Yehezkiel 46 - Eipomek

Weik mambul sum ati, “Aning ara, winina telebe, aning ara winina meme,” nyabuk yupu

¹ Allah Yahweh aning-aning nirya talebuka, deice tam erebuka, mikip weik ululnye birye, nyabuk. “Na Allah si erena ati tenda aik kintinibuka dobik ning, keting yangan tam arye wekelbana ati, abisik bublan botobikak ara, atam kibuka bana ati bublan ara, pia moubuka, tirikinamluma ara, aminggu-aminggu nirya, sum like nakub barye deice arye, talye pil donyak talak arye, abublan ara tirikdongopnamlume. Bukni, abisik bublan tirikilongona kukna ati ara, na Allah, na si eren sum, talye pil pia kum donamlum sum, Sabat sum deice ap, tonda winiryuk wala tiklamle talak ap, ‘Allah arenamabʼ tenen, aning kintinilinamak talak aryuk, abisik bublan ara, kukunamnyake.

² Ati, narye nyapmasin sum akunum yalyeura, sik ninye deiyok nang Raja-Raja ara, aik dam bai tam arye kibuka, aik pum noutam wekenamnyake. Anyaik pum tam wekelbana ati, atam atolonga deice welebuka tikilban, bisik bublan dam ikuka deibik yo damuk tikinamle. Asukumuk tikmalye talak ara, sik imam nang ara, Israel nang arye, ‘Allah arepnuyapʼ tenen, abobuka yanamakce ning arepminyeura, sik imam nang arye, aning dobuka, uku dongopnamake. Tonda, sik anang deiyok Raja nang arye, mali ning ulamik ati, imam nang ara, ‘Allah arye sik Raja nang arye, mali wininyak ning lyeplirye, kum kipdeipnamleʼ tenen, kam ning obuka, uku dongopnamake. Tonda, Raja nang arye, ‘Allah ap, nun ap, teleb kibuka neika unamabeʼ tenen, aning ton bobuka, Allah ati arenamnyake. Aning arebikce talak ara, abublan dam ara, sik ninye deiyok nang Raja-Raja arye, sik kanupdongobikirye, Allah ati si erebikirye, Allah Yahweh, el siuk erenamake. Akunum winibikirye, bikdobikceura, asum noutam nirya ara, abisik bublan ara, pia kum tirikinamake. Keting akunum kumupnulye talak ara, abisik bublan tirikinamnyake.

³ Aning atonun, amutuku noutam unamak Israel nang ara, abisik bublan, keting yangan tam botopdeibik dam babye, amutuku noutam unamak nang nirya arye, kanupdongobikirye, Allah ati si erebikirye, Allah Yahweh, el siuk erenamake. Ara talye sum deice arye kum bukni, Sabat sum ap, tonda, ‘Asum ara, akunum winiryuk wala kipleʼ tenen, si erenamikce sum aryuk, abublan ara tirikilongonamnyake.

⁴ Ura, Sabat sum deice ara, sik ninye deiyok Raja nang babye, Allah Yahweh el siuk erebikirye, domba ato ning obuka, uku dongobikirye, Allah el siuk erenamake. Anggunce Allah ati arenamlum ning ara, ani. Ara, domba basam mi tekbarye ap, atonun yim domba basam weik ning tonok ap, aning nirya ara, malye una pia kum ning, pia teleb ninguk, boyakirye arenamnyake.

⁵ Ayim domba basam ap laptalibuka, si eren ati arelyanganamle ning ton, ara gandum duk, el ikin ara, 17,5 liter arenamlule. Tonda, adomba basam mi, Allah el si eren ati, gandum bukni, el teneplye touk, weika arye arelyanganamle. Agandum arelyanganamak ning nirya ara, minyak zaitun mek, tiga liter ap, kup-kup tam arelyanganamle.

⁶ Aning atonun, winiryuk wala talak akunum tuwak kiplyeura, Raja birye bobuka, arelyanganamle ning ara, yim sapi basam weik ning tonok ap, domba mi like nakub barye ap, yim domba basam weik ning tonok ap arenamle. Aning nirya ara, yok pia malye wamlye ning ara, kum buk, pia teleb ninguk, bobuka arelyanganamnyake.

