Yehezkiel 8 - Eipomek

Yerusalem mutuku noutam bukni, Allah el si eren aik dam arye, talye isa si erelamika ati, nyabuk yupu

¹ Babel mutuku yin talin nang arye, obikce tapu koubuka, sik pera mutuku bobinamsikce, ikin pil dilamsika ani, aminyan talak, keting tamun nakub barye akunum ubukba, wala nakub barye noutam bukni, tanggal lima deice arye, na Yeheskiel bira, na aik bukmase. Anyasik noutam bukmase talak ara, Yehuda tam ulamik ninye deiyok nang nirya ara, na dam neika yayikba bukmapu. Winibuka bukmapuba, Allah Yahweh aning-aning nirya deice tam erebuka, pia mikip weik ululnye birye, el mikip weik ara, na deice yayukce wekuka langdipnuk.

² Winipnuk talak ara, min mapmase talak bukni, lengdar atonun ning arepnuka deice arye, aning-aning eipse. Na lengdar deice arye eipse ning ara, ninye urasin atonun ubukba, eipse. Aeipsinye bira, el nong dam arye ubuka utam ara, uku buk dilamle atonun unmokba, eipse. Tonda, el nong dam arye eitam ara, el kisok tam ara, urasin pia teleb ning, el si ara perunggu arye mil dang-dang alamle touk, anye babye unmokba, eipse.

³ Anye eipse talak ara, elcuk min taruk deice arye, talipmanuka atonun kibuka bibikukce, na kisok potong yanuka talipnuke. Anye birye winibuka talipnukba, adinmase talak aryuk, Allah el mikip weik Allah, el Pia Teleb, Lek Dip Kanye arye erepdakuka, pia im deice tam bobinukba eipse, ara pia im deice tam uamuk bukni, tukwak tam mutuku-mutuku sirya, im sirya nirya ara, utam uamukba, eipse. Tonda atalak aryuk, Allah arepnuk lengdar deice arye, Allah el Pia Teleb, Lek Dip Kanye arye, Yerusalem mutuku bobinuke. Ara, Yerusalem mutuku noutam bukni, Allah Yahweh, el si eren aik dam bobinuke. Ara, anyasik dabu tam, (arah utara) lilun botopdeiamik bisik bublan dam deipnukba eipse. Abobinuka deipnuka dam ara, isa si eren ning, ninye arye urasin atonun puturubuka, ikdeiamik ning, el si ara patung berhala, tikamuk. Adeiamik ning ati ara, Allah el yu weik uamukba, ‘Na tenen nang ara, na tibuk si erepnitinge. Yuk ning ati, si ton pia eremna meme,’ tenelamuk.

⁴ Wininmasirye, banmasiba, atalak ara, na adiparyuk, Israel nang arye si erelamik Allah, el lek weik delina ara, eipse. Eibuka bikse. Aning ara, minop talak arye, Kebar mek lilun unmase talak arye, eipmase ning atonun, aning ara tuba tonap eipse.

⁵ Aeipse talak ara, Allah arye nati nyapnuke, “Se anda ninye arye deipkiknye, an urasin ara, tamubuka dabu tam, dipdelyame,” nyapnukba, dinmase. Dabu tam dinmasiba, anyasik bisik bublan botcamika dam ara, aisa si erena ati, memepdeiamik ning otam ara, ninye urasin atonun memebuka, aisa si erena ati deiamik ning, el si patung berhala eipse. Adeiamik ning ati, Allah el yu weik uamukba, ‘Na tenen nang ara, natibuk si erepnitinge. Yuk ning ton si erena ati ara, pia meme ati, na like,’ tenelamuk.

⁶ Aning eipsopura, Allah arye nati nyapnuke, “Se, anda ninye arye deipkiknye, ance dinmalamba, yatato ning unmoba eipmalam do? Anda sik Israel nang arye, pia malye weik ning wininmakba eilinmalam ning ara, pia malye-malye winin ninguk unyake. Wininyaka deice arye, nara, na si eren aik noutam arye, kutukuka yukak pere sukum bindopnyopura, anyaik tuba ton ap kum bitinye! Aning kum bukni, na ap, an ap, bobikinirye, sik yuk pia malye weik unmakce ning ton, bobikiniba, eipnulame. Asukum arye eipmalam ning ara, mitikto malye unmak bukni, aminyan eipnalam ning ara, pia malye weik winipmakce ning eipnalame,” nyapdeipnukba, kekepse.

