Yeremia 20 - Eipomek

Yeremia ap, Allah el si eren aik pum tam, pil dona deiyoknye, el si Pasyur ap, nyapdarik yupu

¹ Tonoknye, el si Imer, el mi Pasyur, amutuku ulamuk. Pasyur bira, Allah Yahweh, el si eren aik pum tam, pil dona deiyoknye ulamuk. Yeremia birye, Allah nyapdeibuk yupu laka nyanmokba, Pasyur ton kekenmok.

² Pasyur ayupu akunum kekebukopura, Allah el yupu lak nyananye, nabi Yeremia biti, el taruk arye obuk. Obukce, ninye yuk nang ati, “Anggun adiparyuk, anye bira tomobuka tapu koupmunce, Benyamin yala nang, sik Allah pil dopnuca ati, Allah el si eren aik wekelbace aik, bisik bublan dam binuka, kirikdeipmunce, wenepnalume,” nyapdeibukba, Yeremia tomobikce, tapu koubuka, wenena aik dongobik.

³ Pasyur birye nyapdeibukura, tomobuka tapu koubikce, wenena aik deibuka mapmeka, berekukopura, Pasyur birye, el kayapu nang ati, “Lopdeiplulume,” nyabukba, akunum lopdongobik talak ara, Yeremia birye, Pasyur biti nyabuk. “Allah el si Yahweh arye, an si ara Pasyur nyabuka, si arepkukba, ninye arye nyalamkik bukni, wini talak ara, an si Pasyur ton kum nyapnamkiyake. Wini talak ara, an si ara, ‘Magor-Misabib,’ nyapkine. Asi nyapkine deiyok ara, ‘Dana-dana tam nirya arye, ilil un ning yanganamkile,’ nyapkine.” Yeremia birye, Pasyur biti nyabuk.

⁴ Allah arye, anti winiryuk si arepmakila ara, urdem ati kume. Deiyok ani. Allah el si Yahweh arye, anti ayupu nyapkile. Na Allah arye, an damak, pia ilil un ning arenamkine. Tonda, an kayapu nang damak, ilil un ning arenamne. Weik kanye imun ning, sik damak deipne talak ara, sik mal olan ninye arye, parang ya dobuka yakirye, an kayapu nang nirya ati, opnamake. Sikce aninye onyak talak ara, ance dinalame. Aninguk kum bukni, atalak aniryuk, na Allah arye, Babel mutuku nang ati, lo arepneba, Babel mutuku ninye deiyoknye birye, amutuku yalirye, yanuka obisipnamkile. Ara, Yehuda mutuku unyak nang nirya, na Allah arye batakniba, Babel mutuku ninye diparyuk, amutuku unyak ninye nirya, obuka malya kipnamake. Winibikirye, sik tuba kam unamak ninye ara, sik nirya tomobuka, Babel mutuku noutamak delilbinamake. Babel mutuku bobicopura, sik Yehuda yala ninye nirya, parang ya arye, sekuka oplopnamake.

⁵ Narye sikti, bataksineba, Babel mutuku nang arye, Yehuda tam unyak nang, tuba kam ninye nirya tomobikirye, sik dekna weik ning ap, ‘Weik mambul ning’ tenen, ‘Naʼ tenen, delilamik ning ap, tonda, sik minop talak ninye deiyok nang, Yehuda tam taleamik Raja nang arye, moubuka delilamik bona ning nirya ap, aning nirya, ubula doprobikirye, Babel mutuku uk bobinamake. Ara, anggun deipkirikdop nang arye, taleamik ning ap, anggunce talibuka winilulum ning nirya ap dobuka, sik Babel mutuku bobinamake.

⁶ Atalak aniryuk, Pasyur an ap, an aik unyak ninye ap, an yala nang ap nirya, tomopsikirye, Babel mutuku uk bobinamsiake. Winipsicopura, Pasyur anda, Babel mutuku noutamuk, dipminyeba, weipnamkiyake. Tonda, an kayapu nang nirya babye, Babel mutuku noutamak obikiba, weipnamake. Ara, antilila yupu deice arye, ‘Allah arye nyapdeipnuk yupu nyapsine,’ nyabuka, laka nyalamlumba, dib tenelamkik bukni, ance tilila yupu uk nyalamlumba, kekenyak ninye nirya ara, atonun obikiba, Babel mutuku uk, weipnamake. Allah arye anti nyapkile. Yeremia birye, Pasyur biti nyabuk.

