Yeremia 25 - Eipomek

Allah arye Yehuda mutuku nang, Babel mutuku yakdonokukba, keting tamun, tujuhpuluh (70) tahun binuka unamika ati, nyabuk yupu

¹ Yosia elce deiamuknye, Raja Yoyakim bira, Yehuda yala nang, sik deiyoknye kibuka, ulamuka ani, keting tamun empat puluh tahun (40) kibuk. Atalak ara, Allah arye na Yeremia dam yanuka, sik Yehuda mutuku ulamik nang ati, ayupu nyapdeipnuk. Atalakuk, Babel mutuku ara, Nebukadnesar birye, Raja kibuka, Babel mutuku nirya deiyok kibuka, talipmoka ara, keting tamun tonok mapmok. Atalak aryuk, Allah arye yanuka, ayupu nyapdeipnuke.

² Yehuda yala nang ap, tonda Yerusalem mutuku ulamik nang nirya ap ati, na nabi Yeremia birye, ayupu kekepsirye, sikti, laka nyapse.

³ Ura, anggun Yehuda mutuku ululum nang nirya ati, Allah Yahweh arye, na dam yanuka, yupu nyapdeipnuk ning ara, anggun dam laka nyapnusine. Ayupu laka nyapnusin talak ara, ninye si Amon, elce deiamuknye, Raja Yosia birye, Yehuda yala nang ati, deiyok koubuka, taleamuka ani, atalak noutam ara, tiga belas tahun arye nukuka, anoutam nirya ara, amutuku taleamuk. Atalak noutam nirya ara, keting tamun weik, Allah el yupu laka nyapnin yangalamse ani, wini talak ara, akunum dua puluh tiga (23) tahun akunum kipnile. Bukni, anggunce ayanuka laka nyasunun yupu nirya ara, anggunce moubuka kum kekelulume.

⁴ Aninguk kum bukni, Allah aryuk, batakna kumce, elce el yupu ap, aminyan winipnamle ning ap ati laka nyana deiyok nang, sik nabi-nabi nang, sik deice yanuka nyapdeiamukba, sikce amutuku ulamik nang, sik kekenak laka nyapdeiamukba, tuba-tuba nyalyangasinyake. Bukni, sik nabi-nabi nang arye nyasinyak yupu babye, kekepmunyakarye, ‘Aning ara, dip nyapmasiaka ati, kekepnuyabe,’ nyabuka, bita kum talilulume. Tonda anggunda ayupu pia kum kekelulume.

⁵ Ara, sik nabi nang arye, anggun dam nyapdeiamsik ning ara, “Malye ning nirya talibuka winilulum ning ap, tenelulum ning nirya ara, adiparyuk batakmunyopura, na Allah Yahweh arye, lo arepsinye deice arye, amutuku tuba unamlume. Ara, anggun apu yapu nang ati, ‘Ateleb mutuku arepnamsine. Arepsinyeba, dopropmunyopura, amutuku talipmunce, pia aunamlume,’ nyapdeiamuk yupu deice arye, nyapdeiamse ning ati nyapne. Ara, amutuku ara, na Allah Yahweh arye, anggun apu yapu nang ap, anggun asukum ululum nang ap ati, akunum arepsise mutuku ati, ‘Amutuku uk pia talibuka uptingʼ tenen, nyamsise.

⁶ Nyapsopura, ayupu ton nyapdeipsise. Ara, “Anggunda, talye ning ati, ‘Nun ni ani,’ nyabuka, isa si erelulumce, anggunce si erebuka, pil dolulum ning babye, adiparyuk bataknamlume. Tonda, anggun taruk deice aryuk, ninye urasin atonun memebuka delilulum ning ap, malye pil dolulum ning ap, aning winiluluma deice arye, na Allah, na kanye malye ulinululume. Bukni, aning nirya, anggunce malye-malye winilulum ning nirya ara, adiparyuk batakuka, narye anggunti, ‘Aning wininamlume,’ nyapdeipsise touk, winilulum ning ara, na Allah arye anggunti, kum wenebuka opnamsine.

⁷ Bukni, na Allah Yahweh arye nyapsine. Narye, ‘Aning ara, wininamlume. Aning ara, pia kum wininamlume,’ nyapdeipsise yupu, bataklumce, pia kum kekelulume. Tonda, talye ning ati, anggun taruk deice arye, memebuka deiplumce, ‘Nun ni ani,’ nyabuka, isa si ereluluma deice arye, na Allah ati bataknulume. Winiluluma deice arye, anggunce nati, pia yu kilinululume. Tonda, anggunce anggun bidamang nang ati, ikin ning deipdamunce, imun kanye bobuka unamlume. Adeice, na Allah arye, anggun dam kanye imun weik ning arepsiniba, dopropmunce, ikin asa unamlume.

