Yeremia 17 - Eipomek

Yehuda yala nang malye ulamik ning ati, wenebuk yupu

¹ Allah arye, sik Israel nang ati, nyabuk. Se, anggun Yehuda mutuku tam ululum nango, anggun malye winilulum ning nirya ara, akunum anggun talima noutam pia aunamle. Winipmanto ara, ninye arye, kat ning el si besi dobikirye, kat keil deice teleb uka delilamak touk, anggun malye winilulum ning pia aunamsile. Winipmanto ning ara, ton ninye arye, anggun mesba sirik tam, dana-dana tam dumbarye belelamle deice, ara sapi basam kisok deice tiklamle tace ning atonun, aning deice, pia kat seken ning doptingce, teleb uka deipting touk, anggun malye winilulum ning ara, anggun talima noutam pia ati aunamle.

² Sik Yehuda tam nang nirya arye, isa kil, el si Asyera, aisa si erena ati, mutuku dup arye, isa si eren aik domik ning ap, weik yo tikamukce, bok weik ulamle amu tam ara, aisa si eren aik ap, isa arena ati, mesba-mesba domik ning ap, Asyera isa si erena ati, cang ayukumna yo, ikuka deiamik ning ap ara, anggunce isa si erena ati, tuba-tuba arelbalamlume.

³ Tonda, weik asik dobuka, ulamikak arye batakuka, bai tam bukni, buta mutuku dup balulume. Ara, amutuku noutam nirya, mutuku kon deice ara, anggunce isa si eren ati, akunum memebuka deiamlumce, aisa ati arelbalamlume. Adeice arye, anggunda akunum malye weik winilulume. Ati ara, narye nyapniba, anggun on nang arye, anggun ululum mutuku noutam nirya yanuka, anggun talilulum ning ap, delilulum dekna weik ning nirya ara, mikip arye alubuka dobikirye, bobinamsiake.

⁴ Narye, ‘Sik amutuku pia unamakʼ tenen, teleb mutuku akunum bokuka, areamsise ning ara, tuba dobuka, anggun mal olan nang arepnamne. Tonda, narye anggun dopropsinirye, anggun mal olan nang deice deipsiniba, sik anang arye, anggun Israel mutuku nang bobuka, anggun bikina kum mutuku bobisikirye, ikin pil dipsikiba, donamlume. Aning nirya winipnamsina deiyok ara, anggun malye winimunya dengna atia. Na yu ara, akunum uku buk dilamle atonun unulule. Auku dilamle touk unulul ning ara, auku kum tangapmanto ulula ati, pia dinamlarya! Ati ara, ‘Winipnamsine,’ nyapmasin ning nirya ara, dipkoprob anggun wenena ati, narye anggun dam deipnamsine. Allah arye nyabuk.

Allah arye, peterena ati, yuk ning ton nyapdeibuk yupu

⁵ Na Allah Yahweh arye nyapsine. Nara anggun ni koproba Allah Yahweh unun bukni, anggunce bataknulumce, ninye koproba atibuk, ‘Sik mikip deice arye melipnamsiakca,’ tenemunce, talye tukwak nang ati, ‘Sik yuk mutuku nang aryuk, melibuka lyepsitinge,’ tenelulume. Aning atonun tenebikce nang nirya ara, narye wenebuka opnirye, kanye imun weik ning, sik deice deipnamnarya! Deiyok ara, sikce nati, diba tenena kumce, sik kanye talima noutam arye, tenibuka batakaninyake.

⁶ Aning atonun wininyak nang nirya ara, pia ikin weik unamake. Teleb ning ton, sik dam pia kum yanganamla ati, teleb ning ton kum elinamake. Winipmanto ara, pia buta mutuku, mek kum wamlye mutuku noutam ara, amutuku tuku pum tam, garam uwa weik abuka ati, ninye arye kouamikce ning yala-yala nirya ara, amutuku noutam teleb kibuka kum paptue. Ati, mutuku buta tuku deice arye, talye pabukaplirye, nelamle bukni, teleb kibuka kum palamle atonunuk, anang babye atonun, teleb kibuka kum unamake. Sikda teleb mutuku kum bukni, mek kum sukum, pia buppu weik buta mutuku noutamuk unamake.

