Yeremia 2 - Eipomek

Allah arye Israel ninye ati bico tenibukce, “Anggun malye winilulum ning nirya batakmunce, na dam tamubuka yalulume,” nyapdeibuk yupu

¹ Allah el si Yahweh arye, na Yeremia biti, ‘Winipnalame,’ nyapdeipnuke. Allah arye nyapdeipnuk yupu ara, ani.

² “Ayupu nyapdeipkin ning ara, Yeremia ance Yerusalem mutuku unyak ninye, sik kekena ak binuka nyapnulyame. Ara, nyapnulyame. Se, sik Israel ninye ati, Allah Yahweh arye nyapsile. Anggunda minop talak kam ulalum talak ara, ‘Nun ni Allah, elda mambul weik anya arye, el amu tamuk unamabe’ tenen, moubuka tenelamnulumce, pia weik kanye deibuka, na si ati erelamnulum ning ara, tuba tenesunune. Tonda, kam nang kil dopnuce talak taruk murubikiba kanye delilamak touk, anggunce nati atonun tenelamnulume. Tonda, Mesir mutuku batakuka, anggun mek ap, mok ap kum ati, ninye kum ulamik mutuku noutam balalum talak ara, na balamse bisikuk, anggun babye nati melibuka dobolbalamnulume. Amutuku ara ninye arye wa wibuka yala ning kum koupmanto mutuku anya arye, narye meliamsisiba, anggun nirya na menekuka balamse bisikuk, melibuka dobolbalamnulume. ‘Minop talak winibuka anggunce nati melilamnulum ning ara, pia tuba tenesunune,’ Allah arye nyapmasile,” nyapnulyame. Allah arye na Yeremia biti nyapnuke.

³ Nyabukce ayupu ton nyapdeipnuk. “Israel ninye ‘Anggunda ‘Naʼ tenen, ninye unamak’ tenen, naryuk wipdeiamsise. Anya arye anggunda, ‘Naʼ tenen, ninye ululume. Ninye arye wa wibuka koubikiba, kouamice ning nong upliba, weik arye kanye deibuka lilamak touk, narye anggunti minopce wibuka deiamsisa ati, narye anggunti weik arye kanye deipsise. Ati ara, anggunda na kanye deilin nang unyak tenesunune. Utenesununa ati, yata mutuku ninye do, yuk mutuku nang arye, anggun dam ikin ning deipsikirye, ‘Opnamap’ tenen, pirilamsika babye, narye aninye ati, kanye imun ning weik arelamsiba, imun kanye bobuka ulamik. Israel ninye ati, ikin ning deilisinyak ninye ara, narye sik anang dam, ikin ning sik nong deice deipseba, kanye imun ulamik. Aning ara dipkoprob na Allah Yahweh arye akunum nyapsine.” Allah arye nyapnuk. Yeremia birye nyabuka sekuk.

Israel ninye, sik apu yapu arye, malye winilamik ning ati, nyabuk yupu

⁴ Se, Yakub birye deiamukba, dadeipdanin balulum ninye ap, tonda anggun Israel yala ninye nirya ati, Allah arye nyapdeipmasil yupu ara, moubuka kekeplulume.

⁵ Allah el si Yahweh arye anyapdeipmasile. Sik apu yapu arye na Allah dam malye ulamik ning ara, yata deiyok ati do? Tonda, narye yata ning malye winipseba, sik apu yapu arye na bataknik do? Na bataknikce, sik malye ulamik ning ara ani. Sikce, ‘Nun ni koprop unamsil’ tenen, ulamik ning ara, nong una kum ning atibuk talye, ‘Nun ni koprop unamsil’ tenen, ‘Nun deiyok isa ara anye,’ nyabuka, el aisa si erelamik. Winilamika deice arye, sik bidamnye nong uk malye ulilamik.

