Yeremia 29 - Eipomek

Yeremia birye, Israel yala nang Babel mutuku tuba ulamik nang ati, surat sekuka dopdeibuk yupu

¹ Na Yeremia birye, surat sekuka, Babel mutuku delilbinamikba, tuba ulamik nang ati, asurat sekdeipse. Babel mutuku tuba ulamik nang ara, sik imam nang ap, nabi nang ap, tonda minop talak Yehuda mutuku ulamik nang ap, sik anang nirya, talibuka ulamik wisi nang ati, surat sekdeipse. Anang nirya ara, Babel mutuku deiyoknye, Raja Nebukadnesar birye, Yerusalem mutuku arye bobinamukba, Babel mutuku tuba ulamik.

² Na asurat sekse talak ara, Yudea mutuku taleamuk deiyoknye, Raja Yekhoya ap, el kil ap, tonda Raja melibuka pil dona deiyok nang ap, Yehuda mutuku nang ati, tonda Yerusalem mutuku ati, yuk-yuk pil talibuka dolamik deiyok nang ap, tonda urasin teleb ning memena pia weik kel bikamik nang ap, sik nirya ara, Yerusalem mutuku batakuka, Babel mutuku bobinamikba, daulamik talak arye, asurat sekse.

³ Narye asurat seksiba, Yehuda yala nang, sik deiyoknye, Raja Zedekia birye, Raja Babel dam bobana ati, Sapan el mi Elasa ap, tonda Hilkia el mi Gemarya ap, sik dam bobinuka deibukba, abitinye nang arye, Babel mutuku bobirikce, Raja Nebukadnesar biti arepdik. Asurat ara, nyabuka sekse.

⁴ Israel nang, sik ni koproba Allah Yahweh, na im deice yin talin malaikat nirya, anggun deiyoknye unune. Anggun Israel nang nirya arye, nati, ‘Nun ni ani,’ nyabuka, na siuk erenamnulume. Anggun malye winilulum ning ara, narye anggun nirya wenepsinirye, batakuka donoksiseba, Babel mutuku nang arye, anggun nirya dobuka, Yerusalem mutuku ulamlumak arye batakuka, Babel mutuku tamubuka bobiseba, tuba ululume. Anggun ti ayupu nyapsine.

⁵ Wini talak ara, anggun aunmalum mutuku noutamuk, aik dopnululume. Tonda, anggun dina ati, wa moubuka wipmunce, yala kouplulume. Kouamunya, aminyan talak pabukaplirye, nong akunum uplyopura, aning nirya libuka dinamlume.

⁶ Aninguk kum bukni, tonda anggun kilapu ton moubuka dopmunce, mapu ap, kilmapu ap, weik tonun ton, deipmunyeba, weik upnin banamlume. Aning atonun, anggunce delinamlum mapu babye, anggunce delinamlum kilmapu babye, dopdanin bakirye, mapu weik tonun ton deipdanin banamnyake. Winipnamluma deice arye, anggun Babel mutuku unamlum noutam ara, ninye yupa pia weik tonun upnin banamlume. ‘Anggunce mapu ton delina kum arye, anggun yala nang ara, mitik kipsilyakʼ tenen, nyapne.

⁷ Aning kum bukni, narye anggun bobinuka donoksiseba, binuka unamlum mutuku noutam, weik asik dopmunce, unamlum mutuku nirya ara, ‘Aunamap mutuku ara, teleb unamleʼ tenen, moubuka teleb piluk donamluma deice arye, amutuku-amutuku nirya telebuk kinamle! Tonda, asukumuk daumunyak arye, anggunce na Allah ati, ‘Nun aunmab mutuku teleb uptueʼ tenen, moropnumunye ning ara, narye anggun Babel mutuku noutam bukni, daunamlumak ara, teleb kipdeipnamsine. Anggun unamlumak teleb kipdeipsiniba, anggun babye, dipkoprob uk teleb kibuka unamlume.

