Yeremia 10 - Eipomek

Talye ning puturubuka deibibirye, ‘Nun ni koproba,’ nyabuka, si erelamika ning ati, nyabuk yupu

¹ Nabi Yeremia birye, sik Israel yala nang ati nyabuk. Se, anggun Israel yala nango, “Allah Yahweh arye anggunti, nyapdeipmasil yupu ara, moubuka kekepnululume!

² Allah Yahweh arye nyapdeipmasil yupu ara, ani. Yuk-yuk mutuku noutam unyak yala nang, nirya ara, anang sik min arye malye ning talibuka winilamyak ning ati, anggun Israel nang arye aning bikmunce, kum wininamlume. Tonda, im alip tam ap, im noutam ap arye, pitin-pitin kilamle ning ap, Allah arye, ‘Na pil dopnilyeba, ninye biknamakʼ tenen, im noutam arye ninye kum winipmanto ning winilul ning ap, aning eipmunyeura, ilil kum unamsile. Sik yuk mutuku unyak nang nirya ara, ato ning eibikirye, ‘Seʼ tenen, mambul kanye bobuka, ilil ulule. Bukni, sik aunyak touk, anggun Israel yala nang ara, aning kum wininamlume.

³ Aning nyapmasina deiyok ara ani. Ara, sik yuk-yuk mutuku unyak nang ara, sik min arye talibuka winipnin yanganyak ning ara, tilila ninguk ulula ati, aning ara, nong kum upnamle. Sikce bai mutuku tikilul yo webukabikirye, talye kam ning do, ninye do, aning urasin atonun kibuka memena ati, ayo dobuka, weik kel nang, sik dam boyangaceba, anang arye talye kam ning urasin atonun, puturubuka memenyake.

⁴ Winibuka deibikceba, yuk nang arye, aning deice ara, urasin pia teleb una ati, emas ap, perak ap arye, taplakalinyake. Winibikcopura, ‘Tunim abuka asukumuk winipnamsilʼ tenen, martalok arye, pakudakalongonyake.

⁵ Anang arye, “Nun deiyok ning ani,” nyabuka, si erenyak ning, el si patung ara, talye ninguk ulule. Ara winipmanto, ninye arye sumik wa wiamikak, ‘Maka yanuka aning eibikirye, ilil uplyeba, bindopnamake. Nun sumik duk kum dipnamsiakʼ tenen, kam un ning kum bukni, ninye urasin atonun puturubuka delilamike. Sik yuk-yuk mutuku nang ara, atalye ning atonun unyake. Amoubuka delinyak ning ara, yupu pia kum nyaptinge. Tonda, kum lulukuka banyaka ati, ninye aryuk, aning ara erebuka delinyake. Ati ara, anggun Israel nang arye aning ati, ilil kum unamsulule. Deiyok ara, aning arye anggunti, yu tenepsikirye, malye kum kipdeipsitinge. Tonda atonun, atalye ning arye anggunti, teleb kum kilinamsiake. Yeremia birye, nyabuk.

Allah si erena ati, nyabuk yupu

⁶ Nabi Yeremia birye Allah el si erena ati, ayupu ton nyabuk. Se, Allah Yahweh, anda pia Weik Erenanye ulyame. An atonunye ton, pia kum ulule. An tonoka. Ninye pia weika arye, an si pia weik erekinyake. Tonda, anda pia mikip weiknye ulyama ati, an si babye, ninye nirya kekebikirye, ‘Se, elda weik mambul deiyoknyeʼ tenen, an siuk erekinyake.

⁷ Na nio, anda Allah Yahweh, tukwak mutuku noutam nirya ara, Raja nang kibuka ninye talinyakce daunyak bukni, ancuk anang talimince, sik deice tamuk ulyame. Ati, tukwak nang kan-kan, yata tonye ton, Allah anti ilil kum uptu do? Dipkoprop Allah, anda pia mambulnye ulyama ati, ninye nirya arye, an tonok, pia si erebuka kinamkiake. Tonda, ninye nirya aunyaka kan-kan arye, weik kel bikamik nang ton aunyake. Tonda, Raja kinyak nang arye, tukwak nang nirya talibuka wininyaka kan-kan arye, Allah an atonunye ton pia kum ulule. Aning ati ara, sik anang kan-kan noutam nirya ara, na ni Allah, an atonunye ton, tonok babye pia kum ulule. Dipkoprop weiknye bira, an tonok ulyame.

