Yeremia 13 - Eipomek

‘Deiatinga delina ati ara, malye ubuke,’ nyabuk yupu

¹ Allah Yahweh arye, na Yeremia biti nyapnuk. “Anda biminyakarye, deiyok deice deibuka, nong ongona ati, kain lenan arye bumang celana wibuka deibik ning ara, dekuka ongopnulyame. Bukni, nong deice deiatinga delina ati bumang celana ara, mek kum bolpipnamlule.”

² Allah arye ayupu nyapdeipnuk touk, abumang celana, adiparyuk binuka dekse. Akunum deksopura, adiparyuk abaju ongopse.

³ Abaju akunum dekuka ongopsopura, like bitinye talak, Allah arye na dam ati, yanuka nyapnuke. Ayupu ara ani.

⁴ Weik mek, el si ara Efrat mekin, biminyakarye, adiparyuk an nong deice deiatinga delina ati, dekuka an deiyok deice ongopmalam baju ara, kwiribuka keil deiya binuka, duknubuka deipnulyame!”

⁵ Nyapdeipnukba, na adiparyuk bisirye, nong ongona ati bumang celana ara, Allah arye nyapnuk touk, weik Efrat mek balamuka, lilun binuka, keil deiya pum duknubuka deipse.

⁶ Dabinuka duknup deipsirye, ulamsa ani, ouku weik akunum kibukopura, Allah Yahweh arye, na dam yanuka nyapdeipnuke. Ara, narye anti, “An adiparyuk Efrat mek lilun tam biminyakarye, bumang celana dekmince, Efrat mekin dam duknulbinulyame,” nyapkiseba, duknuplum ning ara, binuka doyanulyame!” nyapnuke.

⁷ Nyapnukba, na adiparyuk, Efrat mekin bisirye, duknubuka deiamse bumang celana ara, enmasa ani, adiparyuk eibuka dopse. Bukni, abung baju ara, akunum lyubuka kwiliksakalamuka ati, deiatinga deibuka kitilongon ning ara, ton kum kintinibuk.

⁸ Aning winibuka ati ara, Allah Yahweh arye na dam yanuka, nyapnuk.

⁹ Allah arye ayanuka nyapdeipnuk yupu ara, ani. Yehuda yala nang ap, Yerusalem mutuku unyak nang ap, sik talima erebuka ukirye, maknya kininyak nang ara, narye imun kanye weik bon ning nirya, sik anang deice dobuka deipnirye, sice buklobuka, kum kipdeipnamne.

¹⁰ Amalye unyak nang ara, pia mandipna nang unyak ati, narye sikti, nyalinun yupu nirya ara, kum kekenyake. Sikda, talye ning atibuk dobolbakirye, isa siuk erebuka unyake. Ati, narye sikda bumang celana malye kibukba batakik touk, sik amalye nang ati, aning babye, bataknamne.

¹¹ Winipmanto ara, ninye baju bumang celana ongobikirye, deiyok deice delilamak touk, Yehuda yala nang ap, Yerusalem mutuku nang ap ara, ninye arye bumang celana deiatinga deibuka, nong kitipdongobuka, koulongolamak touk, ‘Sikda na deiceuk unamakʼ tenen, patanulule. Adeice arye sikda, na mapu unyak nang nirya arye, na si bikina ap, na si erena ap, wininamaniake,’ tenenune. Bukni, na mapu sikce, na yupu kum kekeninyake. Allah arye nyabuk.

Anggur mek libuka delin ning, cobuk yupu

¹² Allah Yahweh arye, na Yeremia biti nyapnuke. Ayupu ara, sik Israel nang ati nyapnulyame. “Nara, anggun Israel nang, anggun ni koproba Allah Yahweh arye, akunum nyapdeipmane. Anggur mek lina ati, domba obuka, bola kobik ning arye wibuka deibik ning ara, anggur mek libibeura, langdipnamle,” nyapnulyame. Nyapminyopura, sikce tamubuka, anti nyapnamkiake. “Kume, nun moubuka akunum bikupu. Nunce anggur mek lina ati, moubuka deibupu ning ara, anggur mek libibiba langdipnamle. Ance, ‘Anang ara, aning kum kel bikikʼ tenepmasilama ati, ayupu nyapmasilam do?” nyapnamkiake.

