Yeremia 19 - Eipomek

Allah arye Yeremia biti, “Kiri tuku dobuka, memelinyak makau dopropmince, amutuku ninye dinmacak, coloplopnalyame,” nyabuk yupu

¹ Allah el si Yahweh arye, na Yeremia biti, yanuka nyapdeipnuk yupu ara ani. Anda kiri tuku arye dobuka, memenyak makau dekelbinulyame. Ara an ap, sik wisi-wisi nang Israel ninye talibuka, na si eren aik pum tam pil dona deiyok nang, iman-imam keting tamun weik deice arye, pil dolamik nang ap, nyapminba, sik neika binululume.

² Ara sik ap, an ap, neika Hinom birye deibuk mi, el lyu weik mutuku si ati, Ben-Hinom mutuku nyabuka, si nyalulum mutuku lyuak binamlulume. Bimunyopura, weik cang keil poka, bublan botopdeibikba, bai tam bakirye, kiri tuku dobuka, memelinyak mek makau colopmalye ning dobuka, donokolbalamak bisik, wekuka binamlulume. Akunum wekuka bimunyopura, narye nyapnamkin yupu nirya ara, sik anang dam nyapnalyame.

³ Ance anang ati nyapnamalam yupu ara, ani. Se kekeplulume. Sik Yerusalem mutuku, ninye deiyok kibuka, taliplum nang ap, Yerusalem mutuku unyak ninye nirya ap ati, na Allah Yahweh arye, nyapnusin yupu kekepnuse. Nara, aning-aning ap, im deice unyak yin talin malaikat nirya ap talibuka, sik weik deiyoknye unune. Tonda, Israel ninye, sik kalikuka melinunye, na Allah Yahweh arye nyapnusine. Ara, na Allah arye, anggun umunye mutuku noutamak nirya ara, weik ikin ning arepsiniba, anggun nirya imun kanye bobuka, ilil weik upnamsile. Yata mutuku ninye do nirya, aikin ning arepsiniba, akunum uplyopura, yuk ninye kekebikirye, ‘Se, aning ara, dipkoprob weik mambule. Ato ikin ning ara, nun ton pia kum kekelamupu,’ nyanamake.

⁴ Awinipnamne ning ara, talye ati kume. Deiyok weik aupmale anya arye, ayupu ton laka nyapnusine. Tonok ning ara, anggun mutuku ululum ninye arye, na batakanululuma ati, wenepnamsine. Tonda, na si eren aik ap, ‘Naʼ tenen, mutuku Yerusalem ap ara, anggunce pia malye ulilulume. Ara, anggun wini talak ululum ninye ap, anggun apu yapu ap, Yehuda mutuku ninye, anggun weik deiyok Raja nang ap arye, anggun si kel bikna kumce, Isa Mutuku Dongonye si talye erena ati, kam ning obuka, arelyangalulume. Winiluluma deice arye, amutuku noutamak ara, akunum malye kipdeiplulume. Aning atouk, amutuku unyak ninye ton, malye kum winipmake buk, anggun deiyok nang arye, aninye weik arye talyeuk oltakalulume. Winipmanto ara, mek kwebikirye, weik mek makau pum bisik dikdongobikiba, mek langdiplirye, balamle atonun, ‘Naʼ tenen, mutuku noutamak ara, ninye weik olamikba, ining pia weik saklamukce, aulule.

⁵ Tonda, anggunce Isa Mutuku Dongonye, el si Bahal, el si erena ati, anggun mapu koproba bobuka, keil taplakuka yangabuka kintinip deibikirye, anggun mapu obuka boyangalulume. Anggun mapu koproba dobuka, isa si Bahal el si erena ati, uku dalyangalulume. Awinimunye ning ara, narye ton anggunti, ‘Aning wininamlume,’ kum nyapdeiamsise. Tonda, ‘Aning wininamake,’ kum teinyamse bukni, anggun kanye aryuk tenebuka, winiluluma deice arye, malye weik winilulume.