⁸ Tukwak mutuku noutam yuk-yuk yala nang nirya ara, walwal unyake. Sikda, weik tonun arye kum bikinyake. Talye yo bukni, aning dobuka, ninye urasin atonun puturubuka deibikirye, ‘Nun ni koproba,’ nyabuka, si erenyak ning arye, yupu ton kum nyaptinge. Tonda, aning arye yupu nyaptinga babye, nong kum uptue. Aning arye ninye ati, ‘Aning winipnamlume. Aning ara, pia kum winipnamlume,’ nyabuka, teleb un yupu kum nyapsitinge. Talye nong dem ulula ati nyapne. Aning ara, isin yanuka, kam kum upmanto ning memenyake.

⁹ Tonda, aning atonun, yuk nang arye, dekna weik ning, el si perak ara, moubuka, deibiceura, yuk nang arye pera mutuku, el si Espanyol mutuku binuka, aning dobuka, atam mutuku boyanganyake. Tonda, yuk dekna weik ning, el si emas ara, pera mutuku el si Ufaz mutuku arye, boyanganyake. Winibikirye, ‘Yo dobuka, ninye urasin atonun memebikirye, aning deice, emas ap, perak ap dobuka, taplaknamapʼ tenen, kat ning moubuka memen nang, kel weik bikamik nang ati arebiceura, perak ap, emas ap arye, sik patung urasin teleb kibuka, memenyake. Tonda, sik aning deice, baju urasin pia teleb ning ara, kira bol ning warna biru ap, mirin warna unggu ning ap, dobukabikirye, sik abaju wina kel weik nang dam, boyaceba wibikirye, sik patung deice delinyake.

¹⁰ Sik pia walwal nang arye, wininyak bukni, dipkoprob Allah, el si Yahweh ulule. Elda kam una deiyoknye ulule. Allah el tonok ara, kam pia ulule. El Allah Yahweh ara, aning-aning talibuka, pia ati, Ninye Deiyoknye Raja unamle. El ap, elce talilul ning nirya ap, pia kume, kum danamle. Pia aupnamle. Tonda, Allah elce, tukwak mutuku ap, tukwak nang ap ati, yu uplyeura, tukwak mutuku nirya ara, weik arye onamle. Tonda, Allah elce, tukwak mutuku unyak nang nirya ati, yu upturye, wenepsutu ura, tukwak mutuku unyak nang nirya ara, darapdongobuka uptinga babye, kum upnamake.

¹¹ Aning ati ara, sik Israel nang arye, yuk-yuk mutuku nang, talye ning ati, si erenyak nang nirya ati, ayupu nyapnamlume. “Anango, moubuka kekeplulume! Anggunce, talye-talye ning ap, isa si erelulum ning ap ara, im deice ap, tukwak mutuku nirya ap, abitinye noutamak ulamle ning nirya ap, kum kintinip deibike. Aning ara, talye ning ulula ati, si erelulum ning nirya ara, pia kum danamle. Atukwak mutuku noutam babye, im noutam babye, ato ning nirya ara, pia kum kipnamlarya! Aminyan doyanamle talak nirya ara, ton pia kum bataknamle.

“Allah ati si erebuka wein motuk nyanamlume,” nyabuk yupu

¹² Allah el mikip weik deice arye, tukwak mutuku nirya kwepdeibuk. Allah el weik kel deice arye, tukwak mutuku ara, urasin teleb kipdeibuk. Tonda, el weik kel deice arye, tukwak mutuku nirya, teleb kipdeibukce, asukum kat kipdeibukba, asukumuk unamle. Kum long-long apnamle. Tonda, Allah arye, weik deiyok ning noutam nirya, weik kel bikamuknye birye, im alip tam ap, im noutam ulye ning nirya ap, kintinibuka, teleb kipdeibuk.

