Yehezkiel 47 - Eipomek

Allah Yahweh el aik, mek pu dobuka yayuk ati, nyabuk yupu

¹ Malaikat birye, na Yeheskiel dobuka, Allah Yahweh el si eren aik wekelbana ati, bisik bublan dam delilbinuk. Winipnukba, dinmase talak ara, mek pu tonok bisik bublan amu tam bukni, iknapye tam (arah selatan) arye, kutukuka binamuk ara, keting panalyangan tam balamukak eipse. Aning atonun, Allah Yahweh el si eren ati tenda aik babye, keting yangan tam, urasin deibuka domik. Winibuka domikak, aminyan Allah Yahweh, el aik weik pala bisik bublan dam arye, kutukuka balamukak, iknapye tam (arah, selatan) tam, urasin deiamukce balamuk. Ara, kam ning opnarye, uku dongonak mesba dobuka deiamik tam, (arah selatan) lilun tam aryuk, kutukuka keting panalyangan tam banmokak, eipse.

² Ura, anye elce na adiparyuk bobuka, dabu tam bisik bublan tam arye bobinuk. Ura, ila tamubuka, Allah si eren ati tenda aik lilun, bai tam bobinukce, keting panalyangan tam bisik bublan botopdeiamikak bobinuk. Bobinukura, eipse ara, mitik mek ara, iknapye tam lilunak arye, amek pu dobuka, banmokak eipse.

³ Keting panalyangan tam, bisik bublan dam arye, amalaikat birye, ‘Yata ubuka cang ulul do?’ tenen, ‘Bumang ara, winibuka cang ara, winibukaʼ tenen, kiklilena ati, talipmok kama bobuka kiklibuk. Winibuka ukur kina ati, biyuk talak ara, anye birye na bobuka, amek pu bukni, keting panalyangan tam bobinuk tam, el karin cang ara, 500 meter nukukabukce, bobiyuk. Abobinukura, “Anda amek koupnulyame,” nyapnuk. “Amek koubuka binulyame,” nyapnukaura, amek el karu ara, yan kutam dam arye, outam kipnukbuk, amek koubuka bise.

⁴ Aning nirya akunum winibukura, min winipmok atonun, tonap 500 meter ton kiklibuk. Winibuk bukni, asukum ara, mek mitik tonun ton karu ubukba, mek koupdeserye, gutam dam yanuk. Aning atonun, tonap tabakuka kiklibuk ara, 500 meter ton kiklibukba, asukum karu ara, na deiyok dam baripnuke.

⁵ Ura tonap tabakuka, abisik banmokce, kiklipdeyuk ning babye, karin ara, 500 meter ton kilibuk. Asukum ara, mek pia karu weik ubuk. Ara, yan deice arye, yanibuka koubuka, bana ara, winipman kumto upse. Amek ara, na taram dam ubuka ati, mek kum koupmanto upse. Ura, nauk kum bukni, yata nang do nirya, mek kekuka, bana kel nang arye, amek piribuka koubuka, otam biting bukni, talye nang nirya arye, amek koubuka otam bana ara, kum binmanto uamukak eipse.

⁶ Ura, anye birye ton asipdenuk yupu ara, ani, “Se, anda ninye koproba aryuk, deipkikak ulyamnye, asukum aupmal ning nirya ati ara, ance min kum eipluma ati, moubuka biknulyame,” nyapnuke. Nyapnukura, adiparyuk na bobuka, mek lilunuk dam bobinukak eipse.

⁷ Abalamuk mek lilun tamubuka bobinuk talak ara, narye mek lilun dilamsak, amek dana-dana tam nirya ara, yo mutmuta pia weika, pamuk ning aupmukak eipse.

⁸ Eipseura, malaikat birye nyapnuk. “Amek ara, pu dobuka, keting panalyangan tam mutuku balule. Ara, amutuku noutam arye deiyok koubukce, outam ara, mutuku si Araba mutuku biyuke. Ara, Yordan mek koubuka, otam arye, atam ara, weik asik Yerusalem mutuku domik sukum ubuk. Anoutam arye, amek kebuka balamukce, Yordan mek dukdongamukce, karin sukum outam (arah selatan) ara, weik laut mek, el si Laut Mati, akunum min arye deibuk mek damuk balamukak eipse. Ura, aminyan min arye deibuk laut mek, Laut Mati noutam akunum balamuk ning ara, amek Laut Mati mek deiamukak, yu min-min nyalamuk ning ara, tonap tamubuka, teleb mek kipdeipnamlarya,” nyapnuk.

⁹ Amek ara, dan mutuku bin talak babye, pia mek telebuk, tuba banauk unamle. Wininamle mek noutam ara, ikan yala-yala nirya ara, kam ubikceba, ninye arye tomonamake. Atonun, talye bai tam kam ulamle ning babye, amekwen dam teleb kibuka unamake. Tonda, Laut Mati, garam weik uamuk mekwen babye, amitik mek outam balirye, amekwen deibukak weklyeura, tonap, amekwen pia teleb mekuk upnamlarya. Tonda, aminyan pia kum bataknamle. Dan mutuku do nirya ara, amek balamlye mutuku nirya ara, winilamlyeba, anoutam aryuk amutuku kam ning ap, palamle ning ap, ninye ap nirya, teleb kibuka unamake.

