Yeremia 27 - Eipomek

Yeremia ikin yo moubuka koupdongobukce, el un dam deibuka, bobiyuk ati, nyabuk yupu

¹ Raja Yosia, Yehuda tam taleamuknye birye, deiamuknye, el si Zedekia, el li pununa ati, ‘Ninye deiyoknye Raja unamsilʼ tenen, wipdeibikba, Yehuda mutuku kum talibuka unmok talak ara, Allah Yahweh arye, na nabi Yeremia dam yanuka, ayupu nyapdeipnuk. Allah Yahweh arye nyapdeipnuk yupu ara ani.

² Allah Yahweh arye, nati nyapnuke. “Tukwak kam ulye ning obuka, el bola kokmince, tapu kintinibuka deipnulyame. Tonda an un dam delina ati, ikin yo dobuka koulongon ning ton, moubuka kintinipmince, an un dam arye deipnulyame. Aning ara, an Yeremia un dam koulongona ati, nyapnuke.

³ Tonda, Allah arye ayupu ton nyabuk. “Ninye deiyok nang dam binuka, laka nyapnulyame. Ara, Edom mutuku talibuka ulye Raja ap, Moab mutuku talibuka ulye Raja ap, Amon mutuku talibuka ulye Raja ap, Tirus mutuku talibuka ulye Raja ap, Sidon mutuku talibuka ulye Raja ap ati, sik anang deiyok-deiyok nang ati, yupu dopdeipnulyame. Ara, sik aninye deiyok nang arye, sik mapu yuk-yuk dobuka deibikba, Yerusalem mutuku, ninye deiyoknye, Raja Zedekia talibuka ulyak, yupu nyalyayik nang damuk nyapmimba, anang arye, ayupu dobuka laka nyalbinamake,” nyabuka, Allah arye nyapdeipmasile.

⁴ Nyabukopura, ayupu ton nyabuk. “Anda Yeremia birye, adiparyuk, sik anang dam laka nyapminye ning ara, anang arye, sik deiyok nang yuk-yuk bukni, sik dam laka nyalbinamake. Ayupu ara, ani. “Nara Allah Yahweh, im deice yin talin malaikat nirya ara, sik weik deiyoknye unune. Nara, sik Israel yala nang nirya arye, na siuk ereninyake. Sik mutuku talibuka, unyak ninye deiyok nang ati, Allah Yahweh arye, anggunti, nyapmasile,’ nyabuka laka nyalbinamlum yupu ara, ani. Allah arye nyapsuke.

⁵ “Yuknye kume. Na Allah aryuk, na mikip weik talibuka unye ning ap, tonda na mikip weik unilye taruk ap deice arye, tukwak mutuku ubuk ning nirya kwepdeiamse. Tonda, tukwak mutuku nirya unyak nang ap, tonda tukwak mutuku noutam kam ulye ning yala-yala nirya ap ara, naryuk kwepdeipse. Akwepdeipse ning nirya ara, na kanye aryuk, yatanye biti do, ‘Anye bira mikip weik deiyok ning arepkinun,’ tenepninye bira, narye atenepnye touk arenune.

⁶ Ati, wini talak ara, na Allah arye, anggunce akunum tukwak mutuku nirya ap, amutuku noutam unyak nang yala-yala nirya ap, tukwak kam ulye ning nirya ap ara, aning nirya dobuka, narye tenepsenye biti, akunum arepse. Ara, narye, ‘Anye bira, na amu tam, apil dopnamnil,’ tenyamsinye, Babel mutuku nirya talilul ninye deiyoknye, Raja Nebukadnesar birye, talibuka ulyakuk dobuka arepseba, anyapse touk, aning nirya talilule.

