Yeremia 14 - Eipomek

“Yehuda tam noutamak ara, weik kanye imun dou li mapnamle,” nyabuk yupu

¹ Allah el si Yahweh arye, na Yeremia biti, weik dou li ton mapnamle nyapdeipnuk yupu ara, ani.

² Weik kanye imun dou li maplirye, mek nirya kum uplye talak ara, Yehuda yala ninye, asik dobuka unyak mutuku nirya ara, dipmanto upnamake. Winipnyopura, amutuku unyak ninye nirya, weik kanye imun upliba, ikin kanye bobuka, tuku deice mabuka, ngalukunamake. Tonda, Yerusalem mutuku unyak ninye nirya arye, mambul kanye bobikirye, ‘Se, nun yanuka melipsilyame,’ nyabuka, malye nyanamake.

³ Tonda, amutuku talibuka unyak ninye deiyok nang nirya arye, sik amu tam pil dobuka melin nang ati, ‘Tuku pum tam mekwen sumur palibik mutuku elbinamlume. Elbimunyeura, mekwen mitik anun ton aupmalya ak, eipmunyopura, mek kwebuka boyanamsulume,’ nyabuka, dibikiba elbanamake. Bukni, mek sumur palyamica ak, delilamle mek nirya, akunum ceprobukba, akunum kum ubuka anya arye, mek kum kwepnamake. Winibikirye, sik bopmace mek din makau ara, talyeuk tamubuka, boyakirye ilil uplirye, asing bi lulupnamle. Ati, ‘Nun deiyoknye birye, yatato nyapnamsil do?’ tenen, malye kanye bobikirye, sik kisok talepdakirye, sik nong nirya kanupdongobuka yanamake.

⁴ Atalak ara, mok ton pia kum cepnamle ati, amutuku tuku noutamak nirya ara, kel-kel aplirye, sesal sepnamle. Winiplyopura, wa wibuka yala ning kulamak ninye nirya, malye kanye bobikirye, kisok talibuka, kanupdongopnamake. Ara, ‘Se, nun koun ning nirya koulusulul’ tenen, malye kanye bobikirye, kisok kanupdongopnamake.

⁵ Tonda, maning palamle ning babye, ton pia kum aupnamle. Selal seplirye, kum danamle. Winipliba, rusa basam kil ara, el mi winiryuk deipmaliryuk, batakuka bindopnamle. Ara, abasam el dipmanto maning winiryuk palamle ning pia kum ati, batakuka binamle.

⁶ Tonda, maning nirya kum upliba, bai tam ulul keledai basam, mutuku dup deice talye tikmalirye, maning ton kum diplyopura, el asing bam nalaknamle. Ara, mek ap, mutmuta ap patapliba, isin nep-nep aplirye, el yupu ara, bai kam, kam ulamle atonun nyanamle. Allah arye nyabuk.

⁷ Nyabukura, Yeremia birye, ayupu nyabuk. Se, nun ni Allah. Ance talye ati, kum nyapmasilame. Dipkoprop nun Israel ninye ara, malye-malye ning weik unyaba deice arye, akunum lak upsilak, yuk nang nirya eibikirye, “Diba, sik Israel ninye ara, malyeuk wininyake,” nyasinyake. Diba, nun ni Allah, nun babye malye wininyap ning, dekna arye wenepnamsilame. Nunce antibuk, malye wininyap anya arye, merekuka wenepnamsilame. Kumopura, an si ati, yuk nang nirya arye, malye nyapnamake. Nyabuka wenepnamsilam bukni, “Naio ance nunti, lyepropnamsilame,” nyabuka moropkiyabe. Ara, ‘An si tuba erenamkiap’ tenen, nyapkine.

⁸ Diba, nun ni Allah, anda nun Israel ninye ati, pia melibuka kalikisilyamnye ulyame. Tonda, yu ninye arye nunti, opmanto usinyak talak ara, melibuka lyesilyame. ‘Allah elcuk winisulule,’ tenekinyabe. Bukni, yata deiyok ati, ance kum kekelamsiyak nang atonun upnamsilam do? Winipmanto ara, ninye asik nang, tia yanuka tonok lukunyan yanuka mapmaca, adiparyuk balamak nang atonun upnamsilam do? Tonda, yuk mutuku ninye asik nang arye, nun mutuku tikilyanabica ani, adiparyuk tamubuka, bisik balamak nang atonun upnamsilam do?

