Yeremia 31 - Eipomek

“Israel ninye sik mutuku koproba, tamubuka binuka unamake,” nyabuk yupu

¹ Allah el si Yahweh arye, ayupu nyabuk. “Doyanamle talak ara, Israel ninye ayala-yala nirya ara, na Allah arye, sik Weik Deiyoknye unamne. Winipniba, sikda na mapu koprop atonun ubikirye, na siuk erenamniyake,” nyabuk.

² Na Allah Yahweh arye nyapsine. Yuk pera mutuku ninye, yu ninye arye, na mapu Israel ninye kum oplomik nang ara, ninye kum upmanto mutuku, mek pia kumak, malye mutuku noutamak daulamik. Bukni, amutuku noutamak arye dipdobikba, Israel ninye arye, ‘Nunda dan mutuku bitibirye, telebuk uptibye do?’ tenen, elamikce, nati morolamnik ninye ara, na Allah arye sikti, kanye talima arepnilibuk, lyepnirye, teleb kipdeipnamne.

³ Israel ninye arye, ‘Se, nun telebak utibye’ tenen, engebuka dilamik ninye ara, morolamikba, na Allah ara, pia weik yukak ulamse bukni, sik dam lak kibuka yanamse. Sik ti nyapse. Ara, se anggun Israel ninye ati, minop talak arye anggunti, pia bico tenelamsisirye, kum bataknamsine. Ati, wini talak arye dipdongobuka, doyanamle talak nirya ara, anggunti bico tenesinirye, pia kalikuka, tuba melinamsine.

⁴ Narye, aminyan talak anggunti, melipsinyeura, teleb ubuka wininamlume. Anggunda, narye minop talak taleamsisa ak, teleb ulamlum touk, aminyan talak babye, melipsiniba, telebuk unamlume. Anggun asik nirya, tuba tonap lipsisikuka dopmunce, amutuku unamlume. Tonda, aminyan talak ara, anggun bung-bung ana, el si rebana dopmunce, kanye deibuka, mot senamlume. Anggun ap, anggun kayapu nang ap, pin-pin asa kanye deibuka, mot senamlume.

⁵ Winipmunce, anggun anggur tapu wa ara, tuba tonap, Samaria mutuku deice wa wibuka kounamlume. Awa wipmunba, duk mouplyopura, awa wena deiyok nang arye, duk dakuka, purubikirye, mek kwebuka dinamake. Yuk ninye arye kume.

⁶ “Aning nirya wininamlume,” nyapmasina ara, urdem ati kum nyapsine. Deiyok ara, dipkoprob na tenepse talak akunum uplyopura, amutuku kalikina ninye noutamak, tonoknye birye, Efraim mutuku noutamak yukupnamle. Ara, nyapnamle. “Anggun nirya yangalulume. Nun nirya tuba tamubuka, Sion mutuku binamabe. Ara, nun ni koproba Allah, el si Yahweh, el si eren aik dam bibirye, el si erenamabe,” nyabuka yukupnamle.

⁷ Aning nirya ara, urdem ati kum nyapsine. Na Allah Yahweh arye nyapsine. Anggun Israel yala ninye nirya ap, yuk mutuku ninye nirya ap ara, anggun nirya kanye deibuka mot senamlume. Ara, anggun Israel ninye ara, narye pia teleb kipdeipnamsina ati, kanye deibuka, mot senamlume. Tukwak mutuku noutamak ara, ninye yala-yala weik daunyak bukni, weik mambul yala ninye ara, na mapu Israel nang unyake. Ati, anggunda mutuku-mutuku nirya daululum ninye nirya ara, weik yupu deice arye, kanye deibuka nyanamlulume. “Nun ni Allah, anda Yahweh ulyame. Ance, minop talak arye wipdeiamlum ninye, ‘Sik Israel ninye ayala-yala nirya, ton tuba kam aunyak nang ara, lyepnamlam’ tenen, moropkiyabe.” Ati nyapsine, anggun yuk mutuku ulamlum ninye nirya ara, Israel ninye ati, kanye deipmunce, mot sebuka, sik Israel ninye ati, teleb kilinamlulume.

