Yeremia 21 - Eipomek

Babel mutuku nang arye, Yerusalem mutuku ninye opnamika ati, nyabuk yupu

¹ Yehuda mutuku talibuka ulamuknye, Raja Zedekia birye, bitinye nang wibuka, nabi Yeremia dam dopdeibuk. Anang sik si ara ani. Ara, Allah el si eren aik pum tam pil dolamuknye, imam Zefanya ap, tonda ninye si Malkia, elce deiamuknye Pasyur ap dopdeibuk. Imam Zefanya, el li koproba si ara, Maseya ulamuk. Pasyur el li koproba si ara, Malkia ulamuk. Raja Zedekia birye, anang bitinye wibuka, “Nabi Yeremia dam binuka asipdenamrume,” nyapdeibukba, sikce na Yeremia dam yupu nyalyanirike. Raja Zedekia birye, sik anang bitinye ati, nyapdeibukba, na dam morolyanirik yupu ara, ani.

² “Yeremiao, ‘Ance, Allah Yahweh ati asipdetumʼ tenen, moropkiyabe. Ara, nun Yerusalem mutuku unyap nang ara, yata wiripnamap do? Deiyok ara, Babel mutuku tam talibuka ulul ninye deiyoknye, el si Nebukadnesar, el ap, el yin talin nang ap, yanmakce, ‘Yerusalem mutuku nang opnamapʼ tenen, nun unyap mutuku dam yanuka warekmasiake. Ati, ‘Allah Yahweh arye, nun melibuka lyena ati, nun deice winipman kum pil dopsutua deice arye, Raja Nebukadnesar ap, el yin talin nang ap ara, namin kipturye, bataksitingba, sik mutuku tamubuka bitingeʼ tenen, ati moropmabe. Allah Yahweh arye, minop talak noutam, yata wiribukabarye talak ton, winipman kum pil domsuk deice arye lyepromsuka ati, ‘Aning ara, tuba tonap winipsutuʼ tenen, moropmabe. Ati, anda Yeremia birye nun melina ati, Allah dam moropnusilyame.” Yehuda mutuku tam ninye deiyoknye, Zedekia birye, ayupu nyapdeibukba, elce dopdeibuk bitinye nang arye, nabi Yeremia dam nyalbidik.

³ Atalak ara, abitinye nang arye, Yeremia dam yanuka, ayupu nyabuka asipderikba, nabi Yeremia birye, ayanmarik nang ati, tamubuka nyabuk.

⁴ “Anggunce Raja Zedekia biti binuka nyapnururume. Ayupu ara, ani. Nun Israel nang arye si erenyap Allah, el si Yahweh arye, ayupu akunum nyapdeipmasile. ‘Raja Zedekiao, an yin talin nang nirya arye, ‘Raja Babel ap, el yin talin nang ati, opnamapʼ tenen, bopmakce ninye, on ning nirya ara, narye pil dopneba, an tam yin nang arye bopmakce yin ap, ninye on ning, yuk ning nirya ara, tamubuka Yerusalem mutuku weik asik noutamuk yanamake. Ara, sik Kasdim mutuku yin talin nang arye, ‘Yerusalem mutuku noutam wekibirye, amutuku nang malye kibuka opnamapʼ tenen, anggun Yerusalem mutuku, weik asik dana-dana tam antanap dongobuka doamlum cang keil poka, bai tam warekmasikiba, anggun Yerusalem nang arye, onmamunye bukni, narye pil dopnyopura, aning batakmunce, anggunce bopmamunye ninye, on ning nirya bobuka, Yerusalem asik noutamuk deiplopnamlume.

⁵ Dipkoprop nyapsine. Nara Allah, naryuk, anggun Yerusalem mutuku ululum nang ati, opnamsine! Ara, na mikip weik taruk deice aryuk, anggunti yanuka opnamsine. Tonda, tuba-tuba narye anggunti, yu weik unulul ning ara, pia weik tonun, mek langdilamle atonun unulule. Narye anggunti, yu weik unulula ati, derepsinirye, wenebuka oplopnamsine.

