Yeremia 32 - Eipomek

Yeremia birye, tuku dekuk yupu

¹ Zedeikia birye, Yehuda mutuku Raja kibuka taleamuk keting tamun ara, sepuluh tahun akunum kibuk. Atalakuk, Raja Nebukadnesar birye, Babel mutuku taleamuk keting tamun ara, delapan belas (18) tahun kibuk. Atalak noutam arye, Allah Yahweh arye, na Yeremia dam yanuka, yupu nyapdeipnuke.

² Tonda, atalakuk Babel mutuku yin talin nang, Yerusalem mutuku yayikce warikik. Ara, ‘Amutuku wekibirye, anang opnamapʼ tenen, Yerusalem weik asik dana-dana tam antanap dongobuka warikik. Awarikik talak ara, na nabi Yeremia bira tomobuka, Yehuda mutuku tam nirya talina ati, Raja kibuka taleamuknye, el si Raja Zedeikia, el weik aik dam bukni, anyaik kalikna ati, yin talin nang unmek aik koproba deipnukba unmase.

³ Ara, Yehuda mutuku tam nirya taleamuknye, Raja Zedeikia birye, na Yeremia biti nyapnuk. Ara, “Anda malye yupu akunum nyapmanulum ning ara, yata deiyok ati do?” nyabuka wenepnukce, tomobuka tapu koupnukopura, ayin talin nang aik koproba dongopnuke. El Raja Zedeikia birye, nati, “Anda malye yupu nyapnulum ning ara, ani. ‘Allah Yahweh arye, aminyan winipnamle ning ati, nyapnuk yupu ara, ani. “Ara, na Allah arye Yerusalem mutuku ap, Yehuda mutuku tam nirya ara, dobuka Babel mutuku nang deiyoknye biti, arepnamne. Na Allah arye, Babel mutuku nirya taleamlimye bira, dopdeipyeba, amutuku yalirye, amutuku tuku yanuka alubuka doproplirye, anggun Israel nang nirya talipnamsile.

⁴ Tonda, Nebukadnesar birye, Yehuda mutuku tam talibuknye, Raja Zedeikia biti, kum bataknamkile. Allah arye an dobuka, Babel mutuku talibuk, ninye deiyoknye deice deipkiliba, tomopnamkile. Zedeikia anda tomopkikirye, pera mutuku bobinuka, Raja Babel dam bobinuka deipkikiba, anye ap neika yupu sisiknamrume. Anda Zedeikia, an asing arye, Babel mutuku ninye deiyoknye eipnalame.

⁵ Ati, Babel mutuku talibuk ninye deiyoknye birye, anda Raja Zedeikia dobuka, Babel mutuku bobikiliba, dabinuka ulaminya ani, aminyan talak, na akunum tenyamse talak ara, na Allah arye Raja Babel biti, wenepnamnarya. Bukni atalak ara, Raja Zedeikia ance, Raja Babel biti opnalama babye, ance el ap, el tam nang ap ati, obuka sirya kum danalame. Na Allah Yahweh arye, ayupu akunum nyapdeipmana ati, aning dipkoprob upnamlarya. Anda nabi Yeremia birye, ‘Ayupu ara, Allah Yahweh arye nyapdeipmanuba, an kekena ati, yanuka laka nyapkine,’ nyabuka, nyapnuluma deice arye, ance malye kipdeipnulume. Raja Zedeikia birye, nabi Yeremia biti nyabuk.

⁶ Aminyan talak ara, nabi Yeremia birye, ayupu ton nyabuk. “Allah Yahweh arye, na Yeremia dam yanuka, yupu ton nyapdeipnuk ning ara, ani.

⁷ “Yeremiao, an mam koproba Salum, elce deiamuknye, el si Hanameel, an dam yalirye, yanuka yupu nyapnamkilca. Ara, narye Anatot mutuku noutam bukni, Benyamin yala nang mutuku tam ubuk mutuku noutam ara, tonok wa tuku ton talibuka unune. Anda na yalanye, mening damnye ulyama ati, nun mutuku noutam ulamupu touk, ancuk atuku minop dektume. Ati, narye atuku dopdeipkiniba, atuku ara, ance deknulyame.” Allah arye nyapdeipnuba kekepse. Ura, na Yeremia bira, anye Salum, el mi koproba atonunye ununa ati, na ka Hanameel talibuk tuku, dekuka dopropmantonye bira, na unune.

