Yeremia 34 - Eipomek

Yeremia birye, ‘Raja Zedekia biti, winipnamkile,’ nyabuk yupu

¹ Raja Babel, el si Nebukadnesar, el ap, el yin talin nang ap, sik deiyok nang nirya ap, yuk-yuk ninye yala ulamik nang ap, yuk-yuk Raja nang ap, ura, Babel mutuku ninye deiyoknye, Raja arye taleamukba, el amu tam melibuka olyanamik nang nirya ara, sik nirya arye, mikip kipdeibikba, Yerusalem weik asik ulamik nang ap, amutuku dana-dana tam asik dolamikce, ulamik nang ati, ‘Opnamabʼ tenen, yanuka warikik. Atalak ara, Allah Yahweh arye, na nabi Yeremia dam yanuka, ayupu nyapdeipnuk. Ayupu ara ani.

² Nara, Allah Yahweh arye, an Yeremia biti, nyapkine. Narye sik Israel nang kalekuka meliniba, sikce na si ereninyaka ati, nara sik ni koproba Allah unune. Narye anti, ayupu nyapkine. Ance Yehuda mutuku unyak nang talebuknye, Raja Zedekia biti, ayupu nyalbinamalam yupu ara, ani. “Raja Zedekiao, na Allah Yahweh arye, anggun aululum mutuku ara, narye dobuka, Babel mutuku talebuknye deice deipyopura, elce anggun dam yanuka, anggun weik asik domlum ning ara, uku dongopnamle.

³ Tonda, Raja Zedekia anda, bai sakuka kum binalyame. An babye batakna kum bukni, Babel mutuku yin talin nang arye, tomobukapkikirye, Babel mutuku Raja, el dam binuka deipnamkiake. Ancuk, Babel mutuku Raja Nebukadnesar ap epradumunce, el ap, an ap, yupu talipnamrume. Winipnamruma ati, anda Babel mutuku bobinuka deipnamkiake.

⁴ Dipkoprop winipnamsiak bukni, na Allah Yahweh arye, anda Raja Zedekia, Yehuda mutuku taliplumnye biti, nyapnukin yupu ara, moubuka kekepnulyame! Anda mal olanak arye, ninye on ya arye opkikiba, kum dipnalame.

⁵ Mal olanak arye opkikiba, malye kanye bobuka kum dipnalame. Aminyan talak dipnalam bukni, anda talye dibinauk dipnalame. Dipminyopura, min talak an apu yapu nang, ninye deiyok kibuka, talipnin yangalamik nang dipna ati, sik taleamik nang arye, siltong teleb ning uku dongopnarye, malye nyabuka, engelamik touk ubuka, an babye dipminyopura, an tam nang arye, siltong ning, uku dongobikirye, anti engebuka teleb weipnamkiake. Sik nirya arye anti, engepkikirye, nyapnamkiake. ‘Se nun ni Allah Yahweh! Nun taleamsuknye bira, akunum kum dale,” nyapnamkiake. Ura, na Allah Yahweh arye, ayupu akunum nyapdeipmakina ati, dipkoprob nong upnamle. Allah arye nabi Yeremia biti yanuka laka nyabukba, kekebuk.

⁶ Allah arye anyabuk yupu ara, na Yeremia birye, Raja Zedekia, Yehuda mutuku taleamuka deiyoknye, Yerusalem mutuku weik asik ulamukak bisirye, el kekenak binuka, laka nyapsiba kekebuk.

⁷ Ayupu bobuka laka nyalbise talak ara, Babel mutuku taleamuknye, el ap, el yin talin nang ap arye, ‘Yerusalem mutuku ara, opnuyapʼ tenen, yanuka warikmek. Tonda, Babel yin nang sikcuk, Yehuda mutuku noutam, weik asik dolamik ning, akunum obuka sice buklobik bukni, asik bitinye ara, tuba aubuk. Anyasik ara, Yudea mutuku noutam bukni, ‘Nun mal olan nang arye olyasikcakʼ tenen, anyasik dana-dana tam nirya, weik cang keil poka dobuka, antanap dongamikce, kaliklamik. Anyasik bitinye sik si ara, Lakis mutuku ap, Aseka mutuku ap, abitinyeuk, tuba awamuka ati, Babel mutuku yin nang arye, abinuka warekdongobik. Atalakuk, na nabi Yeremia bisirye, Raja Zedekia biti, Allah arye nyapdeipnuk yupu laka nyapse.

Israel nang ara, uang arye dekuka, delilyangalamikba, sik pil talye dolamik nang ati, sik deice malye kililamik ning ati, nyabuk yupu

⁸ Allah Yahweh arye, nabi Yeremia dam yanuka, ayupu nyabuk. Atalak ara, Yehuda mutuku taleamuknye, Raja Zedekia birye, el amu tam taleamuk nang nirya ati, nyalin yupu akunum nyabuk. Ara, Raja Zedekia birye, sik Yerusalem mutuku weik asik ulamik nang ati, nyabuk. Ara, “Wini talak ara, anggunce, yo bok arebuka, yuk nang dekmunce, ‘Winibuka nun aik pil, talye donamsulume,’ nyabuka, akunum doproplumce, ikin pil dilamlum nang nirya ara, sal babye, kilapu babye, anang adiparyuk bataknamlume,” Raja Zedekia birye, nyabuk.

