Yeremia 23 - Eipomek

Doryanamle talak ara, Allah arye, el ‘Naʼ tenen, ninye, lyepnamla ati, nyabuk yupu

¹ Allah el si Yahweh arye, Israel ninye sik deiyok kibuka, Israel ninye talinyak nang ati nyabuk. “Se, sikda bicoe. ‘Naʼ tenen Israel ninye ara, malye winilimunba, bai tam sakuka, yuk-yuk banyake. Winipmanto ara, domba basam ilil upliba, bokuka bikbik abuka, yuk-yuk balamak touk wininyake.

² Aning ati ara, na Allah Yahweh arye, Israel ninye ati, pia kalikuka melinune. Israel ninye ati, deiyok talibuka ululum nang nirya ati nyapsine. Anggunda, domba weina deiyok nang arye, sik domba basam teleb ubuka weilamak touk, anang arye, ‘Naʼ tenen, Israel ninye ati melibikirye, ‘Wininamlulume, wininamlume, teleb bisik ani,’ nyabuka, ‘Teleb ubuka melinamake,’ tenelamsise bukni, aning kum winilulume. Anggun deiyok nang arye, ‘Aninye talinyabe,’ nyalulum bukni, aning talye nyaplobuka, kalikina kumce, Israel ninye batakmunba, bokuka yuk-yuk bisikuk binuka, talye-talye balsusunauk unyake. Tonda, anggunce, ‘Nun dam yangana kume, bilulume,’ nyabuka, Israel ninye ati batakalulume. Adeice arye, anggunda pia malye weik winilulume. Dipkopropnye bira, anggunce aninye ati, moubuka kaliklamtumura, telebuk ulamtingca. Bukni, anggunce aning ara, kum winilulume. Ati ara, atalak narye anggun malye winimunya ati, wenebuka ikin ning, anggun nong deice deipnamsine. Na Allah Yahweh arye nyapsine ati, dipkoprob nong upnamle.

³ Narye anggun deiyok-deiyok nang nirya, akunum wenepsinyopura, naryuk na mapu yuk pera mutuku-mutuku nirya, daunyaka noutamak arye dobuka, na dam tamubuka boyanamsine. Ara, sik malye weik winilamikba, sik wenena ati, lo arepsiba, yu mutuku ninye arye bisibuka, tapu koubuka bobinamikce, dabobinuka bataklobikba, yuk-yuk mutuku daunyake. Sik Israel ninye nirya tamubuka, sik mince ulamik mutuku uk, bulubuka boyaniba, amutuku unamake. Winipnyopura, amutuku uk yanuka ukirye, sik mapu deibikirye, dadeipdanin bakiba, ninye pia weik upnin banamake. Na Allah aryuk, aninye bulubuka deipnamne.

⁴ Anggun malye winilamlum deiyok nang ara, Israel ninye ton kum kalikinamlulume. Narye, winiryuk nang wipdeipnirye, sik deiyok kibika talipnamak nang deipniba, sikce Israel ninye talibikirye, kalikinamake. Ara, domba weina deiyok nang arye, sik domba basam ati, teleb ubuka weilamak touk, anang arye Israel ninye ati, teleb ubuka kalikikirye melinamake. Atalak ara, na mapu tonoknye babye, kum wangapnamake. Tonda, ‘Se, yata wiriptibye do?’ tenen, ilil kum unamle. Aning ara, dipkoprob winipnamne. Na Allah Yahweh arye nyapsine anya arye, aning ara nong upnamle.” Allah arye nyabuk.

⁵ Na Allah Yahweh arye nyapne. “Doryanamle talak noutamak ara, Daud birye deibukba dadeipdanin, banyak nang noutamak, ton pia diksukumuk telebuk winilulnye wibuka deipniba, Israel ninye, sik ninye deiyoknye Raja ulirye, Israel ninye pia talinamle. Winiplirye, pia moubuka teleb diksukum winin ninguk teneplirye, weik kel kina arye, aninye talinamle. Elce pia teleb ubuka, aninye talilirye, diksukumuk winibuka, yupu bokeipnamle. Winipnamle deice arye, amutuku noutamak nirya, dipkoprob diksukum winina ap, malye winina kum aniryuk, pia teleb winina ap, pia awininamake.