¹⁰ Minop talak ara, aweik mekwen, el si ara Laut Mati, garam weik ubuka ati, amek pum tam ara ikan pia kum uamuk bukni, aminyan talak ara, amitik mekwen akunum balirye weklyeura, aweik laut mekwen dana-dana tam nirya ara, ninye arye ikan tomonamake. Ara, keting komulbalamle tam, mutuku si En-Gelaim arye anyapce, dipdongobuka binamlya ani, otam keting panalyangan tam mutuku, el si En-Eglaim mutuku nirya ara, amekwen pia teleb upnamlarya. Winiplyeura, alaut mekwen lilun arye, ikan don nang nirya ara, pin-pin aryuk unamake. Winikceura, sik ikan don aling, el si ara jala, kalekuka deilinamake. Amekwen akunum teleb uplyeura, amekwen noutam nirya ara, ikan yala-yala nirya aunamake. Ara, weik Laut Mekwen, el si Laut Mediterania, tonda Laut Tengah nyalamak laut mekwen ulye touk, Laut Mati babye, atonun unamle.

¹¹ Weik laut mekwen ara, teleb upnamle bukni, amekwen lilun ara, talye lu mutuku bai delilamle mekwen ap, amutuku talye delilamle mitik mek ap nirya ara, tuba garam ua ara, weik aupnamle. Asukum noutam ara, min-min teleb ning garam ara, ninye tuba patapnamle ati, asukum ara, garam dolonamakak ati, aning kintinipnamle.

¹² Mitik mekwen sukum ara, garam aupnamle bukni, amitik mek balamlye lilun arye, yo yala-yala nirya pabukaplirye, duk weika arye pia mounamle. Ayo bok dakalsakna ap, ninye arye deklamak ning nirya ap ara, ton kum mounamle. Tonda ayo duk mounamle ning babye, ton kum sirya dakmanto unamle. Ayo yala-yala nirya ara, atikinamle ning nirya ara, el duk pia teleb ning ara, awala-awala deice nirya ara, mounauk unamlarya. Winipnamle deiyok ara, ayo duk mek kilamuk mek ara, Allah Yahweh el si eren ati, tenda aik tam arye, mek bukna bukuka yanganamle. Ayo el duk moulamuka nirya ara, ninye arye dina atia. Bukni, ayo el bok ara, uk dinman nang, sik obat dina ati, ayo bok nyalamuk. Atonun, tonda, ninye arye dakuka dibikceura, sikuk lopnamle.

Amutuku tuku wililonak ap, bokuka arenamlak ap ati, lak nyabuk yupu

¹³ Ura, Allah Yahweh aning-aning nirya talebuka, deice tam erebuka, mikip weik ululnye birye, na Yeheskiel ati, nyapnuk yupu ara, ani. “Ura, sik Israel yala nang kan-kan nirya bukni, obarye nirya (12) nuka aupmalye yala nang ati, Israel nang sik unak ati ara, tuku wilibuka arenamlumak ara, ani. Minop ara, Yusuf el yala nang ati ara, tuku bitinye tam, bokuka arebibyeba, dopropnamake.

¹⁴ Aning ati ara, na dipkoprob Allah, na si deice arye nyapsine. Ara minop talak, na nyalin yupu deice arye, akunum nyapdeipsise. Ara, narye anggun apu yapu nang ati, ‘Amutuku tuku noutam ara, boknirye dobuka arepnamsine. Arepsinyeura, anggun ap, anggunce deipmunyakarye, dadeipdanin, binamak nang nirya ara, atuku doprobikirye, daunamnyake nyabuka, nyalin yupu deice arye nyapsise. Aning ati ara, atuku ara, ance dopropnulyame. Tonda, dipkoprob teleb kibuka bokmunce, anggun neika ululum nang ati, arepnalume.

¹⁵ Israel nang nirya arye, dopropnamaka mutuku tuku bokuka wililonak ara, lak nyapnusine. Ara, dabu tam, (arah utara) arye deiyok kibuka wilipdopmunce, weik laut mekwen, Laut Tengah (Mediterania) dam, keting komulbalamle tam arye, dipdongobuka binamuk ani, keting palanyangan tam, mutuku si Hetlon mutuku arye, wilipdopmunyak arye, bokdopnamlulume. Tonda, asukum arye dipdongobuka, mutuku si Hamat tam arye, dipdongobuka binamuka ani, Zedad mutuku deice tam binuka, wilipdopnamlume.