⁸ Nara, Allah, im deice unyak yin talin malaikat nirya, sik deiyoknye unirye, ayupu nyapsine. Na Allah arye anggunti, “Aning ara, wininamlume. Aning ara pia kum wininamlume,” nyapdeipsise yupu ara, pia kum kekelulume.

⁹ Ati ara, narye outam unyak nang, yuk-yuk nirya ati, “Yehuda mutuku nang olyalulume,” nyabuka, yukupnamne. Tonda, na pil dopnamnilanye bira, Babel mutuku nang, sik ninye deiyoknye, Raja Nebukadnesar biti yukupnamne. Yukupnyeba, sik nirya neika yanamake. Narye lo arepnamna deice arye, olyakirye, Yehuda mutuku unyak nang nirya ap, Yerusalem weik asik noutam ululum Israel nang ap, sik ulumik dana-dana mutuku bukni, anggun dam unyak yuk-yuk yala nang nirya ap ara, yanuka, obuka sirya daknamsiake. Narye anggun nirya ati, lakakip deipsinyeba, anggun mal olan nang arye yanuka opsikirye, sice buklopnamsiake. Winibikceba, yuk nang nirya arye aning eipnamake. Eibikirye, ‘Se, yu nang arye anang obuka sice buklopmaka ara, ilil upsile,’ tenebikirye, yok kum-kum dakanamle. Atalak arye dipdongobuka, doyanamle talak nirya ara, yuk nang nirya arye, anggunti, akutubuka nalisikceba, anggun opnamsiak nang nirya ara, alye weik dakanamlume. Aning ara, pia kume kum danamsile. Na Allah Yahweh arye aning akunum nyapmasina ati, aning nirya ara, dipkoprob nong upnamle!

¹⁰ Tonda, narye imun kanye bon ning, arepsinyopura, kil taruk mourun talak kwalya kwalipbikirye, deibuka dinmakirye, kanye kil-kil mot senmakirye karye okirye, yupu weik nyanyak ning ara, kum kipdeipnamne. Tonda, sal arye kilapu dobuka kanye deipdakirye, yupu sisik lamak ning babye, kum kipdeipnamsine. Tonda, ikin weik upsilyopura, anggun Yehuda yala nang ap, Yerusalem mutuku ululum nang ap ara, anggun ululum aik pum tam weisa deipmunyeba, dirina usulul ning ara, kum kipdeipnamsine. Tonda, ‘Roti kwaning kintinipnuyapʼ tenen, gandum duk teikilamunyeba, lelim nyalul ning ara, anggun mutuku noutam arye, ding aplyeba, kum lelim nyanamle.

¹¹ Deiyok ara ani. Anggun ululum mutuku nirya ara, na Allah arye namin kipdeipsinyopura, anggun mal olan nang arye, yanuka opsikirye, amutuku nirya malye kipdeipsikceba, sice buklopnamsiake. Winipsikcopura, anggun mutuku nirya ara, oldemuk upnamle. Mutuku kata sukumuk, ninye kum ulamikcak atonun upnamsile. Atalak ara, anggun Yerusalem mutuku ululum nang ap, anggun Yehuda mutuku nang ap, sik dana-dana tam unyak nang nirya ap ara, Raja Nebukadnesar birye, tapu koubuka, el mutuku, Babel mutuku binuka deipsilyeba, unamlum talak ara, keting tamun tujuhpuluh (70) tahun mapnamlume. Elce ikin pil disiliba, el amu tam umunce, el piluk donamlume.

¹² Bukni, winibuka daulamunya ani, na tenyamse talak, keting tamun tujuhpuluh (70) tahun akunum mapmunyopura, Babel mutuku ninye talibuknye ap, elce talilul nang, sik Kasdim yala nang ap ara, sik pia malye wininyak nang ati, na Allah arye sikti, wenebuka opnamne. Na Allah arye, Babel mutuku ap, Babel nang nirya ara, oplopnyakarye, sice buklopnyopura, sik mutuku ara pia, oldemuk upnamle. Na Allah Yahweh arye, ayupu akunum nyapmana ati, dipkoprob nong upnamle!