⁹ Ayupu nyabuka deiyok ara, ani. Ara, sik Israel yala nang nirya arye, Ibrani nang, sal ap, kilapu ap ara, sik asik talye pil melibuka dona ati, yo bok arye dekuka delilyangalamikba, ikin pil dilamikba, talye pil dolamik nang ara, ‘Bataknamakʼ tenen, ayupu nyabuk. Tonda, ‘Sik bidamnye, Israel yala nang arye, sik mening mamun nang buk, ton Israel yala nang arye, ton Israel yala nang ati, yo bok deice dekuka pia kum talipnamakʼ tenen, nyabuk. Ura, ayupu nyabuk talak ara, sik Israel nang kekebikce, elce, ‘Aning kum wininamlume,’ nyapdeibuk touk winibik.

¹⁰ Atalak ara, Raja Zedekia birye nyapdeibuk touk, sik Yerusalem mutuku ulamik nang nirya arye, atonun winibik. Sik mutuku talibuka, deiyok kibuka, ulamik nang nirya arye, “Wini talak, nun asik pum talye pil dona ati, yo bok arye dekuka deibupu ati, ikin pil dosinyak nang nirya ara, dipkoprob batakipyeura, urdem telebuk unamake,” nyabikura, sikce akunum nyalin yupu nyapdeiamikce, aninguk winilamik.

¹¹ Nyabuka, apil don nang batakdongamikba, anang binamik bukni, aminyan talak ara, sik tamubuka anang tomobuka doprobikce, sik asik pil aruklamikba, apil tuba dolamik.

^12-13 Winilamika ati ara, Israel nang, sik ni koproba Allah Yahweh ara, sik Israel nang arye, el si erenyaka ati, sik ni koproba Allah ulule. Elce, na Yeremia biti, ayupu nyapdeipnuke. “Ance aunyak nang, sik dam binuka nyapnulyame. Ayupu ara, ani. ‘Anggun deipkirikdanin yanamsik nang ap, anggun apu yapu ap ara, Mesir mutuku nang arye, ikin pil dilamika ati, imun kanye bobuka ulamik sukum arye, narye sik lobuka boyanamsirye, sikti, nyalin yupu akunum nyapdeiamse.

¹⁴ Na Allah arye nyapdeiamse ning ara, ani. “Anggun Israel nango, keting tamun, nirya dounamle talak nirya ara, keting tamun nukuka, nakub barye akunum yalyopura, anggun talye pil dona ati, dekuka doplum nang ara, bataknamlume. Ara, anggunce, yuk Ibrani nang nirya ara, yo bok deice dekmunce, ‘Nun ikin pil talye urdem melibuka pil donamsiakʼ tenen, doplum nang ara, adiparyuk nakub barye keting tamun sirya dakmalye talak ara, tekbarye keting tamun winiryuk yalye talak ara, anang batakmunyeba, anang arye, pil ton kum donamake.” Na Allah arye, anggun apu yapu ati, nyalin yupu deice nyapdeipse bukni, anggun apu yapu nang arye, ayupu nirya moubuka kum talibikce, ‘Elce nyapdeipsuk yupu kum kekepnuyap,’ tenebika ati, narye nyapse yupu ara, kekebuka kum talilamik.

¹⁵ Ura, anggun wini talak ululum nang babye, aning atonun akunum winilulume. Se, dotalak ara, anggun malye winilamlum ning ara batakmunce, na Allah, na kanye tenepse ninguk winipnamlume. Ara, anggun nirya arye, ‘Nun kayapu ati, yo bok deice dekuburye, pil aruknyopura, talye pil melin nang atonun kibuka, donyak nang nirya ara, lobuka bataknamabe,’ nyapnamlume. Ara, na Allah, na si eren aik urasin tam bulupmunce, ‘Aning ara, dipkoprob winipnamabe,’ nyapdeiamuk yupu deice arye, nyapnamlume.

¹⁶ Nyaplum bukni, mitik tonun aminyan talak ara, anggun nirya arye, na si ati, malye kipdeipnulume. Ara, anggun pil melibuka don nang, sik anang sik babye tuba, ‘Aning patapsile,’ tenelamik touk, akunum bataklumba, binamik bukni, anang nirya ara, tuba tamubuka doproplumce, pil tamubuka aruklumba, tuba ikin piluk donyake. Aning winipluma deice arye, na si malye kipdeipnulume.