⁹ Tonda, nun ni anda yata deiyok ati, kanye bokoltoliba, ‘Yata uptibye do?’ tenen, pia walwal ulamak nang atonun upnamsilam do? Tonda, nun ni Allah, ance mal oldana deiyoknye, mikip weik weiknye birye, el mapu ati, ‘Melipnamne’ tenelul bukni, pia yukak uptopura, el mapu kum melipmanto ulamle touk, upnamsilam do? Aning nyapman bukni, winina ara pia kume, na nio. Dipkoprop, anda nun ni Allah, Yahweh nun kan-kan tuba unamsilame. Tonda, yuk ninye nirya arye, nunti, ‘Sik Israel ninye ara, Allah Yahweh, el mapu koprop unyake,’ nyabuka, sisibuka nyasinyaka anya arye, ‘Ance kum bataknamsilam’ tenen, moropkine na nio. Yeremia birye nyabuk.

¹⁰ Nyabukce, ayupu ton dukdongobuka nyabuk. Allah el si Yahweh arye nyapmasile. Anggun amutuku ululum Israel ninye ara, na dam arye batakuka, yukak tuba-tuba balulume. ‘Malye una ati, yukak bipyak’ tenen, anggun babye anggun bidamang ati, kel bikuka kum kalikildalulume. Talye luba kibuka, malyeuk winiluluma anya arye, anggunti, kanye kum deilisunune. Anggun malye winiluluma ati, lik unulula anya arye, na dam ton kum yanamlume. Ati ara, narye anggun malye winilulum ning nirya ara, namin kibuka kum batakdongopnamsine. Tuba tenenuna arye, anggun malye winimunye ning ati, wenebuka opnamsine. “Allah arye nyapdeipnuke,” Yeremia birye nyabuk.

¹¹ Allah el si Yahweh arye, na Yeremia biti nyapnuk. Ance sik Israel ninye ati, ‘Na ni Allah, aninye teleb kipdeiplyame,’ nyabuka, kum moronamnilyame.

¹² Sik amalye winilamice ning nirya ati, ‘Se, nun malye wininyap ning ati, mambul kanye bopmabe. ‘Aning kilipsimince lyepnamsil,’ tenebikirye, din dina kumce, si tebuka ukirye, moronamniyaka babye, kum kekenamne. Tonda, Israel ninye arye, ‘Se, nun malye wininyap ning ati, Allah arye talye mangkau kibuka oplopsutu bukni, nun malye wininyap ning kilipsilirye, namin kipnamsil’ tenen, ‘Nun nong pununa ati, kam ning ap, koulamak ning gandum ap bobuka, yanuka uku danamabe,’ tenebikirye, winibica babye, adeice arye anggunti, kanye kum delinamsine. Yu tuba unamnile. Aning-aning nirya arepnikirye, moronamniyaka babye, sikce moronamniyaka babye, na kekepnirye, kanye kum delinamsine. Kwaning dina kumce, mambul kanye bobuka, arin ning arepnitinga babye, narye tamubuka, sik dam ara, oldana ap, din patana ap, wa wibuka kouamice ning kouluna ap, weik imun kanye bon uk dina ap, arenamsine. Ara, sik malye wininyak ning dekna ati, kanye imun ning weik arepnirye, wenepnirye, obuka sirya daknamne. Allah arye nyabuk.

Tilila yupu nyanyak nang arye, ‘Allah nyapdeiamsuk yupu nyapsiyabe,’ nyalamak ning ati, nyabuk yupu

¹³ Na Yeremia birye, Allah ati nyapse. “Se, na ni Allah Yahweh, anda aning-aning talibuka deice tam, Weik Erena Deiyoknye ulyama anya arye, ance, ‘Winipnamne,’ tenelyam touk winilyame. Nun walwal usulule. Yata ning teninamap do? Ayupu nirya nyapmalamba, kekepmakin bukni, tuba tonap asipdekine. Ton nang arye, ‘Allah arye nun nabi-nabi nang ati, el yupu nyapmasilba, sikti, laka lenyabe,’ nyasinyake. Anang arye nyasinyak ara, ‘Kume, aminyan talak ara, yu yin talin nang arye, kum olyanamsiyake. Tonda, dina ton kum patapnamsile. Aning kum bukni, Allah arye, pia teleb kipdeipsiliba, nun unyap mutuku noutamak ara, talye kanye bobuka, pia telebuk unamabe,’ nyabuka, nyalin yupu nyasinyake. Anang arye nyapsik ning ara dan do?” nyabuka Allah ati asipdese.

