Yehezkiel 7 - Eipomek

Israel nang obuka, sikce bultakan talak dam ubuka ati, nyabuk yupu

¹ Allah Yahweh arye, na Yehezkiel birye, lengdar mapsa deice arye, nyapnuke.

² “Se anda ninye sirika arye deipkiknye ulyame. Nara, Allah Yahweh, aning-aning nirya talibuka, deice tam erebuka, pia mikip weik ununye birye, dipkoprob sik Israel tam unyak nang nirya ati, nyapne. Sirya tam akunum yanamale! Ara, anggun amutuku dana-dana tam noutam nirya ululum Israel nang nirya ati ara, na adiparyuk, akunum kum kipdeipnamsine!

³ Se, anggun Israel nang, wini talak ara, anggunti kum kipdeipnamsin talak ara, akunum dam uple. Ati, na Allah yu weik upnilyopura, anggun deice deipnamsine! Ati, narye, ‘Awinimunye ning ara, na pia lik ati, aning nirya ara, pia kum wininamlume,’ nyapdeiamsise ning bukni, anggunce talye kanye bobuka, malye winilulum ning ap, anggunce malye-malye winin ninguk weik winilamlum touk, dekna ati, yupu bokeipsinirye, weik tonun wenepnamsine.

⁴ Dipkoprop anggun Israel yala nang nirya ati, narye, ‘Pia bico, anang ara, ikin ning sik nong deice kum deipnamne,’ kum tenepnamsine. Tonda, ‘Daupmalyeʼ tenen, anggunti pia kum bataknamsine. Ati, narye dipkoprob, anggun malye winilamunya atonun, tamulina ara, aning atonun wenebuka opnamasine. Tonda, narye, ‘Awinimunye ning ara, na pia lik ati, aning nirya ara, pia kum wininamlume,’ nyapdeiamsise ning bukni, anggunce talye kanye bobuka, malye winilamlum ning ati, wenebuka opnamasine. Winibuka wenepsinya deice arye, anggun kanye aryuk, ‘Se, Allah Yahweh ara, aning-aning nirya talibuka, el deice tam ulirye, dipkoprob Pia Mikip Weiknye ululeʼ tenen, bikinamlume.

⁵ Nara, Allah Yahweh, aning-aning nirya deice tam erebuka, Pia Mikip Weik ununye birye, anggun Israel tam ululum nang nirya ati, nyapsine. Kanye imun weik ning yanamle! Ara, minop talak ulamik nang arye, akanye imun ning ato ning ton, kum eiyamikce, kum biklamike. Tonda, yukak ton winyamukak, anggun ton kum kekelamlume. Bukni, wini talak ara, anggun dam yanuka, upnamsile.

⁶ Se sirya dakalongon talak ara, anggun dam akunum yale! Wini talak ara, anggun ap, anggun ning ap, kum danamle talak ara, anggun dam akunum upmasile. Atia, anggun obuka, sirya dakan talak ara, akunum anggun dam aupnule. Akunum dam upmala ati, anggun kanye mouplulume!

⁷ Anggun Israel yala nang dam arye, aning yala-yala nirya ara, akunum kum danamle talak ap, anggun kanye imun weik unamlum talak ap ara, akunum dam yanmasile! Ati se, anggun amutuku noutam ululum nang ara, pia mambule. Dipkoprop kanye imun weik ning, anggun nong deice akunum upnamasile! Ati wini talak ara, anggunce amutuku-amutuku deice tam ululum nang nirya ara, kanye pin-pin una asa una kumce, kanye imun tenena ap, ilil una ap, talima dakalsakana apuk, unamlume.