¹⁷ Ati ara, na Allah Yahweh arye, anggunti nyapsine. Narye anggunti, ‘Sik talye pil don nang, Ibrani nang nirya ara, batakdongoplulume,’ nyapsise touk, kum winiplume. Ati, wini talak ara, na Allah arye, anggun Israel yala nang ati, lopdeipnusine. Ara, talye kanye bobuka, yukak binuka, teleb kum unamlum bukni, narye bataksinyopura, anggun mal olan nang arye, ninye on ya arye opnamsiake. Tonda, imun kanye bon uk weik dipsilyopura, anggun nong dibina ap, tonda din ning kum dalyopura, din patana ap deice arye, anggun dibinauk unamlume. Akanye imun ning akunum arepsinyeba, ikin weik umunyopura, sik dana-dana tam, yuk-yuk mutuku nang ap, yuk mutuku im sirya, mutuku sirya nirya unyak nang arye, eipsikirye, ‘Se, sik Israel nang ara, yatato ning ubukba, pia ikin weik unyak doʼ tenen, ilil weik upnamle.

¹⁸ Tonda, yata nang do nirya, na Allah arye, ‘Winipnamlume. Aning pia kum winipnamlume. Aning ton akunum winipmunyopura, narye winibuka melinamsine nyalin yupu deice nyapdeipsisiba, anggunce, ‘E, diba aninguk winipnamabe,’ nyapnulum nang bukni, aminyan talak ayupu nirya yanibuka, malyeuk winilamlum nang ara, weik tonun wenepnamsine. Anang ara, winipnamsine. Minop talak ara, anggunce nati, ‘Nun ni birye nyapsuk yupu, dipkoprob moubuka talibibirye, aninguk winipnamapʼ tenen, sapi basam obukaplumce, nong kaliplumce sekuka, yuk-yuk kipdeiamlumce, abisikuk binmaluma deice arye, nyalin yupu atonun nyapdeipnulume. Winipluma ati, winipmanto ara, anggun nyalin deice nyapnulum bukni, tuba tamubuka, anyalin yupu bataklum nang ara, anggun nong sekuka, yuk-yuk kipdeipnamsine.

¹⁹ Winipnamsina ara, ani. Anggunce, na yupu yanipnulum nang ara, anggun mal olan nang arye, anggun dam yanuka, anggun obuka, anggun nong opsikirye sekuka, yuk-yuk kipdeipnamsiake. Ara, anggun Yehuda tam ap, Yerusalem mutuku weik asik ap, deiyok kibuka talinyak nang ara, sik Raja-Raja nang ap, Raja nang, sik aik pum tam pil don nang ap, anggun imam-imam nang ap, tonda amutuku talye daululum nang ap, minop talak anggun nirya arye, ‘Aning ara, wininamabe,’ nyabuka, sapi basam mi obukaplumce, nong kalipdoba bitinye kibuka, deiamlumce, asapi basam nong kalipdoba, noutam bisik yanibuka balulume. Winipnululuma deice arye, nyalin yupu nyapdeipnulum bukni, aning nirya ara, akunum yanipnulume.

²⁰ Ati ara, na Allah arye anggun dobuka arepnyopura, anggun mal olan nang arye, ‘Se, anang optibyeʼ tenen, weik tonun pataplye nang ati, sik deice deipnamsine. Ati anggun alye dakana ati, narye lo arepniba, anggun mal olan nang arye, anggun malye winilulum nang opsikirye, anggun nong dobuka, tuku deice kata sukum arye bataksicopura, im noutam talye lakuka balamle maka arye, yanuka anggun kalipdoba dipnamake. Tonda, bai tam talye kam unyak ning ap yakirye, sik nong dipnamake.

²¹ Ura, Zedekia Yehuda mutuku Raja kibuka talebuknye ap, el amu tam pil dona deiyok kiamik nang nirya ara, narye lo arepniba, anggun mal olan nang arye, ‘Se, anang nirya optibyeʼ tenen, kalikinamsiyak nang damuk, narye dobuka arepnamsine. Ura, wini talak ara, Babel mutuku ninye deiyoknye ap, el yin talin nang ap, tia talak ati, sik dam batakuka binmak bukni, aminyan tamubuka yanganamakca!

²² Ara, na Allah Yahweh arye, ‘Winiplulume!’ nyabuka, yupu mikip arye nyapdeipnyopura, sik anang kekebikirye, anang ara, amutuku tamubuka yanamake. Ara, amutuku weik asik dolamlum ning, Yerusalem mutuku warikina ap, ninye ona ap, ukula dolona ap ati, tamubuka yanamake. Tonda, amutuku obuka doprobikirye, anyasik nirya uku dongopnamake. Aninguk kum bukni, na Allah arye, Yehuda mutuku noutam, weik asik dobuka unyakak nirya ara, mutuku kata atonun kiplopniba, oldem uplirye, ninye kum kum ulamne sukum atonun kipnamle. Na Allah Yahweh arye, ayupu akunum nyapmasina ati, aning ara, dipkoprob nong kipnamlarya, nyapsine!