Yeremia 12 - Eipomek

Yeremia birye Allah ati, “Na tenen ning ara, ani,” nyabuka, morobuk yupu

¹ Na Yeremia birye, tenenun ning nyapnukine. Na ni Allah Yahweh, narye anti, ‘Aning ara, yata deiyok ati uple do?’ tenen, na malye kanye bopnyopura, anti morokiniba, ance tuba-tuba teleb ubuka, diksukum ning nyanilyame. Bukni, na kum bikinun ning ara, anti asipdenukine. Ara, yata deiyok ati, sik malye wininyak nang ara, sik wininyak ning nirya ara, nong tuba kiliba, telebuk unyak do? Tonda, yata ati, diksukum koprop kum wininyakce, malye ninguk talibuka wininyak nang ara, sik dam ikin ning yalyeba, kum dolonyak do?

² Allah ance, sik anang ara, teleb kililyame. Winipmanto ara, ance sikti, talye paplirye tukwak tiklamle ning atonun kililyame. Winipminyeba, sikda yating tuku pum tam bilirye, teleb kibuka paplirye, duk moulamle atonun kililyame. Sik anang ara, Allah an dam, sik si bambol deice aryuk, teleb-teleb yupu nyakinyak bukni, sik talima noutam ara, anti, dipkoprob tenebuka kum nyakinyake.

³ Bukni, na ni Allah Yahweh, ance nati bikinilyame. Tonda, narye Allah anti, tuba tenikunun ning ara, na talima noutam elinilyame. Narye anti moropkine. Sik malyeuk wininyak nang ara, ance winipmanto, ninye arye opnukce ati, domba basam kirikuka, el opnukcak bobalamak touk, winipnalame. Ara, ance sik anang ati, kalikilaminya ani, sik olyanamak nang arye yanuka, opnamak talak wininalame.

⁴ Yata sum arye tonap wininmapya ani, amutuku noutam ara, silal lepropnamle do? Tonda, wa win sukum tikilul yo mutmuta nirya ara, yalakuka kolupnamle do? Tonda, talye kam unyak ning ap, maka nirya ara, amutuku nang nun malye wininyaba deice arye, akunum dibik. Dibikopura, nunce ayupu nyanyabe. Ayupu nyananyap ning ara, “Nun ubirye, teninamap deice arye wininamap ning ara, Allah arye kum elinamsile,” nyanyabe. Na Yeremia birye, Allah ati nyapse.

⁵ Winibuka nyapsiba, Allah arye na Yeremia biti, na dam yanuka nyapnuke. Kume Yeremiao, an ap, yuknye ap, ‘Bisipdanunamʼ tenen, bikbik abuka baminyopura, akunum bikikulule. Ati, ance yata wiribuka kuda basam ap, bikbik abuka bitumce, menekbisiptum do? Aning ara, kum winiptume. Tonda, teleb luak bikbik abuka banmakbuk, sakmatumopura, bai mutuku Yordan mek duman ara, tace ning ap, yo mutmuta palamlak ap, anoutam ara, an bikbik abuka bana ara, piriptum bukni, yata wiripnamkil do?

⁶ Ura, an du yapu ap, an weit yapu ap, tonda an tam nang ap, sik nirya arye, an nyalyam yupu kum kekekirye, ‘Elda nun lik ati, Yeremia eluk opnamabeʼ tenen, yupu talikikirye, ‘Olyanamabe,’ nyakinyake. Ati ara, sik anang arye, an dam yanuka, teleb yupu nyapkikca babye, sik yupu kekepmince, diba tenena kume! Allah arye na Yeremia biti, nyapnuke.

Allah arye, el mapu ati, bico upnamla ati, nyabuk yupu

⁷ Allah arye nyabuk. Na Allah arye Israel mutuku noutam unamak nang ati, tonap tuba kum tenenamne. Israel mutuku ara, na mutuku koprop ulul bukni, amutuku ara, akunum bataknamne. Tonda, na mapu sikti, bico tenelamse nang ara, narye dobuka, sik mal olan nang deiceuk deipnamne.

