Yeremia 11 - Eipomek

Allah arye, Yeremia dam nyalin yupu, yanuka nyapdeibuk yupu

¹ Allah Yahweh arye, na Yeremia dam, yanuka nyapdeipnuk yupu ara, ani.

² Moubuka kekepnunilyame! Narye, Na mapu koproba, sik Israel nang, sik dam nyalin yupu nyana ati ara, “Aning wininamlume. Aning ara, pia kum wininamlume. Winipmunyeura, narye anggun melina ati, winipnamsine,” nyabuka, nyalin yupu nyapnusin ara, moubuka kekepnululume. Ance, ayupu kekepminyeura, sik Yerusalem mutuku weik asik noutam unyak nang ap, tonda Yehuda tam unyak nang nirya ap, sik dam nyalbinulyame. Ayupu ara ani.

³ Ance ayupu nyapnulyame. Allah Yahweh arye nyapsile. Nara, Allah Yahweh unune. Narye anggun Israel nang ati, pia melibuka kalinyeba, anggunce na si ereninlulume. Nara anggun ni koproba Allah unune. Yatanye birye do? Anggunce, na nyapnusin nyalin yupu nyapnibuk, kekebikiryuk, ayupu ati ara, kum talibuka ulamiceura, narye anggun ato nang ati, wenebuka supnamsine.

⁴ Narye nyalin yupu nyapnusina ara, winiryuk yupu kuma. Ara narye minop talak Israel nang sik apu yapu mesir mutuku ulamik talak ikin weik asa ulamik buk narye bobuka yanamse talak arye sik dam akunum yanuka nyapdeiamse. Sik Mesir mutuku ulamik talak ara, pia ikin weik ulamika ati, winipmanto ara, ninye arye besi ning ati, ‘Teleb kipdeipnamapʼ tenen, uku weik dilamlirye pia buppu ulamle sukum besi dongobikiba, abesi deice malye ning palipmalye ning uku arye dipliba besi teleb kililamle touk, Israel ninye ati Mesir mutuku ulamik talak arye sik nong deice ara, ikin ning areamse. Atalak ara, narye sik apu yapu ati, nyapdeiamse ninguk, ‘Anyapsin yupu nirya moubuka kekepnumunce aninguk talibuka diksukumuk unamlume,’ nyapdeiamse. Narye sikti, ‘Aning ara wininamlume, aning ara, pia kum wininamlume,’ nyapdeiamse touk dipkoprob winipmunyopura, narye anggun Israel yala nang ara, na mapu koproba unamlume. Tonda nara, anggun ni koproba Allah unamsine,” nyalin yupu deice arye nyamse.

⁵ Anggunda, na mapu koproba upmunyeura, narye anggun apu yapu ati nyalamse touk, anggun apu yapu ati, ‘Pia teleb mutuku, aning-aning nirya, teleb kibuka ulul mutuku arepnamsine,’ nyamse mutuku ara, anggun atalak asukum ululum nang ati arepnamsine. Ara, wini talak ululum nang arye, na nyapdeiamse yupu, moubuka talipmunce, winipmunyeura, narye anggunti, ateleb mutuku ara, arepnamsine. Allah arye na nabi Yeremia ati, nyapnuk.

⁶ Ayupu nyabukura, narye tamubuka Allah Yahweh ati, ‘ “Naio, diba anyapmasilam atonun, winipnamsilamʼ tenen, anti, ‘Telebe,ʼ nyabuka, moropkiyabe!” nyapse. Nyapseura, Allah Yahweh arye, na Yeremia ati, tonap ayupu nyapdeipnuke. “Narye nyapnukin yupu bobuka, sik Yehuda tam mutuku noutam nirya unyak nang ap, Yerusalem weik asik dobuka unyak nang ap, sik dam bimince, ‘Ayupu kekepnuyakʼ tenen, abisik-abisik nirya baminyakarye, anyapdeipnukin yupu nirya ara, sik kekenak laka nyapre banamlyame. Sik ti ance nyapnulyam yupu ara ani. Allah arye anggunti, “Aning ara wininamlume. Aning ara, pia kum wininamlume,” nyapdeiamsise atonun, dipkoprob winipmunyeura, “Narye sik Israel yala nang ati, teleb kilinamsile,” nyabuka, nyalin yupu deice arye nyapnusin yupu ara, moubuka kekeplulume. Kekeplum ning ara, adiparyuk moubuka talipmunce, wininamlume. Tonda ayupu ara, ani.

