Yeremia 1 - Eipomek

Deiyok kouna yupu

¹ Ayupu sekamuknye, el si ara Yeremia. Ara, Benyamin yala nang sik mutuku noutamak tonok mutuku el si ara, Anatot mutuku, tonoknye el si Hilkia ulamuk. Hilkia arye, el mi Yeremia deibuk. Yeremia bira, Allah el si eren aik pil talibuka dolamukce, Hananot mutuku ulamuk. Yeremia birye nyabuk yupu ara abuku noutamak sekuk.

² Tonoknye el si Amon, el mi Yosia bira, Yehuda yala ninye sik ninye deiyoknye ulamuk. Allah arye yanuka yupu nyabuk. Sisinanye Raja Yosia birye Yehuda yala ninye ulamik mutuku taleamuk talak noutamak, keting tamun mikbarye (13) tahun deice, Allah el si Yahweh arye Yeremia biti yupu yanuka nyabuk. Yeremia bira, Allah el yupu laka nyana deiyoknye, nabi ulamuk.

³ Allah arye Yeremia biti, deiyok koubuka, yupu yanuka nyalamuk talak arye dipdongobuka keting tamun yupa weik deice arye yangalamukce, yupu laka nyalamuk. Ara, Yehuda yala ninye sik weik deiyoknye Raja Yoyakim, elce Yehuda tam taleamuk talak noutamak ara, Allah arye Yeremia dam yanakarye yupu laka nyalamuk. Raja Yoyakim, el li si ara, Yosia. Raja Yoyakim arye, Yehuda tam ninye taleamuk talak akunum ubukopura, el dolamuk pil punubuknye bira, el si Raja Zedeikia. Raja Zedeikia el li koprop si ara, Yosia. Yehuda tam minop talak taleamuknye Raja Yosia, el mi Yoyakim, ninye deiyok kibuka, Yehuda tam taleamuk talak arye dipdongobuka, Yosia el mi Zedeikia birye, el du Yoyakim dolamuk pil punubukce, ninye deiyok kibuka, taleamuk keting tamun ara, koklombarye (11) tahun, Allah arye Yeremia biti, el dam tuba-tuba nyalilyangalamuk. Anyalilyangalamuk talak ara, keting tamun 11 tahun akunum ubukura, wala pamubarye kibuk talak ara, batakdongobuk. Batakdongobuk talak ara, Babel mutuku yu nang, sik yin talin nang arye, Yerusalem mutuku ulamik ninye nirya, bisibuka malye kibikce, aninye nirya tapu koubukabikce, sik mutuku koproba pera weik Babel mutuku, bobiyik.

Allah arye Yeremia biti, wipdeibukce nyabuk yupu

⁴ Allah el si Yahweh arye, Yeremia biti wipdeibukce, yupu nyabukba, Yeremia birye ayupu nyabuk. “Allah Yahweh arye, na dam yanuka ayupu nyapdeipnuk.

⁵ ‘Yeremia, an nin mun pum tam, min kum kintinip deiamkise talak ap, tonda, an nin birye kum deiamkuk talak arye, na Allah arye anti, ‘Doryanamle talak ara, narye wininamne ning, anye Yeremia biti, laka nyaipneba, daunamak ninye ayala-yala nirya ati, na yupu laka nyananye, nabi unamle’ tenen, akunum kintinipkisirye anti wipdeiamkise,’ nyabukce, Allah arye na Yeremia biti nyapnuke,” nyabuk.

⁶ Nyapnukba, narye Allah ati tamubuka nyapse. “Diba, na ni Allah Yahweh, anda aning-aning nirya talibuka deice tam, Weik Erena Deiyoknye ulyama anya arye, ance, ‘Winipnamne,’ tenelyam touk winilyame. Bukni, na mambul kanye bopne. Na yupu nyanuna ara, moubuka teniptinirye, kel kum biktinye. Narye pia teleb-teleb kibuka kum nyaptinye. Deiyok ara, nara kamnye koprop ununa ati, na alye unulule,” nyapse.

⁷ Nyapse bukni, Allah el si Yahweh arye tamubuka nyapnuk. “Kume, ance, ‘Na kamnye binyuk ununa anya arye, alye unulule,’ nyana kume. Na Allah arye anti, ‘Amutuku ninye sik dam nyalbinulyame,’ nyapkinyeura, kekepmince, an adiparyuk dipkoprob nyalbinamlame. Tonda narye, an dam nyapkinye yupu nirya, an kekepmince, batakana kum diparyuk, pera mutuku ninye sik dam bobuka, laka nyalbinamlame.