⁸ Narye wibuka deiamse nang, sikce nati, bai tam ulul kam ning, el si singa kus arye, ‘Anye opnunʼ tenen, malye kilamle touk, sikce nati, akunum malye kininyake. Ara, sikce na deice ara, malye yupu nyaninyaka ati nyapne. Ati ara, narye sikti, yu upniliba, ‘Anang na like,’ akunum tenenune.

⁹ Narye sik Israel mutuku noutam unyak nang ati winipnamna ara, winipmanto ning nyapnune. Ara, ayam bulubuka, tonokak unmakiba, maka on ning arye, ‘Ayam maka yanuka obuka dipnunʼ tenen, yangalamle touk ubuka, ‘Naʼ tenen nang, sik mal olan nang arye, olyanganamake. Tonda, winipmanto ara, bai mutuku dana-dana tam talye kam ulye ning, yala nirya ara, narye yukupnirye, lo arepniba, yakirye, sik anang nirya obuka, sirya daknamake. Atonun, narye lo arepniba, Israel nang, sik mal olan nang yala-yala nirya arye, olyanganamake.

¹⁰ Yuk mutuku ninye deiyok kibuka unyak nang arye, na anggur wa nirya ara, akunum yanuka, malye kipdeipnike. Tonda, na wa wiamsak nirya ara, akunum yaniptaplopnike. Tonda, na tuku pia urasin teleb wamnuk mutuku nirya ara, sik yuk mutuku nang arye, ninye deiyok kibuka talibikce, pia malye kipdeibikba, bataklamaka mutuku, ninye kum ulamak mutuku atonun, oldem kipdeipnike. Ara, yuk mutuku yu nang arye, ‘Naʼ tenen nang, Israel nang ati, akunum olyanganyaka ati, nyapne.

¹¹ Diba, na mutuku ara, sik yuk mutuku nang arye, ninye deiyok kibuka talibikce, pia asik oldem kipdeipnik ning ara, akunum elinune. Amutuku noutam nirya ara, sik yuk mutuku nang arye, ninye deiyok kibuka talibikce, pia malye kipdeibikba, ‘Se,’ nyabuka ngaluklirye, malye nyalule. Amutuku tuku nirya ara, kata sekeltakalamak mutuku noutam, pia oldem ubukba, ninye ton amutuku ati, kum eilinyake. Ninye kum ulamak mutuku atonun ubuke.

¹² Narye sik yuk pera mutuku mal olan nang ati, lo arepnirye, dopdeipniba, ninye una kum, pia kata ubuk mutuku kon deice ara, yanibuka banmakirye, ‘Naʼ tenen nang ati olyanamake. Narye sik mal olan nang dopdeipniba, amutuku nirya ara, yanuka malye kipdeipnamsiake. Winipniba, ninye tonok nang babye, teleb ton kum unamle. Winipmanto ara, na Allah Yahweh arye, na ninye on ya dobuka, Israel nang unyak mutuku noutam nirya, omutuku sirya, atam sirya, anoutam nirya babye, Israel nang weik tonun obuka, sirya dakanamake! Ninye tonoknye babye, talye kanye bobuka, kum unamake.

¹³ Winipmanto ara, na mapu Israel nang arye gandum yala akunum dokik bukni, el duk kum daknamake. Talya taca ninguk kipdeipnamake. Imun kanye deice arye, sik wa akunum piribuka wibik ning ara, nong ton pia kum ubuk. Winibuka ati, sikce, ‘Se yata ati upsil do?’ tenen, taram talipdanuka, talima dakalsakalule. Sikce, ‘Aning libibirye, dekeipyopura, bona talin nang unamapʼ tenen, pirilamik bukni, nong pia kum ubuke. Ati, na Allah arye sikti, yu upniliba, sik deice ikin ning deipnyopura, sik wa winyak ning ara, nong ton libuka kum dipnamaka ati, alye weik dakdanamake. Allah arye, na Yeremia dam yanuka nyapnuk.

