Yeremia 18 - Eipomek

Allah arye Yeremia biti, tuku tilibuka ngolol makau memenanye biti, nyabuk yupu

¹ Allah el si Yahweh arye, na Yeremia biti yanuka, nyapdeipnuk yupu ara, ani.

² “An adiparyuk minopce tuku teleb uka ngolol makau memenanye, el aik binulyame. Biminyeura, narye anti, mambul yupu nyapdeipnamkine. Ara, ‘Israel ninye ati wininamne,’ nyabuka, laka len yupu nyapdeipnamkine,” nyapnuk.

³ Nyapnukopura, na adiparyuk, tuku teleb uka ngolol makau memenanye, el aik bise. Abisirye dinmasiba, aning pil donanye bira, tuba tuku teleb uka ngolol makau memebuka delinmokba, eipse.

⁴ Binuka dinmasiba, anye birye, ngolol makau memebuka, delinmok ning, el urasin malye upneura, adiparyuk, tuku tilibuka, ngolol makau memena deiyoknye birye, tamubuka el tenepmok touk winibuka, urasin teleb ninguk, ngolol makau memebuka delinmok. Ara, malye ning dobuka bataknirye, urasin pia teleb upne ninguk punubuka, memenmokba eipse.

⁵ Wininmokba, eipsopura, Allah el si Yahweh arye nati, “Ance na mapu Israel ninye ati, nyalbinulyame,” nyapnuk.

⁶ Asipdenuk yupu ara ani. “Se, na mapu koprop Israel ninyeo, narye sikti, atonun kum daneipnamsine. Winipmanto ara, kiri tuku dobuka, teleb uka ngolol makau memenmok deiyoknye birye, urasin malye ning dobuka, batakukce, tuba tamubuka, urasin teleb ning punubuka, memepmok touk, narye sikti, winibuka kum winipsitinye do? Angolol makau memena deiyoknye birye, kiri tuku dobuka, el tenepmok touk, ngolol makau kintinibuka deipmok touk, narye anggun talibuka usinirye, na tenyamse touk winipnamsine.

⁷ Anyapmasin yupu ara, deiyok ani. Yata talak do nirya, narye, ‘Winipnune,’ tenepnye sum uplyeura, tonok mutuku unyak ninye ap, sik weik deiyok nang ap, obuka wangap singnipnamne. Narye tenepnye talakuk, ‘Anggunda narye, obuka sirya daknamsine,’ nyapne.

⁸ Bukni, narye, ‘Sik wenebuka opnamasine,’ nyapnyopura, sik amutuku nang kekebikirye, ‘Se, nun malye wininyaba ati, wenebuka oplopnamsile,’ teneptingce, sik malye winilamak ning batakikirye, tamubuka na damuk yaceura, narye, ‘Sik obuka sirya daknamne,’ tenepse ning ara, bataknamne.

⁹ Aning atouk, yuk talak ara, na tenepnye talak uplyopura, narye yuk mutuku unyak ninye ap, sik talibuka weik deiyok daunyak nang ap ara, weik mutuku ‘kerajaanʼ nyalamak mutuku ati, narye tuba tamubuka, teleb kipdeipnirye, mikip kibuka deipnamne. Na tenepmanye touk wininuna ati, nyapne.

¹⁰ ‘Winipnamne,’ teneptinye bukni, sik aninye arye, na yupu kekebuka nimalye arye kum ukirye, narye, ‘Aning ara, winina meme,’ nyalamse ning bukni, malyeuk winikirye, na dam tuba-tuba malye wininyak ati ara, narye, ‘Amutuku teleb kipdeipnamne,’ teinyamse ning ara, bataknamne.

¹¹ Ati ara, an Yeremia birye, sik Israel ninye ati, nyapnalyame. Wini talak ara, ‘Yehuda yala ninye ap, Yerusalem mutuku unyak ninye nirya ap ati, binuka obisipnamne,’ tenenyak ning ara, binuka laka nyapnulyame. ‘Ara, kiri tuku dobuka ngolol makau teleb uka memelinye ulye touk, sik amutuku unyak ninye wenena ap, ona ati, nun ni Allah, el si Yahweh arye, sik wenen ning akunum memelule. Anggun nong deice, weik ikin ning delinamsil ning ara, akunum memepdeipsuke.’ Ati, ance, sik Israel ninye ati, ‘Anggun malye winilulum ning nirya ara, batakmunce, diksukumuk teleb ubuka wininamlume,’ nyabuka, aninye dam binuka, laka nyapnulyame,” Allah arye, Yeremia biti nyabuk.