⁷ Bukni, natibuk diba teneninyak nang arye, nati, ‘Allah Yahweh, elcuk melibuka lyepdopnamsilʼ tenen, sik kanye talima, na deice deipnikirye, tuba diba teneninyak nang ara, narye pia teleb kipdeipnamsine. Teleb ning ara, sik deice dobuka delinamna ati, anang ara, tuba-tuba teleb asa unamake.

⁸ Winipmanto ara, sik anang ara, ninye arye mitik yo dobuka, mek kup-kup ak donokikiba, ayo pabuka neplirye, el yating pur-purukuka, mek dongopliba, dou malamlya babye, bok teleb uplirye, kum koululamle atonun unamake. Amutuku noutam, dou man li upmalya babye, ayo kum koulupnamle bukni, el duk teleb kibuka tuba-tuba mounamle. Aning atonun, nati diba teneninyak nang ara, ikin unamle talak ara, ilil upliba, ‘Se yata winiptibye do?’ tenen, kanye teniltona, pia kum unamake. Sikce tuba teleb asa unamake.

⁹ Ninye kanye talima noutam arye, tenenyak ning ara, laka kibuka kum biktinge. Ninye kanye pum tam ara, dungnubuka talye-talye yupu uk nyasulula ati, pia yuk ulule. Yuk ning ton, tilila yupu nyalul bukni, ninye arye, sik talima noutam arye teninyaka ara, pia malye weik ulula ati, tilila ning ati, ‘Diba,’ tenebikirye, talye ninguk talibuka unyake. Ati ara, ninye arye, sik kanye pum arye teninyak ning babye, moubuka kum biktinge.

¹⁰ Bukni, na Allah Yahweh aryuk, ninye sik talima pum ulul ning ap, ninye arye teninyak ning ap ara, tukwak arye eibuka bikne ning ara, narye sikti, ‘Teleb wininamak do, malyeuk wininamak do?’ tenen, sik nirya ati winilenune. Narye tukwak nang nirya ati, tonok-tonok nang arye, sik wininyak ning, dawinilamiceba, nong akunum uplyopura, narye eipnyopura, sik winilamikiba, duk mouplyopura, narye sikti, kwang dakanune. Ara, narye sik winilamice touk, deken ning arenune.

¹¹ Winipmanto ara, maka arye, el duk deiamlya ani, yuk maka arye yanuka, aduk alabuka irilamle touk, el diksukum winina kumnye birye, talye yupu nyalamle deice arye, bona weik talibuka, tia talak ati, bona talinanye ulule. Abona talibuka ulamlya ani, akunum wisi dalyopura, el anye talilamlye ning nirya ara, kum danalule. Winibuka kum dalyopura, sirya talak ara, elda malye winin ning ap, pia walwal arye winilamlye ning ap ara, lake upliba, yuk nang arye biknamakca! Allah arye nyabuk

¹² Nyabukopura, Yeremia birye, tamubuka nyabuk. Se, nun ni Allah, an si erena ati, dobupu aik ara, pia telebuk ulule! Anyaik ati ara, winipmanto ning nyapnune. Ara, ninye deiyok nang arye bulamakak, el si tahkta bun ning, pia urasin teleb ning atonun ulule. Tonda, anyaik dobupu talak arye, dipdongobuka wini talak nirya ara, an si eren aik ara, weik tonun erebuka, mutuku deice atonun bukukba, an weik dirina weik aubuke. Ura, mutuku deice atonun min arye bukamuk atouk, wini talak babye, pia tuba aulule.