⁸ Ura, Allah arye na dam akunum nyapdeipnuk touk, aminyan talak ara, Hanameel bira na dam yayuke. Hanameel babye, Raja Zedeikia birye, el yin talin nang ulamik aik koproba, tomobuka deiamukak yayuke. Hanameel yayukce, elce nati yanuka nyapnuk. “Benyamin yala nang arye, talinyak mutuku noutam bukni, Anatot mutuku talinun tuku ara, ance deknunilyame. Deiyok ara, anda na yalanye ulyama ati, nun mutuku noutam ulamupu touk, ancuk atuku minop dektume,” nyabuka, moropnukba, narye bita kekepse. ‘E, anyapmanil yupu ara, dipkoprob Allah Yahweh, elcuk min talak nyapdeiamnuk yupu ara, anye birye ayupu atonun, akunum nyapnile,’ tenepse. Winibuka tenepsa deice arye, moubuka bikse. ‘E, anye birye nyabuka moropmanil yupu ara, dipkoprob Allah Yahweh arye tenelul touk, akunum nyapnile,’ tenebuka bikse.

^9-10 Utenepsa ati ara, narye Anatot mutuku tuku ara, na mam koproba mi, na ka Hanameel birye taleamuk tuku, el dam arye dekse. Amutuku tuku dekna ati, Hanameel biti arepse deken ning ara, tujuhbelas (17) uang perak arye dekse. Adekse talak ara, ‘Amutuku tuku ara, akunum dekmaleʼ tenen, ‘Biknuniakʼ tenen, ninye ton yukupsiba, sik anang yanuka dinmanik buk, ‘Atuku ara, akunum dekmane,’ nyabuka, tuku dekna ati sekik surat deice, na si sekuka, tanda tanggan kipsa deice arye, atuku dekna ati, sah kipdeipse. Winipsopura, atuku dekse perak keil uang ara, lin ning arye libuka deipsirye, ‘El ikin ara, yate barye kipnul do?’ tenen, timbang kipse.

¹¹ Narye atuku akunum deksopura, ‘Atuku akunum dekmale,’ nyabuka sekik surat ara, bitinye kintinipse. Ton surat ara, lin ning pum tam libuka deipse. Asurat bukni, bitinye ning ara, laka talipse. Aning ara, narye asurat bukni, kopi kipse ning ara, yo atonun ning arye, minop taplakuka deipse ning doropse. Asurat bitinye ara, atuku deken ning, lak nyana ati, ‘Atuku dekna ati, winibuka keil uang arebuk,’ nyana ap, tonda atuku dekuk ning un ning ap, tonda, ‘Adekuk tuku deice ara, aning-aning wininamle,’ lak nyan ning nirya ara, alin ning pum tamuk libuka, deipsirye, alin ning kitibik sukum ara, yo atonun ning arye, taplakuka deipsirye, lipdongopse.

¹² Aning nirya akunum kintinibuka winipsopura, narye atuku dekna ati, laka nyan surat dobuka, na ka el si Baruk biti arepse. Ara, ninye si Mahseia, elce deiamuknye Neria, elce deiamuknye, el si Baruk biti, arepse. Asurat dobuka Baruk biti arepse talak ara, na ka Hanameel ap, atuku deksirye, tanda tangan kipmasiba, eipmanikce, sik si asurat deice sekmek ning ap, tonda Raja Zedeikia el yin talin nang, sik aik koproba dam bukuka unmek Yudea mutuku nang babye, sik nirya ap dinmek sukum arye, asurat dobuka, Baruk biti arepsiba, eipmanike.

¹³ Sik anang nirya kekenmanikce, dinmanik buk, narye Baruk biti, ayupu nyapse.

¹⁴ Israel nang nirya arye, si erenyap Allah, elda Yahweh ulule. Nun ni koproba Allah Yahweh ara, im deice yin talin malaikat nirya talilirye, sik deiyoknye ulula ati, mikip weiknye ulule. Ati, nun ni koproba, Allah Yahweh arye nyapdeipmasil touk, narye ayupu nyapkine. ‘An tuku dekna ati, asurat bitinye kintinip deipman ning ara, yo taplakuka deipmase ning ap, yo kum taplakuka deipmasirye, tuba laka talipman ning ap, akunum arepmakina ati, an Baruk birye, asurat bitinye dobuka, dokola deipnulyame. Ara, asurat bitinye dopropminyopura, ance bobuka biminyak arye, kira tuku arye dobuka telebikirye, memenyak makau pum tam bobinukapmince, libuka deipmin buk, pia asukumuk tuba upnamlule,” nyapse.