⁷ Min talak anggun apu yapu, Mesir mutuku noutam ikin weik ulamikba, boyanuse talak arye dipdongobuka, ayupu nyapnin yangalamse ani, wini talak babye, narye anggunti, ayupu tuba nyasunune. Ara, narye anggunti, ‘Aning ara wininamlume. Aning ara, pia kum wininamlume,’ nyabuka, yupu mikip weik arye nyasunun yupu ara, moubuka kekepmunce, wininamlume. Ati, min arye anyamse yupu uk, arup babye, na mapu, asukum unmalum nang ati, tuba tonap, ayupu yanuka nyapdeipsine.

⁸ Ura, min talak arye dipdongobuka, wini talak babye, tuba nyasunune. Aning nyasunun bukni, anggunda, na yupu moubuka kum kekenululume. Tonda narye anggun dam nyasunun yupu ara, kum talibuka winilulume. Bukni anggun apu yapu babye, anggun asukum ululum nang babye, na yupu moubuka kum kekebuka taliplumce, kum winilulume. Aning kum bukni, anggun apu yapu arye, pia mania kanye bobuka, malye winilamik touk, anggun asukum ululum nang babye, ‘Kume, nun mining kanye aryuk tenenyap ninguk, malye tuba wininamabeʼ tenen, malye tuba ululume. Aning ati ara, narye sik wenena ati, “Ateleb ning nirya kum winipmunyeura, narye ikin ning dobuka anggun nong deice delinamsine,” nyabuka, nyalin yupu deice nyapdeiamse nirya ara dobuka, sik anang deice akunum deiamse. Tonda, anggun wini talak ululum nang babye, anggun deice delisunune. Allah arye nyabuk.

⁹ Tonda, Allah arye, na Yeremia dam nyapdeipnuke. Yehuda tam noutam unyak nang ap, tonda Yerusalem weik asik noutam unyak nang nirya ara, ‘Kume, Allah arye nyasilye yupu kum kekenamabe. El yupu yaniplobibirye, nun tenenyap ninguk, wininamabe,’ tenenyakce, malye winin ning tuba talibuka wininyake. Sikce nati, ‘Dauplye el bataktibyeʼ tenen, sikce akunum yupu talinyake.

¹⁰ Ura, min talak anggun apu yapu arye, na nyapdeiamse yupu moubuka kum taleamikce, malye kanye doubuka, malye-malye winilamik touk, sik asukum unyak nang babye, atonun akunum malye wininyake. Ara, sik anang arye talye ning ati, ‘Nun ni koproba ani,’ nyabuka, isa si erenyaka deice arye, narye sik apu yapu ati, ‘Aninguk winilnamlume,’ nyapdeiamse nyalin yupu ara, akunum yaniltaknuk wininyake. Sik ayupu moubuka talibikirye, kum dobolyanganyake. Ara, sik Israel yala nang babye, Yehuda yala nang babye, sik apu yapu ati, “Aning-aning talibuka, wininamlume,” nyapdeiamse yupu ara, sik asukum unyak nang arye, akunum batakuka yanilongonyake. Wininyaka deice arye, narye nyapdeiamse yupu akunum yanibuka bataknike.

¹¹ Aning ati ara, na Allah Yahweh arye, anggunti ayupu nyapsine. Ara, sik malye weik wininyak ning ati, menenga deknirye, ikin ning dobuka, sik deice deipyeba doropnamake. Winipnirye, sik deice aikin ning deipnamaka ara, kum lyepdanmanto upnamake. Aikin ning ara dipkoprob, sik nong deice yanuka dopropnamake. Sikce, nati, ‘Se, nun ni Allaho, ance nun dam yanuka lyepsutume,’ nyabuka moropnitingce, engeptinga babye, ayupu kum kekepnamsine. Anggun ti, kum lyepropnamsine.

