Yeremia 16 - Eipomek

Allah arye, Yudea mutuku nang wenepnamla ati, nyabuk yupu

¹ Allah Yahweh arye, na nabi Yeremia dam yanuka, ayupu nyapnuk. Ayupu ara, ani.

² Anda, amutuku noutam unamlam talak ara, kil pia kum dopnalame. Tonda, amutuku noutam, mapu babye, kilmapu babye ton, pia kum delinamlame.

³ Ayupu nyapmakina deiyok ara, ani. Ara, na Allah Yahweh arye, amutuku noutam akunum deiamik do, aminyan talak delinamak do, sik mapu ap, kilmapu ap, tonda amapu nirya, sik ni yapu ap, sik nin yapu ap, anang nirya arye delinamak mapu silip nirya ati, ayupu ton nyapsine. Anang nirya, sik deice ikin weik upnamle ning ara, laka nyapnusine.

⁴ Ara ani. Amutuku noutam unamak nang nirya ara, kanye imun weik uk dina deiyok ning yalirye, amutuku noutam unamak nang, pia weik tonun dipnamake. Adipnamak nang ara, sik kayapu nang arye, anang ati kum engenamake. Tonda, amutuku yuk nang ara, anggun mal olanmamunya ani, ninye on parang arye opnamsiake. Ton nang ara, sik din ning kum daliba, din patan deice arye, dipnamake. Tonda, sik dipnamak nang, sik tam nang arye sik nong dobuka, tuku palibuka, teleb kibuka kum weipnamake. Sik adipnamak nang nong ara, talye tuku deiceuk, dana-dana tam batakikiba, lyupnamle. Ara ninye arye, tuku deice talye oplomikiba saklamle touk, unamake. Ati ara, anang akunum dibikcopura, sik nong ara, talye tuku deiceuk bataksikiba, im tam lakuka balamle maka ap, bai mutuku talye daulamle kam ning aryuk, adipnamak nang, sik nong dobuka dinamake.

⁵ Dipkoprob, na Allah Yahweh arye, ayupu nyapdeipsine. Sik ninye dibikiba deipmakirye, ‘Seʼ tenen, wekmakce nang, sik aik ara, pia kum binamlume. Ninye dipmalinye deipmace aik ara, anggun yuk nang arye, kum wekelbanamlume. Tonda, adipmace nang nong dobuka, deipmace aik bimunce, anyaik wekmace nang ap, neika wekelbimunce, ‘Se, nun kayapu nang dipmaka ati, bouku peina ati, bico tenebuka, anang ap neika engepnamabe,’ pia kum tenenamlume. Anggunce, ‘Se, nun tam nang dipmakba, deipmak aik binuka, eibibirye, bico tenebuka, neika engepnamabe,’ pia kum tenenamlume. Tonda, ‘Nun kayapu nang engenmakiba, nunce sik talima mikip kibuka melipnamabe,’ tenena pia kume. Sik dam binuka, kum engenamlume. Aning kum wininamluma deiyok ara, ani. Ara, na Allah arye, anggun amutuku nang ati, ‘Teleb kipdeipsiniba, anggun nirya ara, telebuk unamake. Teleb kipdeipsiniba, telebuk ukcopura, anggun ap, yuk mutuku nang ap, mal olana kumce, kanye deibuka, tonok kanye bobuka, namin asa aryuk, neika unamake,’ tenyamsise ning ara, akunum batakne. Tonda, sik amutuku nang arye, malye winilamik ning ati, adiparyuk wenebuka opmatinye bukni, aning kumce, bico tenesinirye, “Winibuka teleb kipdeipnamsine,” nyapdeiamuk yupu deice arye nyamsise ning ara, na Allah Yahweh arye, “Aning nirya ara, batakne. Ateleb winin ning ara, anggun dam arye, akunum tamubuka dopropnamne. Aning nirya ara, anggunti, pia kum melibuka arepnamsine,” nyapdeipsine.

