Yeremia 3 - Eipomek

Israel nang arye Allah ati, moubuka kum tenelamika ati, nyabuk yupu

¹ Allah Yahweh arye Nyabuk. “Winipmanto, sal tonok ton, kil akunum domlye bukni, ‘Akil bataknun,’ teneplirye akunum batakalule. Winibuka bataklyopura, akil yuk nang doprobikceura, min domlinye birye, tamubuka kum doproptue. Aning winina ara, amutuku nirya malye uptue. Israel nang, yuk kilapu ati weik tonun moun dilalumce, ubula yolalamlum ati ara, wini talak na Allah dam tamubuka yatum do? Aning ara kum winiptume.” Allah arye nyabuk.

² Nyabuk ura, ayupu ton dukdongobuka nyabuk. An asing ara, mutuku kon tam ton erebuka dipdelyame! Dan mutuku ton, an kum binmalum talak, yuk nang domik kil ap, neika kum mamdum do? Winipmanto anda, Arab nang pata mutuku ulamikce elilamik atonun, an babye bisik lilun tam bukminyak arye, ‘yata kil ton yalyeba, neika unamnam do?’ tenen, kalikuka dilyame. Winiminya deice arye, amutuku nirya ati malye kililyame. Anyapmana ara, anggun Israel yala nang nirya, amalye winiluluma ati, akunum nyapmasine.

³ Ati ara, tuku teleb kina ati, im deice arye mek arepnulum ning nirya ara, kum donoknamle. Tonda, mok im deice arye, amutuku ati mok ton pia kum arepnamle. Anda talye yolamikce kilapu urasin atonun ulyam buk, alye kum ukulula atia.

⁴ An kanye ikin upkilye talak ara, nati, “Anda na ni koproba,” nyanilyame. Ati narye an mitik talak dodarapce dipdongobuka wini talak babye, an tonok pia tuba tenekunune.”

⁵ Ance nati nyanilyame, “Atalak nirya pia yu tenebuka kum wenepnamnilame,” nyalyame. Ayupu ara ance nyalyame. “Se, Israelo ance ayupu nyaplyame.” Nyaminye bukni, wini talak ara, pia malye un ning weik winilyame.

Israel nang ap, Yehuda yala nang ap, sik malye un ning batakuka, adiparyuk Allah dam yangana ati, nyabuk yupu

⁶ Yosia birye, amutuku nang, sik ninye deiyoknye kibuka, taleamuk talak ara, Allah Yahweh arye, na dam yanuka nyapnuk. “Israel nang ara, sik wininyak ning ara akunum eiplum do? Winipmanto ara, sal yupu, moubuka kum kekelamlye kil ulamle touk, ulirye pil dolul ning nirya ara, an akunum elilyam do? El akil ara, na batakuka biyukce, weik erebuka bukuk mutuku kon ap, yo tikamlayak arye, yo bok weik poulamya dam amu tam duknubuka bilyeba, talye yolamak kil atonun ulule.

^7-8 Na tenepse ara, ‘Apil nirya dolamlya ani, akunum bataklyopura, tamubuka na Allah dam yatue,’ tenepse. Bukni, tamubuka kum yaturye, tuba pia talye yolamak kil atonun ulule. Adeiyok ara, narye elti, dona kumce bataknirye, el akil ati, “Anda bilyame!” nyabuka yakdoknamle. Aning winipnyeba, Israel yala nang, sik kwit Yehuda yalanye, el babye, aning eipnamle bukni, ilil kum upnamle. El babye tuba, pia talye yolamak kil atonun ulule.

⁹ Tonda, pia tonok ning ara, alye un ning ton el dam kum ulule. Talye yon kil atonun ubukce, keil ap, yo ap ati, Na ni Allah,” nyabuka, el si erelule. Winilya deice arye, amutuku ara malye kililule.

¹⁰ Aning nirya akunum winiplyopura, Yehuda yalanye, na nyapdeipse yupu, moubuka kekena kumnye bira, tamubuka na dam yayuk bukni, ‘Na winilamse ning nirya ara, akunum pia batakne,’ kum tenebukce, talye atibuk “Na batakne,” nyaplobuk. Ati ayupu ara, na Allah Yahweh arye nyapne.

¹¹ Tonda, Nyabuk ura, tuba tamubuka, Allah Yahweh arye, na dam yanuka nyapdeipnuk. “Israel nang ara, nati akunum lik ubukba, balye tamubuk bukni, Israel nang ara, mitik telebe. Bukni, Yehuda yalanye bira, pia mambul kanye bobuka kum ulule,” nyapnuke.

¹² Allah Yahweh arye, ayupu ara, na dam yanuka nyapdeipnuke. “Ance Israel mutuku nang, kekenak binuka nyapnamlyame,” nyapdeipnuke. Ayupu ara, ani. Se, Israel nango, pia ikin kanye bobuka kum ululum nang ati nyapsine. Tamubuka na damuk yanamlume. Nara anggunti, pia bico tenenanye unune. Tonda, anggunti tuba yu pia kum teninamsine.