¹³ Ara, Babel mutuku nirya ap, Babel mutuku noutam unyak nang ap, yuk-yuk mutuku nang nirya ara, sik wenena ati, “Narye winipnamne, ikin weik ning arepsinirye, winibuka opnamsine,” nyapdeipsiba, Yeremia birye kekebukce, anggun atam mutuku nirya ati, abukuka noutam sekdeibuk ning nirya ara, dipkoprob anggun dam arepnamsine. Aning nirya, dipkoprob nong upnamle nyapne.

¹⁴ Ara, sik Babel mutuku unyak nang arye, Yehuda mutuku noutam unyak nang, yuk-yuk nirya, sik deice malye-malye kibuka, ikin weik ning delilamsik ning ati, na Allah arye, sik deice tamubuka, kwang daknamne. Winipnyopura, Babel mutuku nang arye, amalye unamsiaka ati, lo arepniba, yuk-yuk mutuku nang arye, Babel mutuku unyak nang nirya, opnamake. Obicopura, sik yuk-yuk mutuku nang nirya ap, sik talinyak pia weik Raja-Raja nang ap arye, Babel mutuku nang nirya talibikirye, anggun amu tam deipnamsiake. Winipsikcopura, Babel nang arye, sik yuk mutuku nang ati, sik piluk donamake. Aning winipnamla deiyok ara ani. Ara, na Allah arye, sik Babel mutuku nang arye, pia malye-malye weik winilamik ning wenena ati, narye kwang daknamnarya! Sik taruk arye, malye winiun ning, winilamik ning atonun ubuka, narye ikin weik ning, sik nong deice deipnye deice arye, kwang daknamne. Allah arye nyabuk.

Allah arye, yuk-yuk mutuku nang nirya ati, obuka wenepnamla ati, nyabuk yupu

¹⁵ Na Yeremia bira, ton talak ton, lengdar mapmasirye dinmasiba, Israel nang, sik si erenyak Allah Yahweh, el taruk deice bopmuk mek makau ara, anggur mek lipdongobuka, bopmuk. Abobanmok anggur mek ara, Allah el yu weik un ning atonun upmokba, el taruk deice bopmuk. Winipmokce, na Yeremia biti nyapnuk. “Yeremiao, anggur mek libuka deipman ning ara, na yu weik unulul ning uple. Ati, na taruk arye, talipman anggur mek makau ara, ance doproplyame. Dopropminyopura, na Allah arye, anti, ‘Amutuku-amutuku nang nirya, sik dam bobinuka arelbinulyame,’ nyapdeipkin mutuku ara, anggur mek makau bobinuka arelbinulyame. Anggur mek bobimince, amutuku ulamikce nang nirya ati, ance, ‘Anggur mek diplulume!’ nyapminba, sikce aning dobuka, dipnamake.

¹⁶ Anggur mek akunum dibikcopura, sik kanye wangabikiba, teleb kanye kum bobikirye, motona nang winilamak touk upnamaka deiyok ara, na Allah arye, sik anang wenebuka opnamne. Narye nyapniba, yin talin nang arye, ninye ona ati, parang dobuka, anang olyanganamake. Allah arye na Yeremia biti, nyapnukba kekepse.

¹⁷ Akunum kekepsopura, na Yeremia birye, Allah Yahweh el taruk deice, mek makau arye anggur libuka, bopmuk ning ara, binuka dopropse. Dopropsirye, Allah Yahweh arye, ‘Amutuku unyak nang, sik dam bobimince arepminba, arepmakin anggur mek dipnunyake,’ nyapnuk touk, narye sik dam binuka arepsiba, dobuka dibik. Aning nirya ara, lengdar mapmasa deice arye eipse.

¹⁸ Ura, Allah el yu ati, anggur mek dibikiba, imun kanye bobuka unamak nang nirya ara, ani. Ara, weik asik Yerusalem mutuku unyak nang ap, Yehuda yala nang, sik mutuku unyak nang nirya ap, Yehuda mutuku noutam unyak Raja-Raja nang ap, tonda sik Raja-Raja amu tam pil dona deiyok-deiyok kibuka, unyak nang nirya ap ara, narye sikti, anggur mek arepnyopura, sikce dinamake. Anggur mek dibikcopura, sik mutuku-mutuku nirya ara, oldemuk upnamle. Ati ara, anggun mutuku urasin nirya ara, mutuku katauk kounyak ning koubikiba, teleb kibuka kum palamle touk, sik anang ap, sik mutuku nirya ara, pia malye upnamle. Pia malye kipdeiplyopura, yuk mutuku nang nirya arye, aning eibikirye, ‘Seʼ tenen, ilil upnamle. Yuk mutuku nang eibikirye, ‘Se, Allah arye, anang obuka, sice buklopmala ara, mambule. Allah arye amutuku nang akunum wenebukce subuke,’ tenebikirye, duk-duk abikirye, kum-kum dakanamake. Atalak ara, yuk mutuku nang nirya arye, Allah wenebuka opnamle nang ati, akutubuka nalibiceba, alye weik dakalanamake. Wini talak ayupu nyapmasin talak babye, aning akunum deiyok koubuka wininmale.