¹³ Ati ara, an Yeremia birye sikti, tamubuka nyapnulyame. ‘Allah el yupu ara ani. Dipkoprop, sik Yerusalem mutuku unyak nang ap, Yehuda yala nang ap, tonda amutuku talibuka, Raja kibikirye, Raja Daud bun ning, el si tahkta deice bunyaka deiyok nang ap, Allah el si eren aik pum tam, pil donyak nang, sik imam nang ap, Allah el yupu laka nyana deiyok nang, nabi nang ap nirya ara, yu anggur mek pia weik kwepdeipniba, langdiplyopura, sik amutuku noutam unyak nang nirya dibikceba, kisok birbir aplirye, kanye walwalapnamle.

¹⁴ Ati ara, na Allah arye tonoknye dopropnirye, tonye deice dobuka donoknyeba, pia malye kibuka opnamle. Tonda, sik wisi nang ap, mapu ap nirya ara, dopropnirye, sik deice donoknamne. Na Allah arye sikti, bico tenepnirye, kum bataknamne. Narye anggunti, bico kum tenepnamsine. Pia kum kipdeipnamsine. Ayupu ara, na Allah arye, akunum nyapdeipne.

Yudea tam nang bobuka, pia pera mutuku bobinuka deipnamika ati, nyabuk yupu

¹⁵ Anggun amul pakeibuka kekenululume. Anggun kanye erena meme. Ara, Allah Yahweh arye, ayupu akunum nyapdeipmasila ati, nyapsine.

¹⁶ Anggun ni koproba Allah Yahweh, elce nyamuk sum, tamubuka kunukna arepnamle talak aryuk, Allah el tibuk, si erenalume. Kunukmiting aplyeba, anggun weik mutuku kon deice kwepmunyak arye, anggun yan dum min kum dukmasilye talak aryuk, anggun si erelulum Allah ara, el si erepmunce, ‘Elda pia telebe,’ nyanamlulume. Anggunce, ‘Nun dirina ara, dan tam arye yanamle do?’ tenen, kintinibuka dinamlum bukni, Allah elce tamubuka, “Asum ara, kunukna deipnamle. Malye uplye ati, asum noutam ara, pia kunukmiting,” apnamle.

¹⁷ Anggunce na Yeremia nyapdeipsin yupu, kum kekepnumunyopura, na adiparyuk, ninye babye kum banyakak dabinirye engenamne. Ara, sik kanye talima erena deice arye, maknya kilanyaka ati, nyapne. Na asing maka langdipnilirye, saknamnile. Ara, winipmanto ara, anggunda, Allah el weilul domba atonun ululum bukni, yu nang arye anggunti opsikirye, tomobuka sik mutuku tamubuka bobicak arye, wenen aik dongopnamsiaka ati, aning eipnirye engenamne, nyapsine. Nabi Yeremia birye, nyabuk.

¹⁸ Nyabukopura, Allah arye ayupu ton nyabuk. An Yeremia birye amutuku Raja ap, el kil ap, sikti, nyapnulyame. ‘Anggun weik erelin bun ning deice bururum ning ara, batakuka tukwak bun deice bulyanururume. Ara, talye ati kum bukni, deiyok ara, Raja anda, weik deiyoknye ulyama ati, pia teleb kisok kalurum topi, el si mahkota, an kisok deice arye, akunum sakmakile.

¹⁹ Yudea tam bukni, iknapnye tam (arah selatan), el si Negeb mutuku noutam, weik asik domikce unyakak nirya ara, cang keil poka dobuka, bublan botopdeibikak ara, akunum tirikdongopmake. Deiyok ara, anggun mal olan nang arye, akunum yanuka antanap dongobuka warekmasiakce, onamasiaka atia. Ati, ‘Nun mal olan nang arye, obuka sirya daksicakʼ tenen, atirikdongopmak bisik bublan ara, tonoknye babye, amutuku binuka, sik weik bisik bublan kum kukdeiptue. Anggun mal olan nang arye, anggun Yehuda tam umunye nang nirya opsikirye, tapu koubuka, sik mutuku bobinuka deipnamsiake. Yuk lo mutuku noutamuk donoknamsiake. Amutuku noutam ululum nang nirya ara, adiparyuk bobuka, yuk lo mutuku uk, bobinuka donoknamsiake.

²⁰ Aning ati ara, Allah Yahweh arye nyabuk. Se, anggun Yerusalem mutuku ululum nango, anggun asing erebuka, dabu tam (arah utara) dipdenamlume. Anggun olyangana ati, anggun mal olan nang ton, akunum yanganmake! Ati ara, Allah arye, anggun deiyok nang ati areamsik nang, sik domba atonun talibuka ululum nang nirya ara, dan tam binuka unamak do? Tonda, anggunce ikin nyalamlum nang ara, dan mutuku biyik do? Ati, anggunce ilil yupu nyanamlum do?