⁷ Ati, amutuku noutam unyak nang mutuku nirya ara, Babel mutuku talibuka, ulul Raja Nebukadnesar, el amu tamuk ukirye, el pil melibuka donamake. Tonda, elce deipnamle mapu ap, el mapu arye deibikceba, dadeipdanin banamak mapu ap, sikce talibikceba, ulamikca ani, amutuku-amutuku unyak nang arye, Babel mutuku talinyak deiyok nang ati, sik pil melibuka donamake. Winibuka daulamikce bukni, na tenyamse talak akunum uplyeura, akunuma, yuk mutuku nang biti, lo arepnyeba, anang arye, Babel mutuku ninye obuka malye kibiceba, amutuku nirya alubuka dopropnamake. Atalak ara, sik yuk-yuk mutuku nang biti, lo arepnyeba, Babel mutuku nang nirya ati, obuka malye kibiceba, sik Babel mutuku nang arye talinyak ning nirya alubuka doronamake. Atalak ara, anggun Babel mutuku ululum nang nirya arye, sik yuk mutuku nang amu tamuk unamlume. Ara, anggun Babel mutuku ululum nang nirya ara, yuk mutuku Raja ninye deiyok nang arye, tapu koupsikirye, ikin pil arepsiceba, sik amu tamuk umunce, apil ara talyeuk donamlume.

⁸ Bukni, winipmanto ara, ninye arye weik ikin yo dobuka, sapi basam un dam kirikiceba, tapu libuka, ikin pil dolamle touk, wini talak ara, winipnamsine. Ara, yata mutuku nang do nirya, tukwak mutuku nirya unyak nang nirya ap, sik talibuka unyak ninye deiyok nang nirya ap ati, Raja Nebukadnesar yanuka oplirye, ‘Na pil talye dopnululume!’ nyabuka, dinamle pil areplyeba, sikce yuk mutuku nang, el yupu kekena kum arye, ‘El pil kum donamabe,’ tenenamak nang nirya ara, na Allah aryuk, sik wenena ati, kum kipdeipnamsine. Ara, narye amutuku nang dam mal olan nang dobuka delina ap, din patan ning arena ap, kanye imun uk talipsilye, nang weika arye dina ap arepnyeura, aikin ning nirya deice arye, amutuku nang nirya kum kipdeipnamne. Winibuka pia winipnyebuk, sik bikikirye, sik nirya ara, Raja Nebukadnesar el amu tamuk unamake. Kumopura, narye lo arepnyeba, Raja Nebukadnesar birye, sik yuk mutuku nang nirya, obuka sirya daknamnarya.

⁹ Nara Allah arye, winipnamna ati ara, yata nang do nirya, sik dam yakirye, ‘Kume, Babel mutuku ninye deiyok kibuka talibuknye biti, el yupu kekena kume,’ nyabuka, nyamsiak nang nirya ara, sik arye ayupu nyapsitinga babye, sik yupu pia kum kekenamlume. Ara, nabi-nabi nang do, tonda yata talye nang do, amutuku deiyok talibuka unamak nang do, aminyan upnamle ning kum uplye talak, laka nyana deiyok nang, nabi nang arye do, lengdar deice arye eibikirye, laka nyanyak nang do, asing kwa nang arye do, sikce, “Nunda lengdar deice arye nyapdeipmasile,” nyanyak nang do, sik nyapnamak yupu pia kum kekenamlume. Tonda, “Laka kin ning deice arye bikmap ning ara ani,” nyanamak yupu ap, tukwak mutuku sambala mikip deice arye pil dolye ning ap, tonda isa mikip deice arye pil dolye ning ap, adeice arye nyapnamak yupu nirya ara, anggun pia kum kekenamlume.

¹⁰ Aning ara, talye ati kum nyapsine. Deiyok ara ani. Dipkoprop nyapsine. Sik anang nirya arye, tilila yupu deice aryuk nyanamsiake. Bukni, nyabikba, anggun amutuku noutamak ululum nang arye, ‘Dibaʼ tenen, ayupu kekepnamluma deice arye, anggun mutuku noutam arye, tomobuka donoknamsine. Nara Allah arye, anggun mutuku noutam arye tomobuka donoksinyeba, anggun nong babye, amutuku noutamakuk dipmunyeba, kum kipdeipnamsine.

¹¹ Bukni, yata mutuku nang do nirya, sikda, Babel mutuku talibuka ulul ninye deiyoknye Raja Nebukadnesar, el yupu kekebuka, el amu tam umunyeura, nara Allah arye melinamsina deice arye, anggun mutuku koproba, pia unamlume. Babel mutuku ninye deiyoknye, el amu tamuk umunce, elce aruknamsil pil dopmunyeura, anggun mutuku uk noutamak arye, narye kum tomobuka donoknamsine. Anggun mutuku uk umunce, wa wibuka, yala koubuka, telebuk unamlume. Dipkoprop ayupu nirya ara, na Allah Yahweh arye nyapdeipsina ati, aning nirya ara, nong dipkoprob upnamle.