¹⁹ Alengdar mapmase talak aryuk, amutuku-amutuku nang ulamik sukum nirya ara, banmasiba, Allah el yu ati, anggur mek pia piribuka, arepra banmasiba, dinmek. Ara, Allah el yu weik, ninye deice deipnamuk ning ati, anggur mek arepsiba, dibik nang ara, ani. Ara, Mesir mutuku taleamuka deiyoknye, Firaun ap, el amu tam pil dona deiyok kibuka ulamik nang ap, Mesir mutuku noutam ulamik nang ap, yuk mutuku nang bukni, Mesir mutuku yanuka, ansinibuka ulamik nang ap,

²⁰ Tonda, Us mutuku Raja kibuka, taleamik ninye deiyok nang nirya ap, Pilistin mutuku noutam, weik asik dobuka, unyak nang ati, talinyak Raja-Raja nang nirya, ara, Askelon mutuku ap, Gasa mutuku ap, Ekron mutuku ap, tonda, Asdod mutuku tuba unyak nang nirya ap,

²¹ Edom mutuku ap, Amon mutuku ap, Moab mutuku ap, unyak nang nirya ara,

²² Tonda, Tirus mutuku ap, Sidon mutuku ap, tonda weik laut mek kwen, el si Laut Tengah, tonda Laut Mediterania nyakce laut koubuka, otam mutuku unyak nang nirya ara, sik anggur mek ton dibik.

²³ Tonda, Dedan mutuku ap, Tema mutuku ap, Bus mutuku ap unyak nang nirya babye, yuk-yuk mutuku noutam, sik amul deice tam, sik kisok potong bumang arye, konyak nang babye dibik.

²⁴ Tonda, Arab mutuku talibuka unyak Raja nang nirya ap, sik amu tam unyak nang ap, mutuku kata tam unyak nang, yuk-yuk nirya ati, anggur mek arepsiba dibik.

²⁵ Tonda, Zimri mutuku ap, Elam mutuku ap, Madai mutuku ap, Raja kibuka talinyak ninye deiyok nang nirya ati, anggur mek arepsiba, dibik.

²⁶ Tonda, iknapnye mutuku noutam, arah utara unyak ninye deiyok nang, sik Raja-Raja nang nirya ap, tonda, tukwak mutuku sirya im sirya nirya unyak ninye deiyok nang ap, sik talinyak nang nirya ati, Allah el yu anggur mek arepsiba dibik. Sirya tam arepsinye bira, Babel mutuku taleamuk ninye deiyoknye, Raja Babel biti, Allah el yu un ning ati, anggur mek arepsiba dibuk.

²⁷ Na lengdar mapmasa talak ara, Allah arye na Yeremia biti, nyapnuk. “Ance amutuku-amutuku nang nirya ati, nyapnulyame. Anggunda, moubuka kekeplulume! Nara, Allah Yahweh, im deice unyak yin talin malaikat nirya, sik deiyoknye unune. Anggun Israel nang arye, ‘Nun ni koproba,’ nyabuka, na siuk erenululume. Nara, pia mikip weiknye birye nyapsine. Anggun nirya ara, na yu weik unulul ning ati, anggur mek dipmunyeba, anggun kanye wangabuka, dukna dukunamlume. Anggun kanye walwal upsiliba, tuku deice poupnamlume. Atalak ara, tonap kum bataknamlume. Ara, na Allah arye, anggun mutuku noutam nirya ara, mal olan ning dopropnamsine. Winipniba, yu nang yakirye, anggun aululum nang nirya ara, opsikiba dipnamlum ning ara, tonap tamubuka, kam kum buknamlume. Pia dibinauk upnamlume.