⁸ Na Allah Yahweh arye nyapne. Mutuku sirya utam daunyak ninye ap, mutuku sirya, im sirya, dana-dana tam daunyak Israel ninye nirya ap, tamubuka boyanirye, sik nirya bulubuka, tonok sukumuk deipnamne. Sik Israel ninye dobuka boyanganye talak ara, talye ninye ap, yok malye nang ap, asing kun nang ap, tonda mi kabul kum deipmakce kilapu bukni, mun pum bomice kilapu ap, sik nirya melibuka boyanganamne. Neika yanganamake. Winipnamak talak ara, amutuku noutamak, ninye yupa pia weik upnin banamake.

⁹ Sik bisik yanganamak talak ara, pia teleb ubuka melipniba, kanye deibuka engepnin yanamake. Pin-pin kanye bobuka, engepnin yanamak talak ara, narye sikti, melipnirye, lyu teleb bisikuk bobuka yanamne. Winipniba, sik yan dum keil kum duknamle bisikuk yanganamake. Tonda, pia teleb mek weik ubukakuk boyanamne. Winipniba, Israel ninye ara, teleb kibuka yanganamake. Ara, urdem ati kume. Nara, sik ni koprop Allah ununa anya arye, Israel yala ninye ati ara, ‘Na mapu koprop,’ tenenune. Tonda, Efraim yala ninye ati ara, narye, ‘Sikda, na minop talak deipse mi atonun, weik mambul mi ululume,’ tenesunune. Ati, na mapu du nang atonun unamake. Allah arye nyabuk. Nyabukba, Yeremia birye nyabuk.

¹⁰ Mutuku-mutuku nirya ululum ninye nirya ara, Allah el si Yahweh arye nyasilye yupu kekeplulume. Tonda, anggunce Allah nyalye yupu dopropmunce, weik laut mekwen koubuka, otam mutuku babye, laka nyalbinamlume. Sik laut mekwen kup-kup unyak ninye nirya babye kekenamake. Ayupu nyanamlulume. “Minop talak ara, anggun wenena ati, Israel ninye ayala-yala nirya, akunum wangapsinyamukba, yuk-yuk mutuku dabinuka ulamik ninye nirya, atalak ara tamubuka, sik mutuku koproba uk, boyanuka deipnamle. Winipmanto ara, domba basam weina deiyok nang arye, sik domba basam ati, teleb kibuka kaliklamak touk, Allah arye sik Israel ninye nirya ati, moubuka kalikinamsile.” Ayupu bobuka laka nyalbinamlame.

¹¹ Ara, talye ati kum nyanamlulume. “Deiyok ara, Allah el mapu Israel ninye ara, yuk pera mutuku nang, ninye pia mikip weik nang arye taleamikba, lopdanmanto kum ulamik bukni, wini talak ara, Allah Yahweh arye, akunum lyepropmale,” nyabuka, laka nyanamlulume.

¹² Allah arye Israel ninye lyeproplyopura, sik aninye Sion mutuku deice yakirye, atalak ara, kanye deibuka, pin-pin asa arye, teleb mot sepnin yanganamake. Ara, Allah arye sik un ning, teleb ning nirya areplibuk, aning deice kanye deibikirye, kanye teleb mot senamake. Allah arye sikti, arenamle ning ara, ani. Yakong atonun ning, el si ara gandum ap, anggur tapu duk ap, anggur duk teikuka, anggur din mek kwepnamake ap, tonda sapi basam ap, domba basam ap, kambing basam ap nirya arepnamle. Winipliba, sik mutuku ap, sik ap, pia teleb unamake. Winipmanto ning ara, ninye arye koulamak ning mekinak kouamikiba, bok teleb ulamle touk, sik kounamak ning nirya ara, ton pia kuoluna kum unamle. Teleb uk ulirye, weik unamle. Winibuka unamle anya arye, tuba tonap ikin kum unamake. Telebuk unamake.

¹³ Atalak ara, ikin kanye bona, pia kum diparyuk, kam kilapu nirya, kanye deibuka mot senamake. Winibikiba, wisi nang ap, kam nang ap, sik neika kanye delinamake. Yeremia birye nyabuk. Nyabukce, ayupu ton nyabuk. Allah arye nyapsile. “Na Allah arye sik Israel ninye ati, kanye teleb kipdeipnamne. Ara, minop talak ara, ikin ubukba, malye lebuka engelamik bukni, wini talak ara, narye sik melipniba, kanye deibuka telebuk unamake. Atalak ara, imun kanye bonyak ning ara, narye tamubuka teleb kipdeipniba, kanye telebuk unamake. Tonda, malye kanye bonyaka ara, narye tamubuka, pin-pin kanye kipnibuk, telebuk unamake. Ara, narye sik kanye talima kwa dipniba, sik kanye deibuka unamaka ati, nyapne.

