Yehezkiel 48 - Eipomek

Ninye yala yuk-yuk ulamik touk, tuku bokamika ati, nyabuk yupu

¹ Allah Yahweh arye, Yeheskiel biti ayupu nyabuk. Israel nang dopropnamaka tuku ara, bokuka arepnalyame. Dabu tam, (arah utara) mutuku noutam ulamik Israel yala nang ara, sik tuku wililamikak ati, ayupu lak nyapdeibik. Israel nang ulamik tam bukni, pia dabu tam sirik tam ara, Helton tam ban bisik bukni, deiyok kounak ara, mutuku si Lebo-Hamat dam arye, deiyok kobikce, atam dipdongobuka, keting panalyangan tam wilyamikce deibik. Ara, weik laut mekwen, el si Laut Tengah (Mediterania), el cang ara, keting panalyangan tam wilibuka dopropmekce, otam asik si ara, Hazar-Enan mutuku dam kiklibuka deibik. Ura, Hazar-Enan mutuku ara, Damsyik mutuku wililonak dam bukni, dabu tam, sirik tam uamuk. Tonda, Hamat mutuku ara, asukumuk bukni, deice tam, iknapye tam uamuk. Abinamik mutuku wililongonak ara, Damsyik mutuku ap, Hamat mutuku ap, dana-dana wililonak binamik. Ara, Israel yala nang arye, atuku ara, bokuka, tonok-tonok talinamak tuku wililongonak ara, keting panalyangan tam arye dipdongobuka, keting kumulban tam bukni, Laut Tengah damuk binuka deibik. Iknapye tam ara, sik Dan yala nang ati, tonok tuku bokuka arepnalyame.

² Asher yala nang talinamak tuku ara, Dan yala nang arye unamak mutuku wililonak dam arye ubuka, keting panalyangan tam arye dipdongobuka, keting kumulban tam mutuku ara, Asyer yala nang ati arepnalyame.

³ Asher yala nang arye unamak mutuku wililonak dam anyapce ubuka, keting panalyangan tam dipdongobuka, keting kumulban tam mutuku ton, Naftali yala nang ati, tuku ton bokuka arepnalyame.

⁴ Naftali yala nang arye unamak mutuku wililonak dam, arye ubuka keting panalyangan tam arye dipdongobuka, keting kumulban tam mutuku ton, Manasye yala nang ati, tuku ton bokuka arepnalyame.

⁵ Manasye yala nang arye unamak mutuku wililonak dam, arye ubuka, keting panalyangan tam arye dipdongobuka, keting kumulban tam mutuku ton, Efraim yala nang ati, tuku ton bokuka arepnalyame.

⁶ Efraim yala nang unamak mutuku wililonak dam arye ubuka, keting panalyangan tam arye dipdongobuka, keting kumulban tam mutuku ton, Ruben yala nang ati, tuku ton bokuka arepnalyame.

⁷ Ruben yala nang unamak mutuku wililonak dam arye ubuka, keting panalyangan tam arye dipdongobuka, keting kumulban tam mutuku ton, Yehuda yala nang ati, tuku ton wilibukapmince, bokuka arepnalyame.

Israel yala nang ati, mutuku yuk-yuk wibuka deibik talakuk, Allah Yahweh, el si eren aik unamikak ati, tuku ton bokdeibika ati, nyabuk yupu

⁸ Yehuda nang dopropnamaka tuku dam bukni, ton tam, na Allah Yahweh ati, dopropnamne tuku ton, wibuka deipnamnilyame. Na si eren aik dopnamlak ara, tuku ton kiklibuka, wibuka deipnamlum ning ara, keting panalyangan tam arye dipdongobuka, oketeng kumulban tam ap, el pala ara, 12,5 kilometer kintinibuka deipnamnilyame. Atuku el cang ara, Israel nang, yala yuk-yuk aunyak touk, tonok yala nang arye dopropnamaka tuku pala atonun, na ning babye, atonun kipnamle. Tonda, atuku dipkoprob noutam ara, na si eren aik dobuka deipnamake.

⁹ Awilibuka deipnamlum mutuku ara, na ning koproba uk kipnamle. Ara, na Allah Yahweh, naryuk aning talipnamne. Aning ara, atuku noutam bukni, pia noutam ton kintinibuka deipnamlumak el cang ara, 12,5 kilometer ap, el pala ara, 10 kilometer ap, kintinibuka deipnamnulume. Aning ara, na ning uka. Ara, na si eren aik asukum bukni, dipkoprob noutamakuk deipnamnulume.

