Yehezkiel 44 - Eipomek

Allah el si eren aik wekelban bisik bublan, keting panalyangan tam ara, Allah arye tirikdongobuka ati, nyabuk yupu

¹ Allah el arena ati, mesba deice uku dongopnamak ning ati, akunum laka nyapnukopura, na dam yanmoknye biryuk, na Yeheskiel dobuka, Allah el si eren aik dam bukni, mitik lo batakamikak, dana-dana tam antanap dongobuka keil arye deibuka, poka domika dam bobinuk. Asukum ara, Allah el si eren aik otam wekelbana ati, keting panalyangan tam botopdeiamik bisik bublan, el si ara gapura dam bobinuk. Abobinuk tam wekelban bisik bublan, keting panalyangan tam ara, akunum tirikdongamukbuk eipse.

² Eipsiba, Allah Yahweh arye nati nyapnuk. “Abublan ara, tonap pia kum kuknamake. Abublan pia tirikilongonauk unamle. Tonoknye babye, abisik bublan ton kum weknamle. Deiyok ara, ani. Nara Allah Yahweh, Israel nang nirya ati, talibuka melinun Allah, tonda sikce si ereninyak Allah ara, abisik bublan arye bise. Nara, anyaik wekelbana ati, minop talak abisik bublan wekamse. Ati ara, na si eren aik dam bana ati, abisik bublan, keting panalyangan tam ara, pia tirikilongonauk upnamle.

³ Bukni, Israel nang, sik ninye deiyok kibuka, yupu nyana deiyoknye, Raja birye abisik bublan wekturye, abublan dam biturye, asukum ara din diptue. Ara, anye eluk ara, Israel nang, sik Raja ulula ati, na si erena ati, kam ning obikirye, nati arepnamniak ning ara, atup kan-kan arye kalebuka, pia teleb lek din ning kintinipnamak ning ara, binuka asukum dina telebe. El anye birye, abisik bublan, el si gapura weklirye dipnulyopura, abublan dam lo weik tam arye wekenamlule. Atonun, akunum diplyopura, anyaik pum noutam arye tamubuka, bai tam binulye talak ara, ayanmalye bisikuk, abublan lo weik tam arye tamubuka binamlule.

Allah el si eren aik noutam pil donamik ning ati, laka nyabuk yupu

⁴ Na dam yanmoknye biryuk, na bobinuka, Allah el si eren aik dam bukni, arah utara, dabu tam bisik bublan botopdeiamika, ara cang keil arye deibuka domik aik dam bobinuk. Anyapce ubuka, dabu tam bisik bublan, el si gapura weknumurye kirikuka otam dinmanumuba, Allah el si eren aik urasin tam kiamikak sukum bobinuk. Bobinuk talak ara, na dinmasibuk, Allah el si eren aik pum tam ara, Allah Yahweh el pia teleb ulye ning ap, mikip weik ulye ning ap, ulya deice arye, meldang-dang abukce, dirina weik ubuka anyaik pum tam nirya langdibuk. Aning ara, Allah Yahweh anyaik yanuka wekmoka deiyok ati, adirina ubuk. Dirina weik ubukopura, eipsirye, ‘Se dipkoprob Allah Yahweh, elda pia mambule. El si eren aik pum tam akunum wekuka aunamaleʼ tenen bikse. Winibuka biksopura, na nong nirya tuku deice mapsirye, kisok tuku dipdongobuka, Allah ati si erebuka kipse.