⁸ Sik ayupu kekenamak ninye ati, anda ilil una kume. Ara, urdem ati kum nyapkine. Deiyok ara, narye anti melibuka kalikiniba, yuk ninye arye, opnamkiyaka babye, narye lyepropnamkine. Na yupu laka nyalbinamlame. Anyapkin ning ara, talye kum nyapkine. Na Allah Yahweh arye dipkoprob nyapkine,” Allah arye, na Yeremia biti nyapnuk.

⁹ Nyapnukopura, Allah Yahweh, el taruk arye na si bam bol deice talipnuke. Ara, ‘Yupu nyanamle’ tenen, talipnukce nyapnuke. “Na yupu nyapdeipkin ning ara, akunum arepkina ati, an adiparyuk yuk ninye, sik damak laka nyalbinulyame,” nyapdeipnukce, ayupu ton nyabuk.

¹⁰ “An kel biklyame. Asum arye, na Allah mikip dobuka an deice deipkine. Ati ance na mikip dobuka, mutuku-mutuku nirya unyak ninye ap, ninye deiyok yuk-yuk talibuka unyak weik deiyok nang ap, anang arye talinyak nang ap, an bimince na nyapkinye yupu nyapminyopura, ayupu nong upnamlarya. Ati, narye nyapdeipkiniba, ikin ning arena ap, koulamak ning kwinina ap, ninye arye donyak ning ululona ap, kum kilina ap, ninye malye kibuka ona ap, tonda, teleb ubuka lipsisikuka dona ap, winiryuk yala ning kouna ap, aning nirya, narye tenelamse touk winipnalama anya arye, ‘Ance ayupu laka nyalbinamlam’ tenen, na mikip an deice deipkine,” Allah arye nyapdeipnuk.

Deiyok bitinye ning ton, lakak ubukba eibuk ati, nyabuk yupu

¹¹ Aning nirya akunum kekenmasiba, aminyan talak ara, Allah Yahweh arye, nati yanuka nyapnuk. “Yeremia anda, yata ning ton lak upmalak eipmalam do?” nyabuka asipdenuk. Nyapnukba, narye tamubuka nyapse, “Kume, mitik yo duk moulamle yo, el si ara, badam yo dakdopmek taruk ton, lak upmoba eipmanue,” nyapse.

¹² Nyapsiba Allah arye, “Dip nyapmalame. Narye laka kipmakin ning ara, ance teleb arye eipmalame. Ance alak upmalak eipmalam ning ara, nong laka nyapnamkine. Ara, na Allah arye tenelamsirye, ‘Winipnamsine,’ nyapdeiamse touk, dipkoprob nong upnamlarya. Narye, ‘Winipnamle,’ nyapdeiamse yupu ‘Nong kum uplyak’ tenen, pia kalikuka dinune. Ati, nong dipkoprob lak kipnibuk, ninye nirya arye, aning nirya ati eipnamake.” Allah arye nyapnuk.

¹³ Nyapnukopura, tuba tonap, like bitinye sum Allah arye yanuka asipdenuk. “Yata ning tonap, laka upmalba eipmalam do?” nyapnukba, narye tamubuka nyapse, “Se, tuku arye dobuka, memenyak mek makau arye, mek kwepmekba, mek yaruk-yaruk anmokce, na tekmase tam uk utam arye, mek diksakmanto unmoba eipmane,” nyapse.

¹⁴ Nyapsiba, Allah arye nyabuk. “Diba awinipmalba eipmomu ning, el nong ara, laka nyapnamkine,” nyabuka laka nyapnuk, “Ara outam arye Yerusalem mutuku unyak ninye nirya ara, sikti, yu tenenyak nang yakirye, ikin ning sik nong deice yanuka deipnamake. Winibikiba, Yerusalem unyak ninye ara, imun kanye bobuka unamaka ati, aning utam arye, mek diksakmanto unmoba eiplume,” nyapnuk.