¹⁰ Atalak ara, na Allah Yahweh, na ‘Naʼ tenen ning ulul bukni, atuku noutam ara, na Allah ati, na si eren pil talibuka donamak nanguk dopropnamake. Na si eren aik pum tam, mambul pil donamniaka deiyok nang, sik imam-imam nang ati, atuku ton bokuka arenamlume. Sikce doprobikirye, unamakak ara, pia teleb lek sukumuk unamlule. Atuku bukni, arah utara, dabu tam wililongonak el cang ara, 12,5 kilometer kipnamle. Aning atonun, arah selatan, iknapye tam ara, el cang ara, 12,5 kilometer kiklibuka, wibuka deipnamlume. Bukni, atuku el keting kumulban tam babye, keting panalyangan tam babye, el pala ara, 10,000 kilometer kiklibuka wibuka deipnamlume. Arup akunum nyapman touk, atuku sik imam nang ati, kintinip deipnamlumak bukni, anoutam ara, Allah Yahweh, na si eren aik dobuka deipnamniake.

¹¹ Ura, anoutam tuku wilibuka kintinip deinamlum ning ara, sik imam-imam nang, na piluk doninyak nang aryuk, atuku bokuka arepnamlume. Amutuku yuk kintinibuka wipdeipnamlum mutuku ara, Zadok birye deiamukba, dadeipdanin yangalammika ani, sikce deiamikak imam-imam unyak nanguk, arepmunyeba, ananguk sik tuku kipdopnamake. Ara, talye imam nang kum bukni, sik Israel nang ap, sik imam nang kan-kan arye, ton tam nang weik tonun, malye winin ning talibuka ulamik. Ara, narye, ‘Aning ara wininamlume, aning ara, pia kum wininamlume,’ nyapdeipsise yupu yanilamikce, malye winin ninguk, talibuka ulamik nang kan-kan kum bukni, sik Zadok tam imam-imam nang arye, na nyapdeipsise yupu moubuka taleamikce, na pil diksukumuk, teleb kibuka pil dolamnik nang ati nyapne. Zadok tam nang arye deiamik imam nang aryuk, na si eren aik upnamla dam, amutuku tuku ton dobuka unamake.

¹² Ati ara, sik Zadok birye deiamukba, dadeipdanin yangalamika ani, deibik imam nang ara, ‘Naʼ tenen tuku noutam arye wilibukapmunce, bokuka arenamlum bukni, sik tuku yuk wilibuka arepnamlume. Amutuku tuku ara, nara Allah, na si eren aik dam arye pil donyak nang, sik Lewi yala nang ati, arepnamlum tam arye, wilibuka Zadok yala imam nang ati, arepnamlume. Arepnamlum tuku noutam nirya ara, na Allah, na ‘Naʼ tenen ning ati, ‘Atuku ara pia teleb lek sukumuk ulule,’ tenenamlume.

¹³ ‘Naʼ tenen tuku noutam bokuka, sik Lewi yala nang, na aik dam pil donyak nang ati, arepnamlum tuku ara, el cang ara, 12,5 kilometer kipnamle. Ara keting panalyangan tam arye dipdongobuka, keting kumulban tam kiklibuka, wililonak deipnamlume. Tonda, sik dopropnamaka tuku, el pala ara, 5 kilometer kipnamle. Ara, sik imam nang ati arepnamlum tam, alilunakuk, sik Lewi yala nang ati, tuku bokuka arepnamlume.

¹⁴ Sik Lewi yala nang arye dopropnamaka tuku ara, noutam tuku mitik tonun ara, sikce, ‘Yuk ning dekelona ap dekdopnune. Akumopura, yo bok deice arye dekdopniba, yuk nang arye, atuku dopropnamake,’ tenena ara, pia meme. Aning ara, pia kum tenenamake. Yata nang do nirya, yuk Israel nang arye, atuku pia kum dopropnamake. Deiyok ara, atuku ara, na Allah Yahweh, ‘Naʼ tenen ninguk unulula ati, pia teleb lek sukum ulula ati, yuk talye nang nirya ara, pia kum doproptinge.