¹⁵ Nyapsopura, ayupu ton dukdongobuka nyapse. “Awinipnamlam ning ara, talye ati kume. Deiyok ara ani. Ara, Israel nang nirya arye, si erenyap Allah, elda Yahweh ulule. Nun ni koproba Allah Yahweh ara, im deice yin talin malaikat nirya talilyak arye, sik deiyoknye ulula ati, mikip weiknye ulule. Allah elce, ayupu nyapdeipsuke. ‘Babel mutuku nang opsikirye, anggun bobinuka, pera mutuku deipnamsiak bukni, aminyan doyanamle talak ara, amutuku noutam ubuk tuku ap, atuku deice asik dolulum ning ap, tonda anggur wa wilulum ning ara, sik Israel nang arye tamubuka yakirye, tuba dekdopnamake,’ nyabuka, akunum laka nyapdeipmasile,” nyapse.

Yeremia birye, ikin kanye bobuka, Allah ati morobuk yupu

¹⁶ Allah arye nyapdeipnuk yupu akunum laka nyapsopura, na Yeremia birye, tuku deksiba sekuka arepnik surat ara, dobuka, ninye si Neria, elce deiamuknye, Baruk biti arepsirye, Allah Yahweh ati moropse. Moropsirye, ayupu nyapse.

¹⁷ Na nio, anda Allah Yahweh, aning-aning nirya talibuka, deice tam erebuka, pia mikip weik ulyama ati, an tenelalam touk, adiparyuk winilyame. Ati, Allah an mikip weik taruk deice arye, im noutam ap, mutuku sirya, im sirya nirya ap, kwepdeiplume. Yata ning nirya do, tonok ning babye, an ikin upkiliba, kum winipmanto ning ton, pia kum ukulule. Anda, pia mikip weik ulyamnye biti, aning-aning nirya ara, kanam aryuk pil dopra ulyame.

¹⁸ Na ni Allah, ancuk ninye yupa weik, beribu-ribu nukman kumto unyap nang nirya ati, batakna kumce, pia bico tenesimince, ance, ‘Winibuka teleb kipdeipnamsine,’ nyalin yupu deice nyapdeipsulum touk, tuba pia telebuk kilinamsilame. Bukni, wisi nang arye, malye winilamikca dengna ara, sikce deibikce mapu deice, ance ikin ning dobuka, sik mapu deice deibuka wenamsilame. Anda dipkoprob pia mikip weik ulyamce, aning-aning nirya, deice tam erebuka ulyame. Allah Yahweh, anda im deice yin talin malaikat nirya talilyamce, sik deiyoknye ulyama ati, ance mikip weiknye ulyame.

¹⁹ Tonda na nio, ance sikti, ‘Aning ara, winipnamlume, aning ara, pia kum winipnamlume. Teleb winina ara ani,’ nyabuka laka nyasilyam ning ara, ninye arye kum tenipmanto, pia mambul ninguk melibuka nyasilyame. Tonda, ance pil dopminye ning nirya ara, ninye arye pil kum dopmanto ninguk, mikip weik deice arye, an pil dopra ulyame. Ninye nirya arye, pil donyak ning nirya ara, ance disilyamce, apil donyaba atonunuk dengna ara, aresilyame. Malye winin ning ati, ikin ning dolonyabe. Diksukum winin ning ati, teleb dengna ning dolonyabe. Moubuka eipsimince, nun winilamap touk, dengna ning arisilyame.

²⁰ Minop talak, ancuk ninye dopmanto kum pil dolamlume. Ara, ancuk Mesir mutuku noutam, ninye kum winipmanto pil ap, ninye arye winipmanto kum ning ap, dolamlume. Winilamluma atonun, wini talak babye, ancuk nun Israel nang kan-kan ap, tonda mutuku sirya, im sirya nirya unyak nang kan-kan nirya ara, Ance tuba pia winipmanto kum pil melibuka dosilyame. Winiminya deice arye, wini talak ara, ninye tukwak mutuku unyak nang, nun nirya arye, an si akunum kel bikikinyapce, pia tuba-tuba an siuk erekinyapce, ‘Anda pia telebe,’ nyabuka, anti si erebuka kikinyabe.