¹⁵ Nyabukce, ayupu ton nyabuk. “Ara, na Allah arye utam unyak ninye ap, sik weik deiyok nang ap, sikti, yukupniba, yanamak talak ara, na mikip sik deice arepnibuk, aninye mikip weik deice yakirye, Yerusalem mutuku nirya yanuka, alabuka doprobikirye unamake. Aninye deiyok nang nirya arye, sik ninye deiyok nang bulamak ning bobuka, Yerusalem mutuku weik cang keil poka dobuka, antanap dongobik poka dam deipnamake. Ara, apoka bublan mikip kipdeibikce, wekelbace bisik bublan dam ara, sik bulamak ning deipnamake. Winibikirye, sik nirya arye, Yehuda mutuku noutamak asik donyak mutuku nirya ap, amutuku unyak ninye ap, akeil deibuka dobik ning ap ara, sik ayanamak yu ninye aryuk, yanuka alapdobikirye unamake. Wininamak talak ara, amutuku nirya ati, malya kipnamake.

¹⁶ Ara talye ati, kume. Na mapu, sik Yerusalem unyak ninye ara, sik malyeukirye, na batakaninyaka dekna ati, na Allah arye aninye wenepnamne. Ara, sik malye ninguk unyakce, na aminyan kibuka yanininyake ap, tonda, sikce kam ning obuka bobikirye, talye kwemdina daunyak isa ati, arinyak ning ap, talye ning bukni, sikce isa urasin atonun ubuka, memelinyak ning deibikirye, si erenyak ning ap, aning nirya wininyaka ati, sik deice ikin ning deipnirye, mikip arye wenepnamne.”

¹⁷ “Ati ara, Yeremia an adiparyuk kintinipnamlyame. Aninye sik unyakak bimince, na nyapmakin yupu nirya binuka laka nyapnulyame. Ance sikti, ilil una kume. An baju ongopdopmince, yaribuka, ayupu nirya sik kekena ak binuka nyapnulyame. Abinuka nyapnuminye talak ara, na mikip weik an deice arepkiniba, binuka nyanamlyame. Bukni, ance sik aninye ati, ilil upkilyeura, narye alye un deiyok ning arepkiniba, amutuku ninye elinamakak arye, alye dakanamlyame. Ati, sik Yerusalem mutuku unyak ninye ati, ilil tenena kume.

¹⁸ Anyapnukin ning ara, Yeremia anda, pia moubuka kekeplyame. Narye an deice mikip weik akunum arepmakine anya arye, sik amutuku ninye arye, anti, malye yupu nyapkikirye, ‘Anye optibye’ tenen, piridenamkiyaka babye, kum opnamkiyake. Ati yata weik nang do nirya, amutuku noutamak unyak nang, sik ninye deiyok talibuka Raja unyak nang ap, Raja nang, sik amu tamukirye, weik deiyok nang nirya ap, yuk-yuk deiyok talibuka pil donyak nang ap, tonda na Allah si erenyak aik pum tam pil dona deiyok nang ap, sik anang amu tam talye daunyak ninye nirya ap, anti bisibuka kum opnamkiyake. Ance sikti, malye kibuka bisipnalame. Ati asum ara, an deice mikip weik ning arepmakina anya arye, winipmanto yupu nyapnukine. Anda aik dobikirye, weik kat ning arye, poka dobuka antanaldongolamak atonun kipdeipkine. Tonda pia weik kat besi ning arye, ikuka dolamak aik ayukumna yo kintinibuka deibikirye, dobikiba, mikip weik ulamle touk, na mikip dobuka, an deice deipkine. Tonda, kat ning, el si tembaga dobuka, keil poka dobikiba, yuk mutuku nang arye, apoka fakuka, wekmanto kum ulamak touk, an deice mikip weik arepkine. Ati, sik amutuku unyak ninye arye, an nyapnamalam yupu bisibuka kum opnamkiyake.

¹⁹ Sik amutuku ninye arye, ‘Yeremia nyalul yupu nun like,’ nyabuka anti malye kibuka bataknamkiyak bukni, anyapmakin ning ara, talye kume. Narye an melipkenepa, aning nirya ara na minop talak arye tenelamse touk winipnalama ati, nyapkine. Aning nirya naryuk anti, kalikuka melipnamkine. Ara, na Allah Yahweh arye, akunum nyapkine ati, ayupu ara dipkoprob nong upnamle,” Allah arye na Yeremia biti nyapnuke.