Yehezkiel 45 - Eipomek

Allah Yahweh ati, el ‘Naʼ tenen mutuku yuk-yuk wibuka, kintinilina ati, nyabuk yupu

¹ Israel yala nang nirya, sik mutuku noutam, tuku nirya yuk-yuk bokuka arepmunyeba, doprobikirye, atuku talibuka unamaka ati, kanam kum bokaminye talak ara, min talak adiparyuk, na Allah Yahweh ati, yuk tuku ton bokuka, kintinip deipnamnilyame. Ara, atuku el cang ara, 12,5 kilometer nukuka wipnalyame. Aning atonun, atuku el pala ara, 10 kilometer nukuka wipnalyame. Atuku ara, winibuka kintinip deipnamlumak nirya ara, na Allah Yahweh, na babye tenen ning wininamla ati, atuku ara, pia teleb lek mutuku ulamlule.

² Ura, atuku bokuka deipnumunyeura, atuku nirya ara, na Allah Yahweh, na si eren tenda aik kintinibuka delina ati, ton ning bokuka persegi empat deice kintinip deipnalyame. Akintinibuka deipnamlumak, el ulamlye dam ara, 250 meter uk, empat persegi nukuka kintinip deipnalyame. Tonda, atuku noutam ara, na Allah Yahweh, na si eren aik bukni, anoutam ara, Pia Teleb Lek Aik ton kintinibuka asukumuk deipnamnilyame. Tonda, atukwak dana-dana tam nirya ara, tuku ton, el pala ara, 25 meter nukuka, antanap dongobuka kintinip deipnalyame. Aning nirya winibuka kintinip deipnamnulum mutuku ara, na Allah Yahweh, na si eren aik dopnamnuluma ati, atuku nirya ara, Pia Teleb, Lek aikuk unamla ati, atuku ara unamle.

³ Atam tuku nukmunyakarye, kintinip deipnamlum noutam bukni, ton ap bokukapmunce, el cang 12,5 kilo meter ning ap, tonda el pala 5 kilo meter ning ap nirya ara, na Allah Yahweh, ‘Naʼ tenen ning unamla ati, ‘Atuku ara, pia teleb lek mutuku dem unamlule,’ tenepnamlume. Winiplum mutuku noutam ara, Pia Teleb Lek Aik kipdeipnamlule.

⁴ Atuku noutam ara, pia teleb lek mutuku kintinip deipnamlyame. Tonda, sik imam nang ati, kintinip deipnalyame. Ara, anggunce Allah Yahweh na yupu keken aik pum tam pil talibuka donamaka atia. Atuku uk bukni, bokuka ton tam ara, sik aimam nang, sik weik asik kota-kota kintinibuka dopnamake. Aning atonun, ton tam ara, bokuka Allah Yahweh na si eren aik, pia teleb lek kintinip deipnamake.

⁵ Asukum bukni, yuk tuku ton bokuka, ton tam ara, atuku el cang ara, 12,5 kilometer nukmunce, el pala ara, 5 kilometer nukuka deipnalyame. Atuku nirya babye, sik Lewi yala nang ati, kintinibuka deipnalyame. Ara, sikce Allah Yahweh, na aik pil donamak nang, Lewi yala nang sik ning atia. Amutuku noutam ara, sik Lewi nang unamak mutuku ati, sik weik asik dobuka, kota kibuka asukumuk unamicak atia.

⁶ Pia teleb lek tuku kup-kup tam ara, adiparyuk tuku yuk ton bokuka, el cang ara, dua belas setengah (12,5) kilometer ap, el pala ara dua setengah (2.5) kilometer, yuk bokuka deipnulyame. Amutuku kintinipnalam mutuku noutam ara, sik Israel yala nang nirya ara, pia namin arye, tunim nyabuka, amutuku uk unamake.

Yupu nyana deiyok nang, Raja-Raja nang arye, tuku dopropnamaka ning ati, nyabuk yupu

⁷ Tonda, Israel nang nirya talibuka unamak ninye deiyok nang ara, sikda ninye yupu nyanamik nang ati ara, adiparyuk atonun kintinibuka, yuk tuku ton wibuka deipnalyame. Atuku ara, na Allah Yahweh, ‘Naʼ tenen, tuku dam bukni, ton ning ara, keting kumulban tam upnamle. Ton ning ara, keting panalyangan tam upnamle. Sik ninye deiyok nang, Raja-Raja nang ara, sik tuku ara, keting kumulban tam wililongonak arye dipdongobuka, weik laut kwen, el si Mediterania dam binuka deipnamlyame. Tonda, asukum arye dipdongobuka, otam keting palanyangan tam wilililonak arye dipdongobuka akunum wibuka kintinip deiamlume. Tonda, Israel nang unamicak kup-kup upnamle. Keting yangan tam, wililongonak binuka deipnamlyame. Ati el cang ara, Israel yala nang suku tonok ning dopropnamake atonun, aning atonun el cang ara, bokuka deipnamlyam. Atuku lak nyapmasin ning ara, Israel yala nang nirya talibuka ninye deiyok unamlanye, el tenen ning upnamla ati, elti, arepnamlume.