⁷ Aning ap neika boyakirye, arenamlum ning ara, ani. Ara, gandum atonun ning ton, bulubuka arenamnyake. Tonda, yim sapi basam weik ning ap, yim kambing basam weik ning ap, bobuka yan arenamnyake. Aning winipnukce talak ara, gandum atonun ning 17,5 liter ap, tonda domba basam mi ap, neika ansinibuka arenamnyake. Tonda, sikce tenebikce touk, gandum ning ton boyanuka, arenamnyake. Agandum arelyangamak ning nirya ara, minyak zaitun mek, tiga liter lipman tam arelyanganamake.

⁸ Ura, ninye deiyok nang, sik Raja nang ara, nara Allah, na si eren aik noutam wekuka, aning arepnukce ning ara, keting yangan tam bisik bublan arye, aik pum tam noutam yanuka, wekelyanamnyake. Aning atonun, wekmaca ani, bai tam kukuka bana babye, abisik bublan tam aryuk banamnyake. Yuk bisik arye, kum wekenamnyake.

⁹ Ura, Israel nang unyak mutuku noutam unyak nang ara, Allah arye, ‘Asum ara, weik mambul sum,’ nyapdeiamuk touk, weik sum ton auplyeura, asum-asum nirya ara, sik amutuku noutam unyak nang nirya arye, ‘Allah Yahweh, el si ton erelbinamap,’ tenebikceura, sikda dabu tam (arah utara) bisik bublan wekelban bisikuk wekuka yanganamnyake. Aning winibuka, Allah el si erenmace ani, tamubuka ban bisik bublan ara, iknapye tam (arah selatan) bisik aryuk banamnyake. Yuk bisik ton pia bana kume. Ara, sik nirya akunum Allah ati, si erebuka el si erelamikce talak ati nyapne. Tonda, sik iknapye tam (arah selatan) bisik aryuk, abublan arye wekuka yanamak nang ara, aminyan talak tamubuka bana ati ara, dabu tam botopdeiamikce, bisik bublan tam arye binamnyake. Sik anang nirya ara, winiryuk yan talak arye, yanuka wekelyanmace bisikuk, tamubuka bana ara, pia meme. Abisikuk kum tamubuka binamnyake. Sik anang tamubuka bana ati ara, min arye kum wekelyanmace bisikuk binamnyake.

¹⁰ Sik ninye deiyok nang Raja, Allah Yahweh el aik wekelbinukce talak ara, sik talye Israel nang babye, amutuku noutam unyak nang ap, Raja ap, neika wekenamnyake. Winipmaca ani, tamubuka binukce talak nirya babye, neikto touk tamubuka binamnyake.

¹¹ Ura, weik kwalya kwalin sum nirya ap, tonda Allah arye, ‘Weik sum ani,” nyabuka, lak nyapsuk touk, asum-asum nirya ara, yim sapi basam ap, yim domba basam ap, laptalibuka, Allah el si eren ati arelyanganamake. Aning-aning arenamak talak ara, gandum duk yala ning, el ikin ara, 17,5 liter ap tabakuka arenamnyake. Tonda, atalak uk domba basam mi ap arenamak ning ara, sik tenebikce touk ubuka arenamnyake. Tonda, gandum 17,5 liter bobuka arelyanganamikce talak ara, minyak zaitun mek, tiga liter ap, tabakuka arelyanganamake.

¹² Ura, sik ninye deiyok nang Raja birye, el kanye aryuk, ‘Se, na ni koproba, Allah Yahweh ati, pia telebe nyapnamne ati, na tenepmanye touk, aning ton tabakuka, talye arepnamneʼ tenen, kintiniplyeura, aninguk arelyanganamle. Ara, dipkoprob kam ning obuka, uku arye dongon ning do, malye ulamlyeba bikuka, dukulongona ati aren ning do? ‘Na ap, Allah ap, teleb kibuka neika unamnameʼ tenen, aren ning do, aning nirya arena ara, sik Raja nang arye, aning arelyanganamaka ati, sik imam nang arye, Allah el si eren aik bublan, keting panalanyangan tam arye, botopdeibik bisik bublan damuk, kukulinamake. Ara, Raja birye aik pum tam wekelbana ati, abublan kukulinamake, nyapne. Aning arenamak talak nirya ara, min arye Sabat sum deice yanuka, arelyangalamik touk, abisik bublan damuk arelyanganamake. Bukni, Raja birye teneplye touk, aning nirya akunum arebuka bindopnukceura, aketing panalyangan tam bisik bublan arye bindoplyeba, sik imam nang arye abublan adiparyuk tirikilongonamake.