¹⁴ Winipnirye, na si eren aik talibuka, anyaik pum tam pil dona deiyok nang, imam-imam nang ara, sik din ning ara, weik yamubuka arepneba, sik dam langdipnamle. Tonda, na mapu Israel nang ara, sik pataplye ning ara, yamubuka arepneba, dobuka dibikcopura, bopnamle. Kanye deibuka telebuk unamake. Ara, na Allah Yahweh arye nyapsine,” nyabuk.

Allah Yahweh arye, Israel nang ati, bico teneplirye, lyepnamle ati, nyabuk yupu

¹⁵ Allah el si Yahweh arye nyabuk. “Minop talak ara, ikin weik ning, sik Israel ninye deice yanamle. Winiplyopura, mutuku si, Rama mutuku ulamuk kil, el si Rael, el mapu nirya obikiba, dibikcopura, pia bico tenen, talima sukupliba, engenauk unamle. Pia engebuka, yuk nang arye, el talima kum kwa dipmanto upnamake. Ara, el mapu nirya obikiba, ‘Se, na mapu nirya ara, akunum obuka sirya dakmake. Tonok mapu babye, kam kum unamake,’ teneplirye, engenauk unamle.”

¹⁶ Na Allah Yahweh arye, nyapkine. “An engenmalam ning ara, asing maka kilipminba, cepropnamkile. An ikin kanye bopmalam ning ara, bataknulame. An mapu ara, anggun mal olan nang arye tomobuka, wenen aik deibik ning ara, batakdongobikiba, amutuku tamubuka yanganamakca, nyapkine. Na Allah Yahweh arye nyapkine anya arye, dipkoprob nong upnamlarya.

¹⁷ Dounamlam talak ara, an mapu telebuk unamake. Ara, wini talak ara, yuk pera mutuku noutamak unyak bukni, aminyan talak ara, an mapu sik mutuku uk tamubuka yanganamakca, nyapkine anya arye, engena bataklyame, nyapkine. Na Allah Yahweh arye nyapkine.” Allah arye nyabuk.

¹⁸ Nyabukce, ayupu ton dukdongobuka nyabuk. Na mapu Israel ninye, sik kanye imun upliba, moronyak ning ara kekenune. Ara, nyanyake. “Se, nun ni Allah, nun malye ulamupuba, ance nun wenena ati, ikin ning weik arelamsulumba, awenen ning nirya dololamupu. Winipmanto ara, nunda ninye arye delina kum ning, bai tam talye kam ulamak ning atonun ulamupu. Bukni, winira ance, ‘Diksukum winin ninguk winilamting’ tenen, peteresilyame. Adeice, ‘Nun malye wininyap ning batakuka, an damuk tamubuka yanamap’ tenen, kintininyabe. Ati ara, nun ni koproba Allah, anda Yahweh, ancuk nun dobuka, an dam boyasilyame,” nyabuka morobik.

¹⁹ Tonda nyanyake. “Se, nunce Allah anti, akunum balye tam kiyamkupu. Bukni, nun amalye winilamupu ning ara, ‘Yata deiyok ati, nun ni koprop Allah batakamuburye, amalye ning winilamupu do?’ tenenyabe. Ara, nun malye winilamupu ning kel biksulumce, wenepsulum ati, Allah ance wenepsulum deice arye, kel bikupu. Winibupurye, ‘Diba, nunda weik malye ulamupu nang’ tenen, an amu tam unyabe. Adeice arye, nun kam ulamupu talak, malye winilamupu ning ati, ilil upsiliba, alye dakaldanyabe.” Israel ninye arye, nyakiba kekenune. Allah arye nyabuk.

²⁰ Nyabukce, ayupu ton nyabuk. “Israel ninyeo, anggunda na tuba bico tenesunune. Anggunda, pia na kanye deilin ninye ululume. Anggun wenena ati, ‘Na dam tamubuka yanamlum do?’ tenen, ikin weik ning, anggun nong deice deilisunun bukni, ato ning babye, narye anggunti, tuba bico tenesunune. Anya arye, narye anggunti, pia bico tenesunune. Anggun malye winilulum ning ati, talye lukparabuka opsitinya bukni, anggunti tuba bico tenesununa anya arye, obuka sirya kum daknamsine.” Na Allah Yahweh arye nyapsine.