¹⁶ Atonun, anyapce dipdongobuka, Berota mutuku ap, Sibraim mutuku ap, dipdongobuka binamlya ani, wilipdopnamlume. (Sibraim mutuku, ara Damsyik mutuku atam, Hamat mutuku otam, danoutam mutuku). Anyapce dipdongobuka binamunya ani, Hazar-Enan mutuku binuka wilipdopnamlume. Hazar-Enon mutuku ara, Hauran mutuku wililonak dam ubuke.

¹⁷ Wini buka wilipdopnamluma ati, dabu tam (arah utara) wililonak ara, weik laut mekwen, Laut Tengah deibuk dam arye, deiyok kibuka, keting panalyangan tam binamunya ani, otam binuka wilipdopnamlume. Tonda, anyapce dipdongobuka, Hazar-Enon mutuku noutam dilbinamlule. Tonda, Hazar-Enon mutuku bukni, iknapye tam (arah selatan), Damsyik mutuku ubuk. Israel nang mutuku tuku dopropnamaka ning ara, Damsyik mutuku arye, iknapye tam bukni, (arah selatan) dipdongobuka, Hamat mutuku ap, dabu tam (arah utara) mutuku noutam wililonak tam upnamle.

¹⁸ Tonda, keting panalyangan tam wililonak ati ara, anyapce dipdongobuka binamunya ani, Damsyik mutuku ap, Hauran mutuku ap, atam ubuk bukni, danoutam ara, mek balamlye mek, Yordan mek ara, Gilead mutuku ubuk. Tonda, mek otam ara, Israel nang talipnamak tam aubuk. Amutuku arye iknapye tam (arah selatan) dipdongobuka balamunya ani, wilipdopnamlume. Ati Yordan mek ara, sik Israel nang, sik mutuku tuku wililonak upnamle ning ara, keting komulban tam, Gilead mutuku bukni, keting panalyangan tam binuka wililonamake. Israel nang talipnamak tam, anyapce dipdongobuka, iknapye tam anyapce, dipdongobuka binuka, wilipdopnamlume. Ara, Tamar mutuku binuka wilipdopnamlume. Aning ara, keting palanyangan tam wililonak upnamle.

¹⁹ Ura, Tamar mutuku arye, iknapye tam (arah selatan) arye, wililonak arye dipdongobuka binamunya ani, keting komulban tam (arah barat) dabinuka wilipdopnamlume. Asik domik ning ara, Kades-Meriba mek pu arye, dipdongobuka wilibuka binamunya ani, minop talak mek balamukak bukni, akunum diprobuk dam arye dipdongobuka epdamunyak arye, dabinuka wilipdopnamlume. Anyapce, weik laut mekwen, keting komulban tam uamuk ning, el si Laut Tengah (Mediterania) Mesir mutuku damuk dipdongobuka wilipdopnamlume.

²⁰ Anyapce, keting komulban tam wililonak ara, Laut Tengah mekwen deiamukak aryuk kintinipmunce, anyapce dabu tam (arah utara) dipdongobuka binamunya ani, arah utara tonok mutuku tam ara, Hamat mutuku bisik wekelbalamak tam bukni, keting komulban tam teleb tam binuka deipnamlume. Asukumuk aupnamle.

²¹ Aning nirya lak nyapmasin touk, amutuku tuku noutam nirya ati ara, anggun kayapu nang, ‘Israel yala nang nirya doprobikirye, asukumuk unamakʼ tenen, bokdanamlume. Ara anggun yala-yala yuk-yuk ululum bukni, anggun Israel nang talinamlum mutuku, aumunye touk bokdanamlume.

²² Tonda, atuku noutam ara, anggun mutuku koproba, pia ati talebuka unamlume. Tonda, yata mutuku nang do, sik yuk mutuku ninye asik nang arye, sik Israel yala nang dam yanuka neika umunce, atalak tuba aunyak nang arye, sik ap, anggunce sik mapu delilamik nang ap, anggun neika atuku dopropnamlume. Ara, anggun Israel yala nang ap, anggun neika ululum ninye asik nang ap babye, amutuku tuku bokuka deipmunyeba, talebuka unamake. Ara, anggunce, ‘Kume, anang nirya ara, Israel yala nang uka,’ tenamlume. Tonda, anggunce pia tuku dolona ati, ‘Yatanye birye, dan tuku dopropnamleʼ tenen, win ning el si undi donamluma deice arye, anggun ap neika bokmunce dopnamlume. Ara, atuku anggun Israel yala nang nirya arye, tuku wilipnumunye talak ara, anggun kayapu nang, yuk mutuku ninye asik nang bukni, anggun ap neika umunye nang babye, bokuka arenamlume. Winipmunyeba anang nirya ara, sik ap neikauk unamlume.

²³ Ura, ninye asik nang bukni, amutuku nang kibuka ululum nang nirya ara, sik Israel nang ap neika unyakakuk, tuku wilibuka arepmunyeura, sik Israel nang unamakak ara, anggun ap neika ansinibuka unamlume. Nara Allah Yahweh, aning-aning nirya talebuka, deice tam erebuka, mikip weik ununye birye, akunum nyapsina ati, aninguk wininamlume.