⁶ Atalak ara sikce nati, ‘Se, nun ni koproba Allah Yahweh ara dan do?’ nyabuka kum asilelamnike. Ara, ‘Nun ni Allah ara, Mesir mutuku noutamak arye, nun nong dobuka, mok ap, mek ap kum ati, buppu weik arye ninye kum ulamik mutuku bisik melibuka boyanamsuk. Amutuku noutamak boyangalamsuk talak ara, mek ton pia kum uamuk. Tonda, amutuku noutamak ara, weik tilinga pum uamukak ara, ninye kot sakuka opmanto ak uamuk. Winyamuk mutuku noutamak ara, mok pia kum celule. Atonun, lukunyan talak noutamak babye, pia kuna uk dakalule. Amutuku noutamak ara, ninye ton pia kum ulamika ati, bisik ton kum balamik. Tonda amutuku noutamak ara, yuk ninye ton pia kum ulamik, nun uk balamupu. Amutuku ninye una ati, ikin weik ulamsuk mutuku bukni, nun ni koprop Allah arye, amutuku noutam arye, dobuka boyanamsuknye bira, wini talak ara, dan tam ulul do?’ nyabuka kum asilamnike.

⁷ Na Allah arye, sik apu yapu utotoa weik teleb ubuka palamuk mutuku uk, boyanuka deiamse. Ara, ‘Winipnibuk, amutuku ukirye teleb kanye bobikirye, yala ning ayala-yala nirya koubuka dinamake’ tenen, teleb mutuku boyanamsise. Bukni, amutuku noutamak ara, malye ninguk talibuka ulamikba, narye arepsise mutuku ara pia malyeuk ulilamike. Ara, ‘Na tenena ninye arepneba, pia unamake’ tenen, arepsise mutuku, sik apu yapu arye pia malye ninguk talibuka ulamika deice arye, amutuku malye ulilamik.

⁸ Tonda, atalak noutamak ara, na si eren aik talibuka, pil dona deiyok nang, sik imam nang arye, ‘Allah ara dan tam ulul do?’ nyabuka kum asilelamike. Tonda, na Allah arye, ‘Aning wininamlulume, aning ara kum wininamlume,’ nyapdeiamsiba, mem yupu taleamikce, peterena deiyok nang babye, sikce dipkoprob nati, kel kum bikamnik. Tonda Israel ninye, sik ninye deiyok kibuka, talilamika deiyok nang arye, na dam malye ninguk ulamikce, na yupu yaniltalamnike. Tonda, dotalak wininamake ati, lak lena deiyok nang, sik nabi-nabi nang ara, na mikip arepneba, adeice arye sik lak nyana yupu kum lak nyalamik. Sikce, Isa Mutuku Dongonye si, Bahal atibuk si erelamikce, el mikip deice arye yupu nyalamik. Winilamikce, deiyok kum ning, talye ning atibuk, ‘Aning ara pia patapsile,’ tenen, talye ning atibuk dobolbalamik.

⁹ Anggun apu yapu arye, pia malye weik winilamika ati, tuba tonap, ‘Anggunda pia malyeuk ululume,’ nyabuka wenepsine. Tonda, anggun ap, anggunce deiplum mapu ap, anggun mapu ap arye deipnin banamak mapu ap, sik nirya ati wenepsine. Na Allah Yahweh arye nyapsine, nyabuk. Wini talak na mapu sik Israel ninye nirya, minop talak ulamik nang babye, wini talak ulamlum ninye babye, malyeuk winiluluma anya arye, anggun nirya ati wenepsine.

Allah el mapu koprop, Israel ninye ati, ‘Anggunda malyeuk ululume,’ nyabuka, wenebuk yupu

¹⁰ Keting wekelban tam, Siprus mutuku bukni, weik laut mekwen kup-kup tam dilbinamlulume. Winipmunyeura, ninye ton Wibuka deipmunba, pera mutuku el si Kedar mutuku, keting yangan tam dilbinamlule. Dilbilyopura, amutuku-amutuku noutamak nirya moubuka dipdelirye, kel biknamlule. Ara, anggun Israel ninye arye pia malye ulamluma atonun, yuk mutuku ninye babye, atonun malye wininyak do? Yata mutuku ninye arye, anggun malye ulamlum touk unyak do? Tukwak mutuku nirya dipdebuka elbitum bukni, anggun malye ulamlum atonun ninye ton, anggunce pia kum eipnamlume.

