Yeremia 15 - Eipomek

Allah arye, “Israel yala ninye wenen ning, ‘Sik nong deice deipnamne,’ tenepse ning ara, kum bataknamne,” nyabuk yupu

¹ Allah arye, na Yeremia biti nyapnuk. Narye aninye ati, sik wenen ning kum bataknamne. Sik apu yapu, weik mambul nang, Musa ap, Samuel ap, na dam yanuka tikdikirye, ‘Israel ninye ati bico teneplyame,’ nyabuka, yanuka moropnirikce babye, bico kum tenepnamne. Sik aninye malye wininyaka anya arye, dekna ati wenepnamne. Aninye ara, dipkoprob narye sikti, dina lik unulula anya arye, sikda adiparyuk bindopnamnyake. Ance, aninye ati, ‘Allah dam arye batakuka bilulume,’ nyapnalyame.

² Nyapminba, sik aninye arye anti, “Se, nunda dan mutuku binamaba ati, nyapmasil do?” nyabuka asipdekicopura, ance tamubuka nyapnulyame. Allah arye nyapmasila ara ani. Narye, tenelamse touk unamake. Narye, ‘Aninye weik kanye imun uk dilya deice arye dipnamake,’ tenepse. Aninye ara, weik uk dilamlibuk, dipkoprob dipnamake. Tonda, narye tenepse touk, ‘Mal olanak bikiba, ya deice arye, obikiba dipnamake,’ tenepse. Tonda, aninye ara, mal olanmacak bikiba, ya sekna deice arye dipnamake. Tonda, narye, ‘Din ning patana deice arye dipnamake,’ tenepse. Ninye ara, dina nirya patalye deice arye dibinamake. Winibikce deice arye, sik nirya ara, dipna bisikuk banamake. Tonda narye, ‘Wenena aik binuka deibikiba, bulamica deice arye dibinamake,’ tenepse ninye ara, tapu koubikirye, wenena aik dongobikiba, aulamica deice arye dipnamake. Narye, sik Israel ninye tenyamse touk, sik nirya ara, dipna bisikuk banamake.

³ Na Allah arye nyapne. “Narye sik Israel ninye wenena deiyok ning, dumbarye ning ara, sik nong deice deipnamne. Ara, ninye nirya obuka sirya daknamne ning ara, ani. Sik yu nang arye parang ya dobuka, aninye olanmakcak arye, aninye obikiba, dipnamake. Allah Yahweh arye oplopliba, adipmakce ninye, sik nong ara, kam arye dobuka bobinamake. Kam arye dobuka dabobinuka deiplomikiba, talye lakuka balamak maka ap, talye bai tam kam unyak ning nirya ap yakirye, adipmakce ninye, sik nong yanuka dinamake.

⁴ Na Allah arye aninye ati, weik wenen ning arepneba, mutuku-mutuku daunyak ninye, aning eibikirye, ilil weik upnamle. Ilil weik upliba, sik nirya arye, ‘Se, Israel nang ara, nun like. Malye winililamikba, Allah arye wenebuk ning ara, ikin weik anya arye, aning ara, nunce tonap kum teniptibye,’ tenenamake. Na Allah arye, winipnamne ning nirya ara, urdem ati kume. Ara, Hizkia el mi Manasye, elce Yehuda yala ninye, sik ninye deiyoknye, Raja talibuka ulamuk talak, Yerusalem mutuku noutamak, aRaja arye, weik malye winilamuk ning dekna ati, wenepnamne.” Allah arye nyabuk.

⁵ Allah arye nyabuk. “Se, Yerusalem mutuku umunye ninyeo, yatanye birye, bico tenenamsil do? Yatanye birye, ‘Se, yata ning ati kanye imun ning, aninye nong deice yanmal do?’ tenen, anggunti kanye talima uk dinamle do? Tonda, yatanye ton yalirye anggunti, ‘Israel ninye ara, ikin weik tuba unyak do? Teleb unyak do?’ teneplirye, asipnamsil do? Kume, yuk ninye arye, sik Israel ninye ati, kum tenenamake.