¹³ Ance moubuka, ‘Se, nara, Allah Yahweh dam malye winilamse,’ tenepnulyame. Tonda, Na ni koproba Allah arye nyapdeiamuk yupu, kum kekelamse,’ tenepmince, na damuk yanamlame. Tonda, an babye, ‘Se, na ni Allah ati, kum si erelamsirye batakuka, weik yo tikamuka amu tam balamsirye, yuk mutuku nang arye, si erelamik isa ati, “Na deiyok ning,” nyabuka, atalye ning si erelamsirye, na ni Allah ance nati, “Aning-aning wininamlyame,” nyapdeiamnulum ning ara, akunum yanyamse,’ tenepnalame. Ayupu ara, na Allah Yahweh arye, akunum nyapdeipmasina ati, aning nirya ara, dipkoprob upnamle.

Sion mutuku dam yanamak nang ati, nyabu yupu

¹⁴ Allah Yahweh arye nyabuk. Se, na mapuo, anggun nirya pia malye ululum nang, tamubuka na dam yanamlume nyapsine. Anggunda ‘Naʼ tenen nang ululume. Narye Anggunda tamubuka boyanamsine. Ara, weik asik dobuka unyak mutuku noutam arye, ninye tonok ton dopropnamne. Tonda, tonok yala nang ulamikak arye, ninye bitinye nang dopropnamne. Winipnirye tamubuka, Sion mutuku konuk yanuka bodeipnamsine.

¹⁵ Anggun anang ara, narye tenepnye ninguk wipsinyeba, sikce nati, deiyok-deiyok nang kibuka ukirye, sikce moubuka tenebikirye, lipsisikuka peterepsikceba, moubuka biknamlume.

¹⁶ ‘'Amutuku noutam ara, anggunce deipmunyeba, dadeipdanin banamlum nang weik kipnin baceura, narye, “Aning wininamlume, aning ara pia kum wininamlume,” nyapdeipsiba, sekdeiamik marikna yo, el si ara Peti Perjanjian pum ati, ton ap, kum nyapnamnulume. Sik anang arye, ton ap pia kum tenenamniake. Tonda nyapdeiamuk yupu ara, yuk ton ap pataplyeura, “Dobuka deipnuyabe,” kum nyanamake.

¹⁷ Winibikce talak ara, Yerusalem mutuku ati, “Amutuku ara Allah el unak,” nyanamake. Nyabikirye, mutuku-mutuku nirya unyak nang, bulubuka amutuku yakirye, na si yanuka erenamniake. Sik talima noutam aryuk mandipna kanye bobuka, si erenyak ning ara, batakikirye, ton ap kum wininamake. Aning winibikce talak ara, Allah el siuk erenamake.

¹⁸ Atalak ara, Yehuda yala nang ap, Israel yala nang ap, epdanuka neika tonok unamake. Tonda, outam dabu mutuku bobuka donokamik nang babye, tamubuka yakceura, neika tonok unamake. Sik anang nirya ara, narye sik apu yapu ati, areamse mutuku uk tamuyanuka deipnyeba, sikce amutuku pia talibuka, sik mutuku koproba, kibuka unamake.

Allah el mapu koproba arye, talye-talye yolalamika ati, nyabuk yupu

¹⁹ Allah Yahweh arye nyabuk. “Israelo, anggunda narye anti dobuka, na mi koproba akunum kipdeipkise. Tonda, pia teleb mutuku nirya tuku aubuk bukni, pia teleb tuku arepnamsine. Na tenepse ning ara, ance nati, “Elda na ni koproba,” nyapnamnilame. Utenepminye ura, na dam arye batakuka kum binamlame.

²⁰ Bukni, winipmanto, anda ninye domlye kil arye, el sal ati, ‘Bico’ tenen, kanye kum deililamle touk, ance na Allah ati, Na ni koproba, aulule,’ kum tenepnulume. Aning ara na Allah Yahweh arye akunum nyapne.

²¹ Kekelanamlume, Israel nang sik mapu, Weik mutuku kon kumamlyak tukwak bukmakirye, “Melipsilyame,” nyabuka, engebikirye moronamake. Wininamaka deiyok ara, sikce, malye un bisikuk eibuka banyaka deice arye, Allah Yahweh si ati, lubakinyaka deice arye engenamake.

²² Se, anggun nirya, Allah dam akunum bataklum nang ara, tuba tamubuka, el damuk yanamlume. Elce anggun teleb kipdeipsilirye, malye ning nirya ara, lyepdosilirye, kum kipdeipsilyeba, el yupu moubuka talipmunce unamlume. Winipmunyopura, anggunce nyanamlume. “Diba, winida nun akunum tamubuka, Allah Yahweh, el dam yayabe. Ati, dipkoprob elda nun ni koproba Allah,” nyanamlume.

²³ Weik mutuku kon kumamlyak welebuka buknirye, Nun ni koproba Allah usulule,” nyabuka, talye nong kum ning ati, pin-pin kanye bobuka, tuba-tuba si erelamupu. Israel nang ati, melilamuka deiyoknye bira, yuknye ton kume, Allah Yahweh el uka.

²⁴ Bahal isa, el si erelamuburye ulamapu deice arye, nun mapu nirya kum kina ap, tonda min talak nun apu yapu arye talibuka, weilamik sapi basam ap, domba basam ap yala nirya ara, akunum kum kipdopsuka deice arye, alye dakalalamak touk akunum upsuke.

²⁵ Ati ara, adeice arye, nun babye, alye dakdanamabe. Tonda, yuk nang arye, nunti, “Wininyak nang,” nyanamsiake. Ara, nun ap, nun deipdanin banyak nang arye, nun ni koproba Allah, el dam pia malye unyabe. Tonda Allah arye nyapdeiamuk yupu ati, nunce diba kum tenebuburye, moubuka kum talebupu.