Yeremia ikin kanye bobukce, ‘Se’ tenen, malye yupu nyabuka, engena deice arye, nyabuk yupu

⁷ Allah Yahweh ance nati, ‘Kanye bokoltona kum diparyuk, narye nyapdeipnamkin yupu uk, nyanamlyame,’ nyabuka, mikip arye nyapnuluma ati, an nyapniminye yupu uk, nyanune. Anda pia mikip weiknye ulyam bukni, nara mikip kumnye anya arye, ance nyapdeipmaminye ning, aninguk nyanune. Ayupu dobuka, yuk nang ati, binuka nyapnya babye, kum kekebikirye, natibuk malye yupu nyabuka nalinyake. Ara, asum-asum nirya, yuk ninye nirya arye, nati, ‘Elda pia walwal aryuk nyalulnye,’ nyaninyake.

⁸ Ance nyapnulum touk, “Aminyan talak ara, pia kanye imun ning, amutuku yanamle. Amutuku ulul ning nirya, yu nang arye uluplobikirye, kum kipdeipnamsiyake. Ikin weik unamsile,” nyanune. Asum-asum nirya, weik yupu arye, ayupu nyanun bukni, amutuku ninye arye, kum kekeninyake. Wininyakce, na nyanmanye ning ati, yu upliba ikin ning pia weik, na nong deice delininyake. Winibuka tuba-tuba nalibuka akutubuka, malye nyaninyake. Na ni Allah, Yahweh ance, “Ayupu nyapnamalyame,” nyapnulum yupu nyanune ati ara, nati malye nyanikirye, akutuninyake.

⁹ Winibicopura, na ni Allah ance, na dam nyapmaniminye yupu ati ara, ‘Akunuma, Allah el si deice yupu ton, yuk nang dam kum nyanamne. ‘El si ton, lak kum sisinamne,’ tenen, kanye talima noutamakuk tenenune. Winibuka tenenun bukni, weik uku buk dilamle atonun, ‘Ance nyaliniminye yupu, dungnupnamne’ tenen, laka kum nyapnyopura, na kanye talima noutamak, weik uk dinulule. Na kanye talima noutamak ikin weik uniliba, mikip kum unilye talak ara, ‘Pia tunim abuka kum uptinye,’ tenen, malye kanye bonune. Ati, ‘Ance nyaniminye yupu ara, kum dungnuptinye,’ tenenune.

¹⁰ Tonda, amutuku ninye nirya arye, natibuk, yupu mur-mur ana deice arye, yupu talenmakiba kekenune. Sikce natibuk, nyanyake. “Anye bira, ‘Ikin ninguk yanamsile,’ tuba tenelirye ulule. Elda nun lik anya arye, tomobibirye, nun mutuku weik deiyok nang dam bobibirye, ‘Anye bira, malye yupu nyalule,’ nyabibibuk, sikce wenepnamake,” nyaninyake. Tonda, na kayapu nang babye, ‘Malye winipnul do?’ tenen, pia kalikuka dininyake. Tonda, ‘Malye winipliba, eiptibirye, tapu koubibirye, wenebuka optibye,’ teneninyake. Ara, yuk nang aryuk, aning kum teneninyak bukni, pia na tam nang koprop babye, ayupu nyaninyake. “Winibibya deice arye, ‘El ti obuka bisipnamabe,’ tenenyap ning ara, akunum winipnamabe,” nyaninyake.

¹¹ Nyaninyak bukni, na ni Allah Yahweh, mikip weiknye umince, nati kalikuka melinilyame. Winipmanto ara, Allah elda, mikip weik yin talinanye atonun ulula ati, ninye nirya arye elti, ilil asa unyake. Aning ati ara, nati, ‘Ikin ning el nong deice delinamabe,’ tenenyak ninye sik nirya ara, mikip kum mitang kipliba, nati kum malye kipnamniyake. Ati, sik aninye arye, ‘Winipnamepe,’ tenenyak ning ara, kum upliba, aning eibikirye, tuba tamubuka tenekirye, pia alye unamle. Tonda, sik alye unamle ning ara, pia aupnamle. Min kum upnamle ati, ninye nirya arye kum lopdeipnamake. Tuba tenenauk unamake.