⁶ Narye wibuka deipnamne Diksukum Una Deiyoknye birye, amutuku talinamle talak ara, Yehuda yala ninye nirya lyepnamle. Tonda, Israel ninye ayala-yala nirya ara, ‘Nun oldan nang arye olyanamsiyak do?’ tenena pia kum diparyuk, talye kanye bobuka, kanye deibikirye, teleb ubuka neika unamake. Ilil una ap, oldana ap, kum unamake. Ninye deiyok kipnamlanye biti ara, nyanamaka ara, ani. Ara, ‘Allah Yahweh ara, nun Diksukum Ulisulul Deiyoknye ulule,’ nyanamake.” Allah arye nyabuk.

⁷ Na Allah Yahweh arye nyapsine. Dipkoprop, doyanamle talak noutamak ara, na tenelamse talak akunum uplibuk, ninye nirya arye, anggun Israel ninye ati nyalamik ning ara, tuba tamubuka, tonap kum nyanamake. Minop talak ara, nyalamik. ‘Anggun Israel ninye ara, Mesir mutuku noutamak, ikin pil aruklamikba, kanye imun deice bolamikba, Allah arye aninye lyebukce, boyasuke. El pia Kam Una Deiyoknye ulule,’ nyalamnik.

⁸ Minop talak ara, ayupu nyalamik bukni, aminyan talak ara, aning batakuka winiryuk yupu nyanamake. Ara, “Sik Israel ninye arye, mapu deiamikba, dadeipdanin yangalamik Israel ninye nirya ara, yuk pera mutuku daulamik bukni, Allah el si Yahweh arye, aninye lyebukce, sik mutuku tamubuka boyayuke. Ara, minop talak malye winilamikba, sik wenena ati dopdeibukba, dana-dana tam pera mutuku noutamak ap, utam pera mutuku noutamak ap, daulamik bukni, Allah lyebukce boyayukura, sik mutuku noutamakuk, teleb ubuka, pia aunamake. Allah ara, pia Kam Una Deiyoknye ulule.” Aninguk nyanamake. Tuba tonap, ‘Allah arye Israel ninye lyebuka, Mesir mutuku noutamak arye boyanamsuke,’ tenebuka kum nyanamake.

Yeremia birye, nabi-nabi nang arye, tilila yupu nyalamikba, ikin kanye bobuka, nyabuk yupu

⁹ Yeremia birye ayupu nyabuk. “Nabi-nabi nang arye, tilila yupu nyan nang ati, na Yeremia birye nyapsine. Allah Yahweh arye, ‘Aminyan talak ara, anggun Israel ninye wenena ati, winibuka wenepnamsil ati, lak nyalbilyame,’ nyanulun yupu kekepnirye, ilil weik uniliba, talima uk dinulule. Tonda, ‘Se,’ tenen, na kanye talima ikin upniliba, ilil ati, na nong nirya sirim talenulule. Winipmanto ara, anggur mek weik arye dipmace nang, kanye wangabikiba, kum binmanto unyak atonun, kisok biribiri abuka, sirim talenulule. Ara, urdem ati kume. Deiyok ara, nun ni Allah, el si Yahweh arye, ‘Winipnamne,’ nyanulun yupu, pia teleb yupu, mambul weik yupu anya arye, ayupu kekepnyopura, ilil weik unulule.”

