Yeremia 26 - Eipomek

Yeremia birye, Allah el si eren aik yangalamik ninye ati, nyabuk yupu

¹ Atalak ara, Yosia el mi Yoyakim bira, Yehuda tam ulamik ninye, sik ninye deiyoknye una ati, deiyok koubuk keting tamun ara, Allah el si Yahweh arye, Yeremia biti, ayupu yanuka nyabuk.

² Na Allah Yahweh arye nyapkine. Na Allah Yahweh ati, na si erena ap, na kina ap ati, aik domikcak bimince, anyasik dam tikuka ayupu nyanalyame. Ara, sik Yudea tam noutamak unyak ninye nirya ara, ‘Nun ni Allah, el si erenamap’ tenen, na si eren aik yakce ninye ati, narye, ‘Winibuka nyanamlyame,’ nyapdeipnukin yupu nirya, laka nyapnalyame. Tonok yupu babye, ‘Se, ayupu ara, bataknun,’ tenena kume. Tonok yupu babye, kum bataknalyam bukni, na nyapmakin yupu nirya ara, aninye kekenak binuka, laka nyapnulyame.

³ Nyapminba, sik aninye kekebikirye, ‘Sik malye wininyak ning nirya batakuka, na damuk yanamak do, kum do?’ tenen, dinamabe. Sik malye wininyak ning batakice talak ara, narye, ‘Sik deice, kanye imun ning arepnamne’ tenen, kintinipse ning ara, bataknamne. Akintinipse ning ara, ‘Sik malye wininyaka dekna ati ara, opnamne’ tenen, kintinipse bukni, sik malye wininyak ning, dipkoprob batakikcopura, sik wenena ning bataktinye.

⁴ Ati ara, ance sik Israel ninye ati, sik dam nyapnulyame. Allah Yahweh arye, na deice deipnuk yupu ara ani. Nara, Allah Yahweh unirye, sikti, ‘Aning wininamlulume. Aning ara, kum wininamlume,’ nyapdeiamsise yupu ap, yuk nyapsin yupu ap, kum kekemunyopura, narye wenebuka opnamsine.

⁵ Tonda, na yupu laka nyana deiyok nang, sik nabi-nabi dam nyamsiba, sikce anggun Israel ninye dam laka nyapdeiamse ning babye, kum kekelamlume. Ara, ‘Narye weik wenena ning arepneba, ‘Naʼ tenen, ninye, adiparyuk dibicak’ tenen, nabi nang weibuka dopdeiamsise talak ara, “Adiparyuk kekenamake,” nyapdeiamsise bukni, anggunda kum kekelulume.

⁶ Anggunda, Allah el yupu kum kekepmunce, pia mandipna uk winipmunyopura, Allah weik arye wenepnamsile. Ara, minop talak Silo mutuku ulamik ninye, wenebuka oplomse touk, anggun atalak ululum Israel yala ninye nirya babye, anggun malye winimunya dekna ati, opnamsine. Tonda, anggunce anyasik-anyasik nirya, Yerusalem mutuku domlum aik nirya ara, anggun wenena ati, malye kipdeipniba, yuk mutuku ninye mutuku-mutuku unyak ninye nirya arye, “Se, Yerusalem mutuku ara, malyeuk winilamikba, Allah arye malye nyabuka, supdongobuk mutuku ani,” nyanamsiyake. “Allah arye nyaipmanil yupu akunum nyapsine,” nyabuka, laka nyapnalyame. Allah arye Yeremia biti, nyabuk.

⁷ Allah arye nyabukba, Yeremia bira, Allah el si eren aik dam binuka, laka nyabukopura, sik Allah el yupu laka nyana deiyok nang, nabi-nabi nang ap, Allah el si eren aik talibuka, pil dona deiyok nang, imam-imam nang ap, tonda, sik talye daunmek ninye nirya ap, sik nirya ara, Yeremia laka nyabuk yupu kekebik.