¹¹ Ara, yata mutuku ninye arye, dipkoprob na Allah ati, si erelamnik bukni, na batakuka yuk talye ning ap, Isa Mutuku Dongonye ap ati, si erenyak do? Yata deiyok ati, dipkoprob Allah bataktingce, talye Isa Mutuku Dongonye si ati erepting do? Kume, yuk mutuku ninye nirya arye, aning atonun kum wininyake. Bukni, narye wipdeiamsise ninye, anggun Israel ninye aryuk, na Allah ati batakanululume. Nati, batakanumunce, dipkoprob anggun kum melipmanto ning, talye ning ap, Isa Mutuku Dongonye el si ap ati, ‘Nun ni koprop,’ nyabuka, talye ning si erelulume.

¹² Ati ara, se, im alip tam ulul ning nirya ara, Israel ninye arye nati batakaninyaka ara, kekebikirye, pia mambul kanye bobuka unamake. Ninye yok sirim talilamle touk upnamake. Ati, ‘Israel ninye ara, yata deiyok ati, apia malye un ning unyak do?’ tenen, imun kanye bobuka, pia ikin deice uk unamlume. Na Allah Yahweh arye nyapsine.

¹³ Aning ara, urdem ati kum nyapsine. Na mapu koprop Israel ninye arye, pia malye un ning bitinye talibikirye, malye weik unyake. Tonok ning ara, malye unyaka deice arye, sikda na bataknikirye, balye tam kilongoninyake. Nara ninye nirya ati, kam un mek pu atonunye unune. Bukni, sikce nati batakaninyake. Bitinye ning ara, mekwen lukamiki bukni, delilamlye ani, tuku dilikamlye bisik arye, mek weklamlya ani, amek nirya celdolamle. Aning atonun, sik bidamnye kanye aryuk tenebuka si erenyak ning ara, talye ninguk talibuka si erenyak bukni, aning arye sikti, kum meliptue. Yuk talye ning ati si erebikirye, nara bataknikirye, si kum ereninyake, Allah arye nyabuk.

Israel ninye arye Allah nyapdeiamuk yupu, moubuka kum talibik deice arye, ikin ning sik dam yayuka ati, nyabuk yupu

¹⁴ Israel ninye ara, ninye arye pil dibikiba, pil dolamak nang atonun kume. Tonda ikin pil deiamikiba, apil dolamikirye sikce delilamak mapu atonun nang kum unyake. Bukni, yata ati Israel ninye ara sik oldan nang arye obikirye, sik ning nirya dalubuka dolonyak do?

¹⁵ Israel ninye sik oldan nang arye sikti, weik yu ning, el si singa kus yalirye, bai tam kam ulul ning obuka dilamle touk, unyake. Ara, yuk pera mutuku ninye, yu ninye arye yanuka, sik olonyaka ati nyapne. Tonda, Israel ninye unyak mutuku ara, yuk nang arye, uluplobikirye, malye kilinyake. Tonda, sik asik dobuka unyak mutuku nirya ara, uku dongobikiba, uku arye dibuka sirya dakliba, amutuku noutamak ara, Israel ninye ton pia kum unyake. Lo uk ulule.

¹⁶ Anggun Israel ninyeo, ninye deiyok nang, sik kisok deice pia teleb ning kalubuka kalulamak ning, dobuka batakmakibuk, malye ulamle touk, sik Mesir mutuku yin talen nang arye, sik mutuku si Memfis mutuku ap, Tapanes mutuku ap yakirye, anggun Israel ninye arye talibuka umunce, dolamlum mutuku keil nirya ara, uluplopmasiake.

¹⁷ Awinipmasil ning ara, urdem ati kum winipsile. Anggun kele. Anggunce, malye winimunya dekna arye, anggun dam ikin ning nirya yalaba dopropmalume. Deiyok ara, na Allah arye anggun bisik balalum talak ara, melibuka bobalamsise bukni, anggunce nati balye tam kipnulumce, bataknuluma deice arye, wini talak ikin ning anggun dam akunum yale.