⁵ Winipse talak ara, Allah Yahweh arye nati nyapnuke. “Se, anda ninye sirika arye deipkiknye ulyama ati, anda minop dipnalame. Narye nyapnukin yupu ap, narye nyapkiniba, ance dinamalam ning nirya ara, kanye moubuka tenipmince, biknulyame. Na si eren aik pum tam pil donamak nang ati, ‘Aning ara, wininamlume. Apil ara, winibuka-winibuka donamlume,’ nyapdeipnukin yupu ap, tonda, na arena ati, ‘Aning arenamnulume. Aning arenamaka deiyok ara, winibuka-winibuka unamake,’ nyapdeipnukin yupu ap, moubuka kekepmince biknalame. Moubuka bikmince, aning nirya teleb ubuka seknalame. Aning nirya laka nyapminyopura, sik imam nang arye, apiluk donamake. Tonda, narye, ‘Ato nang ara, anyaik wekelbana teleb bukni, ato nang ara, anyaik wekelbana meme,’ nyabuka, laka nyapkinye touk, aning babye moubuka kekepmince, sekuka deipnalame.

⁶ Tonda, sik talye Israel yala nang nirya, na yupu ati, ‘Nun likʼ tenen, yanibikirye, malye winin ninguk talibuka, malye weik wininmak nang ara, nyapnalame. Ara, na Allah Yahweh, aning-aning nirya talibuka, deice tam erebuka, mikip weik deiyoknye birye, anggun Israel yala nang ati nyapsine. “Se, anggun Israel yala nang nirya ara, narye, ‘Aning ara, pia na like,’ nyapdeipsise bukni, aninguk tuba talibuka malye-malye weik winilulum ning nirya ara, adiparyuk bataknamlume.

⁷ Sik anang ara, malye winin ning, pia weik wininyaka deice arye, na si eren aik pia malye weik kililanyake. Na si erena ap, na si erebuka kina ap ati, sikce domba basam opnarye, abasam el meta ap, ining ap tuba arepnulum bukni, anggunce apia malye-malye weik ululuma deice arye, aning nirya, pia malye kililulume. Tonda, sik Israel yala nang arye, yuk yala nang, talye-talye daunyak nang ara, sik den bama mouse kum sekenyak bukni, sikce, ‘Kume, Allah el si eren aik dam talye mangkau asa wektume,’ nyaluluma deice arye, pia malye ululume. Aning atouk, anang ara, yuk mutuku ninye asik nang unyakce, narye, ‘Aning ara, wininamlume, aning ara, pia kum wininamlume,’ nyapdeiamsise yupu ati, diba kum tenebikirye, yanininyake. Tonda, na siuk kum ereninyaka ati, na dam pia kum yanmanto nang unyake. Sikda, den bama mouse kum sekikirye, sik kanye talima ap, sik nong nirya ara, malye tuba unyaka ati, na dam kum yatinge. Ati, sik Israel nang arye, na si erena ati, kam ning nirya obuka, ining ap, meta ap dobuka, nati arelyanganinyak talak ara, sik aninye asik nang ap ansinipmunce, na si eren aik dam kum yatume. Amalye ning weik winimunya deice arye, na si eren aik, pia malye kipdeipnuluma deice arye, na pia like unulule. Narye sik Israel nang ati, ‘Aninguk wininamlume, aning ara, pia kum wininamlume. Winipmunyopura, naryuk, winibuka kaliksinirye, pia melinamsine,’ nyabuka, nyalin yupu deice arye nyapdeiamsise ning nirya ara, anggunce akunum yaniltanauk ululume.

⁸ Aninguk kum bukni, ton ning ara ani. Ara, anggun Israel nang arye, na si eren aik pum tam, na si eren pil dona ati uamuk ning ap, na si erebuka kina ati, aren pil don ning ap, aning nirya ara, pia teleb lek ning ulul bukni, aning nirya ara, teleb kibuka kum kalikinululume. Tonda, anggunce na aren pil dona ati, ‘Allah aren pil dona ara, nun lik,’ tenemunce, ‘Yuk talye yala nang aryuk, apil dopsitingʼ tenen, yuk-yuk yala nang, talye ninye asik nang ton wipdeipmunce, ‘Nun melina ati, sikcuk Allah arena ati, pil doplulume,’ nyabuka, anang wipmunce, apil arenamlume. Arepmunyopura, yuk talye ninye asik nang arye, na mambul ning aren pil ap, na si eren aik pil don ning ap, anyaik dana-dana ulul ning dam, pil dopnin yangalamik touk, tuba donyake. Winimunya deice arye, aning nirya ara, anggun Israel yala imam nang arye, pia malye weik kililulume.