“Allah arye Israel nang, sikti, nyalin yupu deice arye nyapdeipnamle,” nyabuk yupu

¹⁴ Allah arye tonap, na Yeremia dam yanuka nyapnuk. Na Allah arye Israel yala nang, sik dana-dana tam unyak yu nang, ara yuk negara-negara kibuka unyak nang ara, narye wenebuka opnamanarya! ‘Sik ayuk-yuk yala nang arye, na mapu koproba, Israel yala nang ati areamse mutuku ara, sik yuk tam nang arye, ‘Nuncuk amutuku ubula doprobibirye, talibuka unamapʼ tenen, pirinyake. Winipmanto ara, ninye arye kounyak ning, tukwak kouamikceba, aminyan, ‘Aning ara, nun likʼ tenen, tuba kwenilamak touk, narye sik amalye nang dobuka, Israel nang, sik mutuku nirya ara, dobuka donoknamne. Winipnyopura, Yehuda yala nang babye, sik amalye nang kan-kan noutam arye unyak nang ara, sik mutuku noutam arye dopropnirye, yuk pera mutuku noutam deipnamsine.

¹⁵ Bukni, sik Yehuda yala nang ara, narye akunum dobuka yukak deipnyopura, daulamikca ani, aminyan talak ara, narye tamubuka, Israel yala nang ati, tuba ton bico tenepnirye, sikti, lyepdopnyopura, narye anang nirya dobukapnirye, tamubuka sik mince ulamik mutuku, sikti, areyamse mutuku uk, bobinuka deipnamne. Tonoknye babye, kum bataknamne.

¹⁶ Winipnyopura, sik dana-dana tam unyak yuk-yuk yala nang, yuk mutuku unyak nang nirya, sik talima noutam arye, moubuka tenebikirye, na mapu koproba, sik Israel nang, sikce nati, si erenikirye, teleb kibuka unyakce, dipkoprob bisik balamak touk, bikikcopura, ayuk-yuk yala nang babye, teleb kipdeipnamne. Ara, na mapu koproba, ‘Naʼ tenen nang arye, ‘Nun ni koproba Allah Yahweh, el si deice aryuk wininamabe,’ nyalin yupu arye nyapne touk, sik yuk yala nang arye, aning bikikirye, talibuka winibikopura, narye anang babye melinamne. Tonda, sik yuk-yuk yala nang arye, minop talak, na mapu koproba, Israel nang ati, ‘Nun ni koproba isa Bahal, el si deice aryuk nyalin yupu nyanamlume. Eluk talibuka unamlume,’ nyabuka petelamik touk, sikce isa Bahal batakikirye, na siuk erepnikcopura, ayuk yala nang babye melinamnarya. Ara, sik nirya arye, “Allah Yahweh anda, kam una deiyoknye pia ulyame,” nyapnamniake. Nyapnikirye, na siuk erepnikcopura, narye sik anang babye, na mapu Israel nang kan-kan uk, boyanuka tabakdeipniba, neika unamake.

¹⁷ Bukni, na nyapne yupu moubuka kekebikirye, kum dobolyanganamak nang yala nirya ara, bataknirye, kum daneipnamne. Winipmanto ara, ninye arye tukwak kouamikce ning, kwinibuka donoklamak touk, narye sik anang nirya ara, pia kwinibuka bataniba, kum danamake. Narye sikti, sice buklobuka sirya daknamnarya! Na Allah Yahweh arye, ayupu ara akunum nyapdeipmakina ati, ‘Dipkoprob nong kunupnamle,’ nyapsine. Allah arye na Yeremia biti nyapnuk.