Yeremia 28 - Eipomek

Yeremia ap, nabi Hananya ap ati, nyabuk yupu

¹ Aketing tamun noutamuk, Zedekia bira, ninye deiyoknye Raja kibukce, Yudea tam talibuka unmok talak, wala pamubarye deice, keting tamun dumbarye kibuk talak ara, ninye si Asur birye deiamuknye, el si Nabi Hananya ulamuk. Gibeon mutuku noutamak ara, nabi Hananya pil talibuka dolamuknye birye, na Yeremia dam yanuka, Allah el si eren aik dam arye, laka nyapnuke. Ara, sik imam-imam nang ap, amutuku noutam ulamik nang ap, sik kekenmek noutam arye, laka nyapnukba, sik nirya arye kekebik buk, el nyapnuk yupu ara, ani.

² Ara, Allah Yahweh Pia Mikip Weiknye ulirye, im deice yin talin malaikat nirya, sik deiyoknye ulule. Israel yala nang nirya, melibuka kalikilulba, sikce el siuk erenyake. Israel yala nang, sik ni Allah, elce nyabuk yupu ara, ani. “Babel mutuku ninye deiyok kibuka taleamuknye, el mikip ara, akunum kum kipdeipmane. Ninye arye, ‘Sapi basam ara, nun wa tuku palinamsiakʼ tenen, ikin yo kintinibuka, sapi basam un dam delilamak touk, Babel mutuku ninye deiyoknye birye, sik Israel nang ati, kanye imun ikin pil aruklamsuk bukni, aning ara, akunum kum kipdeipmasine.

³ Keting tamun bitinye ton, akunum uplyopura, atalak aryuk, nara Allah Yahweh, na si eren aik noutam deiamik pil don ning, Babel mutuku ninye deiyoknye, Raja Nebukadnesar birye, ubula bobinamuk ning nirya ara, tamubuka boyanirye, anyaik pum tamubuka deipnamne!

⁴ Winipnamne talak ara, na Allah arye, Yehuda mutuku, ninye deiyok kibuka taleamuknye, Raja Yoyakim birye, deiamuknye, el si Raja Yoyakhin, amutuku tamubuka boyanamne. Tonda, Yehuda mutuku nang buk, Babel mutuku nang arye bobuka, sik para mutuku koproba bobinamik nang ap, lyepdopnirye, tamubuka amutuku boyanamne. Dipkoprop na Allah arye, Babel mutuku taleamuk ninye deiyoknye, Raja Babel ap, el mutuku unyak nang nirya ap ara, sik mikip dipkoprob kum kipdeipnamne. Na Allah Yahweh arye, dipkoprob nyapsine.” Allah arye nyabuk.

⁵ Yeremia birye, ayupu akunum laka nyabukopura, yupu ton dukdongobuka nyabuk. Ara, el Yeremia birye, nabi Hananya biti, yupu nyabukba, sik imam-imam nang ap, amutuku ulamik nang nirya ap, Allah el si eren aik dam bulubuka tikmek nang, sik dam arye, ayupu nyabukak, kekenmek. Nabi Yeremia birye nyabuk yupu ara, ani.

⁶ “Anda nabi Hananya birye, nyapmasilam yupu ara, ‘Diba, aning nirya ara, dipkoprob winipnamlaryaʼ tenen, narye, ‘Akunuma awinipnamlaryaʼ tenen, ‘Aminʼ nyapsine! Tonda, anda Hananya birye, ‘Aminyan talak aning-aning ton winipnamle,’ nyapmasilam ning ara, Allah Yahweh arye, aning winiplyeba, lake kiplyopura, ‘Aning nirya eibuka biknamabʼ tenen, moronamnarya. Ara, Allah Yahweh arye, dipkoprob Babel mutuku yin talin nang arye, Allah el si eren aik pum tam deiamik mambul pil don ning ap, tonda, Israel nang ap, tapu koubuka, Babel mutuku binuka deiamikba, ikin kanye bobuka ulamik ninye ap, lyepdoplirye, tamubuka amutuku uk boyanamle. ‘Winipnamleʼ tenen, Allah ati pia moronamne!

⁷ Bukni, nabi Hananya an ap, amutuku noutam unyak nang nirya ap ara, na Yeremia birye nyapnusin yupu ara, moubuka kekeplulume.

⁸ Min talak ara, an ap, na ap min kum deiamsik talak ara, yuk nabi-nabi nang ton nyalamik. Ara, “Nun wininunyap talak kum bukni, aminyan dotalak ara, weik kanye imun mal olan ning ton, nun dam yanamsilarya! Aning atonun, aminyan talak, ikin ning yanuka upnamsil ning ara, ani,” nyabuka nyalamik. “Ara mal olana ap, kanye imun din patana ap, ninye dipna ati kanye imun uk yala weik ning ap ara, nun tam ap, yuk-yuk daunyak nang weik, sik unyakak ap, ninye deiyok kibuka, taleamik weik mutuku nirya ap, kanye imun ikin ning dopropnamabe,” nyalamik.