Lewi yala nang ati, nyabuk yupu

⁹ Ati ara, na Allah Yahweh arye nyapsine. Nara, aning-aning nirya talibuka, deice tam erebuka, mikip weik deiyoknye birye nyapsine. Anggun Israel nang umumnya kan-kan noutam ara, yuk mutuku ninye asik nang, yuk-yuk nang weik ton, anggun ap ansinibuka unyak bukni, ato nang ara, na si erena ati, pil pia kum doptinge. Tonda, na si eren aik dam ara, pia kum yatinge. Deiyok ara, na Allah ati, diba kum teneninyakce, na yupu moubuka kekebikirye, kum talinyak nang ati, sik kanye talima ap, sik nong ap ara, malyeuk tuba unyake. Sikda, yuk mutuku ninye asik nang ara, den bama mouse sekna kum nang unyaka ati, na dam pia kum yantinge. Ati, na si eren aik dam ap, anyaik pum tam ap ara, pia kum wekelyanganamake. Na pia teleb lek aik, na si eren aik ara, pia kum wekmanto nang unyaka atia. Allah Yahweh arye, na Yeheskiel biti, ayupu nirya nyapnuke.

Lewi yala nang arye, Allah si erena ati, aren pil don nang ati, nyabuk yupu

¹⁰ Allah Yahweh arye, na Yeheskiel biti, ayupu ton dukdongobuka nyapnuke. Israel nang arye, na Allah ati, ‘Allah ara, nun likʼ tenen, batakamnikce, talye ning ati, ‘Nun ni koprobaʼ tenen, isa mer si erelamik talak ara, Lewi yala nang kan-kan arye, ton nang ara, sik babye nati bataklamnikce, isa siuk erelamik. Ati ara, na Allah arye, sik Lewi yala nang, bataklamnik nang ati ara, sik malye weik ulamik ning wenena ati, dengna arepnirye, anang wenebuka opnamnarya. Ara, min talak ara, sikce nati, akunum bataknikce, talye isa si erelamika ati, sikti, pia wenenamne.

¹¹ Lewi yala nang weik tam nang ara, winibuka malye winilamik bukni, minop talak ara, ‘Na si eren pil donamakʼ tenen, sik Lewi yala nanguk wipdeiamsa ati, sik ayala nang aryuk, na Allah si eren aik pum noutam pil don nang ara, ayala nanguk bukni, bokuka mitik tonunuk, apil talibuka donamniake. Tonda, sik Lewi yala nang aryuk, na si eren aik, ‘Talye nang wekekicakʼ tenen, anyaik el si gapura, bublan dam kalikina ap, tonda na si erena ati aren pil don ning ap, Israel nang arye malye wininyak ning kum danalina ati, sik anang aryuk, apil talibuka donamake. Ara, kam ning obuka, arepnikirye, mesba deice uku dongonamak pil ap, sik Lewi nang aryuk tuba-tuba, talye daunyak Israel nang nirya ati, melinamake.

¹² Aminyan talak ara, Lewi yala nang bukni, mitik tonun bokuka, dopropnamne nanguk, apil dopra unamak bukni, sik Israel yala nang nirya arye, na batakuka isa siuk erelamik talak ara, Lewi yala nang kan-kan arye, ton nang arye deiyok koubuka, isa si eren pil ton melibuka dolamika deice arye, Israel nang nirya babye, atouk malye-malye pia weik ulamik. Isa si erelamika ati, Israel yala nang nirya ara, aning arye tapu koulamukba, malye ninguk winilamik. Lewi yala nang arye, isa si eren pil melibuka dolamika ati, weik tonun wenepnamsine. Ara, na Allah Yahweh, aning-aning nirya talibuka, deice tam erebuka, mikip weik deiyoknye birye, dipkoprob nyalin yupu deice, weik tonun nyapsine. Lewi yala nang, isa si erelamik nang ati, dengna arepnirye, weik tonun wenepnamsinca! Aning akunum nyapsina ati, nong kunupnamle!