¹² Nyabukce, ayupu ton nyabuk. Ance anyapman yupu binuka, nyapnalam bukni, sik aninye arye, tamubuka nyanamkiyake. ‘Kume, ance nyapsilam yupu ara, kum kekepnamkiyabe. Yata deiyok ati, anyapmasilam ning ara, kekebuka wininamap do? Nunda nun bidamnye tenenyap ninguk wininamaba. Tonda, nun mandipna kanye bobuka, weik unyap ninye anya arye, nun bidamnye tenebibye touk, adiparyuk, nun yuk-yuk malye wininamabe,’ nyapnamkiyake. Allah arye nyabuk.

Israel ninye arye, Allah bataklamika ati, nyabuk yupu

¹³ Allah el si Yahweh arye nyabuk. “Yata mutuku ninye do nirya, sik dam bimince, binuka asipdenamlyame. ‘Israel ninye arye, tuba malye-malye wininyaka ara, aning atonun ning ara, yata ninye arye, ton kekelamlum do? Yuk mutuku ninye nirya ara, amalye ning atonun ton, wininyak do?’ nyabuka asipnamlyame. Kume, Israel ninye ara, ninye min kum dolamak kilapu, kabunye kil atonun ulamik bukni, wini talak ara, malye ning, pia weik arye akunum wininyake.

¹⁴ Winipmanto ara, Libanon mutuku, keil si deice arye, ikip mek pu kutukulirye, ikip ubuka tererem alamle ning ara, kum uptue. Atonun mutuku dam arye, doplirye balamle mek, mikip tererem aplirye mikip ulamle mek ara, pia kum ceproptue. Atouk, yuk ninye nirya arye, ‘Aning ara kum winiptue,’ tenenyak ning bukni, Israel ninye arye, aninguk wininyakce, pia malye ninguk weik wininyake.

¹⁵ Ara, na Allah arye wipdeiamse ninye, ‘Naʼ tenen nang, Israel ninye nirya arye, nati akunum batakalongoninyake. Wininyakce, talye ning ati, ‘Nun ni koproba anye,’ nyabuka, dipkoprob kum melipmanto ning bukni, sik nirya arye, Isa Mutuku Dongonye siuk kibuka, si erenyakce, siltong teleb ning ap, kam ning ap dobuka, uku danyake. Minop talak, narye sikti, ‘Abisik teleb ubuka banalyame,’ nyabuka, peterelamse bisik ara, batakuka, talye malye winin bisikuk banyake. Winipmanto ara, weik karayong bisik, diksukumuk una ati, teleb bisik yabuka deiamse ning batakuka, talye bai tam kwalin bisikuk banyake.

¹⁶ Wininyaka deice arye, amutuku noutamak unyak ninye arye, sik mutuku ak, malye kipdeipmake. Sik mutuku akunum malye kipdeibicopura, yuk mutuku ninye nirya eibikirye, ‘Se, sik aninye ap, sik unyak mutuku ap ara, pia malyeuk ulule,’ nyabuka nalenamake. Tonda, amutuku banamak ninye nirya arye, amutuku malye kipdeipniba, oldemuk danamle ning, eibikirye, ilil upliba, kisok borom-borom anamake.

¹⁷ Winipmanto ara, keting yangan tam arye, kumanya yangalirye, pu abuka, sung-sunga bobuka balamle touk, na mapu Israel ninye, sik on talak dam uplyopura, narye dobuka, sik oldan nang dam deipnamne. Winipnirye, ‘Aninye ara, daopnyake’ tenen, donga anipnamne. Winipnamne talak ara, sik aninye kum melinamne. Sik wenena ati, sik nong deice ikin ning weik deipnirye, kanye imun ning arepnamsin talak ara, anggun ton kum eipnamsine,” Allah arye nyabuk.