¹⁸ ‘Mesir mutuku nang arye melibuka lyepsiting’ tenen, ‘Mesir mutuku binamabe,’ tenepluma ara, nong teleb ning ton dopropnamluma ati binamlum do? Tonda, ‘Nil mek kwebuka dinamap’ tenen, binamlum do? Tonda aning atonun, ‘Asyur mutuku ninye sik dam bitibirye, moroptibyeba, telebe tenepsitingopura, sik Asyur mutuku nang arye melibuka lyepsiting’ tenen, anggun amutuku binamlum do? Asyur mutuku noutamak balamle mek, ‘Efrat mek kwebuka diptibye’ tenen, sik mutuku binamlum do? Mesir mutuku ap, Asyur mutuku ap, binuka moroptuma babye, ara nong teleb ning ton kum dopropnamluma ati nyapsine. Amutuku ninye arye, kum melipsitinge.

¹⁹ Tonda anggun malye un ninguk, talibuka winimunya deice arye, anggun dam wenen ning yanmasile. Aikin ning anggun dam yanmasil ning ara, anggunce na Allah ati bataknuluma deice arye dopropmalume. Ati wini talak ara, ikin doproplumce, kanye imun upmasile deiyok ara, anggunce na Allah Yahweh ati, kibuka si erena kum deice arye, ikin doproplume. Na kele, anggun Israel ninye nirya arye, na Allah ati, ‘Se Allah ara nun weik deiyoknye ulula ati, malyeuk ubibyopura, weik arye wenepnamsile,’ tenena kumce, nati si erebuka, ilil kum ulule. Ayupu nirya nyapmasin ning ara, na Allah Yahweh aning-aning nirya talibuka deice tam unune. Na Allah Yahweh ara, aning-aning nirya talinirye, im deice yin talin malaikat nirya, sik weik deiyoknye kibuka ununye birye nyapsine. Allah arye nyabuk.

Israel ninye arye, ‘Allah el si erena ara, nun like,’ tenebika ati, nyabuk yupu

²⁰ Allah arye Israel ninye ati nyabuk. Minop talak ara, Mesir mutuku ninye arye, anggun nirya opsikce, tapu koubukapsikce, sik mutuku tamubuka bobinamsikba, ikin weik pil dilamsikba, imun kanye bobuka ulamlum bukni, na Allah arye, lyepropsisirye, teleb mutuku boyanamsise. Bukni, anggunce nati, ‘Kume, Allah nyasilye yupu ara, kum kekenamabe. Allah el piluk dobibirye, el amu tamuk kum unamabe,’ tenelamlumce, nati batakanululume. Tonda, dan mutuku do nirya, anggunda weik arye erebuka, bukuk mutuku konak nirya ap, tonda weik yo dam nirya ap bimunce, talye Isa Mutuku Dongonye ati binuka si erepna arye morolulume. Winipmanto ara, ninye domikce kilapu, sik akanye yapu akilapu lik ati, batakmakibuk, talye nang ap ubula yoldalamak touk, anggunda na anggun ni koprop Allah, nati batakanululume.

²¹ Winipmanto ara, ninye arye anggur tapu yala pia teleb ning koulamak touk, narye anggunti teleb yala ninye noutamak arye wipdeiamsise. Ara, ‘Anggun teleb unamak’ tenen, wipdeiamsise. Tonda ninye arye anggur tapu duk yala teleb ning arye wibuka, tuku telebak doklamak touk, narye anggun melina ati, pia telebak boyanamsise. Bukni, wini talak ara anggunda akunum tamupmalume. Winipmaluma deice arye, bai tam talye palamle ning bobuka yanuka koulamak touk upmalume. Anggunda, talye palamle ning atonun akunum unmalume. Anggunda, pia malye ululuma ati nyapsine. Anggunda narye pia teleb yala ning atonun dokamsise bukni, yata wininmaluma deice arye, wini talak ara, pia malye ninguk unmalum do? Ara, nong kum upnamle ning talibuka unmalum do? Ara, nong kum upnamle ning talibuka, unamluma ati nyapsine.