⁸ Wini talak ara, na yu weik unilya deice arye, anggunti kanye imun weik ning arepnusine! Dipkoprop, yu weik unilye ning nirya ara, anggun nong deice deipsinirye, wini talak wenepnusine! Winipsinyopura, anggunda ‘Se tenen, imun kanye bopnamlume. Ati, narye, ‘Awinin ning ara, na pia song ati, aning nirya ara, pia kum wininamlume,’ nyapdeiamsise ning bukni, anggunce talye kanye bobuka, malye winilamlum ning ati, wenepnamsine. Tonda, anggunce malye-malye winin ninguk, weik talibuka winilamlum touk, anggun tamulina ati, yupu bokeipsinirye, weik tonun wenepnamsine.

⁹ Dipkoprop sik Israel yala nang nirya ati, narye, ‘Pia bico kum tenepnamne. Anang ara, pia ikin ning, sik nong deice kum deipnamneʼ tenen, kanye kum tenepnamsine. Tonda, kanye talima kum arepnamsina ati, ‘Sik daupmalyeʼ tenen, anggun malye winilulum ning ati, dipkoprob kum bataknamsine. Aning kum bukni, narye dipkoprob, anggun malye winilamlum ning, akunum eibuka kel bikamsisa ati, awinilamluma atonun, dekna dolona atonun wenebuka opnamasine. Tonda, narye, ‘Awinin ning ara, na pia lik ati, aning nirya ara, pia kum wininamlume,’ nyapdeiamsise ning bukni, anggunce talye kanye bobuka, malye winilamlum ning ati, wenebuka opnamsine. Winibuka wenepsinya deice arye, anggun damnye, ‘Se, Allah Yahweh ara, elcuk nun wenena ati, akanye imun ning, akunum arepmasileʼ tenen, bikinamnulume.

¹⁰ Anggunda bita dilulume! Anggun ti wenepnusin sum ara, akunum yala! Wini talak ara, ikin pia weik ning, anggun Israel nang dam deipnamsin ning ara, akunum dam yanusile! Anggun Israel nang arye, mandipna kanye bobuka, malye weik winilulum ning nirya ati ara, mitang kipnamsine! Ninye arye koulamak ning palamlirye, keit ning ap, duk ap minop palamle touk, anggun Israel nang ara, weik erepdanuka kwalimunce, kimilalulum ning nirya ara, weik kipnin balule. Awiniluluma deice arye, anggun wenen ning, akunum dam upmasile.

¹¹ Anggun mutuku unyak deiyok nang nirya arye, talye bona utotoa talina kum nang ati, ikin weik ning, sik nong deice delinyake. Winibuka unmaca ani, sirya ara, ninye deiyok talibuka erepdakirye, sik amu tam bona talina kum ati, talye kankan ninye unyak ninye ati, yaninauk wininyake. Ati ara, na Allah arye, anggun Israel tam deiyok nang nirya, wenebuka opsinirye, sirya daknamsine. Tonda, sikce aning-aning nirya, pia teleb bona talinyak ning nirya ara, kum daneipnamsine. Aning atouk, sik dekna weik ning nirya babye, kum daneipnamsine. Teleb talin ning tonok ning babye, tuba kum upnamle! Sikce bona talina weik nang unyak ning nirya ap, ninye deiyok kibuka talinyakce, mambul weik nang unyak ning nirya ap, narye kum daneipnamsine. Sik bona weik talinyak nang ap, ninye deiyok kibuka talinyak nang ap nirya ara, wenepnirye, kum daneipnyopura, sik nirya ara, amu tam kipniba unamake.

¹² Narye anggun wenena ati, ‘Atalak, asum winipnamne,’ tenepse touk, akunum dam uple. Kanye imun ning dobuka, anggun nong deice deipnamsin sum ara, akunum dam uple! Ati, sik bona dekikirye, dopropnamaka nang ara, kanye kum delinamlume. Aning atonun, ‘Yo bok patapsila ati, nun bona dobuka deibibiba, yuk nang arye, aning deknamakʼ tenen, kiklinyak nang babye, kanye kum delinamlume. Deiyok ara, anggun abitinye yala nang nirya ara, tabakniba kanye deilin ning ton pia kume. Deiyok ara, na Allah arye, wenen ning anggun anang nirya, anggun deice ikin weik ning deipnamsine!