⁶ Ati ara, na dipkoprob nyapsine. Anggun ti weik arye wenepnamsine. Ara, na Allah Yahweh arye dipkoprob nyapsine. Wini talak ara, amutuku si ati, Topet mutuku nyalulume. Tonda, Hinom birye deibuk mi, el weik lyuak mutuku si ati, Ben-Hinom nyabuka, si silulume. Nyamunye bukni, na tenepse talak akunum uplyopura, anyamunye ning ara, batakmunce, ninye weik olamikak nyanamlulume. Amutuku si ati, ‘Ninye olamak mutuku lyuak nyapsik,’ nyabuka, amutuku si nyanamlulume. Ara, urdem ati kum bukni, narye lo arepneba, yu ninye arye, anggun amutuku ululum ninye, pia weik arye oplopnamsiyaka ati, nyapsine.

⁷ Aninguk kume. Yehuda yala ninye ap, Yerusalem mutuku ululum ninye ap, anggun nirya arye, ‘Amutuku noutamak ara, winipnamabe,’ tenelulum ning nirya ara, kum kipdeipnamne. Ara, narye sik yuk mutuku unyak nang, mikip arepneba, anggun Yehuda tam noutamak ululum ninye ap, Yerusalem mutuku ululum ninye ap nirya ara, obuka sirya daknamsiake. Atalak ara, narye anggun kum lyepnamsine. Anggunda, bataknamsine. Winipniba, anggun oldan ninye arye, ya dobuka anggunti opsice talak ara, eipnamake. Anggun ti, ‘Nun like,’ tenenyak ninye arye, anggun Israel yala ninye dipnamlum talak eipnamsiyake. Anggun opsicopura, yuk nang arye anggun nong nirya ara, kum weipnamsiyake. Kume, oplopsikiba, talye bai tam unyak ning ap, talye maka ap yakirye, yanuka dipnamsiyake.

⁸ Narye, weik kanye imun un ning dopropnirye, amutuku ululum ninye, anggun deice deipnamne. Winipniba, amutuku bisik banamak ninye nirya ara, aning eibikirye, ‘Se, aning ara, weik mambul anya arye, aning ara tonap kum eipnamabe, nun pia ilil unmasile,’ nyanamake. Narye anggun wenena ati, weik ikin ning arepsinye talak ara, yuk mutuku ninye nirya arye, abisik bakirye, aning kel bikikirye, ‘Se,’ nyabuka, tuba nyanamake.

⁹ Tonda, sik oldan ninye arye, ‘Amutuku unyak ninye nirya, obuka sirya daktibye’ tenen, mikip arye yanuka, warekinamake. Yanuka wariknamak ning ara, pia weik kanye imun kipnamsila anya arye, anggun amutuku noutamuk unamlume. Anggun wa wina ap, lina ap, din ning elbana ap, mek kwelbana ap ara, pia kum winipmanto upsilye talak ara, dina pia patanauk usilibuk, ‘Se, yata wiriptibye do?’ tenen, amutuku unamlum ninye nirya ara, kanye imun ning, pia weik upsiliba, ninye arye sik mining mapu obuka dipnamake. Tonda, wisi nang arye, sik kayapu nang ap, sik aik mining dam unyak nang ap, obikirye, aninye sik mining nonguk, kalibuka dinamake. Ara, sik mal olan ninye arye, weik kanye imun weik ning, sik nong deice deibice talak ara, ikin pia weik unamsila ati, weik malye ninguk, pia weik arye wininamlume. Na Allah arye, dipkoprob nyapmasin touk, nong upnamle. Allah arye na Yeremia biti, “Ayupu nyalbinulyame,” nyapdeipnuke.

¹⁰ Allah arye, na Yeremia biti nyapnukce, ayupu tonap dukdongobuka nyapnuk. “Kiri tuku dobuka, memamik mek makau dobuka, memepnalam ning ara, ance dopropmince, an melipmakice nang, sik imam nang ap, nabi nang ap, sik wisi nang ap, sik dinmacak arye coloplopnalyame.