²² Ati ara, anggunce, ‘Se, malye winipmapa anya arye, mek keknamabe’ tenen, mek kekne ning sabun ap, yu ning ap, weik arye bobuka, mek kektuma babye, anggun malye ululum ning ara, anggun nong deice tuba palenamsile. Aning ara, kume kum kipdeipmanto upsile. Aning tuba upsilyeura, na bataknamsine. Pia dinamsine. Nara, Allah Yahweh Weik Erena Deiyoknye arye nyapsine.

²³ Anggun malye un ning weik aupmasili buk, anggun mandipna kanye arye, ‘Kume, nunda malye ton kum winilamupu,’ nyabuka talyeuk nyalulume. Tonda, ‘Tuba malye kum unyabe. Teleb uk unyabe,’ nyalulume. Tonda anggunce, ‘Kume, Isa Mutuku Dongonye si Bahal kum erelamap touk, tuba kum erenyabe,’ nyanululume. Nyanululum bukni, anggun tamubuka weik lyu mutuku noutamak pil dolamlum ning ara, tuba tonap tenepnululume. Anggun malye weik ulamlum ning ara, moubuka tenepnamlulume. Utenepdamunce, anggun bidamnye kel biknamlume. Anggunda winipmanto, unta basam kil arye, ‘Yim unta basam ulamlyak ati, dan do?’ tenen, burum kwakmalirye, otam binmana, atam yanmana ulirye, talye lukparabuka balsusulamle touk umunce, anggun babye kanye bona kumce, malyeuk ululume. Anggunda moubuka kum tenelulume.

²⁴ Aning atouk, bai tam ulul keledai basam babye, binuka yanuka kinmalirye, ninye pia kum unyak mutuku binuka ulule. Akeledai basam bai tam mutuku binuka ulamlya ani, burum kwakmalirye, ‘Yim keledai basam dan do?’ tenen, talye mutuku nirya lukparabuka balirye, binmana, yanmana kilamle touk ululume. Keledai basam kil arye, burum kwak malye talak ara, kum dakdopmalibuk ulamle touk, anggun babye atonun ululume. Abasam deiyok nang arye, ‘Nun keledai basam dan do?’ tenen, elbiting bukni, pia kum eipnamake. Keledai yim basam ulul sukumuk, dipkoprob tamubuka yanamle ati, kum elbanyak bukni, yim basam damuk elinyake. Daulamlya ani, el akunum burum si kwaklye talak ara, elcuk kintinililamle touk, anggun babye malye nang dam bikbik abuka balulume.

²⁵ Ati Israel ninyeo, anggunda bikbik abuka kwemdina, Isa Mutuku Dongonye si erenak ati, pia epra bana uk umunyopura, ikin weik unamsile. Winipmanto, pia bikbik abuka balamak nang, sik yan uk dilamliba, aik bulamak touk, upnamlume. Tonda mek patana pia weik patalamle touk ululume. Ara, talye Isa Mutuku Dongonye si tuba eremunyopura, ikin weik unamsile. Ikin upsilye talak atibuk, anggunce nyalulume. ‘Kume, aisa atibuk si akunum erenyaba anya arye, pia tuba kanye deibuka, aisa si erenamapa ati, kum bataktibye. Anggun uk melibuka dobolbanamabe,’ nyalulume. Allah arye, Israel ninye ati nyabuka wenebuk.

Israel ninye, sik malye wininyak ning ara, Allah arye wenepnamla ati, nyabuk yupu

²⁶ Allah arye Israel ninye ati nyabuk. Winipmanto ara, ubula donmalinye eibikirye, talibikiba, alye daklamle touk, anggun Israel ninye yala nirya ara, alye dakaldanamlume. Ara, talye daunyak ninye ap, anggun deiyok kibuka talisinyak nang ap, anggun yupu bokolina deiyok nang ap, tonda na si eren aik pum tam, pil dona deiyok nang iman-imam nang ap, na yupu nyaipneba, laka nyana deiyok nang, sik nabi-nabi nang ap nirya ara, sik wininyak ning laka kipdeipnyeura, alye upnamsile.