⁸ Allah arye, Yeremia dam nyapdeiamuk yupu nirya dobuka, sik aninye dam, akunum nyabukopura, aninye nirya kekebikura, nyabik. Ara, sik Allah el yupu laka lena deiyok nang, nabi nang ap, Allah el si eren aik talibuka, pil dona deiyok nang, imam-imam nang ap, tonda, sik talye daunmek ninye nirya ap, sik nirya arye, nyabik. “Kume, ance nyanmasilam yupu ara, nun like. Ati, anda adiparyuk dipnulame,” nyabikce, Yeremia biti, yanuka tomobik.

⁹ Aninye arye, Yeremia tomobikce, mikip arye talibikopura, ayupu ton nyabik. “Anda weik mandipna kanye bopmalamce, Allah el si deice arye, ‘Yerusalem mutuku nirya ap, Israel yala ninye nirya ap, Allah el si eren aik ap ara, Allah arye malye ulinamsile. Ara, minop talak, Silo mutuku ulamik ninye wenebuka oplobuk touk, anggun amutuku ululum ninye babye, atonun upnamsile,’ nyapmasilam ning ara, yata deiyok ati do? Tonda ance, ‘Amutuku noutamak ara, yuk nang arye, obuka kum kipdeipsikiba, ninye ton kum unamake. Amutuku domunye asik nirya ara, asik oldemuk upnamsile,’ nyapmasilam ning ara, yata deiyok ati do? Nun kanye ara, ayupu nirya ara, talye nyamasilame, tenenyabe,” nyabik. Nyabikce, aunmek ninye nirya arye, yep-yep abuka malye nyanmekce, Yeremia el nong dana-dana tam bulubuka yayik. Ara, Yeremia unmokakuk, Allah el si eren aik dam, bulubuka yayik.

¹⁰ Wininmekba, yuk nang eibikce, laka nyalbanmekba, Yehuda mutuku yuk-yuk ninye deiyok kibuka, taleamik nang nirya, sik dam binuka nyabikba, kekebikce, sik amutuku nirya ninye deiyoknye, Raja el aik dam arye batakuka, Yerusalem mutuku noutamak, Allah el si eren aik dam yayik. Yayikce, anyaik bublan el si ara, Winiryuk Bisik Bublan nyalamik bublan dam, deiyok nang bulamak deice yanuka bukik.

¹¹ Sik anang nirya akunum binuka bukikopura, sik imam-imam nang ap, nabi-nabi nang ap arye, amutuku noutamak pil deiyok yuk-yuk talibuka, pil dolamik nang ap, anyaik bulubuka wekmek nang, talye ninye ap ati, nyabik. “Kume, nun kanye ara, anye Yeremia bira, el wenena ati, optibye. Ara, urdem ati kum bukni, elce, nun unyap mutuku Yerusalem mutuku ati, ‘Aminyan talak ara, Allah arye amutuku nirya ap, anggun amutuku ululum ninye ap ati, wenebuka opsilirye, sirya daknamsile,’ nyabuka, pia malye yupu nyanmasilarye, yanipmasile. Anyanmasil yupu ara, anggun aunmalum ninye aryuk kekepmalume. Ati ara, adiparyuk, anye bira opnuyabe,” nyabik.

¹² Nyabikopura, Yeremia birye, sik ninye deiyok nang ap, anyaik bulubuka wekmek ninye ap ati, tamubuka nyabuk. “Kume, Allah el si eren aik ap, Yerusalem mutuku ap, amutuku ululum ninye ap ati, malye yupu nyapman ning ara, naryuk tenebuka, kum nyapmane. Nun ni Allah, el si Yahweh arye nati, ‘Ayupu laka nyalbinamalyame,’ nyapdeipnuk touk nyapnopura, kekepmalume. Narye tonok yupu babye, na kanye aryuk kum nyapmasine,” nyabuk.