¹³ Se, Allah anti, an mapu Israel nang, nun nirya arye, ‘Nun ni Allah Yahweh el dem melibuka lyepropnamsile,’ tuba tenenamabe. Nun kanye pum tam nirya ara, an deiceuk deilinyabe. Ton nang ara, anti, batakanamkiak nang ara, ikin ning, sik dam yalyeba, dipkoprob alye upnamle. An Allah ati, ‘Nun likʼ tenen, batakikirye, yuk bisikuk banamak nang nirya ara, dibikcopura, sik akunum dibikce, unyak nang unyak mutuku uk, tuku amu tam, sik dam wekelbinamake. Ara, talye ati kum bukni, sik anang arye, an Allah ati akunum batakikce, donga tam kilongokinyaka ati, dibikcopura, akunum diamik nang dam binuka unamake. Na nio, anda Allah Yahweh, Kam Una Deiyoknye ulyame. Winipmanto ara, anda tukwak mutuku nang nirya ati, kam mek pu atonunye, Allah Yahweh ulyame. Bukni, sik malye wininyak nang arye anti, batakinyake.

Yeremia birye Allah ati, ‘Melipnilyame,’ nyabuka, morobuk yupu

¹⁴ Na ni Allah Yahweh, ance kwetep deipniminba, nara uk talina kumce, telebuk urdem unamne. Tonda, ance na lyepropniminba, nara telebuk unamne. Narye antibuk, si erebuka kipkinirye, an si erebuka, kanye deipkinirye, ‘Anda pia telebe,’ nyanamkine.

¹⁵ Na nio an babye elinilyame. Yuk nang arye, nati, nyaninyake. “Allah arye nunti, ‘Sik malye winin ning ati, ikin ning dobuka deipyopura, sik dam yanamle,’ nyabukba, ance laka nyapsulum ning ara, ayupu nong ara, dan sukum upmal do? Aning ara, dan talak arye, nun dam yanamsil do?” nyabuka, ngalukuka nalinyake. Ati ara, narye nyapne. “Naio, ance nun Israel nang ati, wenebuka arepnamsilam ning ara, adiparyuk nun dam yanuka, akunum upsutue,’ nyabuka, morokunune.

¹⁶ Nyanun bukni, na ni Allah an kele. An ‘Naʼ tenen nang, sik Israel yala nang ati, ‘Domba basam weina deiyoknye atonun ulamse ning ara, kum batakse. An amu tamuk, apil tuba talibuka donune. Tonda, na nio an kele. Na Yeremia birye, ‘Sik Israel nang dam ara, Allah arye kanye imun ning ton deiptua deice arye, anang nirya obuka sirya daktue,’ tenen, patapnuka ati kum nyalamse. Aning nyabuka, kum moropkise. ‘Sikda, ikin weik uptue,’ kum tenenune. Anyapmana ara, talye kum nyapmane. Kume, narye nyanun yupu nirya ara, an damuk nyanuna ati, ance na yupu kekebuka akunum biknilyame.

¹⁷ Na ni Allah, ance nati, ‘Ilil weik uptuba, talima uk diptueʼ tenen ning ara, na dam ton una meme. Dan talak do nirya, kanye imun ning, na dam yalyopura, nara an damuk, yanuka duknupnirye, namin asa arye, teleb kibuka unune. Anda erebuka ulyamce, na melibuka kalikiniminba, nara an amu tam yanuka, telebuk unune. Nabi Yeremia birye, Allah ati nyabuka morobuk.

¹⁸ Morobukopura, ayupu ton morobuk. Na nie, teleb ning ara, ani. Sikce nati doboninyakce, ikin ning, na deice delininyak nang ara, Allah ance sik dam alye un ning ap, ilil un ning ap, arepnamlyame. Bukni, ‘Ance na dam ara, aning nirya arepniminyakʼ tenen, moropkine. Na nio, ance sik damuk, kanye imun weik ning ara, sik deice dobuka deipmin buk, yalirye obuka bataklirye, nirya sice bukloplirye, kum danamake. Bukni, ‘Ance na dam ara, aning nirya, arepniminyakʼ tenen, moropkine.