¹³ Sik minop talak malye winin ning talibuka, ulamik Lewi yala nang ara, tonap na dam pia kum yanganamake. Tonda, Israel yala nang melina ati, imam pil talibuka, kum donamake. Israel nang arye, na si erena ati, kam ning opnarye, areninyak ning babye, anang arye, na dam pia kum boyanganamake. Tonda, na pia malye una kumce, pia teleb unamak ninguk, na si eren aik ap, anyaik pum tam domik ning ap, pia teleb lek ning nirya babye, pia kum talibuka pil donamake. Anang arye malye-malye pia weik winilamik ning ati, alye dakalanamake. Tonda, amalye winilamik ning dengna ara, sik wenena ati, ikin weik ning, sik deice deipnyopura, ikin ning arepniba, bobikirye, ‘Seʼ tenen, mambul kanye bobuka unamake.

¹⁴ Bukni, sik Lewi yala nang kan-kan ara, tuba teleb unyak nang ara, wini talak arye dipdongobuka doupnamle talak, pil donamaka ara nyapnune. Sikce na si eren aik noutam deiamse ning kalikin pil ap, anyaik pum tam mambul pil talibuka don ning ap, donamake. Deiyok ara, narye ayala nang akunum wipdeipsa ati, na si erena ati aren pil ap, anyaik pum tam mambul pil ap arepniba, sikce aninguk talibuka, pil tuba donamake.

Allah el si eren aik pum tam, pil dona deiyok nang, sik imam-imam nang ati, nyabuk yupu

¹⁵ Nara, Allah Yahweh, aning-aning nirya talibuka, deice tam erebuka, mikip weik deiyoknye birye, ayupu nyapkine. Israel yala nang, talye daulamik nang weik tam ara, minop talak bataklamnikce, malye weik ulamik bukni, Lewi yala nang kan-kan, ton tam nang ara, kum bataklamnikce, na si eren aik pum tam, pil tuba melilamik. Ara, ninye el si Sadok, elce deiamukba, dadeipdanin yangalamika ani, deibikba unyak nang ara, na si erena ati, Israel nang arye arebikceba, kam ning dobuka obikirye, Israel nang, sik malye winin ning kum danalina ati, mesba deice uku dongonamake. Ara Lewi yala nang bukni, sik tuba teleb unyak imam nang ati nyapne. Minop talak, sik Sadok tam nang ara, Israel yala nang nirya arye, nati batakamnikce, malye weik ulamik talak ara, anang arye tuba teleb ulamikce, na si eren aik pum tam uamuk ning nirya kaliklamik. Ati ara, wini talak ara, sik Sadok tam imam nang arye, na dam yanuka, na si eren aik noutam pil donamake. Ara, Israel yala nang, ‘Nun malye unyap ning, Allah arye namin kibuka kilipsutueʼ tenen, kam ning arebikceba, Sadok yala imam nang arye, opnopura, sikcuk mesba deice uku dongonamak pil talibuka donamake. Israel nang arye, akam ning arebikceba, Sadok yala imam nang arye, aning kalebuka, meta ap, ining ap, doprobikirye, na Allah ati, arenamninyake.