⁸ Atuku nirya ara, sik Israel mutuku talebuka unamaka deiyok nang arye talepnamake. Tonda narye, wipdeipneba, Israel nang nirya talebuka, unamaka deiyok nang arye, sik amu tam unamak nang, na mapu koproba ati, sik nong deice, ikin ning kum delinamake. Aning kum bukni, amutuku noutam weik tonun arelnunyeba, Israel yala nang arye, atuku talibikirye, talye mangkau asa teleb arye unamake. Sik ninye deiyok nang arye malye ton, kum kipdeipnamake.

Sik ninye deiyok nang arye, batakana kumce, yupu nyanamaka ati, nyabuk yupu

⁹ Ura, nara, Allah Yahweh, aning-aning nirya talibuka, deice tam erebuka, mikip weik ununye birye nyapsine. “Ara, anggun ninye deiyok nang, Raja-Raja nang arye, malye-malye winilulum ning ara, akunuma. Anggunce malye-malye winimunye ning ara, bataknululume! Se, sik Israel nang, anggun deiyok nango. Anggun amu tam unyak nang ati, olana ap, yu uplyeba yupu arye malye nyalulum ning ap, ikin ning, sik nong deice delilulum ning ap, awinilulum ning deice arye, sik kanye dakalsakasulule. Ati, aning nirya ara, adiparyuk bataknululume! Aning ara, batakmunce, pia teleb diksukum un ninguk wininamlume! Tonda, narye, ‘Wininamlume, aning ara, pia kum wininamlume,’ nyapsise touk, pia teleb ning ati wininamlume. Aning atonun, tuba-tuba ‘Naʼ tenen nang, sik tibuk, sik unamak tuku noutam arye, tuba kum yakalkwetenamlyame. Aning babye, bataknulyame! Nara, Allah Yahweh, aning-aning nirya talibuka, deice tam erebuka, mikip weik ununye birye, anggun ninye deiyok nang ati, akunum nyapsine.

¹⁰ Aning atonun, anggunce moubukapmunce, ikin ning tongolena ati nirya ara, pia dipkoprob ninguk talibuka wininamlulume. Ara, ikin ning tongolena ati, el si timbangan ap, mek yala ning wina ati ara, el si takaran ning ap ara, dipkoprob teleb ning aryuk moubuka wininamlulume. Ton ning ara, nyeleng-nyeleng nyalamle ning timbangan ati, el si Bat nyanyap ning, dipkoprob 22 liter ap, tonda mek ning, ikin kiklilena ati, el si Hefa, dipkoprob 22 liter ap, diksukum ninguk wininamlulume.

¹¹ Ara kouamne ning, el kikililena ati ara, dipkoprob ninguk wininamlulume. Bat ap, Hefa ap ara, 22 liter ninguk dekdebuka wininamlulume. Aning atonun, kouamne ning, Bat babye, mek arye tudon ning babye, sepuluh kali lipat kiklilen ning ati ara, awinilen ning, el si Homerdipkoprob ninguk wininamlulume. Aning-aning nirya kikililena ati ara, tonok deiyok kina ati, tonok Homer uka. El tonok deiyok kina ati ara, kouamne ning babye, mek ning babye, tonok Homer ning ara, Hefa 10 atonun upnamle. Tonok homer ara 10 Bat upnamle. Ati, el wina ati ara, adiparyuk atonun wininamlume.

¹² Aning atonun ton, yata bona do nirya, anggunce, ‘Aning ara, el ikin ara, yata wiribuka kilo ulul do?’ tenen, deknamlum talak ara, anggun timbangan deice mitik ikin ning delina ati ara, adiparyuk wininamlume. Tonok syikal ara, 11.4 gram upnamle. Aning atonun, 1 syikal ara, 20 gerah atonun upnamlule. Ati, 1 syikal ning ara, 20 gerah upnamle. Aning atonun, 1 mina nyanyap ning ara, 60 syikal upnamle. Kiklilen ning nirya ara, dipkoprob ninguk talibuka wininamlulume.