¹¹ Amek makau coloplopminye talak ara, nyapnulyame. Allah Yahweh arye, aning-aning nirya ap, im deice yin talin malaikat nirya ap talibuka, sik weik deiyoknye birye, nyapsile. Na Yeremia birye, akera tuku memepdeibik ning dobuka, colobuka batakman touk, Allah arye, amutuku umunye ninye nirya ap, amutuku nirya ara, kiri tuku arye dobuka memenyak mek makau coloplopman touk, anggun amutuku umunye ninye nirya oplopsilirye, kum kipdeipnamsile. Winipnamle ning ara, yuk nang arye, ton tamubuka kum teleb kipdeipnamake. Ara, kum winipmanto atia. Sik aopnamle nang ara, Topet mutuku damuk, dipnamake. Adibice nang, sik nong ara, yuk nang arye dobuka weipnamake. Aweipnamak diparyuk, tuku palinak nirya elipropliba, yuk nang weipmantoak nirya, lo ton kum upnamle.” Allah arye nyapdeipnuke.

¹² Yeremia birye nyabuk. “Ara, urdem ati kum nyapsile. Allah el si Yahweh arye, ayupu dipkoprob nyapmasile anya arye, nong upnamle. Anggun amutuku ululum ninye arye, Topet mutuku ululum ninye nirya, malye winilimunye touk, Allah Yahweh arye, ‘Amutuku ap, Yudea tam ap, Yerusalem mutuku ap, amutuku unyak ninye nirya ap, malye winilinamle. Amutuku unyak ninye nirya ara, Tofet mutuku pia malye ulye touk, kipdeipnamsine,’ nyapdeipnuka ati nyapsine.”

¹³ Tonda, Allah arye nyapnuka ati, nyapsine. “Yehuda tam ninye, sik deiyok-deiyok nang, sik weik asik ap, Yerusalem mutuku aik dobuka, unyak ninye arye domik aik ap, Topet mutuku pia malye ulye touk, kipdeipnamsine. Ara, anggun nirya arye, amutuku noutamak, Isa Mutuku Dongonye si erena ati, siltong teleb ning ap, kam ning ap, obuka arelbamunye ning ap, anggun asik deice, keil yangabuka, taplakuka deipmunce, uku dongomunye ning ap, aning nirya winiluluma deice arye, Tofet mutuku nirya, malye kililamlume. Tonda, anggun asik deice tam arye, ‘Siltong teleb ning uku dabibiba, im deice tam unyak isa mer arye, kurya talinyak isa, yuk isa ayala-yala nirya ap, kekenamsiyake’ tenen, uku dalulume. Aning atonun, anggur mek teleb ning kwebuka, kwemdina ning isa, si erena ati, ‘Nun deiyoknye,’ nyabuka, binuka arelbalamunce, si erelulume. Aning nirya winiluluma deice arye, anggun mutuku malye kilimunye touk, aminyan talak ara, na Allah arye anggunti, wenepsinirye, obuka malye kipdeipnamsine. Narye anggunti, obuka wenepnamne. Allah arye nyapdeipnukba, nyapsine.” Yeremia arye nyabuk.

¹⁴ Allah arye Yeremia biti, ‘Tofet mutuku bimince, na nyapkin yupu laka nyalbilyame,’ nyapdeibuk touk, Yeremia akunum laka nyabukura, Tofet mutuku batakuka, tuba tamubuka, Yerusalem mutuku yayuk. Akunum yayukopura, Allah el si erena ap, elti, arena ap ati, domik aik dam tikukce, anyasik dam bulubuka wekmek ninye ati, nyabuk.

¹⁵ “Allah el si Yahweh ara, aning-aning nirya talilule, im deice yin talin malaikat nirya, sik weik deiyoknye ulule. Allah arye, nun Israel ninye ati, pia kalikuka melisululnye birye, ayupu nyasulule. “Na Allah Yahweh arye, Yerusalem mutuku ap, amutuku noutamak ululum ninye nirya ap ati, ‘Anggun malye winilulum ning dekna ati, weik arye wenepnamsine,’ nyapdeiamsise yupu ara, wini talak, dipkoprob winipnamasile. Ara, urdem ati kume. Anggunce, na nyasinye yupu kum kekemunce, pia mandipna kanye bobuka, batakalulume. Batakmunce, anggun malye winin ninguk, winimunya ati, na Allah arye, anggun damak weik ikin ning arepnamsine. Ara, anggun umunye mutuku noutamak ara, weik kanye imun ning arepnamasine. Na Allah Yahweh arye, akunum nyapsine ati, nong upnamale.” “Allah arye nyapsile,” Yeremia arye, akekenmek ninye ati, nyabuk.