²⁸ Yeremiao, sik anang arye, an taruk deice talipmalam anggur mek ati, sikce, ‘Kume, nunce aning kum dobuka dipnuyabe,’ tenebikirye, batakicopura, ance sik anang ati, ayupu nyapnulyame. ‘Aning anggur mek ara, dipkoprob dobuka dipnulyame. Deiyok ara, Allah Yahweh, im deice unyak yin talin malaikat nirya, sik deiyoknye Allah Yahweh arye, ‘Anggun diplulume!’ nyapmasila ati, anggur mek arepmasin ning ara, adiparyuk diplulume,’ nyapnulyame.” Allah arye nyapnuk.

²⁹ Nyapnukopura, ayupu ton dukdongobuka nyapnuk. “Anggun nirya moubuka teniplulume! Weik asik, el si Yerusalem mutuku ara, amutuku ati, ninye arye, ‘Ara Allah el mutuku koproba ulule, ‘nyanyake. ‘Naʼ tenen mutuku unyak nang arye, sik malye wininyak ning ati, narye deiyok kibuka, wenepnamne. Sik deice, kanye imun weik ning arepnamnarya! Ati ara, anggun yuk-yuk mutuku noutam ululum nang babye, wenebuka opsinirye, malye kibuka oplopnamsine. Ati ara, anggun amutuku ululum nang arye, ‘Kume, nunda Allah arye, obuka kum wenepnamsile,’ tenepmaluma ara, yata deiyok ati, aning tenepnamlum do? Kume, anggun ton, talye kanye bobuka kum unamlume. Narye, tukwak mutuku sirya, im sirya nirya unyak nang, sik malye-malye wininyak ning ati ara, dipkoprob wenebuka opnamnarya! Winipnamna ati, narye yukupnyopura, yu nang arye, ninye on parang bobikirye, anggun nirya ati, olyanganamsiake. Ati ara, anggun amutuku-amutuku ululum nang nirya babye, na yu ati, anggur mek arepsiniba, dobuka dipnamlume. Anggun nirya, obuka wenepnamsine. Ati ara, na Allah Yahweh, im deice unyak yin talin malaikat nirya, sik deiyoknye unirye, nyapmasina ati, dipkoprob aning nirya, nong kunupnamlarya!” Allah arye nyabuk.

³⁰ Nyabukce, ayupu ton dukdongobuka nyapnuke. “Yeremiao, an dam anyapmakin yupu nirya ara, sik tukwak mutuku, im sirya, mutuku sirya nirya unyak nang kekenak nyalbinulyame. Ara, aminyan talak winipnamle ning ati, laka nyalbinulyame. Abinuka nyapnin banamlam yupu ara, ani. Bai tam kam ulamle ning, el si singa kus, din pataplyeba, yuk talye kam ning obuka dipnulirye, yupu weik nyalamle touk, Allah arye ninye nirya opnamalye talak ara, yupu weik deice arye nyapnamle. Ara, pia mambul lek sukum, im deice tam ululak arye, el yupu ara, liman nyalamle touk uplirye, el mapu koproba bukni, malye wininyak nang nirya ati, wenebuka opnamle. Tonda, Allah el yupu weik nyapnamle talak ara, ninye arye, anggur tapu duk dakuka deibikirye, mek purunamaca ati, yupu weik panalamle touk ubuka, weik yupu arye nyapnamle. Ayupu nyapliba, mutuku sirya, im sirya nirya unyak nang arye, alelim kekepnamake.

³¹ Ninye mutuku sirya, im sirya, unyak nang nirya ara, alelim kekepnamake. Pia yuk mutuku noutam unyak nang babye, im sirya, mutuku sirya, unyak nang babye, alelim kekepnamake. Allah arye tukwak mutuku unyak nang nirya ara, malye unyak ning ati, wenebuka opnamsila ara, ninye yupu bokolinamsile. Ninye tukwak nang nirya ara, winilamik ning dipdesirye, sik malye winilamik nang ati, weneplirye, obuka sirya daknamle. Winipmanto ara, el ninye on parang dobukaplirye, ninye tukwak mutuku unyak nang bukni, malye-malye winilamik nang ati, opliba, dipnamake.

³² Winipnamla ati ara, Allah Yahweh, im deice unyak yin talin malaikat nirya, sik deiyoknye ulirye nyapsile. “Anggun nirya moubuka dinamlume. Weik yinya, tonokak arye dobuka yalirye, amutuku nirya, im dup talye balamle touk, im sirya, mutuku sirya arye, kanye imun weik ning yanamsile. Elce arepliba, kanye imun ning nirya ara, ton mutuku nang talipmalya ani, ton mutuku nang babye, dakdongopdanin balamle uk yala ara, mutuku sirya, im sirya nirya ara, aninguk yala doprobikirye, imun kanye bobuka unamake.