¹⁶ Ati, sik Sadok tam imam nang ara, na si eren aik bukni, Pia Teleb Lek Aik pum tam wekenamak. Tonda, Israel nang sik malye un ning kum danalina ati ara, kam ning arebikcopura, sik Sadok tam imam nang arye, na Allah si erebuka kina ati, aning obikirye, mesba deice uku dongonamake. Tonda, narye sik Israel nang ati, ‘Anggunce na arena ati ara, winibuka-winibuka apil donamlume. Ayupu ton nyanamlume nyabuka, akunum lak nyapse pil nirya ara, Sadok yala nang aryuk talibuka donamniake. Ara, na Allah si eren aik noutam wekikirye, na si eren pil nirya ara, sikcuk apil donamake.

¹⁷ Ura, sik imam nang arye, na si eren aik dam bana ati, bai tam domik poka botopdeiamik bisik bublan, el si gapura dam arye wekuka, acang keil arye deibuka, domik aik dam wekelbanamak talak ara, pia namin baju, el si ara, kain lenan arye wilamak baju uk, ongobuka banamnyake. Na arena ati, el si mesba delilban talak babye, tonda na si eren aik lilun ban talak babye, sik anang ara, kain wol arye wilamak baju ton, pia kum ongobuka wekelbanamnyake. Ara, domba basam potong doprobikirye, baju wilamak ning ati nyapne. Bukni, sikce ongonamak baju ara, kain lenan arye wilamak ninguk, ongonamnyake.

¹⁸ Tonda, sik nong buppu uplya deice arye, ‘Nong mek bongoplirye tong nyaplyakʼ tenen ati, sik amu tam ongon baju, el si celana dalam nyalamak ning babye, lenan arye wilamak ninguk ongopnamake. Tonda, sik deiyatinga babye, darapdongobuka, kum ongonamake. Tonda, lenan arye wilamak ning aryuk, sik kisok deice babye, kum koulongonamake. Aning nirya ara, ‘Kwisi mek bongopsilyakʼ tenen, anyaik wekelbanamak talak ara, yuk yala baju ton, kum ongopnamake. Lenan wilamak baju uk, ongonamnyake.

¹⁹ Bukni, imam nang arye, pil akunum dobuka sirya dakikcopura, sik talye Israel nang nirya ara, bai tam bulubuka unamakak, imam nang tamubuka yanukce talak ara, imam nang arye, na si eren aik noutam pil don talak ongona ati, kain lenan arye wilamak baju ara, na Teleb Lek aik noutamuk kwiribuka delinamnyake. Winibikirye, anyaik pum tam arye, bai tam yanukce talak ara, talye baju ongobuka, bai tam yanganamnyake. Na Teleb Lek Aik pum tam pil dona ati kintinip deipse baju, ongopmakce diparyuk, bai tam yakceba, Israel nang arye abaju mangkau arye bol pibikcopura, Allah el lek mikip arye, sik opliba adiparyuk dibikcak ati nyapne.

²⁰ Tonda, sik imam-imam nang ara, sik kisok potong nirya kobuka, delo ulamle touk kum wininamnyake. Tonda, sik kisok potong batakikiba, pia cang weik uplirye dololamle touk, pia kume. Sik anang potong ara, ‘Winibuka kobikiba, mitik tonun bumang kilinamlume,’ nyapdeipsise touk ubuka, konamnyake.

²¹ Imam nang do nirya, Allah si eren aik pum tam ap, anyaik dam bukni, mesba domikak ap binuka, pil dopnukce talak ara, sik anang ara, anggur mek yunye babye, tonda, yuk kanye wangalamak mek yuk-yuk ning nirya babye, pia kum dinamnyake.

²² Sik imam nang ara, wel kilapu donamnyake. Ara, Israel yala nang koproba arye deiamikce, wel kilapu ap, ninye ap, min kum malamice kilapu ap, tonda ninye kum domikce kilapu ap uk, imam nang arye donamnyake. Ara, Allah el si eren aik pum tam pil donyak imam nang arye, domikce kilapu ara, imamnye deplirye, youwak bataklye kil ara, yuk imamnye biryuk, ayouwak kil ara, dona telebe. Bukni, yuk talye daunyak nang arye domikce kilapu ara, el akanye diplyopura, youwak ulamlya ani, yuk imam nang arye, ayouwak kil, pia kum donamnyake. Tonda, yuk talye daunyak nang arye, domikca ani, batakikce kilapu nirya ara, imam nang arye pia kum donamnyake.