²¹ Na kayapu, anggun tenipdelulume! Allah arye lo arepliba, anggun mal olan nang arye yanuka, akunum obukapsikirye, talipsikcopura, anggunce yata nyaptum do? Min talak ara, anggunce, ‘Kume pera mutuku nang ara, nun kayapu nang unyaka ati, yuk mutuku nang arye, olyanganamsiak talak ara, anang arye, ton yanuka melipnasiake,’ tenelulum bukni, dipkoprob atalak ara, anang aryuk, anggunti olyanamsiake. Anang arye, yanuka opsikcopura, winipmanto ara, kil mi bolya ani, mi deiya dinmalyeba, uk dilamle touk, aminyan talak anggun ton, aning atonun kum winipsilya ati ikin kanye bobuka, kum upnamlum do?

²² Tonda, aminyan talak anggun kanye noutam aryuk tenepmunce, asilanamlulume. Ara, ‘Se, yata deiyok ati, aikin ning nirya ara, nun deice yasukba, doprobupu do?’ tenamlume. Atenamluma ara, anggun malye winin ning weik winina deice arye, akanye imun ning, anggun dam akunum yanganmal atia. Anggun malye weik winiluluma ati, anggun wenena ati, anggun mal olan nang arye, anggun mutuku noutam unyak kilapu alubuka doprobikirye, yonamake. Sik ongonyak baju kain sirik dopdobikirye, malye kiplinamsiake.

²³ Anggun bikina ati, tenipdelulume! Winipmanto ara, Etiopia mutuku nang, sik mirin bol bonyak nang ara, tamuptuba, kurun nang kum kiptinge. Tonda bai tam kam ulamle yu ning, el si singa kus kil ara, harimau bol seraplu ulul ning ara, min kume kum danmantoe. Winilamle touk, anggun babye, tuba-tuba akunum malye winilulum ninye ara, adiparyuk tamubuka telebuk uptum do? Kume, anggunce kum teleb kipdatume.

²⁴ Na Allah arye, anggun anang wenena ati winipnamsin ning ara, ani. Winipmanto, buta mutuku arye, kumanya mikip arye puplirye, butbuta bobuka, yuk-yuk dana-dana tam bobalamle touk ubuka, anggun babye yakuka dopkwetepsiniba, yuk-yuk mutuku noutam batakuka bobinamsine.

²⁵ Aning ara, anggun dengna ati dopropnamlume. Tonda, anggunce aning dopropnamluma ati ara, na Allah arye anggunti, ‘Akunuma, aning dopropnamakʼ tenen, “Akunum kiklipdeibuka deipse,” nyabuka, na Allah arye akunum nyapdeipsise. Deiyok ara, anggunce na Allah ati, akunum bataknulumce, tilila yupu atibuk diba tenepluma ati, ayupu akunum nyapdeipsise.

²⁶ Anggun dengna ati, winipmanto ara, anggun alye dakana ati, yu nang aryuk, anggun kilapu cang kain sirik tam talibukapsikirye, tomubuka kisok tam bobisikiba, anggun nong banang dem upsilyeba, alye weik daklamsil touk, weik tonun wenepsiliba, yuk nang nirya arye eipsikcopura, anggunda alye dakdanamlume.

²⁷ Na Allah arye, anggun malye winilulum ning ara, akunum elisunune. Anggunda narye ‘Na likeʼ tenen, yu unulul ning ara, tuba yu unulule. Anggunda, na bataknulumce, ‘Isa si erepnuyapʼ tenen, mutuku deice welena ap, wa windam ap bimunce, isa mer ati, ‘Na niʼ nyabuka, aisa si erelulume. Winipmanto, ninye arye, el kwit domlye kil ati, ‘Se, naryuk akil doproptinyeʼ tenen, pitin-pitin nyabuka, ubula yolamak touk winilulume. Tonda winipmanto, kuda basam yim arye, ‘Kil kuda basam burum nepmaliba yoptinye,’ teneplirye, pitin-pitin nyapliba, burum kwaklamle touk, anggun Yudea mutuku nang babye, winilulume. Ati, anggun Yerusalem mutuku ululum nang nirya ara, anggun wenena ati, ikin ning yalyeba, dopropnamlume. Ati, anggunda pia ati, malye winin ninguk talibuka tuba wininamlum do? Yata wirbuka talak ton, akunum winipliba, anggunce amalye ning batakmunyeba, narye tamubuka, teleb kipdeipnamsin do? Allah arye nyabuk. Ayupu ara, Allah arye akunum laka nyapdeipnukba, na Yeremia kekepsirye sekse.