²¹ Allaho, an mikip weik deice arye taleplumce, an mapu koproba Israel nang ara, Mesir mutuku noutam, ikin weik ulamikba, bobuka ateleb mutuku tamubuka boyanamsulume. Tukwak nang arye, kum winipmanto pitin-pitin ning ap, tonda ninye arye kum dopmanto pil ap, mikip weik ninye arye winipmanto kum pil ap, dolamluma deice arye, Israel nang lobuka lyepropsulume. Ance, kum winipmanto ning nirya ara, an mikip weik taruk deice arye, pil dolamlumba, sik atalak ulamik nang ara, aning nirya eililamikce, ‘Seʼ tenen, imun kanye bobuka, ilil weik asa ulamik.

²² Tonda, Israel nang, sik apu yapu ati, ance, “Amutuku ap, ateleb tuku ap, amutuku noutam, pia teleb ulye ning ap ara, anggunti arepnamsine,” nyabuka, akunum nyalin yupu nyapdeiamlume. Aning nyapdeiamlum touk, nun apu yapu arye deiamikak, dadeipdanin yangalamikce, deibik nang ati, amutuku ara, dobuka arepsulumba aunyabe. Amutuku ara, yata teleb winin ning do nirya ara, pia weik tonun aululba dolonyabe.

²³ Ance, nun apu yapu ati, atam tuku nirya areplumba, amutuku wekuka, talibikce ulamik. Bukni, sik anang arye, amutuku tuku dobuka, unyak talak ara, ance, sikti, “Aning-aning talibuka, unamlume. Aning ara, pia kum wininamlume,” nyapdeiamsulum ning ara, aning nirya kum talibuka ulamik. Tonda, ance, “Aning-aning wininamlume. Teleb winina ara, ani,” nyapdeiamlum ning ara, kum talibuka winilamik. Tonok ning babye, teleb kibuka kum winilamik. Sikce malye-malye weik winilamika ati ara, ance sik anang deice, ikin weik ning ap, kanye imun ning ap, nirya dopdeipminba, sik deice yalyeba dolokirye, imun kanye bobuka unyake.

²⁴ Babel mutuku yin talin nang yayikce, nun weik asik dana-dana tam, keil poka dobuka antanap dongamupu dam ara, tuku weik tonun, lukuka deipmaka deice arye, aning deice welebuka, nun mutuku noutam wekikirye, opnamsiake. Apil ara, akunum kintinibuka dobik. Ati sik Babel mutuku nang arye, nun mutuku ara, malye kibikcak arye, alubuka dopropnamake. Wini talak ara, sikce amutuku akunum warekdongopmake. Winibikiba, din patana deice ap, dakdanin ban uk dina deice ap arye, nunda mitang nang unyaba ati, sik Babel nang taruk deice, amutuku asik dopropnamake. Ati na ni Allah, ance, ‘Winipnamne,’ tenyamlumce, nyamsulum yupu nirya ara, atalak akunum lak upmalba, eipmabe. An babye, akunum eibuka bikmalame.

²⁵ Bukni, na ni Allah, nara mitik tonun walwal upnile. Deiyok ara, ance nati, “Hanameel taleamuk tuku deknulyame. Tonda, atuku deknuminye talak ara, keil uang arepnuminye talak el lina ati, ninye ton bulupdeipminba, eipnamake,” nyapdeipnulumba, atuku akunum deksiba, ninye nirya arye, ‘Akunum dekmaleʼ tenen, eibuka bikike. Winibuka, atuku akunum dekmasa ani, Babel mutuku nang arye, amutuku tuku ara, yanuka alubuka dopropnamaka ati, nara walwal upnile na nio. Ura, na ni Allaho, anda Yahweh, aning-aning nirya talibuka, deice tam erebuka, pia mikip weik ulyama ati, an tenelalam touk, adiparyuk winilyama ati, ance, ‘Winipnulyame,’ nyapnulum touk, akunum winipse. Nabi Yeremia birye, Allah ati nyabuka morobuk.