²³ Imam-imam nang arye, na mapu sik Israel nang nirya ati, peterenamake. Ara, “Aning ara, Allah el na tenen ning ati, pia teleb lek ning ulule. Bukni, aning ara, talye ulul ning ati, aning ara pia teleb lek ning kume. Talye ninguk ulul ning ara ani, pia teleb lek ning ara ani,” nyabuka peterenamake. Tonda, Allah arye, ‘Aning ap, awininyak ning ap ara, na lik ati, aning ara, pia kum talinamlume. Aning ton, pia kum dinamlume, aning ton pia kum wininamlume. Aning nirya ara, na lik ati, aning winipmunye do, talipmunye do, dipmunye do, bol pipmunye do, na dam ton pia kum yanganamlume,’ nyapdeipsuk ning nirya ara, aning ara mem ning ati, pia tenena meme. Imam nang arye, ‘Teleb ning ani, malye ning ani,’ nyabuka, lak nyabikirye, peterenamnyake.

²⁴ Tonda, sik imam-imam nang arye, apil ton donamnyake. Ara, malye winin ning ton arepliba, Israel nang arye, yu upliba, yupu deice arye walakcopura, sik imam-imam nang arye, aning nirya kekebikirye, ‘E, teleb winin ning ara ani. Malye una deiyoknye bira aniʼ tenen, yupu nyapnamnyake. Ara, anggun kanye deice arye kum bukni, na Allah arye anggunti, “Aning ara wininamlume, aning ara, pia kum wininamlume,” nyapdeipsise touk, ayupu uk tenebuka, yupu lipsisikuka bokeipnamnyake. Tonda, na Allah ara, “Anggun Israel nang arye, ‘Asum ara, mambul weik sumʼ tenen, kalikinamak sum ara, narye, “Aning-aning winipmunce wininamlume,” nyabuka, laka nyapdeipsise touk, sik imam nang arye deiyok kibikirye, wininamnyake. Atonun, na Allah arye, “Sik Israel nang ara, na si erena ap, anggun dikdik sena ap ati, tonok sum noutam nirya ara, talye pil nirya kum donamlume. Asum ara, Sabat sum ati, kintinip deipsise sum ati, sikce nati, si erebuka kinamniake,” nyapsise touk, sik imam nang nirya arye, ‘Asum ara, pia mambul sum, lek sum upsile,’ tenenamake.

²⁵ Tonda, narye nyapsise touk, “Sik imam nang ara, talye yuk daunyak nang kan-kan, ton akunum dipmace nang ton auplyopura, imam nang arye bol pibikcopura, el babye winibuka bol piplya deice arye, malye kipdalyopura, na dam kum yanganamle. Ati, akunum dipmace nang dam bana ara, pia meme. Aning ara, kum wininamnyake,” nyapsine. Bukni, imam nang, sik ni yapu do, sik nin yapu do, sik weit capu nang do, sik mapu ap, kilmapu ap, tonda sik nin yapu arye deiamik nang ap, kilapu bukni, ninye kum dopdanamikce kilapu ap, dibikcopura, sik bol pina ara, teleb uka.

²⁶ Aning nyapmakina atonun, imamnye birye, akunum dipnamak nang bol piplyopura, na Allah arye, ‘Aning ara, malye winin ning ati, na dam pia kum yanganamlume,’ akunum nyapdeipsa ati, aning malye winin ning nirya kum danana ati, talye daunmalya ani, wala tekbarye deice arye, talye unamle. Tek barye sum akunum uplyopura, na kanye ara, ‘Anye tuba teleb upmale,’ tenenamne.