⁷ Nyapnukce, na adiparyuk bobuka, Allah el si eren aik bai tam bukni, anyaik dam bublan wekelbanak, bai tam anyaik dam bobinukba eipse. Winipnukce, keil arye deibuka domik poka, dipdesiba, mitikto bisik botopdeiamikak eipse. ‘Apoka otam upmal ning eipnunʼ tenen, apoka bisik kin-kin tonok botopsirye, otam dinmase. Dinmasiba, otam uamuk bublan bisik tonok ton eipse.

⁸ Eipsiba, Allah arye nyapnuke. “Se anda ninye arye deipkiknye, abotopdeibik bisik kin-kin ara, ance mitik tonun ton ap, botopnulyame,” nyapnuke. Nyapnukba, narye mitik tonun ton, akinkin noutam botopsirye, otam uamuk ning eipse.

⁹ Eipsiba, Allah arye nyapnuke. “Wini talak ara, anda abisik bublan wekuka bimince, sik Israel nang arye, pia malye weik wininyak ning, wininmakiba eipnulyame. Aning ara, pia malye-malye winin ninguk wininyaka ara, narye, ‘Aning ara pia na like,’ tenenune,” nyapdeipnukba, kekepse.

¹⁰ Nyapnukba, narye abisik bublan binuka, weksirye eipse. Asukum ara, tonok aik pum tam ara, anyaik abilinga piamik ning nirya ara, ninye arye gambar puturubuka sekamik ning weik eipse. Eipse ning ara, Allah arye, ‘Akam ning yala-yala nirya ara, pia na like,’ akunum nyapdeiamnuk bukni, ninye arye, aning urasin atonun akunum memebuka deiamik. Ara, yata ning do nirya, sik mun ap, yan ap deice arye, tuku butbuta noutamak balamle kam ning urasin atonun sekdeibik ning ara, bal ap, tonda Allah arye, ‘Akam ning ara, na lik ati, anggunce aning ara, dina pia meme,’ nyapdeipsuk ning, abapye eipse. Tonda, sik Israel nang arye, ‘Nun ni koproba ara aniʼ tenen, talye isa mer si eren ati, aning urasin atonun puturubuka, abilinga deice sekuka deiamik ning ton eipse.

¹¹ Tonda, sikce amalye weik ning urasin atonun sekuka deiamik ning dam ara, Israel mutuku noutam talibuka, ninye deiyok-deiyok kibuka, sik taleamik nang ara, tujuhpuluh (70) nang, asukum tikmekba eipse. Tonda, Safan elce deiamuknye Yaazanya babye, asukum unmok. El ap, aunmek deiyok-deiyok nang nirya ara, siltong pia teleb lelamle ning, boyanmek makau ara, uku dinmokce, tulum welemok ning ara, sik aninye deiyok nang arye boyanmekba, siltong teleb tulum welemokba eipse.

¹² Aning nirya eipsopura, Allah arye, na Yehezkiel biti, nyapnuke. “Se anda ninye sirika arye deipkiknye, sik Israel mutuku noutam arye talibuka unyak ninye deiyok nang nirya arye unyakce, duknubuka wininmaka ara, eilinmalam do? Sik awininmak ning nirya ara, ance akunum eipmalame. Ara, sik anang, Allah si eren aik pum tam ara, isa mer si erenyake. Sik nirya yuk-yuk bukni, sik nirya ara, sik isa si erenyak ning dam tikikirye, atalye ning ati moronyake. Winibikirye, sikce ayupu ton nyanyake. ‘Kume, Allah Yahweh ara, nun duknubuka wininmap ning, kum disulule. Kume, Allah Yahweh ara, nun unyap mutuku akunum bataksuka anya arye, elce kum disulule,’ nyanyake.” Allah arye nyapdeipnuke

¹³ Nyapdeipnukopura, Allah arye ayupu ton ap nyapnuke. “Aning akunum eipmalam ning ara, dipkoprob malye upmal bukni, aminyan talak ara, pia weik tonun malye wininyak ning ton eipnalame. Aning babye, pia na like,” Allah arye nyapnuke.