²⁶ Yeremia birye, ayupu nyabuka, Allah ati morobukopura, Allah arye tamubuka, Yeremia dam yanuka nyabuk yupu ara, ani.

²⁷ Yeremiao, anda tenipdemince, biknulyame. Na si ara, Yahweh unune. Tonda, tukwak mutuku sirya, im sirya nirya unyak nang ara, naryuk kwepdeipsirye, sik nirya talibuka unune. Ati ara, yatato ning ikin weik uptuba, narye kanam aryuk kum winiptinye do? Kume, na dam ara, ninye winipmanto ning ton, pia kum wininulula ati, na mikip deice arye, na tenenun touk wininune.

²⁸ Ati ara, narye amutuku batakniba, Babel mutuku talibuk ninye deiyoknye, Raja Nebukadnesar ap, el yin talin nang ap, sikce amutuku ara, malye kibikirye, alabuka dopropnamake. Dipkoprop, sik anang aryuk, amutuku alabuka doprobikirye, talipnamake.

²⁹ Tonda, Babel mutuku nang arye, amutuku wariknamak nang arye, anyasik malye kibikcak arye dopropnamake. Winibikcopura, uku dongobikiba, amutuku asik nirya dipnamle. Deiyok ara, amutuku noutam domlum asik nirya ara, anyaik dobik kat ning, balye deice ara, Bahal isa si erena ati, siltong teleb ning ap, domba ato ning opnarye, uku dongolamikce, Bahal isa si erelamike. Tonda, yuk talye ning, dewa-dewa ap, berhala ning ap, isa mer ati, amutuku nang arye, aning si erena ati, anggur mek binuka dikeipnarye, si erelamika ati, narye amutuku asik dobuka unyak nang ati, pia yu unulule.

³⁰ Yu weik unulul ning ara, talye ati kum bukni, sik Israel nang ap, Yehuda tam unyak nang ap, sik anang nirya, sik mitik mapu ulamik talak arye, deiyok koubuka, tuba kam ulamik talak nirya ara, pia malye ninguk talibuka winilamik ani, wini talak babye, tuba-tuba wininyake. Adeiyok ati, narye sikti, kanye kum deiamsirye, sikti, yu weik unulule. Sik malye-malye weik winilamika deice arye, narye sikti, yu unulule. Sikce pia malye winin ninguk talibuka winilamika ati, na Allah Yahweh ara, yu weik unulula ati, anang wenepnamsinca.

³¹ Amutuku deiyok koubuka, asik dobuka ulamik talak arye dipdongobuka, anoutam talak nirya ara, amutuku unyak nang arye, malye ninguk talibuka winilamikba, na Allah ara sikti, yu ulamnuka ani, wini babye tuba unulule. Yu weik unulula ati, narye, ‘Sik anang obuka sirya daknamne,’ akunum tenipsirye, wini talak aryuk winipnuna ati, amutuku weik asik domik ning ap, anang ap ara, kum elinamne.

³² Amutuku obuka, sice buklopnamna deiyok ara, ani. Sik Yehuda mutuku tam unyak nang ap, Yerusalem mutuku unyak nang ap, tonda sik Raja kibuka talinyaka deiyok nang ap, sik amu tam pemerintah pil donyak nang ap, tonda amutuku unyak imam pil don nang ap, tonda na yupu laka nyana deiyok nang, sik nabi-nabi nang ap, sik Yehuda mutuku noutam unyak nang nirya ap, Yerusalem asik noutam unyak nang nirya arye, malye winin ning yala-yala nirya talibuka winilamik buk, yu weik unulula ati, amutuku nirya obuka, sice buklopnamnarya!

³³ Sik amutuku nang nirya ara, na Allah ati akunum bataknikce, donga karikuka, yukak dinyake. Teleb ning ara, na dam yanmatingce, na urasin tam yanuka, moropmaniting bukni, sikce nati bataknike. Narye sikti, peterepsirye, Teleb ning ara ani, malye ning ara ani. Aning wininamlume. Aning ara, pia kum wininamlume,’ nyabuka peterelamsa ani, tuba peteresunun bukni, sikce na yupu kekebikirye, moubuka kum talinyake. Na yupu pia yaninauk winininyake.