¹⁰ “Allah arye, amutuku ninye wenepnamsil ning ara, urdem ati kume. Nun unyap mutuku noutamak ara, Allah ati ilil kum ulul ninye weik unyake. Anya arye, Allah arye, ‘Wininamlulume,’ nyapdeibuk yupu batakuka, sikce tenebice ninguk, wininyake. Tonda, talye yolalamak nang weik unyake. Tonda, Allah batakikirye, yuk talye ning atibuk, si eranyake. Winibica deice, Allah arye sikti, yu teneplirye, supdeipsiliba, nun mutuku noutamak ulul ning nirya ara, malyeuk usulule. Aning ati ara, mok kum arisilibuk, kum cepliba, nun mutuku ara, maning ap, talye palamle ning ap nirya ara, sesal seplirye, kolulamle. Sik tilila yupu nyanyak nabi nang arye, wininyak ning nirya ara, pia malyeuk wininyake. Sikda nun deiyok nang unyak bukni, diksukumuk kum wininyakce, ‘Malye ninguk unamabe’ tenekirye, ikin ning weik, nun nong deice delisinyake anya arye, nun mutuku unyap ninye nirya ara, kanye imun deiceuk unyabe.” Yeremia birye nyabuk.

¹¹ Yeremia birye, ayupu ton nyabuk. Allah Yahweh arye nyapsuka ara, ani. “Na yupu laka nyana deiyok nang, sik nabi-nabi nang ap, na si eren aik pum tam, pil dona deiyok nang, sik imam-iman nang ap, sik nirya arye, na yupu moubuka kum talinyakce, malye-malyeuk wininyake. Tonda, na si eren aik pum tam babye, pia malyeuk wininyakba, elinune.

¹² Wininyaka ati ara, sik banyak bisik ara, kunuknak atonun ap, alap bisik atonun ap, opmanto bisikuk banamake. Ara, sik tuba malye wininyaka deice, narye sikti, malye ak dopkwetepniba, sakuka opnamle. Winipmanto ara, ninye arye, malye bisik bakibuk, sik yan dum dukliba saklamak touk, aninye babye, wenepnirye opnamne. Ara, urdem ati kum nyapne. Winibuka malyeuk wininyaka ati ara, na tenyamse talak akunum uplyopura, sik deice ikin ning weik deipnamne. Ara, na tenyamse keting tamun akunum yalyopura, sikti, weik wenena ning arepnamne. Anang ara, opnamna atia. Na Allah Yahweh arye nyapsine ati, aning ara dipkoprob winipnamle.” Allah arye nyabuk.

¹³ Nyabukce, ayupu ton nyabuk. “Samaria mutuku unyak nabi-nabi, sik malye wininyak ning ara, akunum elinune. Sik tilila nabi nang arye, Isa Mutuku Dongonye, el si Bahal, aisa si erebikirye, el mikip deice arye, ‘Aminyan upnamle ning ani, anye,’ nyabuka, tilila yupu nyanyake. Wininyaka deice, na mapu Israel ninye arye, sik tilila yupu kekebuka, dib tenebikirye, malye bisikuk dobolbanyake. Aning ara, na pia like.

¹⁴ Sik Samaria mutuku unyak nabi-nabi nang arye, malye wininyak bukni, Yerusalem mutuku unyak nabi-nabi ara, pia weik malye winikiba elinune. Ara, sikce tilila yupu deice nyanyake. Tonda dopdanamikce kilapu batakikirye, yuk kilapu talye-talye yolanyake. Atonun ton, malye ning winilamice nang ati, wenena kum diparyuk, anang ati melibikibuk, amalye wininyak nang ara, weik arye tonap tabakuka malyeuk wininyake. Nabi nang arye, sik pil teleb ubuka kum donyaka ati ara, amutuku malye wininyak ninye nirya ara, sik malye ning kum batakanyake. Tuba malyeuk wininyake. Wininyaka deice, tonoknye babye diksukum ton kum wininyake. Wininyaka anya arye, na Allah arye tenenya ara, pia malye wininyake. Sikda Sodom mutuku ulamik ninye ap, Gomora mutuku ulamik ninye ap, pia malyeuk winilamik atonun wininyake. Aning ara, na pia like.” Allah arye nyabuk.