⁶ Narye anggunti, yu weik unulula ati, amutuku noutam weik asik dobuka ululum nang nirya ara, obuka sirya daknamsine. Ara, minop talak, naryuk arepniba, kanye imun weik ulamle uk ara, tonye talipliba, tonye babye dakalongolamak uk deiyok ning ara, anggun dam yalyopura, anggun amutuku ululum nang nirya ap, tonda anggunce weilulum talye kam un ning ap, pia weik dipnamake.

⁷ Narye, anggun Yerusalem nang nirya ati bataksiniba, anggun mal olan nang arye yanuka, anggun amutuku nang weik tam ara, opnamsiake. Tonda, narye anggun wenena ati, kwaning patana weik li arepniba, kwaning patana deice arye, ninye weik dipnamake. Tonda, narye arepniba, imun kanye bona weik uk dinamla deice arye, ninye weik tonun ton dipnamake. Bukni, akanye imun ning nirya deice arye, kum dipnamak nang ap, mal olanak arye obikce bukni, kum dipnamak nang, Yehuda tam talilul Raja Zedekia ap, el amu tam pil donyaka deiyok-deiyok nang nirya ara, Babel mutuku ninye deiyoknye Raja Nebukadnesar birye, yanuka tomopnamsile. Elce tomopnamle nang nirya ara, elce sikti, bico kum tenenamla ati, elce, ‘Anang ara, ikin weik unyaka ati, akunum bataknamne,’ pia kum tenenamsile. Ayupu ara, Allah Yahweh arye, ‘Aning nirya ara, akunum nyapdeipmasila ati ara, aning dipkoprob winipnamle.' Yeremia birye sik bitinye nang ati nyabuk.

⁸ Nyabukopura, ayupu ton dukdongobuka nyabuk. Tonda, sik bitinye nang arye, Yehuda tam unyak nang nirya ati, ayupu ton laka nyalbinamrurume. Ara ani. Allah Yahweh arye, anggun Israel yala nang ati nyapsile. “Na mapu anggun Israel nang ara, moubuka kekepnamnulume. Ara, wini talak ara, dibin bisik ban nang ap, tonda kam un bisik ban nang ap, lak sukum arye, anggun deice deipnusina ati, ‘Dan tam bisik wipnamlum do?’ Moubuka tenipmunce, wipnamlume.

⁹ Weik asik domik mutuku, Yerusalem mutuku tuba unamak nang nirya ara, narye sik wenena ati arepniba, kanye imun weik deice arye dipnamlume. Ara, ton nang ara, din patana weik deice arye, ninye weik tonun dipnamlume. Ton nang ara, imun kanye weik bon uk, naryuk arepniba, kanye imun weik ulamle uk ara, tonye talipliba, tonye babye dakalongolamak uk deiyok ning ara, anggun dam yalyopura, uk dipnamla deice arye, ninye weik tonun ton dipnamake. Aning deice arye, kum dipnamlum nang, kam tuba unamak nang ara, mal olan deice arye, ninye weik tonun ton dipnamlume. Bukni, anggun aweik asik domumnye sukum, uk tuba unyak nang kan-kan arye, Yerusalem mutuku asik batakuka bikirye, anggun mal olan nang, Raja Babel biti, “Nunda, anggun ap kum olanamaba ati, anggunce datalipsululume. Anggun amu tamuk unamabe!” nyabikce nang ara, el yin nang arye obikiba, kum dipnamake. Raja Babel birye tomopnamsil bukni, anggun tuba kam unamluma ara, teleb uka. Winipmanto ara, yin nang arye, yuk mutuku nang obikirye, sirya dakikcopura, sik atam nang talilamik bona nirya, alubuka dololamak touk, Babel nang arye, kum opsikiba, anggun tuba kam unamlum nang ara, sikce bobuka, sik mutuku bobinamsiake.