¹⁵ ‘Naʼ tenen tuku bukni, mitik tonun yukak ara, el cang ara, 12,5 kilometer aubuk. Tonda, el pala ara, 2,5 (dua setengah) kilometer ubuk. Atuku nirya ara, talye Israel yala nang arye doproptinge. Atuku ara, wa win sukum do, bai tam ninye kum sukum do, sik weik asik donamakak do, anggun Israel yala nang arye, tenepmunye touk, atuku bokuka dopropnamlume.

¹⁶ Amutuku noutam el urasin ara, persegi empat kipnamle. Ati, atonun umunye tam yuk-yuk ara, 2,250 meter kipnamle. Ara, seper empat kilometer (1/4 kilometer) kiklibuka deipnalume. Aning atonun iknapye tam (arah selatan) babye, dabu tam (arah utara) babye, keting kumulban tam (arah barat) babye, keting panalyangan tam (arah timur) babye, 2,250 meter atonun kibuka, kiklipdeipnamlume. Ati, dana-dana tam nirya ara, seper empat kilometer (1/4 kilometer) kiklibuka deipnamlume. Atuku ara, ton tuba aubuka ati, na Allah ap, sik imam nang, dopropnamapak lilun tamuk kipmala ati, atuku ara, pia teleb lek kum sukum ati, sik amutuku noutam unyak Israel yala nang arye, ‘Nunda asukumuk unamapʼ tenen ning ara, dolona teleb uka. Tonda, ‘Amutuku ara, kata mutuku kipnamle. Amutuku ara, weik asik dobukabibirye, asukumuk unamabe,’ tenebikcopura, aning babye teleb uka.

¹⁷ Amutuku noutam weik asik dopnamlum ning ara, dana-dana tam ton, talye bai mutuku ton bataknamlume. Amutuku noutam ara, aik dona kume. Ati, el urasin ara, persegi empat kipnamle. Ati, atonun umunye tam yuk-yuk nirya ara, 125 meter kipnamle. Ati, iknapye tam (arah selatan) babye, dabu tam (arah utara) babye, keting kumulban tam (arah barat) babye, keting panalyangan tam (arah timur) babye, 125 meter kibuka, kiklibuka deipnamlum tuku ara, bai mutuku uk kipnamle. Asukum noutam ara, aik ton dona meme.

¹⁸ Keting panalyangan tam ap, keting kumulban tam ap ara, mitik tonun tuba aupnamle tuku ara, wa winakuk upnamle. Atam el urasin ara, persegi empat kipnamle. Ati, atonun umunye tam yuk-yuk nirya ara, 5 kilometer kipnamle. Atuku nirya ara, sik Israel nang arye, wa win sukum ton kintinipnamake. Abitinye lo weik upnamle tuku ara, ninye arye yala ning nirya kouna ati, talinamake. Wa wiamikca, lin talak linamak ning ara, anggun weik asik dopnamlum ning noutam, aik dobuka unamak nang arye, adin ning dobuka dinamnyake.

¹⁹ Ara, Israel nang yala-yala nirya ara, weik asik Yerusalem mutuku noutam pil donamak nang nirya ara, awa win sukum noutam, wa wibuka kunamnyake. Sik nirya talye tunim abuka namin asa arye daukirye, asukumuk wa wibuka unyak nang nirya ara, lin talak uplyeura, bulubuka, lilyanganamake.

²⁰ Ati, anggunce wilibuka kintinip deipnamlum mutuku noutam nirya, el urasin ara, persegi empat kipnamle. Ati, atonun umunye tam yuk-yuk nirya ara, 12,5 kilometer kipnamle. Ara, wa win sukum ap, weik asik Yerusalem mutuku dopnamlum ning ap, na Allah Yahweh ati, na ‘Naʼ tenen ning, kintinipnamlum ning ap, sik imam-imam nang ati, wilibuka deipnamlum ning ap, amutuku-amutuku nirya, adiparyuk wilibuka kintinipnamlum ning ara, el pala ap, el cang ap, dana-dana tam nirya ap ara, persegi empat kipnamle. El kiklina ara, 12,5 kilo meter, atam, otam, eitam, outam nirya ara, atonun 12,5 kilometer wilibuka kiklipmunce, kintinipnamlume.