¹³ Allah elce, “Aning ara, winipnule,” nyaplyeura, im deice tam arye, long-long aplirye, weik mek lelim nyalamle touk, lelim nyalule. Allah elcuk, Tukwak mutuku kup-kup arye, dua weleptue,’ tenebuk talak ara, adiparyuk, dua weleplirye, tukwak mutuku nirya siknilongolule. Tonda, Allah elcuk, ‘Weik mok cepnulirye, bebeya lakalamle touk winipnamleʼ tenen, nyaplye talak aryuk, yo ceplirye perenglang an ning babye nyalule. Tonda, ‘Allah arye min dobuka, ‘Naʼ tenen deibukak arye, banamle teneplye talak ara, minopce dobuka deiplyeba, tukwak mutuku deice balule.

¹⁴ Ninye tukwak nang arye utenenyake. ‘Nun bikinyabe,’ tenelanyak bukni, sik nirya ara, walwal nanguk unyake. Aning-aning nirya kum kel bikinyake. Kam ning urasin atonun moubuka delina ati, weik arye kel kibikce, memena deiyok nang nirya ara, alye daknamake. Ara, sik anang arye moubuka delinyak ning ara, amounyak arye, aning-aning ton pil dobuka kum unyake. Ati ara, emas deice arye dobuka, mounyak ning nirya ara, kam pia kum ukirye, isin ara, sik kum wekmanto ulule. Kam un ning moubuka kum delinyake. Ati ara, sik moubuka delikinyak ning ara, nong kum upnamle.

¹⁵ Talye ning ati, “Nun deiyok ning,” nyabuka, si erenyak ning nirya ara, nong kum upnamle. Ati ara, aning nirya memebikce, sik anang babye, aning ati, “Nun ni koproba ani,” nyabuka si erenyak nang babye, tilila yupu uk nyalanyake. Ati, anggunce talye ning nyabuka nalimunce, malye kibuka akutunamlume. Allah arye, ‘Atalak akunuma,’ tenyamuk ning akunum yalyeura, aning nirya ara, Allah arye kum kipdeipnamle. Ati, aning yala-yala nirya ati ara, anggunce nalibuka akutunamlume.

¹⁶ Allah el si Yahweh arye, aning-aning nirya kwepdeibuka Deirina Deiyoknye ulule. Allah arye sik Israel yala nang nirya ati, nyabuk. “Yakub birye deibukba, deipdanin balamik nang nirya ara, ‘Naʼ tenen, nanguk unamake. Na mapu koproba unamak tenen, wipdeiamse,” nyabuk. Allah Yahweh, el si ara, “Im deice unyak yin talin malaikat nirya ara, sik deiyoknye ulule,” nyabuka nyanyabe.

Allah arye, sik Yerusalem nang ati, “Anggun mal olan nang arye yanuka opnamsiaka ati, kintinipnamlume,” nyabuk yupu.

¹⁷ Allah arye nyabuk. “Se, anggun Yerusalem mutuku ululum nango, anggun mal olan nang arye, amutuku yanuka opnusiaka ati, anggunce talilulum bona nirya ara, bulubuka kintinip dongopnalume. Anggun mal olan nang arye, amutuku nirya warekuka opsikirye, anggun dobuka bobinamsiaka ati, anggun talin ning, adiparyuk kintinipnamlume!

¹⁸ Aning ara, talye ati kum nyapsine. Deiyok ara ani. Ara, atalak ara, na Allah Yahweh arye Yehuda yala nang nirya ara, dobuka, yaknirye donoksinyeba, anggun mal olan nang arye, pera mutuku bobinamsiake. Naryuk weik imun kanye ning, anggun deice deipnamsine. Na Allah arye lo arepsinyeura, anggun mal olan nang arye, opsikirye, sice buklopnamsiake. Winipsinyeura, anggunce, ‘Se, Allah arye nunti, ‘Winipnamsine,’ nyapdeipsuk ning ara, dipkoprob akunum winipsiakeʼ tenen, biknamlume! Allah arye, sik Israel nang ati, nyabuk.