⁶ Weik sisi nang babye, mitik sisi nang babye, talye kankan nang babye, amutuku noutamuk weik tonun dipnamake. Sik adipnamak nang ati, kanye imun upliba, ‘Se, bicoeʼ tenen, ukirye ton kum engepnamake. Tonda, sik nong bobuka, tuku palibikirye, teleb kibuka kum weipnamake. Tonda, sik adipmakce nang, sik kayapu nang arye, ‘Se nun kayapu dipmaka ati, sikti, bouku peipnamapʼ tenen, malye kanye bobuka, nong bol deice, dila kum dopnamake. Tonda, sik Israel yala nang arye, sik kayapu dipmakce nang engebuka, bouku peina ati winilamlum touk, anggun kisok potong nirya ara, kobuka, delo dem kum unamlume.

⁷ Dipmalinye deibuka unmakce nang ati, yuknye birye, ‘Na kayapu nang talima melipnamneʼ tenen, roti kwaning dabuka boyalirye, kum yanuka arepnamle. Tonda, ‘Se sik wisi nang, na kayapu nang ara, sik ni yapu ap, sik nin yapu ap akunum dipmarakba, malye kanye bobuka unmak nang ati, sik ikin unmalya ati melipnuyapʼ tenen, teleb din ap, mek ap kwebuka, arebibiba, kum dinamake. Aning nirya ara bataknamlume.

⁸ Atonun, ton nang, kanye deibikirye, din ning ap, mek ap, kintinibuka deibikirye, weik kwalina kwalibuka deipmakirye, dinmace aik ara, anggunce kanye deibuka, anyaik binuka wekmunce, anang ap neika bukuka, sik kwalipmace ning neika kum dinamlume.

⁹ “Aning-aning kum wininamlume,” nyapmasina deiyok ara, nyapnusine. Ara, nara aning-aning nirya talibuka, pia deice tam ununye, nara Allah Yahweh, im deice yin talin malaikat nirya, sik weik deiyoknye unune. Anggun Israel nang nirya arye, natibuk, “Nun ni koproba,” nyabuka, na si ereninyaka ati, naryuk anggun nirya ati, nyapsine. Dipkoprop, amutuku unmalam talak aryuk, anggun asing aryuk eipnamlume. Kanye deibuka, yupu sisikilyam ning ap, pin-pin kanye bomlum ning ap, tonda kil don kwalina dibikirye, karye on ning ap, sal arye kilapu dopnamice nang ap, sikce dopnamice kilapu ap, anang arye, kanye deibuka pin-pin kanye bobikirye, kanye lon mot nyanamak ning ara, na Allah arye aning nirya, kum kipdeipnamne.

¹⁰ Ura, an Yeremia birye, anyapmakin yupu bobuka, amutuku nang sik kekenak binuka nyapminyopura, ayupu kekebikirye, sikce tamubuka asipdenamkiake. “Se, yata deiyok ati, Allah arye nun wenena ati, ikin weik ning dobuka, nun deice deipnamsil do? Tonda, yata malye winin ning winibupu ati, Allah arye wenepnamsil do? Tonda, yata malye winin ning ton, nunce, nun ni koproba Allah dam, yata malye wininyap do?” nyabuka, an Yeremia biti asipnamkiake.

¹¹ Asipkikcopura, an Yeremia birye, tamubuka sik Israel yala nang ati, nyapnulyame. Allah arye nyapsile. “Ara, anggun wini talak ululum nang, anggun apu yapu nang arye, na Allah ati akunum bataknikce, talye ning ati melibuka balamikce, ‘Nun ni,’ nyabuka, isa si erelamikce, atalye ning atibuk, si erelamika ati wenepnamsine. Winilamik bukni, narye, “Aning ara, wininamlume. Aning ara, pia kum wininamlume,” nyapdeipsiba, Musa birye sekamuk yupu ara, moubuka kum taleamikce, nati akunum donga tamubuka batakamnika atia. Aning nirya ara, anggun wenena ati, anggun nong deice, ikin ning deipnamsine. Anirya ara, Israel nang, sik kekenak laka nyapmince, ‘Allah arye nyapdeipmasile,’ nyabuka, laka nyapnalyame.