⁶ Na Allah Yahweh arye nyapsine. Anggunce nati, akunum bataknulume. Anggunce, ‘Kume, aminyan talak nun malye winin ning batakuka, telebuk wininamabe’ nyanululum bukni, tuba malyeuk winiluluma anya arye, dipkoprob wenepnamsine. Minopce, ‘Namin kipniba, aminyan teleb winipnamak do?’ tenen, dinauk ulamsise bukni, wini talak ara, na lik unulula ati, tunim abuka kum unamne. Narye, ‘Anggun wenena ati, anggun opnamsin’ tenen, kintinyamsise ning ara, kum bataknamne. Wini talak arepnamsine.

⁷ ‘Israel ninye wenena ati, ikin ning arepnyopura, sik malye winin ning bataktingce, teleb wininamak do?’ tenyamsirye, anggun wenena ning, weik arye arelamsise bukni, anggun malye winin ning tuba kum batakalulume. Ati, anggun mutuku noutamak, asik dobuka ululum ninye nirya ara, asilen ning arenamsine. Winipmanto ara, wa win nang arye, ‘Gandum duk saklirye, bulubuka ‘Naʼ tenen, deipnamap’ tenen, malye ning wibuka donokolbalamak touk, malye ning weik winimunye ninye nirya, wibuka opnamsine. Anggunda talye ninye kume, na mapu ululum bukni, anggun wenena ati, kanye imun weik ning, anggun nong deice delinamsine. Deiyok ara, anggun malye winin ning batakuka, teleb kum winiluluma ati, wini talak dipkoprob wenepsinirye, obuka sirya daknamsine.”

⁸ “Tonda, anggun umunye mutuku noutamak nirya ara, ninye weik arye opnyopura, youwak kilapu batakmakibuk, yupa pia weik kum nukmanto upnamle. Winipmanto ara, weik laut mekwen lilunak, mek wininga yamulamle touk upnamle. Tonda, sik akanye yapu ara, kam talak aryuk opneba, kilapu nirya ara, youwakuk unamake. Tonda, sik aninye nirya ona ati, ninye dopdeipniba, keting noutam talak yangakirye, amutuku mapu, sik nin yapu eibikirye, ilil upliba, ‘Se, yata winiptinye do?’ tenepnamak bukni, sik kum tenebice talak arye, minopce sik ona deiyok nang arye, amutuku wel nang nirya oplopnamake. Sik nin yapu ara, weik imun kanye bobuka, kanye talima uk dinamle.

⁹ Atalak noutamak ara, lo arepneba, ninye weik obicopura, kil tonok, el mapu tekbarye deiamli bukni, sik amapu nirya dibicopura, akil, ‘Se’ tenen, teninmalirye, kanye kum dalirye, isin kum upliba, buku sukunamle. Keting noutam bukni, akilapu sik kanye ara, ‘Akunum inipmasilarye, lukunyan atonun upsile,’ tenenamake. Dipkoprop akilapu ara, sik mapu nirya dipnamake ati, alye weik upnamle. Minop talak arye kum obikiba, tuba kam unmace nang babye, narye lo arepneba, sik oldan nang deice, parang ya arye, aninye nirya obuka, sirya daknamake. Aning nirya ara, na Allah Yahweh arye, anggun wenena ati winipnamsine.” Allah arye nyabuk.

Yeremia birye Allah ati, ‘Se, ance nyapnulum yupu nyana ara, na ikine ati, yata winiptinye do?’ nyabuk yupu

¹⁰ Na Yeremia birye, Allah ati nyapse. “Se, dipkoprob na kum winipmanto upnile. Yata ati, na nin birye deiamnuk do? Na nin birye kum deiamnutu toura, teleb uka. Allah arye nyapdeipnukba, amutuku unyak ninye ati, laka nyanun yupu ara, kekebikirye, weik imun kanye bobuka unyake. Tonda, ayupu laka nyapnyopura, sik kekebikirye, yupu deice waldana ap, oldana ap unyake. Minop talak arye, diprongobuka wini talak babye, narye sik ning ton, diltakan kum unune. Tonda, sik patan ning, tia talak ati arepnice ning ara, yo bok weik arye, tabakuka ubula kum donune. Aning nirya kum wininun bukni, sik amutuku unyak nang nirya arye, nati malye yupu nyabuka sulamniyake. ‘Anye bira, nun pia like,’ teneninyake.” Na Yeremia birye, Allah ati nyapse.