²¹ Nyabukce, ayupu ton nyabuk. “Anggun balamunye bisik nirya ara, lak lelin ning ati, yo bata cepdeipnamlume. Winipmunce, anggun minop talak yangalalum bisik ara, ‘Dan bisik arye yanamupu do?’ tenen, moubuka teninamlume. Ara, aning moubuka kel bikamunyopura, anggun Israel ninye nirya ara, na kanye deilin kil atonun ululuma anya arye, anggun minop ulamlum mutuku uk tamubuka, yanuka unamlume, nyapsine.”

²² “Israel nango, anggun yata wiribuka talak tonap, daumunce, ‘Allah el dam tamubuka binamap do, kum do?’ tenen, tuba walwal usulul do? Anggunda, na nyapsise yupu moubuka kum taliplume. Winipmanto ara, tonoknye birye deibuk kilmu, el li koprop ati, tilila yupu nyaplirye, batakuka malye mutuku balamle atouk ululume. Bukni, nara Allah Yahweh arye, tukwak mutuku noutamak ara, winiryuk ning kintinibuka kwepdeipnamne. Ara, tuba tamubuka tonap, lo ton arepnyopura, Israel ninye ayala-yala nirya arye, tuba tonap, na dam tamubuka yakirye, nati kanye deibuka, telebuk unamake. Na talibuka, na siuk erepnamniake.” Allah arye sik Israel ninye ati nyabuk.

Doyanamle talak Israel ninye ara, telebuk unamaka ati, nyabuk yupu

²³ Israel ninye, anggun ni koprop Allah Yahweh, aning-aning nirya talilulce, im deice yin talin malaikat nirya, sik weik deiyoknye kibuka ululnye birye, ayupu nyabuk. “Nara, Israel ninye ati, pia kalikuka melilamsise. Na mapu Israel ninye minop talak taleamse atonun ubuka talipnamne. Winipnyopura, Yehuda yala ninye unyak mutuku noutamak bukni, Yehuda mutuku asik dobuka, unyak ninye nirya ara, tuba tonap tamubuka nyanamake. ‘Se, Allah el si Yahweh arye, teleb kipdeipsiliba, nun winin ning nirya ara, pia telebuk winilinamsile. Yerusalem mutuku ara, malye winin ning ton kum ulule. Pia diksukum winin ninguk winilule.’ Amutuku ara, Allah arye, ‘Na tenen mutuku ani’ tenebukce, wipdeiamuk anya arye, ‘Amutuku ara, pia telebe,’ nyanamake.

²⁴ Na Allah arye aninye ap, sik mutuku ap, akunum teleb kipdeipnyopura, sik Yehuda yala ninye nirya ara, amutuku noutamak, asik dobuka, pia aunamake. Sik nirya ap, tonda wa win ninye ap, domba basam ap, kambing basam ap, sapi basam ap, wein nang nirya ap, neika amutuku noutamak unamake.

²⁵ Sik aninye noutamak, yata ninye do nirya, sikce, ‘Se, nun kum winiptibye,’ tenen, mikip kum mitang uple ninye nirya ara, narye mikip kilinamne. Tonda din patapliba, kisok biribiri alamle ninye ara, din ning arepneba, tuba tonap mikip unamake.” Allah arye nyapdeibukba, Yeremia kekebuk.

²⁶ Yeremia birye ayupu kekebukce, adiparyuk, lengdar mabuk bukni, tuba ton bukukce nyabuk. “Na mapmanu ning ara, teleb ubuka mapsa anya arye, teleb kipdeipnukba, na kanye deipse.” Yeremia birye nyabuk.

²⁷ Allah arye nyapdeibukba, Yeremia birye, sekuk. Allah arye nyabuk, “Na Allah Yahweh arye nyapne. Na tenepse talak akunum uplyopura, Israel ninye unyak mutuku ap, Yehuda ninye unyak mutuku nirya ara, narye arepneba, aninye arye weinamak ning, pia weik upnin banamle. Tonda, narye mikip arepneba, amutuku ninye arye, mapu deibikirye, dadeipdanin, balamice ani, ninye yupa pia weik, upnin banamake. Winipmanto ara, ninye arye, ‘Koun ning weik upnamle’ tenen, yala ning weik arye koulamak touk, narye arepneba, sik mapu ap, sik weilamak ning ap, weik upnin banamle.