¹⁵ Nyabukce, ayupu ton nyabuk. “Nara Allah Yahweh, aning-aning nirya talinirye, im deice yin talin malaikat nirya, sik weik Deiyoknye unune. Nara mikip weiknye birye nyapsine. Anggun malye-malye ubuka, tilila yupu nyalulum nabi-nabi ati ara, weik arye wenebuka opnamsine. Winipmanto ara, sik lelamle ning arepneba denamlume. Tonda, ninye dipna deiyok ning ap, mek ap tabakuka arebikiba, dibikirye dibilamak touk, ninye dipna ning arepsinyopura, anggun dipnamlume. Wininamluma ara, talye ati kume. Ara, sik Yerusalem mutuku unyak tilila yupu nyanyak nabi-nabi nang arye, malye weik wininyaka deice arye, na mapu amutuku unyak Israel ninye nirya, aning eibuka kekebikirye, na batakuka, na si kum erepnikirye, pia malye ninguk wininyaka ati nyapsine.” Allah arye nyabuk.

¹⁶ “Nara Allah Yahweh, aning-aning ap, im deice yin talin malaikat nirya ap, sik weik deiyoknye unune. Nara, weik erena ap, mikip weik ap, uninye birye nyapsine. Amutuku noutamak ululum Israel ninye, ayala-yala nirya ati nyapsine. Tilila yupu nyanyak nabi-nabi arye, anggun nong deice kum upnamle yupu nyalisinyak ning ara, kum kekenamlume. Sikce, ‘Aminyan talak ara, winipnamsile,’ nyanyak bukni, atilila yupu ara, pia kekena kume. Sikce nyalisinyak ning ara, sik bidamang aryuk, ‘Aning nyapnamabe’ tenen, kintinipmace ninguk, talye yupu nyasinyake. Ara, na Allah Yahweh arye, ‘Nyapnamlume,’ nyapdeipse ning ara, yanuka kum nyalisinyake. Sikce, sik kanye aryuk nyanyake.”

¹⁷ Na Allah arye nyapse yupu ati ara, atilila nabi nang arye, ‘Ayupu ara nun like, kum kekenamabe,’ tenenyak nang ara, sikce nyanyake. “Kume, anggun malye wininmaluma babye, Allah arye talye lyepnamsile. Dipkopropnye bira, Israel ninye malye wininyak bukni, anabi nang arye, ‘Kume, amutuku winipnamsil ning ara, telebuk unamsile,’ nyanyake. Tonda, na yupu nyapse ning kum kekenyakce, sik bidamang kanye noutamak tenenyak ning talibuka, mandipna kanye bobuka, weik ulul ninye ati, nyanyake. “Kume, malye winilalum babye, Allah kum wenepnamsile anya arye, anggun dam ara, ikin ning kum yanamsile. Telebuk unamlume,” nyanyake. Ayupu nyanyak ara, na Allah arye kum nyapdeipse, tilila yupu uk nyanyake. Allah arye nyabuk.

¹⁸ Yeremia birye nyabuk. “Anggun tilila yupu nyalulum nabi-nabi ap, yuk ninye ap kekeplulume. Allah el si Yahweh arye, el kanye noutamak ap, el talima noutamak ap, tenelul ning ara, yatanye birye kel biktu do? Allah arye nyalul yupu ara, yatanye birye talye lukparabuka kekeptu do? Tonda, Allah arye winilul ning ara, yatanye birye talye eiptu do? Tonda Allah arye, ‘Aning ara winipnamne. Aning ara, kum winipnamne,’ tenelirye, kintinibuk ning ara, talye ninye arye kum kekebuka kel biktinge. Tonda, Allah arye tenelye ning ara, talye laka kum nyaptinge.

¹⁹ Anggun nirya moubuka dipdelulume. Allah Yahweh arye, sik malye wininyak ninye ati, yu tenelul ning ara, kumanya balamle atonun ubuka, sik aninye deice, ikin ning yangalule. Anggun malye-malyeuk winilulum ninye ara, Allah el yu arye, wenepnamsil ning ara, anggun nong deice talye karin arye yanuka opnamsile.