¹¹ Nyapsiba, Allah el si Yahweh arye tamubuka nyapnuk. “Diba amutuku ninye arye, anti, ‘Nun like,’ nyapnamkiyak bukni, dipkoprob na Allah arye, lyepropnamkine. Narye anti, tenyamkise touk, an dam unirye, dukdongobuka teleb aryuk, pil dopnin bakinyopura, aminyan talak an dam unamle ning ara, telebuk unamkile. Wini talak ara, sikce anti, ikin ning deilikinyak ninye ara, aminyan talak, narye kanye imun ning, sik nong deice deipniba, ikin weik ubicopura, sikce anti, ‘Allah melipsutue’ tenen, ance melibuka, ‘Allah ati moronamsilame,’ nyabuka moronamkiake.” Allah arye, na Yeremia ati nyapnuk.

¹² Nyapnukce, Allah arye, sik Israel ninye ati nyabuk. “Tonda tonoknye birye, pia kat ning, besi ning ara, el taruk aryuk kum ceptue. Winipmanto ara, kat ning besi ning ap, tembaga ning ap, kum ceptue. Aning atouk, minopce utam mutuku arye, anggunti olyanamsiyak ninye ara, anggunce kum obisiptume, nyapsine.

¹³ Na Allah arye, anggun oldan nang dopdeipniba yakirye, amutuku talibuka unamake. Aukirye, anggun Israel ninye talemunye bona weik talibuka, un nang nirya yanuka, dalubuka dopropnamsiyake. Dekna kum diparyuk, amutuku noutamak, anggun dekna weik ning, talye lukparabuka dopropnamsiyaka deiyok ara, amutuku nirya ululum ninye nirya arye, malye-malye weik ulamlumba, anggun wenena ati winipnamsiyake.

¹⁴ Narye anggun mal olan ninye ati, lo arepneba, yanuka opsikirye, kam tuba unamak nang ara, tapu koubuka, sik mutuku tamubuka bobinamsiake. Anggunda kum bikamlum ninye, pera mutuku yu ninye noutamak, bobuka deipsinyopura, ninye asik nang atonun ulamunce, anggunda amutuku nang ati, talye pil dobuka melina nanguk ulamunce, sik amu tamuk ikin kanye bobuka, unamlume. Anggunce, ‘Se, yata ning ati, ikin unmasil do?’ kum tenenamlume. Ara, na yu ara, uku buk dilamle atonun unulula ati, nyapne. Auku buk dininto unmalye ning ara, yatanye birye tangap dongoptu do? Pia kume. Weik uku pia dilamle touk, na yu ara, kum kum danamle. Allah arye nyabuk.

¹⁵ Nyabukba, na Yeremia birye Allah ati, tamubuka nyapse. Se, na ni koproba, anda Allah Yahweh ulyame. Na ikin weik unilye ning ara, an akunum bikinilyame. Ati, na ikin unilye ning, pia tenepnimince, melipnilyame. Amutuku ninye arye, nati dobolkirikinikirye, malye yupu nyaninyaka anya arye, aninye ati, wenepnamlyame. ‘Ance sikti, kwang dakmince, na nong deice ikin ning delininyaka ati, ance sikti, wenepnalam’ tenen, moropkine. Ara, ance yupu nyapdeipnulumba, anyapnulum touk aninye ati, nyalbanune. Wininuna ati ara, aninye nirya arye nati, malye yupu nyanikirye, nati opmanto uninyaka ati, nyapkine. Ati, ‘Ance nati melibuka kaliknimince, lyepdopnamnilame’ tenen, moropkine.