¹³ Ati ara, anggun nirya arye, malye-malye winilulum ning ap, anggun malye tenelulum ning ap, nirya batakmunce, tamubuka Allah el dam yanamlulume. Ara, nun ni Allah Yahweh arye, ‘Aninguk wininamlulume. Aning ara, kum wininamlume,’ nyapdeiamsuk yupu uk, kekebuka talipmunce, moubuka wininamlume. Nukmunba, Allah arye sik wenena ati, ‘Sik deice ikin weik ning deipnamne,’ tenepsuk ning ara, ‘Bataknamsil do, kum do?’ tenen, unamabe. Anggun malye winilulum ning batakmunyopura, Allah arye wenebuka kum opnamsile. Bukni, anggun malye winilamlum ning, kum batakmunyopura, wenepnamsile.

¹⁴ Bukni, na Yeremia biti ara, anggunce tomopmanulumba, anggun dam unmana anya arye, anggunce nati, ‘Winipnamabe, teleb ning ara ani,’ tenepmanulum ning ara, teleb uka. Anggunce tenepmanulum touk, dawinipnamnululume.

¹⁵ Nyapmasin bukni, anggunce moubuka tenepnamlulume. Na dipkoprob nyapsine. Anggunce, na malye ton kum winipmanbuk, opnulum ati ara, anggun deiyok nang ap, anggun amutuku noutamak ululum ninye ap nirya ara, ikin ning dopropnamlume. Ara, malye winina kumnye opmunyopura, na ining, anggun kisok deice upnamsile. Deiyok ara, anyapmasin yupu ara, na kanye aryuk kum nyapsine. Nara, Allah Yahweh arye, ‘Na yupu, sik aninye dam laka nyapminba, sik malye wininyak ning bataknamak do, kum do?’ tenen, Allah arye nyapnuk touk, anggun dam yanuka nyapmasina. Ara, anggun bidamnye, malye winimunya ati, nyapdeibukba, yanuka nyapmasine. Ayupu nirya ara, Yeremia birye nyabuk.

¹⁶ Nyabukura, amutuku ninye deiyok kibuka taleamik nang ap, amutuku ulamik ninye ap arye, tamubuka, sik imam-imam nang ap, nabi-nabi nang ap ati, nyabik. “Se, anye bira, ona kume. Elda dipkoprob nun ni koprop Allah Yahweh, el si deice arye, ayupu dipkoprob ninguk nyapmasile ati, el ona kume,” nyabik.

¹⁷ Nyabikopura, amutuku ninye deiyok yuk-yuk talibuka ulamik nang noutamak, tonoknye tikukce, wilibuka minopce utikilbiyukce, anyaik noutamak bulubuka, wekmek ninye ati, nyabuk.

¹⁸ Minop talak, Yehuda yala ninye ati, ninye deiyoknye kibuka taleamsuknye, el si ara Hizkia, elce taleamsuk talak noutamak ara, Allah yupu nyapdeipliba, laka nyananye, el si Mika, mutuku si Moresyet mutukunye birye, nyabuk. Atalak ara, nabi Mika birye, amutuku ulamik ninye ati, nyamuk. “Allah Yahweh, aning-aning nirya deice tam, weik erebuka ululnye birye, el yupu nyapdeipnukba, yanuka nyapsine. Allah Yahweh ara, aning-aning nirya talilule. Im deice yin talin malaikat nirya, sik weik deiyoknye ulule. Allah arye nyapdeipnuk yupu ara, ani. ‘Sion mutuku ara, wa win dam atonun upnamake. Tonda Yerusalem mutuku asik dobik ning ara, yu nang arye yanuka, uluplobikiba, asik oldemuk upnamle. Tonda, Allah el si erena ati domik aik, uluplobikiba, dauamlya ani, aminyan talak ara, amutuku dupak, talye palamle yo noutamak tiknamle. Anyasik uluplobikiba, talye aikuk upnamle atia.’ Allah arye nyapdeipnuk yupu nyapsine,” nabi Mika birye, nyabuk.