²⁰ Allah Yahweh ara, el yu ubukba, ‘Amalyeuk wininyak ninye ara, wenebuka opnamne’ tenen, kintinibuk ning ara, pia kum bataknamle. Kume, Allah arye, ‘Winipnamne,’ tenelamuk touk, aning nirya ara, akunum uplirye, sirya daklyeura, bataknamle bukni, aning nirya min kum winipmalye talak ara, dipkoprob kum bataknamle. Wini talak ara, moubuka kel kum biknamlum bukni, doyanamle talak, sirya talak ara, Allah el mapu nirya ara, ‘E, deiyok ani,’ tenen, pia moubuka kel biknamake.” Yeremia birye nyabuk.

²¹ Allah arye nyabuk. “Sik tilila yupu nyanyak nabi-nabi ati, ‘Anggunda apil, apil donamnulume,’ nyabuka, kum dopdeipse bukni, sik bidamang kanye aryuk, amutuku-amutuku bikbik abuka balamik. Tonda, narye sik tilila nabi nang ati, ‘Ayupu nyanamlume,’ kum nyapdeiamse bukni, sik bidamang kanye aryuk, ‘Aminyan talak ara, winipnamle, winipnamle,’ nyabuka, laka nyalbalamik. Narye, ‘Apil ton dolbinamlume,’ kum nyapse. Sikda, sikce tenebuka nyasinyak bukni, narye ton, sik anang deice kum nyalinune.

²² Bukni, sik anang arye, na tenenun ning, laka nyamtiniba, kel bikamting toura, diba na mapu Israel ninye damak, na nyapmatinye yupu nirya ara, laka nyalamtinge. Dipkoprop aninguk laka nyapdeiamtingopura, Israel ninye ayupu kekelamtingce, sik malye wininyak ning nirya batakuka, na damuk tamubuka yangalamting bukni, sik atilila yupu nyanyak nabi-nabi arye, talye tilila yupu uk, laka nyapra balamike.” Allah arye nyabuk.

Allah Yahweh arye, el bidamnye ati, laka nyabuk yupu

²³ Allah el si Yahweh arye nyabuk. “Anggun nirya tenipdelulume. Na Allah ara, mining damuk unun do? Diba, dam unun bukni, pia pera mutuku noutamak babye, kum unun do? Mining dam ning ap, pera mutuku ulye ning ap nirya ara, moubuka kum elinun do? Kume, aning-aning nirya moubuka dinune.

²⁴ Ati ara, yatanye birye, ‘Kume, na dungnupnyopura, Allah arye na wininye ning kum eipnamnile,’ tenelul do? Kume, na Allah Yahweh ara, im deice babye, tukwak mutuku nirya babye, aununa anya arye, aning-aning nirya dinune. Ati ara, tonoknye babye, ton kum duknuptue. Anirya dinauk ununa anya arye, dungnuptuma babye, eilisunune.

²⁵ Tonda, tilila yupu nyana nabi-nabi nang arye, nyanyak yupu nirya ara, akunum kekenune. Ara, sikce nyanyake, ‘Nun lengdar mabupu deice arye, Allah arye yanuka nyapdeipsukba, anggun dam yanuka nyapsiyabe,’ nyabuka, nyaltakanyake. Talye nyaplobuka, tilila yupu nyalinyak ning ara, na ton kekenune. Narye ayupu kum nyapse bukni, sik tilila nabi-nabi, nang arye, talye nyaltakanyake.

²⁶ Se, atilila yupu peterena nabi-nabi nang ara, pia nyapnin balamica ani, dan talak arye bataknamak do? Pia tilila yupu nyanauk unamak do? Ara, narye kum nyapse bukni, sikcuk tenebuka, tilila yupu uk, laka nyanyak nabi-nabi nang ati nyapsine. Dan talak arye, sik malye wininyak ning batakikirye, sik kanye talima, na damak tamubuka yanamak do? Yata talak arye ton, pia tililauk nyapnamak do?

²⁷ Sik anang arye tenenyak ning ara, ani. Nun lengdar mapmap ning bobuka, Israel ninye sik dam nukibiba kekebikirye, ‘Israel ninye ara, Allah arye nyapdeibuk ning lubakipnamak’ tenen, nyasinyake. Ara, anggun deiyok nang winilamik atonun, na si lubakiamnikce, Isa Mutuku Dongonye, el si Bahal si erelamik touk, wini talak unyak ninye babye, ‘Na bataknikirye, yuk talye ning si erebuka, pia aunamak do?’ tenen, nyapne.