¹⁰ Yerusalem mutuku weik asik dobuka ululum nang, obuka sirya daknamsiak ning ara, na Allah Yahweh arye, ‘Aning nirya ara, anang ati arepnamneʼ tenen, akunum kintinip deipse. Tonda, ‘Aminyan talak teleb unamakʼ tenena kumce, ‘Atalak ara, kanye imun weik ning arepnamsine,’ tenen, akunum kintinibuka deipsa ati, aning nirya ara, dipkoprob winipnamsilarya. Narye anggunti, bico kum tenepnamsine. Anyasik dobuka ululum nang ara, narye anggun dopropsinirye, anggun mal olan nang, Babel mutuku deiyoknye, el deice deipnamsine. Winipsilyeba, elce aulamlumak nirya ara, uku dongobuka, sirya daknamsile. Allah Yahweh arye, ayupu ara, akunum nyapdeibuka ati, anggunce Yehuda mutuku nang ati, laka nyalbinamrurume. Nabi Yeremia birye, el dam yanmarik nang ati, nyabuk.

Allah arye, ‘Yehuda mutuku unyak nang ati, deiyok kibuka, talin nang wenepnamne,’ nyabuk yupu

¹¹ Nabi Yeremia birye, ayupu ton dukdongobuka nyabuk. Allah Yahweh arye, na Yeremia biti, nyapnuk yupu ara ani. “Ance na nyapkin yupu bobinuka, Yehuda yala nang ati, ninye deiyok kibuka, talinyak nang ati, nyalbinulyame. Ara, Raja Daud birye deiamukba, dadeipdanin yangalamikce, deiyok kibuka talinyak deiyok-deiyok nang, sik kekenakuk binuka, laka nyapnulyame. Sikda, Allah Yahweh arye, ‘Anang sik wenena ati, winipnamne ning ara ani,’ nyapdeipsuk yupu, moubuka kekeplulume.

¹² Raja Daud birye deiamukba, dadeipdanin yangakirye, deiyok kibuka, talilulum nang nirya ara, diksukum un ninguk wininamlume. Ara, asum-asum nirya, pia pi dobuka, teleb piluk donamlume. Mikip ukirye, sik amu tam talinyak nang, sik ning dopropnamakca ati, anang ikin ning deibikirye dolonyak ning ara, anggun deiyok nang arye, teleb kibuka, yupu lipsisikmunce, amalye unyaka ara, bataknamake. Asum-asum nirya ara, ninye yupu teleb kibuka lipsisikuka bokeipnamlume. Aning tuba kum winipmunyopura, anggun amalye upmunya deice arye, na Allah ara, anggun malye tuba winimunya ati, na yu weik unulul ning ara, uku buk weik dilamle atonun unilirye, anggun malye winilulum nang ati, auku dipnamsile. Anggun tuba malye winilulum ning ati, yu weik upniliba, uku buk dilamle touk ning ara, min kume, kum danapnamle. Pia dinauk upliba, anggun nirya dibuka, sirya daknamsine.

¹³ Anggun nirya moubuka kekepnululume! Anggun mutuku deiyok dam, weik luak ululum nang ati, narye wenebuka opnamsine. Aning atonun, anggun mutuku kon deice, weik pala keil deice ululum nang babye, narye wenebuka opnamsine. Min talak ara, anggunce, “Kume nunda, pia mikip weik unyaba ati, yuk nang arye yanuka, kum opsitinge. Tonda, ‘Nun mal olan nang yanuka opsicakʼ tenen, cang keil poka dobupe ning ara, yuk nang arye yanuka, ulubikirye, wekuka kum opsitinge,” nyabuka, maknya kintibuka kwalilamlum bukni, na Allah arye, anggun nirya ati, malye kipsinirye, wenebuka opnamsine.

¹⁴ Na Allah arye, anggun malye winilulum ning nirya, eibuka biksa ati, anggun malye winilamlum ning weik aulule atonun, nara weik tonun, wenebuka opnamsine. Winipmanto ara, ninye arye akunum koulyamlye yo kan-kan noutam, uku sekikiba, auku arye, asukum wamlye ning nirya ara, uku arye dibuka, sirya daklamle touk, na Allah Yahweh arye, anggunti, wenebuka opsinirye, sirya daknamsine. Allah arye nyabuk.