Yehezkiel 9 - Eipomek

Allah arye, Yerusalem mutuku wenepnamle ning ati, nyabuk yupu

¹ Allah arye, “Yerusalem mutuku nang ati, bico kum tenepnamne,” nyapnukopura, ayupu ton dukdongobuka nyabuk. Na Yeheskiel birye kekenmasiba, Allah arye weik yupu deice arye nyabuk, “Sikda, Yerusalem mutuku weik asik domik ning ati, kalikina deiyok nang yukupmunce, ayin nang asukum boyanamlume. Anyasik kalikinyak yin talen nang ara, yuk-yuk bukni, sik nirya ara, sik taruk arye yin do, yuk ninye on ning do, aning bobikirye, yanuyake,” nyabukba kekepse

² Nyabukba, lengdar mapsa deice arye dinmase talak ara, sik amutuku kalikina deiyok nang nirya ara, adiparyuk like tonok nakub barye (6) nang, Allah Yahweh el si eren aik dam yangan bisik bublan tam, dabu tam arye kibuka, yanganmekba eipse. Sik anang yayik talak ara, sik yuk-yuk yin taleamik ning ara, adiparyuk sik taruk deice arye, talipdakuka yayik. Sik ayayik kan-kan arye, ninye tonoknye ton, baju pia teleb namin ning, el si kain lenan ongopmoknye bira, yupu seken ning ap, talipdakuka yayuk. Winibikopura, sik anang nirya ara, adiparyuk, Allah si eren aik urasin tam, kam ning opnarye, uku dongonak, el si mesba, pia teleb kat ning si, perunggu deice arye kintinibuka deiamikak, asukumuk wekmekce, binuka tikmek.

³ Mesba dam tikmek talak ara, Israel nang arye, si erelamik Allah, el si Yahweh, el pia teleb una ap, mikip ap ulya deice arye, lak kina ati, el weik dirina uamukak arye, panayanuka tikuk. Ara, Allah si eren aik pum tam, Pia Teleb Lek Aik noutam arye deiamik ning, si Peti Perjanjian deice tam, malaikat urasin atonun kibuka, kat ning emas arye, puturubuka deiamik ning, el si Kerub bitinye, dana-danatikdik sukum, adirina min arye, awamuka arye lopdakuka, asukum arye welebuka, Allah si eren aik wekelban bisik, bublan wekelbalamik tam binuka tikuk. Adirina ara, asukumuk yanuka tikukba, Allah Yahweh arye winipmokba, teleb namin baju, si kain lenan ongopmokce, yupu seken ning lipmoknye biti, yukubukce, ayupu ton nyabuk.

⁴ “Anda, Yerusalem mutuku weik asik noutam dana-dana tam nirya ak, binulyame. Biminyopura, anyasik noutam unyak nang nirya dipdemince, yata nang do nirya, Israel yala nang pia malye-malye weik wininyak ning ap, na Allah arye, ‘Aning ara, pia na like,’ tenenun ning bukni, amutuku nang arye, pia mem ning wininyakba, eibikirye, sik kanye talima noutam arye, ‘Se, aning ara, kum winiptinge, aning ara pia malye wininyakeʼ tenen, talima uk diliba, engenyak nang nirya ara, sik dam binulyame. Biminyopura, anang sik urasin tam bukni, sik asok deice tam ara, lak bikna ati, tanda sekdeipnamlyame.” Allah arye, kain lenan ongopmoknye, seken ning lipmoknye biti, nyabuk.

⁵ Nyanmokba, na Yeheskil birye, kekenmasiba, Allah arye, sik yuk-yuk nang, sik Yerusalem kalikina ati yanmek yin nang nirya ati, ayupu ton nyabuk. Ara, “Aseken ning lipmalinye bira, Yerusalem weik asik noutam eipnuminye talak ara, sikda eluk melibuka, amutuku noutam nirya bobimunce, Yerusalem mutuku weik asik noutam unyak nang nirya ara, moubuka dipdemunce, anye birye, sik urasin deice lak kina ati, seken ning kum sekmalye nang ara, adiparyuk oplopnulyame. Tonda, anang nirya ati ara, sikce ‘Se, anang ara, pia bicoe ati, kum opnuyabe’ tenen, kum bataknamlume. Amutuku unyak nang nirya ara, opnamalyame.

⁶ Winipnalam talak ara, wisi nang ap, wisi kilapu ap, wel nang ap, wel kilapu ap, mitik mapu ap, kilmapu ap, sik nirya ara, opnamalyame. Winibuka opnalam bukni, aning moubuka kekepnamalulume. Yata nang do nirya, akain lenan ongopmalinye birye, ninye tonoknye babye, sik urasin deice lak kina ati, seken ning akunum sekdeipmalye nang ara, bol ton kum pipnamlume. Seken ning, sik urasin deice akunum wamlye nang ara, olana meme. Ati ara, wini talak asukum noutam arye, na si eren aik dam arye, deiyok koupnamalume,” Allah arye, sik yin talin nang ati nyabuk. Nyabuk talak aryuk, sikda ninye olana ati, deiyok koubikce, Israel nang ninye deiyok nang nirya, Allah el si eren aik urasin dam tikmek nang kan-kan arye, kong kibuka wipmekce, opnin banmekba eipse.