Tonok sum Allah arena ati, nyabuk yupu

¹³ Allah Yahweh arye nyabuk, “Asum-asum nirya, beren tam talak ara, sik Israel nang talebuka ninye deiyoknye birye, ‘Na malye wininye ning kum kipnirye, biknamnilʼ tenen, domba basam mi keting tamun nena tonok, deice arye nemlye basam ara, Raja birye arenamnile. Adomba basam ara, yok malye pia kum ninguk, adiparyuk yanuka areplyeba, imam nang arye, adomba obikirye, uku dabuka, na Allah Yahweh ati arenamninyake.

¹⁴ Aninguk kum bukni, yuk ning ara, asum-asum nirya beren tam talak ara, gandum dua kilogram boyanuka arelyanganamnulule. Tonda minyak zaitun mek tonok liter ara, arup talak kintinibuka, gandum teikice ning ‘Mitik tonun moul ap uptueʼ tenen, agandum ap, minyak ap, arenamnulume. Aning ara, asum-asum nirya, beren tam talak ara, pia na Allah Yahweh ati, winibuka arenamninyake. Awinipnamak ning ara, pia awinipnin balamikca ani, pia wininamaka ati nyapsine.

¹⁵ Ura, asum-asum nirya, beren tam talak ara, winiryuk lak nyapmasin touk, Israel nang ninye deiyoknye Raja birye, aning-aning bobuka, na Allah Yahweh, na si eren ati, arelyanganamnile. Ara, domba basam mi tonok ap, teikne gandum ap, minyak zaitun mek ap, boyanuka areplyeba, sik imam nang arye, ‘Raja el malye winin ning lyeplirye, teleb kipdeipnamleʼ tenen, aning nirya bobuka, uku dongonamnyake.

Ninye deiyok nang Raja-Raja, sik tuku ati, nyabuk yupu

¹⁶ Ura, Allah Yahweh, aning-aning nirya talebuka, deice tam erebuka, mikip weik ulinye birye, ‘Aning ara wininamlume. Aning ara, pia kum wininamlume,’ nyapdeibuk. Ayupu ara ani. “Ura ninye deiyok nang, sik Raja nang ara, anggun ni koproba Allah arye, anggunti bokuka, areamsise wa tuku ton bokuka arepyeba, aminyan talak Raja nang arye, sik mi ati, bokuka arebikceura, awa tuku bokuka, arepnamikce mi, el tuku koproba uk kilonamlule. Deiyok ara, na Allah arye, Raja nang ati areamsebuk, sikce sik mapu ati, akunum arebikceura, amapu yuk kipdobikirye, sikce ananguk, atuku pia kalikinamnyake. Ara, sik wa tuku, ‘Tanah warisan,’ nyalamak touk, anggun ‘Naʼ tenen, anggun ning koproba uk, kilonamlume.

¹⁷ Bukni, na Allah arye areamseba, aninye deiyoknye Raja birye, el taleamlirye, aulamye tuku noutam arye, ton bokuka, el amu tam pil dolinye biti, akunum areplyeura, anyareplye mutuku noutam tuku nirya ara, Raja amu tam pil melibuka dolinye birye, atuku talebuka, wa wibuka ulamya ani, aminyan talak, Tamubuka Arena Keting Tamun akunum yanuka uplyeura, amelin pil dolinye birye, awa tuku tamubuka, elti, areamuk ninye deiyoknye Raja biti, areplyeba, el wa tuku tamubuka, ton kipdoplyeura, Raja elcuk atuku talenamle. Deiyok ara ani. Allah arye ninye deiyoknye Raja biti, areplye tuku noutam ara, el aninye deiyoknye Raja ap, elce deiamlye mapu ap, awa tuku talinamnyake. Winibikirye, atuku nirya ara, sik ap, sik mapu silip apuk, wa wibuka linamnyake. Yuk nang arye ton, kume. Aning ara, doyanamle talak nirya, pia wininamake.

¹⁸ Aning atonun, Israel nang, sik ninye deiyoknye birye, yuk nang, sik talinyak wa tuku noutam arye, mitik tonun babye aulubuka kum dopropnamle. Na Allah arye, amutuku noutam unyak nang nirya ati, wa tuku bokuka, akunum arepsise ning ara, Raja birye, ‘Atuku talinyak nang yakniba bindobiceura, narye atuku dobuka bokukapnirye, na deiamse mapu koproba ati, arepnamne,’ tenepturye, pia kum winiptue. ‘Aning ara, meme,’ nyapsine. Ninye deiyoknye, el amu tam unyak nang arye talinyak mutuku tuku noutam, tonok tam babye, ton pia bokuka, kum dopropnamle. Akum bukni, Allah arye arebukba, el mutuku noutam awamlye tuku uk ara, urda doproplirye, el mapu koprop ati, bokuka arepnamlule. Winiplyeura, Allah el mapu koprop, sik Israel nang nirya arye talebuka, unyak mutuku noutam nirya ara, pia ati talinamnyake. Raja nang arye ton, sik wa tuku aulubuka doproplirye, kum boknamake.