Nabi Yeremia birye, sik Israel yala nang ati, nyabuk yupu

¹⁹ Allah arye, na nabi Yeremia dam yanuka nyapdeipnuke. “Yeremiao, anda Yerusalem weik asik dana-dana tam domik cang keil poka noutam bukni, Israel nang nirya talye ur wekelyanganamak bisik ati, ‘Ninye wekelban bisik bublan,’ nyabuka, botopdeibik bisik, abisik bublan dam binulyame. Abotopdeibik bisik bublan ara, Yehuda yala nang arye, ninye deiyok kibuka, talinyak nang ara, amutuku asik dobuka, unyak sukum binuce talak ara, abisik bublan dam wekuka banyake. Tonda, aninye deiyok nang arye, tamubuka banyak bisik bublan ara, anang aryuk wekikirye, tamubuka banyake. Ati ara, asukum bisik bublan damuk binulyame. Tonda, Yerusalem mutuku asik antanap dongobuka, domik keil poka noutam ara, yuk-yuk bisik bublan kintinibuka bocamikak nirya ara, dipra binamlyame.

²⁰ Abisik bublan dam biminyopura, sik Israel nang nirya ati, ayupu nyapnulyame. Ara, na Allah arye nyapdeipnukin yupu ara, abisik bublan dam bimince, sik Israel yala nang nirya ati, ayupu nyapnulyame. Ara abisik bublan dam yanuka, binuka kinyak nang ara, sik ninye deiyok nang, Raja-Raja nang ap, Yehuda yala nang nirya ap, tonda Yerusalem mutuku weik asik domikba, daunyak nang ap, sik dam binuka, ayupu nyapnulyame.

²¹ Abinuka nyapnalam yupu ara, ani. ‘Ara, nun ni koproba, Allah Yahweh arye nyapsile. ‘Nun malye winibibiba, Allah arye adiparyuk wenebuka opsiliba, dipnuyabe,’ tenepmunce, tonda, ‘Allah arye opsilyakʼ tenen, anggunda Sabat sum noutam arye, anggun bona ikin ning bobuka, yuk mutuku bana ara, pia meme. Tonda, bona bobinuka, ‘Yerusalem mutuku asik dana-dana tam, keil poka noutam botopdeibik bisik bublan arye, amutuku wekelbinamabe,’ tenena meme. Ati, Sabat sum deice arye, Yerusalem mutuku cang keil poka noutam botopdeibik bisik arye, binapna, yanapna kina ara, pia meme nyapsine.

²² Tonda, Sabat sum noutam nirya ara, talye pil kum dopnamluma ati, anggun aik koproba arye, yata bona nirya babye, boyanuka yukak bobana ara, pia meme. Asum ara, narye akunum kintinibuka deipsirye, anggun apu yapu nang ati, ‘Asum ara, ‘Naʼ tenen sum ulula ati, talye pil dona kumce, dikdik sepmunce, na siuk erenamnulume,’ nyapdeiamse. Ati, anggunda, aning atonun kintinibuka wininamlume. Ara, Sabat sum noutam ara, ‘Naʼ tenen sum ati, anggunce talye pil dona kumce, dikdik sepmunce, na siuk erepnamnulume.

²³ Bukni, anggun apu yapu nang arye, na nyapdeiamse yupu ara, kekena kum ulamik. Tonda, sikce, ‘Ayupu ara, Allah arye nyapdeipsukeʼ tenen, moubuka kum taleamik. Ara, sikce, pia ninye yupu kekena kum, kat kanye bobuka ulamikce, ‘Kume, Allah arye nyapsutua babye, elce nyapdeiamsuk yupu moubuka kum talipnamabe,’ tenelamikce, mandipna kanye bolamik. Sikda, weneptinya babye, moubuka kekena kum nang ulamike.

²⁴ Anggun apu yapu winilamik bukni, narye nyapsine. Na Allah arye nyapdeipsise yupu nirya ara, moubuka talipnamlume. Tonda, Sabat sum ara, Yerusalem mutuku bisik bublan arye bona bobuka, abisik wekelbana kum wininamlume. Aning kum bukni, Sabat sum noutam ara, ‘Naʼ tenen sum ati, na si eren sum ulula ati, anggunce talye pil nirya ara, asum deice arye, pil kum donamlume. Winipmunyopura, teleb ning ton arepniba, anggun dam yanamle.