²⁷ Winiplyopura, el imamnye birye, na si eren aik, arelbaninyak aik noutam bilirye, el malye winipmalye ning dengna ati, kam ning obuka bobilirye, ‘Allah ati, aning arepnyopura, elce na malye winin ning kum kipdeipnilyopura, tuba teleb kipdeipnamnilʼ tenen, anyaik binuka areplyopura, tamubuka, na si eren aik noutam binuka, pil donamlule. Aning nirya ara, na Allah Yahweh aning-aning nirya talibuka, deice tam erebuka, mikip weik deiyoknye birye, akunum nyapdeipsa ati, aning ara, dipkoprob wininamnyake.

²⁸ Tonda, Lewi yala nang ara, sik unamak mutuku ton, kum dopropnamake. Ara, na Allah deice uk unamake. Naryuk sik patan ning nirya arenamnune. Sik Lewi yala nang ati, sik Israel yala nang deiyok nang arye, Israel nang unamlumak arye, wa tuku ton bokuka, Lewi yala nang ati, kum arenamlume. Ara, sik Lewi yala nang ara, na Allah deice uk unamake. Naryuk sik patan ning nirya arenamnune. Na si eren pil ati, dopnin yangamlum nang ara, sik Lewi yala nang aryuk apil donamake.

²⁹ Sik Lewi yala nang arye dinamak ning ara, ani. Ara, Israel yala nang nirya arye, na Allah ati arenamlum ning deice aryuk wininamake. Ara, sik yuk Israel yala nang arye, na si erena ati, gandum duk arenamniak ning ara, imam nang arye dobuka dinamnyake. Tonda, Israel nang sik malye ning kum danalina ap, pununa ap ati, kam ning opnarye, uku dongobuka, arelyanganamak ning ap, tonda sik malye winipmakce ning ati, ‘Se, nun malye ubupuʼ tenen, aning pununa ati, boyanuka arelyanganamak ning ap ara, sik Lewi yala nang arye, aning dolonamnyake. Deiyok ara, talye Israel yala nang nirya arye, na Allah ati, ‘El na tenen ning upnamleʼ tenen, nati arelyanganamniak ning, yuk-yuk ning nirya ara, akunum arepnikcopura, sik Lewi yala nang aryuk doprobikirye, dinamnyake.

³⁰ Israel nang nirya arye, sik wa wibuka kouamikca ani, duk akunum moupliba, na si erena ap, ‘Telebeʼ nyana ap ati, nong linamak ning, yuk-yuk ning nirya, winiryuk ning, teleb weik ning ara, boyanuka arelyanganamnulume. Aning nirya ara, sik imam nang aryuk doprobikirye, dinamnyake. Atonun tonda, na arena ati arelyanganamak ning, yuk-yuk ning nirya ara, arepnikirye, tuba sirya bataknamak ning ara, sik imam nang aryuk doprobikirye, dinamnyake. Tonda, asum-asum nirya, Israel nang arye, roti kwaninguk dabuka dinamak talak ara, na arena ati, minop memepnamak ning ara, aning kan-kan arye bokuka, na arena ati, na si eren aik boyanganamniake. Aning babye, imam-imam nang, sik din atia. Aning lak nyapmasin touk, anggunce dipkoprob akunum winipmunyopura, narye sik Israel nang nirya ap, sik mapu silip ap, sik aik nirya ap, teleb kilinamsine.

³¹ Bukni, sik imam nang ati ara, mem ning ton lak nyapnusine. Ara, maka yuk-yuk ning nirya ap, yuk talye kam ulye ning, yuk-yuk ning nirya ap, el yuk talye dipmalye ning ara, sik imam nang arye pia kum dinamnyake. Atonun, bai tam talye kam ulamle yu ning nirya arye, kam ulamak ning oplopmalye ning ara, sik ton yala nang arye, yu ning yalirye oplopmalye ning ara, sik imam-imam nang arye, aning dobuka, pia kum dinamnyake.