Allah Yahweh arye, sik imam nang, sik uku dabuka din aik ati, nyabuk yupu

¹⁹ Aning nirya akunum nyabukura, na Yeheskiel biti, peterepnin balamnuknye malaikat arye, na adiparyuk bobukapnukce, pala weik bisik bublan bukni, dabu tam, (arah utara) uamuk weik bisik bublan dam, pintu gerbang lilun bobinuke. Ara, sik imam-iman nang arye, sik anyaik-anyaik, pia teleb lek aik pum wekuka ulamik, anoutam ara, el urasin dabu tam, (arah utara) urasin kibuka delilbinuk. Anyaik pum noutam nirya ara, sik imam nang una atibuk, kintinibuka deibik. Winibikura, sik anang nirya ati, keting komulban tam kintinibuka domik aik pum noutam bukni, pia sirya koprop domik aikuk, binuka lak nyapnuk.

²⁰ Lak nyapnukce, ayupu ton nyapnuk. “Anyaik noutam ara, sik imam nang arye, mek buppu yubikirye, sik ninye malye ulamikce ning, kum kina ati pil ara, asukum donyake. Tonda, kam ning obuka boyace ning, pununa ati, asukumuk pil donyake. Tonda, gandum duk teikikcak arye, roti kwaning ap nirya ara, asukumuk uku deice arye danamake. Anyaik pum tamuk, apil nirya ara donamnyake. Ara, Alek ning dobuka, bai tam bobilyeba, talye bai tam daunyak nang babye, pia lek deiyok ning ton aulubuka doprobicakʼ tenen, aik pum tamuk apil donyake. Winibikirye, tonok ning babye, anyaik dam bai tam, ton kum bobanamake. Aning ara, winibikceba, sik amutuku noutam unyak nang nirya ara, Pia lek deiyok ning ton, aulubuka dopropsikcakʼ tenen, apil nirya ara, anyaik bai tam ton, pia kum donamnyake.

^21-22 Aning nirya akunum peterepnukura, amalaikat birye, na adiparyuk bobuka, Allah el si eren aik, bai tam bobinukce, nara aik bai tam, halaman nyalamak ning dina ati winipnuk. Ara, Allah el si eren aik, bai tam lumunak dumbarye domikak uamukak ara, asukum dam bobuka, binukak eipse. Winipnukak eipse ning ara, Allah el si eren aik bai tam halaman bukni, lumunak dumbarye ning dam ara, mitik tuku ton wilyamikce, poka dobuka deibik ning ara, yuk-yuk kintinibuka deimikak ton eipse. Atuku dumbarye yuk-yuk bukni, apoka noutam uamuk tuku ara, el cang ara, 20 meter. Tonda atonun el pala ara, 15 meter arye kintinibuka deiamikak eipse.

²³ Alumunak dumbarye, mitik tuku kintinibik ning dana-dana nirya ara, mitik keil pala ton domikce, abilinga lilun bukni, aik pum tam ara, mitik keil bun ning ton dobuka deiamikak eipse. Atuku poka lilun bukni, mitik keil bun ning nirya deibuka domik ning nirya ara, kat keil tembok deice aryuk antanap dongomikce, deibuka domik.

²⁴ Ati, na bobinuka peterepnuknye birye, nati lak nyapnuke. “Amitik aik eipmalamak ara, Allah el si eren aik, pil dona ati deiyok nang arye, sik uku sekikcak arye, Israel nang boyanuka arelamik kam ning, tup kalebuka, buppu mek arye yunak ara, aubuke,’’ nyapnuk. Ara, sik amutuku noutam unyak Israel nang, sik malye ulamikba, ‘Allah arye aning nirya kum kipnamsil,’ tenena ati, domba ato ning obuka boyakceba, imam nang arye aning kalebuka, mek buppu arye yubuka, Allah ati arebikceura, Allah arye, sik malye ulamikce ning nirya ara, kum kililule,” nyabuka, lak nyapnuke.