¹⁴ Nyapdeipnukopura, Allah arye na dobuka yukak bobinuke. Ara, Yerusalem mutuku noutam bukni, Allah Yahweh, el si eren aik dam wekelbana ati, bisik bublan dam bobinukak ara ani, anyaik ara dabu tam, lilun botopdeiamik bisik bublan dam, deipnukba eipse. Asukum sik amutuku noutam ulamik kilapu nirya, tonok kong bulupmekce, Babel mutuku isa si erenmek bukni, sikce aisa si erenmek ning ara, el si ara, Dewa Tamus diamukba, engenmekak eipse.

¹⁵ Eipsiba, Allah Yahweh arye, nati asipdenuke. “Se anda ninye koprop arye deipkiknye, anda aning ara, moubuka eilinmalam do?” Aning akunum eipmalam ning ara, dipkoprob malye upmal bukni, aminyan talak ara, pia weik tonun malye unyak ning, ton ap eipnamalame. Aning babye, pia na like,” Allah arye, na Yehezkiel biti nyapnuke.

¹⁶ Nyapnukce, adiparyuk Allah arye, na boyanuka, Allah Yahweh el si eren aik domik ning, lilun dam bobinuke. Ara, anyaik dam wekelban bisik bublan, botopdeiamika dam bobinuka ara, ani. Ara, Allah el si erena ati, kam ning opnarye, uku dongona ati, kintinip deiamik ning, el si mesba, otam upmokba eipse, atalak ara, anyaik kup-kupak unmek nang ton eipse. Asukum ara, ninye yupa ara, pia weik, dua puluh lima (25) nang unmekba, eipse. Sik aunmek nang ara, Allah el si eren aik, Pia Teleb Lek Aik, sik donga tam unmokba, sikce asukum wekmekce, keting panalyangan tam, urasin deibuka, sik kutam tuku dipdongobuka, keting panalyangan tam unmekce, si erebuka kinmekce, keting si erenmekak, eipse.

¹⁷ Allah Yahweh arye, na Yehezkiel biti nyapnuke. “Se, anda ninye koprop arye deipkiknye ulyame. Sik awininmak ning ara, ance moubuka eilinmalam do? Ara, sik Yehuda yala nang arye, pia malye weik unyak ning ati ara, ‘Aning ara, ilil kume. Daupmalye,’ tenen, bataktinye do? Kume, awininmak ning ara, dipkoprob malye unmake. Bukni, aninguk kum bukni, sikda amutuku-amutuku noutam nirya ara, sikce pia malye-malye winin ning, weik tonun ton tabakuka wininyake. Ara, ton nang arye yuk nang ati, oldana ap, walana ap, mikip weik yu kililana ap, weik wininyake. Wininyaka deice arye, na yu pia weik unulule. Yu unulul bukni, sikce, aning tenina kum aryuk, siltong teleb yo taruk, sik u pum bisik liptalibikirye, asiltong kekebikcopura, isa mer siuk erenyake. ‘Wininyaka anya arye, aning ara pia na lik ati, narye sikti, yu weik unulule,’ nyapkine

¹⁸ Wininyaka ati ara, nara, na yu weik tuba unilya ati, sik nong deice, ikin weik ning deipnamne. Tonda, narye sik anang ati, ‘Se sikda bicoe, ‘Naʼ tenen, nang unyaka ati, sik malye wininyaka ara dauaplye’ tenen, talye kanye bobuka, namin kipnamane, kum nyapnamne. Tonda, narye sik anang ati, kum namin kipnamne. Sikti, weik tonun wenepnamne. Tonok nang babye, kum bataknamne, sik nirya ati, pia ikin weik ning, sik deice deipnirye, wenepnamne. Wenebuka opnyopura, sik Israel nang arye, yupu weik tonun, nati moronmaniyak talak ara, mikip arye yukubuka, engenamaka babye, dipkoprob na pia kum kekepnamne! Allah arye, na Yeheskiel biti, nyapnukba, kekepse.