⁸ Israel nango, nara Allah Yahweh unirye, im deice yin talin malaikat nirya, sik deiyoknye unune. Anggun Israel nang arye, anggun ni Allah Yahweh ti, si erenululuma ati, dipkoprob ayupu nyapdeipmasine. Anggun unamlum kan-kan arye, ‘Nunda nabi nang unyabe,’ nyabuka ‘Dotalak ara, winipnamle, winipnamle,’ nyabuka, laka nyanamsiak nang ara, sik nyanamsiak yupu ara, pia kum kekenamlume. Tonda, isa mikip deice arye, asing keten nang arye, Aning-aning winipnamla ara, winipnamsile,’ nyabuka, anggun dam laka nyanamsiak nang ap, sik lengdar mabikirye, nukunamak yupu babye, pia kum kekenamlume. Deiyok ara, ayupu nirya, tilila yupu arye nyapnamsiaka ati, nyapsine.

⁹ Anang arye nyanamak yupu ara, sikce ‘Dipkoprob nyanmake, tenepnamakʼ tenen, talye minin yupu deice arye, ‘Kume, Allah el si deice arye nyapsiabe,’ nyanamsiake. Bukni, na Allah arye sik anang ati, “Winibuka ayupu bobinuka nyalbinamlume,” nyapniba, kum yanuka nyanamsiake. Na Allah Yahweh arye, anang kum dopdeipsise. Sikda tilila yupu dem yanuka nyanyake.

¹⁰ Aning deiyok ara, ani. Ara, na Allah arye anggunti, nyalin yupu arye nyapsine. “Babel mutuku dabinuka unamluma ara, keting tamun tujuhpuluh (70) tahun mapnamlume,” nyabuka nyalin yupu arye nyapdeipsise touk, winipnamlume. Bukni, aketing tamun, tujuhpuluh tahun akunum uplyopura, narye anggun mutuku koproba, tamubuka boyanamsine. Ara, narye ‘Anggunda winibuka talak akunum mapmunyopura, Babel mutuku arye tamubuka, anggun mutuku boyanamsine,’ nyabuka, nyalin yupu deice arye nyapsise touk, dipkoprob winipnamsine!

¹¹ Ayupu ara, talye ati kum nyapsine. Deiyok ara, na Allah Yahweh arye, anggun teleb kilina ati, ‘Aning-aning winipnamne,’ tenepse ning ara, pia kum lubakiptinye. Tonda, narye anggunti, tenyamsise ning ara, ‘Winibuka-winibuka pia teleb kipdeipsinyopura, pia telebuk unamlume,’ tenyamsise. Narye, ‘Anang ara, malye kipdeipnirye, bataktiniba, pia ikinuk unamake,’ kum tenepsise. Narye anggunti tenyamsise ning ara, ‘E, ‘Naʼ tenen nang ara, pia teleb kipdeipniba, pia moubuka telebuk unamake,’ tenepsisa ati, anggun Israel nang arye, aninguk tenepmunyopura, anggunce, ‘E, diba, doupnamle talak ati, Allah arye teleb ninguk arenamsileʼ teneplumce, na deiceuk, anggun kanye talima deipnuluma deice arye, teniltona kumce, kanye deibuka, telebuk unamlume.

¹² Anggun kanye talima nirya, na deiceuk deipnumunce, nati diba tenepnumunyopura, anggunce nati, ‘Nun ni Allah, melipsilyame!’ nyabuka, moronamnulume. Nati, moropnumunyopura, narye dipkoprob, anggunce moronamnulum ning kekepsinirye, melinamsine.

¹³ Ara, anggunce nati, diba tenebuka, anggun kanye talima nirya, na deiceuk deibuka moropnumunyopura, anggun moropmunye ning ati melinamsine. Anggunce, nati, Se, nun ni koproba Allah, dan sukum ulul do? Elce nyapnamsil yupu ara, moubuka kekebibirye, biktibyeʼ tenen, pia pataplyeba, epnumunyopura, dipkoprob neika unamabe. Kanye talima telintona kumce, dipkoprob epnumunyopura, eipnamnulume. Na Allah Yahweh arye nyapsine.

¹⁴ Dipkoprob nyapsine. Dipkoprob epnumunyopura, narye anggunti, lo arepsinyeba, na unye ning eibuka biknamlume. Tonda, wini talak ara, anggun ikin weik ululum bukni, aminyan talak ara, narye anggun tamubuka pia teleb kipdeipnamsine. Tonda, wini talak ara, anggun malye winilamlum ning wenena ati, akunum bataksisirye, donoksiseba, yuk-yuk mutuku, dana-dana tam ulamikce nang yuk-yuk yala nang kan-kan, dabinuka winilamunya babye, aminyan talak, narye anggun boyanuka, anggun mutuku koproba, tonap tamubuka boyanuka deipnamsine. Ayupu ara, na Allah Yahweh arye akunum nyapmasina ati, aning ara dipkoprob kunupnamle!