²⁸ Tonda, minop talak narye, sik Israel ninye ayala-yala nirya ara, malye weik winilamik bukni, narye ikin weik wenen ning, sik nong deice delilamse. Ara, kwinina ap, ululona ap, malye kibuka ona ap, sirya obuka dakna ap, malye kilina ap, kanye imun ning weik arye arelamse touk, aminyan talak ara, pia teleb ubuka melinamsine. Ara, narye Israel ninye ati, moubuka dinirye, teleb ubuka melipniba, sik asik lipsisikuka donamake. Tonda, sikce wa wibuka koulamak ning kounamake. Ati, wini talak ara, narye sik melibuka taleamsiba, minop arye teleb ulamik touk, aminyan talak babye, telebuk unamake. Aning ara, na Allah Yahweh arye nyapsine anya arye, nong dipkoprob upnamle.

²⁹ Winipnamne talak ara, ayupu tonap, tuba kum nyanamake. ‘Wisi nang sik yo duk dakuka dilamikiba, adeice arye, sik mapu si umum unamle,’ nyabuka, kum nyanamake.

³⁰ Aminyan talak ara, yatanye do nirya, sik yo duk dakuka diplinye bira, el uk si umum unamle. Ara, talye ati kum nyapne. Deiyok ara, yatanye do nirya, elcuk malye winiplyopura, el amalye winipmalinye binyuk, wenebuka opneba, dipnamle.

Allah arye, ‘Nyalin yupu winiryuk ning kintinip deipnamsine,’ nyabuk yupu

³¹ Na Allah Yahweh arye nyapne. Na tenepse talak akunum uplyopura, narye sik Israel yala ninye ap, Yehuda mutuku ninye ap ati, nyalina yupu winiryuk ning, sikti, ‘Winipnamsine,’ nyapdeipnamne.

³² Bukni, narye minop talak, sik deiyok nang, Mesir mutuku ulamikba, melibuka boyangalamse talak ara, nyalina yupu nyapdeiamse atonun yupu, aminyan talak kum nyapnamsine. Nyalina yupu winiryuk ning, anggun dam nyapnamsin ning ara, el nong yuk upnamle. Minop talak ara, anggun deiyok nang ati, nara anggun akanye atonun ulamsirye, ‘Wininamlume, aning ara kum wininamlume,’ nyabuka, nyalin yupu nyalyangalamse. Bukni, atalak ulamik ninye arye, na nyalilamse yupu ara, kum kekelamnik. Sikce nati, batakamnik. Winipmanto ara, kilapu sik akanye yapu ati, deiyok kum upmalye babye, batakanyak touk, Israel ninye arye, sik akanye atonunye, na unun bukni, sikce nati bataknike.

³³ Bukni, sik malye winilamice ning ati, wenen ning akunum arepnyopura, aminyan talak, narye winiryuk nyalin yupu, sik Israel ninye dam nyapdeipnamne ning ara, atia. Minop talak narye, ‘Aning wininamlulume. Aning ara, kum wininamlume,’ nyabuka, yupu deice nyaiamse ning ara, aminyan talak ara, ayupu moubuka tenenyak, ninye ara, yuk-yuk sik talima noutamak deipniba, moubuka tenenamake. Minop talak ara, keil deice sekuka arepse bukni, aminyan talak ara, sik talima pum tam sekuka deipnamne. Winipnirye, nara sik ni koprop Allah unamne. Sikda, na mapu koprop pia aunamake.

³⁴ Atalak arye dipdongobuka doyanamle talak ara, tonoknye birye, el kwit yuknye biti, ‘Anda Allah si kel biknalame,’ nyabuka, peterelamik atonun, tuba kum wininamake. Ara, weik nang babye, mitik nang babye, na siuk akunum kel bikikirye, ‘Nun ni koproba,’ nyabuka, na damuk unamake. Ara, urdem ati kum bukni, deiyok ara, sik malye winilamice ning babye, narye pia kum kipdeipnamne. Aning nirya ara, kilipnirye, kum kipdeipnyopura, tuba tamubuka tonap, sik malye winin ning nirya kum tenepnamne. Ayupu ara, na Allah Yahweh arye, akunum nyapsine ati, dipkoprob nong upnamle,” Allah arye nyabuk.