¹² Narye anggunti kum melipnyeura, Yehuda tam unyak nang babye, Yerusalem mutuku unyak nang babye, domba basam totoa obuka, sik isa ati arebikirye, aning ati, si erenyak ning dam bikirye, “Se, nun ni yapu, melipsulume!” nyabuka, bin morobikirye, engenamake. Nyabuka morobikirye, engenamak bukni, ikin ning, sik deice areplyeba doropnamak ning ara, sik si talye erenyak ning arye, yanuka kum melibuka lyepropnamsiake.

¹³ Aning ara, talye ati kum nyapsine. Anggun Yehuda tam ululum nang arye, ‘Nun deiyok ning, nun ni koproba ani,’ nyabuka, isa si erelulum yala ning nirya ara, weik aulule. Ara, Yehuda tam unyak nang, sik asik weik dobuka, daunyak atonun, sikce isa si erenyak ning babye, pia weik aulule. Tonda, aning atonun, anggun Yerusalem mutuku ululum nang ara, Yerusalem mutuku noutam talye bisikak, pia weik auplye touk, anggun amutuku ululum nang arye, sik isa si erena ati, mesba weik, kum nukmanto, moubuka kintinililule. Ara anggunce, ‘Nun ni koproba, el si Bahal, isa pia malye ning, el si erena ati, domba basam ato ning obuka, arelbanamabʼ tenen, memelilulume. Amalye winilulum ati ara, alye weik dakalanalume. Allah arye nyabuk.

¹⁴ Allah arye nyabukura, na nabi Yeremia ati, ayupu ton nyapdeipnuke. Ati ara, Yeremiao, ance sikti, winipmince, na Allah ati, kum moronamnilyame. Tonda, ance na Allah ati, ‘Se na ni Allaho, sik Israel nang ati melipsilyame,’ nyabuka, morona ap, engena ap kume. Deiyok ara, sikce talye isa ati, ‘Nun deiyok ning ani,’ nyabuka, si erenyaka deice arye, narye arepnyeba, weik ikin ning, sik nong deice areplyeba, dopropnamaka talak ara, ance nati, ‘Naio, melipnilyame,’ nyabuka, kum moronamnululume. Moropnutuma babye, kum kekenamne.

¹⁵ Tonda, aning tenipdelulume! Na Allah arye, na mapu koproba ati, bico tenelamse buk, sikce malye ninguk tuba wininyake. Ati ara, na Allah si eren aik, kum wekelyakirye, morolyanganamake. Na aik pum tam kum wektinge. Narye sikti, kum tenenamne. Tonda, sikce tenenyaka ara, ‘Kume, nunce Allah ati, nyalin yupu nyabuka, delinyap ning ap, tonda el arena ati, domba ato ning obuka arelyanganyapa deice arye, Allah el kanye teleb kilinyaba ati, elce ikin ning areplyeba, nun dam yasilyeura, kum dopropnamabe,’ tenenyake. Winibuka tenenyakce, kanye delinyak bukni, aning teneptinga babye, narye sik wenena ati, obuka sice buklopnamne ning ara, adiparyuk kum datu do? Kume, aning ara, kum winipmantoe.

¹⁶ Min talak ara, na Allah Yahweh arye, sik Israel yala nang nirya ati, winipmanto ning ara, “Anggunda, pia teleb zaitun yo, teleb kibuka tiklirye, yo bok ap, zaitun duk babye weika arye teleb kibuka moulul yo atonun ululume,” nyalamsise. Bukni, wini talak ara, narye dopdeipnyeba, anggun mal olan nang arye, yanamak talak ara, weik yupu lelim nyabikce deice arye, yanuka opnamsiake. Winipmanto ara, zaitun yo dam, weik uku dongopyeba, uku buk arye, zaitun yo bok ap, tonda zaitun yo taruk nirya babye, diplirye, sice buklopnamlarya! Aning atonun, anggun mutuku nirya ara, obuka sirya daknamsine.

¹⁷ Nara, Allah Yahweh, im deice yin talin malaikat nirya ara, sik deiyoknye ununa ati, na mikip weiknye unune. Ati, narye Israel yala nang ap, Yehuda tam ululum nang ap, moubuka deiamsisirye, teleb kipdeipsise. Bukni, narye, ‘Winibuka wenepnirye, malye kipdeipnamsinʼ tenen, akunum kintinipse ning ara, arepnamsine. Ara, narye anggun deice, ikin ning deipyeba, kanye imun upnamle. Ikin ning, sik deice areplyeba, dopropnamlum nang ara, anggun malye winilulum ning, menenga ati dopropnalume. Ara, anggun atam ululum nang nirya arye, Bahal isa, pia malye ning ati, ‘Nun deiyoknye,’ nyabuka, si erelulumce, kam ning obuka, arelbalamluma deice arye, narye anggunti, yu upnilyeba wenepnamsine. Allah arye, na Yeremia ati nyapnuke.