¹⁵ Bukni, wini talak ara, anggun Babel mutuku noutam unmalum nang kan-kan arye, ton nang ara nyanyake. “Kume, nun ni Allah Yahweh arye, Babel mutuku unyak ninye kan-kan arye, doupnamle talak yanamsil ning laka nyana ati, nabi-nabi nang ton, akunum wibuka deipsuke. Sik anang arye nyanamsiak yupu dem, kekenamabe,” nyanyake. Sikda, tilila yupu dem nyanyake.

¹⁶ Ati ara, na Allah Yahweh arye, wini talak Yerusalem mutuku ninye deiyok kibuka, amutuku tuba unyak nang talipmal ninye deiyoknye biti, ayupu nyapsine. ARaja bira, anggun apu koproba, Raja Daud birye, amutuku taleamuk talak arye, weik bun ning, el si tahkta bulamak deice, wini talak bululnye biti, Allah arye nyapdeipliba, anggun dam nyapnusin yupu ara, anggunce kekeplulume. Tonda, Yerusalem mutuku noutam ninye weik ululum nang ati, ayupu nyapnusine. Ara anggun ap, anggun yala nang ap, neika Babel mutuku kum donoksisa ati, amutuku tuba ululum nang ati, nyapsine.

¹⁷ Na Allah Yahweh arye, im deice unyak yin talin malaikat nirya sik deiyoknye unirye, anggunti ayupu nyapnusine. Dipkoprob amutuku tuba ululum nang nirya ati, ninye mal olan ning ap, din patan ning ap, tonda uk dina deiyok ning weik arepnyeba, uk yala dakdongopdanin ban ning ap, anggun Yehuda mutuku ululum nang deice deipnamsine. Narye akanye imun ning nirya dobuka, anggun nong deice deipyopura, anggun ikin weik asa unamluma ati winipmanto yupu ton nyapnusine. Ara, ninye arye kwarang duk dakuka, ‘Dipnuyapʼ tenen, dakikirye, deipmake bukni, lyubuka tong pia weik nyaliba, dipmanto kum upliba, anang arye ayo duk batakuka donoklamak touk, na Allah arye anggunti atonun winipnamsine.”

¹⁸ Anggun amutuku ululum nang banamlumak nirya ara, na Allah arye eibuka biknirye, mal olan ning ap, din patan ning ap, tonda uk dilirye dakdongopdanin balamak nakina deiyok ning ap, arepnamsine. Narye anggun amutuku ululum nang deice, kanye imun weik ning arepniba, yuk-yuk mutuku nang nirya eibikirye, ilil upnamle. Tonda, anggun wenena ati malye kipdeipsiniba, yuk mutuku ninye, im sirya, mutuku sirya nirya unyak nang nirya arye, “Se, anango, Yerusalem mutuku ara, malyeuk ulamikba, Allah arye malye nyabuka supbuk mutuku ani,” nyabuka, malye nyanamsiake. Tonda, eipsikirye, ‘Se, yu nang arye, anang obuka, sice buklopmaka ara, ilil upsile,’ tenebikirye, duk-duk nyabikirye, kum-kum dakanamake. Tonda, anggun malye-malye winilamlumba, narye anggun namin kipsisirye, yuk-yuk pera mutuku inibuka bobisisak arye dopkwetepsisiba, yuk mutuku ninye yuk yala nirya ap, neika unamlumak nirya, anang arye anggunti, akutubuka nalisikceba, anggun malye kipdeipnamsin nang nirya ara, alye weik dakdanamlume.

¹⁹ Narye tuba-tuba, anggun anang ati, ikin weik un ning anggun deice delinamsina deiyok ara nyapnusine. Ara, narye, ‘Nyapnamlume,’ nyabuka, nabi-nabi nang dam nyapdeiamsiba, anang arye, anggun dam yanuka laka nyalamsik yupu ara, anggunce pia kum kekelamluma ati, dengna ara, ikin ning anggun deice yalyeba dolonmalume. Na Allah Yahweh arye, ayupu nyapmasina ati, aning ara dipkoprob nong upnamlarya! Allah arye nyabuk.