¹³ Atalak ara, sik mutuku tuku talibuka deiyok unyak nang arye, ‘Yuk nang arye, nun talinyap mutuku tuku dektinge,’ tenebikirye, akunum dekikcopura, akunuma. Atuku ila ton ap tamubuka, kum dolonamake. Sik mutuku tuku dekenyak nang ap, amutuku tuku dekikirye, dopropnamaka nang ap, sik nirya arye, tuba kam unamak talak ara, amutuku tuku tamubuka, kum dolonamake. Deiyok ara, yata nang do nirya, na Allah arye, anggun Israel yala nang ati, ‘Winibuka wenepnamsine,’ nyabuka, lak nyapsise yupu ara, pia kume, kum danamle. Na kanye tenipse ning ara, kum luba kipnamne tuba teninamne. Anang nirya ara, sik malye-malye pia weik ulamika ati ara, anang nirya wenebuka oplopnyopura, tonok nang babye, ton kum lyepdanamle.

¹⁴ Sik Israel yala nang ara, ‘Yu nang nun dam olyasicak, ati, nun tam yin talen nang arye, bulubuka yanamak’ tenen, yim domba basam, el kisok deice taice nang arye, lelim len ning dobuka, pong-pong nyabuka, weik tonun lelim lenamak babye, sik yin talen nang ton kum yanamake. Atalak ara, sik amutuku nang nirya, adiparyuk ninye olana ning ati, yala-yala nirya kintinibuka deiptinga babye, sik tam nang arye, atalak ara, tonok nang ton ninye mal olalbinamaka babye, dipkoprob sikce ton kum binamake. Deiyok ara, nara Allah, na yu weik upnuk ning ara, anggun Israel yala nang deice deipnamna atia.

Ikin ning deipnamla deiyok ara, “Israel nang malye unyaka ati,” nyabuk yupu

¹⁵ Yerusalem mutuku weik asik domikce, cang poka keil arye, antapdongobuka domik ning bai tam ara, yuk mutuku yin talin nang arye, parang ya bobikirye, ‘Amutuku nang nirya opnuyabeʼ tenen, kintinibuka warikilyanamake. Tonda, Yerusalem weik asik domik noutam ara, ikin ning arepniba, kanye imun weik uk dinamle. Tonda, din ning kum kipdeipniba, din patana weik unamle. Yata nang do nirya, amutuku noutam unyak nang, pia weik tonun dipnamake.

¹⁶ Anyasik noutamaik ara, weik uk ap, din patana ap, ninye bai tam arye daunyak nang arye, olanamaka deice arye, ninye weik tam ara, dibinamake. Bukni, mitikto tam nang arye, bai sakuka, mutuku-mutuku kon bukuk noutam, bikbik abuka bindopnamake. Abinuka unamakak ara, sum maka ara, weik mutuku amu tam, lu ubukak bukuka engelamaka atonun, binuka engenamake. Winipnamaka deiyok ara, sik anang nirya ara, ‘Se, nun bidamnye malye ulamupa deice arye, wenepsukba, dibinauk unyabe,’ tenebikirye, malye yupu nyabuka, malye kanye bonamake.

¹⁷ Israel yala nang, sik awinibuka unamak talak ara, sik taruk mikip nirya ara, pia mitang upliba deresekenamle. Tonda, sik kutam nirya babye, duklam-duklam abuka banamake.

¹⁸ Winibikirye, sik Israel nang ulamak touk, sik nirya ara, ‘Se, pia ikin unamsilʼ tenen, lak kina ati, malye baju si, kain karung aryuk ongonamake. Tonda, sik nirya, ilil pia weik upliba, sik nong nirya ara, sirim talipnamle. Tonda, sik wininamak talak ara, alye weik dakdanamaka anya arye, sik urasin ara, pia alye upnamle. Tonda, sik Israel nang, pia imun kanye bobikirye, talima daksaknamle talak atonun, sik talima daksaknamle talak babye, sik kisok potong nirya ara, koubikiba, delo copnamle.

