Yeremia 24 - Eipomek

Lengdar mapmok deice arye dilamukak, kwarang yo duk lin aling bitinye arye, libuka deipmek ning ati, nyabuk yupu

¹ Allah arye na Yeremia biti, lengdar mapmasa deice arye eipse ning ara, ani. Ara, kwarang yo duk lin aling bitinye arye, libuka, Allah si eren aik urasin tam deipmok ning, ‘Eipnulʼ tenen, peterepnukba eipse. Eipse ning ara, Babel mutuku taleamuknye, Raja Nebukadnesar birye, Yehuda mutuku tam taleamuka deiyoknye, Yoyakim, el punubuknye, el mi Raja Yekonya birye, Yerusalem mutuku nirya taleamuk talak, Babel mutuku nang arye, obikce, Yerusalem mutuku ulamik nang tomobuka, sik mutuku tamubuka, delilbinamik talak, aning winibukba eipse. Babel mutuku nang arye, Yehuda mutuku deiyok ning nirya, pemerintah talibuka ulamik nang ap, pil deiyok yuk-yuk talibuka winilamik nang ap, tonda besi ning memena kel nang ap, yuk-yuk urasin teleb ning nirya memena kel nang ap nirya ara, akunum tomobuka, Babel mutuku bobinamikba, lengdar deice arye aning eipse.

² Kwarang yo duk lin aling tonok ning ara, duk pia teleb ninguk, wibuka lipmok. Tonok ning ara, kwarang yo duk malye ning, dipmanto kum ninguk wibuka, lipmok ning deiamokak eipse.

³ Eipmasopura, Allah Yahweh arye, na dam yanuka asipdenuk. “Yeremia, anda yata ning eipmalam do?” nyabuka asipdenuk. Asipnukba, narye tamubuka nyapse. “Naio, narye kwarang duk pia teleb ning ap, tonda pia malye ning, ninye dopmanto kum ning ton, aupmalba eipmane,” nyapse.

⁴ Ati ara, Allah arye, na dam yanuka, ayupu nyapnuke.

⁵ “Yeremiao, nara Allah Yahweh unune. Sik Israel yala nang nirya arye, na si ereninyak Allah unune. Ance eipmalam ning ara, laka nyapnukine. Ara, an eipmalam kwarang duk, pia teleb ning ton, lipdeipmanunguba, eipmanilama ara, winipmanto ning ulule. Deiyok ara, ani. Ance, akwarang duk libuka deipmak, teleb ning ara eipnamlame. Aning atonun, narye lo arepsiba, sik Babel mutuku nang arye yanuka, Yehuda mutuku nang weik tonun tomobuka, sik mutuku akunum tamubuka bobinamike. Narye batakamsiba, aboyanamik nang ati, kanye deibikirye, ‘Sikda tuba teleb uka,’ tenenyake.

⁶ Bukni, narye sik aboyanamik nang ati, aminyan talak tuba teleb kipdeipnamne. Narye sikti, kalekuka dinamne. Winilamya ani, narye anang dobukapnirye, tamubuka amutuku boyanuka deipnamne. Narye sikti, pia teleb kilinamne. Narye sik obuka, batakna ati kuma. Tonda, winipmanto ara, ninye arye, wa wibuka kounyak ning kouamikirye, teleb kibuka kaliklamikirye, kwinibuka kum bataklamaka touk, narye sik Yehuda yala nang bobinamik ati, tuba teleb kipdeipnamne.

⁷ Narye sikti, kanye talima winiryuk ning arepninyeba, sikce na Allah ati, ‘E, nun ni Allah, elda dipkoprob Yahweh, el ukaʼ tenen, moubuka biknamake. Winibikceura, sikda na mapu koproba unamake. Tonda, nara sik ni koproba Allah unamne. Winipyeba, sik malye wininyak ning nirya, batakikcak arye, sik kanye talima nirya ara, dobuka, na deiceuk deibikirye, na siuk erenamniake.

⁸ Bukni, na Allah Yahweh arye, ayupu ton nyapnukine. Aning ton moubuka kekepnulyame. Aning ara, nyapnukine. Ance kwarang duk malye ning, ninye kum dipmanto ning lipdeipmanunguba, eipmalama ning deiyok ara, ani. Ara, narye Yehuda yala nang, taleamuknye, sik deiyoknye Raja Zedekia ap, el amu tam deiyok kibuka ulamik nang ap, sikce talibikba, Yerusalem mutuku tuba ton aunyak nang ap, tonda Israel yala nang bukni, Mesir mutuku binuka unyak nang ap ati, weik ikin ning, sik deice deipnamnarya!

⁹ Na Allah arye, sik anang nirya ati, imun weik ning arepnyeba, yuk mutuku sirya, im sirya nirya unyak nang, eibikirye, ilil uplyeura, ‘Se, sikda pia malye nang unmake,’ tenebuka, kanye delinamake. Narye sik anang wenepnyopura, yuk-yuk mutuku nang arye, anggunti utenenamsiake. ‘Se, sikce malye winilamik ning ara, teleb nang arye kum winiptinge! Sikda, alye weik dakalanamake! Winipyeba, yuk mutuku nang arye sikti, nalibuka akutunamake. Analibuka akutunamak nang arye, sik kayapu yuk nang ati, wanamak talak ara, sikce ayupu nyanamake. “Allah arye Israel nang ati, malye kibukce, supdongobukba, pia malye weik unyak touk, narye anti, malye kipkinirye, pia supkine,” nyabuka nyalanamake. Ara, na Allah arye, sik Yehuda tam unyak nang bataknirye, yakdonoknyeba, yuk-yuk mutuku sakuka dabikirye unamakak nirya ara, amutuku-amutuku unyak nang nirya arye, sik Yehuda mutuku nang ati nyanamake.

¹⁰ Aninguk kum bukni, narye, sik Yehuda mutuku ulamik nang, yuk-yuk mutuku binuka unamak mutuku noutam nirya ara, na Allah arye ninye olan ning deiyokuk arepnyeba, yuk nang ap olanauk wininamake. Tonda, din patan ning arepnyeba, din patana deiceuk unamake. Tonda, ‘Ninye weik tonun diptingʼ tenen, wenen ning, sik dam deipnyopura, sik weik tonun dipnamake. Winipnamne bukni, akunum winipnyopura, yuk-yuk mutuku noutam bukni, sik Yehuda mutuku unamak nang nirya ara, dibuka sirya daknamake. Winibikceba, minop talak, narye sik apu yapu nang ati, ‘Amutuku arepnamsine,’ nyalin yupu deice arye nyalamsa ani, amutuku anggunti arepsise mutuku ara, Yehuda yala nang, ninye tonok babye, tuba kum unamake. Sik nirya kum kipdeipnamnarya! Allah arye nyabukba, na Yeremia birye kekepsirye, asukum sekeipse.