²⁷ Ara, anggun nirya arye yo dobuka, puturubuka deipmunce, aning ati, ‘Nun ni koprop,’ nyabuka si erelulume. Aning atouk, talye urasin teleb keil dobuka deipmunce, ‘Nun nin bira ani. Elce nun deipsuke,’ nyabuka, si erelulume. Adeice arye, anggun diamuk alye dakdanamlume. Ara, urdem ati kum nyapsine. Anggunce nati, balye tamuplumce, nati batakanululume. Na dam kum yangalulume. Nara, anggun balye tam atonun, akunum deipmanulumce, na batakuka banululum bukni, anggun urasin ara, na tam atonun tuba elinululume. Deiyok ara, na nyasinye yupu nirya batakanumunce, na si kum erenululum bukni, ikin ning anggun dam yasilye talak nirya ara, imun kanye bopmunyopura, natibuk, ‘Se na nio, ance melibuka lyepsilyame,’ nyabuka, tuba moronululume. Wininumunba, anggun moropmanumunye touk, ubuka lyesunune.

²⁸ Anggunce memebuka deipmunce, si erelulum isa mer ara, dan tam unyak do? Ikin ning anggun dam yalyopura, imun kanye bolulum talak ara, anggunce puturubuka deiamlum ninguk, sikti, ‘Se yanuka lyepsilyame,’ nyabuka moropnamlume. Atalye ning arye, anggunti dipkoprob lyepsiting toura, sik Isa Mutuku Dongonye si erelulum ning aniryuk, anggun ikin ning upsilye talak ara, aning arye lyepnamsitinge. Narye kume. Aning ara, urdem ati kum nyapsine. Se anggun Israel yala ninyeo, anggun asik dolulum mutuku, weik arye dolulum touk, anggunce talye Isa Mutuku Dongonye siuk weik arye erelulum ning ara, kum nukmanto. Ati, sik Yehuda yala ninye unyak mutuku noutamak ululum ninye nirya ara, Isa Mutuku Dongonye si weik arye ereluluma ati, wenepnamsine.

²⁹ Anggunda yata deiyok ati, na kanye kum deipnulumce, nati malye yupu nyabuka, malye nyanumunce, ‘Nun ni Allah, yata ati wenepnamsil do?’ nyabuka mandipna ululum do? Na Allah Yahweh arye nyapsine.

³⁰ Anggun ap, anggunce delilalum mapu ap ati, ‘Na yupu kekepnamak’ tenen, anggun wenena ati, anggun dam ikin deilisilye ning ara, anggun kel kum bikilulume. Ati, anggun wenesinye ning ara, talye atibuk wenelamsise do? Anggunce, ‘Se, nun malye unyaba ati, wenepmasile,’ kum tenelulume. Ara, winipmanto ara, bai tam ulamle yu kus, el si singa kus, weik yu kus arye, yu nguru-nguru alamlirye, talye daulamle kam ning obuka, dilamle touk ululume. Ara, na yupu nyaipneba, laka nyana deiyok nang nabi-nabi nang dopdeipsiseba, anggunce anabi nang nirya oltakalulume.

³¹ Se wini talak ululum Israel nango, anggunce na anyapmasin yupu moubuka kekepnululume. Narye anggunti ara, mek kum ati ninye kum ulamik mutuku atonun ubuka, ikin ninguk deipsisa ati, bataknulum do? Akumopura, anggun ululum mutuku ara, kuna daklamle atonun, dirina ap, kel bikna deiyok ning ap, kum arelamsisa ati, bataknulum do? Aning kum winipsisa ati do? Anggun ti narye, teleb kibuka kalikuka melilamsise. Bukni, anggunce nyanululume. ‘Kume, nunda talyeuk ubirye, nun tenenyap ninguk wininamabe. Allah el amu tam bukuka kum unamabe. El nyasilye yupu ara, pia kum kekenamabe. Tonda el dam ara, tamubuka kum banamabe,’ nyanululume. Aning ara, yata deiyok ati do?