¹⁶ Na ni Allah an kele. Ance, nati nyapnulum yupu nirya ara, akunum kekebuka dolonune. Ance nyanilyam yupu ara, pia talinune anya arye, na pia kanye teleb upnile. Ance nyanilyam yupu kekepnirye, ayupu ati, pin-pina asa arye unune. Na ni koproba Allah Yahweh, aning-aning nirya ap, im deice yin talin malaikat ap, nirya talibuka, sik weik deiyoknye ulyame. Winilyame ati, nara, an mi unune. Ati, yuk nang arye, nati, ‘Anye bira, Allah el amu tam pil donanye ulule,’ nyaninyake.

¹⁷ Nara, ninye yuk nang bulubuka wekmakirye, kanye deibuka, pia teleb-teleb yupu nyanmacak ara, na kum unune. Anda, weik mambul yupu nyapnulumce, mambul pil arepnuluma deice, na ikin kanye bobuka unune. Talye kanye bobuka unyak ninye ap, sik ap kum unune. An taruk arye, na deice deipnulumba, mambul kanye bobuka, na yuk uk unune. Ara, sik amutuku ninye arye, malye winin ning weik wininyaka ati, na babye, ‘Se, sik Israel ninye ara, malyeuk wininyake,’ tenen, mambul kanye bobuka unune.

¹⁸ Wininuna anya arye, na ni koproba, anda na yata deiyok ati, tuba-tuba kanye imun deiceuk unun do? Winipmanto ara, na weik susu dinilye ning ara, yata ati kum danmanto kum unulul do? Na ni Allah, narye anti, ‘Melipnamnil do, kum do?’ tenena arye, anti na kanye bokoltonulule. Winipmanto ara, mok li, mok weik celamle talak ara, mitik mek babye deiplirye, mikip arye balamle bukni, dou ulamle talak ara, celolamle tonun ulule. Atouk, mek pu dobuka balamlya celolamle atonun, ‘Na ni Allah elce melipnamnil do, kum do?’ tenen, na kanye bokoltonulule. Ati na ni Allah, na ikin weik unulule. Yeremia birye Allah ati nyabuk.

¹⁹ Nyabukba, Allah el si Yahweh arye, Yeremia biti tamubuka nyabuk. “Dipkoprop nyapkine. Ance na damak tamubuka yaminyopura, narye an dopropkinirye, melipnamkine. Winipkiniba, anda na damak tonap umince, na pil donanye unalame. Narye anti, weik mambul yupu nyapkiniba, ance ayupu kekebuka dopropmince, ‘Ayupu ara, deiyok aupnamle,’ nyabuka nyanamlyame. Talye tilila yupu ara, kum nyanamlyame. Ati, sikce, malye yupu nyapnamkiyake ning ara, kum kekenamlame. Winipminya deice arye, na yupu nyaipneba, na yupu laka nyana deiyoknye, nabi tuba unalame. Winiminyeura, sik Israel ninye nirya ara, tamubuka an damuk yakirye, ance nyanalam yupu kekenamake.

²⁰ Sik aninye noutamak, narye wibuka deipkinirye, talibuka melikiniba, mikip arye unalame. Winipmanto ara, pia kat ning, el si perunggu arye, cang poka dobikiba, kat ulamle atonun, anda sik aninye noutamak mandipna ilil kum asa unalame. Winipminba, sik aninye arye, ‘Anye bira, nun lik’ tenen, warikil yanganamkiyak bukni, kum opnamkiyake. Ara, talye ati kum nyapkine. Narye an damak unirye, anti melibuka lyepropkiniba, na amu tam unalame ati nyapkine. Na Allah Yahweh arye nyapkine ati, dipkoprob nong upnamle.

²¹ Wini talak anda pia malye weik wininyakce, pia yu weik unyak ninye, sik noutamak ulaminba, narye dipkoprob melibuka lyenamkine. Ara, deiyok kum upmalibuk, yu weik ukirye, yuk ninye ati, talye mania kanye bobuka, olonyak ninye noutamak unalam bukni, na Allah Yahweh arye, dipkoprob lyepropnamkine, nyapne.” Allah arye Yeremia ati nyabuk.