¹² Tonda, anggun wini talak unamlum Israel nang ara, malye pia weik tuba winilulume. Anggun apu yapu nang, min talak malye winilamik nang ara, mitik tonun malye winilamik bukni, anggun wini talak ululum nang ara, pia malye weik winilulume. Anggun wini talak unmalum nang ara, moubuka teniplulume! Anggun wini talak ululum nang ara, mandipna weik nang ululuma ati, anggun kanye aryuk tenibuka, winilulum ning ara, ‘Aninguk winipnamabeʼ tenen, pia malyeuk winilulume. Winimunce, narye nyasinye yupu nirya ara, anggunce, ‘Ayupu ara, pia kum kekepnamabe,’ tenemunce, na yupu batakalulume!

¹³ Aning winiluluma ati ara, na Allah arye anggun aululum mutuku noutam arye bobinuka, yuk pera mutuku noutam dopkwetepnamsine. Ara, anggun bikina kum mutuku, bobinuka donoknamsine. Tonda, anggun apu yapu babye, amutuku kum bikamik. Anggun yakuka yuk pera mutuku noutam donoknamsine. Amutuku binuka unamlum talak nirya ara, narye anggunti, ‘Bicoeʼ tenena kumce, pia kum melinamsine. Winipnamsina ati, awini talak ara, anggun bikina kum ning, talye isa ati, ‘Nun deiyoknye aulule,’ nyabuka, walwal aryuk, aning si erenamlume. Ara, keting noutam babye, sintam babye, aning atibuk, si erenamlume. Atalak ara, narye anggunti, ton tuba bico pia kum tenenamsine. Allah arye nyabuk.

Allah Yahweh el mapu koproba, yuk mutuku arye, tamubuka yanamika ati, nyabuk yupu

¹⁴ Allah arye ayupu akunum nyabukce, ayupu ton dukgobuka nyabuk. Ati ara, na Allah Yahweh arye, ayupu nyapdeipsine. Pia dipkoprop, nyapsine. Aminyan talak ara, na tenepse talak akunum kiplyopura, yuk mutuku nang arye, anggun Israel yala nang ati, nyalamik ning ara, batakdopnamake. Min talak ara, sik Israel yala nang ati, nyalamik. ‘Kume, Allah Yahweh, kam pia ululnye bira, el mapu koproba Israel nang ara, Mesir mutuku noutam ikin weik ulamik buk, lobuka lyepdobukce, anang dobuka boyanamukce, tonap teleb kipdeibuk,” nyalamik. Winibuka nyalamik bukni, aminyan talak ara, ayupu tonap pia kum nyanamake.

¹⁵ Tonda, aning atonun, ayupu ton nyalamik. “Kume, Allah Yahweh ara, kam pia ulula deiyoknye bira, el mapu koproba, sik Israel nang arye, malye winilamikba, elce, sik Israel nang yakdonokukba, yuk pera mutuku, dabu tam (arah utara) mutuku bobinamikba, ikin kanye bobuka ulamik. Sik nirya dabinuka ulamika ani, aminyan talak Allah arye, anang boyanuka, tuba tamubuka sik mutuku boyanamuk. Tonda, outam arye boyanamuk touk, yuk-yuk pera mutuku noutam arye, Allah arye sik Israel nang lyebukabukce, tamubuka, sik mutuku uk boyanamuk.” Minop talak ara, yuk mutuku nang arye, nyalamik bukni, aminyan yanamle talak ara, ayupu tonap kum nyanamake. Aning deiyok ara ani. Ara, aminyan doyanamle talak ara, narye anggun wini talak kam tuba unmalum Israel nang ara, anggun punun nang ati areamse mutuku uk, anggun wini talak ululum nang ati, tamubuka arepsinyeba, asukumuk unamlume.

¹⁶ Bukni, wini talak ara, na Allah arye winipmanto ning nyapsine. Ikan tomon nang arye, ikan weik tomolamak touk, ninye yukupniba, yakirye, amutuku nang yanuka tomopnamake. Tonda, narye bai kam ulamle ning, olban nang arye, aning dobonmakirye, olamak touk, ninye nyapniba, amutuku deice unyak nang ap, amutuku kon deice unyak nang ap, keil deiya dungnubuka unyak nang nirya ara, yanuka epra binamake. Eibikcopura, yakuka opnamake.