²⁸ Ati nyapsine. Sik tilila nabi-nabi nang arye, ‘Lengdar mapsa deice, Allah arye yanuka nyapmanu yupu ara, ani,’ tenebikirye, nyapnamak nang ara, danyanamakca. Bukni, ton nabi-nabi nang ara, dipkoprob narye yupu nyapdeipniba, laka nyapnamak nabi-nabi nang ara, ‘Narye, nyanamlyame,’ nyapdeiamse touk, kum bataknamaka ati, sikce diksukum yupu uk nyalamtinge. Winipmanto ara, ninye arye dipmanto ning, el si gandum ara, talye palamle ning mutmuta atonun kum ulule. Aning bitinye atonun kum ulule. Atouk, narye nyasinye yupu ap, tilila nabi-nabi nang arye talye nyaltakanyak yupu ap, atonun kum ulule. Ati, ‘Sikce nyasikce yupu ara, dipkoprob do, tilila ning do?’ tenen, pia moubuka teninamlume. Na Allah Yahweh arye nyapsine.” Allah arye nyabuk.

²⁹ Anggun kele, na Allah Yahweh arye nyalisunun yupu ati, winipmanto yupu nyapsine. Ara, narye nyasinye yupu ara, uku dilamle atonun ulule. Tonda, narye nyasinye yupu ara, kat besi ning, el si martalok dobuka, weik keil sibikiba, teleb uka poulamle atonun ulule. Na yupu ara, dipkoprob mikip weik ulula ati, nyapsine.

³⁰ Ati ara, na Allah Yahweh arye nyapsine. Ton tilila nabi nang arye, sik kanye aryuk, ‘Aminyan winipnamsile,’ nyabuka nyakiba, sik kayapu nang kekebikirye, ayupu uk doprobikirye, sikce, yuk ninye ati, ayupu uk, sik dam laka nyalbanyake. Sikce, ‘Allah arye nyapsuk yupu ara, ani,’ nyabuka, talye nyaltakanyak bukni, sik kayapu nang aryuk nyapmek buk, kekebik ning ara, ayupu uk nyanyake. Na Allah ara, atilila yupu talye nyaltakanyak nabi-nabi nirya ara, na lik anya arye, anang ara, narye wenebuka opnamne.

³¹ Ati ara, sik tilila yupu nyanyak nabi nang arye, sik kayapu nang ati, ‘E, winira nunce ayupu laka nyanamabe, ayupu ton laka nyanamabe,’ nyabuka, yupu talikirye, sik bidamang kanye aryuk tenenyak yupu uk nyalakirye, laka nyalbanyake. Sikce, nunti, ‘Allah arye yanuka nyapsukba, yanuka nyapsiyabe,’ nyabuka, nyanyak bukni, dipkoprob tilila yupu uk, nyanyake. Na Allah ara, atilila yupu talye nyaltakanyak nabi-nabi nirya ara, na lik anya arye, wenebuka opnamne.

³² Nara, Allah Yahweh arye nyasunune. Tilila yupu laka nyana nabi-nabi arye, ‘Lengdar mabupu talak ara, Allah arye yanuka nyapmasuk yupu ara, ani,’ nyabuka, yuk ninye dam yanuka, nyaltakanyak nang nirya ara, na like. Atilila yupu nyanyak nang arye, na mapu ati, ayupu nyabikibuk, kekebikirye, dib tenebiceura, amalye bisikuk dobolbanyake. Sikce tilila yupu nyanyak bukni, ‘Aminyan talak ara, yata wiripnamsil do?’ pia kum tenenyake. Talye lukparabuka, tilila yupu uk, nyaltakanyake. Narye ton, sik anabi-nabi nang, sik dam binuka kum nyalinune. Sik kanye aryuk nyanyake. Tonda, ‘Na yupu dobuka laka nyalbinamlyame,’ nyabuka, narye anang ati, wibuka kum deipse. Sikda dipkoprob talye yupu uk, na mapu Israel ninye dam, laka nyanyake. Winica deice arye, na mapu ati, teleb ubuka, pia kum melinyake. Malyeuk winilinyake. Ati, nara Allah Yahweh arye, anang ara wenebuka opnamne, nyapne. “Na Allah Yahweh arye nyapsin ati, dipkoprob nong upnamle,” nyabuk.