¹² Na Allah arye, nabi Yeremia biti nyapdeipsiba, elce, Yehuda mutuku ninye deiyok kibuka taleamuknye, Raja Zedekia el dam babye, ayupu uk laka nyabuk. Ara, narye ayupu nyapdeipsiba, nabi Yeremia birye nyabuk. “Ura ninye arye, ikin yo kintinibikirye, sapi basam un dam deibikceba, ikin pil dolamle touk, anda Raja Zedekia ap, an talilum nang ap, Babel mutuku ninye deiyoknye, el amu tamuk unamlulume. El nyaplye yupu kekebuka winina ap, elce taleamuk nang, sik amu tamuk umunce, sik nyasiknyak yupu kekepmunce, apiluk dopmunyeura, dipkoprob Allah arye lo arepsiliba, anggunda tuba kam unamlume. Bukni, Allah arye anggunti, ‘Wininamlume,’ nyapsilirye yupu kekepmunce, kum winipmunyeura, dipkoprob dipnamlume.

¹³ Anggunda moubuka tenipdelulume! Yata deiyok ati, na nyapmasin yupu yanimunyeura, wenebuka opsinyeba, dipnamlum do? Kume, na Allah Yahweh arye, ayupu nyapdeipmasine. Ara, “Yata mutuku nang do nirya arye, Babel mutuku ninye deiyoknye Raja Nebukadnesar, el yupu yanibikce nang ara, na Allah arye arepneba, mal olana ap, din patana deice ap, ninye dipna ati kanye imun uk, weik arye dinamle ning ap, adeice arye dipnamake. Ati, anda Raja Zedekia ap, an talilyam nang ap, anggun Yehuda tam ululum nang babye, yata deiyok ati, anggun dam arye imun ning yalyeba, adiparyuk dipnamlum do?

¹⁴ Aning ati ara, Zedekia an ap, an talilyam nang ap ara, sik mutuku noutam unyak nabi-nabi nang arye, “Babel mutuku talibuka ulye ninye deiyoknye Raja Nebukadnesar birye nyalul yupu ara, kekena kume,” nyabkikca babye, anabi-nabi nang, sik yupu kum kekenamlume. Anang ara, Zedekia anti, ‘Tilila yupu talye nyapnuyapʼ tenen, ayupu nyapnamaka ati, ayupu pia kum kekenamlyame.

¹⁵ Na Allah Yahweh arye, dipkoprob nyapkine. Sik anang arye nyanamak yupu ara, ‘Nunda, Allah arye nyapdeipmasil yupu laka nyababe,’ nyabuka nyaltakanamake. Bukni, talye tilila yupu deice nyanamake. Na Allah Yahweh arye, ayupu pia kum nyapdeipse. Tonda, aning ara dipkoprob, narye kum wipdeipse nang unyake. Aning ati ara, anggun amutuku nang arye, sik tilila yupu nyan nabi-nabi nang arye nyanamak tilila yupu kekepmunce, dip tenepmunyeura, na Allah arye anggun amutuku nang nirya, anggun mutuku noutamak arye tomobuka donoknamsine. Winipyeura, Raja Zedekia an ap, an dam yanuka tilila yupu nyanamak nabi-nabi nang ap, sik nirya ara, na Allah arye kum kipdeipnamsine. Allah Yahweh arye ayupu nirya nyabukba, Yeremia birye, ayupu laka nyalbiuk.

¹⁶ Nyabukura, nabi Yeremia birye, ayupu ton dukdongobuka nyabuk. “Ara, na Yeremia birye, Yudea tam imam-imam nang ap, amutuku noutam unyak nang ap ati, ‘Allah Yahweh arye nyapdeipmasil yupu nyapnusine,’ nyapse. Ara ani. Anggun mutuku nabi-nabi nang arye, nyanmasice yupu ara, pia kum kekenamlume. Sik tilila yupu deice nyanmasikce yupu ara, ani. Sikce, ‘Kume, Allah el si eren aik noutam deiamik ning, sik Babel mutuku nang arye, alubuka bobinamik ning ara, adiparyuk tamubuka boyanamsiake. Aning ara, sik arye kum boyanamsiake. Babel mutuku arye tamubuka, boyanamake,’ nyanmasiake. Bukni, ayupu ara, tilila yupu nyanamsiaka ati, anggunce aning nyabikce babye, ayupu ara, pia kum kekenamlulume.”