²⁰ Nyabukopura, ayupu ton dukdongobuka nyabuk. Na Allah arye, Yerusalem mutuku noutam ulamlumba, boyanuka Babel mutuku akunum donokamsiseba, daulamlum nang nirya ara, na Allah arye nyapnusin yupu kekepnamlume.

²¹ Na Allah Yahweh arye, im deice unyak yin talin malaikat nirya sik deiyoknye unirye, anggunti, ayupu nyapnusine. Tonda, na Allah ununa ati, anggun Israel yala nang nirya ara, na siuk erenululume. Narye, ninye si Kolaya, elce deiamuknye, Ahab ap, tonda, Mahasea elce deiamuknye Zedekia ap, sikce tilila yupu nyasinyake. Abitinye nang arye, “Kume, nun ni Allah si deice arye nyapsiyabe. Allah arye, doupnamle talak yanamle ning ara, ani-ani,” nyapdikirye, tilila yupu uk nyasinyake. Sik bitinye ara, pia malye ururaka ati, narye sik anang bobinuka, Babel mutuku talibuknye, Raja Nebukadnesar, el taruk deice deipyopura, anggun amutuku nirya dinmamunye buk, sik abitinye nang opliba, eipnamlume.

²² Tonda, aminyan talak ara, Yudea mutuku noutam arye bobinuka, Babel mutuku bobinamikba, daulamik nang nirya ara, aning kekebuka bikikirye, nyanamake. Yuk nang ati, ‘Supnamabe,’ tenebikirye, anang ati nyanamake. “Kume, anggunda malye winiluluma ati, nun ni koproba Allah Yahweh arye, Zedekia ap, Ahab ap, sik wenena ati, kanye imun weik ning arebuk touk, anggunti aning ara, ‘Allah arye arepnamsilʼ tenen, Allah ati moronamabe,” nyabuka, sunamake. Ura, minop talak ara, Allah arye lo arebukba, Babel mutuku taleamuka deiyoknye, Raja Nebukadnesar birye, abitinye nang tomobukce, kam kipman, uku dongobukba, uku arye anang dibuk. Ati, Israel nang bukni, Babel mutuku tuba daunyak nang arye, yuk nang sik wenena ati, ayupu nyanamake.

²³ Na Allah Yahweh arye, ninye tukwak mutuku unyak nang arye, wininyak ning moubuka elinuna ati, narye sik wenena ati, na elinun ning nirya laka nyapnirye, yupu bokeipnamsine. Zedekia ap, Ahab ap arye, pia malye ning winilamdika ati, sik bitinye ara, sik dengna ati, weik tonun wenepnamne. Sik bitinye arye, sik kayapu nang arye, akunum domik kilapu ara, alubuka yolamdik. Tonda, narye sikti, pia kum nyapse bukni, sikce, “Allah si deice arye nyapsinamne. Allah arye yanuka nyapdeipsukba, nun bitinye arye, sik Israel nang ati laka nyapnume,” nyabuka, tilila yupu dem nyalamdik. Ati, abitinye nang wenebuka opnamne,” Allah arye nyabuk.

Allah arye, Yeremia dam yanuka, ninye si Semaya biti, nyabuk yupu

²⁴ Allah arye, na Yeremia biti, yanuka, nyapnuke. Nahelam mutukunye, el si Semaya biti, ance ayupu ara, el dam adiparyuk, binuka nyapnulyame.

²⁵ “Nara Allah Yahweh, im deice unyak yin talin malaikat nirya, sik deiyoknye unune. Sik Israel yala nang arye, nati, ‘Nun ni koproba,’ nyabuka, na siuk ereninyake. Narye an Semaya biti nyapkine. Ance malye winiplum ning ara, ani. An kanye aryuk, an si deice arye, sik Yerusalem mutuku ulamik nang ap, tonda Maaseya elce deiamuknye Zefanya ap, tonda Allah si eren aik pum tam, pil dona deiyok nang, amutuku noutam ulamik imam-imam nang ap ati, surat sekuka dopkweteplume. Asurat noutam ara, ayupu nyapdeiplume. Ayupu ara ani.