^21-22 Na Allah ap, imam nang ap, kota Yerusalem dopnamlumak ati, atuku wilibuka deipnamlumak, pia teleb lek sukum atonun, persegi empat kiklibuka, 12,5 kilometer kipnamlum ning ara, dipkoprob noutamuk upnamle. Atuku dam bukni, dana-dana tam, keting kumulban tam ap, keting panalyangan tam ap, ton tuba aupnamle tuku ara, Israel ninye talipnamak weik deiyok nang, sik Raja nang arye, atuku sirya tam talibuka unamake. Amutuku nirya dipkoprob noutam ara, anggunce, na Allah Yahweh, na si eren aik dopnamnulume. Aning lilun dam ara, anggun imam nang ap, sik Lewi yala nang ap, sik unamakak babye kintinibuka dopnamlume. Atalak ara, dipkoprob noutamuk kipnamle bukni, asukum arye dana-dana tam, ton tuba aupnamle tuku ara, sik Raja nang arye talinamake. Raja nang arye, talipnamak tuku bukni, dabu tam ara (arah utara), Yehuda yala nang arye unamak tuku aupnamle. Aning atonun, iknapye tam ara, (arah selatan) sik Benyamin yala nang arye, unamak tuku aupnamle. Bukni, atuku nirya upnamlak dipkoprob noutam ara, Allah, na si eren aik dopnamlume.

Israel ninye bukni, sik yala yuk-yuk nang arye unamakak ati, nyabuk yupu

²³ Ura, Israel ninye bukni, sik yala yuk-yuk nang arye, talibuka unamak tuku ati, laka nyapnune. Ara, pia teleb lek sukum tuku, persegi empat 12,5 kilometer ning ara, noutam awamliba, asukum lilun dam ara, Raja nang arye talipnamak tuku aupnamle. Asukum arye iknapye tam ap, dabu tam uamuk tuku ara, talye Israel ninye yala yuk-yuk ulamak touk, sik un tuku ton wilibuka deipnamlume. Min yuma ara, Benyamin yala nang arye, unamakak wilibuka deipnamlume. Atuku el pala deiyok kouna ara, keting panalyangan tam, wililonak arye dipdongobuka binamuka ani, keting kumulban tam kipnamle.

²⁴ Benyamin yala nang arye, unamak mutuku wililonak dam ubuka, keting panalyangan tam arye dipdongobuka, keting kumulban tam mutuku ton, Simeon yala nang ati, tuku ton bokuka arepnamlume.

²⁵ Simeon yala nang arye, unamak mutuku wililonak dam ubuka, keting panalyangan tam arye dipdongobuka, keting kumulban tam mutuku ton, Isakar yala nang ati, tuku ton bokuka arepnamlume.

²⁶ Isakar yala nang arye unamak mutuku wililonak dam arye ubuka, keting panalyangan tam dipdongobuka, keting kumulban tam mutuku ton, Zebulon yala nang ati, tuku ton bokuka arepnamlume.

²⁷ Zebulon yala nang arye, unamak mutuku wililonak dam ubuka, keting panalyangan tam arye dipdongobuka, keting kumulban tam mutuku ton, Gad yala nang ati, tuku ton bokuka arepnamlume. Atouk, tonda laut tengah mekwen deibukak, binuka wililolamik, tonda sik yala yuk-yuk bokamik ning ara, awilibik ning ara, dabu tam arye sekuka, iknapye tam sekamik ara, ani. Ara, Benyamin yala nang unak ap, Simeon yala nang ap, Isakar yala nang ap, Zebulon yala nang ap, Gad yala nang ap una ati, wilibuka kintinip deiamik.

²⁸ Gad yala nang arye unamakak bukni, iknapye tam ara (arah selatan), sik wililonak deiyok kouna ara, keting panalyangan tam, Tamar mutuku arye dipdongobuka, keting kumulban tam, weik kata mutuku bukni, Kades-Meriba mek puak arye dipdongobuka, keting kumulban tam ton anyapce dipdongobuka, otam Mesir mutuku wililonak, Mesir mek balula lilun dam arye, dipdongobuka otam wilipdongobuka, binamuka ani, Laut Tengah mekwen deiamukakuk, binuka deipnamlume.

²⁹ Na Allah Yahweh, aning-aning nirya talibuka, deice tam erebuka, mikip weik ununye birye nyapsine. Aning lak nyapmasin touk, amutuku tuku noutam nirya ara, anggun adiparyuk, Israel ninye yala-yala nirya unyak nang ara, sik talibuka unamakak ati, amutuku tuku yuk-yuk bokdeipmunce, arepmunyopura, Israel yala nang arye, atuku pia ati talinamake. Sik yala yuk-yuk aunyak touk, bokuka arepmunyeba, asukumuk unamnyake.