^13-15 Ati ara, na Allah si kina ap, na si erena ap ati, na si eren aik dam yanuka arenamlum talak ara, winipnamlyame. Tonok literuk, dekna deiyok ning ara, tonok Homer talibuka dekenamluma ati, aning bokmunce, sebagian 1/60 nukuka deipnalyame. Ati, anggun gandum ap, jelai ap dakmunce, 60 liter akunum lipmunce, aupmalyopura, aning noutam arye bokuka, tonok liter dobuka, adiparyuk Allah ati, arelyanganamlume. Tonda, sik Israel nang arye, delina ati ara, Raja Israel sik deiyok nang dam arelyanganamaka ara, ani. Ara, minyak Zaitun mek makau, 100 liter kintinibuka deipmunyopura, aning bokuka, tonok liter dobuka, adiparyuk Allah ati arelyanganamlume. Aning atonun, anggunce weilamlum domba basam, 200 domba akunum aupmalyopura, anggun adiparyuk, tonok domba basam bobuka, Allah ati arelyanganamlume. Adin ning nirya ati ara, Israel nang, anggun malye winilamlum ning nirya kum kilina ati ara, kam ning opnarye, boyanuka, uku dongopmunyeba, uku diplirye, siltong kekepnirye, bikinamsine. Tonda, anggun gadum ning ap, jelai ap, ‘Telebuk unamapʼ tenen, aren ning ap, ura anggun malye-malye winilulum ning pununa ati ara, na nyapsise ning boyanganululume. Ati nara Allah Yahweh, aning-aning nirya talibuka, deice tam erebuka, mikip weik ununye birye, ayupu nirya ara, akunum nyapsina ati, aninguk wininamlume.

¹⁶ Israel mutuku noutam unamak Israel nang koproba nirya ara, adiparyuk aning nirya boyanuka, arenamnyake. Ara Israel nang, sik ninye deiyok nang arye, na Allah ati, aning nirya boyanuka arelyanganamniyak talak ara, anggun babye aning atonun ning bobuka, arelyanganamnulume.

¹⁷ Narye, ‘Winibuka arelyanganamlulume,’ nyabuka, lak nyapsise touk, aning nirya arelyanganamnulum bukni, Israel nang, sik ninye deiyoknye, Raja elce deiyok kiplirye, aning nirya winipnamle. Ara, sik Israel nang arye, malye-malye winilamikce ning ati, ‘Allah arye aning kum kiplirye, teleb kipdeipnamsilʼ tenen, kam ning opnarye, arelyamnil ning ara, kam ning oplirye, uku dongopnamle ning ap, gandum ning arenamniyak ning ap, na arena ati, anggur mek makau kwebuka, arenamniyak ning ap, aning nirya ara, Rajanye, elcuk dekuka arelyanganamnulule. Tonda, narye, ‘Sik Israel nang ara, sik mambul weik sum ara ani,’ nyabuka, lak nyalamsise sum ap, tonda winiryuk wala upnyopura, ‘Awala ani,’ tenena ati, arenamniyak talak ap, tonda talye pil dona kumce, dikdik sebuka, na si erenamsiak sum, Sabat sum nirya ap, tonda Israel nang ati, narye, ‘Sik mambul weik sum ani,’ nyabuka, ‘Kwalya kwalin sum yuk-yuk kipse touk, aning nirya wininamnyake. Atalak-atalak nirya ara, Israel nang sik ninye deiyoknye birye, na Allah ati aren ning ara, buluplirye, arelyanganamnulule. Ara, sik anang nirya arye, malye unyap ning kum kipsuturye, bikuka lyepdopsutueʼ tenen, kintinibuka deilinamak ning ap, gandum arenamak ning ap, kam ning obuka, uku dongonamak ning ap, ‘Nun ni Allah ap, teleb ubuka neika uptibyeʼ tenen, arenamak ning ap, sik Israel nang malye winin ning pununa ap, dukungolona ap ati ara, Israel mutuku Rajanye birye kintiniplirye, aning nirya, arelyanganamnulule. Winiplyopura, na Allah arye, Israel yala nang nirya arye, malye-malye wininyak ning ati, kum kipdeipnirye, biklyopura, anggunti lyepdopnamsine.

Weik sum, Kwalya kwalina ati, nyabuk yupu

¹⁸ Allah Yahweh aning-aning nirya talibuka, deice tam erebuka, mikip weik ulinye birye, el mapu koproba, sik Israel nang ati nyapsile. “Wala tonok deice, tanggal tonok deice ara, sik adiparyuk, na si eren aik ara, pia teleb kilinamlyame. Winipnamlama ati ara, yim sapi basam winiryuk nenmalirye, bol malye bona pia kum ninguk boyamunce, na si eren aik teleb kilina ati, arelyanganamnulume.