¹⁴ Nyapsiba, Allah el si Yahweh arye tamubuka nyapnuk. “Anang arye, nyasikce yupu ara, narye kum nyapse bukni, sikcuk tilila yupu nyanyake. Atilila nabi nang, sikcuk, ‘Allah arye nyapdeipsuk yupu nyanyabe. El si deice arye ayupu nyasinyabe,’ nyalamik bukni, dipkoprob narye kum nyapdeiamse yupu, tilila yupu uk nyanyake. Narye sik atilila yupu nyanyak nang ati, ‘Ayupu nyalbinamlyame,’ kum nyapdeiamse. Tonda na ap, sik ap neika, yupu kum taleamupu. Sik dam lengdar deice eibikce, ‘Aning winipnamle do, aning winipnamle do?’ tenen, nyalamak yupu ara, sik mining kanye aryuk tenebuka nyasinyake. Sik tilila nabi nang arye, nyanyak yupu nirya ara, tilila yupu uk nyalisinyake. Ayupu dib tenena kume.”

¹⁵ “Tilila yupu uk nyanyaka ati ara, na Allah Yahweh arye nyapsine. Na si deice, sik anang arye, ‘Israel ninye ululum mutuku ara, mal oldana ap, din patana ap, kum upnamsile,’ nyanyake. Nyalamsiyak ning ara, na Allah arye, ‘Nyalbinamake’ tenen, nyabuka, kum nyapdeiamse. Tonda, atilila yupu nyanyak nabi nang ara, narye kum dopdeiamse. Anang ara, tilila yupu uk nyanyaka anya arye, sik anang wenena ati, na Allah Yahweh arye nyapsine. Tilila nabi-nabi nang ara, narye sik dam arepnamne ning ara, mal oldana ap, din patana ap deice arye, aninye obuka batakneba, dipnamake. Anang nirya, obuka sirya daknamne.

¹⁶ Tonda, atilila yupu nyana nabi-nabi arye nyalamikba, sik yupu kekelamikce, ‘Dib,’ tenelamik ninye babye, din patana ap, mal oldana ap deice arye, dipnamake. Adipnamak ninye, sik nong dobuka, Yerusalem mutuku bisik talye donoknamake. Teleb ubuka kum weipnamake. Weik kanye imun ning weik arye, sik aninye nong deice deipneura, weik arye dipnamak bukni, winipniba sik mapu ap, sik kilapu ap, sik yala nang nirya ap arye, adipnamak ninye kum weipnamake. Nirya opnirye, sirya daknamna ati nyapsine. Winipnamna deiyok ara, sik aninye arye, malye winilamik ning dekna ati winipnamne,” Allah arye nyabuk.

¹⁷ Allah arye, na Yeremia biti wipdeipnukce, nyapnuke. “Yeremia ance, sik Israel ninye ati, laka nyalbinulam yupu ara, ani. Narye sikti, bico tenena arye, nara sikti, tunim abuka kum unamne. Keting noutam babye, lukunyan babye nirya, ‘Naʼ tenen, ninye ati, pia engenauk unamne. Winipmanto ara, tonoknye el kilmu, kanamuk ulamlya ani, diplyopura, ikin kanye bobuka ulamle touk, unamne. Ara, ‘Naʼ tenen, Israel ninye deice, kanye imun weik ning yaliba, mambul weik unamaka ati, nyapne. Winipmanto ara, ninye arye tonye biti, mikip arye obikiba, weik suse dilamliba, ikin kanye bobuka, donmalya ani, aminyan diplamle atonun, ‘Naʼ tenen, ninye dam, kanye imun weik ning yanamla ati, engenauk unamne.