¹⁹ Aninguk kum bukni, sik dekna kat weik ning, si emas ap, perak ap, mambul weik ning bukni, ninye weik bisik banyakak talye ning bataklamaka atonun, abisik noutamak yamuplobuka binamake. Deiyok ara, sikce, ‘Se, aning babye, mambul kume. Nun lyena ati, aning babye, dipkoprob pia kum melipsutueʼ tenen, yamuplopnamake. Allah Yahweh el kanye imun weik yu ara, asum arye, sik deice akunum deipnamla ati, sik talinyak dekna weik ning, emas ap, perak ap, deice arye, pia kum lyepdatinge. Aning ara, pia mem ning atonun akunum upliba, Allah arye, ‘Aning ara, na pia lik,’ tenelye touk, akunum winipmale. Dipkoprop, emas ap, perak ap arye, kum lyepdatinge, sik mun kum buklirye, kum boupnamle. Sik din patana weik unamle ning ara, adekna kat ning diptinga deice arye, din patana min kume, kum datue. Dipkoprop ning ara, adekna weik ning talilamika deice arye, sik bidamnye ati, malye weik kipdeipdanamikce, malye winin ninguk talibuka winilamik.

²⁰ Israel yala nang ara, sikce memebuka deiamikce, talilamik urasin pia teleb kwerya ara, cicin do, gelang do, permata do, aning nirya ati, sikce, ‘Se, aning nirya ara, urasin pia teleb ning ululule,’ tenelamik. Tonda, ato ning boyanuka, talye ning bukni, sikce, ‘Nun ni bira aniʼ tenen, isa si erena ati, urasin teleb ning ton, memebuka delilamik. Winilamik bukni, na Allah arye, ‘Aning ap, aning dobuka malye ning, sikce puturubuka delinyak ning nirya ap ara, na pia like,’ tenenune. Ati ara, na Allah arye, aning sik talinyak urasin teleb ning emas ap, perak ap ati, ‘Aning nirya ara, na pia like,’ tenenune. Aning talinyaka ara, na dam ton boyakirye, nati telebe nyabuka, na si kum ereninyak diparyuk, nati ton kanye kum delininyake.

²¹ Na Allah Yahweh arye, sik Israel nang talinyak dekna weik ning, emas ap, perak ap ati, “Dipkoprop aning nirya ara, bataknirye, lo arepniba, sik mal olan nang arye, yanuka obikirye, aning nirya ara, alubuka dopropnamsiyake. Wininamak talak ara, tukwak mutuku noutam unyak nang, pia malye-malye weik wininyak nang arye, Israel nang talilulum bona nirya babye, alubuka doprobikirye, aning nirya, pia malye kipdeipnamake.

²² Atalak ara, sik yuk mutuku arye olyanamsiyak yin talin nang ara, malye pia weik unamak bukni, narye, ‘Daupmalye, dawinipnamakʼ tenen, bataknirya, sikti kum wenepnamne. Winipyopura, amalye wininyak nang arye, na si erena ati, Pia Teleb Aik nirya babye, talye wekikirye, anyaik noutam ubuk ning nirya, pia malye kipdeipnamake.

²³ Atalak, amutuku noutam nirya ara, malye-malye pia weik tonun akunum wininyake. Atouk, dan sukum do nirya ara, amutuku noutam nirya ninye oldana ap, yu tenelana apuk unyake. Ati ara, malye wininyak nang, tapu koulongon ning ati, besi arye memenyak rantai tapu kintinip deipnalame.

