah arye nun Rekhab yala nang nirya ati nyapsuke. “Narye, ‘Winipnamlume,’ nyapsise touk, pia ati, winipmunyeura, kam una deiyok ning arepsinyeba, ateleb mutuku noutamuk, keting tamun pia weik arye, teleb kibuka unamlume. Kum winipmunyeura, kume,” nyapsuke.

⁸ Ura na nio, nun apu koproba Rekhab birye deiamuknye, Yonadab birye, ayupu nyabuka sekuka ati, elce nyapdeiamsuk touk, nun ayala nang nirya arye, aninguk tuba talibuka wininyabe. Ati, nun ap, nunce donyap kilapu ap, nunce delinyap mapu ap, kilmapu ap nirya babye, anggur mek pia kum dinyabe.

⁹ Aning atonun, nun apu koproba Yonadab birye nyapdeipsuk touk, nun un aik ati, kat aik ton kum dobuka unyabe. Tonda, anggur wa ton kum winyabe. Tonda, yala ton kum kounyabe, tonda wa tuku kum dekenyabe. Nun Rekbah yala nang nirya arye, nun kam unyap talak nirya ara, ayupu moubuka talibuburye wininyabe.

¹⁰ Ati, nun un aik ton kum dobuka pia unyap bukni, nunda tia tenda aikuk unyabe. Tonda, nun apu koproba Yonadab birye, ‘Aning ara wininamlume. Aning ara, pia kum wininamlume,’ nyabuka, yupu seksuk touk, aninguk moubuka talibibirye wininyabe.

¹¹ Wininyap bukni, min talak ara, Babel mutuku talebuka deiyoknye, Raja Nebukadnesar birye, ‘Israel nang opnirye, sik mutuku alubuka dopropnamneʼ tenen, nun Israel nang unyap mutuku, mal olyangalamsuk talak ara, nunce nyabupu. ‘Kume, sik Babel mutuku yin nang ap, Siria mutuku yin nang ap arye, nun atam unyap nang nirya, ‘Opsicakʼ tenena ati, nun ilil weik upsile. ‘Ati, anang sik dam arye, bai sakuka bibirye, omutuku weik asik domika, Yerusalem mutuku binuka daunamabe,’ tenebuburye, yanuka Yerusalem mutuku damuk unyabe. Winibupu ati, wini talak babye, asukumuk tuba awininmabe.” Sik Rekbah yala nang arye, na Yeremia biti, ayupu laka nyapnike.

¹² Winibuka nyapnikba, daunmasa ani, aminyan talak Allah Yahweh arye, na dam yanuka, yupu ton nyapdeipnuke.

¹³ Allah arye nyapdeipnuka ara, ani. “Nara sik Israel yala nang, ‘Nun ni koproba,’ nyabuka si erenululuma ati, narye melibuka kalikisunun Allah aunune. Nara, Allah Yahweh arye, im deice unyak yin talin malaikat nirya, sik deiyoknye ununa ati, mikip weiknye unune. Yeremia, anda Yehuda tam unyak nang ap, weik asik Yerusalem mutuku unyak nang ap ati, ayupu bobuka, sik dam nyalbinulyame. Anyapnamlyam yupu ara, ani. “Anggun ti asipdesine. Anggun nirya ara, yata deiyok ati anggunda, na nyapsise yupu kum kekenululum do? Tonda, narye nyapsinye yupu ara, moubuka kum taliplumce, kum dobolbalulum ara, yata ati do? Anggunda, yata deiyok ati, kum bikilulum do? Na Allah Yahweh arye anggunti, nyabuka asipdesine,” nyabuk.

¹⁴ Allah arye nyapnukopura, ayupu ton nyabuk. “Ura anggun ton moubuka teniplulume! Ninye si Rekhab birye deibuk nye, Yonadab birye deibukba, dadeipdanin yangalamika ani, sikce mapu deipdanin, yanganyak nang nirya ati, ‘Anggunda, anggur mek pia kum dinamlume,’ nyabuka, yupu sekamukba, sik Rekbah yala nang nirya arye, ayupu moubuka taleamikce, winilamika ani, wini talak wininamak nang babye, tuba ayupu moubuka talinyake. Sik apu koproba arye nyapdeibuk yupu, moubuka talinyaka ati, wini talak babye ayala nang arye, anggur pia kum dinyake. Wininyak bukni, na babye, sik Israel yala nang nirya ap, anggun Yehuda tam ululum nang nirya ap ati, ‘Aning wininamlume. Aning ara, pia kum wininamlume,’ nyabuka, tuba-tuba anggun dam nyasunun bukni, anggunce pia kum kekenululume.