⁷ Allah arye, sik amutuku kalikina ati, deiyok yin talin nang nirya ati, nyabuk. “Na si eren aik dam bukni, bai tam aik dam nirya ara, akunuma. Adiparyuk anggunce pia malye kipdeipnamlume! Narye, ‘Aning ara, pia na like,’ nyamse ning bukni, anggunce opnamalum nang nirya, sik ongon ning boyanuka, na si eren aik dam boyanuka, delilyanamlume. Delilyangalamunya ani, anyaik dam bai tam aik dam nirya, langdipnamle. Ati, adiparyuk deiyok koupmunce! Anang olbilulume!” nyabukopura, sik ayin talin nang nirya ara, minopce deiyok koubuka, Yerusalem mutuku weik asik domik noutam ulamik nang, weik tonun opnin banmek. Ara, lak kina seken ning, sik urasin deice tam kum uamuk nang ati, nirya onmakak, lengdar deice arye eipse.

⁸ Anang tuba onmek talak ara, na Yeheskiel bira, na tonok amutuku noutam tuba unmase. Na yuk, aunmase talak arye, na mambul kanye bobuka, ‘Se tenenmasirye, Allah si erebuka kina ati, tuku deice mapmasirye,’ ayupu nyanmase. ‘Se, anda na si erenun Allah Yahweh, anda aning-aning nirya talibuka, deice tam erebuka, mikip pia weik ulyamnye biti, asipdekine. Ance Yerusalem mutuku unyak nang ati, yu weik ukilye ning dobuka, anang nong deice deipmince, weik tonun wenebuka opnuminye talak ara, Israel yala nang nirya, obuka sirya daknulam do, kum do? Ara, Babel mutuku arye batakuka, Yerusalem mutuku tamubuka yanmek nang ara, mitik tonunuk tamubuka yayike. Minop talak ara, anang, weik tam nang ara, Babel mutuku daulamik talak arye, akunum diamik. Ati, sik Israel yala nang, amutuku noutam mitik tonunuk tuba kam unmak nang nirya babye, obuka sirya dakipnalam do, kum do?” nyabuka asipdese.

⁹ Asipdenmasiba, Allah arye, ayupu ton tamubuka nyapnuke. “Se, sik Israel yala tuba unyak nang ap, tonda Yehuda yala tuba unyak nang ap, sik nirya ara, pia malye-malye ning talibuka winilamik ning ap, tuba malye wininyak ning ap ara, pia weik ulule. Aning ara, nukmanto kume. Sik tuba malye-malyeuk, weik tonun wininyaka anya arye, amutuku-amutuku noutam nirya ap, Yerusalem mutuku weik asik domik noutam ap, ninye olana weik unyakce, ninye ining weik sakalule. Tonda, aning atonun, Yerusalem mutuku noutam nirya babye, atalak unyak nang nirya ara, yuk nang ati, ninye yupu lipsisikuka bokolinyak talak ara, dipsukum yupu uk, kum nyanyake. Tilila yupu nyanyaka deice arye, ninye yupu lipsisikuka bokolina, deiyok kum upmalibuk, ikin ning dobuka, yuk nang nong deice deibicopura, yaninyake. Tonda, sikce nati, tilila yupu deice nyaninyaka ara, ani. ‘Kume, Allah Yahweh ara, Pia Mikip Weiknye ulirye, aning nirya talilul bukni, amutuku noutam ati ara, akunum bataksuke. Allah Yahweh arye, akunum bataksuka anya arye, nunce malye ning talibuka wininyap ning nirya ara, pia kum dinamsile,’ nyanyake.

¹⁰ Anang arye, nyanyaka ati ara, na Allah arye, sik anang nirya ati, eipnyopura, sikti bico pia kum tenepnamne. Kume, sik Israel nang nirya ara, yuk nang ati, pia malye-malye weik wininyak touk, narye sik anang ati, sik malye unyak ning ara, sik nong deice deipnamne. Winibuka pia wenebuka opnamne” Allah arye, na Yeheskiel biti, lengdar mapsa deice arye nyapnuke.

¹¹ Nyabukopura, atalak aryuk, pia namin teleb baju, el si kain lenan ongopmoknye birye, tamubuka yayukce, Allah ati yanuka lak nyabuk. Ara elce, “Na ni Allah, ance, ‘Aning winipnamlame. Aning ton kum winipnalame,’ nyapdeiamuk touk, aning nirya ara, adiparyuk akunum winibuka, sirya dakmane. Tonok babye, kum batakse,” nyabukba kekepse.