¹⁹ “Minop talak ara, nabi Mika birye, ayupu nyabuk bukni, amutuku Yudea taleamuknye, Raja Hizkia ap, Yehuda mutuku noutamak ulamik ninye ap, sik nirya arye, ayupu kekebikura, Mika biti yu ubuka kum obik. Kume, Raja Hizkia birye, nabi Mika nyabuk yupu, moubuka kekebukce, ‘Ara dib nyanmale. Na ap, amutuku ninye ap, malye wininyap ning ati, Allah arye wenepsilyak’ tenen, nyanmasile, tenebuk. Winibuka tenebukce, ‘Se, amalye wininun ning ara, Allah arye bico tenebuka lyepnutue’ tenen, Allah moryamuk. Utenebuka morobukopura, Allah arye, atalak ulamik ninye ati, ‘Wenebuka opnamne,’ tenyamuk ning ara, batakuk. Ati, atalak unyap ninye ara, pia moubuka tenipnuyabe. Nun babye, Allah arye nun dam ikin ning deipsilyak ati, Yeremia bira, talye lukparabuka ona kume. ‘Nunce nun bidamnye ati, malye kipdanyap’ tenen, nyapsine.” Yehuda mutuku wisinye tonoknye birye, anyaik bulubuka wekmek ninye nirya ati, ayupu nyabuk.

²⁰ Aning nirya winibuk talak ara, tonoknye ton, Allah arye nyapdeibukura, el yupu laka nyalamuknye, el si ara, Uria ulamuk. Ara, ninye si Semaya birye, deibuknye ani. Uria bira, el mutuku si ara, Kiryat-Yearim. Uria bira, Allah arye nyapdeibukura, el yupu kekelamukce, laka nyalamuk ning ara, Yerusalem mutuku ap, Yehuda yala ninye ulamik mutuku ap ati, ‘Aminyan talak ara, ikin weik unamle,’ nyabuka, laka nyalamuk. Ara, nabi Yeremia birye, laka nyalamuk atonun, anye bira Uria babye, ‘Allah el si Yahweh arye, nyapdeipmanilba, nyapsine,’ nyabuka, Yeremia birye nyalamuk yupu atonun nyalamuk.

²¹ Nabi Uria birye, yupu yanuka nyanmokba, amutuku nirya talibuka ninye deiyoknye, Raja Yoyakin ap, el yin talin deiyok nang ap, el amu tam mambul pil dobuka ulamik nang, weik nang ap, sik nirya arye, ayupu kekebikce, ‘Kume, anye Uria bira opnamabe,’ tenebikce yupu talibik bukni, yuk nang kekebikce, laka nyabikura, Uria birye, sik tenepmek ning, el kel bikukce, ‘Na opnamaniyak’ tenen, ilil ubukba, Mesir mutuku binamuke.

²² Mesir mutuku binamuk bukni, ninye deiyoknye Raja Yoyakim arye, ninye si Akbor, el mi Elnatan biti, ‘Uria tomolbilyame,’ nyabukce, Elnatan deiyok kouna ati, dopdeibukba, el ap, yuk yin talin nang ap, Mesir mutuku biyikce, Uria binuka, tomobuka boyanamik.

²³ Anang arye, nabi Uria dobuka, tuba tamubuka, ninye deiyoknye, Raja Yoyakim dam boyayikopura, elce, ‘Anye bira oplulume,’ nyabukura, parang ya dobuka, Uria obik. Obikopura, talye ninye weilbalamikak, binuka donokik. Ara, weina kum diparyuk, el nong talye donokikce, batakik.

²⁴ Atalak ara, Uria oplobik bukni, Safan el mi Aikam birye, Yeremia meliplyame, ‘Anye bira oltakana kume,’ nyabukba, amutuku deiyok nang arye, ‘Yeremia tomobuka amutuku ninye arye anye bira opdeipnamake,’ nyabuka, kum nyapdeibikba, Allah arye, Yeremia biti lyeprobuke.