¹⁹ Yim sapi basam akunum arepmunyeura, sik imam nang arye, Israel nang malye winilamikce ning nirya ati, ‘Allah lyeplirye, kum kipdeipnamsilʼ tenen, uku dongonamak ning ara, asapi opmakce talak arye, ining ton dobuka, na si eren tenda aik, keting panalyangan tam bisik bublan dana-dana tam, yo deibuka dobik ning nirya ara, likuka deibikirye, anyaik teleb kilinamake. Aning atonun, mesba el kup-kup ak dumbarye babye, tonda anyaik koproba tam wekelyangan bisik bublan, keting panalyangan tam ara, ikuka tikiebik tikin yo babye, aning deice arye ining likuka deipnamake. Winipnamaka deice arye, anyaik bublan teleb kilinamake.

²⁰ Arup nyapmasin touk, apil atonun ning ara, wala tonok noutam bukni, tekbarye tanggal (7) akunum kiplyeura, apil atonun dopnamake. Bukni, tekbarye tanggal 7 deice ara, sik Israel nang nirya kan-kan, malye winin ninguk ulamik nang, sikce, ‘Malye kipnune,’ tenena kum, tonda sik walwal deice arye talye winilamik nang arye, mangkau arye malye winibikcopura, kam ninguk obuka arelyanganamak. Aning arebikceura, sik imam nang arye, na si eren anyaik wekelban bisik bublan domik ning ara, yo dana-dana tam deiamika deice ining likuka, teleb kilinamake. Winipnamaka deice arye, na si eren aik nirya ara, malye ning aupmalyopura, kum kipdeibikirye, pia teleb kilinamake. Ara, anggunce, na aik pia lek sukum karekinamnulume.

²¹ Tonda, wala tonok noutam bukni, tanggal empat belas (14) akunum kiplyeura, anggun adiparyuk, weik kwalya kwalinamlume. Ara, Kaplin Kwalya kwalipnamlume. Aning wininamlum talak ara, asum tanggal empat belas arye nukuka, like tekbarye ton nukmunce, asum-asum nirya ara, nena kum roti kwaninguk dabuka dinamlume. Winipnin balamunya, tanggal 22 akunum kiplyeura, anggun anang nirya arye nena kum roti kwaning dina ara bataknamake.

²² Kaplin Kwalya kwalipnamlum talak bukni, min sum ara, sik Israel nang talibuka, ninye deiyok Rajanye birye, yim sapi basam winiryuk neplopmalye, tonok kintinibuka arepnamlule. Aning ara, ‘Na ap, na amu tam Israel nang ap, malye wininyap ning, Allah arye kiliplirye, kum kipdeipnamsilʼ tenen, asapi obuka bikirye, uku dongobuka arebikceura, elce malye winilye ning ap, Israel nang arye malye winilulum ning ap ara, Allah arye kililtaknauk unamle.

²³ Aninguk kum bukni, yuk kam ning ton arenamlule. Ara, Kaplin Kwalya kwalin talak bukni, atanggal sum noutam nirya ara, Raja arye, tuba-tuba Allah Yahweh ati arenauk unamle. Ara, yim sapi basam, winiryuk nenmalye ning tekbarye, el yok kwanina kum, pia teleb ning, nong yum deice aryuk, boyanuka opmunce, uku dongobuka, Allah ati arenamle. Tonda, asum-asum nirya babye, elce yim kambing basam ton arenamlule. Aning babye, sik malye winin ning kum kilina ap, namin kina ap ati, boyanuka opmunce, arenamlule.

²⁴ Aninguk kum bukni, tonda tabakuka arena ati, gandum duk el ikin ara, 17,5 liter kintinibuka, boyalirye, arenamlule. Ara, tonok yim sapi basam ap, tonda tonok yim domba basam ap nirya ara, aning tabakana ati, gandum 17,5 liter kintinibuka, boyalirye arenamlule. Tonda, aning arepnamle talak babye, tonok yim sapi ap, tonok yim domba ap, minyak zaitun tiga liter ap, tabakuka boyalirye, Allah el si erena ati arelyanganamlule.

²⁵ Aning atonun, wala tekbarye, tanggal lima belas (15) deice akunum kiplyeura, weik Kaplin Kwalya kwalin talak bukni, mitik yo taruk ton doprolyak arye, mitikto bai aik atonun kibuka, pondok ton dopnamlulume. Ara, Israel mutuku noutam talibuka unamle ninye deiyok Raja nang ara, atekbarye sum deice ap, tonda, tanggal 15 deice ap, Allah atibuk teleb aren ning, pia tuba-tuba arenauk ulamlule. Ara, arup akunum nyapmanu touk, asum-asum nirya ara, aninguk kintinibuka arenamlule. Winipnamla deiyok, ara anggun malye winilamlum ning nirya ati, ‘Allah arye amalye winin ning kum kiplirye, tuba teleb kipdeipnamsilʼ tenen, aning nirya arenamle. Aining ning obuka, uku dongona ap, gandum duk dakuka arena ap, minyak zaitun mek makau boyanuka arelyangana ap, unamle.