¹⁵ Tonda, tuba-tuba na Allah arye, na amu tam pil donyak nang, ara na yupu laka nyana ap, aminyan winipnamle ning, laka nyanyaka deiyok nang, sik nabi-nabi nang ara, sik dam dopdeipyeba, anggun dam yanarye, anggunti laka nyalamsik. ‘Anggun malye winilulum ning batauka, Allah dam tamubuka yalulume,’ nyabuka, yupu nyasinyake. Tonda, anggun malye dekna ning ara, batakuka, diksukum winin ninguk talibuka telebuk unamlume. Tonda, sik nirya ara, talye ning ati, ‘Nun ni koproba ani,’ nyabuka, isa si erelulum ning ara, adiparyuk bataklulume! ‘Allah arye nyasilye yupu, moubuka talipmunyeura, elce melipsilyeba, anggun apu yapu ap, anggun ap ati, akunum areamsuk mutuku, teleb mutuku noutam ara, keting tamun yupa weik deice arye, asukum teleb kibuka unamlume,’ nyasinyake. Bukni, na Allah arye, anggun Israel nang ati, nyapdeiamse yupu ara, kum kekenululumce, ayupu moubuka kum talilulume. Tuba malye ninguk talibuka winilulume.

¹⁶ Ura tenipdelulume! Yonadab birye deiamukba, deipdanin yangalamik nang ara, sik yok punanye nyapdeiamuk yupu ara, moubuka kekelamikce, tuba talinyake. Bukni, anggun Israel nang nirya ara, na Allah arye nyapdeiamsise yupu ara, anggunce moubuka kum talilulume.” Allah arye, na Yeremia ati nyapnuke.

¹⁷ Nyapnukaura, ayupu ton dukdongobuka nyabuk. “Ati ara, na Allah Yahweh, im deice yin talin malaikat nirya, sik deiyoknye unune. Nara, anggun Israel nang arye, ‘Nun ni koproba, ani,’ nyabuka, si erenululumba, narye anggunti melibuka kalikisunun Allah, narye nyapsine. Narye anggun Yehuda tam ululum nang ap, weik asik domik mutuku, Yerusalem mutuku ululum Israel nang ap, anggun wenena ati, weik kanye imun bon ning, anggun mutuku dobuka deipniba, yanamale. Ara, anggun amutuku ululum nang wenena ati, aning nirya akunum kintinibuka deiamsirye, ‘Anggunda anggun malye winilulume ning, kum batakmunyeura, wenepnamsine,’ nyapdeiamsise ning nirya, wini talak dopdeipnamsine. Narye aning winipnamne deiyok ara, anggun Israel nang arye, na nyapdeisise yupu kum kekenululumce, aning moubuka kum taliluluma ati, narye anggunti, ‘Na dam tamubuka yanamlume,’ nyabuka, yukamsise bukni, aning babye kum kekeluluma ati, wini talak ara, anggun deice imun kanye bon ning deipnamsine.” Allah arye na Yeremia biti, laka nyapnuke.

¹⁸ Nyapnukura, Allah arye, sik Rekhab yala nang ati nyapnukba, na Yeremia birye, sik Rekbah yala nang ati nyapse. Anyapse yupu ara ani. “Allah arye nyapsile. Nara, Allah Yahweh, im deice yin talin malaikat nirya, sik deiyoknye unune. Anggun Israel nang arye, nati, ‘Nun ni koproba,’ nyabuka, si erenululumba, narye anggunti, melibuka kalikisunun Allah, narye ayupu nyapsine. Anggunda, anggun apu Yonadab birye nyapdeipsuk yupu, tuba moubuka taliplume. Yonadab birye, ‘Aning wininamlume, aning ara, pia kum wininamlume,’ nyapdeipsuk yupu, anggunce aninguk moubuka talipmunce, melibuka dobolbalulume.

¹⁹ Awiniluluma ati ara, na Allah Yahweh, im deice yin talin malaikat nirya, sik deiyoknye unune. Anggun Israel nang arye, nati, ‘Nun ni koproba,’ nyabuka, si erenululum ati, narye anggunti, melibuka kalikisunun Allah, narye anyalin yupu nyapdeipsine. “Anggun apu Rekhab birye deiamukba, deipdanin yangalulume ninye noutam ara, anggun yala nang ton wipdeipnyeba, anggunce na pil talibuka, pia donamnulume. Na Allah arye, nyalin yupu deice arye, akunum nyapdeipmasina ati, aning ara dipkoprob nong upnamlarya!” Allah arye, nyapnukba, na Yeremia birye, sik Rekbah yala nang deiyok kibuka taleamik nang ati nyapse.