³⁵ Nyabukce, ayupu tonap nyabuk. “Allah el si Yahweh arye, ‘Keting deiplirye, dirina upnamle, keting noutam unamak’ tenen, keting kwepdeibuk. Tonda, wala ap, kurya ap, nirya kwepdeibuka ara, ‘Kunuklye talak dirina unamle’ tenen, ati kwepdeibuk. Tonda, weik laut mekwen kum dolamle ning babye, kwepdeibukce, el mikip welena ati ara, ‘Mek kuruninikuka weleptue,’ teneplyopura, welepliba, weik lelim lelule. Nara Allah, aning-aning nirya deice tam, Weik Erenanye unune. Na Allah Yahweh, aning-aning nirya talinirye, im deice yin talin malaikat nirya, sik Weik Erena Deiyoknye unune,” Allah arye nyabuk.

³⁶ Na Allah arye tukwak mutuku ap, im deice ulul ning ap nirya, kintinibuka deipse ning nirya ara, ‘Aning pia aunamle,’ tenenune. Atouk, Israel ninye ayala-yala nirya ara, na mapu koprop, pia unamake. Aning-aning nirya kwepdeipse ning, kum kum danamle touk, Israel ninye babye, ‘Na tenena ninye,’ tenen, pia kum bataknamne.

³⁷ Ara, winipmanto ning nyapsine. Ninye arye kiklilen tapu dobuka, kiklipdetingce, ‘Im alip tam ap, im deice tam ap ara, el cang ara ani, el pala ara, ani. Tonda, tukwak mutuku im sirya, mutuku sirya, tuku amu tam ap, deiyok dam ap ara, el cang ani, el pala ani. Aning nirya winibuka kwepdeibuk,’ nyabuka, kel biktingce, laka nyaptingopura, na Allah arye, Israel ninye ayala-yala nirya ara, ‘Na mapu tuba kum unamake’ tenen, bataktinye. Bukni, na kwepdeipse ning nirya, kum kiklipdenamtinge atonun, Israel ninye malye winilamik bukni, narye sikti, kum bataktinye. Abitinye ning babye, kum winipmanto ning ati nyapsine. Na Allah Yahweh arye nyapsine ati, pia dipkoprob yupu nyapne. Allah arye nyabuk.

Aminyan talak ara, Yerusalem mutuku noutamak, weik asik lipsisikuka dopnamika ati, nyabuk yupu

³⁸ Allah el si Yahweh arye nyabuk. “Na tenepse talak akunum uplyopura, doyanamle talak noutamak ara, Yerusalem mutuku nirya tamubuka dopnamake. Ara, na si erena ati, Yerusalem weik asik nirya lipsisikuka dopnamake. Ara, weik cang domik aik, el si ara, Menara Hananel, anirye dipdongobuka dopnin banmaca ani, cang keil poka dukuldongonak, el si Gerbang Sudut bublan dam, aning nirya ara, lipsisikuka dopnamake.

³⁹ Aninguk kum bukni, ‘Fala pia weik dopnamap’ tenen, cang kiklilden tapu, bibiktalebuka deibikirye, atalak ara, mutuku si Gareb mutuku deice arye, dipdongobuka deipnin banmaca ani, otam mutuku si, Goa mutuku dam binuka deibikirye, dopnamake.

⁴⁰ Winibikirye, amutuku lyu nirya dana-dana tam nirya ara, na Allah Yahweh ati, lipsisikuka dobikirye, na si erena ati arepnamniake. Amutuku nirya ara, ‘Naʼ tenen mutuku,’ ati, pia talinamne. Ara, wini talak ara, uku dilamlye atu yamul balamakak ap, dipmakce ninye, sik nong weilbanyak sukum ap, kintinip deibikirye, anirye dipdongobuka, otam ulul yini mutuku ap, weik lyuak, el si Kidron mek lilun ap, tonda keting yangan tam dipdongobuka, cang keil poka, bublan bisik botopdeibikce, abublan si, Kuda Basam Bublan nyabik bublan dam nirya ara, lipsisikuka dobikiba, ‘Amutuku nirya ara, na ning uka,’ nyabuka talinamne. Yerusalem mutuku weik asik nirya akunum lipsisikuka dobikcopura, pia tonap kum ulupnamake. Yuk ninye arye, amutuku tuba tamubuka, tonap malya kum kipnamake. Na aryuk taliniba, pia aunamle,” Allah arye nyabuk.