Allah arye, tilila yupu nyanyak nabi-nabi nang ap, sikce tilila yupu nyanyak ning ap ati, nyabuk yupu

³³ Allah arye Yeremia biti, nyabuk. Yeremia, na mutuku unyak nang, tonok-tonok nang ton, an dam yakirye, asipnamkiyake. Ara, tonok-tonok nang arye do, tonda dotalak winipnamle ning ati, narye nyaipneba, laka nyana deiyok nang noutamak, nabinye birye do? Akumopura, na si eren aik pum tam, pil dona deiyok nang noutamak, imamnye birye do, an dam yakirye asipnamkiyake. Ara, nyapnamkiyake, “An dam ton, Allah Yahweh arye, dotalak ikin ning yanuka, wininamsil ning ati, an dam yanuka nyalinmakil yupu ara, yatato yupu nyapdeiamkuk do?” nyabuka, sik anang arye yanuka, asipdekicopura, ance tamubuka, sik anang ati nyapnulyame. “Allah arye, dotalak ikin ning, nun damak yanamle ning ati, na dam nyapdeipnuk yupu ara, yuk yupu kume. Ikin ning upnamsil ning ara, anggun malye winilulum nang atibuk, nyapmanile. Ati ara, Allah Yahweh arye anggunti, wenepsilirye, yukak donoknamsile,” nyapnalyame.

³⁴ Tonda, Yeremia, yatanye birye do nirya, tonok-tonok nang ton, amutuku unyak nang arye do, dotalak winipnamle ning ati, narye nyaipneba, laka nyana deiyok nang noutamak, nabi nang arye do? Akumopura, na si eren aik pum tam, pil dona deiyok nang noutamak, imamnye birye do, an dam yakirye, “Allah Yahweh arye, aminyan talak ara, winipnamle ning ati, na dam yanuka mambul yupu nyapdeipmasile,” nyapkicopura, na dipkoprob nyapne. Ance, sik anang nyapnamkiyak yupu kekena kume. Ayupu nyanyak nang ap, sik bona nirya ara, na Allah Yahweh arye, wenebuka opnamne.

³⁵ Wini talak arye, dipdongobuka dorunamle talak ara, anggun Israel ninye nirya arye, tuba-tuba aninguk nyalanamlulume. Anggun nirya arye, anggun mapu silip nirya ap, sik kayapu nang nirya ap ati, asildanamlulume. “Allah Yahweh arye, yata yupu nyapmasil do? Tonda, nunce Allah ati, asipdeipu ning ara, Allah Yahweh arye, yupu ton tamubuka nyapdeipmasil do, kum do?” nyabuka, asildanamlulume.

³⁶ Anggun nirya arye, anyapmasin atonun yupu nyana ara, teleb uka. Bukni, anggun Israel ninye nirya arye, anyapnukin yupu ara, tonap kum nyanamlulume. Ara, ‘Allah Yahweh arye, dotalak winipnamle ning ati, duknuna yupu deice arye, el yupu yanuka nyapdeipmanilba, nyapnusine,’ kum nyanamlulume. Ayupu tuba kum nyanamluma deiyok ara, ani. Ara, sik Israel ninye arye, sikce nyanyak yupu nirya ara, dipkoprop, sik kanye talima noutamak aryuk, teninmace ninguk, yuk ninye kekenak laka nyalbanyake. Anyanyak yupu ara, na Allah Yahweh arye tenebuka, sikti, kum nyalinun bukni, sikcuk talye nyaltakanyake. Ara, yuk nang dam binuka, ‘Allah arye nyaipmanil yupu ani,’ nyabibibuk, ‘Anang arye dib tenepsikirye, ‘Se, anang ara, weik mambul nang unyake,’ tenenamsiyak’ tenen, talye-talye yupu nyalbanyake. Sikcuk tenepmace ninguk, nyanyaka deice arye, na Allah arye nyanun yupu ara, tamubikirye, yaninyake. Ati ara, talye ati kum nyapsine. Ayupu nyanyak nang, sik nong deice ara, weik ikin ning deipnamne. Na Allah arye, pia Kam Una Deiyoknye birye nyapsine. Tonda, nara sik im deice yin talin malaikat nirya, sik weik deiyoknye birye nyapkine. Na Allah Yahweh arye, sik Israel ninye nirya talibuka, deice tam mikip weik ap, weik erena ap ununye birye, an Yeremia biti nyapkine.