¹² Allah Yahweh, anda mikip weiknye ulyame. Anda aning-aning ap, im deice yin talin malaikat nirya ap, sik weik deiyoknye ulyama anya arye, ance diksukumuk ubuka, wininyak ninye ati ara, ‘Dipkoprop teleb wininyak do, kum do?’ tenen, asildelyame. Ara, Allah ance, ninye nirya, sik kanye talima noutamak ulul ning ap, sik kanye noutamak tenenyak ning nirya ara, ance moubuka bikisilyame. Ati, na yu teneninyak ninye ara, ance wenen ning arepminba, ‘Na ton eiptinye’ tenen, moropkine. Aning ati ara, na wininun ning ap, na kam una ap nirya ara, ‘Na ni Allah, elcuk kalikuka melinamnil’ tenen, an deiceuk lobuka deipkine.

¹³ Ninye nirya arye, Allah el si Yahweh atibuk, mot sebuka ulinauk winibibirye, el si erenamabe. Allah Yahweh atibuk, ‘Anda pia telebe ulyamnye,’ nyabuka, el siuk erenamabe. Winipnamabe ara, urdem ati kume. Deiyok ara, malye un ninye arye, ‘Sik bona utotoa talina kum ninye ap, aning nirya kum talinyak ninye ap, nunce optibye,’ tenesinyak nang ara, Allah arye lyelosilya ati, nyapne. Yeremia arye nyabuk.

Yeremia arye, mambul kanye bobukce, malye yupu nyabuka engebukce, nyabuk yupu

¹⁴ Yeremia arye, malye kanye bobuka, engebukce nyabuk. “Se, nara, ikin weik unulula ati, winibuka tenenune. Na nin birye deipnuk sum ara, malye upturye, kum danamtinirya. Asum ati, supdongamnitingca. Na nin birye deipnuk talak aryuk, opdeiamnutue. ‘Yata deiyok ati bataknuk do?’ tenenune. Ati, ‘Asum ara, malye upturye, teleb kum unamle,’ tenenune.

¹⁵ Tonda, na nin birye deipnuk talak, yuknye birye, na ni koproba dam biyukce, ‘An kil arye sal mi deiple,’ nyabukba, na ni koprop kanye deibuk bukni, ayupu laka nyalbiyuknye bira, batakamtue. Atonun, ayupu laka lelbiyuknye ati, malye kipdeiamtinge. Yata deiyok ati, ayupu nyalbiyukura, na ni koproba kekebukce, kanye deiamuk do? Aning ara, batakamtue.

¹⁶ Atalak nyalbiyuknye bira, ninye asik dolamikak, Allah arye sik anang ati, bico tenena kum arye, obuka sirya dakamuk touk, winyamnutue. Winiptopura, lukunyan talak ap, keting duk-duk talak ap ara, yuk nang arye, anye biti, ‘An mal olan nang arye olyanmakiyake,’ nyabuka, nyaptingba, kekamtue.

¹⁷ Ara, urdem ati kum nyapne. Na ni koproba dam, ‘An kil ara, sal mi deipkile,’ nyabuka, laka nyalyayuknye birye, na nin mun pum tuba unmase talak arye, opdeiamnutue. Opdeipnutuba, nabiyuk na nin mun pum uk diamtinye, na nin ap, na ap neika weiamsitingba daulamtinye. Anye birye, na nin ap, na ap, yata ning ati kum opsukba, kum dipnumu do? ‘Elda ikin weik wamtue,’ tenenune.

¹⁸ Se, yata deiyok ati, nara na nin birye deiamnuk do? Na deiamnukba, ‘Ikin ning weik dololirye, imun kanye bobuka, ikin ninguk unamle’ tenen, deiamnuk do? Tonda, na kam unun talak nirya ara, malye kanye bobuka unirye, kwang dakna deiceuk wininamne do?” nyabuka, Yeremia arye, malye kanye bobukce, engebuka nyabuk.