Israel ninye arye, ‘Anye Yeremia opnamabe,’ nyabika ati, nyabuk yupu

¹⁸ Allah arye, Yeremia biti nyabuk yupu dobuka, sik un dam laka nyalbiyukopura, sik Israel ninye, Yudea mutuku noutamak ulamik ninye arye, ayupu talinmek. Sikce sik kayapu yuk nang ati, “Anggun nirya yangalulume. Nun nirya arye, Yeremia biti binuka wenebibirye, opnuyaba ati, yupu talinamabe,” nyabuka, yuk nang nirya yukubik. Tonda, ayupu ton nyabik. “Yeremia elcuk, Allah yupu laka nyalya ati do? Kume, nun dam ara, Allah el si eren aik pum tam, pil don deiyok nang, imam-iman ap, Allah yupu laka lena deiyok nang, nabi-nabi ap, tonda, nun mutuku weik kel bikamik nang ap, tuba aunyak nang aryuk, ‘Wininamsile,’ nyabuka, sik yupu yanuka nyapsitinge. Yeremia bira, el talinye bukni, nyasulula anya arye, nun mutuku yupu bokolina deiyok nang arye, ‘El nong dobuka, wenena aik dongolbinamak’ tenen, Yeremia biti, ‘El malye nyalul yupu ara, anye,’ nyabuka, malye yupu nyapnamabe. Ati, Yeremia birye nyasulul yupu, ton kum kekenamabe.” Sik Israel ninye arye, Yeremia biti, nyabik.

¹⁹ Nyabikopura, Yeremia bira, sikce nyabik yupu kekebukce, Allah ati morobuk. “Se anda na ni Allah Yahweh ulyame. Nati, ‘Nun like, anye bira opnuyabe,’ tenenyak ninye arye, nati, ‘Opnamap’ tenen, yupu taleninyake. Ati, anyaninyak yupu ara, an kekebuka, kel bikmalam do? Melipnilyame,” nyabuka morobuk. Tonda ayupu nyabuk.

²⁰ Na ni Allah, an kele. ‘Ance Israel ninye nirya, obuka sirya daknamlam’ tenen, “Sik melina ati, ateneplum ning ara, bataknulyame,” nyabuka, sikti, moropkine na nio. Narye teleb ning winipseba, sik Israel nang arye, tamubuka nati, malye kilinmaniaka ara, teleb do? Ance nyapnulum yupu laka nyalamsiba, sik anang arye, ‘Anye Yeremia bira, talinye binya arye opnuyabe’ tenen, yupu talenmaniake. Winipnikce, nati, ‘Teling bisik sakturye, diptue’ tenen, bisik akunum palibuka kintinibik. Winipnik bukni, narye sikti, Allah moropkise. Ara, sik malye winilamik ning ati, ‘Allah arye aninye ati, bico tenepturye, kum wenebuka opnamle’ tenen, Allah an dam yanuka moropkise.

²¹ Ati, wini talak ara, Allah ance sikti, batakmimba, din patana ap, mal oldana ap deice arye, sik mapu nirya dipna teleb uka. Tonda, oldana deice arye, sik aninye nirya oltakana teleb uka. Tonda, yuk mutuku nang yakirye, sik akanye yapu nirya obikiba, kum dalyopura, sik amutuku noutamak nirya ara, kilapu youwak dem unamake. Tonda, mapu kum delinamake. Tonda wisi-wisi nang ara, weik kanye imun uk, dina deice arye, dibinamake. Sik kam nang ara, mal olan noutamak, ya arye seklobikiba, dibinamake, nyapne.

²² Tonda ance, yuk pera mutuku yu ninye nyapminba, talye karin arye, sik aik dam yakibuk eibikirye, sik amutuku ninye nirya, ilil upnamle. Winipmanto ara, ‘Yu weik nang, ubula dona ati yakibuk, sik aik unmace ninye eibikirye, ilil weik upliba, engelamak touk, winipnamak’ tenen, nyapne. Ara, amutuku ninye arye, ‘Anye biti opnuyap’ tenen, yupu talinyaka ati nyapne. Winipmanto ara, na sakuka bulyanganyaka ati, sikce akunum tuku palibuka kintinipnik. Aning atonun, sikce nati, wena pum bisik wekna ati, akunum kintinibuka delininyake. Ati ara, aninye nirya ara, ance wenepnalame, na nio.

²³ Bukni, na ni Allah, an si Yahweh ara, aning-aning nirya, bikilyamnye binya arye, na kele. Ance sik anang teneninyak kanye nirya ap, ‘Anye bira obibirye, kum daneiptibye’ tenen, yupu taleninyak ara, an akunum kel biklume. Ati ara, sikti, bico tenena ap, sik malye wininyak ning kilina ap ara, kume. Sik malye wininyak ning luba kina kumce, ‘Sik aninye ara, ance wenebuka opnalam’ tenen, moropkine. Winipmince, an tuba yu weik ukilye talak ara, ance tenepminye touk, sik dam malye kipdeipnulyame. Na ni Allah, anti moropkine. Yeremia birye, Allah ati nyabuk.