²⁵ Ara ani. Dipkoprop, anggunda, na nyapdeipsise yupu moubuka talepmunce, dobolbamunyopura, ninye deiyoknye, Raja Daud birye, amutuku nirya talibuka winilamuk touk, aminyan talak, yuk deiyok nang, Raja-Raja nang ap, tonda sik amu tam pil dona deiyok koubuka talinyak nang ap, Daud bitonun Raja nang ap, tonda, Yehuda yala nang ap, Yerusalem mutuku weik asik noutam unyak nang ap, amutuku bisik bublan wekelyanganamake. Ara, minop talak sik neika, Yerusalem mutuku weik asik domikce, weik keil poka antanap dongobuka domikce, apoka noutam bisik botopdeiamika nirya ara, abisik wekenamake. Tonda, sik Raja-Raja nang ap, sik amu tam pil dona deiyok nang ap arye, sik ninye olbana ati, tuku deice ban ning, el si kereta kuda perang ap, kuda basam ap, aning deice bukikirye, binamake. Tonda, Yerusalem mutuku ara, lo mutuku pia kum upnamle. Ninye pia weik tonun, amutuku yanuka, pia aunamake. Doupnamle talak nirya ara, Yerusalem mutuku noutam ara, ninye pia aunamake.

²⁶ Tonda, sik Yerusalem mutuku dana-dana tam, yuk-yuk mutuku arye ninye weik yakirye, ‘Allah si erepnuyabeʼ tenen, kam ning boyanuka, arelyanganamake. Ara, Yehuda mutuku noutam dolamik mitik asik nirya ap, Yerusalem mutuku weik asik bobuka, unyak mutuku bukni, dana-dana tam unyak nang ap, amutuku yanganamake. Tonda, Yerusalem mutuku dana-dana tam mitik asik dobuka unyak nang ap, Benyamin yala nang, sik mutuku tam unyak nang babye, amutuku yanganauk wininamake. Tonda, Yerusalem kota dipdongobuka, keting kumulban tam, (arah barat) mutuku kon bukuka, amu tam unyak nang ap, weik mutuku deice tam unyak nang ap, tonda Yehuda yala nang unyakak bukni, dabu tam (arah selatan) tam mutuku, el si Negeb mutuku unyak nang ap, sik nirya ara, Yerusalem mutuku yakirye, na Allah ati arelyanganamnike. Sik anang nirya ara, na Allah Yahweh, na si erena ati, domba ato ning obikirye, boyanuka arelyanganamnike. Ara, uku dongobikcopura, uku arye dipnamle ning ap, tonda opnamak ning tup bobikirye, ton ning, uku dongonamak ning ap, uku kum dongonamak bukni, imam nang arye dinamak ning ap, tonda gandum duk ap, nintong teleb ning, el si kemenyan ap, arelyanganamniake. Aning-aning nirya ara, na Allah Yahweh ati, telebe nyan ning ap, ‘El ap, nun ap, teleb kibuka neika unamapʼ tenen, arenamak ning ap, aning nirya boyanuka, Yerusalem mutuku arelyanganamniake.

²⁷ Bukni, anggun Israel yala nang ara, na Allah arye, “Aning ara, wininamlume. Aning ara, pia kum wininamlume,” nyapdeipsise yupu uk, moubuka kum talipmunyopura, ikin ning arepniba, sik dam yanamlarya! Ara, narye, “Sabat sum ara, nati kintinip deipnutumce, talye pil dona kumce, dikdik sepmunce, na siuk erepnamnulume,” nyapdeipsise yupu ap, tonda, “Asum noutam ara, yata yala bona nirya babye, bobamunce, Yerusalem mutuku bisik bublan wekelbana kume,” nyapdeipsise ning bukni, anggunce na yupu kum kekepnumunce, yanipnumunyopura, narye anggunti, weik tonun wenepnamsine. Ara ani. Yerusalem mutuku weik asik wekelban bisik bublan nirya ap, tonda ninye deiyok nang, Raja nang unyak weik aik nirya ara, uku deipyopura, aning-aning nirya dibuka, sirya daknamle. Winiplyopura, adinamle uku ara, pia kum tangapmanto upnamake. Pia dinauk unamle! Na Allah arye nyapsine.