²⁶ “Anda Zefanya bira, imam Yoyada, el pil punubuka dona ati, Allah Yahweh arye, akunum wipdeipmakile. Ati, wini talak ara, ance imam Yodaya, el pil dolamuk ning ara punubuka donamlame. Apil donamlam talak ara, anda Allah el si eren aik kaliknanye unalame. Winipminyopura, yatanye birye do nirya, sikce, ‘Nara nabi ununa,’ nyabikirye bukni, sikda motona talin nang nyalamak touk nyace nang ara, ‘Bikbik abuka bicakʼ tenen, ance kat besi tapu, el si rantai arye, anye el yan ap, taruk ap, ngang dam ap, atapu arye, kirikdongobuka, koulongonamlyame.

²⁷ Allah arye, ‘Winipnamleʼ tenen, wipdeipkuk bukni, yata deiyok ati, Semaya ance Anatot mutukunye, nabi Yeremia biti ara, “Ance, ‘Allah arye nyaniliba, el yupu laka nyana ati, narye nabi yupu nyanune,’ nyanilyam bukni, anda aning bataknulyame. Winina ara, meme,” nyabuka, el Yeremia biti wenepmatum bukni, ance aning min kum winiplume. Ati, aning ara yata ati do?

²⁸ Aning ara, talye ati kum nyapkine. Deiyok ara, Yeremia birye, nun Yehuda yala nang bukni, Babel mutuku noutam tuba unyap nang ati, surat sekuka dopkwetepsuke. Asekuk surat noutam ara, ayupu nyabuka sekuke. “Anggun Babel mutuku unamluma ara, keting tamun yupa pia weik mapnamluma ati, amutuku noutamuk, anggun unamlum aik ara, dopnamlume. Tonda, anggun din dipmunce, unamluma ati, wa wipmunce, din yala kounyak ning kounamlume. Wa wiamica lin talak ara, awa wiamica linamlum ning boyanuka dinamlume,” nyabuka, surat sekeipsuke. Anye Semaya birye, asurat sekuka, imam Zefanya biti arebuk.

²⁹ Bukni, asurat ara, imam Zefanya birye dobukabukce, nabi Yeremia kekenak yinibuk.

³⁰ Winibukopura, Allah Yahweh arye, Yeremia dam yanuka, nyapdeibuk yupu ara, ani.

³¹ Ayupu ara, narye sik wenena ati, Babel mutuku donoksiseba, tuba daunyak nang, sik kekena ati, surat ton sekuka dopreipnune. Anang ati nyapnulyame. Allah Yahweh arye Semaya biti ara, ‘Winipnamle,’ nyabuka, nyapdeipnuk yupu ara, anggun dam laka nyapnusine. Ayupu ara ani. “Na Allah Yahweh arye, Nehelam mutukunye, el si Semaya biti, kum nyapdeipmase yupu bukni, el kanye aryuk, tilila yupu deice arye, ‘Allah arye nyapmasile,’ nyabuka, anggunti, tilila yupu nyapdeipsuke. Winibuka ati, anggunce ayupu kekelamlumce, adiparyuk diba teneplum bukni, narye ayupu kum nyapdeipse. Anggunda tilila yupu ap, minin yupu ap, akunum kekeplume.

³² Ati ara, na Allah arye, Nehelam mutukunye Semaya biti, dipkoprob wenepnamane. Ara, Semaya ap, elce deiamukba, dadeipdanin yangalamik nang, el mapu koproba nirya babye, wenepnamne. Winipnyopura, na Allah arye, na mapu koproba, anggun Israel nang ululum ati, aminyan talak tonap, teleb kipdeipnamsin ning ara, Semanya ap, el mapu silip nirya ara, sikce ton kum eipnamake. Sik ap, el mapu silip nirya ap ara, dipnamaka atia. Ati ara, na Allah arye na mapu koproba, anggun Israel yala nang ati, tonap, teleb kipdeipnamsin ning nirya ara, sikce kum eipnamake. Deiyok ara, ani. Ara narye kum nyapsise yupu bukni, tilila yupu ap, minin yupu ap, Semanya birye nyalamuka deice arye, anggun kekelamlumce, anggun babye, na yupu yanipmanto kiplume. Ati, Semanya birye, na yupu yanipnukce, anggunda, malye bisik dobolbana ati, bobinmanto upsuka ati, el dengna ati, el ap, el mapu silip nirya ap, dipnamake, nyapne. Na Allah Yahweh arye, ayupu nyapmasin ning ara, dipkoprob nong kunupnamle! Allah arye nyabuk.