³³ Asum ara, Allah arye mutuku sirya, im sirya nirya unyakce, malye winilamik nang opnamle nang ara, sik nong nirya, tukwak weik uplirye langdipnamle. Ara otam im sirya, ap mutuku sirya, dana-dana tam ap, anoutam ap, ninye weik opliba dipnamak nang, sik nong langdipnamle. Allah arye ninye weik tonun oplyopura, yuk nang arye adipmakce nang ati, eibikirye, ‘Se, sikda bicoeʼ tenen, malye kanye bobuka ukirye, kum engepnamake. Tonda, tonoknye babye, oplopmalye nang, sik nong bobinuka, kum weilbinamake. Anang nong, ‘Daupmalyeʼ tenebuka, opmaliba dipnamak nang, sik nong bobinuka, tuku pum kum weipnamake. Kume, tuku deiceuk batakikiba, talye kam ulul ning, dei siriklopliba, tuku deice lak sukum talye uplirye, tong welelamle atonun, upnamle.

³⁴ Ati ara, se, sik deiyok-deiyok nang nirya ara, bicoe! Anggun nirya ara, engepmunce, uku diplyeba, sice buklopmalyak, tuku deice mapra engenamlume. Winipmanto ara, Allah el domba basam atonun nang, talibuka weilulum nango, Allah el tenebuk sum, akunum kiplyopura, anggun nirya ara, wenebuka opnamsilca. Akumopura, ton nang ara, anggun ulamlum mutuku noutam arye, yakuka donoksiliba, yuk pera sukumuk, sakuka bindopnamlume. Winipmanto ara, kira tuku arye dobuka, teleb uka bikirye deibikiba, urasin pia teleb mek makau memamikiba, tukwak sakuka poulbilirye, colamle touk ubuka, wenepsilirye opnamsile. Ati ara, anggun nirya malye nyabuka, tukwak mabuka ninikmunce, ngalukuka engenamlume.

³⁵ Allah el ‘Naʼ tenen nang ati, deiyok kibuka ululum nang ati, wenepnamsil talak ara, ‘Wenebuka opsilyakʼ tenen, dungnubuka kum bitume. Tonda yuk tam bikbik abuka kum duknulbitume. Sik Yehuda mutuku tam unyak nang kalikina ap, peterena ap, deiyok-deiyok nang nirya ara, wenebuka opsilyopura, dibinauk upnamlume.

³⁶ Anggun nirya moubuka dinamlume! Allah arye, sik domba weina deiyok nang atonun ubuka, ninye talinyaka deiyok nang ati, wenebuka obikcopura, weik tonun engenamake. Alelim ara, anggun nirya bita kekepnamlume! Aning atonun, anggun ululum mutuku noutam, ninye deiyok kibuka unyak nang nirya ati, Allah el yu ubukce, malye kipdeipsukba, sik nirya malye nyabuka, ngalukunyak ning ara, kekepnamlume! Alelim kekenamlum ning ara, talye ati kume!

³⁷ Deiyok ara, sik domba weina deiyok nang atonun ulamik, sik ninye deiyok nang nirya ara, Allah arye, sik malye winilamik ning ati, yu pia weik upliba, weik tonun wenebuka onmala ati, anggun teleb maning pamsukba, mince domba teleb kibuka weilamlum ara, wini talak akunum malye kipdeipnamsile! Winipsilirye, tunim anauk upnamle. Ara, Allah arye, anggun deiyok nang nirya ati, wenebuka opmasile.

³⁸ Ura, Allah elce derepsukce, anggun ulamlum mutuku nirya ara, malye kipdeipmasile. Winipsiliba, anggun mutuku nirya ara, ninye ton una kumce, talye tuku lo dem upnamle. Ara, anggun mal olan nang, ya mikip weik arye, ya sekuka bataksike. Winipmanto ara, bai ulamle singa kus, el ulamlak arye batakuka, ‘Na din ati, kam ning obuka dipnunʼ tenen, yukak balamle touk, “Allah ara, yu weik ubukba, el ulamle mutuku arye batakuka, tukwak mutuku yanuka opsuke. Ara, el mapu dam arye, batakuka biyuka ati, nyapsine. Yeremia birye, sik Yudea mutuku ulamik nang ati, nyabuk.