¹⁹ Nyabukura, sik Israel nang arye, nyalamik. “Se, nun Yerusalem mutuku unyap nang, nunda ikin asa weik unamaba ati, weik suse dilamle touk usulule. Nun suse ara, kum kwetepmanto usulule. Bukni, nun malye weik winilamupu ning ati, aikin ning nun deice yanmasila ati, nun menenga ning dopropnamaba ati ara akunuma. Aikin ning ara, kum dopropmanto upnamsil ati, ‘Se,’ tenenamabe.

²⁰ Winipmanto ning ara, nun cang kain arye domupu doltakne tenda aik nirya ara, akunum ulupsike. Tonda, ‘Atenda aik saklyakʼ tenen, tapu mikip arye kouamupu ning nirya ara, akunum seksakuke. Tonda, nun doktakne tenda aik lipsisikuka dopmanto mapu nirya ara, yuk mutuku akunum bindobik ati, nun tenda arye donyap aik, kum dopsitinge.

²¹ Tonda, nun ninye deiyok kibuka talisinyak sisin nang nirya ara, walwal nanguk unyake. Sikce Allah Yahweh ati, ‘'Naio, Teleb winin ning ara ani, malye winin ning ara ani,’ nyabuka peterepsilyame,” nyabuka, Allah ati, kum moronyake. Allah ati kum moronyaka ati, sik kanye aryuk tenebuka, wininyak ning ara, nong kum upnamle. Teleb kum upnamle. Ati, sik anang amu tam unyap Israel nang nirya ara, nun mal olan nang arye inipdobsikba, yuk-yuk mutuku dabinuka unamabe. Aminyan talak, tonok mutuku noutamuk, kum unamabe.

²² Wini talak anggun kekeplulume! Moubuka kekepmunce, anggun ton biknamlume. Weik lelim nyanmalak, kekenamaba ara ani. “Dabu tam arye (arah utara) unyak nang ara, kintinipmakirye, lelim weik nyanamake. ‘'Amutuku unyak yin talin nang arye, nun Yehuda tam unyap nang dam yakirye, nun weik asik dobuka, deiamupurye, aunyab mutuku nirya ara, yanuka kum kipdeipsikceba, din bulung unamabe. Tonda, amutuku nang ton pia kum upnamake. Nun mutuku nirya ara, asik oldem upnamsile. Winipyeura, nun mutuku ara, bai tam yu ulamle kam yanuka aunamake. Israel nang arye nyapnamake.

Nabi Yeremia birye, Allah ati morobukce, nyabuk yupu

²³ Na ni Allah, na kele, tonoknye babye, el mikip aryuk, el wininamle ning kum taliptue. El babye, ‘Winipnamne, aning ton winipnamne. Tonda teleb winina ati, abisik binamne. Tonda, winipnamsil ning ara, ani,’ teneptu bukni, dipkoprob ning ara, tukwak nang, sik mikip deice arye, aning nirya kum talinyake. Tonda, moubuka kum kel biktinge. Sik bisik binamakak ara, moubuka kum teneptinge.

²⁴ Aning ati ara, na ni Allah ance, nunti wenepnamsilam bukni, nun ni Allah, an yu weik upkilye talak arye, nun deice weik kanye imun ning deibuka wenebuka ona kume. Dipkoprop, an yu upkilye talak arye, wenepsiminyeura, nunda adiparyuk, an dam arye, kum kipdopnamsile. Ati, ‘Mitik ikin ninguk, nun deice deibuka wenepsutumeʼ tenen, moropkine na nio.

²⁵ Allah an weik yu ara, doprapmince, an si kum kel bikamkik nang, yuk-yuk mutuku nang, sik deiceuk deipnalyame. Tonda, an yu weik upkilye ning ara, an si pia kum erekinyak nang, sik deiceuk, deipnalyame. Deiyok ara ani. Aning ara, sikce, an mapu koproba, Yakub birye deibukba, dadeipdanin yangalamupu nang obuka, akunum kum kipmanto kipsik. Tonda, anang arye nun unyap mutuku babye, sikce yatu obuka, sice buklopsika ati, moropkine na nio.” Nabi Yeremia birye, Allah ati nyabuka morobuk.