³⁴ Aninguk kum bukni, tonda, minop talak sikce na Allah ati, “Nun ni koproba Allah, el siuk erenamabe,” nyabuka, teleb weik aik ara, dolamikce, “Anyaik ara, Allah el aik pia unamle,” nyalamik. Bukni, sikce anyaik pum isa si eren ning dobuka deibikce, talye isa ati, si erelamika deice arye, na si eren aik akunum malye kibuka yanipnike. Ati, wini talak ara, anyaik pum tam ara, ninye yakirye, na si ton pia kum erepnitinge. ‘Aning ati ara, na pia lik weik,’ unulule.

³⁵ Tonda, sik amutuku nang aryuk, Yerusalem dam bukni, Ben-Hinom mutuku luak, Bahal isa si erena ati, domba ato ning opnarye arelbanak, el si mesba memepdeiamikce, arelbalamik. Tonda, amesba deice arye, yuk isa el si Molok, el si erena ati, sik mapu ap, sik kilmapu ap, obuka arelbalamik. Apia malye weik wininyak ning ara, na Allah arye sikti, “Aning wininamlume,” kum nyapdeiamse ning ara, na kanye talima pum tam arye, pia kum tenelamse. Aning kum bukni, sik kanye aryuk tenibuka, amalye ning wininyake. Aning ara, malye weik wininyak deice arye, sik Yehuda mutuku noutam unyak nang nirya ara, aning eibikirye, sik babye aninguk talibuka, pia malye weik wininyake. Allah arye, Yeremia biti nyabuk.

Allah arye, “Doyanamle talak ara, aning ton winipnamsine,” nyapdeibuk yupu

³⁶ Allah arye, ayupu akunum nyabukopura, ayupu ton dukdongobuka nyabuk. Anggun Israel nang nirya ara, pia malye-malye weik winiluluma ati ara, na Allah arye ayupu nyapsine. Nara anggun ni koproba Allah Yahweh ununa ati, na si erenululume. Ati, narye, anyasik Yerusalem mutuku ati, ayupu nyapnune. Yeremiao, ance Yerusalem mutuku weik asik ati, nyapmanilame. Ance, “Se, na ni Allah. Ance sik Babel mutuku nang taruk deice akunum deipmasilamba, nunda mal olan deice ap, din patan deice ap, tonda dakdanin ban kanye imun uk dilya deice aryuk, nun amutuku asik dobuka unyap nang nirya, dibipyeba, amutuku ara, Babel nang aryuk talipnamsiake,” nyabuka, mambul kanye bobuka, engebuka nyapmanulume. Aning ara, sik wenena ati, dipkoprob winipnamnarya! Bukni, wini talak narye nyapnukin yupu ara, moubuka kekepnunilyame.

³⁷ Narye sik amutuku unyak nang nirya, sik wenena ati, yakdonokniba, yuk mutuku nang unyak mutuku tikilbinuka, ikin weik daulamica ani, aminyan doyanamle talak ara, sik nirya, narye tamubuka, anggun mutuku uk boyanuka deipnamsine. Wini talak ara, na yu weik uniliba, lik unilya ati, narye sikti, yakuka donokamniba, yu nang arye, sik tomobuka, tapu koubuka, pera mutuku yukak bobinamake. Bukni, doyanamle talak ara, narye tamubuka boyanirye bulubuka, asukumuk deipnamne. Narye sik tamubuka, sik mutuku koproba, asukumuk boyanuka, teleb kipdeipnamne. Boyanirye, sik anang teleb kipdeipniba, olana kumce, kanye deibuka, talye dakeiam arye, pia amutuku uk unamake.

³⁸ Wini talak ara, sikda na mapu koproba unyakbuk, nara anggun ni koproba Allah unamne. Naryuk anggunti, kalekuka melisinirye, teleb kilinamsine.

³⁹ Wini talak ara, narye sikti, kanye tenen ning ap, talima ap, deiyok tonok ninguk arepniba, teleb winin ninguk talibuka wininamake. Ara, talye ati kum bukni, ‘Sikce nati, ilil upliba, pia si erenamniake. Na siuk pia erenamniake. Aning winibikca deice arye, sik winina ara, pia telebuk wininamake. Pia telebuk ukirye, sikce mapu deibikcopura, dadeipdanin banamak mapu nirya babye, teleb kipdeipniba, pia telebuk winipnin banamake.