Yeremia el mal olan nang arye, ‘Anye, opnamabe,’ nyabuka, sisiklamik yupu

¹⁸ Na mal olan nang arye, na Yeremia biti, “Anye opnamabe,” nyabuka, yupu taleamik ning ara, na ni Allah Yahweh arye, na dam yanuka, laka nyapnuke. Lak nyapnuka deice arye, sik malye weik wininyak ning bikse.

¹⁹ Allah arye, na onin nang ati, yupu min kum yanuka nyapdeiamnuk talak, na Yeremia bira, anang arye malye tenelamik ning kum bikamsa ati, walwal asa ulamse. Winipmanto ara, ‘Domba basam, mangkau aryuk unmalibuk, bobuka opnamapʼ tenen, bobalamak touk winipnike. ‘Na bikna kum, mangkau aryuk, nati opnamapʼ tenen, yupu sisiklamnik ning ara, kum bikamse. Sik anang arye, nati nyalamnik. “Winipmanto ara, duk moulul yo ara, atalak arye webuka batakikceba, kum danalamle touk, anye bira obibyeba, kum danamle. Tonda, el anye bira obuka batakikceba, amutuku nang ara, el si ton ap, pia kum sisinamake. “El ti ara, pia luba kipmabe,” nyabuka, yupu taleamik.

²⁰ Nyalamikba, akunum bikseura, narye Allah ati moropse. “Na ni Allah Yahweh anda, im deice yin talin malaikat nirya ara, sik deiyoknye ulyama ati, anda mikip weiknye ulyame. Na bikse, anda yupu bokolina deiyoknye umince, ninye tukwak nang ati, diksukumuk yupu bokuka nyalilyame. Ancuk, nun tukwak nang, kanye talima noutam tenenyap ning babye, tukwak arye eibuka bikiselyame. Ati na nio, sikce nati, ‘Anye opnamap,’ nyanyak ning nirya ara, dobuka an deiceuk deipkine. Ati ara, ance tenepnimince, ‘Sik anang deice menenga dobuka, deipnalam ning ara, na ton eipnirye, biktinyeʼ tenen, moropkine.

²¹ Na Yeremia bira, na mutuku koproba, Anatot mutuku asik dobuka unyak nang arye, na Yeremia biti, nyaninyake. “Kume, Yeremia anda yupu ton tana kumce, batakuka urdem unulyame. Ance, “Allah Yahweh el si deice arye, aminyan doyanamle ning ara, laka nyapnusine,” nyabuka, “Laka nyapsilyam yupu ara, adiparyuk bataknulyame. Anyapkiap yupu kum kekepmince, nun dam tuba nyalyansiminyeura, nun taruk aryuk, anti opnamkiabe,” nyabuka, mikip yupu deice arye sekeninyake.

²² Na mutuku nang arye nyanyaka ati ara, ‘Allah Yahweh im deice yin talin malaikat nirya, sik deiyoknye ulula ati, elda mikip weiknye ulirye,’ nyapmasile. “Narye, sik Anatot mutuku nang ati, wenebuka opnamne. Sik mutuku unyak wel nang nirya ara, mal olan dam arye, ninye on parang ya arye, obikiba dipnamake. Tonda, anang sik mapu ap, kilmapu ap nirya ara, din patana deice arye dipnamake.

²³ Allah Yahweh arye sik Anatot mutuku unyak nang ati, ikin ning areplyeba, dopropnamaka talak ara, akunum kintinip deibuk. Tonda, Allah arye sik amutuku unyak nang ati, ‘Wenebuka opnamne,’ tenyamuk keting tamun ap, asum ap akunum yalyeura, tonoknye babye, ton kum bai sakuka binamake. Na Allah arye, kanye imun weik ning arepnamle deice arye, anang nirya oltakanauk winipnamnarya!” Allah arye, na Yeremia biti nyapdeipnuke.