³⁷ Ati ara, ance, na yupu nyaipneba, laka nyana deiyok nang, nabi-nabi nang ati, nyanamlyame. “Nunce, Allah ati asipdeipu ning ara, nun ni koproba Allah Yahweh arye nunti, yatato yupu tamubuka nyapkuk do?” nyabuka asipnamlyame. Tonda, “Nun ni koproba Allah arye, anggun dam ara, yatato yupu nyapdeiamsuk do?” nyabuka asipdenamlyame.

³⁸ Ance anggun anang ati, anyapmakin touk nyabuka asipdeminba, sikce tamubuka, “Kume, Allah Yahweh arye, aminyan winipnamle ning ati, ayupu akunum nyapdeipmasil yupu ton, aupmalba nyapnukiyabe,” nyabuka nyapkiceura, ance utenenamlyame. ‘Sik ayupu atonun nyanyak nang ara, Allah arye nyapdeibuk yupu moubuka, kum talibuka unyak nang arye nyasinyake,’ tenenamlyame. Ati, aninye ak tamubuka nyanamlame. “Dipkoprop nun ni koprop, Allah Yahweh arye nyapkile. Anggun arye, ‘Allah Yahweh ara, doyanamle talak winipnamle ning ati, yupu nyapdeipsile,’ nyabuka, talye nyaplopmanuluma ara, anggunce tenepmalum yupu uk, nyanmaluma anya arye, pia malye nyapmalume. Allah arye anggunti, ‘Ayupu nyana ara, meme,’ akunum nyapdeipsuk bukni, aning tenena kum arye, anggunce ayupu talye lukparabuka nyapmaluma ati ara, Allah arye wenepnamsile.”

³⁹ Allah el si Yahweh arye, anggunti nyasulule. “Nara Allah Yahweh unune. Anggun tuba malyeuk nyaluluma anya arye, narye anggunti, ton kum teninamsine. Narye anggunti, na dam arye yankuka, pera mutuku bokwetepnamsine. Na damak, ton kum yanganamnulume. Tonda, Yerusalem mutuku noutamak arye dobuka, pia pera mutuku donoknamsine. Wini talak aunmalum mutuku ara, minop talak narye anggun deiyok nang ati areamse bukni, wini talak ara, anggun malye winilulum ninye ara, na dam ap, Yerusalem mutuku dam ara, kum yanganamnulume. Anggun ti, akunum bataksine.

⁴⁰ Na Allah arye, Yerusalem mutuku unyak ninye nirya ara, weik ikin ning arepneba, yuk-yuk mutuku nang arye, sikti, nalibuka akutunamake. Atalak ara, yuk pera mutuku unyak ninye nirya arye, anggun Israel ninye ati, ‘Se, aninye ara, pia malye ninguk talibuka winilamikba, sik ni koprop Allah arye, sik wenena ati, weik ikin ning arebuka anya arye, anang ara nun like,’ tenenamsiyake. Aning kum bataknamsiyak bukni, aketing tamun, aketing tamun nirya, doyanamle talak noutamak nirya, aning pia tenibuka nyanamsiake.” Allah Yahweh arye, Israel ninye ati, Yeremia dam yanuka nyapdeibukba, ayupu sekdeibuk.