²⁴ Israel nang wenena ati, narye tukwak mutuku sirya, im sirya nirya dipdenirye, pia malye wininyak nang wibuka deipnirye, lo arepnyopura, sikce yu weik deice arye yakirye, Israel mutuku nang nirya, sik aik dam yakirye, alubuka dopropnamake. Atouk, Israel nang unyak mutuku noutam ara, ‘Nunda mambul weik nang unyabeʼ tenen, maknya kintinibuka unyaka deiyok nang ara, amu tam deipnamne. Tonda, narye Israel mutuku nirya bataknyopura, na Allah si erena ati, kintinibuka domik aik nirya babye, sik yuk pera mutuku arye olyanamak nang arye, anyaik ulubuka daklopnamake. Anyasik winibuka malye kipdeibicopura, nara anyasik ton ap, na kanye kum deipnamna ati, anyaik pum tam ton, na si pia kum erepnamake.

²⁵ Anggun mal olan nang arye yakirye, opnusice talak ara, anggun Israel mutuku talibuka ululum nang ara, talima seksaksiliba, ‘Se tenepmunce, ‘Anang ap, nun ap, teleb kibuka neika una ati, talima ansinipdeipsinirye, tonok kanye bobuka unamapa ati, anang ap, nyalin yupu nyapdeipdatibyeʼ tenen, patapsilya ati, piripdemunyak arye, enamlum bukni, ayu nang arye, kum kekenamake. Anggunti pia olyanganamsiyake.

²⁶ Atalak nirya ara, yu ning tenen kanye ap, imun kanye bobuka, talima daksaknaba, malye yupu nyana ap ara, pia tuba-tuba yanganamle. Tonda, ton nang arye, ‘Se, kanye imun ning ton, asukum akunum upmale, asukum ton yanamle,ʼ nyabuka, talye yupu nyanamak bukni, aning nirya ara, talye-talye yupu nyabikiba, kekenamlume. Winipliba, anggun Israel yala nang arye, ‘Se, nabi nang ati, morobibiba, lengdar deice arye, teleb un ning ton eibikirye, nun melibuka lak nyapsitingʼ tenen, sikce morolbinamak bukni, aning babye, kum danamle. Tonda, aning atonun, imam-imam nang anggun deiyok nang ati, moronamlum bukni, sik imam nang babye, Allah yupu tuba kum peterenamsiyake. Allah arye, ‘Aning ara, wininamlume, aning ara, pia kum wininamlume,’ nyapdeiamsuk yupu ara, pia kum danamle. Atouk anggun ninye deiyok nang nirya ap, yupu bokolina deiyok nang ap babye, ‘Winibuka wininamlume,’ nyabuka, kum peterenamsiyake. Aning nirya, akunum sirya tunim apnamle

²⁷ Tonda, winipnamlula ati, anggun mutuku talibuka, ninye deiyok nang Raja ara, ‘Se, yata wiriptibye do?’ tenen, pia engenamake Aning atonun, Raja el mi babye, el talima sakliba, ‘Se, nun mutuku noutam ara, ila ton ap, teleb kum unamle,’ tenepnamle. Tonda, amutuku noutam unyak nang nirya ara, ilil weik upliba, ‘Se,’ tenebikirye, sik taruk ap, yok ap, serem talipnamle. Ati ara, narye anggun malye ulalum ning eipnirye, awamuk atonun, narye kanye imun yu ning deipsinirye, wenepnamsine. Tonda, sik nirya ati, weik wenen ning arepnirye, anggunti kum kipdeipnamsine. Ara, minop talak anggunce, anggun kayapu nang ati, wenemunce, kum kipdeiamlum atonun, anggunti, narye winipnamsine. “Winipnamsina deice arye, anggun nirya arye, nati ara, ‘Se, kume, dipkoprob el Allah Yahweh ara, Pia Mikip Weiknye dikoprop ulule,’ tenepnamnulume. Allah arye nyapdeibukba, Yeheskiel kekebukce, sekuk.