¹⁷ Winipnamna deiyok ara ani. Ara, narye sik amutuku nang wininyak ning nirya ara, akunum elinune. Sik wininyak ning nirya ara, na dam arye duknupmanto kum ati, yata ning do nirya, lakauk elinune. Ati ara, anggun amutuku nang arye, pia malye ning talibuka, wininyak ning nirya ara, elinauk unune. Aning nirya ara, kum duknupmanto. Ati, narye anang nirya wenebuka opnamnarya.

¹⁸ Sik malye wininyak ning nirya ara, yu weik unulula ati, narye tamubuka, anggun amutuku nang ati, like bitinye deice arye wenepnirye, kwang daknamne. Deiyok ara ani. Ara, sikce talye isa ati, “Nun ni koproba,” nyabuka, si erenyak deice arye, na mutuku koproba nirya, akunum malye kipdeipnika ati, amutuku noutam ara, na dam yakirye, na si kum erepnitinge. Sikce, ‘Nun ni,’ nyabuka, isa si erenyak ning ara, talye ning, kam ton kum ulul ning ati, si erenyake. Narye, ‘Amutuku ara, pia talipnamne,’ tenyamse mutuku, na mutuku koproba noutam ara, sik isa si eren ning, weik tonun akunum delilamika deice arye, amutuku akunum malye kipdeibike. Sikce amalye wininyak ning ap, aisa mer nirya si erena ati, patung ning delilamik ning ara, ‘Na pia like, tenenune. Allah arye na Yeremia biti, nyapnuk.

Nabi Yeremia birye, el diba tenyamuk ning ati, Allah Yahweh dam laka nyabuk yupu

¹⁹ Allah arye nyabukba, nabi Yeremia birye, tamubuka nyabuk. Na ni Allah Yahweh, anda erebuka ulyamce, mikip kilinilyame. Na kanye imun unilye talak ara, na ni anda, na mikip kelinilyamnye ulyame. Tonda, imun kanye bobuka, unun talak do, ikin ning yanuka unilye talak do, na mal olan nang arye opmanto uninyak talak do nirya ara, ancuk melibuka kalikinilyame. An damuk yanuka dungnubuka uniba, yuk nang arye kum opnitinge. Telebuk wininune. Tukwak mutuku im sirya, mutuku sirya, unyak nang nirya ara, ‘Elcuk melibuka lyepdopnamsilʼ tenen, an damuk yanganamake. Mutuku sirya, im sirya nirya unyak nang, an dam yakirye, nyanamake. “Nun apu yapu arye talibuka, si erelamik ning ara, nong kum ning, talye ninguk talibuka si erelamik. Tilila yupu uk, diba tenebuka taleamikce, dipkoprob nong kum upnamle ning, ninye kum melipmanto ninguk talibuka winilamik,” nyanamake.

²⁰ Ninye arye, ‘Isa si erenamabʼ tenen, talye ning dobuka, memepdeibikirye, “Ara, nun ni koproba,” nyabuka, si erenamting bukni, aning ara, teleb do, kum do? Winiptinga babye, aning deice arye, ninye aryuk, Allah atonun ning memepdeipting do? Kume, ara kum winipmanto! Ninye arye, ‘Talye ning si erepnamabʼ tenen, sik kanye aryuk memebuka delinyak patung nirya ara, dipkoprob Allah atonun ning pia kume. Aning nirya ara, talye ninguk ulule! Nabi Yeremia birye, nyabuk.

²¹ Nyabukopura, Allah arye, tamubuka nyabuk. Ati ara, an kel biknulyame. Na teninun ning ara, anggun Israel nang dam nyapnamne. Ton ap, narye sik dam nyapdeipniba, sik nirya arye biknamake. Ara, na mikip weik ununa ap, mikip weik arye pil donun ning nirya ap, peterepniba bikikirye, sikce, ‘Se, Allah ara, dipkoprob el si koproba ara, Yahweh ulule. Allah ara, Yahweh eluk ulule,’ tenebikirye, biknamake.” Allah arye nyapdeibukba, nabi Yeremia birye, kekebuka sekuk.