Weik asik, kota Yerusalem dobikce, pala weik bisik bublan botopnamika ati, nyamuk yupu

³⁰ Weik asik, kota Yerusalem mutuku dopnamlum dana-dana tam nirya ara, antanap dongobuka, cang weik keil poka ton, dobuka deipnamlume. Acang keil poka wekelbanak ati, bisik bublan nirya ara, dua belas botopdeipnamlume. Kota Yerusalem antanap dongobuka dopnamlum cang keil poka ara, persegi empat kibuka, 2,250 meter kiklibuka dopnamlume. Ati ara, dabu tam (arah utara) kat keil arye deibuka dopnamlum keil poka, el kiklin ning cang ara, 2,250 meter kiklibuka dopnamlume. Atam poka el pala weik bisik bublan botopdeipnamlum ning ara, winilye kintinipnamlume.

³¹ Dabu tam weik poka botopdeipnamlum pala bisik bublan ara, yuk-yuk winilye kintinipnamlume. Apala bisik bublan ara, yuk-yuk kintinibuka, Israel nang yala yuk-yuk ulamak touk, si tonok yuk-yuk wibuka, si dopnamlume. Tonok ning dabu tam (arah utara) botopdeipnamlum bublan, el si ara Ruben, nyabuka si dopnalume. Bitinye bublan pala el si ara, ‘Yehudaʼ nyabuka, si dopnalume. Winilye bublan pala el si ara, ‘Lewiʼ nyabuka si dopnalume.

³² Aning atonun bukni, kota Yerusalem keil poka noutam bukni, keting panalyangan tam, pala weik bublan botopdeipnamlum ning ara, yuk-yuk winilye kintinipnamlume. Ara, keting panalyangan tam babye, kat keil arye deibuka dopnamlum keil poka, el kiklina cang ara, 2,250 meter kiklibuka dopnamlume. Atam poka, el pala weik bisik bublan botopdeipnamlum ning ara, winilye kintinipnamlume. Tonok ning botopdeipnamlum bublan, el si ara ‘Yusubʼ nyabuka, si dopnalume. Bitinye bublan pala el si ara, ‘Benyaminʼ nyabuka, si dopnalume. Winilye bublan pala el si ara, ‘Danʼ nyabuka, si dopnalume.

³³ Aning atonun bukni, kota Yerusalem keil poka noutam bukni, iknapye tam (arah selatan), pala weik bublan botopdeipnamlum ning ara, yuk-yuk winilye kintinipnamlume. Ara, iknapye tam babye, kat keil arye deibuka, dopnamlum keil poka, el kiklina cang ara, 2,250 meter kiklibuka dopnamlume. Atam poka, el pala weik bisik bublan botopdeipnamlum ning ara, winilye kintinipnamlume. Tonok ning botopdeipnamlum bublan, el si ara ‘Simeonʼ nyabuka, si dopnalume. Bitinye bublan pala el si ara, Isakar nyabuka si dopnalume. Winilye bublan pala el si ara, ‘Zebulonʼ nyabuka, si dopnalume.

³⁴ Aning atonun keting kumulban tam babye, pala weik bublan botopdeipnamlum ning ara, yuk-yuk winilye kintinipnamlume. Ara, kat keil arye deibuka dopnamlum keil poka, el kiklina cang ara, 2,250 meter kiklibuka dopnamlume. Atam poka, el pala weik bisik bublan botopdeipnamlum ning ara, winilye kintinipnamlume. Tonok ning botopdeipnamlum bublan, el si ara, ‘Gadʼ nyabuka, si dopnamlume. Bitinye bublan pala el si ara, ‘Asherʼ nyabuka, si dopnamlume. Winilye bublan pala el si ara, ‘Naftaliʼ nyabuka, si dopnamake.

³⁵ Akat keil arye, cang poka dopnamlum ning ara, kota Yerusalem antanap dongobuka dana-dana tam nirya nukmunyopura, el cang nirya ara, 9 kilometer deice kiklibuka dopnamlume. Tonda, kota Yerusalem dona ati, anggun deiyok koupnamlum talak arye dipdongobuka, keting tamun oyanamle talak nirya ara, akota si ton si sinamak nang ara, ani. Akota el si ara, ‘Allah Yahweh, amutuku noutam tuba aulule,’ nyabuka, kota si ati sisinamlume.