⁹ Bukni, anyalamik touk, ikin ning weik arelamukba, tuba aulul bukni, dipkoprob nyapsine. Yatanye do, nabi tonok arye, ‘Aminyan winipnamsil ning ati, dotalak ara, ikin ning nirya kum kibuka, tonap pia telebuk unamabe. ‘Olana kum aryuk, kanye deibuka, telebuk unamabe,’ nyaplyeba, aminyan winipnamsil ning, laka nyaplinye bira, weik mambule. Anye birye, ayupu nyaplye touk, el nyaplye ning akunum nong laka uplyopura, ninye nirya arye, anabi ati ara, ‘Se, dipkoprob Allah Yahweh arye, anye bira wipdeibukba, weik mambul tenelul ning nyapsilye ning ara, akunumaʼ tenen, bikinamabe. Nabi Yeremia birye nyabuk.

¹⁰ Nyabukura, atalak aryuk, nabi Hananya birye, Yeremia el un dam, ikin yo koubuka deiamuk ning ara, dobukce aikin ning ara, cebuka batakukce, donokuk. Ara, ninye arye, ‘Sapi basam arye, aikin ning el un dam deibibyeba, aning libuka balirye, nun wa tuku palipnamsilʼ tenen, kintininyak ning atonun, cebuka batakukce, donokuk.

¹¹ Hananya birye, aning akunum winibukura, anang sik, wekmeka dam arye ayupu nyabuk. “Allah Yahweh arye nyapmala ara, aning ikin yo dobuka cebukce, donokmana atonun, aminyan talak ara, Babel mutuku taleamuk Raja Nebukadnesar birye, ikin ning, anggun nong deice deipsuk ning nirya ara, na Allah Yahweh arye, dobuka kum kipdeipnamne. Narye sik ap, yuk-yuk mutuku nang ap, lyebuka loplopnamsine. Tonda aning ara, sik arye kum winipnamne. Ara, keting tamun bitinye ning ton, min kum kipmalye talak arye, anggunti lyebuka loplopnamsine. Babel mutuku taleamuka deiyoknye, el mikip kum kipdeipnamnarya!” Allah arye nyabuk yupu ara, akunum laka nyapmasine, nabi Yeremia birye, laka nyapdeiamuk. Aning akunum nyabukopura, el nabi Yeremia bira, tamubuka biyuk.

¹² Nabi Hananya bira, nabi Yeremia birye, el un dam deibuk kat yo, akunum cebuka donokuk ning ara, aning nirya akunum winibukba, sik nirya daunmeka ani, aminyan talak ara, Allah Yahweh arye, nabi Yeremia dam yanuka, “Aning winipnulyame,” nyabuk.

¹³ “Ara ani. Yeremia anda, Hananya dam bimince, ayupu nyapnulyame. “Allah Yahweh arye, nyapmakila ara, ani. Ara, ‘Ance yo koundam koupdongobuk ning ara, akunum ceploplum bukni, Allah arye dipkoprob kat besi ning arye, punubuka deipnamle.

¹⁴ Ara, talye ati kum nyapkine. Deiyok ara, Allah Yahweh mikip weik ulirye, im deice yin talin malaikat, sik deiyoknye ulule. Anggun Israel nang nirya arye, el siuk erenamlume. Na Allah arye nyapmasina ara, akunuma. ‘Israel yala nang nirya, ski dam ara, ikin ning bukni, kat weik ning besi arye akunum kintinibuka, sik deice deipmasine. Winipnamna deiyok ara, ani. Winipnyeba, sik Israel nang ap, yuk-yuk mutuku unyak nang ap ara, Babel mutuku ninye deiyok kibuka taleamuknye, Raja Nebukadnesar, el amu tamuk ulamukce, el ikin pil dobuka, talya uk donamlume. Aninguk kum bukni, tonda, tukwak kam ulye ning, bai tam talye daulamle ning nirya babye, aning nirya dobuka, Raja Nebukadnesar el damuk, akunum arepmance deipmane. Elcuk aning nirya talinamle,’ nyabuka, ‘Na Allah arye, akunum nyapsine,’ nyabuk. Nabi Yeremia birye, Allah nyadeibuk yupu lak nyabuk.

¹⁵ Ayupu nirya lak nyabukura, nabi Yeremia birye, el nabi Hananya dam, nyabuk. Nyabukopura, nabi Yeremia birye, nabi Hananya biti, ayupu ton dukdongobuka nyabuk. “Se, Hananya anda kekepnulyame! Allah Yahweh arye, an kum wipdeipkukce, nun Israel nang dam ton kum dopdeipkuke. Ati, an kanye deice aryuk, nyapsiminye yupu nirya ara, tilila yupu uk, nyasilyame. Nyapmanuma ati, sik amutuku Israel nang arye, atilila yupu ati, akunum dip tenekinyake.

¹⁶ Aning ati ara, Allah Yahweh elce anti, nyapmakila ara, ani. “Hananya an nong ara, tukwak mutuku noutam arye, na Allah arye kum kipdeipnamkile. Aketing tamun noutam aryuk, anda dipkoprob dipnamalame. Aning winipnamkila deiyok ara, ani. Ara, ance amutuku nang ati, ‘Allah Yahweh el yupu yanibuka malye kiplume. Narye nyapsin yupu uk, kekebuka unamlume,’ nyalamlumba, sikce na Allah ati, yanilamnika ati, ayupu nyapkine.” Allah arye, an Hananya biti nyapmakile.” Nabi Yeremia birye nyabuk.

¹⁷ Ati Yeremia birye, lak nyabuk touk, aketing tamun noutamuk bukni, tekbarye wala noutam ara, Hananya dibuk.