¹⁷ Atilila yupu nyanyak nabi-nabi nang arye nyanyak yupu ara, kum kekenamlulume! Aning ara, kum bukni, Babel mutuku noutam, ninye deiyok kibuka taleamuknye Raja Nebukadnesar, el yupu uk kekebukmunce, el amu tamuk umunce, el pil melibuka donamlume. Winipmunyopura, Allah arye melibuka kalikisilye deice arye, anggun tuba kam unamlume. Tonda, anggun ululum mutuku babye, malye kibuka kum deipnamsile. Moubuka tenipdelulume! Yata deiyok ati, Allah arye nyapmasil touk, kum winipmunyopura, Allah arye anggun weik asik umunyak, obuka sice buklopnamasil do?

¹⁸ Aning ton moubuka tenipdelulume! Sik anang ara, dipkoprob nabi pil dolamtinga arye, Allah el yupu sik dam laka nyalilamtopura, dipkoprob sikce, Allah Yahweh aning-aning nirya talibuka deice tam mikip weik ulinye, el dam moroptingba, kekepturye, melipsutuba, el si eren aik pum tam ap, Yerusalem mutuku noutamak ap, Yudea tam ninye deiyok kibuka talibuknye Raja, el pia teleb aik, el si istana pum tam deililamik ning ap, mitik tonun tuba aubuk ning nirya ara, Babel mutuku nang arye, aning dobuka kum bobinamtinge. Anabi nang ara, Allah el pil dopmanto nang upting toura, sikce Allah moroptingopura, melipsetu ura, Babel mutuku nang arye, nun tam ning kum alubuka doplopnamtinge.

^19-20 Aning ara, na Allah Yahweh, im deice yin talin malaikat nirya ara, sik deiyoknye ununa ati, nara mikip weiknye birye nyapsine. Min talak ara, Babel mutuku Raja ninye deiyok kiamuknye, Nebukadnesar birye, Yehuda mutuku obuka malye kibukce, amutuku taleamik deiyok nang bobinamuk. Ara, amutuku deiyoknye, Raja Yoyakim elce deibuknye, el pununanye Yoyakin ap, Yehuda mutuku nirya ap, weik asik domicak Yerusalem mutuku ap taleamikce, ninye deiyok kibuka, ulamik deiyok nang ap nirya ara, tapu koubuka bobinamuk talak ara, amutuku mambul ning weika arye, alubuka bobinamuk. Bukni, aning kan-kan noutam arye, ton ning ara, kum bobinamuk. Ati, asukum ara, Yerusalem mutuku tuba aupmal ning ara, Allah el si eren aik urasin tam, weik ayukumna iklamik cang yo ap, weik pala mek makau domik ning ap, amek kwebuka bobana ati, kintinip deibik makau, takubarye 10 ap, tonda na Allah si eren aik noutam yuk-yuk ning deiamika, mitik tonun ap ara, tuba aupmale. Min talak ara, aning nirya alubuka, Babel mutuku kum bobinamike.

^21-22 Bukni, na Allah Yahweh, im deice yin talin malaikat nirya ara, anggun deiyoknye ununa ati, anggun Israel yala nang arye, na siuk ereninyake, nara sik ni koproba Allah unune. Narye dipkoprob nyapsine. Na Allah arye, ‘Aminyan talak, aning ara, winipnamakʼ tenen, tenyamse touk, Yerusalem mutuku weik asik domice noutam ap, na si eren aik noutam ap, Yudea tam taleamuknye, Raja el aik pum deiamik ning ap, tuba uamuk ning nirya ara, ‘Aminyan talak, sik Babel mutuku nang arye, aning bobuka Babel mutuku bobinamake,’ tenyamse. Aning nirya ara, Babel mutuku bobinuka deibikceba, amutuku noutamuk aunmalya ani, aning kalikuka talipnamake. Bukni, winibuka taleamikca ani, narye tenepmase talak akunum kiplyopura, aning nirya dopropnirye, tamubuka amutuku uk boyanamne. Ara, na Allah si eren aik noutam tuba uamuk ning ara, tia talak ati bobinamak bukni, aminyan talak ara, narye aning nirya tamubuka dopropnirye, tamubuka amutuku Yerusalem mutuku uk boyanuka deipnamne.