¹⁸ Weik ikin ning, sik nong deice yanamle ning ara, urdem ati kume. Deiyok ara, na Allah ati, si erebuka kininyak aik pum tam, pil dona deiyok nang, imam nang ap, narye yupu nyaipneba, na yupu laka nyana deiyok nang, nabi-nabi nang ap arye, pil teleb ubuka kum donyake. Narye, ‘Aning wininamlulume. Aning ara, kum wininamlume,’ nyapdeiamse atonun kum bukni, sik nirya pil donyaka ara, ‘Deiyok asukum’ tenen, kel bikna kum diparyuk, talye donyake. Wininyaka ati ara, narye lo arepneba, yu nang arye, Israel ninye ati yanuka obikiba, dipnamak ninye weik upnamake. Tonda, bai tam bindobice nang babye, parang ya arye, oplopnamake. Winibice nang, sik nong eipnamne. Aning atouk, sik weik asik dopra, ulamik mutuku noutamak babye, binuka eipnyopura, weik kanye imun din patana ap, uk dina ap deice arye, dipmakce ninye, sik nong dana-dana nirya, batakmace nang ara, eipnamne.” Allah arye nyabuk.

Israel ninye arye, Allah ati, ‘Bico tenebuka melipsutue’ tenen, morolamik yupu

¹⁹ Israel ninye arye, Allah ati nyabik. “Se, nun ni Allah, ance Yehuda yala ninye nirya ati, pia bataksulum do? Tonda Sion mutuku unyak ninye ati, lik upkiliba yu tenesilyam do? Yata ning deiyok ati, ance nunti, weik yu deice arye oplopsiminba, kam kum buktibye do? Imun kanye bobuka unyaba ati ara, ‘Olana kum aryuk, yuk ninye ap, Allah ap dukdongobuka, teleb una ara, yata wiribuka deice arye winiptibye do?’ tenen, enyak bukni, talye ati enyabe. Tonda, ‘Allah arye nunti, lyepnamsilamca’ tenenyap ning ara, talye atibuk tenenamabe. Ati nun dam winisilyam ning ara, yu ninguk arisilyame.

²⁰ Diba nun ni Allah, dipkoprob nunce an dam malye wininyabe. Nun ni Allah Yahweh, nun babye malye wininyap ning ap, nun deiyok nang arye, malye winipnin yangalamik ning nirya ara, an damuk laka nyapdeibape. Aning nirya ara, kum duknupnuyabe.

²¹ Nun ni Allah ance nunti, ‘Winibuka wininamlulume. Winipmunyopura, pia dib talepsinirye, anggunti teleb kipdeipsinirye, pia melibuka kalikinamsine,’ nyabuka, nyalina yupu nyaiyamsulum ninguk, tamubuka tenepnamsilyame. Ance nunti bataksiminyopura, ‘Yuk ninye nirya arye, an si ati, malye nyapdeipkicak’ tenen, nyababe. Anda aning-aning nirya talibuka, deice tam umince, urasin teleb bulamak ning deice buklumce, nun ninye deiyoknye ulyame. Tonda, anda Weik Erenanye ulyame. Ati, ance nun an ‘Naʼ tenen, ninye ati, bataksiminyopura, yuk nang arye, malye yupu nyapnamkiyake. ‘Nyapkicak’ tenen, nunti yu tenena kume, na nio. Ance nunti, nyalin yupu nyaiyamsulum ning ara, batakana kume. Amutuku ap, nun ap ati, yu kanye bona kume, nyababe.

²² Nun ni Allah, nun kele. Mutuku-mutuku nirya arye, kwemdina ning Isa Mutuku Dongonye si erenyak ning ati, ‘Mok arepsilyame,’ nyabuka moroptibye babye, mok kintinibuka kum arepsutue. Tonda, im noutamak ulul ning aryuk, mok tukwak mutuku kum dopkweteptue. Aning nirya kum bukni, Allah ancuk, nun patapsilye ning nirya arisilyame. Ati ara, nunce an deiceuk, nun kanye delinyabe. An dem aryuk, aning-aning nirya arisilyame.” Israel ninye arye, Allah ati ayupu nyabik.