⁴⁰ Tonda, atalak ara, anggun dam narye pia nyalina teleb yupu nyapdeipnamsine. Narye anggunti tuba tonap, pia kum bataknamsine. Anyapdeipnamne yupu ara, pia min kume kum danmanto bukni, pia teleb kilinamsine. Narye, ‘Anggunda tuba tonap bataknikcakʼ tenen, narye anggun kanye tenen ning ap, anggun talima ap, tamubuka teleb kipdeipniba, anggunda na Allah ati ilil upsiliba nati si erenamnulume. Sikda na si pia erenikirye, yuk talak ara na dam arye batakuka, pia pera sukum kum binamake.

⁴¹ Aminyan talak nirya ara, narye sikti, kanye deipnirye, teleb kipdeipnamne. Tonda, narye sikti, batakna pia kumce, ‘Amutuku noutamuk, pia teleb unamakʼ tenen, kintinip deipyeba, telebuk wininamake. Aning akunum nyapdeipsina ati, aning ara, pia kum bataknamne. Na nyasinye touk, dipkoprob pia wininamsinarya! Na kanye tenen ning ap, na talima ap deice arye, nyalin yupu arye nyapsine. Aning nirya ara, dipkoprob winipnamsine!

⁴² Na Allah Yahweh arye, ayupu nyapsine. Narye, anggun amutuku ululum nang wenena ati, anggun deice, ikin weik ning deiamsiniba, imun kanye bobuka ulamunya ani, aminyan talak ara, naryuk tamubuka, teleb kipdeipsiniba, anggun nirya ara, telebuk wininamlume. Ateleb una ati ara, na Allah arye anggun dam nyalin yupu deice arye akunum nyapdeiamsina ati, aning nirya ara, dipkoprob nong upnamlarya!

⁴³ Ura, wini talak ara, anggunce malye kanye bobuka, ‘Se, nun mutuku ara, pia oldemuk upmasile! Nun mutuku ara, Allah arye lo arebukba, sik Babel mutuku yin talin nang arye yanuka, obuka malye kipsikce, nun mutuku alubuka doprobikce, talibikba, nun mutuku ara, kata sukum atonun ubuk. Ati ninye babye, bai tam talye kam ulamle ning babye, amutuku kum unyake! Wini talak ara, anggunce ayupu nyalulum bukni, narye anggunti nyapsine. Doyanamle talak ara, amutuku nirya tuba tonap, teleb kipdeipnamsine! Wa wibuka koupnamlum ning ara, teleb aryuk libuka dekelamunce, dinamlume.”

⁴⁴ Narye amutuku akunum teleb kipdeipsinyopura, amutuku noutam unamak nang arye, amutuku tuku dekenamake. Dekikirye, sah kina ap, bikilina ati, sekeipnamak surat deice arye, sik si sekikirye, tanda tanggan kipnamake. Winibikirye, ‘Asurat pia aunamleʼ tenen, yo pia arye, asurat lin ning palipdongopnamake. Tonda, ‘Tuku akunum dekike,’ nyabuka, laka kipnamaka ati, kel bikin nang babye, atuku deknamak talak, eibuka bikikirye, ‘Akunuma,’ tenenamake. Aning wininamaka ara, Benyamin yala nang arye talinyak mutuku noutam arye winipnamake. Tonda, Yerusalem mutuku weik asik dolamika noutam arye winipnamake. Tonda, Yerusalem mutuku bukni, mitik pere sukum, mitik asik donamakak ap, tonda Yehuda mutuku noutam, yuk weik asik donamakak ap, tonda mutuku tam asik donamakak ap, Yehuda mutuku tam bukni, otam keting panalyangan tam, laut mekwen dam, el si Sepelah mutuku tam nyanyakak sukum ap, tonda, amutuku arye dipdongobuka, iknapnye tam (arah selatan) pata mutuku ulye tam ap, yuk-yuk asik donamake. Winipnamaka ara, na Allah arye sik ap, sik unamak mutuku ap, sik wininamak ning nirya ara, tuba tonap teleb kipdeipnamne deice arye, pia telebuk wininamake. Nara, Allah Yahweh arye, anyalin yupu akunum nyapdeipmasina ati, aning nirya ara, dipkoprob nong upnamlarya, nyapsine. Ayupu nirya ara, Allah Yahweh arye, nabi Yeremia biti, laka nyabukba, Yeremia birye abuku noutam sekeibuk.