³² Winipmanto ara, wel kil el kweirya dopmalye luba kilul do? Atonun, taruk morupnamace kilapu, ongolamak teleb baju ap, kweirya ning ap, taruk morupnuce talak ara, luba kiplirye kum ongolul do? Kume, ara kum winipmanto. Bukni, ‘Anggunda, ‘Naʼ tenen, ninye’ tenen, wipdeiamsise ninye arye, na Allah ati, pia akunum luba kipnulum talak nirya ara, keting tamun kum nukmanto, pia weik ubuk.

³³ Diba anggunda, ‘Talye yolanyak kilapu, teleb nang tenenamsiyak’ tenen, sik kilapu kanye teleb deipmanto ning moubuka tenemunce, kintinibuka delin ning ara, weik kel bikilulume. Winibuka memelulum ning ara, yuk talye yolana kilapu babye, aning eibikirye, ‘Sik awinipmak ning ara, nun ton kel biknamap’ tenen, moubuka, sik wininmace ning dinyake. Ara, anggun Israel ninye ara, malye un ning weik arye kel kiplum ati nyapsine.

³⁴ Aninguk kume. Tonda, anggun ongolulum baju ara, aning nirya talina kumce, talye bona utotoa talina kum nang, sik ining ap, malye kum ulamice nang, sik ining ap arye, anggun baju palisulule. Anggun baju deice, ninye ining palisulul ning ara, ubula don nang tomobuka, oplum nang ining kum palisulule. Deiyok kum uamukbuk, talye nang oploplumba, sik ining palisulule. Anggun malye ululum ning ara, nukmanto kume.

³⁵ Malye ululum ning, kum nukmanto usilibuk, anggunce nyanululume. ‘Kume, nunda malye kum wininyap nang unyabe. Nunda telebuk unyabe. Ati, Allah arye kum wenebuka opnamsil,’ nyaldalulume. Bukni, na Allah arye dipkoprob nyapsine. Narye anggun malye weik ululuma ati ara, wenebuka opnamsine. Ara, anggun malye ululum diparyuk, ‘Kume, nunda malye kum wininyap nang, telebuk unyabe,’ nyaluluma deice arye, yupu bokipsinirye, wenebuka opnamsine. Na Allah arye nyapsine.

³⁶ Malye uk ulalum bukni, anggun adiparyuk, ‘Kume, nun malye ulamupu ning nirya ara, dipkoprob bataknamabe,’ nyalulum bukni, talye si bam bol deice aryuk ayupu nyaltakalulume. Kanam aryuk tilila yupu nyaltakalulume. Ati ara, anggun minop talak Asyur mutuku nang arye, anggun Israel yala ninye olamsik touk, aminyan talak ara, sik Mesir mutuku unyak ninye arye, anggun wenena ati, malye kibuka opsikirye, opnamsiyake.

³⁷ Mesir mutuku nang arye anggunti, sirya opsikirye, tapu koubuka bobinamsiyak talak ara, anggun Israel nang arye, ‘Se, yata deiyok ati upmasiyak do?’ tenen, imun kanye bobuka unamlume. Ikin kanye bopmunce, anggun taruk anggun damnye, kisok deice deipmunba, Mesir mutuku nang arye, sik mutuku tamubuka bobinamsiake. Sik mutuku binamlum talak ara, alye una ap, ilil una ap, pia weik upnamsile. Mesir nang arye winipnamsiyaka ara, urdem ati kume. Deiyok ara, na Allah Yahweh arye, anggun kanye delilulum ning nirya, kum kipdeipnamna atia. Ara, anggunce, ‘Isa Mutuku Dongonye arye do, Mesir mutuku mikip nang arye do, sikcuk melinmasiyak,’ tenelulum ning ara, na Allah Yahweh arye, aning nirya kum kipdeipnamne. Ati ara, isa mer babye, Mesir mutuku ninye babye, sik nirya arye, anggun Israel ninye ati, melipsikiba, teleb ubuka kum unamlume. Ara, kum winipmanto atia. Anggunce, ‘Mambul ning anye,’ tenelulum ning nirya ara, na lik unilya ati nyapsine. Allah arye Israel ninye ati nyabuk.